Tag: ସୁକାନ୍ତ ମଜୁମଦାର

ଭୁବନେଶ୍ୱର: ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କ ନେତୃତ୍ୱାଧୀନ କେନ୍ଦ୍ର ସରକାରଙ୍କ ପ୍ରଥମ ଓ ଦ୍ୱିତୀୟ ପାଳି ଭଳି ତୃତୀୟ ପାଳିର ପ୍ରଥମ ୬ ମାସ ମଧ୍ୟରେ ଦେଶରେ ସ୍ୱଚ୍ଛତାର ପ୍ରସାର ଏବଂ ସହରୀ ବିକାଶ ପାଇଁ ବିଭିନ୍ନ ପଦକ୍ଷେପ ଗ୍ରହଣ କରାଯାଇଥିବା କେନ୍ଦ୍ର ଶିକ୍ଷା ଓ ଉତ୍ତର ପୂର୍ବାଞ୍ଚଳ ବିକାଶ ରାଷ୍ଟ୍ର ମନ୍ତ୍ରୀ ଡକ୍ଟର ସୁକାନ୍ତ ମଜୁମଦାର କହିଛନ୍ତି। ଭୁବନେଶ୍ୱର ଠାରେ ଗଣମାଧ୍ୟମକୁ ବିବୃତି ଦେଇ ଶ୍ରୀ ମଜୁମଦାର କହିଛନ୍ତି, ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କ ସରକାର ୧୫ ସେପ୍ଟେମ୍ବର ଠାରୁ ୨ ଅକ୍ଟୋବର ପର୍ଯ୍ୟନ୍ତ ‘ସ୍ୱଭାବ ସ୍ୱଚ୍ଛତା ସଂସ୍କାର ସ୍ୱଚ୍ଛତା’କୁ ନେଇ ସମ୍ପୂର୍ଣ୍ଣ ଅଭିଯାନ ଆରମ୍ଭ କରିଥିଲେ । ସ୍ୱଚ୍ଛତା କ୍ଷେତ୍ରରେ କାମ କରୁଥିବା ଲୋକଙ୍କୁ ଗୁରୁତ୍ୱ ଦେଇ ସରକାର ସ୍ୱଚ୍ଛ ମିତ୍ରଙ୍କୁ ସମ୍ମାନ ଦେବା ଲାଗି ପଦକ୍ଷେପ ନେଇଥିଲେ। ଜନଭାଗିଦାରୀ ବଢ଼ାଇବା ପାଇଁ ସ୍ୱଚ୍ଛତା ଅଭିଯାନରେ ଚଳିତ ବର୍ଷ ୧୭ ଲକ୍ଷ କାର୍ଯ୍ୟକ୍ରମ ଆୟୋଜନ କରାଯାଇଥିବା କେନ୍ଦ୍ର ମନ୍ତ୍ରୀ ସୂଚନା ଦେଇଥିଲେ।

ସେ ଆହୁରି କହିଥିଲେ, ୧୮ ଲକ୍ଷ ସ୍ୱାସ୍ଥ୍ୟ ଶିବିର ମାଧ୍ୟମରେ ୪୩ ଲକ୍ଷ ସଫେଇ ମିତ୍ରଙ୍କ ସ୍ୱାସ୍ଥ୍ୟ ପରୀକ୍ଷା କରାଯାଇଛି। ବିଭିନ୍ନ ପର୍ବପର୍ବାଣୀକୁ ସ୍ୱଚ୍ଛତା ସହ ଯୋଡ଼ିବା ପାଇଁ ସରକାର ପଦକ୍ଷେପ ନେଇଛନ୍ତି। ବିଗତ ୧୦ ବର୍ଷ ମଧ୍ୟରେ କେନ୍ଦ୍ର ସରକାର ୬୪ ଲକ୍ଷରୁ ଅଧିକ ବ୍ୟକ୍ତିଗତ ଏବଂ ୬.୬୬ ଲକ୍ଷରୁ ଅଧିକ ସାର୍ବଜନୀନ ଶୌଚାଳୟ ନିର୍ମାଣ କରିଛନ୍ତି। ୨୦୧୪ ପୂର୍ବରୁ ବର୍ଜ୍ୟବସ୍ତୁ ସଂଗ୍ରହ ପ୍ରସାର ଖୁବ୍ କମ୍ ରହିଥିଲା। ଆମ ସରକାର ଆସିବା ପରେ ୯୩ ହଜାର ୬୦୦ରୁ ଅଧିକ ୱାର୍ଡରେ ବର୍ଜ୍ୟବସ୍ତୁ ସଂଗ୍ରହ ପ୍ରସାର ହୋଇଛି। ସାରା ଦେଶରେ ବର୍ଜ୍ୟବସ୍ତୁର ବ୍ୟବସ୍ଥିତ ସଂଗ୍ରହ ୯୭% ୱାର୍ଡରେ ପହଞ୍ଚି ପାରିଛି। ଏହା ସରକାର ବହୁତ ବଡ଼ ଉପଲବ୍ଧି ବୋଲି ସେ କହିଥିଲେ।

କେନ୍ଦ୍ର ମନ୍ତ୍ରୀ କହିଥିଲେ, ଦୀନଦୟାଲ ଉପାଧ୍ୟାୟ ଜାତୀୟ ଗ୍ରାମୀଣ ଜୀବିକା ମିଶନ ଜରିଆରେ ୩୯.୩୯ ଲକ୍ଷ ଜୀବିକା ସୁଯୋଗ ସୃଷ୍ଟି କରାଯାଇଛି । ସହରରେ ବାସହୀନମାନଙ୍କୁ ଆଶ୍ରୟ ଦେବା ଲାଗି ୨ହଜାର ଆଶ୍ରୟସ୍ଥଳୀ ଖୋଲାଯାଇଛି ଯେଉଁଥିରେ ୧ ଲକ୍ଷ ୪୧ ହଜାରରୁ ଅଧିକ ବାସହୀନ ଲୋକ ରହିପାରିବେ। ସାଧାରଣ ଲୋକଙ୍କ ଜୀବନକୁ ସହଜ ଓ ସରଳ କରିବା ଲାଗି ଆମ ସରକାର କାମ କରୁଛନ୍ତି। ଦେଶରେ ୧୦୦ ସ୍ମାର୍ଟସିଟି ନିର୍ମାଣ ପାଇଁ ପଦକ୍ଷେପ ନିଆଯାଇଛି। ଏଥିରେ ୧ ଲକ୍ଷ ୬୭ହଜାର କୋଟିରୁ ଅଧିକ ଟଙ୍କା ନିବେଶ ପାଇଁ ବ୍ୟବସ୍ଥା କରାଯାଇଛି। ସ୍ମାର୍ଟସିଟିରେ ଆଧୁନିକ ପରିବହନ ଠାରୁ ଡିଜିଟାଲ ତଥ୍ୟ ପାଇଁ ଇଣ୍ଟିଗ୍ରେଟେଡ୍ କମାଣ୍ଡ ସେଣ୍ଟର ଖୋଲାଯାଇଛି। ଜନସାଧାରଣଙ୍କ ସୁରକ୍ଷା ପାଇଁ ଦେଶର ବିଭିନ୍ନ ସହରାଞ୍ଚଳରେ ୮୩ ହଜାରରୁ ଅଧିକ ସିସି ଟିଭି କ୍ୟାମେରା ଲଗାଯାଇଛି। ଏହାସହିତ ପ୍ରାୟ ୧୬ ଲକ୍ଷ ଏଲଇଡି ବଲବ ଲଗାଯାଇଛି।

ଶ୍ରୀ ମଜୁମଦାର କହିଛନ୍ତି ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ପିଏମ ସ୍ୱନିଧି ଯୋଜନାର ଶୁଭାରମ୍ଭ କରିଛନ୍ତି। ଏହା ମାଧ୍ୟମରେ ସହରର ଉଠାଦୋକାନୀମାନଙ୍କୁ ବିନା ବନ୍ଧକରେ ବ୍ୟବସାୟ ପାଇଁ ଋଣ ଯୋଗାଇ ଦିଆଯାଉଛି। ଇତିମଧ୍ୟରେ ପିଏମ ସ୍ୱନିଧି ଯୋଜନାରେ ୩୦,୪୨୨ କୋଟି ଟଙ୍କାର ୯୪.୩୧ ଲକ୍ଷ ଋଣ ଯୋଗାଇ ଦିଆଯାଇଛି। ଏମାନଙ୍କ ମଧ୍ୟରେ ୪୫ ପ୍ରତିଶତ ମହିଳା, ୪୧% ଓବିସି, ଏସସି ୨୦%, ଏସଟି ୩% ଏବଂ ସଂଖ୍ୟାଲଘୁ ୩% ହିତାଧିକାରୀ ରହିଛନ୍ତି। ଉତ୍ତମ ପ୍ରଶାସନ ପାଇଁ ପିଏମ ସ୍ୱନିଧି ଯୋଜନା ପୁରସ୍କୃତ ହୋଇଥିବା କେନ୍ଦ୍ର ମନ୍ତ୍ରୀ କହିଛନ୍ତି।

ନୂଆଦିଲ୍ଲୀ: ଗୋଟିଏ ପଟେ କେନ୍ଦ୍ରରେ କ୍ଷମତାରେ ଥିବା ଭାରତୀୟ ଜନତା ପାର୍ଟି ଦାବି କରୁଛି ଯେ, କେନ୍ଦ୍ରୀୟ ଅନୁସନ୍ଧାନକାରୀ ସଂସ୍ଥା ଉପରେ ତାଙ୍କର କୌଣସି ନିୟନ୍ତ୍ରଣ ନାହିଁ, ଅନ୍ୟପକ୍ଷରେ ପଶ୍ଚିମବଙ୍ଗ ବିଜେପି ସଭାପତି ସୁକାନ୍ତ ମଜୁମଦାର ଏପରି ଦାବି କରିଛନ୍ତି ଯାହା ଏକ ଉତ୍ତେଜନା ସୃଷ୍ଟି କରୁଛି। ସୁକାନ୍ତ କହିଛନ୍ତି ଯେ, ଯଦି ସେ ଚାହାଁନ୍ତି, ତେବେ ସେ ଫୋନ୍ କରି ସିବିଆଇ ଚଢାଉକୁ ବନ୍ଦ କରିପାରିଥାନ୍ତେ। କିନ୍ତୁ ବିଜେପି ଏହା କରିବାକୁ ବିଶ୍ୱାସ କରେ ନାହିଁ।

ବାସ୍ତବରେ, ବଙ୍ଗଳାର ବିଭିନ୍ନ ପୌରସଂସ୍ଥାରେ ବେଆଇନ ପଦବୀ ନିଯୁକ୍ତି ହୋଇଥିବା ବେଳେ ସିବିଆଇ ବିଜେପି ବିଧାୟକ ପାର୍ଥ ସାରଥୀ ଚଟ୍ଟୋପାଧ୍ୟାୟଙ୍କ ଘରେ ଚଢାଉ କରିଥିଲା। ପ୍ରକାଶ ଯେ, ପାର୍ଥ ମଧ୍ୟ ରାଣାଘାଟ ପୌରପାଳିକାର ପୂର୍ବତନ ଅଧ୍ୟକ୍ଷ ରହିଛନ୍ତି। ଏହା ବ୍ୟତୀତ ସିବିଆଇ ରାଜ୍ୟ ନଗର ଉନ୍ନୟନ ମନ୍ତ୍ରୀ ଫିରହାଦ୍ ହାକିମ ଏବଂ ତୃଣମୂଳ କଂଗ୍ରେସ (ଟିଏମସି) ବିଧାୟକ ମଦନ ମିତ୍ରଙ୍କ ଘରେ ଚଢାଉ କରିଥିଲା।

ସୁକାନ୍ତ ମଜୁମଦାର କ’ଣ କହିଥିଲେ?:

ପାର୍ଟି ବିଧାୟକଙ୍କ ଘରେ ସିବିଆଇ ଚଢାଉ ଉପରେ ସୁକାନ୍ତ ମଜୁମଦାର ଦାବି କରିଛନ୍ତି ଯେ, “ଯାହାକୁ ଡାକିବା ଆବଶ୍ୟକ, ସିବିଆଇ ତାଙ୍କୁ ଡାକିବ। ଯଦି ମୁଁ ଚାହିଁଥାନ୍ତି, ତେବେ ଫୋନ୍ କରି ଦଳୀୟ ବିଧାୟକଙ୍କ ଘରେ ସିବିଆଇ ଚଢାଉକୁ ବନ୍ଦ କରି ଦେଇଥାନ୍ତି, କିନ୍ତୁ ଆମେ ଏଥିରେ ବିଶ୍ୱାସ କରୁନାହୁଁ। ” ଏହା ସହିତ ବିଜେପି ନେତା ଟିଏମସି ବିଧାୟକ ଫିରହାଦ୍ ହାକିମଙ୍କୁ ଡକାୟତ ବୋଲି କହିଛନ୍ତି। ସୁକାନ୍ତଙ୍କ ଏହି ଦାବି ଯୋଗୁଁ ପଶ୍ଚିମବଙ୍ଗ ତଥା ଦେଶର ରାଜନୀତି ମଧ୍ୟ ଉତ୍ତପ୍ତ ହୋଇଛି।

ବିଜେପି ଉପରେ ଆକ୍ରମଣ କରି ଟିଏମସି କହିଛି ଯେ, ସୁକାନ୍ତଙ୍କ କଥା ପ୍ରମାଣିତ କରିଛି ଯେ କେନ୍ଦ୍ରରେ ଶାସକ ବିଜେପିଙ୍କ ନିର୍ଦ୍ଦେଶରେ କେନ୍ଦ୍ରୀୟ ଅନୁସନ୍ଧାନକାରୀ ସଂସ୍ଥା କାର୍ଯ୍ୟ କରୁଛନ୍ତି। ରାଜନୈତିକ ପ୍ରତିଶୋଧ ଯୋଗୁଁ ବିରୋଧୀ ଦଳ ହଇରାଣ ହରକତ ହେଉଇଛନ୍ତି। ସୂଚନା ଯୋଗ୍ୟ ଯେ, ବଙ୍ଗଳାରେ ଚାଲିଥିବା ଗ୍ରାମୀଣ ଯୋଜନା ପାଇଁ ଟିଏମସିର ପାଣ୍ଠି ବନ୍ଦ କରିବା ଅଭିଯୋଗରେ ସୁକାନ୍ତ କହିଥିଲେ ଯେ, ଗୋଟିଏ ଫୋନ୍ କଲ କରାଯିବ ଏବଂ ସମସ୍ତ ପାଣ୍ଠି ଆସିବ।

କୋଲକାତା: ଭାରତୀୟ ଜନତା ପାର୍ଟି (ବିଜେପି) ପଶ୍ଚିମବଙ୍ଗ ୟୁନିଟ୍ ସଭାପତି ସୁକାନ୍ତ ମଜୁମଦାର ରବିବାର ଦିନ କହିଛନ୍ତି ଯେ, ତୃଣମୂଳ କଂଗ୍ରେସ (ଟିଏମସି) ସାଧାରଣ ସଂପାଦକ ଅଭିଷେକ ବାନାର୍ଜୀ କିମ୍ବା ଦଳର ଅନ୍ୟ କୌଣସି ବରିଷ୍ଠ ନେତା ରାଜ୍ୟରେ ଥିବା ଦୁର୍ନୀତିଗ୍ରସ୍ତ ଟିଏମସି ସରକାରର ପତନରୁ ବଞ୍ଚାଇ ପାରିବେ ନାହିଁ।

ଉତ୍ତର ବଙ୍ଗାଳର ଆଲିପୁରଦ୍ଵାରରେ ପାର୍ଟି କାର୍ଯ୍ୟାଳୟର ଉଦଘାଟନ କରିବା ପରେ ସାମ୍ବାଦିକମାନଙ୍କ ସହ କଥାବାର୍ତ୍ତା କରି ମଜୁମଦାର କହିଛନ୍ତି ଯେ, ବିଭିନ୍ନ ପ୍ରକଳ୍ପ ପାଇଁ କେନ୍ଦ୍ରୀୟ ପାଣ୍ଠିର ବ୍ୟବହାର ସମ୍ପର୍କରେ ଲୋକମାନେ ଖୁବ ଶୀଘ୍ର ଟିଏମସି ନେତାଙ୍କଠାରୁ ଅଡିଟ୍ ମାଗିବେ।

ମଜୁମଦାର କହିଛନ୍ତି ଯେ, “ଅଭିଷେକ ବାନାର୍ଜୀ ବର୍ତ୍ତମାନ ଲୋକଙ୍କ ଘରକୁ ଯାଉଛନ୍ତି, କାରଣ ତାଙ୍କୁ କିଛି ଖରାପ ହେଉଥିବା ଦେଖାଯାଉଛି। ଟିଏମସିର ପଞ୍ଚାୟତ ସଦସ୍ୟଙ୍କ ଦ୍ଵାରା ସରକାରୀ କଲ୍ୟାଣ ପ୍ରକଳ୍ପର ଲାଭରୁ ବଞ୍ଚିତ ହୋଇଥିବା ଗରିବ ଲୋକମାନେ ଏହି ଦୁର୍ନୀତିଗ୍ରସ୍ତ ସରକାର ଠାରୁ ମୁହଁ ଫେରାଇ ନେଇଛନ୍ତି। ଦୁର୍ନୀତି ଅଭିଯୋଗରେ ବହୁ ନେତା ଜେଲରେ ଅଛନ୍ତି। ଅଭିଷେକ ବାନାର୍ଜୀ କିମ୍ବା ଅନ୍ୟ କୌଣସି ଟିଏମସି ନେତା ସରକାରଙ୍କୁ ପତନରୁ ରକ୍ଷା କରିପାରିବେ ନାହିଁ।

କୋଲକାତା: ପଶ୍ଚିମବଙ୍ଗ ରାଜ୍ୟ ସଭାପତି ଭାବେ ସୁକାନ୍ତ ମଜୁମଦାରଙ୍କୁ ବିଜେପି ନିଯୁକ୍ତି ଦେଇଛି। ଦିଲୀପ ଘୋଷଙ୍କ ସ୍ଥାନରେ ମଜୁମଦାରଙ୍କୁ ରାଜ୍ୟ ସଭାପତି ଭାବେ ଦାୟିତ୍ଵ ଦିଆଯାଇଛି।

ଦଳର ରାଜ୍ୟ ମୁଖ୍ୟାଳୟରେ ସମାରୋହକୁ ସମ୍ବୋଧିତ କରି ମଜୁମଦାର କହିଛନ୍ତି ଯେ, ଦଳର ନେତୃତ୍ୱ ତଥା ବରିଷ୍ଠ ନେତାମାନଙ୍କ ସହଯୋଗରେ ମୁଁ ରାଜ୍ୟର ତାଲିବାନିକରଣ ବିରୋଧରେ ଲଢେଇ ଜାରି ରଖିବି। ଆମ ପାଇଁ ବିଜେପି କର୍ମୀମାନେ ଆମର ପ୍ରକୃତ ସମ୍ପତ୍ତି। ଯଦି ଆମେ କୌଣସି ଭୁଲ କରିଛୁ, ଆମେ ଏହାକୁ ସଂଶୋଧନ କରିବୁ।

“ଯେଉଁମାନେ ଭାବନ୍ତି ଯେ, ସେମାନେ ଏହାକୁ ଛାଡି ଦଳକୁ କ୍ଷତି ପହଞ୍ଚାଇ ପାରିବେ, ସେମାନେ ଭୁଲ୍ ଭାବୁଛନ୍ତି। ଆଗାମୀ ଦିନରେ ବିଜେପି ବିଜୟୀ ହେବ। ଯେଉଁମାନଙ୍କର ଦଳର ଆଦର୍ଶ ଏବଂ ଉଦ୍ଦେଶ୍ୟ ପ୍ରତି ପ୍ରତିବଦ୍ଧତା ଅଛି ସେମାନେ କେବେବି ଦଳ ଛାଡିବେ ନାହିଁ।”

ଉଲ୍ଲେଖ ଯୋଗ୍ୟ ଯେ, ପଶ୍ଚିମବଙ୍ଗ ୟୁନିଟର ନୂତନ ସଭାପତି ଭାବରେ ବାଲୁରଘାଟର ଲୋକସଭା ସାଂସଦ ସୁକାନ୍ତ ମଜୁମଦାରଙ୍କୁ ବିଜେପି ନିଯୁକ୍ତ କରିଛି। ଦଳର ଆଭ୍ୟନ୍ତରୀଣ ମତଭେଦ ଏବଂ ନେତାମାନେ ରାଜ୍ୟରେ ଶାସକ ତୃଣମୂଳ କଂଗ୍ରେସରେ ସାମିଲ ହେଉଥିବା ବେଳ ଦିଲୀପ ଘୋଷଙ୍କ ସ୍ଥାନରେ ମଜୁମଦାରଙ୍କୁ ଦାୟିତ୍ଵ ଦିଆଯାଇଛି। ଦିଲୀପ ଘୋଷଙ୍କୁ ବିଜେପିର ରାଷ୍ଟ୍ରୀୟ ଉପସଭାପତି କରାଯାଇଛି। ଘୋଷଙ୍କ ରାଜ୍ୟ ସଭାପତି ଭାବରେ କାର୍ଯ୍ୟକାଳ ଶେଷ ହେବାକୁ ପ୍ରାୟ ୧୫ ମାସ ବାକି ଥିଲା।