ଅହମଦାବାଦ, ଆଜି ସକାଳୁ ବିଜେପିର ତୁଙ୍ଗ ନେତା ତଥା ଗୃହମନ୍ତ୍ରୀ ଅମିତ ସାହା ଅହମଦାବାଦର ଏକ ବୁଥରେ ଭୋଟ ପ୍ରଦାନ କରିଛନ୍ତି। ସେ ସସ୍ତ୍ରୀକ ଅହମଦାବାଦର ନାରଣପୁରା ଅଞ୍ଚଳର ଏକ ବୁଥରେ ଭୋଟ ଦେଇଛନ୍ତି। ଆଜି ଅହମଦାବାଦ ସହିତ ଛଅଟି ମ୍ୟୁନିସପାଲ୍ କର୍ପୋରେସନର ନିର୍ବାଚନ ଅନୁଷ୍ଠିତ ହେଉଛି। ସେହି ଗଣତନ୍ତ୍ର ପର୍ବରେ ନିଜକୁ ସାମିଲ କରିବା ପାଇଁ ଅମିତ ସାହା ଗୁଜୁରାଟ ଗସ୍ତରେ ଅଛନ୍ତି।
ଆଜି ଅହମଦାବାଦ ସହିତ ବଦଦୋରା, ସୁରତ, ରାଜକୋଟ, ଜାମନଗର ଏବଂ ଭବନଗରର ମହାନଗର ପାଇଁ ଭୋଟ ଗ୍ରହଣ ଚାଲିଛି। ସକାଳ ସାତଟାରୁ ଏହି ଭୋଟ ଗ୍ରହଣ ଆରମ୍ଭ ହୋଇଛି। ଯାହା ଅପରାହ୍ନ 5ଟା ପର୍ଯ୍ୟନ୍ତ ଚାଲିବ। ଆସନ୍ତା 23 ତାରିଖରେ ଭୋଟ ଗଣତି କରାଯିବ। ଏହି ଛଅଟି ସହରରେ ମୋଟ 575ଟି ଆସନ ପାଇଁ ଭୋଟ ଗ୍ରହଣ କରାଯାଉଛି। ଏଥିରେ ପ୍ରାୟ 1 କୋଟି 14 ଲକ୍ଷ ଭୋଟର ସେମାନଙ୍କର ମତାଧିକାର ସାବ୍ୟସ୍ତ କରିବେ।
ବର୍ତ୍ତମାନ ଏହି ଛଅଟି ସହରରେ ବିଜେପି ଶାସନରେ ରହିଛି। ଏଥର ନିର୍ବାଚନରେ ବିଜେପି ସହିତ କଂଗ୍ରେସର କଡା ଟକ୍କର ହେଉଛି। ଏହି ନିର୍ବାଚନରେ ଆମ ଆଦମୀ ପାର୍ଟି ମଧ୍ୟ ପ୍ରତିଦ୍ବନ୍ଦିତାରେ ସାମିଲ ହୋଇଛି। ସେହିପରି ଆସାଦ୍ଦୁନୀ ଓୱାସୀଙ୍କ AIMIM ଦଳ ମଧ୍ୟ ଗୁଜୁରାଟ ପୌର ନିର୍ବାଚନରେ 21ଟି ଆସନରେ ପ୍ରାର୍ଥୀ ଦେଇଛି।