ଭୁବନେଶ୍ବର, ଶାନ୍ତି ସ୍ତୁପ ଧଉଳିଠାରେ ଚାଲିଥିବା ତିନିଦିନିଆ ଧଉଳି କଳିଙ୍ଗ ମହୋତ୍ସବ ଶେଷ ହୋଇଛି। ରାଜ୍ୟ ପର୍ଯ୍ୟଟନ ବିଭାଗ ଏବଂ ଓଡିଶା ଡ୍ୟାନସ ଏକାଡେମୀର ମିଳିତ ସହଯୋଗରେ ଏହି ଉତ୍ସବ ଦୀର୍ଘ ବର୍ଷ ଧରି ଆୟୋଜିତ ହୋଇ ଆସୁଛି। ଶେଷ ସଂଧ୍ୟାରେ ପରିବେଷଣ ହୋଇଥିଲା ଓଡିଶୀ ସହିତ କୁଚୁପୁଡି ଏବଂ ଛଉ ନୃତ୍ୟ।
ପ୍ରଥମେ ଭୁବନେଶ୍ବରର ନୈବେଦ୍ୟ ଅନୁଷ୍ଠାନର କଳାକାରମାନେ ଓଡିଶାର ବାରମାସରେ ତେର ପର୍ବକୁ ଓଡିଶୀ ନୃତ୍ୟରେ ନୃତ୍ୟାୟନ କରିଥିଲେ। ଏହା ପାରଂପାରିକ ସଂଗୀତ ସହିତ ଓଡିଶୀ ନୃତ୍ୟର ଏକ ସମିଶ୍ରଣ ଧାରା ଥିଲା। ଦ୍ବିତୀୟ କାର୍ଯ୍ୟକ୍ରମରେ ପ୍ରଖ୍ୟାତ କୁଚୁପୁଡି ନୃତ୍ୟାଙ୍ଗନା ବୈଜୟନ୍ତ କାଶୀ ଏବଂ ତାଙ୍କର ସାଥୀମାନେ କୁଚୁପୁଡି ପରିବେଷଣ କରିଥିଲେ।
ସେହିପରି ଅନୁଗୁଳର ଓଡିଶୀ ନୃତ୍ୟାନୁଷ୍ଠାନ ନୃତ୍ୟ ନିଳୟର କଳାକାରମାନେ ପରିବେଷଣ କରିଥିଲେ ଓଡିଶୀ ନୃତ୍ୟ। ଗୁରୁ ସ୍ବପ୍ନାରାଣୀ ସିହ୍ନାଙ୍କ ନୃତ୍ୟ ନିର୍ଦ୍ଦେଶନାରେ କଳାକାରମାନେ ଭିନ୍ନଭିନ୍ନ ନୃତ୍ୟାଭିନୟ ପରିବେଷଣ କରିଥିଲେ। ଶେଷରେ ନୂଆଦିଲ୍ଲୀର କଳାକାରମାନେ ପରିବେଷଣ କରିଥିଲେ ଷଢେଇକଳା ଛଉ ନୃତ୍ୟ। ଶଷଧର ଆଚାର୍ଯ୍ୟ ଏବଂ ସାଥୀମାନଙ୍କ ଏହି ନୃତ୍ୟ ଶୈଳୀ ବେଶ୍ ଆକର୍ଷଣୀୟ ହୋଇଥିଲା।
ଶେଷ ସଂଧ୍ୟାରେ ପଶ୍ଚିମ ଓଡିଶା ବିକାଶ ପରିଷଦର ଅଧ୍ୟକ୍ଷ ତଥା ମୁଖ୍ୟମନ୍ତ୍ରୀଙ୍କ ପରାମର୍ଶଦାତା ଅସୀତ ତ୍ରିପାଠୀ, ଦକ୍ଷତା ବିକାଶ ଅଧ୍ୟକ୍ଷ ସୁବ୍ରତ ବାଗଚୀ, ମୋ ସ୍କୁଲ ଅଭିଯାନର ଅଧ୍ୟକ୍ଷା ସୁସ୍ମିତା ବାଗଚୀ ଏବଂ ପର୍ଯ୍ୟଟନ ନିର୍ଦ୍ଦେଶକ ରାମଚନ୍ଦ୍ର ଯାଦବ ଯୋଗଦେଇଥିଲେ। ଏଥିସହିତ ଉତ୍ସବର ଆୟୋଜକ ତଥା ପ୍ରଖ୍ୟାତ ଓଡିଶୀ ନୃତ୍ୟାଙ୍ଗନା ଅରୁଣା ମହାନ୍ତି ଏବଂ ଓଡିଶୀ ନୃତ୍ୟଶିଳ୍ପୀ ଇଲିୟାନା ସୀତାରିଷ୍ଟ ମଧ୍ୟ ଉପସ୍ଥିତ ଥିଲେ।