ନୂଆଦିଲ୍ଲୀ: ରୁଷ ରାଷ୍ଟ୍ରପତି ଭ୍ଲାଦିମିର ପୁଟିନ ପୁଣି ଥରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କୁ ପ୍ରଶଂସା କରିଛନ୍ତି। ସେ କହିଛନ୍ତି ଯେ, ଭାରତର ନେତୃତ୍ୱ ମଜବୁତ ଏବଂ ଜାତୀୟ ସ୍ୱାର୍ଥକୁ ପ୍ରାଧାନ୍ୟ ଦେଇଥାଏ। ଋଷର ରାଜଧାନୀ ମସ୍କୋରେ ଏକ କାର୍ଯ୍ୟକ୍ରମରେ ଯୋଗ ଦେଇ ପୁଟିନ ପାଶ୍ଚାତ୍ୟ ଦେଶଗୁଡ଼ିକୁ ଟାର୍ଗେଟ କରିଛନ୍ତି। ସେ କହିଛନ୍ତି ଯେ, ପାଶ୍ଚାତ୍ୟ ଦେଶକୁ ଅନ୍ଧ ଭାବରେ ଅନୁସରଣ କରୁନଥିବା ଭାରତ, ଚୀନ୍ ଏବଂ ଆରବ ଭଳି ଦେଶକୁ ସେମାନେ (ପାଶ୍ଚାତ୍ୟ ଦେଶ) ଶତ୍ରୁ ଭାବରେ ଉପସ୍ଥାପନ କରୁଛନ୍ତି।
ଗଣମାଧ୍ୟମର ରିପୋର୍ଟ ଅନୁଯାୟୀ ପୁଟିନ କହିଛନ୍ତି ଯେ, “ଏକ ସମୟରେ ସେମାନେ ଭାରତ ସହ ସମାନ କାର୍ଯ୍ୟ କରିବାକୁ ଚେଷ୍ଟା କରିଥିଲେ। ଆମେ ସମସ୍ତେ ଏହା ଭଲ ଭାବରେ ଜାଣିଛୁ। ଏସିଆର ସ୍ଥିତିକୁ ମଧ୍ୟ ଆମେ ଭଲଭାବେ ବୁଝୁଛୁ। ମୁଁ କହିବାକୁ ଚାହେଁ ଯେ, ଭାରତୀୟ ନେତୃତ୍ୱ ଶକ୍ତିଶାଳୀ ଏବଂ ଏହାର ଜାତୀୟ ସ୍ୱାର୍ଥକୁ ପ୍ରାଧାନ୍ୟ ଦିଅନ୍ତି। ଏଭଳି ପରିସ୍ଥିତିରେ ମୁଁ ବିଶ୍ୱାସ କରେ ଯେ, ସେମାନଙ୍କର (ପାଶ୍ଚାତ୍ୟ ଦେଶ) ଏହିପରି ଉଦ୍ୟମ ବୃଥା ଅଟେ। ସେମାନେ ଏସବୁ କରିବା ଉଚିତ୍ ନୁହେଁ। ”
ମିଳିତ ଜାତିସଂଘ ସୁରକ୍ଷା ପରିଷଦ (ୟୁଏନଏସସି) ରେ ରୁଷର ରାଷ୍ଟ୍ରପତି ଭ୍ଲାଦିମିର ପୁଟିନ ଭାରତର ଅଧିକ ଅଂଶଗ୍ରହଣକୁ ସମର୍ଥନ କରିଛନ୍ତି। ରଏଟର୍ସ ରିପୋର୍ଟ ଅନୁଯାୟୀ, ରୁଷ ରାଷ୍ଟ୍ରପତି କହିଛନ୍ତି ଯେ ଭାରତ, ବ୍ରାଜିଲ ଏବଂ ଦକ୍ଷିଣ ଆଫ୍ରିକା ଭଳି ଦେଶ ମିଳିତ ଜାତିସଂଘ ସୁରକ୍ଷା ପରିଷଦରେ ଅଧିକ ପ୍ରତିନିଧିତ୍ୱ କରିବାକୁ ଯୋଗ୍ୟ। ମିଳିତ ଜାତିସଂଘରେ ସଂସ୍କାର ଆଣିବା ଉଚିତ ବୋଲି ସେ କହିଛନ୍ତି। ସ୍ଥାୟୀ ସଦସ୍ୟତା ମିଳିବା ଉଚିତ୍।
ଭାରତ ଶକ୍ତିଶାଳୀ ଦେଶ:
ଋଷ ଭିତ୍ତିକ ଆରଟି ନ୍ୟୁଜ୍ ରିପୋର୍ଟ ଅନୁଯାୟୀ ପୁଟିନ ଭାରତକୁ ଏକ ଶକ୍ତିଶାଳୀ ଦେଶ ବୋଲି କହିଛନ୍ତି ଏବଂ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କ ନେତୃତ୍ୱରେ ଏହା ଅଧିକ ଶକ୍ତିଶାଳୀ ହେଉଛି ବୋଲି ସେ କହିଛନ୍ତି। ପୁଟିନ କହିଛନ୍ତି ଯେ, “୧୪୦ କୋଟିରୁ ଅଧିକ ଜନସଂଖ୍ୟା ବିଶିଷ୍ଟ ଭାରତ ଏକ ଶକ୍ତିଶାଳୀ ଦେଶ, ୭% ରୁ ଅଧିକ ଅର୍ଥନୈତିକ ଅଭିବୃଦ୍ଧି। ପ୍ରଧାନମନ୍ତ୍ରୀ ମୋଦୀଙ୍କ ନେତୃତ୍ୱରେ ଏହା ଅଧିକ ଶକ୍ତିଶାଳୀ ହେଉଛି।”
ଆରଟି ନ୍ୟୁଜ୍ ରିପୋର୍ଟ ଅନୁଯାୟୀ ବୁଧବାର ପୁଟିନ ପିଏମ ମୋଦୀଙ୍କୁ ଜଣେ ବୁଦ୍ଧିମାନ ବ୍ୟକ୍ତି ଭାବରେ ବର୍ଣ୍ଣନା କରିଛନ୍ତି ଏବଂ ତାଙ୍କ ନେତୃତ୍ୱରେ ଭାରତ ବିକାଶରେ ଅନେକ ଅଗ୍ରଗତି କରୁଛି ବୋଲି କହିଛନ୍ତି। ଗତ ମାସରେ ସେ ପ୍ରଧାନମନ୍ତ୍ରୀ ମୋଦୀଙ୍କୁ ପ୍ରଶଂସା କରିଥିଲେ ଏବଂ କହିଥିଲେ ଯେ ମେକ୍ ଇନ୍ ଇଣ୍ଡିଆ କାର୍ଯ୍ୟକ୍ରମକୁ ପ୍ରୋତ୍ସାହିତ କରିବା ପାଇଁ ପିଏମ ମୋଦୀ ଭଲ କାମ କରୁଛନ୍ତି।
