Tag: ଶିକ୍ଷା ବିଭାଗ

ବ୍ରହ୍ମପୁର: ଗଞ୍ଜାମ ଜିଲ୍ଲା ଶିକ୍ଷା ବିଭାଗର ଜିଲ୍ଲା ପ୍ରକଳ୍ପ ପରିଚାଳନା ୟୁନିଟ୍ (ଡିପିଏମ ୟୁ ) ର ବୈଠକ ଜିଲ୍ଲାପାଳଙ୍କ ସଦ୍ଭାବନା ସମ୍ମିଳନୀ କକ୍ଷଠାରେ ଅତିରିକ୍ତ ଜିଲ୍ଲାପାଳ (ରାଜସ୍ୱ) ସୁଧାଂଶୁ କୁମାର ଭୋଇଙ୍କ ଅଧ୍ୟକ୍ଷତାରେ ଅନୁଷ୍ଠିତ ହୋଇଯାଇଛି। ଜିଲ୍ଲା ଶିକ୍ଷା ଓ ତାଲିମ୍ ଅନୁଷ୍ଠାନ ଖଲ୍ଲିକୋଟ ଗଞ୍ଜାମର ଅଧ୍ୟକ୍ଷ ଡ ସନ୍ତୋଷ କୁମାର ପରିଡା ପ୍ରଥମ ଶ୍ରେଣୀରୁ ତୃତୀୟ ଶ୍ରେଣୀ ପିଲାଙ୍କୁ କିପରି ଶିକ୍ଷାଦାନ କରାଯାଇପାରିବ ତାହା ଉପରେ ଉପସ୍ଥିତ ପ୍ରଧାନ ଶିକ୍ଷକ/ପ୍ରଧାନ ଶିକ୍ଷୟିତ୍ରୀ, ବ୍ଲକ ଶିକ୍ଷା ଅଧିକାରୀ, ସି.ଆର୍.ସି.ସି. ତଥା ସମସ୍ତ ସଭ୍ୟମାନଙ୍କୁ ଉପସ୍ଥାପନା କରିଥିଲେ। ପିଲାଙ୍କ ଭାଷା ଓ ଗଣିତ ଜ୍ଞାନର ବିକାଶ କିପରି ହୋଇ ପାରିବ ତାହାହିଁ ଥିଲା ବୈଠକର ମୂଳ ଉଦ୍ଦେଶ୍ୟ। ପିଲାଙ୍କୁ ଉତ୍ତମ ଶିକ୍ଷାଦାନ ନିମନ୍ତେ ନିପୁଣ ଓଡିଶା କାର୍ଯ୍ୟକାରୀ କରାଯାଇଛି। ସଂଖ୍ୟା ପରିଚୟ, ଶୂନ୍ୟସ୍ଥାନ ପୂରଣ, ସଂଖ୍ୟାକ୍ରମ, ଅଧଃ କ୍ରମରେ ଓ ଉର୍ଦ୍ଧ୍ବ କ୍ରମରେ ସଂଖ୍ୟା ଲିଖନ, ସଂଖ୍ୟାର କ୍ରମ ଓ ରୂପ, ସଂଖ୍ୟାର ସ୍ଥାନୀୟମାନ, ପୁସ୍ତକ ପଠନ, ଯୋଗ, ବିୟୋଗ, ଜ୍ୟାମିତିକ ଆକୃତି, ଶବ୍ଦ ସଂଯୋଜନା ଆଦି ଶିଶୁ ମାନେ କିପରି ସହଜରେ ବୁଝି କରିପାରିବେ ତାହା ଉପରେ ତାଲିମ୍ ପ୍ରଦାନ କରିଥିଲେ।

ସି.ଆର୍.ସି.ସି ମାନେ ପ୍ରତ୍ୟେକ ମାସରେ କ୍ଲଷ୍ଟର ସ୍ତରୀୟ ବୈଠକ କରି ତାଲିମ ପ୍ରଦାନ କରିବାକୁ ସ୍ଥିର କରାଯାଇଛି। ଜିଲ୍ଲାର ପ୍ରତ୍ୟେକ ବିଦ୍ୟାଳୟକୁ ଉତ୍ତମ ଶିକ୍ଷାଦାନ ନିମନ୍ତେ ଶିକ୍ଷା ଉପକରଣ ଓ ସଂଖ୍ୟା ପରିଚୟ ଉପକରଣ କିଟ୍ ପ୍ରଦାନ କରାଯିବା ପାଇଁ ସ୍ଥିର କରାଯାଇଛି। ବ୍ଲକ୍ ସ୍ତରରେ ଓ କ୍ଲଷ୍ଚର ସ୍ତରରେ ନିୟମିତ ପ୍ରଫେସନାଲ ଲର୍ଣ୍ଣିଂ କମ୍ୟୁନିଟି ବୈଠକ କରି ଶିକ୍ଷାଦାନ କିପରି କରାଯାଉଛି ଜିଲ୍ଲା ଶିକ୍ଷାଧିକାରୀ, ଜିଲ୍ଲା ଶିକ୍ଷା ଓ ତାଲିମ୍ ଅନୁଷ୍ଠାନ ଖଲ୍ଲିକୋଟ ଗଞ୍ଜାମର ଅଧ୍ୟକ୍ଷ, ଅତିରିକ୍ତ ଜିଲ୍ଲା ଶିକ୍ଷାଧିକାରୀ, ବ୍ଲକ୍ ଶିକ୍ଷାଧିକାରୀ ଏବଂ ସି.ଆର୍.ସି.ସି, ମାନେ ତାହାର ତଦାରଖ କରିବାକୁ ନିଷ୍ପତ୍ତି ନିଆଯାଇଥିଲା। ଶିକ୍ଷା ବର୍ଷକୁ 2 ଭାଗରେ ବିଭକ୍ତ କରାଯାଇଛି।

ପ୍ରଥମଟି ବିଦ୍ୟାଳୟ ପ୍ରସ୍ତୁତି କାର୍ଯ୍ୟକ୍ରମ ଯାହାକି ପିଲା ମାନଙ୍କୁ ଓ୍ବାର୍କ ବୁକ୍ ଯୋଗାଇ ଦିଆଯିବା ସହିତ କ୍ରିୟାକଳାପ ମାଧ୍ୟମରେ ପୂର୍ବ ପାଠର ଆଲୋଚନା କରାଯିବ। ଦ୍ବିତୀୟଟି ଗ୍ରେଡ୍ ଲେବୁଲ୍ ପ୍ୟାକେଜ୍। ଏଥିରେ ପିଲାଙ୍କୁ ବିଷୟ ଭିତ୍ତିକ ଶିକ୍ଷାଦାନ କରାଯିବା ସହ ପିଲାଙ୍କ ଶିକ୍ଷା କ୍ଷେତ୍ରରେ କିପରି ଉନ୍ନତି ହୋଇଛି ତାହାର ମୂଲ୍ୟାଙ୍କନ କରାଯିବ। ଗୁଣାତ୍ମକ ଶିକ୍ଷାର ମାନ ବୃଦ୍ଧି ନିମନ୍ତେ ଏଫ୍.ଏଲ୍.ଏନ୍. ( ଫାଉଣ୍ଡେସନ୍ ଲିଟେରାସି ଆଣ୍ଡ ନ୍ୟୁମେରାଶି ) ହବ୍ ଛତ୍ରପୁରର କୌଣସି ଏକ ବିଦ୍ୟାଳୟରେ ସ୍ଥାପନ କରାଯିବା ପାଇଁ ସ୍ଥିର କରାଯାଇଛି।

ବୈଠକରେ ଜିଲ୍ଲା ଶିକ୍ଷାଧିକାରୀ ଅମୀତା ପଟ୍ଟନାୟକ, ଜିଲ୍ଲା ମଙ୍ଗଳ ଅଧିକାରୀ, ଜିଲ୍ଲା ସମାଜ ମଙ୍ଗଳ ଅଧିକାରୀ ଆବିଦା ପରବୀନ୍, ଛତ୍ରପୁର ବ୍ଲକ୍ ଶିକ୍ଷାଧିକାରୀ, ଜିଲ୍ଲା ଶିକ୍ଷା ଓ ତାଲିମ୍ ଅନୁଷ୍ଠାନ ଖଲ୍ଲିକୋଟ ଗଞ୍ଜାମର ଡ. ନିହାରିକା ସାମନ୍ତରାୟ, ଶୈକ୍ଷିକ ସଂଯୋଜକ ଡ ସନ୍ତୋଷ କୁମାର ପଣ୍ଡା, ସି.ଆର୍.ସି.ସି. ରାଜପୁର ଲକ୍ଷ୍ମଣ ସେଠୀ, ବକ୍ସିପଲ୍ଲୀ ଉଚ୍ଚ ପ୍ରାଥମିକ ବିଦ୍ୟାଳୟର ପ୍ରଧାନ ଶିକ୍ଷକ କୈଳାଶ ଶବର, କତୁରୁ ଉଚ୍ଚ ପ୍ରାଥମିକ ବିଦ୍ୟାଳୟର ପ୍ରଧାନ ଶିକ୍ଷକ କୈଳାଶ ଚନ୍ଦ୍ର ବେହେରା, ସମନ୍ବୀତ ଶିଶୁ ବିକାଶ ପ୍ରକଳ୍ପ ଅଧିକାରୀ, କ୍ୟୁରେସ୍ ପ୍ରକଳ୍ପ ପରିଚାଳକ, ଛତ୍ରପୁର ରାମ କୃଷ୍ଣ ପଣ୍ଡା ଓ ଅନ୍ୟାନ୍ୟ ଅଧିକାରୀଗଣ ଉପସ୍ଥିତ ଥିଲେ।

କଳାହାଣ୍ଡି (ଦୁଷ୍ମନ୍ତ କୁମାର ପଣ୍ଡା): ସରକାର ପ୍ରାଥମିକ ଶିକ୍ଷାକୁ ଗୁରୁତ୍ବ ଦେଇ ୫-ଟି ମୋ ସ୍କୁଲ, ଆମ ସ୍କୁଲ ଭଳି ବିଭିନ୍ନ ଯୋଜନା ମାଧ୍ୟମରେ ଶିକ୍ଷାର ବିକାଶ ପାଇଁ ଉଦ୍ୟମ କରୁଥିବା ବେଳେ ଆଜି ମଧ୍ୟ ଶିକ୍ଷକମାନେ ପୂରଣ ଯୁଗର କୁମ୍ଭକର୍ଣ୍ଣ କିପରି ନିଦ୍ରା ଯାଉ ଥିଲା ତାହାର ଉଦାହରଣ ଦେଉଥିବାର ଦେଖା ଯାଉଛି। କଳାହାଣ୍ଡି ଜିଲ୍ଲାର ବନ ପାହାଡ ଘେରା ତଳ ଆମ ପଦର ପ୍ରାଥମିକ ସ୍କୁଲରେ ଏଭଳି ଏକ ଅଭାବନୀୟ ଘଟଣା ଦେଖାଯାଇଛି।

ଆଦିବାସୀ ବହୁଳ ତଳ ଆମ ପଦର ଗ୍ରାମ ପଂଚାୟତ ଅନ୍ତର୍ଗତ ତଳ ଆମ ପଦର ପ୍ରାଥମିକ ସ୍କୁଲ ରେ ମୋଟ ତିନି ଜଣ ଶିକ୍ଷକ ନିଯୁକ୍ତ ଥିବା ବେଳେ ପ୍ରାୟତଃ ଶିକ୍ଷକ ମାନେ ଉପସ୍ଥିତ ହେଉ ନ ଥିବା ଗ୍ରାମ ବସି ଅଭିଯୋଗ କରନ୍ତି। ପାଳି କରି ଶିକ୍ଷକ ମାନେ ଏହି ସ୍କୁଲ କୁ ଯାଉଥିବା ବେଳେ ଯେଉ ଶିକ୍ଷକ ଙ୍କ ପାଳି ଥାଏ ସେହି ଶିକ୍ଷକ ସ୍କୁଲ କୁ କେବଳ ନାମକୁ ମାତ୍ର ଯାଇ ଉପସ୍ଥାନ ପକାଉଥିବା ଅଭିଯୋଗ ହେଉଛି ଗତ ସପ୍ତାହରେ ଶିକ୍ଷକ ସୁରେଶ ବେଶରା ନାମକ ଶିକ୍ଷକ ସ୍କୁଲ କୁ ଯାଇ ଥିଲେ ହେଁ ସ୍ପଷ୍ଟ ଦଇବ ଲୋକରେ ଶ୍ରେଣୀ ଗୃହରେ ଛାତ୍ର ଛାତ୍ରୀଙ୍କ ଉପସ୍ଥିତିରେ ନିଜ ଚୌକି ରେ ବସି ଘୁଙ୍ଗୁଡି ମରୁଥିବାର ଦେଖା ଯାଇଥିଲା।

ସ୍ଥାନୀୟ ଗ୍ରାମବାସୀଙ୍କ ଦୀର୍ଘ ଦିନର ଅଭିଯୋଗ ପାଇ ଗଣମାଧ୍ୟମ ପ୍ରତିନିଧି ଖବର ସଂଗ୍ରହ ପାଇଁ ଯାଇଥିବା ବେଳେ ସମ୍ପୃକ୍ତ ଶିକ୍ଷକ ଚୌକି ରେ ବସି ଶୋଇ ପଡ଼ିଥିବାର ଦୃଶ୍ୟ କେମେରା ରେ ରେକର୍ଡ କରିଥିଲେ ହେଁ ଶିକ୍ଷକ ଙ୍କ ନିଦ୍ରା ଭଙ୍ଗ ହୋଇ ନ ଥିଲା। ବୋଧ ହୁଏ ଶିକ୍ଷକ ସୁରେଶ ବେଶରା ପୂରାଣ ଯୁଗର କୁମ୍ଭକର୍ଣ୍ଣ କିପରି ଶୋଉ ଥିଲା ତାହା ଛାତ୍ର ଛାତ୍ରୀ ଙ୍କୁ ଦେଖାଉ ଥିଲେ। ସରକାର ଯେତେ ଚେଷ୍ଟା କଲେ ମଧ୍ୟ ଏଭଳି ଠକ ଶିକ୍ଷକ ମାନଙ୍କ ଦ୍ବାରା କିପରି ଅନୁନ୍ନତ ଅଞ୍ଚଳର ଶିକ୍ଷାର ବିକାଶ ହୋଇ ପାରିବ ତାହା ବିଚାର ସାପେକ୍ଷ। ଶିକ୍ଷା ବିଭାଗ ଉଚ୍ଚ କର୍ତ୍ତୃପକ୍ଷ ଦୃଷ୍ଟି ଦେବାକୁ ଦାବି ହେଉଛି।

କୁଜଙ୍ଗ: କୁଜଙ୍ଗର ଶିକ୍ଷା ଓ ସଂସ୍କୃତିର ପ୍ରାଣକେନ୍ଦ୍ର ସାଜିଥିବା କୁଜଙ୍ଗ ବନବିହାରୀ ଉଚ୍ଚ ବିଦ୍ୟାଳୟରେ ଘୋର ଶିକ୍ଷକ/ଶିକ୍ଷୟିତ୍ରୀ ଅଭାବ ଥିବା ବେଳେ ଏବେ କୁଜଙ୍ଗ ସଦର ମହକୁମାରେ ଉପସ୍ଥିତ କୁଜଙ୍ଗ ପ୍ରାଥମିକ ବିଦ୍ୟାଳୟରେ ୫ଟି ଶ୍ରେଣୀରେ ଜଣେ ଶିକ୍ଷୟିତ୍ରୀରେ କାର୍ଯ୍ୟ ଚାଲିଛି। ବିଦ୍ୟାଳୟର ପ୍ରଧାନ ଶିକ୍ଷୟିତ୍ରୀ ଗତ ମାର୍ଚ୍ଚ ୩୧ରେ ଅବସର ପରେ ଜଣେ ଶିକ୍ଷୟିତ୍ରୀର ଦେବକୀ ଲେଙ୍କା ଏବେ ପାଠ ପଠା କାର୍ଯ୍ୟକରୁଛନ୍ତି। ବହୁବାର ଦାବି ଓ ଅନୁରୋଧ ପରେ ପ୍ରଶାସନ କିମ୍ବା ଶିକ୍ଷା ବିଭାଗ ନୂତନ ଶିକ୍ଷକଙ୍କୁ ନିଯୁକ୍ତି କରୁନଥିବା ବେଳେ ଏବେ ଅଭିଭାବକ ଓ ଗ୍ରାମବାସୀଙ୍କ ମଧ୍ୟରେ ଅସନ୍ତୋଷ ଦେଖାଦେଇଛି।

ତେବେ ବିଦ୍ୟାଳୟର ପରିଚାଳାନା କମିଟି ପକ୍ଷରୁ ପ୍ରଭାତୀ ଦାସ, ସୁଜାତା ଦାସ, ଇରାଙ୍ଗିନି ଦାସ, ତପସ୍ୱନୀ ସ୍ୱାଇଁ, ପଦ୍ମାବତୀ ମହାରଣା, ମିନତୀ ଦାସ, ପ୍ରଭାତ କୁମାର ନାଥ ଶର୍ମା, ଅକ୍ଷୟ କୁମାର ନାଥ, ଅମିୟ ବାରିକ, କୈଳାସ ସେଠୀ, ମନୋରଞ୍ଜନ ଦାସ, ସତ୍ୟବ୍ରତ ମଲିକ ପ୍ରମୁଖ ତୁରନ୍ତ ନୂତନ ଶିକ୍ଷକ ପାଇଁ ବ୍ଲକ ଶିକ୍ଷା ଅଧିକାରୀଙ୍କ ସହ ଜିଲ୍ଲାପାଳଙ୍କ ଦୃଷ୍ଟି ଆକର୍ଷଣ କରିଛନ୍ତି। ଏହି ବିଦ୍ୟାଳୟରେ ମୋଟ ୫ଟି ଶ୍ରେଣୀରେ ଏକ ଶହ ବିଦ୍ୟାର୍ଥୀ ଅଧ୍ୟୟନ କରୁଥିବା ବେଳେ ଏବେ ବିଦ୍ୟାଳ ୟରେ ଶିକ୍ଷକ ଅଭାବ ଯୋଗୁ ପାଠପଢାରେ ଘୋର ଅବବ୍ୟସ୍ଥା ଦେଖା ଦେଇଛି।

ବିଭାଗୀୟ କର୍ତ୍ତୁପକ୍ଷ ଯଦି ତୁରନ୍ତ ପଦକ୍ଷପ ଗ୍ରହଣ ନକରିନ୍ତି ତେବେ ଗ୍ରାମବାସୀ ଓ ବିଦ୍ୟାଳୟ କମିଟି ବାଧ୍ୟ ହୋଇ ଆନ୍ଦୋଳନକୁ ଓହ୍ଲାଇବେ ବୋଲି ଅଭିଭାବକ ଓ ଗ୍ରାମବାସୀ ଚେତାବନୀ ଦେଇଛନ୍ତି। ସରକାରୀ ପ୍ରାଥମିକ ବିଦ୍ୟାଳୟ କୁଜଙ୍ଗର ଏକ ବିଦ୍ୟାଳୟ ଯଦି ସଦର ମହକୁମାରେ ରହି ୫ ଶ୍ରେଣୀକୁ ଜଣେ ଶିକ୍ଷକରେ ପାଠ ପଢା ଚାଲିବ ତେବେ ବ୍ଲକ ର ସମୁଦ୍ରକୂଳ ତଥା ଦୂର ଅଞ୍ଚଳରେ ଥିବା ବିଦ୍ୟାଳୟର ସ୍ଥିତି କଣ ଥିବା ତାହା ସହଜେ ଅନୁମେୟ ବୋଲି କୁଜଙ୍ଗର ସମାଜ ସେବୀ ଅକ୍ଷୟ କୁମାର ନାଥ କହିଛନ୍ତି।

ଭୁବନେଶ୍ୱର : ସମଗ୍ର ଶିକ୍ଷା ଅଧୀନରେ କାର୍ଯ୍ୟରତ ପାର୍ଟ ଟାଇମ୍‌ ଇନ୍‌ଷ୍ଟ୍ରକ୍‌ଟରମାନଙ୍କୁ ଚଳିତ ବର୍ଷ ମଇ ଓ ଜୁନ୍‌ ମାସର ପାରିଶ୍ରମିକ ପ୍ରଦାନ କରାଯିବାକୁ ସରକାର ସ୍ଥିର କରିଛନ୍ତି । ବିଦ୍ୟାଳୟ ଓ ଗଣଶିକ୍ଷା ମନ୍ତ୍ରୀ ଶ୍ରୀ ସମୀର ରଞ୍ଜନ ଦାଶ ଏ ନେଇ ବିଭାଗୀୟ ପ୍ରମୁଖ ଶାସନ ସଚିବ ଏବଂ ଓସେପାର ରାଜ୍ୟ ପ୍ରକଳ୍ପ ନିର୍ଦ୍ଦେଶକଙ୍କ ସହ ଆଲୋଚନା କରିବା ପରେ ଏହି ଘୋଷଣା କରାଯାଇଛି ।

ପୂର୍ବବର୍ଷମାନଙ୍କରେ ମଇ ଓ ଜୁନ୍‌ ମାସରେ ବିଦ୍ୟାଳୟ ବନ୍ଦ ରହୁଥିବାରୁ ପାର୍ଟ ଟାଇମ୍‌ ଇନ୍‌ଷ୍ଟ୍ରକଫରମାନଙ୍କୁ ପାରଶ୍ରମିକ ଦିଆଯାଉନଥିଲା । କିନ୍ତୁ ଚଳିତ ବର୍ଷ ମଇ ଓ ଜୁନ୍‌ ମାସରେ ବିଦ୍ୟାଳୟ ଖୋଲା ରହିଥିବାରୁ ଏହି ଦୁଇମାସ ପାଇଁ ପାରିଶ୍ରମିକ ପ୍ରଦାନ କରାଯିବ । ଜିଲ୍ଲାଗସ୍ତ ସମୟରେ ମନ୍ତ୍ରୀ ଶ୍ରୀ ଦାଶ ଏ ବିଷୟ ହୃଦୟଙ୍ଗମ କରି ଉପଯୁକ୍ତ ପଦକ୍ଷେପ ନେବା ନିମନ୍ତେ ବିଭାଗୀୟ ଅଧିକାରୀମାନଙ୍କୁ ନିର୍ଦ୍ଦେଶ ଦେଇଥିଲେ ।