ଭୁବନେଶ୍ବର: ଦୀର୍ଘ ୨୭ ବର୍ଷ ପରେ ପୁଣି ଥରେ ଦିଲ୍ଲୀ ଦଖଲ କରିଛି ଭାରତୀୟ ଜନତା ପାର୍ଟି। ଦଳ ଦିଲ୍ଲୀ ବିଧାନସଭାରେ ଯେପରି ଆସନ ହାସଲ କରିଛି ତାହା ଏକ ରେକର୍ଡ। ସାରା ଦେଶରେ ବର୍ତ୍ତମାନ ବିଜେପିର ଦିଲ୍ଲୀ ଦରବାର ଦଖଲ ନେଇ ଚାଲିଛି ଚର୍ଚ୍ଚା। ତେବେ ଏହା ଭିତରେ ଜଣେ ଓଡିଆ ନେତାଙ୍କ ନାମ ମଧ୍ୟ ବେଶ ଚର୍ଚ୍ଚାରେ ରହିଛି। ସେ ହେଉଛନ୍ତି କେନ୍ଦ୍ରାପଡା ସାଂସଦ ତଥା ବିଜେପିର ଉପାଧ୍ୟକ୍ଷ ବୈଜୟନ୍ତ ପଣ୍ଡା।
କାରଣ ହେଲା ଦିଲ୍ଲୀ ବିଧାନସଭା ନିର୍ବାଚନର ପୁରା ଦାୟିତ୍ବ ନେଇଥିଲେ ସାଂସଦ ବୈଜୟନ୍ତ ବା ଜୟ ପଣ୍ଡା। ଗତବର୍ଷ ଅକ୍ଟୋବର ମାସରେ ଦଳ ତାଙ୍କୁ ଦିଲ୍ଲୀର ପ୍ରଭାରୀ ଭାବେ ନିଯୁକ୍ତ କରିଥିଲା। ବୈଜୟନ୍ତଙ୍କ ଦିଲ୍ଲୀରେ ଭଲ ଦଖଲ ରହିଥିବାରୁ ଦଳର ନେତା ଅମିତ ଶାହ ଏବଂ ସଭାପତି ଜେପି ନଡ୍ଡା ତାଙ୍କ ଉପରେ ଭରସା କଲେ। ଆଉ ତାହାର ଫଳ ଦେଖାଇଦେଲେ ସାଂସଦ ବୈଜୟନ୍ତ ପଣ୍ଡା।
ମୁଖ୍ୟତଃ ବୈଜୟନ୍ତ ଦିଲ୍ଲୀର ପାଣିପାଗ ଦେଖି ଗୋଟି ଚାଳନା କରିବାରେ ବେଶ ଧୂରନ୍ଧର ଅଛନ୍ତି। ନିର୍ବାଚନ ପୂର୍ବରୁ ପ୍ରମୁଖ ନେତାଙ୍କୁ ବିଜେପିରେ ସାମିଲ କରାଇବା ହେଉ କିମ୍ବା ଟିକେଟ ବଣ୍ଟନ କରିବା ହେଉ, ଏଥିରେ ବୈଜୟନ୍ତଙ୍କ ଭୂମିକାକୁ ଦିଲ୍ଲୀ ବିଜେପି ନେତୃବୃନ୍ଦ ବେଶ ଅନୁଭବ କରିଛନ୍ତି। ଟିକେଟ ବଣ୍ଟାରେ ଦଳୀୟ କମିଟର ଭୂମିକା ଥିଲେ ମଧ୍ୟ ବୈଜୟନ୍ତଙ୍କ କଥାକୁ ଦଳ ଗୁରୁତର ସହ ବିଚାର କରିଛି। ଫଳରେ ଦିଲ୍ଲୀରେ ବିଜେପିକୁ ଆଜି ଏକ ବଡ ସଫଳତା ମିଳିପାରିଛି।
ଦିଲ୍ଲୀ ନିର୍ବାଚନ ଜୟ ପଣ୍ଡାଙ୍କ ରାଜନୈତିକ କ୍ୟାରିୟରରେ ଥିଲା ଏକ ବଡ ଚ୍ୟାଲେଞ୍ଜ। କାରଣ ଦଳ ଯେତେବେଳେ ତାଙ୍କୁ ଦିଲ୍ଲୀର ପ୍ରଭାରୀ ଭାବେ ଘୋଷଣା କଲା ସେତେବେଳେ ଅନେକ ଭାବିଥିଲେ ଯେ, ସେ ଆପ କୁ ଠିକରେ ମୁକାବିଲା କରିପାରିବେ ନାହିଁ। ହେଲେ ଆଶ୍ଚର୍ଯ୍ୟର କଥା ଦାୟିତ୍ବ ନେବାର ଦୁଇ ମାସ ମଧ୍ୟରେ ସେ ଦିଲ୍ଲୀରେ ମୋଦିଙ୍କ ସଫଳତା ଗାଥାକୁ ଲୋକଙ୍କ ମଧ୍ୟରେ ବାଣ୍ଟିବାରେ ସକ୍ଷମ ହୋଇପାରିଥିଲେ। ମୋଦି ଶାହାଙ୍କ ପ୍ରତିଟି କଥା ସେ ତଳ ସ୍ତରର କର୍ମିଙ୍କ ନିକଟରେ ପହଞ୍ଚାଇବାରେ ସଫଳ ହୋଇପାରିଥିଲେ।
ବର୍ତ୍ତମାନ ଦିଲ୍ଲୀର ବଡ ବିଜୟ ପରେ ଜାତୀୟ ରାଜନୀତିରେ ବୈଜୟନ୍ତଙ୍କ ପତିୟାରା ଆହୁରି ବଢିଯାଇଛି। ମୋଦି ଶାହାଙ୍କ ସେ ବହୁ ଆଗରୁ ଗୁଡ ବଏ ଭାବରେ ରହି ଆସିଛନ୍ତି। ହେଲେ ଦିଲ୍ଲୀ ନିର୍ବାଚନ ସଫଳତା ପରେ ତାହା ଆହୁରି ଦୃଢ ହୋଇଯାଇଛି। ତେବେ ବୈଜୟନ୍ତଙ୍କ ଏହି ସଫଳତା ପରେ ତାଙ୍କୁ ଦଳ ପୁରସ୍କୃତ କରିବ ବୋଲି ଆଶା କରାଯାଉଛି। ମୁଖ୍ୟତଃ ମନ୍ତ୍ରୀ ମଣ୍ଡଳ ଅଦଳବଦଳରେ ତାଙ୍କୁ ମନ୍ତ୍ରୀପଦ ମିଳିବ ବୋଲି ଓଡିଶା ରାଜନୀତିରେ ବେଶ ଚର୍ଚ୍ଚା ଆରମ୍ଭ ହୋଇଯାଇଛି।
