ପୁଣେ : ଭାରତର କିଛି ସହରରେ ଧୀରେ ଧୀରେ କରୋନା ସଂକ୍ରମିତଙ୍କ ସଂଖ୍ୟା ବଢିବାରେ ଲାଗିଛି । ମହାରାଷ୍ଟ୍ରରେ 11ଟି କରୋନା ସଂକ୍ରମିତ ମାମଲା ସାମ୍ନାକୁ ଆସିଛି । ଏହାକୁ ଦେଖି ମହାରାଷ୍ଟ୍ର ସରକାର ସତର୍କ ହୋଇଛନ୍ତି। ଏହା ସହିତ ନେତାମାନେ ମଧ୍ୟ ଏହି ଭାଇରସ ପ୍ରତି ସତର୍କ ରହି ସଚେତନତା କରୁଛନ୍ତି । କରୋନା ମାମଲା ବୃଦ୍ଧି ଦେଖି ବଜାରରେ ମାସ୍କ ଓ ସାନିଟାଇଜର୍ ଦାମ ଆକାଶ ଛୁଆଁ ହୋଇଯାଇଛି । ସେହିପରି ବଜାରରେ ମଧ୍ୟ ଏହାକୁ ନେଇ କଳାବଜାରୀ ହେଉଥିବାର ଖବର ମିଳୁଛି ।
ସାଧାରଣରେ କରୋନାକୁ ନେଇ ବେଶ୍ ସଚେତନ ରହୁଥିବାବେଳେ ମାସ୍କ ଓ ସାନିଟାଇଜର୍ର ବର୍ଦ୍ଧିତ ଦର ଯୋଗୁଁ ଏହାକୁ କ୍ରୟ କରିବାରେ ଜନତା ବେଶ୍ ଅସୁବିଧା ଭୋଗ କରୁଛନ୍ତି । ଜନତାଙ୍କ ଏହି ସମସ୍ୟାକୁ ଦେଖି ନେତାମାନେ ମଧ୍ୟ ନିଜ ନିଜ ନିର୍ବାଚନୀ କ୍ଷେତ୍ରରେ ଜନତାଙ୍କ ହୃଦୟ ଜିତିବା ପାଇଁ ପଦକ୍ଷେପ ନେଉଛନ୍ତି । ପୁଣେର ମହାରାଷ୍ଟ୍ରର ବିଜେପି ଅଧ୍ୟକ୍ଷ ଚନ୍ଦ୍ରକାନ୍ତ ପାଟିଲ୍ ନିଜ ନିର୍ବାଚନୀ କ୍ଷେତ୍ରର ଜନତାଙ୍କ ପାଇଁ ମାଗଣା ମାସ୍କ ଓ ସାନିଟାଇଜର୍ ବିତରଣ ଆରମ୍ଭ କରିଛନ୍ତି । ପୁଣରେ କରୋନାର ସମ୍ପର୍କିତ 8ଟି ମାମଲା ସାମ୍ନାକୁ ଆସିଛି ।
ମହାରାଷ୍ଟ୍ରରେ କରୋନା ସଂକ୍ରମିତଙ୍କ ବୃଦ୍ଧି ଯୋଗୁଁ ମହାରାଷ୍ଟ୍ର ମୁଖ୍ୟମନ୍ତ୍ରୀ ଉଦ୍ଧବ ଠାକ୍ରେ ବୈଠକ କରିବା ସହିତ ଏହା ଉପରେ କଡା ନଜର ରଖିଛନ୍ତି । ସ୍ବାସ୍ଥ୍ୟ ବିଭାଗ ସଚେତନତା କାର୍ଯ୍ୟକ୍ରମ ଅଭିଯାନ ଆରମ୍ଭ କରିଛନ୍ତି । ଏପରିକି ଆଇପିଏଲ୍କୁ ବିନା ଦର୍ଶକରେ ଆୟୋଜିତ କରିବା ନେଇ ଚିନ୍ତା କରାଯାଉଛି ।
ସୂଚନାଯୋଗ୍ୟ, ଭାରତରେ କରୋନା ସଂକ୍ରମିତଙ୍କ ସଂଖ୍ୟା 73ରେ ପହଞ୍ଚିଲାଣି । କେରଳରେ 17ଜଣଙ୍କୁ ଚିହ୍ନଟ କରାଯାଇଥିବାବେଳେ ମହାରାଷ୍ଟ୍ରରେ 11, କର୍ଣ୍ଣାଟକରେ 4, ତାମିଲନାଡୁରେ ଜଣେ, ରାଜସ୍ଥାନରେ 3ଜଣ (ବିଦେଶୀ), ତେଲେଙ୍ଗାନାରେ ଜଣେ, ଜମ୍ମୁକାଶ୍ମୀରରୁ ଜଣେ, ଲଦାଖରୁ ତିନି ଜଣ, ଦିଲ୍ଲୀରୁ 6 ଜଣ, ହରିୟାଣାର 14 ଜଣ (ବିଦେଶୀ), ଉତ୍ତରପ୍ରଦେଶରୁ ମଧ୍ୟ 11ଜଣଙ୍କୁ ଚିହ୍ନଟ କରାଯାଇଥିବାବେଳେ ଏଥିରେ ଜଣେ ବିଦେଶୀ ରହିଛନ୍ତି । ସେହିପରି ପଞ୍ଜାବର ଜଣେ କରୋନା ସଂକ୍ରମିତଙ୍କ ମାମଲା ରହିଛି । (ଏଜେନ୍ସି)