ନୂଆଦିଲ୍ଲୀ: ଅଷ୍ଟ୍ରେଲିଆର ହିନ୍ଦୁ ମନ୍ଦିର ଉପରେ ଆକ୍ରମଣ କମିବାର ନାମ ନେଉନାହିଁ। ଏଭଳି ମାମଲା ପ୍ରତିଦିନ ସାମ୍ନାକୁ ଆସୁଛି। ଏହି ଧାରାବାହିକରେ ଶନିବାର ଅଷ୍ଟ୍ରେଲିଆର ବ୍ରିସବେନରୁ ଏକ ସମାନ ମାମଲା ସାମ୍ନାକୁ ଆସିଛି। ଖାଲିସ୍ତାନର ସମର୍ଥକମାନେ ବ୍ରିସବେନରେ ଥିବା ଶ୍ରୀ ଲକ୍ଷ୍ମୀ ନାରାୟଣ ମନ୍ଦିରକୁ ପୁଣି ଥରେ ଭଙ୍ଗାରୁଜା କରିଛନ୍ତି।
ଉଲ୍ଲେଖନୀୟ ଯେ, ଜାନୁଆରୀ ମାସରେ ଅଷ୍ଟ୍ରେଲିଆର ମେଲବର୍ଣ୍ଣରେ ତିନି ଦିନ ମଧ୍ୟରେ ତିନୋଟି ହିନ୍ଦୁ ମନ୍ଦିର ଉପରେ ଆକ୍ରମଣ କରାଯାଇଥିଲା, ଯାହା ପରେ ଅଷ୍ଟ୍ରେଲିଆରେ ରହୁଥିବା ଭାରତୀୟ ଲୋକ କ୍ରୋଧ ପ୍ରକାଶ କରିଥିଲେ। ଏହା ପରେ ମଧ୍ୟ ମନ୍ଦିରରେ ଭଙ୍ଗାରୁଜା ସହିତ ଭାରତ ବିରୋଧୀ ସ୍ଲୋଗାନ ଲେଖାଯାଇଥିଲା।
ସ୍ଥାନୀୟ ଗଣମାଧ୍ୟମ ଅନୁଯାୟୀ ଏହି ଘଟଣା ଶନିବାର (ଦିନ ସକାଳେ ଘଟିଥିଲା। ଯେତେବେଳେ ଶ୍ରଦ୍ଧାଳୁମାନେ ସକାଳ ପୂଜା ପାଇଁ ଆସିଥିଲେ। ଏହି ସମୟରେ ବ୍ରିସବେନସ୍ଥିତ ଶ୍ରୀ ଲକ୍ଷ୍ମୀ ନାରାୟଣ ମନ୍ଦିରକୁ ଭଙ୍ଗାରୁଜା କରାଯାଇଥିଲା। ମନ୍ଦିର କାନ୍ଥରେ ଭାରତ ବିରୋଧୀ ସ୍ଲୋଗାନ ଲେଖାଯାଇଥିଲା। ଏହି ଘଟଣା ପଛରେ ଖାଲିସ୍ତାନୀ ସମର୍ଥକ ଥିବା କୁହାଯାଉଛି। ପ୍ରକାଶ ଯେ, ଦୁଇ ମାସ ମଧ୍ୟରେ ଏହା ହେଉଛି ଚତୁର୍ଥ ଘଟଣା।
ଅଷ୍ଟ୍ରେଲିଆରେ ହିନ୍ଦୁମାନଙ୍କର ମୋଟ ଜନସଂଖ୍ୟା ହେଉଛି ୬.୮୪ ଲକ୍ଷ। ହିନ୍ଦୁ ଏଠାରେ ତୃତୀୟ ବୃହତ୍ତମ ଧର୍ମ ଅଟେ। ଅଷ୍ଟ୍ରେଲିଆର ମୋଟ ଜନସଂଖ୍ୟାର ଏହା ୨.୭% ଅଟେ। ଏହି ସଂଖ୍ୟା ୨୦୨୧ ଜନଗଣନାରୁ ଆସିଛି। ଚାଇନା ପରେ ଭାରତୀୟ ଛାତ୍ରମାନେ ଦ୍ୱିତୀୟ ସ୍ଥାନରେ ଅଛନ୍ତି।
