ଗୌହାଟି: ଜଣେ ଗୃହରକ୍ଷୀ (ହୋମ ଗାର୍ଡ଼) ନିଜର ସଚ୍ଚୋଟତା ଏବଂ ସାହାସର ଉଦାହରଣ ଦେଖାଇ ଚର୍ଚ୍ଚାକୁ ଆସିଛନ୍ତି। ଡ୍ରଗ କାରୋବର ମାମଲାରେ ଲକ୍ଷରୁ ଉର୍ଦ୍ଧ୍ଵ ଟଙ୍କାର ଲାଞ୍ଚକୁ ସେ ପ୍ରତ୍ୟାଖାନ କରିବା ସହ ୧୨ କୋଟି ଟଙ୍କାର ନିଶା ଦ୍ରବ୍ୟ ଜବତ କରିଛନ୍ତି। ଏଭଳି ସାହସିକତା ଏବଂ ସଚ୍ଚୋଟତା ଯୋଗୁଁ ରାଜ୍ୟର ମୁଖ୍ୟମନ୍ତ୍ରୀ ତାଙ୍କ ପାଇଁ ଏକ ବଡ ପୁରଷ୍କାର ଘୋଷଣା କରିଛନ୍ତି।
ସୂଚନା ଅନୁଯାୟୀ, ଆସାମର କାର୍ବୀ ଆଙ୍ଗଲୋଙ୍ଗ ଜିଲ୍ଲାରେ ଜୁନ ୨୧ ତାରିଖ ଦିନ କର୍ତ୍ତବ୍ୟରତ ବୋରସିଂ ବେ ନାମକ ଗୃହ ରକ୍ଷୀଙ୍କୁ ନିଶା ବ୍ୟବସାୟୀମାନେ ଲକ୍ଷାଧିକ ଟଙ୍କାର ଲାଞ୍ଚ ଦେଇଥିଲେ। କିନ୍ତୁ ବୋରସିଂ ଏତେ ମୋଟା ଅଙ୍କର ଲାଞ୍ଚକୁ ପ୍ରତ୍ୟାଖାନ କରିବା ସହ ୧୨ କୋଟି ଟଙ୍କାର ନିଶା ଦ୍ରବ୍ୟକୁ ଜବତ କରିଥିଲେ।
ଏହାପରେ ଆସାମ ମୁଖ୍ୟମନ୍ତ୍ରୀ ହିମନ୍ତ ବିଶ୍ଵ ଶର୍ମା ତାଙ୍କ ଉପରେ ଖୁସି ହୋଇ ପୁରଷ୍କାର ଘୋଷଣା କରିଛନ୍ତି। ମୁଖ୍ୟମନ୍ତ୍ରୀ ତାଙ୍କୁ ରାଜ୍ୟ ପୋଲିସ ସେବାରେ ନିଯୁକ୍ତି ଦେଇଛନ୍ତି। ଗୃହରକ୍ଷୀ ମୁଖ୍ୟତଃ ପୋଲିସକୁ ସହାୟତା କରିବା ପାଇଁ ଏକ ପଦବୀ ଅଟେ। ହେଲେ ଏହି ସାହାସିକତା ପାଇଁ ତାଙ୍କୁ ପୋଲିସ କନଷ୍ଟେବଳ ପଦବୀରେ ନିଯୁକ୍ତି ଦେବା ପାଇଁ ଆସାମ ସରକାର ନିଷ୍ପତ୍ତି ନେଇଛି।