ନୂଆଦିଲ୍ଲୀ: ଆଶ୍ଚର୍ଯ୍ୟ ହେଲେ ମଧ୍ୟ ସତକଥା। ବର୍ତ୍ତମାନ ସାରା ପୃଥିବୀରେ କରୋନା ଭାଇରସକୁ ନେଇ ଏକ ଆତଙ୍କର ବାତାବରଣ ସୃଷ୍ଟି ହେବାରେ ଲାଗିଛି। ଲୋକମାନେ ଏକ ଭୟଭୀତ ଅବସ୍ଥାରେ କାଳାତିପାତ କରୁଛନ୍ତି। କାଳେ ଏହି ଭାଇରସ ପଶିଯିବ ଆଉ ମୋତେ ମାରିଦେବ, ଏହି ଭୟ ଘାରିଛି। ଏହି ଭାଇରସ ନେଇ ଅଧା ପୃଥିବୀ ବର୍ତ୍ତମାନ ଲକଡାଉନ ସ୍ଥିତିରେ। ହେଲେ ଆଶ୍ଚର୍ଯ୍ୟର କଥା ଜଣେ 95 ବର୍ଷର ବୃଦ୍ଧା ଏହି ମାରାତ୍ମକ ଭାଇରସ କବଳରୁ ମୁକୁଳି ପାରିଛନ୍ତି। ଯାହକୁ ନେଇ ହସପିଟାଲରେ ଏକ ଆନନ୍ଦର ବାତାବରଣ ଖେଳିଯାଇଛି।
ଘଟଣାଟି ଘଟିଛି ଇଟାଲୀରେ। ଗତ ମାର୍ଚ୍ଚ 5 ତାରିଖରେ ଇଟାଲୀର ମୋଡେନା ହସପିଟାଲରେ ଜଣେ ବୃଦ୍ଧା ଆଲ୍ମା କ୍ଲାରା କ୍ରୋସିନ୍ ଥଣ୍ଡା କାସ ପାଇଁ ହସପିଟାଲରେ ଭର୍ତ୍ତି ହେଲେ। ଇଟାଲୀରେ କରୋନା ଭାଇରସ ଏକ ମାରାତ୍ମକ ପରିସ୍ଥିତି ସୃଷ୍ଟି କରିଥିବାରୁ ସ୍ବାସ୍ଥ୍ୟ କର୍ମୀମାନେ ଭୟଭୀତ ହୋଇପଡିଲେ। ମୁଖ୍ୟତଃ ବୟସ୍କ ଲୋକଙ୍କୁ ଏହି ରୋଗ ହେଉଥିବାରୁ ସମସ୍ତେ ଭାବିନେଲେ ଯେ କ୍ଲାରାଙ୍କୁ କରୋନା ହିଁ ହୋଇଛି। ତୁରନ୍ତ ତାଙ୍କ ସାମ୍ପୁଲ ପରୀକ୍ଷା ପାଇଁ ପଠାଗଲା ପରେ ଜଣାପଡିଲା ତାଙ୍କୁ କରୋନା ହିଁ ହୋଇଛି।
ହସପିଟାଲ କର୍ତ୍ତୃପକ୍ଷ କ୍ଲାରାଙ୍କୁ ଏହା ଅବଗତ କରାଇଲେ। ହେଲେ ସେ ହସି ହସି କହିଲେ ମୋର କିଛି ହୋଇ ନାହିଁ। ମୋତେ ଛାଡି ଦିଅନ୍ତୁ। ହେଲେ ନିୟମ ଅନୁସାରେ କ୍ଲାରାଙ୍କୁ 14 ଦିନ ପର୍ଯ୍ୟନ୍ତ ଆସୋଲେସନରେ ରଖାଗଲା। ଯେହେତୁ ଏହି ରୋଗ ପାଇଁ କିଛି ଔଷଧ ନାହିଁ ସେଥିପାଇଁ ତାଙ୍କୁ କିଛି ଆଣ୍ଟିବାୟୋଟିକ୍ ମଧ୍ୟ ଦିଆଗଲା ନାହିଁ। ଆଶ୍ଚର୍ଯ୍ୟର କଥା ବୃଦ୍ଧା ଜଣଙ୍କ ଧିରେ ଧିରେ ଭଲ ହୋଇଗଲେ। ପରେ ଜଣାପଡିଲା ଯେ ବୃଦ୍ଧା ଜଣଙ୍କ କରୋନା କବଳରୁ ମୁକୁଳି ଯାଇଛନ୍ତି। ଏହି ଖବର ପ୍ରଚାର ହେବା ପରେ ହସପିଟାଲ କର୍ତ୍ତୃପକ୍ଷ ତାଙ୍କୁ ଦେଖା କରିବାକୁ ଆସିଲେ। ସମସ୍ତେ ତାଙ୍କ ସହ ଫଟୋ ନେବା ସହିତ ଖୁସିଗପ ମଧ୍ୟ କରିଥିଲେ।
ଏ ସଂପର୍କରେ ଇଟାଲୀ ଗଣମାଧ୍ୟ ତାଙ୍କର ସାକ୍ଷାତକାର ନେବା ବେଳେ ସେ ହସି ହସି କହିଥିଲେ ଯେ Yes, yes, I’m fine. They were good people who looked after me well, and now they’ll send me home in a little while. ‘
ବର୍ତ୍ତମାନ କରୋନା ଭାଇରସ ଚୀନ ପରେ ଇଟାଲୀରେ ସବୁଠାରୁ ଭୟାନକ ପରିସ୍ଥିତି ସୃଷ୍ଟି କରିଛି। ଆକ୍ରାନ୍ତ ସଂଖ୍ୟା ଦିନକୁ ଦିନ ବଢିବାରେ ଲାଗିଛି। ବର୍ତ୍ତମାନ ସୁଦ୍ଧା ଇଟାଲୀରେ 69 ହଜାର 176 ଜଣ ଆକ୍ରାନ୍ତ ହୋଇଥିବା ବେଳେ 6 ହଜାର 820 ଜଣ ମୃତ୍ୟୁବରଣ କରି ସାରିଲେଣି। ଏହି ସଂଖ୍ୟା ଆହୁରି ବଢିବ ବୋଲି ଜଣାପଡିଛି। ତେବେ ଖୁସିର କଥା ଏମାନଙ୍କ ମଧ୍ୟରୁ ପ୍ରାୟ 8 ହଜାର 326 ଜଣ ସୁସ୍ଥ ହୋଇ ଘରକୁ ଫେରିସାରିଲେଣି।