କଟକ, କୁଖ୍ୟାତ ଗ୍ୟାଙ୍ଗଷ୍ଟାର ହାଇଦର ଆଜି ପୋଲିସକୁ ଚକମା ଦେଇ କଟକ ମେଡିକାଲରୁ ଫେରାର ହୋଇଯାଇଛି। ଗତ 12 ଦିନ ଧରି ହାଇଦର କଟକ ମେଡିକାଲରେ ଚିକିତ୍ସିତ ହେଉଥିଲା। ତେବେ ତା ପାଖରେ ନିୟୋଜିତ ଥିବା ପୋଲିସ କର୍ମିଙ୍କୁ ନିଶା ଦେଇ ସେ ଫେରାର ହୋଇଯାଇଥିବାର ଜଣାପଡିଛି।
ହାଇଦର ପ୍ରଥମେ ବୁର୍ଲା ମେଡିକାଲରେ ଚିକିତ୍ସିତ ହେଉଥିଲା। ହେଲେ ସେଠାକାର ଡାକ୍ତର କଟକ ମେଡିକାଲକୁ ରେଫର କରିଦେଇଥିଲେ। ସେ କଟକରେ ଚିକିତ୍ସିତ ହେଉଥିଲା। ହେଲେ ଆଜି ଅପରାହ୍ନରେ ହାଇଦରକୁ ଇଂଜେକସନ ଦେବା ପାଇଁ ସ୍ବାସ୍ଥ୍ୟକର୍ମି ଯାଇଥିଲେ। ହେଲେ ହାଇଦର ବେଡରେ ନ ଥିଲେ। ଏପରିକି ତାଙ୍କର ଲୁଗାପଟା ମଧ୍ୟ ତାଙ୍କ ରୁମରେ ନ ଥିଲା।
ପ୍ରଥମେ ସ୍ବାସ୍ଥ୍ୟ କର୍ମି ସେଠାରେ ନିୟୋଜିତ ସୁରକ୍ଷା କର୍ମିଙ୍କୁ ଖୋଜିଥିଲେ। ହେଲେ ସେମାନେ ନିଘୋଡ ନିଦରେ ଶୋଇପଡିଥିଲେ। ସ୍ବାସ୍ଥ୍ୟ କର୍ମି ସେମାନଙ୍କୁ ଉଠାଇ ହାଇଦର କାହିଁ ବୋଲି ପଚାରିଥିଲେ। ହେଲେ ସେମାନେ ଉଠିବାର ଅବସ୍ଥାରେ ନ ଥିଲେ। ଟଳିଟଳି ବାହାରକୁ କୁଆଡେ ଯାଇଥିବ ବୋଲି କହିଥିଲେ।
ସେମାନଙ୍କର ଏପରି ଅବସ୍ଥା ଦେଖିବା ପରେ ସ୍ବାସ୍ଥ୍ୟକର୍ମି ଉଚ୍ଚ କର୍ତ୍ତୁପକ୍ଷଙ୍କୁ ଜଣାଇଥିଲେ। ଘଟଣା ପ୍ରଘଟ ହେବା ପରେ ପୋଲିସ ଫୋର୍ସ ପହଁଞ୍ଚି ଯାଞ୍ଚ ପକ୍ରିୟା ଆରମ୍ଭ କରିଛନ୍ତି। ଖୋଦ ପୋଲିସ କମିଶନର ଏକ ଟିମ ଗଠନ କରି ହାଇଦରଙ୍କୁ ଖୋଜିବା କାମରେ ଲାଗିଛନ୍ତି। କଟକ ମେଡିକାଲାକୁ ସଂଯୋଗ କରୁଥିବା ସମସ୍ତ ରାସ୍ତାକୁ ନାକାବନ୍ଧି କରାଯାଇଛି।
ହସପିଟାଲରେ ଥିବା ସମସ୍ତ ସିସିଟିଭି ଯାଞ୍ଚ କରାଯାଉଛି। ହାଇଦର ସୁରକ୍ଷାରେ ନିୟୋଜିତ ସୁରକ୍ଷା କର୍ମି କିପରି ହାଇଦର ଦେଇଥିବା ଖାଦ୍ୟ ଗ୍ରହଣ କରିଥିଲେ ସେ ନେଇ ମଧ୍ୟ ତଦନ୍ତ ଆରମ୍ଭ ହୋଇଛି। ଖୁବଶିଘ୍ର ହାଇଦର ଧରାପଡିବ ବୋଲି ପୋଲିସ କମିଶନର ସୌମେନ୍ଦ୍ର ପ୍ରିୟଦର୍ଶି କହିଛନ୍ତି।
ଖଣି ବ୍ୟବସାୟୀ ରଶ୍ମି ରଂଜନ ମହାପାତ୍ର ଏବଂ ଗ୍ୟାଙ୍ଗଷ୍ଟାର ସୁଲେମନର ଭାଇକୁ ହତ୍ୟା କରିବା ନେଇ କୋର୍ଟ ଆଜୀବନ କାରାଦଣ୍ଡ ଶୁଣାଇଛନ୍ତି। ଫଳରେ ହାଇଦର 14 ବର୍ଷ ଧରି ଜେଲରେ ରହିଛି। ବର୍ତ୍ତମାନ ସେ ଫେରାର ହେବା ନେଇ ପୋଲିସର ମୁଣ୍ଡବଥା ଆରମ୍ଭ ହୋଇଯାଇଛି।
