ନୂଆଦିଲ୍ଲୀ, ବେଙ୍ଗଲ କେମିକାଲ୍ସ ଆଣ୍ଡ ଫାର୍ମାସ୍ୟୁଟିକାଲ୍ ଲିମିଟେଡ୍ (ବିସିପିଏଲ୍), ସାର ଏବଂ ରସାୟନ ମନ୍ତ୍ରଣାଳୟ ଅଧୀନରେ ଥିବା ଏକ ରାଷ୍ଟ୍ରାୟତ୍ତ ଉଦ୍ୟୋଗ, କୋଭିଡ-19 ମହାମାରୀ ସମୟରେ ଚାହିଦା ବୃଦ୍ଧିକୁ ଦୃଷ୍ଟିରେ ରଖି ଉତ୍ପାଦନ କାର୍ଯ୍ୟ ଜାରି ରଖିଛି । ଗୋଟିଏ ଦିନରେ 51,960 ବୋତଲ ଫିନାଇଲ ଉତ୍ପାଦନ କରି ଏହା ଏକ ସର୍ବକାଳୀନ ରେକର୍ଡ ସୃଷ୍ଟି କରିଛି । ପଶ୍ଚିମବଙ୍ଗର ଉତ୍ତର 24-ପ୍ରଗଣା ପାନିହାତିସ୍ଥିତ ବିସିପିଏଲ୍, ୟୁନିଟ୍ ଏହି ସଫଳତା ହାସଲ କରିଛି ।
କେନ୍ଦ୍ର ରସାୟନ ଏବଂ ସାର ମନ୍ତ୍ରୀ ଡି.ଭି ସଦାନନ୍ଦ ଗୌଡା ଏହି ସର୍ବକାଳୀନ ରେକର୍ଡ ଉତ୍ପାଦନ ପାଇଁ କମ୍ପାନୀର ପରିଚାଳନା କର୍ତ୍ତୃପକ୍ଷ ଏବଂ କର୍ମଚାରୀମାନଙ୍କୁ ଅଭିନନ୍ଦନ ଜଣାଇଛନ୍ତି ।
ବିସିପିଏଲ୍ ନିର୍ଦ୍ଦେଶକ (ଅର୍ଥ) ପି. ଏମ ଚନ୍ଦ୍ରିୟା କହିଛନ୍ତି ଯେ ‘ଏହା ବିସିପିଏଲର 120 ବର୍ଷର ପୁରୁଣା ଇତିହାସରେ ଏକ ସର୍ବକାଳୀନ ରେକର୍ଡ । ଜୁଲାଇ 2020ରେ ଆମେ ଗୋଟିଏ ଦିନରେ 38,000 ଫିନାଇଲ ବୋତଲ ଉତ୍ପାଦନ କରିବାରେ ସଫଳ ହୋଇଥିଲୁ । ଏକ ମାସ ମଧ୍ୟରେ କମ୍ପାନୀ ଏହାକୁ ଆହୁରି ବୃଦ୍ଧି କରି ବର୍ତ୍ତମାନ ଗୋଟିଏ ଦିନରେ 50,000ରୁ ଅଧିକ ବୋତଲ ଫିନାଇଲ ଉତ୍ପାଦନ କରିପାରିଛି । ଅଗଷ୍ଟ 23, 2020ରେ 51,960 ବୋତଲ ଉତ୍ପାଦନ କରାଯାଇଥିଲା ।
ବିସିପିଏଲ କହିଛି, ଯେ କୋଭିଡ-19 ମହାମାରୀ ପୂର୍ବରୁ ଏହା ପ୍ରତିଦିନ 15,000 ବୋତଲ ଉତ୍ପାଦନ କରୁଥିଲା । ଫିନାଇଲର ମାସିକ ବିକ୍ରି 3 ରୁ 3.5 କୋଟି ଟଙ୍କା ଥିଲା । ‘‘କୋଭିଡ ସଂକ୍ରମଣ ପରେ ଏହା ମାସକୁ 4.5 ରୁ 6 କୋଟି ଟଙ୍କାକୁ ବୃଦ୍ଧି ପାଇଛି । ଯାହା ଏହି ଉତ୍ପାଦର ଚାହିଦାକୁ ସ୍ପଷ୍ଟ ପ୍ରମାଣିତ କରୁଛି ’’ ।
ଏହି ସ୍ୱଚ୍ଛତା ଉତ୍ପାଦର ବ୍ୟାପକ ଚାହିଦାକୁ ପୂରଣ କରିବା ପାଇଁ କୋଭିଡ ମହାମାରୀ ପରିସ୍ଥିତିରେ ମଧ୍ୟ କର୍ମଚାରୀମାନେ ଅକ୍ଟୋବର 20 (ପୂଜା ଛୁଟି) ପର୍ଯ୍ୟନ୍ତ ସମସ୍ତ ରବିବାର ଏବଂ ଛୁଟିଦିନରେ ଦୁଇଟି ସିଫ୍ଟରେ କାର୍ଯ୍ୟ କରିବେ ।
ବେଙ୍ଗଲ କେମିକାଲ୍ସ ଆଣ୍ଡ ଫାର୍ମାସ୍ୟୁଟିକାଲ୍ ଲିମିଟେଡ୍ ହେଉଛି ଭାରତର ପ୍ରଥମ ଫାର୍ମାସ୍ୟୁଟିକାଲ୍ କମ୍ପାନୀ ଯାହା ଅନେକ ଘର କରଣା, ଫାର୍ମା ଏବଂ ଶିଳ୍ପ ସଂସ୍ଥା ପାଇଁ ଉତ୍ପାଦ ପ୍ରସ୍ତୁତ କରେ ।