Tag: ajit pawar

ନୂଆଦିଲ୍ଲୀ: ଅକ୍ଟୋବରରେ ହେବାକୁ ଥିବା ମହାରାଷ୍ଟ୍ର ବିଧାନସଭା ନିର୍ବାଚନ ପୂର୍ବରୁ ୨୦୨୪-୨୫ ପାଇଁ ରାଜ୍ୟ ବଜେଟ୍ ଉପସ୍ଥାପନ କରାଯାଇଛି। ମହାରାଷ୍ଟ୍ର ବିଧାନସଭାର ମୌସୁମୀ ଅଧିବେଶନ ଆଜି ଠାରୁ ଆରମ୍ଭ ହୋଇଛି। ମହାରାଷ୍ଟ୍ରର ଉପ-ମୁଖ୍ୟମନ୍ତ୍ରୀ ଏବଂ ଅର୍ଥମନ୍ତ୍ରୀ ଅଜିତ ପାୱାର ରାଜ୍ୟ ବଜେଟ୍ ଉପସ୍ଥାପନ କରିବା ସମୟରେ ଅନେକ ଉପହାର ଘୋଷଣା କରିଛନ୍ତି। ଆଜି ଅଜିତ ପାୱାର ରାଜ୍ୟର ଯୋଗ୍ୟ ପରିବାରକୁ ତିନୋଟି ମାଗଣା ଏଲପିଜି ସିଲିଣ୍ଡର ଦେବା ଏବଂ ମହିଳାମାନଙ୍କୁ ପ୍ରତି ମାସରେ ୧୫୦୦ ଟଙ୍କା ଆର୍ଥିକ ସହାୟତା ଦେବା ଭଳି ବଜେଟରେ ଘୋଷଣା କରିଛନ୍ତି। ଆଜି ଉପମୁଖ୍ୟମନ୍ତ୍ରୀ ଅଜିତ ପାୱାର ବିଧାନସଭାରେ ୨୦୨୩-୨୪ ର ଆର୍ଥିକ ସମୀକ୍ଷା ମଧ୍ୟ ଉପସ୍ଥାପନ କରିଛନ୍ତି।

ଅର୍ଥମନ୍ତ୍ରୀ ଅଜିତ ପାୱାର ‘ମୁଖ୍ୟମନ୍ତ୍ରୀ ମାଝି ଲଡକି ବହିନ ଯୋଜନା’ କାର୍ଯ୍ୟକାରୀ କରିବାକୁ ଘୋଷଣା କରିଛନ୍ତି। ମହିଳାମାନଙ୍କ ପାଇଁ ଏହି ଆର୍ଥିକ ସହାୟତା ଯୋଜନାରେ, ୨୧ ବର୍ଷରୁ ୬୦ ବର୍ଷ ବୟସର ଯୋଗ୍ୟ ମହିଳାଙ୍କୁ ମାସିକ ୧୫୦୦ ଟଙ୍କା ଭତ୍ତା ଦେବାକୁ ଘୋଷଣା କରାଯାଇଛି। ଜୁଲାଇରୁ ‘ମାଝି ଲଡକି ବହିନ ଯୋଜନା’ କାର୍ଯ୍ୟକାରୀ ହେବ। ଏହି ଯୋଜନା ପାଇଁ ବାର୍ଷିକ ୪୬ ହଜାର କୋଟି ଟଙ୍କା ବଜେଟ୍ ଆବଣ୍ଟନ କରାଯିବ।

ମହାରାଷ୍ଟ୍ରର ବଜେଟରେ ଅଜିତ ପାୱାର ମୁମ୍ବାଇ, ଥାନେ ଏବଂ ନଭି ମୁମ୍ବାଇରେ ପେଟ୍ରୋଲ ଏବଂ ଡିଜେଲକୁ ଶସ୍ତା କରିବା ପାଇଁ ଏକ ବଡ଼ ଘୋଷଣା କରିଛନ୍ତି। ଏହି ଘୋଷଣା ପରେ ମୁମ୍ବାଇ, ଥାନେ ଏବଂ ନଭି ମୁମ୍ବାଇରେ ପେଟ୍ରୋଲ ଏବଂ ଡିଜେଲ ଶସ୍ତା ହେବ। ଉପ-ମୁଖ୍ୟମନ୍ତ୍ରୀ ଅଜିତ ପାୱାର କହିଛନ୍ତି ଯେ, “ମୁମ୍ବାଇ ପାଇଁ ଡିଜେଲ ଉପରେ ଟିକସ ୨୪ ପ୍ରତିଶତରୁ ୨୧ ପ୍ରତିଶତକୁ ହ୍ରାସ କରାଯାଉଛି। ଏହାଦ୍ୱାରା ଡିଜେଲର ମୂଲ୍ୟ ଲିଟର ପିଛା ୨ ଟଙ୍କା ହ୍ରାସ ପାଇବ। ମୁମ୍ବାଇ ଅଞ୍ଚଳରେ ପେଟ୍ରୋଲ ଉପରେ ଟିକସ ୨୬ ପ୍ରତିଶତରୁ ୨୫ କୁ ହ୍ରାସ କରାଯାଇଛି। ଏହାଦ୍ୱାରା ପେଟ୍ରୋଲର ମୂଲ୍ୟ ଲିଟର ପିଛା ୬୫ ପଇସା ହ୍ରାସ ପାଇବ।”

‘ମୁଖମନ୍ତ୍ରୀ ଅନ୍ନପୂର୍ଣ୍ଣା ଯୋଜନା’ ଅଧୀନରେ ପ୍ରତିବର୍ଷ ତିନିଟି ଏଲପିଜି ସିଲିଣ୍ଡର ପାଞ୍ଚ ଜଣଙ୍କ ଯୋଗ୍ୟ ପରିବାରକୁ ମାଗଣାରେ ଦିଆଯିବ। ଏହା ଅଧୀନରେ ରାଜ୍ୟର ୫୨.୪ ଲକ୍ଷ ପରିବାର ପ୍ରତିବର୍ଷ ତିନୋଟି ମାଗଣା ଏଲପିଜି ସିଲିଣ୍ଡର ପାଇବେ।

ପଶୁ ଆକ୍ରମଣ ଯୋଗୁଁ ମୃତ୍ୟୁ ମାମଲାରେ ରାଜ୍ୟ ସରକାର ଆର୍ଥିକ ସହାୟତା ବୃଦ୍ଧି କରିଛନ୍ତି। ବୁଲା ପଶୁଙ୍କ ଆକ୍ରମଣରେ ମୃତ୍ୟୁବରଣ କରିଥିବା ଲୋକଙ୍କ ପରିବାରକୁ ୨୫ ଲକ୍ଷ ଟଙ୍କା ମିଳିବ, ପୂର୍ବରୁ ୨୦ ଲକ୍ଷ ଟଙ୍କା ଆର୍ଥିକ ସହାୟତା ଦିଆଯାଇଥିଲା।

ମହାରାଷ୍ଟ୍ରର ସମସ୍ତ ଚାଷୀଙ୍କୁ କପା ଏବଂ ସୋୟାବିନ ଫସଲ ପାଇଁ ସରକାର ହେକ୍ଟର ପିଛା ୫୦୦୦ ଟଙ୍କା ବୋନସ ଦେବେ। ଏହା ବ୍ୟତୀତ ମହାରାଷ୍ଟ୍ର ସରକାର ଦୁଗ୍ଧ ଉତ୍ପାଦନ କରୁଥିବା କୃଷକମାନଙ୍କୁ ଜୁଲାଇ ୧ ତାରିଖ ୨୦୨୪ ପରେ ମଧ୍ୟ ଲିଟର ପିଛା ୫ ଟଙ୍କା ବୋନସ ଦେବେ।

ମହାରାଷ୍ଟ୍ର ବଜେଟରେ ରାଜ୍ୟର ୧୭ ଟି ସହରର ୧୦ ହଜାର ମହିଳା ଇ-ରିକ୍ସା କିଣିବା ପାଇଁ ଆର୍ଥିକ ସହାୟତା ପାଇବେ। ଏହି ଯୋଜନା ପାଇଁ ୮୦ କୋଟି ଟଙ୍କା ଆବଣ୍ଟନ ପାଇଁ ଏକ ପ୍ରସ୍ତାବ ବଜେଟରେ ଉପସ୍ଥାପିତ ହୋଇଛି।

ମହାରାଷ୍ଟ୍ରର ବଜେଟରେ ଅର୍ଥମନ୍ତ୍ରୀ ଅଜିତ ପାୱାର ଶୁଭମଙ୍ଗଲ ସାମୁହିକ ବିବାହ ପଞ୍ଜୀକରଣ ଯୋଜନା ଅନ୍ତର୍ଗତ ମହିଳାମାନଙ୍କୁ ଦିଆଯାଉଥିବା ୧୦ ହଜାର ଟଙ୍କାକୁ ୨୫ ହଜାର ଟଙ୍କାକୁ ବୃଦ୍ଧି କରିବାକୁ ପ୍ରସ୍ତାବ ଦେଇଛନ୍ତି।