କଟକ: ବର୍ତ୍ତମାନ ସାରା ଓଡିଶାରେ ଅନୁଭୂତ ହୋଇଛି ହକି ଜ୍ବର। ଚାରିଆଡେ ବର୍ତ୍ତମାନ ହକିକୁ ନେଇ ଚର୍ଚ୍ଚା। କାରଣ ଆଜି ହେଉଛି ଏହି ହକି ମହାକୁମ୍ଭର ଉଦଘାଟନ ସଂଧ୍ୟା। ଆଜି ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ଏହା ମହାକୁମ୍ଭକୁ ଆନୁଷ୍ଠାନିକ ଭାବେ ଉଦଘାଟନ କରିବେ। ସେଥିପାଇଁ ପ୍ରାୟ ବର୍ଷାଧିକାଳ ଏହାର ପ୍ରସ୍ତୁତି ଆରମ୍ଭ ହୋଇଛି।
ସେଥିପାଇଁ କଟକ, ଭୁବନେଶ୍ବର ଏବଂ ରାଉରକେଲା ସହରକୁ ପୁରା ନୂଆ ରାଣୀ ପରି ସଜାଇ ଦିଆଯାଇଛି। ଚାରିଆଡେ ପେଣ୍ଟିଂ, ସ୍ଥାପତ୍ୟ ଏବଂ ସୁନ୍ଦର ତୋରଣ ସାରା ସହର ଝଲସି ଉଠିଛି। କଳିଙ୍ଗ ଷ୍ଟାଡିୟମକୁ ମଧ୍ୟ ନୂଆ ରୂପ ଦିଆଯାଇଛି। ଉଦଘାଟିତ ହୋଇଛି ରାଉରକେଲାରେ ନୂଆ ହକି ଷ୍ଟାଡିୟମ। ବର୍ତ୍ତମାନ ଚାରିଆଡେ କେବଳ ହକି ହକି ଆଉ ହକି।
ଏପରି ପରିବେଶରେ ଆନ୍ତର୍ଜାତୀୟ ବାଲୁକା ଶିଳ୍ପୀ ସୁଦର୍ଶନ ପଟ୍ଟନାୟକ କେମିିତି ବାଦ ପଡିଥାଆନ୍ତେ। ସେ ମଧ୍ୟ ନିଜର ଜଲୱା ପ୍ରଦର୍ଶିତ କରିଛନ୍ତି। ସେ କଟକ ବାଲିଯାତ୍ରା ପଡିଆରେ ନିର୍ମାଣ କରିଛନ୍ତି ଭିନ୍ନ ଏକ କଳା। ଯାହାକୁ ଯେ ଦେଖୁଛି ସେ ଘଡିଏ ଅନେଇ ରହୁଛି। ତାଙ୍କ କଳାର ଆକର୍ଷଣ ଏପରି ହୋଇଛି ଯେ ସବୁ ଆୟୋଜନଠାରୁ ଏହା ବଳିଯାଇଛି କହିଲେ ଅତ୍ୟୁକ୍ତି ହେବ ନାହିଁ।
ସୁଦର୍ଶନ ବାଲୁକା କଳାରେ ନିର୍ମାଣ କରିଛନ୍ତି ଏକ ହକି ଷ୍ଟିକ୍। ତେବେ ଏହି ବାଲୁକାରେ ସେ ସ୍ଥାପନ କରିଛନ୍ତି ବିଭିନ୍ନ ରଂଗର ହକି ବଲ। ସେ ପ୍ରାୟ ୫ ହଜାର ହକି ବଲରେ ନିର୍ମାଣ କରିଛନ୍ତି ଏହି ହକି ଷ୍ଟିକ୍। ଏହାକୁ ସେ ଏପରି ନିର୍ମାଣ କରିଛନ୍ତି ଯେ, ସେଥିରେ ସେ ହକି ଟ୍ରଫି, ହକି ଷ୍ଟିକ, ଷ୍ଟାଡିୟମ, ହକି ବଲ ଏବଂ ବିଭିନ୍ନ ଦେଶର ଜାତୀୟ ପତାକା କଳାକୁ ସେଥିରେ ସ୍ଥାନିତ କରିଛନ୍ତି।
ଏହି ହକି ଷ୍ଟିକର ଲମ୍ବା ୧୦୫ ଫୁଟ ରହିଥିବା ବେଳେ ଚଉଡା ରହିଛି ୪୫ ଫୁଟ ଏବଂ ଉଚ୍ଚତା ରହିଛି ୨୨ ଫୁଟ। ଏଥିରେ ସୁଦର୍ଶନ ୬୮ ଟନ ବାଲିକୁ ସ୍ଥାପତ୍ୟରେ ବ୍ୟବହାର କରିଛନ୍ତି। ଏଥିରେ ସୁଦର୍ଶନଙ୍କ ୧୫ ଜଣ ଛାତ୍ରଛାତ୍ରୀ ସହଯୋଗ କରିଛନ୍ତି। ତେବେ ସବୁଠାରୁ ବଡ କଥା ହେଲା ଯେ, ଏଥିରେ ବ୍ୟବହାର ହୋଇଥିବା ହକି ବଲଗୁଡିକ ବିଭିନ୍ନ ହକି ଖେଳାଳିଙ୍କଠାରୁ ସଂଗ୍ରହ କରାଯାଇଛି।
ଏହି ବାଲୁକା କଳା ଖୁବ ଶିଘ୍ର ଏକ ନୂଆ ରେକର୍ଡରେ ସ୍ଥାନିତ ହେବ ବୋଲି ଅନୁମାନ କରାଯାଇଛି।
