ଚେନ୍ନାଇ : ଲକ୍ଡାଉନ୍ କାରଣରୁ ସମସ୍ୟାରେ ପଡି ବାଇକ୍ ଚୋରି କରିଥିବା ଜଣେ ବ୍ୟକ୍ତି 15 ଦିନ ପରେ ବାଇକ୍ ଟିକୁ ଫେରସ୍ତ କରିଛନ୍ତି । କୋଏମ୍ବାଟୋରରେ ଲକ୍ଡାଉନ୍ରେ ଫସି ରହିଥିବା ବ୍ୟକ୍ତି ଜଣକ ନିଜ ପତ୍ନୀ ଏବଂ ପୁଅକୁ ନେବା ପାଇଁ ବାଇକ୍ଟିକୁ ଚୋରି କରିଥିଲେ । ତେବେ ଘରେ ପହଞ୍ଚିବା ପରେ ତୁରନ୍ତ ଏକ କୋରିୟର ସଂସ୍ଥା ସାହାଯ୍ୟରେ ଫେରାଇଛନ୍ତି ଏହି ବ୍ୟକ୍ତି ଜଣକ ।
ଉଲ୍ଲେଖଯୋଗ୍ୟ ଯେ, ଭି ସୁରେଶ କୁମାର କୋଏମ୍ବାଟୁରର ସୁଲୁରର ଜଣେ ଚମଡା ବ୍ୟବସାୟୀ । ତାଙ୍କର ହିରୋ ସ୍ପ୍ଲେଣ୍ଡର ଗାଡିଟି ମେ 18 ତାରିଖରେ ଚୋରି ହୋଇଯାଇଥିଲା । ଗାଡି ଫେରାଇବା ସହିତ ଉକ୍ତ ବ୍ୟକ୍ତି ଜଣକ ଏକ ଧନ୍ୟବାଦ ପତ୍ର ମଧ୍ୟ ଲେଖିଛନ୍ତି । ଲକ୍ଡାଉନ୍ରେ ଅନ୍ୟ କୌଣସି ରାସ୍ତା ନ ପାଇ ଗାଡିଟିକୁ ନେଇଥିବାରୁ କ୍ଷମା ଚାହୁଁଛି ବୋଲି ଚିଠିରେ ଲେଖାଯାଇଥିଲା । ଏହା ପରେ ସୁରେଶ କୁମାର ଥାନାରେ ଦାଖଲ କରିଥିବା ନିଜର ଅଭିଯୋଗକୁ ପ୍ରତ୍ୟାହାର କରିନେଇଛନ୍ତି ।
