ବଲିଉଡ୍ ମିଷ୍ଟର ଫରଫେକନିଷ୍ଟ୍ ଆମିର ଖାଁ ଆଜି ୫୪ ବର୍ଷରେ ପଦାର୍ପଣ କରିଛନ୍ତି। ସେ ୧୯୬୫ ମାର୍ଚ୍ଚ ୧୪ରେ ମୁମ୍ବାଇଠାରେ ଜନ୍ମଗ୍ରହଣ କରିଥିଲେ। ୧୯୭୩ ମସିହାରେ ନାସିର୍ ହୁସୈନଙ୍କ ଫିଲ୍ମ ‘ୟାଦୋଁ କି ବାରାତ୍’ରେ ଶିଶୁ କଳାକାର ରୂପେ ନଜର ଆସିଥିଲେ। ୧୯୮୮ରେ ଫିଲ୍ମ ‘କୟାମତ୍ ସେ କୟାମତ୍ ତକ୍’ ଫିଲ୍ମରେ ବଲିଉଡ୍ରେ ହିରୋ ରୂପେ ନଜର ଆସିଥିଲେ । ଏହି ଫିଲ୍ମରେ ତାଙ୍କ ବିପକ୍ଷରେ ନଜର ଆସିଥିଲେ ଅଭିନେତ୍ରୀ ଜୁହୀ ଚାଓ୍ବାଲା। ୧୯୮୯ ମସିହାରେ ‘ରାଖ୍’ ଫିଲ୍ମରେ ନିଜର ବଳିଷ୍ଠ ଅଭିନୟ ପଇଁ ସେ ଜାତୀୟ ପୁରସ୍କାର ପାଇଥିଲେ। ୧୯୯୦ ମସିହାରେ ବହୁ ସଫଳ ବ୍ୟବସାୟ କରିଥିବା ଫିଲ୍ମରେ ଅଭିନୟ କରିଥିଲେ। ‘ଦିଲ୍’, ‘ରାଜା ହିନ୍ଦୁସ୍ତାନୀ’, ‘ସର୍ଫରୋଶ୍’ ପରି ବହୁ ସଫଳ ଫିଲ୍ମରେ ଅଭିନୟ କରିଥିଲେ। ୧୯୯୯ ମସିହାରେ ନିଜ ପ୍ରଡକ୍ସନ ହାଉସ୍ ଦ୍ବାରା ‘ଲଗାନ୍’ ଫିଲ୍ମ ପ୍ରସ୍ତୁତ କରିଥିଲେ, ସେ ଏହି ଫିଲ୍ମରେ ଅଭିନୟ ମଧ୍ୟ କରିଥିଲେ। ଏହି ଫିଲ୍ମଟି ବିଦେଶୀ ଭାଷାର ଫିଲ୍ମରେ ଏକାଡେମୀକ ଆଓ୍ବାର୍ଡ ଜିତିବା ସହିତ ଜାତୀୟ ପୁରସ୍କାର ଓ ଓସ୍କାର ଆଓ୍ବାର୍ଡ ପାଇଁ ମନୋନୀତ ହୋଇଥିଲା। ପରବର୍ତ୍ତୀୟ ସମୟରେ ‘ଫନା’, ‘ରଙ୍ଗଦେ ବସନ୍ତୀ’ ଫିଲ୍ମରେ ଉଚ୍ଚକୋଟୀର ଅଭିନୟ କରିଥିଲେ। ୨୦୦୭ ମସିହାରେ ତାଙ୍କ ନିର୍ଦ୍ଦେଶିତ ତଥା ଅଭିନୀତ ‘ତାରେ ଜମିନ୍ ପର୍’ ଫିଲ୍ମ ପରଦାକୁ ଆସିଥିଲା। ଏହି ଫିଲ୍ମ ପାଇଁ ସେ ଫିଲ୍ମ ଫେୟାର୍ର ଶ୍ରେଷ୍ଠ ନିର୍ଦ୍ଦେଶକର ପୁରସ୍କାର ମଧ୍ୟ ହାତେଇଥିଲେ। ପ୍ରତିଟି ଫିଲ୍ମରେ କିଛି ନୂଆ କରିଥା’ନ୍ତି ଆମୀର୍। ପ୍ରଥମ ୧୦୦ କୋଟି କ୍ଲବ୍ରେ ଆମୀର୍ ଫିଲ୍ମ ଏଣ୍ଟ୍ରି କରି ବଲିଉଡ୍ ଇଣ୍ଡଷ୍ଟ୍ରିରେ ବେଶ୍ ଚହଳ ସୃଷ୍ଟି କରିଥିଲା। ଆମୀର୍ଙ୍କ ସବୁଠୁ ଅଧିକ ବ୍ୟବସାୟ କରିଥିବା ଫିଲ୍ମ ଗୁଡ଼ିକ ମଧ୍ୟରେ ରହିଛି ‘ଗଜ୍ନୀ’, ‘ଥ୍ରୀ ଇଡିଅଟ୍ସ୍’, ‘ଧୁମ୍ ୩’, ‘ପିକେ’, ‘ଦଙ୍ଗଲ୍’ ‘ସିକ୍ରେଟ୍ ସୁପରଷ୍ଟାର୍’। ଫିଲ୍ମ ଚୟନକୁ ନେଇ ବେଶ୍ ସତର୍କ ଥା’ନ୍ତି ଏହି ଅଭିନେତା ଜଣକ। ଫିଲ୍ମ ଜଗତରେ ତାଙ୍କର ଉଲ୍ଲେଖନୀୟ ଅବଦାନ ପାଇଁ ଭାରତ ସରକାରଙ୍କ ତରଫରୁ ପଦ୍ମଶ୍ରୀ ଓ ପଦ୍ମଭୂଷଣ ପୁରସ୍କାରରେ ସମ୍ମାନିତ ହୋଇଛନ୍ତି। ୨୦୧୭ ମସିହାରେ ଚାଇନା ସରକାରଙ୍କ ତରଫରୁ ସମ୍ମାନିତ ମଧ୍ୟ ହୋଇଛନ୍ତି। କ୍ୟାରିୟର୍ରେ ସଫଳ ଥିବା ଏହି ଅଭିନେତା ଜଣକ ମଧ୍ୟ ବ୍ୟକ୍ତିଗତ ଜୀବନରେ ମଧ୍ୟ ବେଶ୍ ଚର୍ଚ୍ଚାରେ ରହିଥିଲେ। ଆମିର ରୀନା ଦତ୍ତଙ୍କ ପ୍ରେମରେ ଥିଲେ ପାଗଳ। ଆମିର୍ ହାତ କାଟି ରକ୍ତରେ ରୀନାଙ୍କ ପାଖକୁ ଚିଠି ଲେଖିଥିଲେ। ଆମିର ମୁସଲମାନ୍ ଥିବାବେଳେ ରୀନା ଥିଲେ ହିନ୍ଦୁ। ସବୁ ପ୍ରକାର ବାଧାକୁ ଖାତରି୍ ନ କରି ଦୁହେଁ ୧୯୮୬ରେ ବିବାହ ବନ୍ଧନରେ ଆବଦ୍ଧ ହୋଇଥିଲେ। ପରେ ପାରିବାରିକ ସମସ୍ୟା ଯୋଗୁ ୨୦୦୨ରେ ଆମିର ଏବଂ ରୀନାଙ୍କର ଛାଡପତ୍ର ହୋଇଥିଲା। ଏହାର ୩ ବର୍ଷ ପରେ ଆମିର ୨୦୦୫ରେ କିରଣ ରାଓଙ୍କୁ ବିବାହ କରିଥିଲେ। ଆମିର୍ ଓ ରୀନାଙ୍କର ଗୋଟିଏ ପୁଅ ଓ ଗୋଟିଏ ଝିଅ ଥିବାବେଳେ ଆମିର୍ ଓ କିରନ୍ଙ୍କର ମଧ୍ୟ ଗୋଟିଏ ପୁଅ ଅଛି। ତେବେ ଆମିର୍ଙ୍କ ପୁଅ ଜୁନୈଦ୍ ବଲିଉଡ୍ରେ କ୍ୟାରିଅର୍ କରିବା ପାଇଁ ପ୍ରସ୍ତୁତି ଆରମ୍ଭ କରିସାରିଥିବାବେଳେ ଇରା ସୋସିଆଲ୍ ମିଡ଼ିଆରେ ବେଶ୍ ସକ୍ରିୟ।
