Categories
ବିଶେଷ ଖବର

ଭାରତ ଚୀନ ସୀମା ବିବାଦ ତୃତୀୟ ବିଶ୍ଵଯୁଦ୍ଧର କାରଣ ହେବାର ସମ୍ଭାବନା ରହିଛି କି?

କେଦାର ମିଶ୍ର

ଜୁନ ମାସରେ ଯେତେବେଳେ ଭାରତ ଓ ଚୀନ ଭିତରେ ସୀମା ବିବାଦ ଉଗ୍ର ଅବସ୍ଥାକୁ ଆସିଥିଲା, ସେତେବେଳେ ଏହା ତୃତୀୟ ବିଶ୍ଵଯୁଦ୍ଧର କାରଣ ହୋଇପାରେ ବୋଲି ପୃଥିବୀର ବହୁ ବଡ ବଡ ଖବର କାଗଜ ଲେଖିଥିଲେ। ଭାରତୀୟ ଗଣମାଧ୍ୟମରେ ଏହାକୁ ଜାତୀୟତାବାଦର ପରିଚୟ ଭିତରେ ବିଶ୍ଳେଷଣ ଚାଲିଥିବା ବେଳେ, ବିବିସି, ଦି ଫରେନ ଆଫେୟାର୍ସ, ଦି ସନ ଭଳି ସଂସ୍ଥା ଏହାକୁ ସମ୍ଭାବ୍ୟ ବିଶ୍ଵ ସଙ୍କଟ ଭାବେ ବିଶ୍ଳେଷଣ କରୁଥିଲେ। ସମ୍ପ୍ରତି ଚୀନ ଓ ଆମେରିକା ଭିତରେ ସମ୍ପର୍କ ଏତେ ଅଧିକ ତିକ୍ତ ଅବସ୍ଥାରେ ରହିଛି ଯେ, ଏହା କୌଣସି ବି ଘଟଣାରୁ ବହୁ ଭୟଙ୍କର ଦିଗକୁ ଗତି କରିପାରେ। ସେହି ସମୟରେ ଚୀନ-ଭାରତ ସୀମା ବିବାଦ, ପରିସ୍ଥିତିକୁ ଅଧିକ ଅଣାୟତ୍ତ କରିବା ସ୍ଵାଭାବିକ।

ଆଧୁନିକ ସମୟରେ ଯେଉଁ ଦୁଇଟି ବିଶ୍ଵଯୁଦ୍ଧ ହୋଇଛି, ତାର କାରଣ ଖୁବ ବଡ ନଥିଲା। ନିହାତି ଛୋଟ ଛୋଟ ଭୁଲ ବୁଝାମଣା ଓ ଅହଙ୍କାରରୁ ଯୁଦ୍ଧ ଜନ୍ମ ନିଏ। ପ୍ରଥମ ଓ ଦ୍ଵିତୀୟ ବିଶ୍ଵଯୁଦ୍ଧ ର କାରଣ ଭାବରେ ଯେଉଁ ପାଞ୍ଚୋଟି ବିନ୍ଦୁକୁ ଚିହ୍ନିତ କରାଯାଏ, ସେଗୁଡିକ ହେଲା- ୧. ସାମରିକ ଚୁକ୍ତିଭିତ୍ତିକ ସମ୍ପର୍କ, ୨-ଜାତୀୟତାବାଦ, ୩.ସାମରିକ ଅହଂକାର, ୪.ଉପନିବେଶବାଦୀ ବିଚାର ଓ ୫. ରାଜନୈତିକ ହତ୍ୟାକାଣ୍ଡ। ପ୍ରଥମ ଚାରୋଟି କାରଣ କ୍ରମାଗତ ଭାବରେ ଯୁଦ୍ଧ ପରିସ୍ଥିତି ସୃଷ୍ଟି କରୁଥିବା ବେଳେ ରାଜନୈତିକ ହତ୍ୟାକାଣ୍ଡ ଯୁଦ୍ଧ ପରିସ୍ଥିତିକୁ ବାଧ୍ୟତାମୂଳକ କରିଥାଏ। ଜୁନ,୨୦୧୪ରେ ଅଷ୍ଟ୍ରିଆ-ହଙ୍ଗେରୀର ଆର୍କ ଡ୍ୟୁକ ଫ୍ରାଞ୍ଜ ଫର୍ଡିନାଣ୍ଡଙ୍କୁ ସର୍ବିଆର ଜାତୀୟତାବାଦୀମାନେ ହତ୍ୟା କରିବା ପରେ, ପ୍ରଥମ ବିଶ୍ଵଯୁଦ୍ଧ ହୋଇଥିଲା। ଏହି ରାଜନୈତିକ ହତ୍ୟାକାଣ୍ଡ ପରବର୍ତ୍ତୀ ସମୟରେ ଦୁଇଟି ବିଶ୍ଵଯୁଦ୍ଧର କାରଣ ପାଲଟିଥିଲା। ବିଶ୍ଵଯୁଦ୍ଧର ଧ୍ଵଂସ ଓ ପାଗଳାମିରୁ ଆମେ ବୋଧେ କିଛି ଶିଖିନାହୁଁ।

୧୯୪୫ର ଦ୍ଵିତୀୟ ମହାଯୁଦ୍ଧ ପରେ ହୁଏତ ଆମେ ଆଉ ବିଶ୍ଵଯୁଦ୍ଧ ର ସାମ୍ନା କରିନାହୁଁ। ହେଲେ ଦ୍ଵିତୀୟ ବିଶ୍ଵଯୁଦ୍ଧର ୭୪ ବର୍ଷ ପରେ ଆମେ ଆଉ ଏକ ବିଶ୍ଵଯୁଦ୍ଧକୁ ସାମ୍ନା କରିବା ଭଳି ପରିସ୍ଥିତିରେ ଠିଆ ହୋଇଛୁ। ବିଶ୍ଵଯୁଦ୍ଧ ପୂର୍ବବର୍ତ୍ତୀ ପୃଥିବୀର ରାଜନୀତି ସହିତ ସମାନ ରାଜନୈତିକ ପୃଷ୍ଠଭୂମି ଆଜି ଦେଖା ଦେଇଛି। ବିଶ୍ଵର ବିଭିନ୍ନ ରାଷ୍ଟ୍ରରେ ଅହଙ୍କାରୀ, ଉଗ୍ର ଜାତୀୟତାବାଦୀ ଓ ଯୁଦ୍ଧଖୋର ଶାସକମାନେ ଲୋକ ସମର୍ଥନ ପାଉଛନ୍ତି। ଆମେରିକାରେ ଡୋନାଲ୍ଡ ଟ୍ରମ୍ଫ, ଚୀନରେ ସି ଜିଂପିନ, ଋଷିଆରେ ଭ୍ଲାଦିମିର ପୁଟିନ, ତୁର୍କୀରେ ରିଶେପ ତାଈପ ଇର୍ଦ୍ଦୋଗନ, ଇଂଲଣ୍ଡରେ ବୋରୀସ ଜନସନ, ଭାରତରେ ନରେନ୍ଦ୍ର ମୋଦୀ ପ୍ରମୁଖ ରାଜନୀତିରେ ଉଗ୍ର ଜାତୀୟତାବାଦୀ ରାଜନୀତିର ପ୍ରସାର କରୁଛନ୍ତି। ଆମେରିକା ରାଷ୍ଟ୍ରପତି ନିର୍ବାଚନ ପୂର୍ବରୁ ଉଗ୍ର ଜାତୀୟତାବାଦୀ ଅହଙ୍କାରରକୁ ଏବେ ସବୁଠୁ ବଡ ରାଜନୀତି ଭାବେ ଉପସ୍ଥାପନ କରିବାର ଉଦ୍ୟମ ଚାଲିଛି। ଏହାକୁ ସାମ୍ନା କରିବାକୁ ଚୀନରେ ମଧ୍ୟ ଉଗ୍ର ଜାତୀୟତାବାଦୀ ରାଜନୀତିର ପ୍ରସାର ଘଟୁଛି। ଭାରତ-ଚୀନ ସୀମା ବିବାଦ ପରେ ଏହା ଅଧିକ ତୀବ୍ର ହେବା ଆରମ୍ଭ କରିଛି।

ସଦ୍ଦାମ ହୁସେନଙ୍କୁ ଫାଶୀ ଦେଇ ଓ ଓସାମା ବିନ ଲାଦେନକୁ ଖତମ କରିଦେଇ    ଆମେରିକା ଗୋଟେ ସମୟରେ ମଧ୍ୟ ପ୍ରାଚ୍ୟ ଉପରେ କବଜା କରିନେଇଛି ବୋଲି ଭାବୁଥିଲା। ତେବେ ଇରାକ ଓ ଆଫଗାନିସ୍ତାନ କୁ ସାମରିକ ଭାବରେ ଜୟ କରିବାର ଉଦ୍ୟମ ଆମେରିକା ପାଇଁ ମହଙ୍ଗା ସାବ୍ୟସ୍ତ ହୋଇଛି। ଏହି ଦୁଇଟି ରାଷ୍ଟ୍ର ଆମେରିକାର କବଜାରେ ରହିଥିଲେ ମଧ୍ୟ, ସେଠାରୁ ପୃଥିବୀର ସର୍ବାଧିକ ସନ୍ତ୍ରାସବାଦୀ ସୃଷ୍ଟି ହେଉଛନ୍ତି।ଏହା ସହିତ ସିରିଆର ସ୍ଥିତି ସୁଧୁରିବାର କୌଣସି ସମ୍ଭାବନା ଦିଶୁନାହିଁ। ସିରିଆ, ଇରାକ ଓ ଆଫଗାନିସ୍ତାନରେ ଆଜି ଯେଉଁ ପରିସ୍ଥିତି ସୃଷ୍ଟି ହୋଇଛି, ସେଥିଲାଗି ମୁଖ୍ୟତଃ ଆମେରିକା ହିଁ ଦାୟୀ।

କରୋନା ସଂକ୍ରମଣ ବ୍ୟାପିବା ପୂର୍ବରୁ ଇରାନ ସହିତ ଆମେରିକା ମୁହାଁମୁହିଁ ହେବା ଆରମ୍ଭ କରିଥିଲା ।ମାର୍ଚ୍ଚ ମାସରେ ଇରାନର  ଜଣେ ପ୍ରଭାବଶାଳୀ ସେନାବାହିନୀ ଅଧିକାରୀ ମେଜର ଜେନେରାଲ କାଶିମ ସୁଲେମାନୀକୁ ଆମେରିକା ହତ୍ୟା କରିଥିଲା। ଇରାକର ବାଗଦାଦ ବିମାନ ବନ୍ଦର ନିକଟରେ ଜଣେ ଇରାକୀ ସେନା ଅଧିକାରୀ ଙ୍କ ସହିତ ସୁଲେମାନୀଙ୍କୁ ହତ୍ୟା କରାଯିବା ପରେ,ଏହାକୁ ନେଇ ଏବେ ମଧ୍ୟପ୍ରାଚ୍ୟରେ ଯେଉଁ  ଉତ୍ତେଜନା ବଢିଥିଲା, ତାହା କରୋନା କାରଣରୁ ପ୍ରଶମିତ ହୋଇଛି। ସେତେବେଳେ ଇରାନ ସମର୍ଥନରେ ଚୀନ ଓ ଋଷିଆ ଖୋଲାଖୋଲି ବାହାରିଥିବା ଯୋଗୁଁ ପରବର୍ତ୍ତୀ ରାଜନୈତିକ ପରିସ୍ଥିତି ଅଧିକ ଜଟିଳ ହୋଇଥିଲା।

ଗତ ଚାରିମାସ ଭିତରେ ଚୀନ ବନାମ ବାକି ବିଶ୍ଵ ଭଳି ଏକ ଉତ୍ତେଜକ ପରିସ୍ଥିତି ବଢି ଚାଲିଛି। ସେଥିରେ ଭାରତ ସହିତ ଚୀନର ସୀମା ବିବାଦ ପରିସ୍ଥିତିକୁ ବେଶୀ ଜଟିଳ କରିଛି। ଭାରତ ଓ ଚୀନ ଭିତରେ ସୀମା ବିବାଦ ଆଦୌ ସାମୟିକ ନୁହେଁ ଓ ଏହା ଏକ ଦୀର୍ଘସ୍ଥାୟୀ ସଙ୍କଟ ହୋଇ ଆଗକୁ ରହିବ। ଦ୍ଵିପାକ୍ଷିକ ଆଲୋଚନା ଜରିଆରେ ସମାଧାନ ବାହାର କରିବା ଭଳି ରାଜନୈତିକ ପରିସ୍ଥିତି ବର୍ତ୍ତମାନ କୌଣସି ଦେଶରେ ନାହିଁ। ଉଗ୍ର ଜାତୀୟତାବାଦର ରାଜନୀତି ଆଜିର ତାରିଖରେ ବିଶ୍ଵଶାନ୍ତି ଲାଗି ଏକ ବଡ ସଙ୍କଟ ତିଆରି କରିଛି। ଆଗାମୀ ଦିନରେ ପୃଥିବୀର ଗତି କେଉଁ ଦିଗକୁ ଯିବ, ତାହା ନଭେମ୍ବର ମାସରେ ଅଧିକ ସ୍ପଷ୍ଟ ଜଣାପଡିବ।ନଭେମ୍ବର ନିର୍ବାଚନରେ ଆମେରିକା ରାଷ୍ଟ୍ରପତି ଟ୍ରମ୍ଫ ଜିତିବେ ନା ହାରିବେ, ତାରି ଉପରେ ଅନେକ କିଛି ନିର୍ଭର କରୁଛି। ତେବେ ଭାରତ ଓ ଚୀନ ମଧ୍ୟରେ ଯଦି ବିବାଦ ଲାଗି ରହେ, ତାହେଲେ ଏହା ଭବିଷ୍ୟତରେ ଏକ ବୃହତ୍ତର ବିଶ୍ଵ ସଙ୍କଟକୁ ଜନ୍ମଦେବ।

Categories
ଅନ୍ତରାଷ୍ଟ୍ରୀୟ ଆଜିର ଖବର ଜାତୀୟ ଖବର

ବିଶ୍ବରେ କରୋନା ଆକ୍ରାନ୍ତଙ୍କ ସଂଖ୍ୟା 89 ଲକ୍ଷ ଟପିଲା, ଗତ 24 ଘଣ୍‌ଟାରେ ପାଞ୍ଚ ହଜାରରୁ ଉର୍ଦ୍ଧ୍ବ ଲୋକଙ୍କ ଜୀବନ ନେଲାଣି କରୋନା

ନୂଆଦିଲ୍ଲୀ : କରୋନା ମହାମାରୀ ପାଇଁ ସାରା ବିଶ୍ବ ଏବେ ସଂକଟରେ । ଦେଶର ବହୁ ଧନୀ ରାଷ୍ଟ୍ରମାନେ ମଧ୍ୟ ଏହି ସଂକଟର ସାମ୍ନା କରୁଛନ୍ତି। ଚୀନ୍‌ର ବୁହାନ ସହରରୁ ଆରମ୍ଭ ହୋଇଥିବା ଏହି ଭାଇରସ୍‌ ସାରା ବିଶ୍ବକୁ ନିଜ ଆୟତ୍ତରେ କରି ସାରିଛି । ଏହି ଭାଇରସ୍‌ ଯୋଗୁଁ ସାରା ବିଶ୍‌ବରେ ଏପର୍ଯ୍ୟନ୍ତ 89 ଲକ୍ଷରୁ ଅଧିକ ଲୋକେ ସଂକ୍ରମିତ ହୋଇଛନ୍ତି । ସେହିପରି ଏହି ସଂକ୍ରମଣରେ ମୃତକଙ୍କ ସଂଖ୍ୟା ଚାରି ଲକ୍ଷ66 ହଜାର ପାର କରି ସାରିଛି । ବିଶ୍ବରେ ସର୍ବାଧିକ କରୋନା ଜନିତ ମୃତ୍ୟୁ  ଆମେରିକାରେ ହୋଇଛି । ଏହି ମହାମାରୀ ଯୋଗୁଁ ଆମେରିକାରେ ଏକ 20 ହଜାରରୁ ଅଧିକ ଲୋକ ମୃତ୍ୟୁବରଣ କରିସାରିଲେଣି ।

ଗତ 24 ଘ୍‌ଟାରେ ବିଶ୍ବରେ ପାଞ୍ଚ ହଜାରରୁ ଅଧିକ ମୃତ୍ୟୁ ହୋଇଥିବବେଳେ ଗତ ଦୁଇ ଦିନ ମଧ୍ୟରେ ଦୁଇଲକ୍ଷରୁ ଅଧିକ ଲୋକେ ଏହି ସଂକ୍ରମଣର ଶିକାର ହୋଇଛନ୍ତି। ତେବେ ଏହି ରୋଗରୁ ସୁସ୍ଥ ହେଉଥିବା ସଂଖ୍ୟାର ବେଶ୍‌ ଉନ୍ନତି ଘଟିଛି। ଦୁନିଆରେ ଏବେ ସୁଦ୍ଧା 47 ଲକ୍ଷ 38 ହଜାର 542 ଜଣ ସୁସ୍ଥ ହେଲେଣି ।

ଆମେରିକା ପରେ ଦ୍ବିତୀୟ ସର୍ବାଧିକ କରୋନା ମାମଲା ବ୍ରାଜିଲ୍‌ରୁ ହିଁ ଆସିଛି । ଏଠାରେ କରୋନା ସଂକ୍ରମିତଙ୍କ ସଂଖ୍ୟା 10 ଲକ୍ଷ ପାର କରିଥିବାବେଳେ ଏଠାରେ 50 ହଜାରରୁ ଉର୍ଦ୍ଧ୍ବ ମୃତ୍ୟୁବରଣ କଲେଣି ।

କେଉଁ ଦେଶରେ କିପରି ଅଛି କରୋନା ସ୍ଥିତି :

ଆମେରିକା ରେ ସଂକ୍ରମିତ ସଂଖ୍ୟା 23 ଲକ୍ଷ 30 ହଜାର 578 ଥିବାବେଳେ ମୃତ୍ୟୁ ସଂଖ୍ୟା 1ଲକ୍ଷ 21 ହଜାର 980 ରହିଛି ।

ବ୍ରାଜିଲ୍‌ରେ ମୃତ୍ୟୁ ସଂଖ୍ୟା 50 ହଜାର 058 ରହିଥିବାବେଳେ ସଂକ୍ରମିତଙ୍କ ସଂଖ୍ୟା 10 ଲକ୍ଷ 70 ହଜାର 139କୁ ବୃଦ୍ଧି ହୋଇଛି ।

ରୁସ୍‌ରେ 5 ଲକ୍ଷ 76 ହଜାର 952 ଜଣ କରୋନାରେ ସଂକ୍ରମିତ ହୋଇଥିବାବେଳେ 8ହଜାର2ଜଣ ମୃତ୍ୟୁବରଣ କରିଛନ୍ତି ।

ଭାରତରେ 13 ହଜାର 277 ଜଣଙ୍କ କରୋନା ଜନିତ ମୃତ୍ୟୁ ହୋଇଥିବାବେଳେ ସଂକ୍ରମିତଙ୍କ ସଂଖ୍ୟା 4 ଲକ୍ଷ 11 ହଜାର 727କୁ ବୃଦ୍ଧି ହୋଇଛି ।

ୟୁକେରେ 3 ଲକ୍ଷ 03 ହଜାର 110 ଜଣ ସଂକ୍ରମିତ ରହିଥିବାବେଳେ ମୃତ୍ୟୁ ସଂଖ୍ୟା 42 ହଜାର 598ରେ ପହଞ୍ଚିଛି ।

ସ୍ପେନ୍‌ରେ ମୃତ୍ୟୁ ସଂଖ୍ୟା 28 ହଜାର 322 ରହିଥିବାବେଳେ ସଂକ୍ରମିତଙ୍କ ସଂଖ୍ୟା 2 ଲକ୍ଷ 93 ହଜାର 018 ରହିଛି ।

ପେରୁରେ କରୋନା ସଂକ୍ରମିତ ମାମଲା 2 ଲକ୍ଷ 51 ହଜାର 388 ରହିଥିବାବେଳେ ମୃତ୍ୟୁ ସଂଖ୍ୟା 7ହଜାର 861 ରହିଛି ।

ସେହିପରି ଇଟାଲୀରେ କରୋନା ଜନିତ ମୃତ୍ୟୁ ସଂଖ୍ୟା 34 ହଜାର 610 ରହିଥିବାବେଳେ ସଂକ୍ରମିତଙ୍କ ସଂଖ୍ୟା 2 ଲକ୍ଷ 38 ହଜାର 275ରେ ପହଞ୍ଚିଛି । (ଏଜେନ୍ସି)

Categories
ଅନ୍ତରାଷ୍ଟ୍ରୀୟ ବିଶେଷ ଖବର ମତାମତ

ଭାରତର ଚୀନ ନୀତିରେ ସଂପୂର୍ଣ୍ଣ ପରିବର୍ତ୍ତନ ଲୋଡା, ଚୀନକୁ ତିବ୍ବତ ଓ ହଂକଂ ପ୍ରସଙ୍ଗରେ ଆମେ ଘେରି ପାରିବା କି?

କେଦାର ମିଶ୍ର

ଗଲାୱାନ ନଦୀ ଉପତ୍ୟକାରେ ଯାହା ଘଟିଲା, ତାହା କେବଳ ଦୁଃଖଦ ବା ଦୁର୍ଭାଗ୍ୟଜନକ ନୁହେଁ, ଏହା ଅନେକାଂଶରେ ଦାନବୀୟ। ୨୦ ରୁ ଅଧିକ ଭାରତୀୟ ସୈନିକଙ୍କୁ ଯେଉଁ ଢଙ୍ଗରେ ଚୀନର ସୈନିକମାନେ ହତ୍ୟା କଲେ ତାହା ସେନା ସୁଲଭ ଆଚରଣ ନୁହେଁ। କୌଣସି ପେଷାଦାର ସେନାବାହିନୀ ଏ ପ୍ରକାର ଆଚରଣ ପ୍ରଦର୍ଶନ କରନ୍ତି ନାହିଁ। ବାଡି, ଲୁହାରଡ ଓ ପଥର ମାଡ କରି ରକ୍ତାକ୍ତ ଭାରତୀୟ ସୈନିକମାନଙ୍କୁ ଗଲାୱାନ ନଦୀର ହିମ ପ୍ରବାହରେ ଭସେଇ ଦିଆ ଯାଇଥିଲା। ଚୀନ ଓ ଭାରତ ସେନା ଭିତରେ ହୋଇଥିବା ମୁହାଁମୁହିଁ ର ପରିଣତି ସ୍ୱରୂପ ୨୦ ଜଣ ଯବାନ ପ୍ରାଣ ହରାଇବା ଓ ଆଉ କିଛି ଜଣ ଏବେ ଜୀବନ ସହିତ ସଂଘର୍ଷ କରୁଥିବାର ଖବର ଆମେ ବହୁତ ଡେରି ରେ ପାଇଲୁ।

ଦେଶର ବିଡମ୍ବନା ହେଉଛି, ଗତ ଏପ୍ରିଲ ମାସ ଶେଷ ସପ୍ତାହରୁ ଚୀନ ଓ ଭାରତ ସେନା ମୁହାଁମୁହିଁ ଅବସ୍ଥାରେ ରହିଲେଣି। ଅଥଚ ସେମିତି କିଛି ଘଟିନାହିଁ ଓ ଆଲୋଚନା ମାଧ୍ୟମରେ ଏହାର ସମାଧାନ ହୋଇଯାଇଛି ବୋଲି ଆମକୁ ବାରମ୍ବାର କୁହା ଯାଉଥିଲା। ସରକାରଙ୍କ ବୋଲ ମାନି ଆମର ଜାତୀୟ ଗଣମାଧ୍ୟମ ଏ ପ୍ରସଙ୍ଗରେ “ସବୁକିଛି ଠିକ ଅଛି” ବୋଲି ଆମକୁ କହି ଆସୁଥିଲେ। ତେବେ ଭାରତ ଚୀନ ସମ୍ପର୍କ ଅତ୍ୟନ୍ତ ଖରାପ ଅବସ୍ଥାକୁ ଚାଲି ଆସିଛି ବୋଲି ଜାଣିବା ପାଇଁ, ଆମକୁ ବହୁତ ବଡ ମୂଲ୍ୟ ଦେବାକୁ ପଡିଲା।

ତେବେ ଏ ଘଟଣା ଏମିତି ଅବସ୍ଥାକୁ ଆସିଲା କାହିଁକି? ଏଥିଲାଗି କିଏ ଦାୟୀ? ଏପ୍ରିଲ ଶେଷ ସପ୍ତାହରୁ ଏ ଘଟଣାକୁ ନେଇ ଗଣମାଧ୍ୟମରେ ଚର୍ଚ୍ଚା କିଛି କିଛି ଆରମ୍ଭ ହୋଇଥିଲା। କିଛି ସପ୍ତାହ ଆଗରୁ ଆମେରିକା ରାଷ୍ଟ୍ରପତି ଡୋନାଲ୍ଡ ଟ୍ରମ୍ଫ ଚୀନ ଓ ଭାରତ ମଧ୍ୟରେ ମଧ୍ୟସ୍ଥତାର ପ୍ରସ୍ତାବ ଦେଇଥିଲେ ଓ ତାର ଦିନକ ପରେ କହିଥିଲେ ଯେ ଚୀନକୁ ନେଇ ଭାରତ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କ “ମୁଡ ଭଲ ନାହିଁ”। ସେତେବେଳେ ପ୍ରେସିଡେଣ୍ଟ ଟ୍ରମ୍ଫଙ୍କ ସହିତ ପ୍ରଧାନମନ୍ତ୍ରୀ ଆଦୌ କଥା ହୋଇନାହାନ୍ତି ବୋଲି ଭାରତ ସରକାର ସଫେଇ ଦେଲେ। ପରିସ୍ଥିତି ଗମ୍ଭୀର ନଥିଲେ ଆମେରିକା ଏ ପ୍ରସଙ୍ଗରେ ସହଜରେ ପାଟି ଫିଟାଇ ନଥାନ୍ତା। ସେତେବେଳେ ମଧ୍ୟ ଆମର ଗଣମାଧ୍ୟମ ଏହାକୁ ଅଣଦେଖା କରିଥିଲା।

୧୯୭୫ ମସିହା ପରଠୁ ଚୀନ ଓ ଭାରତ ମଧ୍ୟରେ ସୀମାରେଖାକୁ ନେଇ ଛୋଟ ମୋଟ ଝଗଡା ହୋଇଛି ସିନା ଏହାକୁ ନେଇ କେବେ ମାରପିଟ ଯାଏଁ କଥା ଯାଇନି। ଆପୋଷ କଥାବାର୍ତ୍ତା ମାଧ୍ୟମରେ ସମସ୍ୟାର ସମାଧାନ ହୋଇଛି। ହଠାତ ଏ ସମସ୍ଯା ସଙ୍କଟ ପାଲଟିଗଲା କେମିତି? ଏହାର ଅନେକ କାରଣ ରହିଛି। ଲଦ୍ଦାଖକୁ ଏକ ସ୍ଵତନ୍ତ୍ର କେନ୍ଦ୍ର ଶାସିତ ପ୍ରଦେଶ କରିବା ପାଇଁ ଭାରତ ସରକାରଙ୍କର ବିଜ୍ଞପ୍ତିକୁ ଚୀନ ବିରୋଧ କରିଛି। ଜାମ୍ମୁ କାଶ୍ମୀର ପ୍ରସଙ୍ଗରେ ଜାତିସଙ୍ଘରେ ପାକିସ୍ତାନ ସହିତ ଚୀନର ସମର୍ଥନ ଖୋଲାଖୋଲି ଆମେ ଦେଖିଛୁ। ତା ସତ୍ତ୍ୱେ ଚୀନକୁ ଭାରତ ସରକାରଙ୍କ ତରଫରୁ ସ୍ପଷ୍ଟ ଜବାବ ଦିଆ ହୋଇନି।

ଗତ ଅକ୍ଟୋବର ରେ ଚୀନ ରାଷ୍ଟ୍ରପତି ସି ଜିଂପିଙ୍ଗ ଏବଂ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କ ମଧ୍ୟରେ ମାମଲାପୁରମ/ ଚେନ୍ନାଇ ରେ ଯେଉଁ ଶିଖର ସମ୍ମିଳନୀ ହୋଇଥିଲା, ସେଥିରେ ଏହି ସବୁ ପ୍ରସଙ୍ଗ ବିଲକୁଲ ଆଲୋଚନା ହୋଇ ନଥିଲା। ସି ଜିଂପିଙ୍ଗ ଭାରତ ଆସିବା ପୂର୍ବରୁ ପାକିସ୍ତାନ ପ୍ରଧାନମନ୍ତ୍ରୀ ଇମ୍ରାନ ଖାଁଙ୍କୁ ଭେଟିଥିଲେ ଓ ଉଭୟ ନେତା ଆଧିକାରିକ ଭାବରେ କାଶ୍ମୀର ପ୍ରସଙ୍ଗରେ କଥା ହୋଇଥିଲେ। ସେତେବେଳେ ଭାରତ ତରଫରୁ ଏହି ପ୍ରସଙ୍ଗକୁ ଉଠା ନଯିବା ଆଶ୍ଚର୍ୟଜନକ ଥିଲା।

ବର୍ତ୍ତମାନ ସମୟରେ ଚୀନ ଏକ ପାଖିଆ ଭାବରେ ଭାରତ ଓ ଚୀନ ମଧ୍ୟରେ ରହିଥିବା ବାସ୍ତବ ସୀମାରେଖା ବା ଏଲଏସି କୁ ବଦଳାଇବାକୁ ଚାହୁଁଛି। ବର୍ତ୍ତମାନ ଯେଉ ସବୁ ଅଞ୍ଚଳରେ ଚୀନ ସେନାର କାର୍ୟକଳାପ ବିଶେଷ ବଢିଛି, ପୂର୍ବରୁ ସେ ସବୁ କ୍ଷେତ୍ରରେ ଚୀନର ଉପସ୍ଥିତି ହିଁ ନଥିଲା। ଗଲାୱାନ ଉପତ୍ୟକା ପାରମ୍ପରିକ ଭାବରେ ଭାରତର ଅଞ୍ଚଳ ବୋଲି ଧାରଣା ରହି ଆସିଥିଲା। ହଠାତ ଏହାକୁ ନିଜର ବୋଲି ଦାବି କରିବା ପଛରେ ଚୀନର ଏକ ଭିନ୍ନ ଅଭିସନ୍ଧି ରହିଛି। ଭୌଗୋଳିକ-ରାଜନୀତି କାରଣରୁ ଏହି ଅଞ୍ଚଳରେ ଭାରତର ସଶକ୍ତ ଉପସ୍ଥିତି ଉଭୟ ପାକିସ୍ତାନ ଓ ଚୀନ ପାଇଁ ଚିନ୍ତାର କାରଣ ପାଲଟିଛି। ସେଥିଲାଗି କେବେ ହେଲେ ଗଲାୱାନ ଉପତ୍ୟକା ରେ ପାଦ ଦେଇନଥିବା ଚୀନ ହଠାତ ଏହି ଅଞ୍ଚଳରେ ସକ୍ରିୟ ହୋଇ ପଡିଛି।

ଚୀନର ଗତିବିଧି ସମ୍ପର୍କରେ ସେନାବାହିନୀ ତଥା ଅନ୍ଯାନ୍ଯ ଗୁଇନ୍ଦା ସୂତ୍ରରୁ ଭାରତ ସରକାର ଖବର ପାଇଥିବେ ନିଶ୍ଚୟ। ଏହି ଖବର ଆଧାରରେ ଚୀନ ସହିତ କେବଳ ସାମରିକ ଅଧିକାରୀ ସ୍ତରର ଆଲୋଚନା  ହୋଇଥିଲା। ତେବେ କୂଟନୈତିକ ସ୍ତରରେ ଏବଂ ରାଜନୈତିକ ସ୍ତରରେ ଏହାର ସମାଧାନ ଖୋଜା ଯାଇ ପାରିଥାନ୍ତା। ଗୁଜରାଟ ମୁଖ୍ୟମନ୍ତ୍ରୀ ଥିବା ବେଳୁ ନରେନ୍ଦ୍ର ମୋଦୀ ଏବଂ ସି ଜିଂପିଙ୍ଗ ଙ୍କ ମଧ୍ୟରେ ମଧୁର ସମ୍ପର୍କ ରହି ଆସିଛି। ଏହି ସମ୍ପର୍କ ମାଧ୍ୟମରେ ହୁଏତ ସମାଧାନର ଏକ ସୂତ୍ର ବାହାରି ପାରିଥାନ୍ତା। ହେଲେ ଏହାକୁ ନେଇ ଆମର ବୈଦେଶିକ ବ୍ୟାପାର ବିଭାଗ ସେତେ ତତ୍ପରତା ଦେଖାଇ ନଥିଲେ।

ଆଜି ପ୍ରଶ୍ନ ଉଠୁଛି, ଏତେ ବଡ ଦାନବୀୟ କାଣ୍ଡ ପରେ ଭାରତର ପ୍ରତିକ୍ରିୟା କଣ ହେବ। ଘଟଣା ଘଟିବାର ୨୪ ଘଣ୍ଟା ପରେ ଯାଇ ପ୍ରଧାନମନ୍ତ୍ରୀ ନିଜର ପ୍ରତିକ୍ରିୟା ରଖିଛନ୍ତି ଓ ଏ ପ୍ରସଙ୍ଗରେ ଆସନ୍ତା କାଲି ସର୍ବଦଳୀୟ ବୈଠକ ଡାକିଛନ୍ତି। ଏ ପ୍ରସଙ୍ଗରେ ବହୁ ଆଗରୁ ଭାରତ ସରକାର ନିଜର ପକ୍ଷ ରଖନ୍ତୁ ବୋଲି କଂଗ୍ରେସ ଦାବି ରଖି ଆସୁଥିଲା। ସ୍ଵଭାବ ସୁଲଭ ଢଙ୍ଗରେ କଂଗ୍ରେସକୁ ଗୁରୁତ୍ଵ ନଦେବାର ନାଟକ ବିଜେପି କରୁଥିଲା। ହେଲେ ଗତ ମଙ୍ଗଳବାର ର ଘଟନା ଏବେ ବିଜେପିକୁ ସତ୍ଯର ସାମ୍ନା ପାଇଁ ବାଧ୍ୟ କରିଛି।

ଚୀନ କୁ କୋଣଠେସା କରିବାକୁ ହେଲେ ଭାରତକୁ ନିଜର ଗଣତାନ୍ତ୍ରିକ ଶକ୍ତିର ପ୍ରଦର୍ଶନ କରିବାକୁ ପଡିବ। ଚୀନର ବିସ୍ତାରବାଦୀ ନୀତି କୁ ବିଭିନ୍ନ ବାଗରେ ଆମକୁ ଉଠାଇବାକୁ ପଡିବ। ତିବ୍ବତ ପ୍ରସଙ୍ଗରେ ଭାରତ ସବୁବେଳେ ଦଳାଇ ଲାମାଙ୍କ ପଛରେ ନିଜର ସମର୍ଥନ ଦେଇ ଆସୁଥିଲା। ହେଲେ ନରେନ୍ଦ୍ର ମୋଦୀ ସି ଜିଂପିଙ୍ଗ ଙ୍କୁ ଖୁସି କରିବାକୁ ଯାଇ ତିବ୍ବତ ପ୍ରସଙ୍ଗରେ ନୀରବତା ଅବଲମ୍ବନ କରି ଆସୁଛନ୍ତି।ସେହିପରି ହଂକଂ ଘଟଣାରେ ମଧ୍ୟ ଭାରତ ନିଷ୍ପକ୍ଷ ରହି ଆସୁଛି।  ଏ ନୀତି ଏବେ ବଦଳିବା ଦରକାର।

ଚୀନକୁ କେବଳ ସୀମାନ୍ତରେ ନୁହେଁ, ସବୁ କ୍ଷେତ୍ରରେ ଘେରିବା ଲାଗି ଭାରତର ଚୀନ ନୀତି ସଂପୂର୍ଣ୍ଣ ବଦଳିବା ଦରକାର।

Categories
ଆଜିର ଖବର ରାଜ୍ୟ ଖବର

ଭାରତ-ଚୀନ୍‌ ସୀମା ସଂଘର୍ଷ : 2 ଓଡିଆ ଯବାନ ଶହୀଦ୍‌

ଲଦାଖ : ଭାରତ-ଚୀନ୍‌ ସୀମାରେ ଘଟିଥିବା ସଂଘର୍ଷରେ 20 ଜଣ ଭାରତୀୟ ଯବାନ ଶହୀଦ ହୋଇଥିବା ବେଳେ ଏହା ମଧ୍ୟରେ ଦୁଇ ଜଣ ଓଡିଆ ରହିଛନ୍ତି । ଲଦାଖର ଗଲଓ୍ବାନା ଉପତ୍ୟାକାରେ ଘଟିଥିବା ସଂଘର୍ଷରେ 20 ଜଣ ଯବାନ ଶହୀଦ ହୋଇଥିବା ବେଳେ 4 ଜଣ ଯବାନଙ୍କ ଅବସ୍ଥା ଗୁରୁତର ରହିଛି । ଦୁଇ ଯବାନ ହେଉଛନ୍ତି ଚନ୍ଦ୍ରକାନ୍ତ ପ୍ରଧାନ (28) ଏବଂ ନନ୍ଦୁରାମ ସୋରେନ୍‌ । ରାଇକିଆ ବ୍ଲକ୍‌ର ବିଅରପଙ୍ଗା ଗ୍ରାମର ଚନ୍ଦ୍ରକାନ୍ତ 6 ବର୍ଷ ତଳେ ଭାରତୀୟ ସେନାର ବିହାର ରେଜିମେଣ୍ଟରେ ଯୋଗ ଦେଇଥିଲେ । ବିଗତ ଦୁଇ ବର୍ଷ ହେବ ସେ ଲଦାଖରେ କାର୍ଯ୍ୟରତ ଥିଲେ ଏବଂ ଦୁଇ ଦିନ ତଳେ ଶହୀଦ ହୋଇଥିଲେ । ସେହିପରି ଅନ୍ୟତମ ଶହୀଦ ଯବାନ ନନ୍ଦୁରାମଙ୍କ ଘର ରାଇରଙ୍ଗପୁର ବ୍ଲକ୍‌ ବିଜାତଳା ବ୍ଲକ୍‌ ଚମ୍ପାରଦା ଗ୍ରାମରେ । ସେ ମଧ୍ୟ ବିହାର 16 ରେଜିମେଣ୍ଟରେ ଯୋଗ ଦେଇଥିଲେ ।

Categories
ବିଶେଷ ଖବର

ଗଲାୱାନ ଉପତ୍ୟକାରେ ଆମ ସେନାବାହିନୀର ରକ୍ତ ପୁଣିଥରେ ପ୍ରମାଣିତ କରିଛି ଯେ ଚୀନ ସହିତ ମିତ୍ରତା କେବଳ ଏକ ଛଳନା

କେଦାର ମିଶ୍ର

ଗତକାଲି ଯାଏଁ ପୂରା ଦେଶକୁ କୁହା ଯାଉଥିଲା ଯେ, ଚୀନ ଏବଂ ଭାରତ ସୀମାନ୍ତରେ ସବୁ କିଛି ଠିକ ଚାଲିଛି। ଭାରତ ସରକାର, ଆମର ସେନାବାହିନୀ ଏବଂ ଶାସକ ଦଳ ଭାରତୀୟ ଜନତା ପାର୍ଟି ତରଫରୁ ଏ କ୍ଷେତ୍ରରେ ସଂପୂର୍ଣ୍ଣ ନୀରବତା ଅବଲମ୍ବନ କରା ଯାଇଥିଲା। ଉଭୟ ପକ୍ଷଙ୍କ ମଧ୍ୟରେ ଜୁନ ୬ ତାରିଖ ଦିନ ସୌହାର୍ଦ୍ଦ୍ୟପୂର୍ଣ୍ଣ ଆଲୋଚନା ହୋଇଛି ବୋଲି ମଧ୍ୟ କୁହାଗଲା। ତେବେ ବିଭିନ୍ନ ଆନ୍ତର୍ଜାତିକ ଗଣମାଧ୍ୟମ ଓ ଭାରତର କେତେଜଣ ପ୍ରତିରକ୍ଷା ସାମ୍ବାଦିକ ବାରମ୍ବାର ସୂଚନା ଦେଇ ଆସୁଥିଲେ ଯେ, ଭାରତ ଚୀନ ମଧ୍ୟରେ ରହିଥିବା ବାସ୍ତବ ନିୟନ୍ତ୍ରଣ ରେଖା (Line of actual control-LAC) କୁ ଅତିକ୍ରମ କରି ଚୀନ ସେନା ଗଲାୱାନ ନଦୀ ଉପତ୍ୟକାରେ ୬୦ ବର୍ଗ କିଲୋମିଟର ଭିତରକୁ ଅନୁପ୍ରବେଶ କରି ସାରିଛନ୍ତି। ପୂର୍ବରୁ ସେନା ବାହିନୀରେ କାମ କରିଥିବା କର୍ଣ୍ଣେଲ ଅଜୟ ଶୁକ୍ଲାଙ୍କ ଭଳି ସାମ୍ବାଦିକ ଯେତେବେଳେ ଏ ପ୍ରସଙ୍ଗ ଉଠାଉଥିଲେ, ସେତେବେଳେ ଦେଶର କେତେକ ଟିଭି ଚାନେଲ ସେମାନଙ୍କୁ କୁତ୍ସିତ ଭାବରେ ବଦନାମ କରିବାକୁ ଚେଷ୍ଟା କରୁଥିଲେ। ଗତକାଲି ହଠାତ ଯେତେବେଳେ ଖବର ଆସିଲା ଯେ ଗଲାୱାନ ଉପତ୍ୟକାରେ ଉଭୟ ସେନା ମଧ୍ୟରେ ଭୟଙ୍କର ମାରପିଟ ଘଟି ଜଣେ ଭାରତୀୟ କଲୋନେଲଙ୍କ ସମେତ ୨୦  ଜଣ ସୈନିକ ପ୍ରାଣ ହରାଇଛନ୍ତି। ଚୀନ ସେନା ରୁ ପ୍ରାୟ ୪୩ ରୁ ଅଧିକ ମୃତାହତ ହୋଇଥିବାର ସୂଚନା ମଧ୍ୟ ରହିଛି।

ଏହି ପୃଷ୍ଠଭୂମିରେ ଆଜିର ବଡ ପ୍ରଶ୍ନ ହେଉଛି, ଯଦି ସବୁ କିଛି ଠିକଠାକ ରହିଥିଲା, ତା ହେଲେ ହଠାତ ଏତେ ବଡ ହିଂସାକାଣ୍ଡ ଘଟିଲା କେମିତି? ଭାରତୀୟ ସେନା ତରଫରୁ କୁହା ଯାଇଛି ଯେ, ସୀମାନ୍ତରେ ଗୁଳି ଫୁଟିନାହିଁ। କେବଳ ଲାଠି ଓ ପଥର ମାଡରେ ଉଭୟ ସେନାବାହିନୀର ଏତେ ସଂଖ୍ୟକ ଅଧିକାରୀ ଓ ଜବାନ ପ୍ରାଣ ହରାଇଛନ୍ତି। କେବଳ ଲାଠି ଓ ପଥର ମାଡରେ ଏତେ ସଂଖ୍ୟକ ପ୍ରାଣ ଚାଲି ଯାଇଛି ବୋଲି ବିଶ୍ଵାସ କରିହେବ କି? ଚୀନ ର ଆକ୍ରାମକ ଉଦ୍ଦେଶ୍ୟକୁ ନେଇ ଅନେକ ଦିନରୁ ପ୍ରତିରକ୍ଷା ବିଶେଷଜ୍ଞମାନେ ସତର୍କ କରାଇ ଆସୁଛନ୍ତି। ହେଲେ ଭାରତ ସରକାରଙ୍କ ତରଫରୁ ଏ ପ୍ରସଙ୍ଗକୁ ଏକ ପ୍ରକାର ଲୁଚାଇବାର ଉଦ୍ୟମ ହୋଇ ଆସୁଛି। ଚୀନ ସହିତ ଆମର କୂଟନୈତିକ ଆଲୋଚନା ସୌହାର୍ଦ୍ଦ୍ୟପୂର୍ଣ୍ଣ ରହିଛି ବୋଲି ବାରମ୍ବାର କୁହା ଯାଉଥିଲେ ମଧ୍ୟ ଗତକାଲି ଗଲାୱାନ ଉପତ୍ୟକାରେ ଘଟିଥିବା ସାମରିକ ସଂଘର୍ଷ ଅନେକ ପ୍ରଶ୍ନବାଚୀ ଠିଆ କରାଇଛି।

ସାମରିକ ଓ ସୀମାନ୍ତ ପ୍ରସଙ୍ଗରେ ନରେନ୍ଦ୍ର ମୋଦୀ ସରକାର ଜାତୀୟ ସହମତି ସୃଷ୍ଟି କରିବା ପରିବର୍ତ୍ତେ ସବୁବେଳେ ମାତ୍ରାଧିକ ଆତ୍ମ ବିଶ୍ବାସର ଛଳନାରେ ବିଶ୍ଵାସ କରି ଆସୁଛନ୍ତି। ଚୀନ ପ୍ରସଙ୍ଗରେ କଂଗ୍ରେସ ନେତା ରାହୁଲ ଗାନ୍ଧୀ କିଛିଦିନ ତଳେ ଯେଉଁ ପ୍ରଶ୍ନ କରିଥିଲେ, ତାହା ଆଜି ସତ୍ୟ ପ୍ରମାଣିତ ହୋଇଛି। ଦେଶର ସୀମାନ୍ତ ସୁରକ୍ଷା ପ୍ରସଙ୍ଗରେ ଦେଶର ସବୁ ରାଜନୈତିକ ଦଳ ଓ ସବୁ ଲୋକଙ୍କୁ ବିଶ୍ଵାସରେ ନେବା ସରକାରଙ୍କର ନୈତିକ ଦାୟିତ୍ଵ ହେବା ଉଚିତ। ହେଲେ ଏ ପ୍ରସଙ୍ଗରେ ପ୍ରଶ୍ନ ଉପସ୍ଥାପନ କରୁଥିବା ଲୋକଙ୍କୁ ବିଦ୍ରୂପ କରିବାର ଏକ ଅସୁସ୍ଥ ପରମ୍ପରା ବିଜେପି ଆରମ୍ଭ କରିଛି। ଚୀନ ସହିତ ଆମର ସମ୍ପର୍କ ଯେ ଆଦୌ ଉତ୍ତମ ସ୍ଥିତି ରେ ନାହିଁ, ଏ କଥା ମୋଦୀ ସରକାର ମାନିବାକୁ ରାଜି ନୁହନ୍ତି କାହିଁକି?

୧୯୬୨ ଭାରତ – ଚୀନ ଯୁଦ୍ଧ ପରେ ଉଭୟ ଦେଶର ବାସ୍ତବ ନିୟନ୍ତ୍ରଣ ରେଖାରେ ପ୍ରାୟତଃ ଶାନ୍ତି ରହି ଆସିଥିଲା। ୧୯୭୫ ରେ ଏହି ଅଞ୍ଚଳରେ କିଛିଟା ଉତ୍ତେଜନା ର ରେକର୍ଡ ରହିଛି। ତା ପରେ ଚୀନ ଓ ଭାରତ ମଧ୍ୟରେ ସୀମାକୁ ନେଇ ସାମରିକ ବିବାଦ ପ୍ରାୟ ନଥିଲା। ହଠାତ ଢୋକଲାମ ପ୍ରସଙ୍ଗରେ ଭାରତ ଓ ଚୀନ ସେନା ପରଷ୍ପରର ମୁହାଁମୁହିଁ ହେଲେ। ତା ପରଠୁ ବିଭିନ୍ନ ସମୟରେ ଚୀନ ଓ ଭାରତୀୟ ସେନା ମଧ୍ୟରେ ଉତ୍ତେଜନାର ଖବର ଆସିଛି। ତେବେ ଗତ ବର୍ଷ ଅଗଷ୍ଟ ମାସରେ ଭାରତ ସରକାର ଜାମ୍ମୁ-କାଶ୍ମୀରରୁ ଧାରା ୩୭୦ରୁ ଉଚ୍ଛେଦ କରି ଲଦ୍ଦାଖକୁ ଏକ ସ୍ଵତନ୍ତ୍ର କେନ୍ଦ୍ର ଶାସିତ ପ୍ରଦେଶ କରିବା ପରେ, ଏହାକୁ ନେଇ ଲଦ୍ଦାଖ ଅଞ୍ଚଳରେ ଚୀନ ନିଜର ସାମରିକ ଶକ୍ତି ବିସ୍ତାର କରିବା ଆରମ୍ଭ କରିଥିଲା।

ଏହି ପ୍ରସଙ୍ଗରେ ମୂଳରୁ ଭାରତ ସରକାର ଏକ ସ୍ପଷ୍ଟ ଆଭିମୁଖ୍ୟ ଗ୍ରହଣ କରି ନାହାନ୍ତି। ଗତ ୬ ବର୍ଷରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ଚୀନର ସର୍ବମୟ କର୍ତ୍ତା ସି ଜିନ ପିଙ୍ଗଙ୍କୁ ୯ ଥର ଭେଟିଛନ୍ତି। ଉଭୟ ନେତା ପରଷ୍ପର ସହିତ ୪ ଥର ଶିଖର ସମ୍ମିଳନୀ କରିଛନ୍ତି। ଭାରତରେ ଚୀନର ପୁଞ୍ଜି ଲଗାଣ ଓ ଭାରତୀୟ ବଜାରରେ ଚୀନା ସାମାନର ପ୍ରାବଲ୍ୟ ବଢି ଚାଲିଛି। ଏକଦା ଭାରତୀୟ ବଜାରରେ ଚୀନର ବଜାର ଚୀନାମାଟିର କପ-ପ୍ଳେଟ ରେ ଇ ସୀମିତ ରହିଥିଲା। ହେଲେ ଗତ ଦଶ ବର୍ଷରେ ଭାରତୀୟ ବଜାର ମୁଖ୍ୟତଃ ଶସ୍ତା ଚାଇନିଜ ମାଲର ଭୂସ୍ଵର୍ଗ ପାଲଟି ଯାଇଛି।

ଗତକାଲିର ସୀମାନ୍ତ ହତ୍ୟାକାଣ୍ଡ ପରେ ଭାରତ-ଚୀନ ସମ୍ପର୍କ କେଉଁ ଆଡକୁ ଯିବ? ଗଲାୱାନ ଉପତ୍ୟକାରେ ଚୀନର ଅନୁପ୍ରବେଶକୁ ପ୍ରତିହତ କରିବା ଭାରତ ପାଇଁ ଜରୁରୀ ନିଶ୍ଚୟ। ଲଦ୍ଦାଖକୁ ଏକ ବିବଦମାନ ଅଞ୍ଚଳ ଭାବେ ପ୍ରଦର୍ଶିତ କରିବାକୁ ଚୀନ ସୁଚିନ୍ତିତ ଭାବରେ ନିଜର ସାମରିକ ରଣନୀତି ପ୍ରସ୍ତୁତ କରୁଛି। ଏ  କ୍ଷେତ୍ରରେ ଚୀନର ଆଧିପତ୍ୟବାଦୀ ମାନସିକତା ବିରୋଧରେ ଜାତୀୟ ସହମତି ସୃଷ୍ଟି କରି ଭାରତକୁ ଦୃଢ ଜବାବ ଦେବାକୁ ପଡିବ। ଲୁଚାଛପାରେ ବୈଠକ କରି ଏ ସମସ୍ୟାର ସମାଧାନ ସହଜ ନୁହେଁ।

Categories
ଆଜିର ଖବର ଜାତୀୟ ଖବର

ଭାରତ ଚୀନ୍‌ ସୀମା ସଂଘର୍ଷ : 20 ଭାରତୀୟ ଯବାନ ଏବଂ 43 ଚୀନ୍‌ ଯବାନ ହତାହତ!

ଲଦାଖ : ଭାରତ ଏବଂ ଚୀନ୍‌ ମଧ୍ୟରେ ଲାଗି ରହିଥିବା ସୀମା ବିବାଦରେ ଉଭୟ ପକ୍ଷର ସେନା ମଧ୍ୟରେ ସଂଘର୍ଷରେ 20 ଜଣ ଭାରତୀୟ ଯବାନ ଶହୀଦ ହୋଇଥିବା ବେଳେ ଏବଂ 43 ଜଣ ଚୀନ୍‌ ଯବାନ ନିହତ ହୋଇଛନ୍ତି । ଲଦାଖର ଗଲଓ୍ବାନ ଉପତ୍ୟାକାରେ ଉଭୟ ରାଷ୍ଟ୍ରର ସେନାଙ୍କ ମଧ୍ୟରେ ସୋମବାର ରାତିରେ ସଂଘର୍ଷ ହୋଇଥିଲା । ମଙ୍ଗଳବାର 3 ଜଣ ଭାରତୀୟ ଯବାନ ଶହୀଦ ହେବାର ଖବର ଆସିଥିଲା । ତେବେ ଚୀନ୍‌ ପକ୍ଷରୁ କୌଣସି ସଂଖ୍ୟା ଦର୍ଶାଯାଇନଥିଲା । ଏହାପରେ ରାତିରେ ଭାରତୀୟ ସେନା ପକ୍ଷରୁ 20 ଜଣ ଯବାନ ଶହୀଦ ହୋଇଥିବା ନେଇ ସୂଚନା ପ୍ରଦାନ କରାଯାଇଥିଲା । ଏହା ବ୍ୟତିତ ଏହି ଲଢେଇରେ 43ରୁ ଅଧିକ ଚୀନ୍‌ ସୈନ୍ୟଙ୍କ ପ୍ରାଣହାନି ଘଟିଥିବା ଜଣାପଡିଛି । ତେବେ ଉଭୟ ପକ୍ଷର ମୃତ୍ୟୁ ସଂଖ୍ୟା ବୃଦ୍ଧି ପାଇବାର ସମ୍ଭାବନା ରହିଛି । (ଏଜେନ୍ସି)

Categories
ଆଜିର ଖବର

ଭାରତ-ଚୀନ୍‌ ସଂଘର୍ଷରେ 5 ଚୀନ୍‌ ଯବାନ ନିହତ : 11 ଆହତ

ଲଦାଖ : ଲଦଖର ଗଲଓ୍ବାନ୍‌ ଉପତ୍ୟାକାରେ ଉଭୟ ରାଷ୍ଟ୍ରର ଯବାନଙ୍କ ମଧ୍ୟରେ ସଂଘର୍ଷ ଘଟିଛି । ଏହି ସଂଘର୍ଷରେ 3 ଜଣ ଭାରତୀୟ ଯବାନ ଶହୀଦ ହୋଇଥିବା ବେଳେ 5 ଜଣ ଚୀନ୍‌ ଯବାନଙ୍କ ପ୍ରାଣହାନି ଘଟିଛି । ସେହିପରି 11 ଜଣ ଚୀନ୍‌ ସୈନ୍ୟ ଆହତ ହୋଇଥିବା ଜଣାପଡିଛି । ଭାରତୀୟ ସେନା ପକ୍ଷରୁ ଶହୀଦ ଯବାନଙ୍କୁ ନେଇ ସ୍ପଷ୍ଟୋକ୍ତି ପ୍ରଦାନ କରାଯାଇଥିବା ବେଳେ ଚୀନ୍‌ ପକ୍ଷରୁ ନୀରବତା ଅବଲମ୍ବନ କରାଯାଉଛି । ତେବେ ଗ୍ଲୋବାଲ ଟାଇମ୍ସର ଏକ ରିପୋର୍ଟ ଅନୁଯାୟୀ 5 ଜଣ ଚୀନ୍‌ ଯବାନ ପ୍ରାଣ ହରାଇଥିବା ବେଳେ 11 ଜଣ ଆହତ ହୋଇଛନ୍ତି । ସରକାରୀ ଭାବରେ କୌଣସି ସୂଚନା ପ୍ରଦାନ କରାଯାଇନଥିବା ବେଳେ ଚୀନ୍‌ ରାଷ୍ଟ୍ରଦୂତ ଭାରତକୁ ସମାଲୋଚନା କରିଥିଲେ । (ଏଜେନ୍ସି)

Categories
ଆଜିର ଖବର ଜାତୀୟ ଖବର

ଚୀନ୍‌ ସୀମା ବିବାଦ ନିୟନ୍ତ୍ରଣରେ ରହିଛି : ସ୍ଥଳସେନା ମୁଖ୍ୟ

ନୂଆଦିଲ୍ଲୀ : ଭାରତ ଏବଂ ଚୀନ୍‌ ସୀମାବିବାଦକୁ ନେଇ ବିଭିନ୍ନ ଗଣମାଧ୍ୟମରେ ଖବର ପ୍ରକାଶ ପାଉଥିବା ବେଳେ ଏହାକୁ ନେଇ ସ୍ପଷ୍ଟୀକରଣ ଦେଇଛନ୍ତି ସ୍ଥଳସେନା ମୁଖ୍ୟ ଏମ୍‌ ଏମ୍‌ ନରାଓ୍ବଣେ । ଚୀନ୍‌ ସହିତ ସୀମା ବିବାଦ ନିୟନ୍ତ୍ରଣରେ ରହିଛି ବୋଲି ସ୍ଥଳସେନା ମୁଖ୍ୟ ମତ ଦେଇଛନ୍ତି । ଉଭୟ ଦେଶ ମଧ୍ୟରେ ହୋଇଥିବା ଆଲୋଚନା ସଫଳ ହୋଇଛି ବୋଲି ନରାଓ୍ବଣେ ମତ ଦେଇଛନ୍ତି । ଉଭୟ ଦେଶର ସରକାରୀ ଅଧିକାରୀ ଏବଂ ସେନାଧିକାରୀଙ୍କ ମଧ୍ୟରେ ହୋଇଥିବା ଆଲୋଚନା ସଫଳ ହୋଇଛି ଏବଂ ମୁଁ ଦେଶବାସୀଙ୍କୁ ଆଶ୍ବାସନା ଦେଉଛି କି ସ୍ଥିତି ନିୟନ୍ତ୍ରଣାଧୀନ ରହିଛି ବୋଲି ନରାଓ୍ବଣେ ମତ ଦେଇଛନ୍ତି । ନେପାଳ ସହିତ ଭାରତର ଭୌଗଳିକ, ଐତିହାସିକ ଏବଂ ସାଂସ୍କୃତିକ ସମ୍ପର୍କ ରହିଛି । ସେହିପରି ଭାରତ ଓ ନେପାଳ ମଧ୍ୟରେ ସମ୍ପର୍କ ପୁରାତନ ଏବଂ ସଠିକ୍‌ ରହିଛି ବୋଲି ନରାଓ୍ବଣେ ମତ ଦେଇଛନ୍ତି ।  (ଏଜେନ୍ସି)

Categories
ଅନ୍ତରାଷ୍ଟ୍ରୀୟ ଆଜିର ଖବର ଜାତୀୟ ଖବର

କରୋନା ଉପରୁ ବିଶ୍ବ ସମୁଦାୟର ଧ୍ୟାନ ହଟାଇବା ସୀମା ବିବାଦ ସୃଷ୍ଟି କରୁଛି ଚୀନ୍‌ : ଭିକେ ସିଂ

ନୂଆଦିଲ୍ଲୀ : କରୋନା ଭାଇରସ୍‌କୁ ନେଇ ବିଶ୍ବ ସମୁଦାୟ ସମ୍ମୁଖରେ ନିନ୍ଦିତ ହେଉଥିବା ଚୀନ୍‌ ଜାଣିଶୁଣି ଭାରତ ସହିତ ସୀମା ବିବାଦରେ ଲିପ୍ତ ରହୁଛି ବୋଲି କେନ୍ଦ୍ରମନ୍ତ୍ରୀ ତଥା ପୂର୍ବତନ ସ୍ଥଳସେନା ମୁଖ୍ୟ ଭିକେ ସିଂ ମତ ଦେଇଛନ୍ତି । କରୋନା ଭାଇରସ୍‌ କାରଣରୁ ଚାଇନା ସମଗ୍ର ବିଶ୍ବର ରାଡାରରେ ରହିଛି । ଏହା ଉପରୁ ଧ୍ୟାନ ହଟାଇବା ପାଇଁ ଚୀନ୍‌ ପକ୍ଷରୁ ଏଭଳି କାର୍ଯ୍ୟ କରାଯାଉଥିବା ନେଇ ସିଂ କହିଛନ୍ତି । ପୂର୍ବରୁ ଲଦାଖରେ ଏବଂ ସିକ୍କିମ୍‌ ପାଙ୍ଗଙ୍ଗରେ ଉଭୟ ପକ୍ଷର ସେନା ପରସ୍ପର ସହିତ ଲଢେଇ କରିଥିଲେ । ଏହା ମଧ୍ୟରେ ଭାରତୀୟ ବାୟୁସେନା ପକ୍ଷରୁ ନୂତନ ୟୁନିଟ୍‌ ପ୍ରସ୍ତୁତ କରାଯାଇଛି । ତେବେ ଚୀନ୍‌ର ରାଷ୍ଟ୍ରଦୂତ କହିଛନ୍ତି ଉଭ ରାଷ୍ଟ୍ର ପରସ୍ପରର ଶତ୍ରୁ ନୁହନ୍ତି, ବରଂ ପରସ୍ପର ପାଇଁ ସୁଯୋଗ । ହାତୀ ଏବଂ ଡ୍ରାଗନ ଗୋଟିଏ ମଞ୍ଚରେ ନାଚି ପାରିବ । ଅପରପକ୍ଷରେ ଆମେରିକୀୟ ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ ମଧ୍ୟସ୍ଥତାର ପ୍ରସ୍ତାବ ଦେଇ ଘଟଣାକୁ ଆହୁରି ଗୋଳମାଳିଆ କରି ଦେଇଛନ୍ତି । (ଏଜେନ୍ସି)

Categories
ଆଜିର ଖବର ଜାତୀୟ ଖବର

ଲଦାଖ ସୀମାରେ ଉଡିଲା ଚୀନ୍‌ ବିମାନ : ଯୁଦ୍ଧବିମାନ ପଠାଇଲା ଭାରତ

ଲଦାଖ : ଲଦାଖ ନିୟନ୍ତ୍ରଣ ରେଖାର ସୀମା ନିକଟରେ ଚୀନ୍‌ର ବିମାନ ଉଡିବା ପରେ ଭାରତୀୟ ବାୟୁସେନା ପକ୍ଷରୁ ଏହାର ଯୁଦ୍ଧ ବିମାନକୁ ସୀମାନ୍ତକୁ ପଠାଯାଇଛି । ମଙ୍ଗଳବାର ପ୍ରଥମେ ଚୀନ୍‌ ବିମାନ ନିୟନ୍ତ୍ରଣ ରେଖା ନିକଟରେ ଉଡୁଥିବାର ଦେଖିବାକୁ ମିଳିଥିଲା । ଏହାପରେ ଭାରତୀୟ ବାୟୁସେନା ପକ୍ଷରୁ ଯୁଦ୍ଧ ବିମାନ ଲଦାଖ ସୀମାନ୍ତକୁ ପ୍ରେରଣ କରାଯାଇଥିଲା । ତେବେ ବାୟୁସେନା ପକ୍ଷରୁ ଏହାକୁ ନିୟମିତ ରୁଟିନ୍‌ ବୋଲି ଅଭିହିତ କରାଯାଇଛି । ଉଲ୍ଲେଖଯୋଗ୍ୟ ଯେ , ତିନି ଦିନ ପୂର୍ବରୁ ସିକ୍କିମ୍‌ ନିୟନ୍ତ୍ରଣ ରେଖାରେ ଉଭୟ ପକ୍ଷର ସେନା ପାସ୍ପର ସହିତ ହାତହାତି ହୋଇଥିଲେ । ଏହି ଘଟଣା ପରେ ପରସ୍ପର ସୀମାରେ ଯୁଦ୍ଧବିମାନ ଉଡାଣକୁ ନେଇ ଯୁଦ୍ଧ ଆଶଙ୍କା ଦେଖାଦେଇଥିବା ବେଳେ ଭାରତୀୟ ବାୟୁସେନା ଏହାକୁ ଖଣ୍ଡନ କରିଛି । ଚୀନ୍‌ ବିମାନ ଗୁଡିକ ଚୀନ୍‌ର ପରିସୀମା ମଧ୍ୟରେ ଉଡୁଥିବା ବେଳେ ଭାରତୀୟ ପରିସୀମା ମଧ୍ୟରେ ଭାରତୀୟ ବିମାନ ଗୁଡିକ ଉଡୁଥିଲା ଯାହାକି ଦୈନନ୍ଦିନ କାର୍ଯ୍ୟ । ତେଣୁ ଏହି ଘଟଣାକୁ ଅଧିକ ସ୍ପର୍ଶକାତର ନକରିବା ପାଇଁ ବାୟୁସେନା ପକ୍ଷରୁ କୁହାଯାଇଛି । (ଏଜେନ୍ସି)

Categories
ଆଜିର ଖବର ଜାତୀୟ ଖବର

ସିକ୍କିମ୍‌ ସୀମାରେ ପରସ୍ପର ସହିତ ଲଢିଲେ ଭାରତ ଏବଂ ଚୀନ୍‌ ସେନା : 11 ଆହତ

ଗାଙ୍ଗଟକ୍‌ : ସିକ୍କିମ୍‌ ସୀମାରେ ଭାରତ ଏବଂ ଚୀନ୍‌ ସୈନିକଙ୍କ ମଧ୍ୟରେ ଝଗଡା ଲାଗିଛି । ରବିବାର ଲାଗିଥିବା ଏହି ଝଗଡାରେ ଉଭୟ ପକ୍ଷର ପ୍ରାୟ 11 ଜଣ ଯବାନ ଆହତ ହୋଇଛନ୍ତି । ରବିବାର କୌଣସି କାରଣରୁ ଉଭୟ ପକ୍ଷଙ୍କ ମଧ୍ୟରେ ଝଗଡା ଲାଗିବା କାରଣରୁ 4 ଜଣ ଭାରତୀୟ ଯବାନ ଏବଂ 7 ଜଣ ଚୀନ୍‌ ଯବାନ ଆହତ ହୋଇଛନ୍ତି । ନାକୁ ଲା ନିୟନ୍ତ୍ରଣ ରେଖା ନିକଟରେ ଉଭୟ ପକ୍ଷର ବରିଷ୍ଠ ଅଧିକାରୀଙ୍କ ମଧ୍ୟରେ କଥା କଟାକଟି ହେବା ପରେ ଏହି ଝଗଡା ଆରମ୍ଭ ହୋଇଥିଲା । 5 ହଜାର ମିଟରର ଏହି ନିୟନ୍ତ୍ରଣ ରେଖାରେ ଉଭୟ ପକ୍ଷର ସେନା ପରସ୍ପର ସହିତ ଲଢେଇ କରିବା ସହିତ ହାତହାତି ଯାଏଁ କଥା ଯାଇଥିଲା । ପ୍ରାୟ 150ରୁ ଅଧିକ ସେନା ପରସ୍ପର ସହିତ ଲଢେଇ କରିଥିଲେ । ଉଲ୍ଳେଖଯୋଗ୍ୟ ଯେ, କିଛିଦିନ ପୂର୍ବରୁ ସ୍ଥଳସେନା ମୁଖ୍ୟ ଏମ୍‌ ଏମ୍‌ ନରାଓ୍ବଣେଙ୍କ ଗସ୍ତ ପରଠାରୁ ଉଭୟ ପକ୍ଷଙ୍କ ମଧ୍ୟରେ ବିବାଦ ଲାଗି ରହିଛି । ନରାଓ୍ବଣେ ସୁକ୍‌ନା, ବିନ୍ନାଗୁରୀ ଏବଂ ପାନାଗଡ ନିୟନ୍ତ୍ରଣ ରେଖା ଭ୍ରମଣ କରିଥିଲେ । 2017 ମସିହାରେ ମଧ୍ୟ ଉଭୟ ପକ୍ଷର ସେନା ପରସ୍ପରକୁ ପଥର ଫିଙ୍ଗି ଆକ୍ରମଣ କରିଥିଲେ ।

Categories
ଅନ୍ତରାଷ୍ଟ୍ରୀୟ ଆଜିର ଖବର

76ଦିନ ପରେ ଉହାନରୁ ହଟିଲା ଲକ୍‌ଡାଉନ୍, ଲୋକ ଛାଡୁଛନ୍ତି ସହର

ଉହାନ: କରୋନା ଭାଇରସର କେନ୍ଦ୍ରସ୍ଥଳୀ କୁହାଯାଉଥିବା ଚାଇନା ଦେଶର ହୁବେଇ ରାଜ୍ୟର ଉହାନରୁ ଗତକାଲି ମଧ୍ୟରାତ୍ରିରୁ ଲକ୍‌ଡାଉନ୍ ହଟିଛି। ଦୀର୍ଘ 76 ଦିନ ପରେ ଚାଇନା ସରକାର ଲକ୍‌ଡାଉନ୍ ହଟାଇଛନ୍ତି। ଏଣିକି ଉହାନବାସୀ ପୂର୍ବ ଭଳି ନିଜ ନିଜର କାମ କରିପାରିବେ। ଗତବର୍ଷ ଡିସେମ୍ୱର ମାସ ଶେଷ ବେଳକୁ ଏଠାରେ କରୋନା ଭାଇରସ ବ୍ୟାପିଥିଲା। ମୃତକ ଓ ଆକ୍ରାନ୍ତଙ୍କ ସଂଖ୍ୟା ବଢ଼ୁଥିବା ଦେଖି ଚାଇନା ସରକାର ଜାନୁଆରୀ 23ରେ ଲକ୍‌ଡାଉନ୍ ଘୋଷଣା କରିଥିଲେ।

କରୋନା ଭାଇରସ ପାଇଁ ଚାଇନାରେ 3300ରୁ ଅଧିକ ଲୋକଙ୍କ ମୃତ୍ୟୁ ହୋଇଛି। 82 ହଜାରରୁ ଅଧିକ ଲୋକ କେବଳ ଉହାନରୁ ସଂକ୍ରମିତ ହୋଇଥିଲେ। ନିକଟରେ ସପ୍ତାହେ ହେବ କୌଣସି ଆକ୍ରାନ୍ତ ଚିହ୍ନଟ ହୋଇନାହାନ୍ତି କି ଏହି ମହାମାରୀରେ କେହି ମୃତ୍ୟୁ ବରଣ କରିନଥିବା ଦେଖିବାକୁ ମିଳିଛି। ତେବେ ଲକ୍‌ଡାଉନ୍‌ ଉଠିବା ପରେ ସେଠାକାର ଲୋକମାନେ ସେହି ସହର ଛାଡୁଥିବାର ଦେଖାଯାଉଛି । ସେଠାରେ ଟ୍ରେନ୍‌ ଓ ବିମାନ ବନ୍ଦରର, ବସଷ୍ଟାଣ୍ଡରେ ଭାରୀ ପରିମାଣର ଭିଡ ଦେଖିବାକୁ ପରିଲକ୍ଷିତ ହେଉଥିଲା । (ଏଜେନ୍ସି)

Categories
ଆଜିର ଖବର ଜାତୀୟ ଖବର

କରୋନା ଅପଡେଟ୍‌ : ଆମେରିକାରେ ଦିନକରେ ହଜାରରୁ ଉର୍ଦ୍ଧ୍ବ ମୃତ୍ୟୁ

ନୂଆଦିଲ୍ଲୀ : ଚାଇନାର ବୁହାନ ସହରରୁ ସାରା ଦେଶକୁ ବ୍ୟାପିଥିବା ଭୟଙ୍କର କରୋନା ଏବେ ଦେଶର ଶକ୍ତିଶାଳୀ ରାଷ୍ଟ୍ରଗୁଡ଼ିକୁ କବଳିତ କରି ରଖିଛି । ଦୁନିଆର ଶକ୍ତିଶାଳୀ ରାଷ୍ଟ୍ର ଆମେରିକା ମଧ୍ୟ ଏଥିରୁ ନିସ୍ତାର ପାଇପାରିନାହିଁ। ଆମେରିକାରେ  ବିଗତ 24 ଘଣ୍ଟା ମଧ୍ୟରେ ଏକ ହଜାରରୁ ଅଧିକ ଲୋକଙ୍କର ମୃତ୍ୟୁ ହୋଇଛି । ଆମେରିକାରେ କରୋନା ଜନିତ ମୃତ୍ୟୁ ସଂଖ୍ୟା ପାଞ୍ଚ ହଜାର ପାର କରିଛି । ଚୀନ୍‌ଠାରୁ ଆମେରିକାରେ ଅଧିକ ମୃତ୍ୟୁ ହୋଇଛି ।  କେବଳ ନ୍ୟୁୟର୍କରେ ଦୁଇହଜାରରୁ ଅଧିକ ଲୋକେ ମୃତ୍ୟୁବରଣ କରିଛନ୍ତି ।  ଆମେରିକାରେ ଛଅ ସପ୍ତାହର ଜଣେ ଶିଶୁର ମଧ୍ୟ କରୋନା ଯୋଗୁଁ ମୃତ୍ୟୁ ହୋଇଛି ।  ଆମେରିକାରେ ସର୍ବମୋଟ୍‌ 2,15,174 ଜଣ ଏହି ଭୟଙ୍କର ରୋଗରେ ଆକ୍ରାନ୍ତ ହୋଇଛନ୍ତି । ସେହିପରି ଇଟାଲୀରେ ଏକ ଲକ୍ଷରୁ ଅଧିକ ଉର୍ଦ୍ଧ୍ବ ଲୋକେ ଏହି ରୋଗରେ ଆକ୍ରାନ୍ତ ହୋଇଥିବାବେଳେ 13 ହଜାରରୁ ଉର୍ଦ୍ଧ୍ବ ମୃତ୍ୟୁବରଣ କରିଛନ୍ତି । ଆମେରିକା ଓ ଇଟାଲୀ ପରେ ସ୍ପେନ୍‌ରେ କରୋନା ଜନିତ ମୃତ୍ୟୁ ସଂଖ୍ୟା ବଢିବାରେ ଲାଗିଛି । ସ୍ପେନ୍‌ରେ ସର୍ବମୋଟ୍‌ ମୃତ୍ୟୁ ସଂଖ୍ୟା 9ହଜାରରୁ ଉର୍ଦ୍ଧ୍ବ ରହିଛି । ସେହିପରି ସ୍ପେନରେ ଆକ୍ରାନ୍ତଙ୍କ ସଂଖ୍ୟା ଏକ ଲକ୍ଷ ଟପିଛି ।

ସେହିପରି ଜର୍ମାନୀ, ଫ୍ରାନ୍ସ, ଇରାନ୍‌, ୟୁକେ, ସ୍ବିଜରଲାଣ୍ଡ, ତର୍କୀ, ନେଦାରଲାଣ୍ଡ, ଅଷ୍ଟ୍ରେଲିଆ, ପାକିସ୍ତାନ, ଭାରତ ପରି ବହୁ ରାଷ୍ଟ୍ରରେ ଏହି କରୋନା ବେଶ୍‌ ଭୟଙ୍କର ଭାବରେ ମାଡ଼ି ଚାଲିଛି ।

ସମୀକ୍ଷା ତରଫରୁ ପ୍ରସ୍ତୁତ କରୋନା ଅପଡେଟ୍‌ :

Categories
ଆଜିର ଖବର ଖେଳ

ନଭେମ୍ବରରେ ଚୀନ୍‌ରେ ଆୟୋଜିତ ହେବ ଏସିଆନ୍ ୟୁଥ୍ ଗେମ୍ସ

ବେଜିଂ : ଆସନ୍ତା ନଭେମ୍ବର ମାସରେ ଚୀନ୍‌ରେ ଆୟୋଜିତ ହେବାକୁ ଯାଉଛି ଏସିଆନ୍ ୟୁଥ୍ ଗେମ୍ସ । ଦକ୍ଷିଣ ଚୀନ୍‌ର ସାଣ୍ଟୋଉ ସହରରେ ଏହି କ୍ରୀଡା ଉତ୍ସବ ଅନୁଷ୍ଠିତ ହେବାକୁ ଯାଉଛି । ୨୦୨୧ର ନଭେମ୍ବର ୨୦ରୁ ୨୮ ମଧ୍ୟରେ ଏହି ଟୁର୍ଣ୍ଣାମେଣ୍ଟ ଆୟୋଜିତ ହେବ । ଉହାନ୍‌ରେ କରୋନା ଭାଇରସ୍ ଆତଙ୍କ ପରେ ଚୀନ୍‌ରୁ ଟୁର୍ଣ୍ଣାମେଣ୍ଟ ପ୍ରତ୍ୟାହାର କରିବା ପାଇଁ ଆଶଙ୍କା ସୃଷ୍ଟି ହୋଇଥିଲା । ମାତ୍ର ଅଲମ୍ପିକ୍ସ କମିଟି ଏସିଆ ପକ୍ଷରୁ ଟୁର୍ଣ୍ଣାମେଣ୍ଟ ଚୀନ୍‌ରେ ଆୟୋଜନ କରିବା ପାଇଁ ନିଷ୍ପତ୍ତି ନିଆଯାଇଥିଲା । ଉଲ୍ଲେଖଯୋଗ୍ୟ ଯେ, ଚୀନ୍ ତୃତୀୟ ଥର ପାଇଁ ଏହି ଟୁର୍ଣ୍ଣାମେଣ୍ଟ ଆୟୋଜନ କରିବାକୁ ଯାଉଛି ।

Categories
ଅନ୍ତରାଷ୍ଟ୍ରୀୟ ଆଜିର ଖବର ସ୍ବାସ୍ଥ୍ୟ

ବିଗତ 24 ଘଣ୍ଟା ମଧ୍ୟରେ କରୋନା ଯୋଗୁଁ ସ୍ପେନରେ ସର୍ବାଧିକ ମୃତ୍ୟୁ

ନୂଆଦିଲ୍ଲୀ : ବିଶ୍ବରେ କରୋନାର ଆକ୍ରାନ୍ତଙ୍କ ସଂଖ୍ୟା 5ଲକ୍ଷ ଟପିଲାଣି । ଦୁନିଆରେ ମୋଟ୍‌ 5,36,617 ଜଣ କରୋନାରେ ସଂକ୍ରମିତ ହୋଇଛନ୍ତି । ସେହିପରି କରୋନା ଯୋଗୁଁ ମୋଟ୍‌ 24,118 ଜଣଙ୍କର ମୃତ୍ୟୁ ଘଟିଲାଣି। ସେହିପରି ସୁସ୍ଥ ହୋଇଛନ୍ତି 1,24,408ଜଣ । ଚୀନ୍‌ ପରେ ୟୁରୋପରେ ଏହା ବେଶ୍‌ ଭୟଙ୍କର ରହିଛି । ସ୍ପେନ୍‌ରେ ଗତ 24 ଘଣ୍ଟାରେ 718ଜଣଙ୍କର ମୃତ୍ୟୁ ହୋଇଛି । ସ୍ପେନ୍‌ରେ ସର୍ବମୋଟ୍‌ ମୃତ୍ୟୁ ସଂଖ୍ୟା 4,365ରେ ପହଞ୍ଚିଛି । ଗୁରୁବାର ଦିନ ସ୍ପେନ୍‌ରେ 718ଜଣଙ୍କର ମୃତ୍ୟୁ ହୋଇଥିବାବେଳେ ଆମେରିକାରେ ବିଗତ 24 ଘଣ୍ଟା ମଧ୍ୟରେ 16,000 ଲୋକ କରୋନା କବଳରେ ଆସିଥିବାବେଳେ ମୋଟ୍‌ ଆକ୍ରାନ୍ତଙ୍କ ସଂଖ୍ୟା 85ହଜାରକୁ ଟପିଛି । ସେହିପରି ଇଟାଲୀରେ କରୋନା ଯୋଗୁଁ ମୃତ୍ୟସଂଖ୍ୟା ଆଠ ହଜାର ପାର୍‌ କରିଛି । ଓ୍ବାଲ୍ଡୋମିଟରର ପରିସଂଖ୍ୟାନ ଅନୁସାର ଗତ 24 ଘଣ୍ଟା ଧ୍ୟରେ ଇଟାଲୀରେ 683ଜଣଙ୍କର ମୃତ୍ୟୁ ହୋଇଛି ।

ସମୀକ୍ଷା ତରଫରୁ କରୋନା ଅପଡେଟ୍‌ :

Categories
ଅନ୍ତରାଷ୍ଟ୍ରୀୟ ଆଜିର ଖବର

ଚୀନ୍‌ରେ ଭୁଶୁଡିଲା ହୋଟେଲ୍‌ : 49 ଉଦ୍ଧାର

ବେଜିଂ : ଚୀନ୍‌ରେ ଏକ ହୋଟେଲ୍‌ ଭୁଶୁଡି ପଡିବା କାରଣରୁ 70 ଜଣ ଲୋକ ଫସି ରହିଥିବା ବେଳେ ତା ମଧ୍ୟରୁ 49 ଜଣଙ୍କୁ ଉଦ୍ଧାର କରାଯାଇଛି । ପୂର୍ବ ଚୀନ୍‌ର ଫୁଜିଆନ୍‌ ପ୍ରଦେଶରେ ରହିଥିବା ଏହି ହୋଟେଲ୍‌ରେ 80ଟି ରୁମ୍‌ ରହିଥିବା ବେଳେ ଭୁଷୁଡିବା ସମୟରେ 70 ଜଣ ରହିଥିଲେ । ଫୁଜିଆନ୍‌ର ଅଗ୍ନିଶମ ବିଭାଗ ଅଧିକାରୀ ଉଦ୍ଧାର କାର୍ଯ୍ୟରେ ନିୟୋଜିତ ହୋଇଛନ୍ତି । ଆହୁରି 21 ଜଣ ବ୍ୟକ୍ତି ହୋଟେଲ ତଳେ ଫସିରହିଥିବା ଜଣାପଡିଛି । 2018ରେ ଏହି ହୋଟେଲଟି ପ୍ରତିଷ୍ଠା ହୋଇଥିବା ବେଳ ହୋଟେଲ ଭୁଷୁଡିବାର କାରଣ ଜଣାପଡିନାହିଁ । ଉଲ୍ଲେଖଯୋଗ୍ୟ ଯେ, ଶନିବାର ସନ୍ଧ୍ୟା 7.15 ମିନିଟ୍‌ରେ ଏହି ହୋଟେଲ୍‌ଟି ଭୁଶୁଡି ପଡିଥିଲା । (ଏଜେନ୍ସି)

Categories
ଅନ୍ତରାଷ୍ଟ୍ରୀୟ ଆଜିର ଖବର

ଲାଇସେନ୍ସ ମିଳିବାର 10 ମିନିଟ୍‌ ମଧ୍ୟରେ ନଦୀକୁ କାର୍‌ ଖସାଇଲେ ଯୁବକ

ବେଜିଂ : ଲାଇସେନ୍ସ ମିଳିବାର 10 ମିନିଟ୍‌ ମଧ୍ୟରେ ନଦୀ ମଧ୍ୟକୁ କାର୍‌ ଖସାଇଛନ୍ତି ଯୁବକ । ଚୀନ୍‌ର ଜଣେ ଯୁବକଙ୍କୁ ଲାଇସେନ୍ସ ମିଳିବା ପରେ କାର୍‌ ଚଲାଉଥିବା ସମୟରେ ମୋବାଇଲରେ କଥା ହୋଇ ଯୁବକ ଜଣକ କାର୍‌ଟିକୁ ବ୍ରିଜ୍‌ରୁ ତଳକୁ ଖସାଇ ଦେଇଥିଲେ । ଝାଙ୍ଗ ନାମକ ଏହି ବ୍ୟକ୍ତି ଜଣକ ଲାଇସେନ୍ସ ପାଇଥିବାରୁ ମିଳିଥିବା ଶୁଭେଚ୍ଛା ମେସେଜ୍‌ର ଉତ୍ତର ଦେଉଥିବା ସମୟରେ କାର୍‌ଟି ତଳକୁ ଖସି ପଡିଥିଲା । ଚୀନ୍‌ର ଜୁନ୍ୟି ପ୍ରଦେଶରେ ଘଟିଥିବା ଏହି ଦୁର୍ଘଟଣାର କିଛି ଫଟୋ ଚୀନ୍‌ ଟ୍ରଫିକ୍‌ ପୋଲିସ୍‌ ପକ୍ଷରୁ ସେୟାର କରାଯାଇଛି । କାର୍‌ର ଡୋର୍‌ ଖୋଲି ଝାଙ୍ଗ ବାହାରିଥିବା ବେଳେ କ୍ରେନ୍‌ ଜରିଆରେ କାର୍‌ଟିକୁ ବାହାର କରାଯାଇଥିଲା । (ଏଜେନ୍ସି)

Categories
ଅନ୍ତରାଷ୍ଟ୍ରୀୟ ଆଜିର ଖବର ସ୍ବାସ୍ଥ୍ୟ

27 ଶହ ଅତିକ୍ରମ କଲା କୋରୋନା ଭାଇରସ୍‌ ମୃତ୍ୟୁ ସଂଖ୍ୟା

ବେଜିଂ : ଚୀନ୍‌ରେ ତାଣ୍ଡବ ମଚାଇଛି କୋରୋନା ଭାଇରସ୍‌ । ଗୁରୁବାର ମିଳିଥିବା ସୂଚନା ଅନୁଯାୟୀ ଏହି ଭାଇରସ୍‌ ପ୍ରଭାବରେ ମୃତ୍ୟୁ ସଂଖ୍ୟା 27 ଶହ ଅତିକ୍ରମ କରିଛି । ଧୀରେ ଧୀରେ ଏହି ଭାଇରସ୍‌ର ପ୍ରଭାବ ନିୟନ୍ତ୍ରଣକୁ ଆସିଥିଲେ ମଧ୍ୟ ଏପ୍ରିଲ୍‌ ପୂର୍ବରୁ ଏହାକୁ ସମ୍ପୂର୍ଣ୍ଣ ଦମନ କରିହେବ ନାହିଁ । ଏହି ଭାଇରସ୍‌ ଦ୍ବାରା ଆକ୍ରାନ୍ତଙ୍କ ସଂଖ୍ୟ 78,497ରେ ପହଞ୍ଚିଛି । ବୁଧବାର ଏହି ଭାଇରସ୍‌ ପ୍ରଭାବରେ 57 ଜଣଙ୍କ ମୃତ୍ୟୁ ଘଟିଥିବା ବେଳେ ନୂତନ ଭାବରେ 433 ଜଣ ଆକ୍ରାନ୍ତଙ୍କୁ ଚିହ୍ନଟ କରାଯାଇଛି । ବର୍ତ୍ତମାନ ସୁଦ୍ଧା ସମୁଦାୟ 32495 ଜଣ ସୁସ୍ଥ ହୋଇଥିବା ନେଇ ସୂଚନା ମିଳିଛି । (ଏଜେନ୍ସି)

Categories
ଅନ୍ତରାଷ୍ଟ୍ରୀୟ ଆଜିର ଖବର ସ୍ବାସ୍ଥ୍ୟ

2663ରେ ପହଞ୍ଚିଲା କୋରୋନା ଭାଇରସ୍‌ ମୃତ୍ୟୁ ସଂଖ୍ୟା

ବେଜିଂ : ଚୀନ୍‌ରେ କୋରୋନା ଭାଇରସ୍‌ ମୃତ୍ୟୁ ସଂଖ୍ୟା ରୋକିବାର ନାମ ନେଉନାହିଁ । ସୋମବାର ଏହି ଭାଇରସ୍‌ ପ୍ରଭାବରେ 71 ଜଣଙ୍କ ପ୍ରାଣହାନି ଘଟିଛି । ନୂତନ ଭାବରେ 71 ଜଣଙ୍କ ମୃତ୍ୟୁ ପରେ କୋରୋନା ମୃତ୍ୟୁ ସଂଖ୍ୟା 2600 ଅତିକ୍ରମ କରିଛି । ଏହାପରେ ମୃତ୍ୟୁ ସଂଖ୍ୟା 2663 ଛୁଇଁଛି । କୋରୋନା ଭାଇରସ୍‌ ପ୍ରଭାବରେ କେବଳ ଚୀନ୍‌ରେ ନୁହେଁ ଦକ୍ଷିଣ କୋରିଆରେ ମଧ୍ୟ ମୃତ୍ୟୁ ସଂଖ୍ୟ ବଢିବାରେ ଲାଗିଛି । ଦକ୍ଷିଣ କୋରିଆରେ ସୋମବାର ଦିନ ନୂତନ ଭାବରେ ଦୁଇ ଜଣଙ୍କର ମୃତ୍ୟୁ ଘଟିଛି । ସେହିପରି ନୂତନ ଭାବରେ 508 ଜଣ କୋରୋନା ଆକ୍ରାନ୍ତ ହସ୍ପିଟାଲରେ ଆଡମିଟ୍‌ ହୋଇଛନ୍ତି । କୋରୋନା ଭାଇରସ୍‌ ପ୍ରଭାବରେ ଚୀନ୍‌ ବିଧାନସଭା ଅଧିବେଶନ ବାତିଲ କରାଯାଇଥିବା ବେଳେ ଏହାଦ୍ବାରା ଚୀନ୍‌ର ଅର୍ଥନୀତି ଗଭୀର ଭାବରେ ପ୍ରଭାବିତ ହୋଇଛି । (ଏଜେନ୍ସି)

Categories
ଅନ୍ତରାଷ୍ଟ୍ରୀୟ ଆଜିର ଖବର ସ୍ବାସ୍ଥ୍ୟ

କୋରୋନା ଭାଇରସ୍‌ ମୃତ୍ୟୁ ସଂଖ୍ୟା 2592କୁ ବୃଦ୍ଧି : 409 ନୂତନ କେସ୍‌ ପଞ୍ଜୀକୃତ

ବେଜିଂ : କୋରୋନା ଭାଇରସ୍‌ ପ୍ରଭାବରେ ମୃତ୍ୟୁ ସଂଖ୍ୟା 2592କୁ ବୃଦ୍ଧି ପାଇଛି । ରବିବାର 150 ଜଣଙ୍କ ମୃତ୍ୟୁ ହୋଇଥିବା ବେଳେ 409ଟି ନୂତନ ମାମଲା ପଞ୍ଜୀକୃତ ହୋଇଛି । ଚୀନ୍‌ ଏବଂ ଜାପାନରେ ଏହି ଭାଇରସ୍‌ ତାଣ୍ଡବ ମଚାଇଥିବା ବେଳେ ଦକ୍ଷିଣ କୋରିଆରେ ଏହି ଭାଇରସ୍‌ ନିଜର ପ୍ରଭାବ ବିସ୍ତାର କରୁଛି । ରବିବାର ଦକ୍ଷିଣ କୋରିଆରେ ନୂତନ ଭାବରେ 161 ଜଣ ଆକ୍ରାନ୍ତ ହେବା ସହିତ ସମୁଦାୟ ଆକ୍ରାନ୍ତଙ୍କ ସଂଖ୍ୟା 763ରେ ପହଞ୍ଚିଛି । ସୋମବାର ମିଳିଥିବା ସୂଚନା ଅନୁଯାୟୀ ଚୀନ୍‌ରେ ବର୍ତ୍ତମାନ ସୁଦ୍ଧା 77 ହଜାର ବ୍ୟକ୍ତି ଏହି ଭାଇରସ୍‌ ଦ୍ବାରା ଆକ୍ରାନ୍ତ ହୋଇଛନ୍ତି । ସେହିପରି ଇରାନ୍‌ରେ ବର୍ତ୍ତମାନ ସୁଦ୍ଧା 43 ଜଣ କରୋନା ଆକ୍ରାନ୍ତଙ୍କୁ ଚିହ୍ନଟ କରାଯାଇଛି । (ଏଜେନ୍ସି)

Categories
ଅନ୍ତରାଷ୍ଟ୍ରୀୟ ଆଜିର ଖବର ଜାତୀୟ ଖବର

ଗୃହମନ୍ତ୍ରୀଙ୍କ ଅରୁଣାଚଳ ଗସ୍ତକୁ ଚୀନ୍‌ର ବିରୋଧ

ବେଜିଂ : କୋରୋନା ଭାଇରସ୍‌ ଦ୍ବାରା ଭୟଙ୍କର ଭାବରେ ପୀଡିତ ଚୀନ୍‌ ପକ୍ଷରୁ ପୁଣି ଏକ ନୂତନ ବିବାଦ ସୃଷ୍ଟି କରାଯାଇଛି । ଗୃହମନ୍ତ୍ରୀ ଅମିତ ଶାହଙ୍କ ଅରୁଣାଚଳ ପ୍ରଦେଶ ଗସ୍ତକୁ ଚୀନ୍‌ ପକ୍ଷରୁ ବିରୋଧ କରାଯାଇଛି । ଫେବୃୟାରୀ 20ରେ ଅରୁଣାଚଳ ପ୍ରଦେଶକୁ ପୂର୍ଣ୍ଣାଙ୍ଗ ରାଜ୍ୟର ମାନ୍ୟତା ମିଳିବାର 34 ବର୍ଷ ପୂର୍ତ୍ତି ହେଉଥିବା ଅବସରରେ ଗୃହମନ୍ତ୍ରୀ ଅରୁଣାଚଳ ପ୍ରଦେଶ ଗସ୍ତ କରିଛନ୍ତି । ଗୃହମନ୍ତ୍ରୀଙ୍କ ଏହି ଗସ୍ତ ଉଭୟ ରାଷ୍ଟ୍ରର ଦ୍ବିପାକ୍ଷିକ ସମ୍ପର୍କ ଉପରେ ଖରାପ ପ୍ରଭାବ ପକାଇବ ବୋଲି ଚୀନ୍‌ ବୈଦେଶିକ ମନ୍ତ୍ରାଳୟର ମୁଖପାତ୍ର ଗେଙ୍ଗ ସୁଆଙ୍ଗ ପ୍ରକାଶ କରିଛନ୍ତି । ଉଲ୍ଲେଖଯୋଗ୍ୟ ଯେ, ଚୀନ୍‌ ସରକାରଙ୍କ ପକ୍ଷରୁ ଅରୁଣାଚଳ ପ୍ରଦେଶକୁ ନିଜର ଅଂଶ ବୋଲି ଦାବି କରାଯାଉଛି । (ଏଜେନ୍ସି)