The Samikhsya Odia
ଭୁବନେଶ୍ୱର: ଶ୍ରୀମନ୍ଦିର ରତ୍ନଭଣ୍ଡାର ଭିତରେ ସୁଡ଼ଙ୍ଗକୁ ନେଇ ଆଇନ ମନ୍ତ୍ରୀ ପୃଥ୍ବୀରାଜ ହରିଚନ୍ଦନ ବଡ଼ ବୟାନ ଦେଇଛନ୍ତି। ସୁଡ଼ଙ୍ଗ ଅଛି କି ନାହିଁ, ତାହା ସ୍ପଷ୍ଟ ହେବା ପାଇଁ ସର୍ଭେ ହେବ ବୋଲି ଆଇନ ମନ୍ତ୍ରୀ କହିଛନ୍ତି।
ସେ ଗଣମାଧ୍ୟମକୁ କହିଛନ୍ତି ଯେ, ରତ୍ନଭଣ୍ଡାର ସୁଡ଼ଙ୍ଗର ସର୍ଭେ ହେବ। ପ୍ରାଥମିକ ପ୍ରକ୍ରିୟାରେ ପ୍ରଥମେ ରତ୍ନଭଣ୍ଡାର ମରାମତି କରାଯିବ। ମରାମତି ପରେ ଗଣତି ମଣତି ପ୍ରକ୍ରିୟା ଆରମ୍ଭ କରାଯିବ। ୧୯୭୮ ମସିହା ଡାଟାବେସ ଅନୁଯାୟୀ ଅଳଙ୍କାରକୁ ମେଳ କରାଯିବ।
ଭୁବନେଶ୍ବର: ଆଜି ପୁଣି ଥରେ ରତ୍ନଭଣ୍ଡାର ଖୋଲାଯିବ। ଅପରାହ୍ନ ପ୍ରାୟ ଦୁଇଟା ବେଳକୁ ବାହର ରତ୍ନଭଣ୍ଡାର ଏବଂ ଭିତର ରତ୍ନଭଣ୍ଡାର ଖୋଲାଯିବ। ଏ ନେଇ ରାଜ୍ୟ ସରକାର ଅନୁମତି ପ୍ରଦାନ କରିଛନ୍ତି। ମୁଖ୍ୟତଃ ଭିତର ଓ ବାହାର ରତ୍ନଭଣ୍ଡାରରେ ଥିବା ଆଲମିରା ଓ ସିନ୍ଧୁକକୁ ସ୍ଥାନାନ୍ତରିତ କରାଯିବ। ଏହାପରେ ରତ୍ନଭଣ୍ଡାରର ସ୍ଥିତି ଏଏସଆଇର ଏକ ଟିମ ଯାଞ୍ଚ କରିବେ।
ଏହି ସ୍ଥାନାନ୍ତରିତ ପାଇଁ ଏକ 12 ଜଣିଆ ଟିମ ଗଠନ କରାଯାଇଛି। ଏଥିରେ ଶ୍ରୀମନ୍ଦିର ମୁଖ୍ୟ ପ୍ରଶାସକ ଅରବିନ୍ଦ ପାଢୀ, ଜିଲ୍ଲାପାଳ ସିଦ୍ଧାର୍ଥ ଶଙ୍କର ସ୍ବାଇଁ, ରତ୍ନଭଣ୍ଡାର ଯାଞ୍ଚ କମିଟ ଅଧ୍ୟକ୍ଷ ଜଷ୍ଟିସ ବିଶ୍ବନାଥ ରଥ ପ୍ରମୁଖ ରହିଛନ୍ତି। ସେମାନେ ଶ୍ରୀମନ୍ଦିର ପ୍ରବେଶ ପୂର୍ବରୁ ପୁରୀ ଏସପି ସମସ୍ତଙ୍କୁ ଯାଞ୍ଚ କରି ଭିତରକୁ ଛାଡିବେ।
ଆଇନ ବିଭାଗ ଚିଠି ଅନୁସାରେ ବାହାର ଓ ଭିତର ରତ୍ନଭଣ୍ଜାରରେ ଥିବା କାଠ ଓ ଲୁହା ଆଲମିରା ସିନ୍ଧୁକ ବାହାର କରାଯିବ। ସେଗୁଡିକ ଶ୍ରୀମନ୍ଦିର ଭିତରେ ଥିବା ନୀଳାଦ୍ରୀବିହାର ମ୍ୟୁଜିୟମ ନିକଟସ୍ଥ ଘରେ ରଖାଯିବ। ସେଥିପାଇଁ ଏହି ସମୟରେ ସାଧାରଣ ଦର୍ଶନକୁ ବନ୍ଦ କରାଯାଇଛି। ତେବେ ଶ୍ରୀମନ୍ଦିରର ନୀତିକାନ୍ତି ଯଥାରୀତିରେ ଚାଲିବ। ଏପରିକି ଭକ୍ତମାନେ ମହାପ୍ରଭୃଙ୍କ ଅଭଢା ମଧ୍ୟ ପାଇପାରିବେ ବୋଲି ଚିଠିରେ ଉଲ୍ଲେଖ କରାଯାଇଛି।
ପୂର୍ବରୁ କମିଟ ଭିତର ରତ୍ନ ଭଣ୍ଡାରକୁ ପ୍ରବେଶ କରିବା ପରେ ସେଠାରୁ ସମସ୍ତଙ୍କ ଅଳଙ୍କାର ସ୍ଥାନାନ୍ତରିତ କରାଯାଇଛି। ଏଗୁଡିକ ତିନୋଟି କାଠ ଅଲମିରା, ଗୋଟିଏ ଷ୍ଟିଲ ଆଲମିରା, ଗୋଟିଏ ଲୁହା ଆଲମିରା ଏବଂ ଦୁଇଟି କାଠ ସିନ୍ଧୁକରେ ଥିଲା। ଏହିଗୁଡିକ ଆଜି ସ୍ଥାନାନ୍ତରିତ କରାଯାଇ ରତ୍ନଭଣ୍ଡାରର ସ୍ଥିତି ଯାଞ୍ଚ କରାଯିବ।
ଭୁବନେଶ୍ବର: ଆଜି ପୁଣି ଥରେ ଖୋଲାଯିବ ଭିତର ରତ୍ନ ଭଣ୍ଡାର। ଆଜି ସକାଳ ୯ ଟା ୫୨ ରୁ ୧୨ଟା ୧୫ ପର୍ଯ୍ୟନ୍ତ ଶୁଭ ବେଳା ରହିଛି। ଏହି ଭିତରେ ପୂର୍ବ କମିଟ ସଦସ୍ୟ ଶ୍ରୀମନ୍ଦିର ଭିତରକୁ ଯାଇ ରତ୍ନ ଭଣ୍ଡାରର ଜିନିଷ ସ୍ଥାନାନ୍ତରିତ କରିବେ। ଯେଉଁ କମିଟ ସଦସ୍ୟମାନେ ରତ୍ନଭଣ୍ଡାର ତଦାରଖ କରିବା ପାଇଁ ଯିବେ ସେମାନେ କୌଣସି ସୁନା କିମ୍ବା ଧାତୁ ଜିନିଷ ପିନ୍ଧି ଯାଇପାରିବେ ନାହିଁ ବୋଲି ଶ୍ରୀମନ୍ଦିର ପ୍ରଶାସନ ତରଫରୁ ନିର୍ଦ୍ଦେଶ ଦିଆଯାଇଛି।
ପୂର୍ବରୁ ଯେଉଁ କମିଟ ରତ୍ନ ଭଣ୍ଡାରକୁ ଯାଇଥିଲେ ସେମାନେ ହିଁ ଆଜି ଭିତର ରତ୍ନ ଭଣ୍ଡାରକୁ ଯିବେ। ସେମାନେ, ଭିତର ରତ୍ନ ଭଣ୍ଡାରରେ ଥିବା ସିନ୍ଧୁକ ଏବଂ ଆଲମିରାରେ ଥିବା ସମସ୍ତ ଅଳଙ୍କାରଗୁଡିକୁ ଅସ୍ଥାୟୀ ସ୍ଥାନରେ ରଖାଯିବ।ଏହି ସମୟରେ ପ୍ରକୃତରେ ଭିତରେ କଣ ଜିନିଷ ରହିଛି ତାହାର ରହସ୍ୟ ଆଜି ଜଣାପଡିବ।
ପୁରୀ: ରତ୍ନ ଭଣ୍ଡାର ଖୋଲିବା ପରେ ଘଟିଲା ଏକ ଅଘଟଣ। ତାହା ହେଲା ଯେ, ରତ୍ନ ଭଣ୍ଡାର ଖୋଲିବା ପରେ ସେଠାରେ ଅସୁସ୍ଥ ହୋଇପଡିଲେ ପୁରୀ ଏସପି ପିନାକ ମିଶ୍ର। ସେ ଶ୍ବାସ ପ୍ରଶ୍ବା, ନେବାରେ କଷ୍ଟ ଅନୁଭବ କଲେ। ଫଳରେ ସେ ସେଠାରେ ବସି ପଡିଥିଲେ। ଏହାପରେ ସେଠାରେ ଉପସ୍ଥିତ ଥିବା ଡାକ୍ତର ସି ବି କେ ମହାନ୍ତି ତାଙ୍କର ଚିକିତ୍ସା କରିଥିବାର ସୂଚନା ମିଳିଛି।
ତେବେ ଏସପି ପିନାକ ମିଶ୍ର ବାହାରକୁ ଆସି ଏହି ଖବରକୁ ଖଣ୍ଡନ କରିଛନ୍ତି। ସେ କହିଛନ୍ତି ଯେ, ସେମିତି କିଛି ଘଟି ନାହିଁ। ମୁଁ ଆପଣମାନଙ୍କ ସମ୍ମୁଖରେ ଛିଡା ହୋଇଛି। ଯାହା କୁହାଯାଉଛି ତାହା ମିଛ କଥା ବୋଲି ଖୋଦ ପିନାକ ମିଶ୍ର କହିଛନ୍ତି। ତେବେ ସେ ସାମାନ୍ୟ ଅସୁସ୍ଥ ହୋଇପଡିବା ପରେ ଠିକ ହୋଇଥିବାର ଅନୁମାନ କରାଯାଉଛି।
ପୁରୀ: ଦୀର୍ଘ ୪୬ ବର୍ଷର ଅନ୍ତ ଘଟିଛି। ବହୁ ରାଜନୈତିକ ବିତର୍କ ଭିତରେ ମହାପ୍ରଭୁ ଶ୍ରୀଜଗନ୍ନାଥଙ୍କ ରତ୍ନଭଣ୍ଡାର ଆଜି ଖୋଲାଯାଇଛି। ଏନେଇ ସିଏମଓ ପକ୍ଷରୁ ସୂଚନା ଦିଆଯାଇଛି।
ସିଏମଓ ପକ୍ଷରୁ ଟ୍ବିଟ କରି କୁହାଯାଇଛି ଯେ, ”ହେ ମହାପ୍ରଭୁ! ତୁମେ ଲୀଳାମୟ। ତୁମ ଇଚ୍ଛାରେ ଏ ସାରା ସଂସାର ଆତଯାତ ହେଉଛି। ତୁମେ ଓଡ଼ିଆ ଜାତିର ହୃତ୍ ସ୍ପନ୍ଦନ। ଓଡ଼ିଆ ଜାତିର ଅସ୍ମିତା ଓ ସ୍ବାଭିମାନର ଶ୍ରେଷ୍ଠ ପରିଚୟ। ତୁମ ଇଚ୍ଛାରେ ଓଡ଼ିଆ ଜାତି ଆଜି ତାର ଅସ୍ମିତାର ପରିଚୟକୁ ନେଇ ଆଗକୁ ବଢ଼ିବାକୁ ଉଦ୍ୟମ ଆରମ୍ଭ କରିଛି।
ତୁମ ଇଚ୍ଛାରେ ପ୍ରଥମେ ଶ୍ରୀମନ୍ଦିରର ଚାରି ଦ୍ଵାର ଖୋଲିଲା। ତୁମ ଇଚ୍ଛାରେ ୪୬ ବର୍ଷ ପରେ ଆଜି ଏକ ମହତ୍ ଉଦ୍ଦେଶ୍ୟ ନେଇ ରତ୍ନ ଭଣ୍ଡାର ଖୋଲାଗଲା। ଏ ମହାନ୍ କାର୍ଯ୍ୟ ସଫଳ ହେବ ବୋଲି ମୋର ଦୃଢ଼ ବିଶ୍ୱାସ। ତୁମ ଆଶୀର୍ବାଦରେ ପ୍ରତ୍ୟେକ ଓଡ଼ିଆ ଜାତି, ଗୋଷ୍ଠୀ, ବର୍ଣ୍ଣ ଓ ସର୍ବୋପରି ରାଜନୀତିର ଭେଦକୁ ଭୁଲି ଆଧ୍ୟାତ୍ମିକ ଓ ଭୌତିକ ଜଗତରେ ଓଡ଼ିଶାର ଏକ ନୂଆ ପରିଚୟ ସୃଷ୍ଟି କରିବାକୁ ଅଗ୍ରସର ହେଉ, ଏତିକି ପ୍ରାର୍ଥନା।”
ପୁରୀ: ଆଜି ଖୋଲାଯିବ ରତ୍ନ ଭଣ୍ଡାର। ଏହାକୁ ନେଇ ଚାରିଆଡେ ଚାଲିଛି ଚର୍ଚ୍ଚା। ବର୍ତ୍ତମାନ ରତ୍ନ ଭଣ୍ଡାର ଖୋଲିବା ପାଇଁ ୧୧ଜଣିଆ କମିଟ ମନ୍ଦିର ଭିତରକୁ ପ୍ରବେଶ କରିଛନ୍ତି। ସେମାନେ ସମସ୍ତ ପ୍ରସ୍ତୁତି ଦେଖିବା ପରେ ଠିକ ଦିନ ୧ ଟା ୨୮ ମିନଟ ପରେ ଏହା ଖେଲିଯିବ। ଯଦି ଚାବିରେ ନ ଖୋଲେ ତେବେ ସେହି ତାଲା ଖୋଲା ଯିବ ବୋଲି ନିଷ୍ପତି କରାଯାଇଛି।
ରତ୍ନଭଣ୍ଡାର ଖୋଲିଯିବା ପରେ ସେଠାରେ ଥିବା ଜିନିଷଗୁଡିକ ବାହାରକୁ ବାହାର କରାଯିବ। ସେଗୁଡିକ ମନ୍ଦିର ଗୋଟିଏ ସ୍ଥାନରେ ରଖାଯିବ। ସେଥିପାଇଁ ମନ୍ଦିର ପ୍ରଶାସନ ତରଫରୁ ୬ ଟି ସିନ୍ଧୁକ ନିର୍ମାଣ କରାଯାଇଛି। ଶାଗୁଆନ କାଠରେ ଭୁବନେଶ୍ବର ନୟାପଲ୍ଲୀର ଏକ କାରୀଗର ତିଆରି କରିଛନ୍ତି। ଏହାର ଉପରେ ପିତ୍ତଳ ପାତିଆ ଦିଆଯାଇଛି। ଏ ଗୁଡିକ ଭୁବନେଶ୍ବରରୁ ଟ୍ରକରେ ଆସିବା ପରେ ଶ୍ରୀମନ୍ଦିର ଭିତରକୁ ନିଆଯାଇଥିବାର ଜଣାପଡିଛି।
ପୁରୀ: ବହୁ ପ୍ରତୀକ୍ଷିତ ଶ୍ରୀମନ୍ଦିର ରତ୍ନ ଭଣ୍ଡାର ଖୋଲା ହେବା ପୂର୍ବରୁ ଆରମ୍ଭ ହୋଇଛି ବିବାଦ। ଶ୍ରୀଲୋକନାଥଙ୍କ ଆଜ୍ଞାମାଳ ଶ୍ରୀମନ୍ଦିର ଭିତରକୁ ନେବା ନେଇ ପ୍ରଶ୍ନ ଉଠାଇଛନ୍ତି ସେବକ। ସେମାନଙ୍କର କହିବା କଥା ଯେ, ଶ୍ରୀମନ୍ଦିରରୁ ଜଗନ୍ନାଥଙ୍କ ଆଜ୍ଞାମାଳ ଚାରିଆଡେ ଯାଏ। ହେଲେ ଶ୍ରୀମନ୍ଦିର ଭିତରକୁ ଅନ୍ୟ ମନ୍ଦିରର ଆଜ୍ଞାମାଳ କିପରି ଅଣାଗଲା ବୋଲି ପ୍ରଶ୍ନ ଉଠିଛି।
କେତେକ ସେବାୟତଙ୍କ ଅଭିଯୋଗ ଯେ, ଶ୍ରୀମନ୍ଦିର ଭିତରେ ଥିବା ରତ୍ନ ଭଣ୍ଡାର ସମ୍ମୁଖରେ ଶ୍ରୀଲୋକନାଥ ଅଛନ୍ତି। ସେ ଭଣ୍ଡାରଘରର ଦାୟିତ୍ବରେ ରହିଛନ୍ତି। ତାଙ୍କ ପାଖରେ ପୂଜାପାଠ କରି ତାଙ୍କର ଅନୁମତି ନେବାର ଆବଶ୍ୟକ ରହିଛି। ହେଲେ କଣ ପାଇଁ ବାହାର ମନ୍ଦିରରୁ ଆଜ୍ଞାମାଳ ଆସିଲା ସେ ନେଇ ସେମାନେ ପ୍ରଶ୍ନ କରିଛନ୍ତି।
ସେହିପରି ସେମାନେ ଅଭିଯୋଗ କରିଛନ୍ତି ଯେ, ଭଣ୍ଡାର ଘରର ମାଲିକ ହେଉଛନ୍ତି ଶ୍ରୀ ଜଗନ୍ନାଥ। ସେ ଯେତେବେଳେ ଘରେ ନାହାଁନ୍ତି, ତାଙ୍କ ଅନୁପସ୍ଥିତରେ ତାଙ୍କ ଭଣ୍ଡାରଘର ଖୋଲିବାକୁ ଏମାନେ କିଏ ବୋଲି ପ୍ରଶ୍ନ କରିଛନ୍ତି। ଘରର ମାଲିକ ନ ଥିବା ବେଳେ କାହିଁକି ଭଣ୍ଡାରଘର ଖୋଲାଯାଉଛି ସେମାନେ କହିଛନ୍ତି।
ପୁରୀ: ଆଜି ଖୋଲାଯିବ ମହାପ୍ରଭୃଙ୍କ ରତ୍ନ ଭଣ୍ଡାର। ସେଥିପାଇଁ ସମସ୍ତ ପ୍ରସ୍ତୁତି ଆରମ୍ଭ ହୋଇଯାଇଛି। ଏ ନେଇ ଆଜି ସକାଳେ ଜଷ୍ଟିସ ବିଶ୍ବନାଥ ରଥଙ୍କ ଅଧ୍ୟକ୍ଷତାରେ ରତ୍ନ ଭଣ୍ଡାର ତଦାରଖ କମିଟ ବୈଠକ ବସିଯାଇଛି। ଏଥିରେ ଆଜି ଦିନ ୧ ଟା ୨୮ ମିନଟ ପରେ ରତ୍ନ ଭଣ୍ଡାର ଖୋଲାଯିବ ବୋଲି ନିଷ୍ପତି କରାଯାଇଛି।
ତେବେ ତା ପୂର୍ବରୁ ମନ୍ଦିର ଭିତରେ ରତ୍ନ ଭଣ୍ଡାର ନିକଟରେ ପ୍ରସ୍ତୁତି ଆରମ୍ଭ ହୋଇଯାଇଛି। ସେହି ଅନୁସାରେ ମନ୍ଦିର ଭିତରକୁ ଓଡ୍ରାଫ ଟିମ ଏବଂ ସାପ ଧରାଳି ପ୍ରବେଶ କରିଛନ୍ତି। ସେହିପରି ତାଲା ନିର୍ମାଣକାରୀଙ୍କୁ ମଧ୍ୟ ସେଠାରେ ନିୟୋଜିତ କରାଯାଇଛି। ଓଡ୍ରାଫ ଟିମ ହାଇମାକ୍ସ ଲାଇଟ୍ ସହିତ ବିଭିନ୍ନ ଯନ୍ତ୍ରପାତି ଏବଂ କ୍ୟାମେରା ଧରି ମନ୍ଦିର ଭିତରକୁ ପ୍ରବେଶ କରିଛନ୍ତି। ସେଠାରେ ସେମାନେ ପ୍ରସ୍ତୁତି ଆରମ୍ଭ କରିଛନ୍ତି।
ଶ୍ରୀମନ୍ଦିର ପ୍ରଶାସନ ଅନୁସାରେ ଏହି ରତ୍ନ ଭଣ୍ଡାର ଖୋଲିବା ପାଇଁ ୧୧ ଜଣ ନିୟୋଜିତ ରହିବେ। ସେଥିମଧ୍ୟରେ ତଦାରଖ କମିଟରୁ ଦୁଇ ଜଣ ଯିବେ। ସେମାନେ ହେଲେ ଖୋଦ ତଦାରଖ କମିଟର ଅଧକ୍ଷ ଜଷ୍ଟିସ ବିଶ୍ବନାଥ ରଥ ଏବଂ ଡାକ୍ତର ସି ବି କେ ମହାନ୍ତି। ସେହିପରି ଖୋଦ ଶ୍ରୀମନ୍ଦିର ମୁଖ୍ୟ ପ୍ରଶାସକ ଡ ଅରବିନ୍ଦ ପାଢୀ, ଜିଲ୍ଲାପାଳ, ଏଏସଆଇର ସୁପରିଟେଣ୍ଡଣ୍ଟ, ଭଣ୍ଡାର ମେକପ ସେବାୟତ ସହିତ ଭଣ୍ଡାର ସଂପର୍କିତ କେତେକ ସେବାୟତ ରହିବେ।
ତେବେ ନିଷ୍ପତି ଅନୁସାରେ ଜିଲ୍ଲାପାଳ ଭଣ୍ଡାରଘର ଚାବି ଏହି କମିଟକୁ ହସ୍ତାନ୍ତର କରିବେ। ନିର୍ଦ୍ଧାରିତ ଶୁଭ ବେଳା ୧ ଟା ୨୮ ପରେ ସେହି ଚାବିରେ ଭଣ୍ଡାରଘର ଖୋଲାଯିବ। ସେଥିରେ ତାଲା ଖୋଲିଲେ କମିଟ ସଦସ୍ୟ ଭିତରକୁ ଯିବେ। ଯଦି ତାଲା ନ ଖୋଲେ ତେବେ ସେହି ତାଲା ଭାଙ୍ଗିବା ପାଇଁ ମୁଖ୍ୟ ପ୍ରଶାସକ ନିର୍ଦ୍ଦେଶ ଦେବେ। ସେହି ଅନୁସାରେ ସେଠାରେ ଉପସ୍ଥିତ ଥିବା ତାଲା ନିର୍ମାଣକାରୀ ତାଲା ଭାଙ୍ଗିବେ।
ପ୍ରାରମ୍ଭିକ ପର୍ଯ୍ୟାୟରେ ସେଠାରେ ଥିବା ସମସ୍ତ ଜିନିଷକୁ ବାହାରକୁ ବାହାର କରାଯିବ। ସେସବୁକୁ ମନ୍ଦିର ଭିତରେ ଗୋଟିଏ ସ୍ଥାନରେ ରଖାଯିବ। ସେଥିପାଇଁ ଶ୍ରୀମନ୍ଦିର ପ୍ରଶାସକଙ୍କ ତରଫରୁ ଛଅଟି କାଠର ସିନ୍ଧୁକ ନିର୍ମାଣ କରାଯାଇଛି। ସେଗୁଡିକ ମନ୍ଦିର ଭିତରକୁ ପ୍ରବେଶ କରାଯାଇଛି। ସେହି କାଠର ସିନ୍ଧୁକରେ ସମସ୍ତ ଜିନିଷ କଡା ସୁରକ୍ଷା ମଧ୍ୟରେ ରଖାଯିବ।
ଏହା ପୂର୍ବରୁ ଆଜି ସକାଳେ ଶ୍ରୀଲୋକନାଥଙ୍କଠାରୁ ଆଜ୍ଞାମାଳ ଆସିଛି। ପୁରାଣ ଅନୁସାରେ ଶ୍ରୀଲୋକନାଥ ଭଣ୍ଡାର ଘରର ଦାୟିତ୍ବରେ ରହିଛନ୍ତି। ସେବାୟତମାନେ ଶ୍ରୀଲୋକନାଥଙ୍କ ନିକଟକୁ ଯାଇ ସେଠାରୁ ଆଜ୍ଞାମାଳ ଅଣାଯାଇ ଭଣ୍ଡାର ଘର ସମ୍ମୁଖରେ ପୂଜାପାଠ କରାଯାଇଛି। ମନ୍ଦିର ଭିତରେ ଥିବା ଭଣ୍ଡାର ଘର ସମ୍ମୁଖରେ ମଧ୍ୟ ଶ୍ରୀଲୋକନାଥ ମନ୍ଦିର ରହିଛି। ସେଠାରେ ଏହି ପୂଜାପାଠ କରାଯାଇଛି।
ଭୁବନେଶ୍ୱର: ମହାପ୍ରଭୁ ଶ୍ରୀଜଗନ୍ନାଥଙ୍କ ରତ୍ନଭଣ୍ଡାର ଖୋଲିବାକୁ ନେଇ ରାଜ୍ୟରେ ଚର୍ଚ୍ଚା ଲାଗି ରହିଛି। ପୂର୍ବ ସରକାର ସମୟରେ ଶ୍ରୀଜଗନ୍ନାଥଙ୍କ ରତ୍ନଭଣ୍ଡାର ଖୋଲିବା ପାଇଁ ଅନେକ ଦାବି ହୋଇଥିଲେ ମଧ୍ୟ ତାହା ସମ୍ଭବ ହୋଇପାରିନଥିଲା। କିନ୍ତୁ କ୍ଷମତାକୁ ଆସିଲେ ରତ୍ନଭଣ୍ଡାର ଖୁବ ଶୀଘ୍ର ଖୋଲାଯାଇ ଗଣତି କରାଯିବ ବୋଲି ବିଜେପି ପକ୍ଷରୁ ପ୍ରତିଶ୍ରୁତି ଦିଆଯାଇଥିଲା। ଏବେ ବିଜେପି ସରକାର ଗଠନ କରିସାରିଥିବା ବେଳେ ଏହାକୁ ନେଇ ଲୋକଙ୍କ ମଧ୍ୟରେ ଉତ୍ସାହ ବଢିଛି।
ଯଦିବା ଏଏସଆଇ ର ଜଣେ ଅଧିକାରୀ ଜୁଲାଇ ୮ରେ ରତ୍ନଭଣ୍ଡାର ଖୋଲିବା ପାଇଁ ନିଷ୍ପତ୍ତି ହୋଇଥିବା ଘୋଷଣା କରିଥିଲେ। କିନ୍ତୁ ଏହାକୁ ଆଇନ ମନ୍ତ୍ରୀ ପୃଥ୍ଵୀରାଜ ହରିଚନ୍ଦନ ଖଣ୍ଡନ କରିବା ସହ ଅଧିକାରୀଙ୍କ ବିରୋଧରେ କାର୍ଯ୍ୟାନୁଷ୍ଠାନ ଗ୍ରହଣ କରାଯିବ ବୋଲି କହିଥିଲେ।
ତେବେ ଆଜି ଆଇନ ମନ୍ତ୍ରୀ ପୃଥ୍ଵୀରାଜ ହରିଚନ୍ଦନ ଏହା ଉପରେ ପରଦା ଉଠାଇଛନ୍ତି। ରତ୍ନଭଣ୍ଡାର ଖୋଲାଯିବା ନେଇ ନିଷ୍ପତ୍ତି ସରିଥିବା ବେଳେ ମୋଡାଲିଟି ପ୍ରସ୍ତୁତ କରାଯିବା ସହ ଦିନେ ଦୁଇ ଦିନ ମଧ୍ୟରେ ତାରିଖ ଘୋଷଣା ହେବ ବୋଲି ମନ୍ତ୍ରୀ ପୃଥ୍ବୀରାଜ ହରିଚନ୍ଦନ ସୂଚନା ଦେଇଛନ୍ତି। ଏନେଇ ସରକାରଙ୍କ ପକ୍ଷରୁ ବିଜ୍ଞପ୍ତି ମଧ୍ୟ ପ୍ରକାଶ କରାଯିବ ବୋଲି ଆଇନ ମନ୍ତ୍ରୀ କହିଛନ୍ତି। ଏତଦବ୍ୟତୀତ ଗଣମାଧ୍ୟମ ଓ ସାମାଜିକ ଗଣମାଧ୍ୟମରେ ରତ୍ନଭଣ୍ଡାର ଖୋଲିବା ନେଇ ଯେଉଁ ତାରିଖ କୁହାଯାଉଛି ଏହା ଏକ ଗୁଜବ, ଏହି ଗୁଜବକୁ ଲୋକେ ବିଶ୍ବାସ ନକରନ୍ତୁ ବୋଲି ଆଇନମନ୍ତ୍ରୀ ପୃଥ୍ବୀରାଜ ହରିଚନ୍ଦନ ନିବେଦନ କରିଛନ୍ତିା
ନୂଆଦିଲ୍ଲୀ: ରତ୍ନ ଭଣ୍ଡାର ପ୍ରସଂଗରେ ପ୍ରଧାନମନ୍ତ୍ରୀଙ୍କ ବିବୃତିକୁ ଦୃଢ ନିନ୍ଦା କରିଛନ୍ତି ତାମିଲନାଡୁ ମୁଖ୍ୟମନ୍ତ୍ରୀ ଏମ କେ ଷ୍ଟାଲିନ। ସେ କହିଛନ୍ତି ପ୍ରଧାନମନ୍ତ୍ରୀ କଣ ପାଇଁ ଚୋରୀ ହୋଇଥିବା ରତ୍ନ ଭଣ୍ଡାରର ଚାବି ତାମିଲନାଡୁରେ ଅଛି ବୋଲି କହିଲେ। ତାହା ହେଲେ ତାମିଲନାଡୁ ଲୋକେ କଣ ଚୋର ବୋଲି ପ୍ରଶ୍ନ କରିଛନ୍ତି ମୁଖ୍ୟମନ୍ତ୍ରୀ ଶ୍ରୀ ଷ୍ଟାଲିନ। ଦୟାକରି ପ୍ରଧାନମନ୍ତ୍ରୀ ତାମିଲ ବିରୋଧୀ ମନ୍ତବ୍ୟରୁ ଦୂରେଇ ରୁହନ୍ତୁ ବୋଲି ମୁଖ୍ୟମନ୍ତ୍ରୀ ଶ୍ରୀ ଷ୍ଟାଲିନ କହିଛନ୍ତି।
ସେ କହିଛନ୍ତି ଯେ, ପ୍ରଧାନମନ୍ତ୍ରୀ ଓଡିଶାର ଏକ ନିର୍ବାଚନ ସଭାରେ କହିଛନ୍ତି ଯେ, ଚୋରୀ ହୋଇଥିବା ପ୍ରଭୃ ଜଗନ୍ନାଥଙ୍କ ରତ୍ନ ଭଣ୍ଡାର ଚାବି ତାମିଲନାଡୁରେ ଅଛି। ଏହାର ଅର୍ଥ ସେ କୋଟିକୋଟି ଜଗନ୍ନାଥ ପ୍ରେମୀଙ୍କ ସହିତ ତାମିଲନାଡୁ ଲୋକଙ୍କୁ ଆଘାତ କରିଛନ୍ତି। ଜଣେ ପ୍ରଧାନମନ୍ତ୍ରୀ ଭାବେ ଏପରି କହିବା ଠିକ ନୁହେଁ ବୋଲି ଷ୍ଟାଲିନ କହିଛନ୍ତି। ବିଜେପି କର୍ମିଙ୍କୁ ଉତ୍ସାହିତ କରିବା ପାଇଁ ତାମିଲନାଡୁ ଲୋକଙ୍କୁ ଅପମାନିତ କରିବା ଠିକ ନୁହେଁ।
ପ୍ରଧାନମନ୍ତ୍ରୀ କାହିଁକି ତାମିଲଙ୍କ ପ୍ରତି ଏତେ ଘୃଣାଭାବ ପୋଷଣ କରୁଛନ୍ତି ବୋଲି ପ୍ରଶ୍ନ କରିଛନ୍ତି ଶ୍ରୀ ଷ୍ଟାଲିନ। ସେ କହିଛନ୍ତି ଯେ ତାମିଲନାଡୁ ଗସ୍ତ ସମୟରେ ତାମିଲ ଭାଷା ଏବଂ ତାମିଲଙ୍କ ବୁଦ୍ଧି ବିଷୟରେ ଶ୍ରୀ ମୋଦୀ ଉଚ୍ଚକୋଟୀର ପ୍ରଶଂସା କରୁଛନ୍ତି। ହେଲେ ବାହାର ରାଜ୍ୟରେ କିନ୍ତୁ ତାମିଲଙ୍କୁ ଚୋର ଭାବରେ ଚିତ୍ରଣ କରୁଛନ୍ତି। ସେ ରାଜସ୍ଥାନ, ମଧ୍ୟପ୍ରଦେଶ, ଉତ୍ତରପ୍ରଦେଶ ଏବଂ ଓଡିଶାରେ ଏପରି ତାମିଲ ବିରୋଧୀ ଭାଷଣ ଦେଉଛନ୍ତି। ପ୍ରଧାନମନ୍ତ୍ରୀ ଦୟାକରି ଏପରି ଡବଲ ଷ୍ଟାଣ୍ଡାର୍ଡ ଗୁଣ ପରିତ୍ୟାଗ କରନ୍ତୁ ବୋଲି ଶ୍ରୀ ଷ୍ଟାଲିନ କହିଛନ୍ତି।
ଭୁବନେଶ୍ବର: ଓଡିଶା ହାଇକୋର୍ଟଙ୍କ ଶ୍ରୀ ଜଗନ୍ନାଥ ମନ୍ଦିର ରତ୍ନଭଣ୍ଡାର ସମ୍ପର୍କିତ ନିର୍ଦ୍ଦେଶ ଅନୁଯାୟୀ, ମୁଖ୍ୟମନ୍ତ୍ରୀ ଶ୍ରୀ ନବୀନ ପଟ୍ଟନାୟକ, ସୁପ୍ରିମ କୋର୍ଟର ପୂର୍ବତନ ବିଚାରପତି ଜଷ୍ଟିସ ଅରିଜିତ୍ ପଶାୟତଙ୍କ ଅଧ୍ୟକ୍ଷତାରେ ଏକ ଉଚ୍ଚସ୍ତରୀୟ କମିଟି ଗଠନ କରିଛନ୍ତି। ଏହି କମିଟି ରତ୍ନ ଭଣ୍ଡାରରେ ଥିବା ମହାପ୍ରଭୁଙ୍କ ଅଳଙ୍କାର ଏବଂ ବିଭିନ୍ନ ମୂଲ୍ୟବାନ ବସ୍ତୁର ତାଲିକା ପ୍ରସ୍ତୁତି କାର୍ଯ୍ୟ ତଦାରଖ କରିବେ। ଏହି କମିଟିରେ ଅଧ୍ୟକ୍ଷଙ୍କ ସହିତ ୧୨ ଜଣ ସଦସ୍ୟ ଅଛନ୍ତି।
ଏହି କମିଟିରେ ଥିବା ଅନ୍ୟ ସଦସ୍ୟମାନେ ହେଲେ-
– ପ୍ରସିଦ୍ଧ ହୃଦରୋଗ ବିଶେଷଜ୍ଞ ଡ. ରମାକାନ୍ତ ପଣ୍ଡା, ଉପାଧ୍ୟକ୍ଷ
– ଡ. ବିଧୁଭୁଷଣ ସାମଲ, ଆଲ୍ଲାହାବାଦ ବ୍ୟାଙ୍କର ପୂର୍ବତନ CMD
– ଶ୍ରୀ ଏ.କେ. ସାବତ, ଚାର୍ଟାର୍ଡ ଆକାଉଣ୍ଟାଣ୍ଟ,
– ପୁରୀ ଗଜପତି ମହାରାଜା ତଥା ଶ୍ରୀଜଗନ୍ନାଥ ମନ୍ଦିର ପରିଚାଳନା କମିଟିର ଅଧ୍ୟକ୍ଷ ଶ୍ରୀ ଦିବ୍ୟସିଂହ ଦେବ ଙ୍କ ପ୍ରତିନିଧି
– ଭାରତୀୟ ପ୍ରତ୍ନତତ୍ତ୍ୱ ସର୍ବେକ୍ଷଣ ସଂସ୍ଥାର ପ୍ରତିନିଧି
– ଶ୍ରୀ ଦୁର୍ଗାପ୍ରସାଦ ଦାସ ମହାପାତ୍ର, ସେବକ ପ୍ରତିନିଧି
– ଶ୍ରୀ ମାଧବ ଚନ୍ଦ୍ର ମହାପାତ୍ର, ସେବକ ପ୍ରତିନିଧି
– ଶ୍ରୀ ଜଗନ୍ନାଥ କର , ସେବକ ପ୍ରତିନିଧି
– ଶ୍ରୀ ଗଣେଶ ମେକାପ, ଭଣ୍ଡାର ମେକାପ ସେବକ
ଏବଂ
– ପୁରୀ ଜିଲ୍ଲାପାଳ ତଥା ଶ୍ରୀ ଜଗନ୍ନାଥ ମନ୍ଦିର ର ଉପମୁଖ୍ୟ ପ୍ରଶାସକ.
– ଶ୍ରୀ ଜଗନ୍ନାଥ ମନ୍ଦିର ପ୍ରଶାସନର ମୁଖ୍ୟ ପ୍ରଶାସକ- ସଦସ୍ୟ ଆବାହକ ଭାବରେ କାର୍ଯ୍ୟ କରିବେ
ଭୁବନେଶ୍ୱର: ରତ୍ନଭଣ୍ଡାର ଖୋଲାଯିବା ପ୍ରସଙ୍ଗରେ ଆଜି ବିଜେପି ନେତା ଶ୍ରୀ ସମୀର ମହାନ୍ତିଙ୍କ ନେତୃତ୍ୱରେ ରାଜ୍ୟ ବିଜେପିର ଏକ ଉଚ୍ଚସ୍ତରୀୟ ପ୍ରତିନିଧିମଣ୍ଡଳୀ ଶ୍ରୀମନ୍ଦିର ପରିଚାଳନା କମିଟିର ଅଧ୍ୟକ୍ଷ ଗଜପତି ମହାରାଜଙ୍କୁ ଭେଟି ବିସ୍ତୃତ ଭାବେ ଆଲୋଚନା କରିଛନ୍ତି।
ଆଲୋଚନା ପ୍ରସଙ୍ଗରେ ସୂଚନା ଦେଇ ଶ୍ରୀ ମହାନ୍ତି କହିଛନ୍ତି ଯେ, ଶ୍ରୀମନ୍ଦିର ରତ୍ନଭଣ୍ଡାର ଖୋଲିବା ପ୍ରସଙ୍ଗରେ ଗଜପତି ମହାରାଜଙ୍କ ସହ ବିସ୍ତୃତ ଆଲୋଚନା କରାଗଲା। ଶ୍ରୀମନ୍ଦିର ପରିଚାଳନା କମିଟିର ଅଧ୍ୟକ୍ଷ ଭାବେ ଗଜପତି ମହାରାଜଙ୍କଠାରୁ ରତ୍ନଭଣ୍ଡାର ଖୋଲାଯିବା ଏବଂ ସୁରକ୍ଷା ପ୍ରସଙ୍ଗରେ ବହୁ ଆଶା ରଖିଛନ୍ତି ଅଗଣିତ ଜଗନ୍ନାଥପ୍ରେମୀ।
ହାଇକୋର୍ଟଙ୍କ ନିର୍ଦ୍ଦେଶାନୁଯାୟୀ ଏକ କମିଟି ଗଠନ କରାଯାଇ ତୁରନ୍ତ ରତ୍ନଭଣ୍ଡାର ଖୋଲିବା ପ୍ରସଙ୍ଗରେ ହସ୍ତକ୍ଷେପ କରିବାକୁ ନିବେଦନ କରିଥିଲୁ। ରିଜଲ୍ୟୁସନ ମାଧ୍ୟମରେ ଗଜପତି ମହାରାଜ ରାଜ୍ୟ ସରକାରଙ୍କୁ ଜଣାଇଛନ୍ତି ଏବଂ ସେ ନିଜେ ବହୁ ଆଶାବାଦୀ ଅଛନ୍ତି ବୋଲି ଗଜପତି ମହାରାଜ ପ୍ରତିନିଧିମଣ୍ଡଳୀଙ୍କୁ କହିଛନ୍ତି। ବର୍ତମାନ ରତ୍ନଭଣ୍ଡାର ଖୋଲିବାର ସଂପୂର୍ଣ୍ଣ ଦାୟୀତ୍ୱ ହେଉଛି ରାଜ୍ୟ ସରକାରଙ୍କର ଏବଂ କମିଟି ଗଠନ କରି ତୁରନ୍ତ ରତ୍ନଭଣ୍ଡାର ଖୋଲାଯାଉ ବୋଲି ଶ୍ରୀ ମହାନ୍ତି କହିଛନ୍ତି।
୨ ମାସ ଭିତରେ କମିଟି ଗଠନ କରିବା ପାଇଁ ହାଇକୋର୍ଟ ନିର୍ଦ୍ଦେଶ ଦେଇଥିବା ବେଳେ ବର୍ତମାନ ୩ ମାସ ପୁରିବାକୁ ବସିଲାଣି, କିନ୍ତୁ ବର୍ତମାନ ସୁଦ୍ଧା କମିଟି ଗଠନ କରାଗଲା ନାହିଁ। ହାଇକୋର୍ଟଙ୍କ ନିର୍ଦ୍ଦେଶ ସତ୍ୱେ ଯଦି ରାଜ୍ୟ ସରକାର ତୁରନ୍ତ କମିଟି ଗଠନ ନ କରନ୍ତି, ତାହା ହେଲେ ହାଇକୋର୍ଟଙ୍କ ନିର୍ଦ୍ଦେଶ ଅବମାନନା ବିରୁଦ୍ଧରେ ପୁଣି ଥରେ ମାନ୍ୟବର ହାଇକୋର୍ଟଙ୍କ ଦ୍ୱାରସ୍ଥ ହେବୁ ବୋଲି ବରିଷ୍ଠ ବିଜେପି ନେତା ତଥା ଆଇନଜୀବି ଶ୍ରୀ ପୀତାମ୍ବର ଆଚାର୍ଯ୍ୟ କହିଛନ୍ତି।
ଏହି ପ୍ରତିନିଧିମଣ୍ଡଳୀରେ ରାଜ୍ୟ ଉପସଭାପତି ତଥା ବ୍ରହ୍ମଗିରି ବିଧାୟକ ଲଲିତେନ୍ଦୁ ବିଦ୍ୟାଧର ମହାପାତ୍ର ଏବଂ ପୁରୀ ବିଧାୟକ ଜୟନ୍ତ ଷଡଙ୍ଗୀ ଉପସ୍ଥିତ ଥିଲେ।
କଟକ: ଶ୍ରୀମନ୍ଦିର ରତ୍ନଭଣ୍ଡାର ଖୋଲିବା ନେଇ ହୋଇଥିବା ପିଆଇଏଲ ର ଶୁଣାଣି କରି ଏହି ମାମଲାରେ ହାଇକୋର୍ଟ ହସ୍ତକ୍ଷେପ କରିବେ ନାହିଁ ବୋଲି ରାୟ ଦେଇଛନ୍ତି। ତେବେ କୋର୍ଟ କହିଛନ୍ତି ଯେ, ଏହି ନିଷ୍ପତି ଉପରେ ସରକାର ଏକ କମିଟ ଗଠନ କରନ୍ତୁ। ଏଥିରେ ସେବାୟତ ଇଂଜିନିୟରଙ୍କୁ ନିଆଯାଇ ନିଷ୍ପତି ଗ୍ରହଣ କରାଯାଉ।
ତେବେ ପ୍ରଥମେ ରତ୍ନଭଣ୍ଡାରର ମରାମତି କାମ କରାଯାଉ। ଏହି କମିଟ ମରାମତି କାମକୁ ତଦାରଖ କରିବେ ବୋଲି କୋର୍ଟ କହିଛନ୍ତି। ଦୁଇମାସ ମଧ୍ୟରେ ଏହି କମିଟ ଗଠନ କରିବାକୁ ସରକାରଙ୍କୁ କୋର୍ଟ ନିର୍ଦ୍ଦେଶ ଦେଇଛନ୍ତି।
ପୁରୀ:ଶେଷରେ ବହୁ ବାଦବିବାଦ ପରେ ମହାପ୍ରଭୃଙ୍କ ରତ୍ନଭଣ୍ଡାର ଖୋଲାଯିବ। ଆଜି ପୁରୀରେ ବସିଥିବା ଶ୍ରୀମନ୍ଦିର ପରିଚାଳନା ବୈଠକରେ ଏହି ନିଷ୍ପତି ନିଆଯାଇଛି। ତେବେ ଏହି ବୈଠକର ନିଷ୍ପତି ଅନୁସାରେ ଆସନ୍ତା ବର୍ଷ ରଥଯାତ୍ରା ବେଳକୁ ଏହା ଖୋଲାଯିବ। ସେଥିପାଇଁ ଏହି ବୈଠକରେ ଏଏସଆଇ କୁ ଅନୁମତି ପ୍ରଦାନ କରିବାକୁ ନିଷ୍ପତି କରାଯାଇଛି।
ରଥଯାତ୍ରା ବେଳେ ତିନିଠାକୁର ଶ୍ରୀମନ୍ଦିରରେ ନ ଥିବେ ଏବଂ ଏହି ସର୍ଭେ କରିବା ପାଇଁ ସୁବିଧା ହେବା ନେଇ ପରିଚାଳନା ବୈଠକରେ ନିଷ୍ପତି ନିଆଯାଇଛି। ଏ ନେଇ ବୈଠକେ ବହୁ ସମୟ ଆଲୋଚନା କରାଯାଇଥିଲା। ଠାକୁର ମନ୍ଦିରରେ ରହିବା ସମୟରେ ନା ନ ଥିବା ସମୟରେ ରତ୍ନଭଣ୍ଡାର ଯାଞ୍ଚ ହେଲେ ଭଲ ସେ ନେଇ ଆଲୋଚନା ହୋଇ ନ ଥିଲା। ଶେଷରେ ତିନିଠାକୁର ନ ଥିବା ବେଳେ ଅର୍ଥାତ ଆସନ୍ତା ରଥଯାତ୍ରାରେ ଏହି ଯାଞ୍ଚ କରାଯିବ।
ତେବେ ଏ ନେଇ ମନ୍ଦିର ପରିଚାଳନା କମିଟ ରାଜ୍ୟ ସରକାରଙ୍କୁ ଏକ ଚିଠି କରିବେ। ଏହି ଯାଞ୍ଚ ବେଳେ ଏକ ବିଚାରବିଭାଗୀୟ କମିଟ ଗଠନ ଉପସ୍ଥିତ ରହିବାକୁ ଅନୁରୋଧ କରିବେ। ରାଜ୍ୟ ସରକାର ସେହି କମିଟ ଗଠନ କରିବେ। ଏଥିସହିତ ଶ୍ରୀମନ୍ଦିର ପ୍ରଶାସନ ଆଉ ଏକ କମିଟ ଗଠନ କରିବେ। ଏଥିରେ ଏଏସଆଇ ଟିମ ସହିତ ବୈଷୟିକ ଦଳ ଏବଂ ସେବାୟତ ଓ ପ୍ରଶାସକ ସାମିଲ ହେବେ।
ଏହି ବୈଠକ ପରେ ପୁରୀ ଜିଲ୍ଲାପାଳ ସମର୍ଥ ବର୍ମା ମିଡିଆକୁ କହିଛନ୍ତି ଯେ, ଏଏସଆଇ ରତ୍ନ ଭଣ୍ଡାର ଯାଞ୍ଚ କରିବା ପାଇଁ ମନ୍ଦିର ପ୍ରଶାସନଙ୍କୁ ଏକ ଚିଠି କରିଥିଲେ। ସେହି ଚିଠି ଉପରେ ବିସ୍ତୁତ ଆଲୋଚନା ହେବା ପରେ ପରିଚାଳନା କମିଟ ଏହି ନିଷ୍ପତି କରିଛନ୍ତି। ତେବେ ଏଏସଆଇ ଏହି ଯାଞ୍ଚ ବେଳେ ଯେପରି ଅତ୍ୟାଧୁନିକ ତଥା ଡିଜିଟାଲ ଉପକରଣ ବ୍ୟବହାର କରିବ ସେ ନେଇ ଅନୁରୋଧ କରାଯାଇଛି।
ଭୁବନେଶ୍ୱର: ରତ୍ନ ଭଣ୍ଡାର ଚାବି ହଜିବା ପ୍ରସଙ୍ଗକୁ ନେଇ ସରକାରଙ୍କୁ ସିଧାସଳଖ ନିଶାଣ କରିଛି କଂଗ୍ରେସ । ସରକାର ନକଲି ଚାବି ଖୋଜିବାପାଇଁ ଦୁଇଟି ଟିମ୍ ଗଠନ କରିଥିଲେ। କିନ୍ତୁ ଅସିଲି ଚାବି ଖୋଜିବାପାଇଁ କୌଣସି ପଦକ୍ଷେପ ନେଇ ନ ଥିଲେ ବୋଲି ଆଜି କଂଗ୍ରେସ ତରଫରୁ ଏକ ସାମ୍ବାଦିକ ସମ୍ମିଳନୀ କରି ଅଭିଯୋଗ କରାଯାଇଛି।
ଯେତେବେଳେ ସାରା ରାଜ୍ୟ ରତ୍ନ ଭଣ୍ଡାର ଖୋଲିବା ଦାବିରେ ପଡ଼ୁଛି ଉଠୁଛି ହୁ ହୁ ହୋଇ ଆନ୍ଦୋଳନର ବର୍ଣ୍ଣି ରାଜ୍ୟବ୍ୟାପି ଜଳୁଛି ପ୍ରସଙ୍ଗର ଉଷ୍ମତାକୁ ପ୍ରଶମିତ କରିବାପାଇଁ ରାଜ୍ୟ ସରକାର ବିଚାର ବିଭାଗୀୟ ତଦନ୍ତ କମିଶନ ବସାଇଥିଲେ ଏବଂ କମିଶନ ତାଙ୍କ ରିପୋର୍ଟ ୨୯.୧୧.୨୦୧୮ରୁ ରାଜ୍ୟ ସରକାରଙ୍କ ପାଖରେ ଦାଖଲ କରିବା ପରେ ମଧ୍ୟ ରାଜ୍ୟ ସରକାର ତଦନ୍ତ କମିଶନଙ୍କ ରିପୋର୍ଟ ବିଧାନସଭାରେ ଆଗତ କରୁଛନ୍ତି ନା ରତ୍ନ ଭଣ୍ଡାର ଖୋଲିବା ଦିଗରେ କୌଣସି ପଦକ୍ଷେପ ନେଉଛନ୍ତି ବୋଲି କଂଗ୍ରେସ କହିଛି ।
ଏଥିରୁ ସ୍ପଷ୍ଟ ବାରିହୋଇପଡ଼ୁଛି ରତ୍ନ ଭଣ୍ଡାର ଚାବି ହଜିବା ସରକାରୀ ପ୍ରାୟୋଜିତ କାର୍ଯ୍ୟକ୍ରମ । ଆମେ ଆଶଙ୍କା କରୁଛୁ ରାଜ୍ୟବାସୀଙ୍କ ଚାପ ଏବଂ ରତ୍ନଭଣ୍ଡାର ଖୋଲିବା ନେଇ ଟେମ୍ପୁଲ ମ୍ୟାନେଜମେଂଟ କମିଟିର ନିଷ୍ପତିର ୫ବର୍ଷପରେ ମଧ୍ୟ ସରକାର ରତ୍ନଭଣ୍ଡାର ନ ଖୋଲିବା ସୂଚାଉଛି ଯେ ସରକାରଙ୍କ ଜ୍ଞାତ ସାରରେ ରତ୍ନଭଣ୍ଡାର ଲୁଟ ହୋଇଛି ।
ଯଦି ସରକାର ଏବଂ ସରକାରଙ୍କ ମୁଖିଆ ମୁଖ୍ୟମନ୍ତ୍ରୀ ୪.୫ କୋଟି ଓଡ଼ିଆଙ୍କୁ ନିଜର ପରିବାର ବୋଲି କହୁଛନ୍ତି ରତ୍ନ ଭଣ୍ଡାର ଖୋଲି ମହାପ୍ରଭୁଙ୍କର ରତ୍ନ ସୁରକ୍ଷିତ ଅଛିବୋଲି ପ୍ରମାଣ ଦେଇ କଂଗ୍ରେସର ଅଭିଯୋଗକୁ ମିଥ୍ୟା ପ୍ରମାଣିତ କରନ୍ତୁ ବୋଲି ପ୍ରଦେଶ କଂଗ୍ରେସ ପକ୍ଷରୁ ଆୟୋଜିତ ସାମ୍ବାଦିକ ସମ୍ମିଳନୀରେ ପିସିସି ମୁଖପାତ୍ର ନିଶିକାନ୍ତ ମିଶ୍ର ସିଧାସଳଖ ସରକାରଙ୍କ ଉପରେ ବର୍ଷିଛନ୍ତି । ଏହି ସାମ୍ବାଦିକ ସମ୍ମିଳନୀରେ ଅନ୍ୟତମ ମୁଖପାତ୍ର ମନୋରଞ୍ଜନ ଦାଶ ଏବଂ କୃଷ୍ଣଚନ୍ଦ୍ର ପତି ଉପସ୍ଥିତ ଥିଲେ।