ଗୌହ୍ଵାଟୀର ପୂର୍ବତନ ମୁଖ୍ୟ ବିଚାରପତି ଅଜିତ୍ ସିଂହ ଓଡ଼ିଶାର ପ୍ରଥମ ଲୋକାୟୁକ୍ତ ଭାବେ ନିଯୁକ୍ତ ହୋଇଛନ୍ତି । ଓଡ଼ିଶାର ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କ ଅଧ୍ୟକ୍ଷତାରେ ଗଠିତ ମନୋନୟନ କମିଟି ଦ୍ଵାରା ସୁପାରିସ୍ ଜଷ୍ଟିସ୍ ସିଂହଙ୍କ ନାମକୁ ସ୍ଵୀକୃତ ଦେଇଛନ୍ତି ଓଡ଼ିଶାର ରାଜ୍ୟପାଳ ଗଣେଶୀ ଲାଲ୍ । ୨୦୧୬ ମାର୍ଚ୍ଚ ୫ରେ ଆସାମର ଗୌହାଟୀ ହାଇକୋର୍ଟର ମୁଖ୍ୟ ବିଚାରପତି ଭାବେ ନିଯୁକ୍ତି ପାଇଥିଲେ । ସେପ୍ଟମ୍ବର ୨୦୧୮ରେ ସେ ମୁଖ୍ୟ ବିଚାରପତି ପଦରୁ ଅବସର ଗ୍ରହଣ କରିଛନ୍ତି । ୬ସେପ୍ଟମ୍ବର ୧୯୫୬ ମସିହାରେ ଜନ୍ମିତ ଅବସରପ୍ରାପ୍ତ ବିଚାରପତି ଶ୍ରୀ ସିଂହ ସିଭିଲ୍, କ୍ରିମିନାଲ୍ ଓ ସାମ୍ବିଧାନିକ ମାମଲା ପରିଚାଳନା କ୍ଷେତ୍ରରେ ବିଶେଷ ଦକ୍ଷତା ରଖିଛନ୍ତି । ମଧ୍ୟପ୍ରଦେଶ ହାଇକୋର୍ଟରୁ ଓକିଲାତି ପେଶା ଆରମ୍ଭ କରିଥିବାବେଳେ ୨୦୦୨ ଏପ୍ରିଲ୍ ୧ରେ ମଧ୍ୟପ୍ରଦେଶ ହାଇକୋର୍ଟର ଅତିରିକ୍ତ ବିଚାରପତି ଭାବେ ନିଯୁକ୍ତ ହୋଇଥିଲେ । ୨୦୦୩, ମାର୍ଚ୍ଚ ୨୧ରେ ସ୍ଥାୟୀ ବିଚାରପତି ଦାୟିତ୍ବ ତୁଲାଇଥିବାବେଳେ ୨୦୧୬ ମାର୍ଚ୍ଚ ୫ରେ ରାଜସ୍ଥାନ ହାଇକୋର୍ଟର ବିଚାରପତି ପଦ ମଧ୍ୟ ସମ୍ଭାଳିଥିଲେ । ଓଡ଼ିଶା ଲୋକାପାଳ ଓ ଲୋକାୟୁକ୍ତ ଆଇନକୁ ବିଧାନସଭାରେ ଅତୀତରେ ଗୃହୀତ କରାଯାଇଥିଲା । ତେବେ ଲୋକପାଳ ନିଯୁକ୍ତିରେ ଅହେତୁକ ବିଳମ୍ବ ଘଟିବା ପରେ ଏହି ନିଯୁକ୍ତି ପ୍ରକ୍ରିୟାକୁ ତ୍ଵରାନ୍ଵିତ କରିବା ପାଇଁ ସୁପ୍ରିମ୍କୋର୍ଟ ନିର୍ଦ୍ଦେଶ ଦେଇଥିଲେ ।