ଭୁବନେଶ୍ୱର: ଓଡ଼ିଆ ଭାଷା, ସାହିତ୍ୟ ଓ ସଂସ୍କୃତି ବିଭାଗ, ଓଡ଼ିଶା ଡ଼୍ୟାନ୍ସ ଏକାଡ଼େମୀ ଏବଂ ଆର୍ଟ ଭିଜନ୍ର ମିଳିତ ଉଦ୍ୟମରେ ଐତିହାସିକ ଧଉଳି ପାହାଡ଼ର ପାଦଦେଶରେ ଆୟୋଜିତ ୨୧ତମ ଧଉଳୀ କଳିଙ୍ଗ ମହୋତ୍ସବ ଉଦ୍ଯାପନୀ ଉତ୍ସବରେ ପରିବେଷିତ ହୋଇଯାଇଛି ଓଡ଼ିଶୀ, କଥକ, ଭାରତନାଟ୍ୟମ୍ ଓ ମୋହିନୀଆଟ୍ଟମ ନୃତ୍ୟର ଫ୍ୟୁଜନ ସହିତ ମୟୁରଭଞ୍ଜ ଛଉ ନୃତ୍ୟ ।
ଉଦ୍ଯାପନୀ ସଂଧ୍ୟାର ପ୍ରଥମ କାର୍ଯ୍ୟକ୍ରମ ଥିଲା ଓଡ଼ିଶୀ, କଥକ, ଭାରତନାଟ୍ୟମ୍ ଏବଂ ମୋହିନୀଆଟ୍ଟମର ମିଶ୍ରଣ ଯାହା ଓଡ଼ିଶା ଡ଼୍ୟାନ୍ସ ଏକାଡ଼େମୀ, ଖାନକ ଇନଷ୍ଟିଚ୍ୟୁଟ୍ ଅଫ୍ ପରଫର୍ମିଂ ଆର୍ଟସ୍, ପବିତ୍ର ଆର୍ଟ ଭିଜୁଆଲ୍ ଇନଷ୍ଟିଚ୍ୟୁଟ୍ ଏବଂ ଇଣ୍ଟରନ୍ୟାସନାଲ୍ ଏକାଡ଼େମୀ ଅଫ୍ ମୋହିନୀଆଟ୍ଟମ୍ ଦ୍ୱାରା ପରିବେଷିତ ହୋଇଥିଲା । ସେମାନଙ୍କର ପ୍ରଥମ ଉପସ୍ଥାପନ ଥିଲା ଗଣେଶ ବନ୍ଦନା ଏବଂ ପରେ ପରେ ଶ୍ରୀ କୃଷ୍ଣ ଶରଣମ୍ ନମଃ – କୃଷ୍ଣଙ୍କ ଜୀବନର ଯାତ୍ରା।
ଏହି ପ୍ରସ୍ତୁତି ଏକ ମିଶ୍ରିତ ସୃଜନଶୀଳ ନୃତ୍ୟ ଥିଲା ଯେଉଁଥିରେ ଓଡ଼ିଶା ଡ଼୍ୟାନ୍ସ ଏକାଡ଼େମୀ ଦ୍ୱାରା ଓଡ଼ିଶୀ, ବାଙ୍ଗାଲୋରର କର୍ଣ୍ଣୁକୋପିଆ କ୍ରିଏସନ୍ସ ଦ୍ୱାରା ସମସାମୟିକ ନୃତ୍ୟ, ଦିଲ୍ଲୀର ଇଣ୍ଟରନ୍ୟାସନାଲ ଏକାଡ଼େମୀ ଅଫ୍ ମୋହିନୀଆଟ୍ଟମ୍ ଦ୍ୱାରା ମୋହିନୀଆଟ୍ଟମ୍, ମୁମ୍ବାଇର ପବିତ୍ର ଆର୍ଟ ଭିଜୁଆଲ୍ ଇନ୍ଷ୍ଟିଚ୍ୟୁଟ୍ ଦ୍ୱାରା ଭାରତନାଟ୍ୟମ୍, ଦିଲ୍ଲୀର ଖାନକ ଇନଷ୍ଟିଚ୍ୟୁଟ୍ ଅଫ ପରଫର୍ମି ଆର୍ଟସ୍ ଦ୍ୱାରା କଥକ ନୃତ୍ୟ ସାମିଲ ଥିଲା ।
ପଦ୍ମଶ୍ରୀ ଡ଼କ୍ଟର ଅରୁଣା ମହାନ୍ତିଙ୍କ ଦ୍ୱାରା ସଂଗୃହିତ ଓ ପରିକଳ୍ପିତ ଏହି କାର୍ଯ୍ୟକ୍ରମଟିର ଓଡ଼ିଶୀ ନୃତ୍ୟ ସଂରଚନା ନିଜେ ଗୁରୁ ଅରୁଣା ମହାନ୍ତି କରିଥିଲା ବେଳେ ଜନାର୍ଦ୍ଦନ ରାଜ ଉର୍ସଙ୍କ ଦ୍ୱାରା ସମସାମୟିକ ନୃତ୍ୟ, ଜୟପ୍ରଭା ମେନନ୍ଙ୍କ ଦ୍ୱାରା ମୋହିନୀଆଟ୍ଟମ୍ ନୃତ୍ୟ, ପବିତ୍ର ଭଟ୍ଙ୍କ ଦ୍ୱାରା ଭାରତନାଟ୍ୟମ୍ ନୃତ୍ୟ ଏବଂ ମୋନିସା ନାୟକଙ୍କ ଦ୍ୱାରା କଥକ ନୃତ୍ୟ ସଂରଚନା କରାଯାଇଥିଲା । ଏହି ପରିବେଷଣଟି ଅତ୍ୟନ୍ତ ଚିତାକର୍ଷକ ଓ ମୋନଜ୍ଞ ଥିଲା ଯାହା ଦର୍ଶକଙ୍କୁ ବେଶ୍ ଆନନ୍ଦ ପ୍ରଦାନ କରିଥିଲା ।
ଉଦ୍ଯାପନୀ ସଂଧ୍ୟାର ଅନ୍ତିମ ଉପସ୍ଥାପନା ଥିଲା ମୟୁର କଳା କେନ୍ଦ୍ରର ଶିଳ୍ପୀମାନଙ୍କ ଦ୍ୱାରା ମୟୁରଭଞ୍ଜ ଛଉ ନୃତ୍ୟ । ସେମାନଙ୍କ ପ୍ରସ୍ତୁତିରେ ଥିଲା ସୁମ୍ଭ – ନିସୁମ୍ଭ ବଧ। ଉଭୟ ଅସୁର ଭାଇ ଶକ୍ତିଶାଳୀ ଏବଂ ସ୍ୱର୍ଗର ଦେବତାମାନଙ୍କୁ ନିର୍ଯାତନା ଦେଉଥିଲେ। ଏଥିରେ ଅତିଷ୍ଟ ହୋଇ ଦେବତାମାନେ କୌଶିକି ରୂପରେ ଆବିର୍ଭୁତ ହୋଇଥିବା ଦିବ୍ୟ ମାତାଙ୍କୁ ପ୍ରାର୍ଥନା କରିଥିଲେ ଏବଂ ପରେ ସମସ୍ତ ଦେବତାଙ୍କ ଶକ୍ତି ସହିତ ଆଶୀର୍ବାଦ ପାଇ ହିମବନ୍ତ ପର୍ବତରେ ଜଣେ ସୁନ୍ଦରୀ ମହିଳାଙ୍କ ରୂପରେ ଉପସ୍ଥିତ ହେଲେ ।
ତାହା ଜାଣି ସୁମ୍ଭ ତାଙ୍କ ଅସୁର ଦାସମାନଙ୍କୁ ତାଙ୍କୁ ଆଣିବାକୁ ପଠାଇଥିଲେ କିନ୍ତୁ ଦେବୀଙ୍କ ଦ୍ୱାରା ସେମାନଙ୍କୁ ବଧ କରାଯାଇଥିଲା। ପରେ ସୁମ୍ଭ ଓ ନିସୁମ୍ଭ ଦେବୀ କୌଶିକି (ମହାସରସ୍ୱତୀ)ଙ୍କ ସହିତ ଯୁଦ୍ଧ କରିଥିଲେ କିନ୍ତୁ ଦେବୀ ମାତାଙ୍କ ଦ୍ୱାରା ସେମାନଙ୍କୁ ବଧ କରାଯାଇଥିଲା । ଦେବତାମାନେ ସ୍ୱର୍ଗରୁ ଆନନ୍ଦରେ ଫୁଲ ବୃଷ୍ଟି କରିଥିଲେ । ଉକ୍ତ ପ୍ରସ୍ତୁତିଟିର ନୃତ୍ୟ ସଂରଚନା କରିଥିଲେ ଗୁରୁ ଅଚିନ୍ତ୍ୟ କୁମାର ବେହେରା।
ଉଦ୍ଯାପନୀ ସନ୍ଧ୍ୟାରେ ଅତିଥି ଭାବରେ ଯୋଗଦେଇଥିଲେ ବିଶିଷ୍ଟ ଓଡ଼ିଶୀ ନୃତ୍ୟାଙ୍ଗନା ତଥା ସମ୍ବଲପୁର ବିଶ୍ୱବିଦ୍ୟାଳୟର ପୂର୍ବତନ କୁଳପତି ଡଃ (ପ୍ରଫେସର) ପ୍ରିୟମ୍ବଦା ମହାନ୍ତି ହେଜମାଦି; ବିଶିଷ୍ଟ କଳା ସମିକ୍ଷକ ଡ଼କ୍ଟର ଲୀଲା ଭେଙ୍କଟରମଣ; ବିଶିଷ୍ଟ ମର୍ଦ୍ଦଳ ବାଦକ ଗୁରୁ ଧନେଶ୍ୱର ସ୍ୱାଇଁ; ସମାଜସେବୀ ଶ୍ରୀମତୀ ସୁମିତ୍ରା ଜେନା ଏବଂ ଓଡ଼ିଶା ଡ଼୍ୟାନ୍ସ ଏକାଡ଼େମୀର ସଚିବ ଗୁରୁ (ଡ଼କ୍ଟର) ଅରୁଣା ମହାନ୍ତି । କାର୍ଯ୍ୟକ୍ରମକୁ ସଂଚାଳନା କରିଥିଲେ ଡଃ. ଶ୍ରୀନିବାସ ଘଟୁଆରୀ ଏବଂ ଡଃ. ନାଜିଆ ଆଲାମ । ଏହି ଧଉଳୀ କଳିଙ୍ଗ ମହୋତ୍ସବ ସବୁଦିନର ନୃତ୍ୟ କାର୍ଯ୍ୟକ୍ରମକୁ ସୁନ୍ଦର ଭାବରେ ଆଲୋକ ପରିଚାଳନା କରିଥିଲେ ଶ୍ରୀ ଦେବୀପ୍ରସାଦ ମିଶ୍ର ।