The Samikhsya Odia
ଡାଭୋସ୍ : ଭାରତରେ ଦେଖାଦେଇଥିବା ଅର୍ଥନୈତିକ ମାନ୍ଦାବସ୍ଥାକୁ ନେଇ ପ୍ରତିକ୍ରିୟା ରଖିଛନ୍ତି ଆଇଏମ୍ଏଫ୍ ମୁଖ୍ୟ କ୍ରିଷ୍ଟାଲିନା ଜର୍ଜିଭିଆ । ଡାଭୋସ୍ରେ ଅନୁଷ୍ଠିତ ଅର୍ଥନୈତିକ ସମ୍ମିଳନୀରେ କ୍ରିଷ୍ଟାଲିନା କହିଛନ୍ତି, ଭାରତୀୟ ଅର୍ଥନୀତିରେ ଦେଖାଦେଇଥିବା ସଙ୍କଟ ସାମୟିକ । ଖୁବ୍ ଶୀଘ୍ର ଏହି ପରସ୍ଥିତିରେ ପରିବର୍ତ୍ତନ ହେବାକୁ ଯାଉଛି । ବର୍ତ୍ତମାନ ସମଗ୍ର ବିଶ୍ବରେ ଅର୍ଥନୈତିକ ସଙ୍କଟ ଦେଖାଦେଇଛି, ମାତ୍ର ଭାରତ ସରକାରଙ୍କ ପକ୍ଷରୁ ନିଆଯାଇଥିବା ପ୍ରତିଷେଧକ ମୂଳକ ପଦକ୍ଷେପ କାରଣରୁ ଖୁବ୍ ଶୀଘ୍ର ଭାରତୀୟ ଅର୍ଥନୀତିରେ ଦେଖାଦେଇଥିବା ଶୀଥିଳତା ଦୂର ହେବ ବୋଲି କ୍ରିଷ୍ଟାଲିନା ପ୍ରକାଶ କରିଛନ୍ତି ।
ନୂଆଦିଲ୍ଲୀ : ବିଜେପି କର୍ମୀ ମାନେ ଅନ୍ତର୍ଜାତୀୟ ମୁଦ୍ରା ପାଣ୍ଠି ମୁଖ୍ୟ ପରାମର୍ଶଦାତା ଗୀତା ଗୋପୀନାଥଙ୍କୁ ଆକ୍ରମଣ ପାଇଁ ପ୍ରସ୍ତୁତ ବୋଲି ପୂର୍ବତନ ଅର୍ଥମନ୍ତ୍ରୀ ପି ଚିଦାମ୍ବରମ ମତ ଦେଇଛନ୍ତି । ଉଲ୍ଲେଖଯୋଗ୍ୟ ଯେ, ଆଇଏମ୍ଏଫ୍ ପକ୍ଷରୁ ଭାରତୀୟ ଅଭିବୃଦ୍ଧି ହାର ହ୍ରାସ ନେଇ ସଂଶୋଧିତ ତାଲିକା ପ୍ରକାଶ ପାଇଥିଲା । ସୋମବାର ଆଇଏମ୍ଏଫ୍ ପକ୍ଷରୁ ଭାରତୀୟ ଅଭିବୃଦ୍ଧି ହାର 4.8 ପ୍ରତିଶତକୁ ହ୍ରାସ ପାଇବା ନେଇ ଆକଳନ କରାଯାଇଥିଲା । ଦେଶର ଅର୍ଥନୀତିକୁ ନେଇ ଯିଏବି ସଠିକ୍ ତଥ୍ୟ ପ୍ରକାଶ କରେ ମୋଦି-ଶାହାଙ୍କ ଅନୁଗତଙ୍କ ପକ୍ଷରୁ ତାଙ୍କୁ ଆକ୍ରମଣ କରାଯାଇଥାଏ । ଭାରତରେ ବର୍ତ୍ତମାନରେ ନିବେଶ କରିବା ଜରୁରୀ ହୋଇ ପଡିଛି । ମାତ୍ର କେନ୍ଦ୍ର ସରକାରଙ୍କ ପକ୍ଷରୁ ଆମାଜନ୍ ସିଇଓ ଜେଫ୍ ବେଜୋସ୍ଙ୍କ ଗସ୍ତକୁ ନେଇ କୌଣସି ପ୍ରତିକ୍ରିୟା ନ ମିଳିବା ତାଙ୍କୁ ଆଶ୍ଚର୍ଯ୍ୟ କରିଛି ବୋଲି ଗୋପୀନାଥ ପ୍ରକାଶ କରିଥିଲେ । ଏହା ଭାରତୀୟ ଅର୍ଥନୀତି ଉପରେ ଖରାପ ପ୍ରଭାବ ପକାଇବ ବୋଲି ଗୋପୀନାଥ କହିଛନ୍ତି । (ଏଜେନ୍ସୀ)
ନୂଆଦିଲ୍ଲୀ : ଦେଶରେ ଅର୍ଥବ୍ୟବସ୍ଥା ଠିକ୍ ନାହିଁ, ରୋଜଗାରକୁ ନେଇ ଏକ ବଡ ପ୍ରଶ୍ନ ଉଠିଛି । ବିରୋଧୀ ଲଗାତାର ଭାବରେ ସରକାରକୁ ଏହି ପ୍ରସଙ୍ଗରେ ଘେରୁଛି । ଠିକ୍ ଏହି ସମୟରେ ବିଜେପିର ସାଂସଦ ସୁବ୍ରମଣ୍ୟମ୍ ସ୍ବାମୀ କହିଛନ୍ତି ଯେ, ଯଦି ନୋଟ୍ ଉପରେ ମାତା ଲକ୍ଷ୍ମୀଙ୍କ ଫଟୋ ଲଗାଯିବା, ତେବେ ଅର୍ଥବ୍ୟବସ୍ଥାରେ କିଛିଟା ସୁଧାର ଆସିବ । ତେବେ ସ୍ବାମୀଙ୍କ ଏହି ବୟାନକୁ ନେଇ ଏବେ ବେଶ୍ ଚର୍ଚ୍ଚା ଚାଲିଥିବାବେଳେ ଏହାକୁ ନେଇ ବିରୋଧୀ ଦଳ ଏବେ ସରକାରକୁ ଟାର୍ଗେଟ୍ କରିଛନ୍ତି ।
କଂଗ୍ରେସ ନେତା ତଥା ବରିଷ୍ଠ ଓକିଲ ମନୁ ସିଂଘଭୀ ଟୁଇଟ୍ କରି କହିଛନ୍ତି ଯେ, ସୁବ୍ରମଣ୍ୟମ୍ ସ୍ବାମୀ କଟାକ୍ଷ କରି କହିଛନ୍ତି ଯେ, ଦେଶରେ ଅର୍ଥନୀତି ଓ ଅର୍ଥବ୍ୟବସ୍ଥାକୁ ସୁଧାରିବା ପାଇଁ ସ୍ବାମୀ କିଛି ଆଇଡିଆ ଦେବେ ବୋଲି ଭାବିଥିଲୁ କିନ୍ତୁ ସେ ନୋଟ୍ ବଦଳାଇବାକୁ କହୁଛନ୍ତି । ମାତା ଲକ୍ଷ୍ମୀ ଯଦି ଏପରି କାମ କରିକି ଅର୍ଥବ୍ୟବସ୍ଥାକୁ ସୁଧାରିବେ, ତେବେ ଆମର ଅର୍ଥମନ୍ତ୍ରୀ କ’ଣ କରିବେ ?
ଏକ କାର୍ଯ୍ୟକ୍ରମରେ ବିଜେପି ସାଂସଦ ସୁବ୍ରମଣ୍ୟମ୍ ସ୍ବାମୀ କହିଛନ୍ତି ଯେ, ଦେଶର ଆର୍ଥିକ ବ୍ୟବସ୍ଥା ଉପରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଉତ୍ତର ରଖିପାରିବେ । ତେବେ ଏହି ପ୍ରସଙ୍ଗରେ ସୁବ୍ରମଣ୍ୟମ୍ ଟିକେ ହାଲ୍କା ଉତ୍ତର ରଖିଛନ୍ତି । ସେ କହିଛନ୍ତି ଯେ, ଭଗବାନ ଗଣେଶ ବାଧାକୁ ଦୂର କରିଥା’ନ୍ତି । ସେହିପରି ଯଦି ଧନର ଦେବୀ ମାତା ଲକ୍ଷ୍ମୀଙ୍କ ଫଟୋ ନୋଟ୍ରେ ଛପା ଯିବା, ତେବେ ଭାରତୀୟ ମୁଦ୍ରାର ସ୍ଥିତିରେ କିଛି ସୁଧାର ଆସିବେ । ନିକଟରେ ଇଣ୍ଡୋନେସିଆ ନିଜ ନୋଟ୍ ଉପରେ ଗଣେଶଙ୍କ ଫଟୋ ଲଗାଇଥିଲେ, ଯାହାର ବହୁତ କିଛି ଫାଇଦା ମିଳିଥିଲା । ଭାରତ ଏପରି କିଛି କରିବା ଦରକାର ବୋଲି ସ୍ବାମୀ କହିଥିଲେ । ସୁବ୍ରମଣ୍ୟମ୍ ସ୍ବାମୀ ନିଜ ତରଫରୁ ଦେଶର ଅର୍ଥବ୍ୟବସ୍ଥାକୁ ନେଇ ସବୁବେଳ ପ୍ରଶ୍ନ ଉଠାଇଆସିଛନ୍ତି । କେବଳ ଏତିକି ନୁହେଁ ଅର୍ଥମନ୍ତ୍ରୀଙ୍କୁ ମଧ୍ୟ ଟାର୍ଗେଟ୍ କରିଛନ୍ତି ସ୍ବାମୀ । (ଏଜେନ୍ସି)
ସମୀତ ପଣ୍ଡା
ଗତ ନଭେମ୍ବର ୧୪ ତାରିଖ ଦିନ ବିଜନେସ ଷ୍ଟାଣ୍ଡାର୍ଡ ନାମକ ଏକ ଇଂରାଜୀ ଖବର କାଗଜରେ ଏକ ଚିନ୍ତାଜନକ ଖବର ପ୍ରକାଶିତ ହେଇଥିଲା। ଏହି ଖବର ଅନୁସାରେ ଆମ ଦେଶରେ ଗ୍ରାମାଞ୍ଚଳ ଲୋକଙ୍କ ଖାଇବା ଉପରେ ଖର୍ଚ୍ଚ ୨୦୧୧-୧୨ ଏବଂ ୨୦୧୭-୧୮ ମଧ୍ୟରେ ୮.୮ ପ୍ରତିଶତ ହ୍ରାସ ପାଇଛି। ଏହା ଜାତୀୟ ପରିସଂଖ୍ୟାନ କାର୍ଯ୍ୟାଳୟର ଏକ ପ୍ରଘଟ ହେଇଥିବା ରିପୋର୍ଟ ଆଧାରରେ କୁହାଯାଇଛି। ଉକ୍ତ ରିପୋର୍ଟ ଭାରତ ସରକାରଙ୍କ ଦ୍ଵାରା ଆନୁଷ୍ଠାନିକ ଭାବରେ ପ୍ରକାଶ କରାଯାଇନଥିଲା।ଏହି ଖବର ପ୍ରକାଶିତ ହେବା ପରେ ଭାରତ ସରକାର ଗୁଣାତ୍ମକ ତଥ୍ୟ ନଥିବା ଦର୍ଶାଇ ରିପୋର୍ଟକୁ ପ୍ରକାଶ ନ କରିବା ପାଇଁ ନିଷ୍ପତ୍ତି ନେଇଛନ୍ତି।
ଏହି ରିପୋର୍ଟ ଅନୁସାରେ ୨୦୧୧-୧୨ରେ ମାସିକ ହାରାହାରି ଖର୍ଚ୍ଚ ଯାହା ୧୫୦୧ ଟଙ୍କା ଥିଲା ତାହା ୨୦୧୭-୧୮ରେ ହ୍ରାସ ପାଇ ୧୪୪୬ କୁ ପହଞ୍ଚିଛି। ଏହି ସମୟରେ ସହରାଞ୍ଚଳରେ ଖାଦ୍ୟ ଉପରେ ହାରାହାରି ଖର୍ଚ୍ଚ୨ ପ୍ରତିଶତ ବୃଦ୍ଧି ପାଇଛି। ଗତ ଚାରି ଦଶକରେ ପ୍ରଥମ ଥର ପାଇଁ ଲୋକଙ୍କ ଖାଇବା ଉପରେ ଖର୍ଚ୍ଚ ହ୍ରାସ ହେଇଛି। ସବୁଠୁ ଚିନ୍ତାଜନକ ବିଷୟ ହେଲା ଅନ୍ନ ଜାତୀୟ ଖାଦ୍ୟ ଯେମିତିକି ଚାଉଳ, ଗହମ ଉପରେ ଖର୍ଚ୍ଚ ହ୍ରାସ ସର୍ବାଧିକ ୨୦.୪ ପ୍ରତିଶତଯାହାକି ଗରିବ ଲୋକଙ୍କ ଖାଦ୍ୟର ସିଂହଭାଗ। ଏହା ଛଡା ତେଲ, ଲୁଣ,ଚିନିଉପରେ ଖର୍ଚ୧୬.୬ ପ୍ରତିଶତ ଏବଂ ଡାଲି ଜାତୀୟ ଖାଦ୍ୟ ପଦାର୍ଥରେ ୧୫.୪ ପ୍ରତିଶତ ହ୍ରାସ ପାଇଛି। ଏହି ପରିସଂଖ୍ୟାନ ଦେଖିଲେ ଲାଗୁଛି ଗ୍ରାମାଞ୍ଚଳରେ ଦାରିଦ୍ର୍ୟରମାତ୍ରାବୃଦ୍ଧିପାଉଛି ଏବଂ ଭୋକ ଏବଂ କୁପୋଷଣ ବଢିବାର ସମ୍ଭାବନାକୁ ଏଡାଇଯାଇପାରିବ ନାହିଁ।
ଗ୍ରାମାଞ୍ଚଳ ଅର୍ଥନୀତି ଉପରେ କାମ କରୁଥିବା ବିଶେଷଜ୍ଞମାନେଏହି ରିପୋର୍ଟର ତଥ୍ୟ ଉପରେ ବିଶେଷ ଆଶ୍ଚର୍ୟ୍ୟ ହେଇନାହାନ୍ତି। ଡାଃ ହିମାଂଶୁ ଗ୍ରାମୀଣ ଅର୍ଥନୀତି ଉପରେ ଲଗାତର ଗବେଷଣା କରୁଥିବା ଏବଂ ଲେଖୁଥିବା ଅର୍ଥନୀତିଜ୍ଞ ମଧ୍ୟରୁ ଅନ୍ୟତମ। ସେ ଗତ କିଛି ବର୍ଷ ଧରି ଗ୍ରାମୀଣ ଆର୍ଥିକ ଅବସ୍ଥାର ଖରାପ ଅବସ୍ଥା ବିଷୟରେ ସରକାରଙ୍କ ବିଶେଷ ଧ୍ୟାନ ଦେବାର ଆବଶ୍ୟକତା ଉପରେ ଯୋରଦେଇଆସୁଛନ୍ତି। ସେ ନିଜ ଗବେଷଣା ମାଧ୍ୟମରେ ଦର୍ଶାଇଛନ୍ତି ୨୦୦୭-୦୮ ରୁ ୨୦୧୪-୧୫ ଭିତରେ ଗ୍ରାମୀଣ ମଜୁରି ଦର ବାର୍ଷିକ ୬ ପ୍ରତିଶତ ହାରରେ ବୃଦ୍ଧି ପାଉଥିଲା କିନ୍ତୁ ୨୦୧୪-୧୫ ରୁ ୨୦୧୭-୧୮ ଜମାରୁ ବୃଦ୍ଧି ପାଇନାହିଁ ଅଥବା ବାର୍ଷିକ ୧ ରୁ ୧.୫ ପ୍ରତିଶତ ହାରରେ ବୃଦ୍ଧି ପାଇଅଛି। ଯଦି ଗ୍ରାମୀଣ ମଜୁରି ହାର ନ ବଢିବ ଲୋକ ନିଜ ଖର୍ଚ କାଟ କରିବା ବାହୁଲ୍ୟ ଏବଂ ଯେହେତୁ ଗ୍ରାମୀଣ ଲୋକ ତାଙ୍କ ଆୟର ସିଂହଭାଗ ଖାଦ୍ୟରେଖର୍ଚ୍ଚ କରନ୍ତି,ତେବେଖାଦ୍ୟଉପରେ ହିଁ ଖର୍ଚ୍ଚକାଟ କରିବାକୁ ବାଧ୍ୟ ହେଇଛନ୍ତି।
ଅନେକ ଅର୍ଥନୀତିଜ୍ଞମାନେଗ୍ରାମାଞ୍ଚଳ ଅର୍ଥନୀତିର ଏହି ଦୟନୀୟ ଅବସ୍ଥାକୁ ମୁଖ୍ୟତଃ ତିନୋଟି କାରଣକୁ ଦାୟୀ କରିଛନ୍ତି। କେନ୍ଦ୍ର ସରକାରଙ୍କ ଦ୍ଵାରା ମୁଦ୍ରାସ୍ପୀତିର ଆବଶ୍ୟକତାରୁ ଅଧିକ କମ କରିବାକୁ ଚେଷ୍ଟା,ଏମ.ଜି.ଏନ.ଆର.ଇ.ଜି.ଏ.ର ଅବକ୍ଷୟ ଏବଂ ବିମୁଦ୍ରିକରଣ.। ୨୦୧୦ ରୁ ୧୪ ଭିତରେ ମୁଦ୍ରାସ୍ପୀତି ଦୁଇ ଅଙ୍କ ସ୍ପର୍ଶ କରିଥିଲା ଏବଂ ତାହା ଟଚଇ ସରକାର ପତନର ଅନ୍ୟତମ କାରଣ ବୋଲି ବି ଧରାଯାଏ। ଏନଡ଼ିଏ ସରକାର ଆସିଲା ପରେ ତା’କୁ କମକରିବାକୁ ଏବଂ ଖାସ କରି ରେଟିଂ ସଂସ୍ଥା ଓ ମଧ୍ୟବିତ୍ତ ଖାଉଟି ଶ୍ରେଣୀକୁ ଖୁସି କରିବାକୁ ଯାଇ ଖାଦ୍ୟ ପଦାର୍ଥମାନଙ୍କ ଦର ବଢିବାକୁ ଦେଲେ ନାହିଁ । ୨୦୧୪ -୧୫ ରୁ ୨୦୧୭-୧୮ ମଧ୍ୟରେ ସର୍ବନିମ୍ନ ସହାୟକ ଦର (msp)ର ବୃଦ୍ଧି କେବଳ ୩.୭ ରୁ ୫.୪ ପ୍ରତିଶତ ମଧ୍ୟରେ ସରକାର ସୀମିତ ରଖିଥିଲେ। ଏହି ସମୟରେ ନୋମିନାଲ ଫାର୍ମ ଆୟବା ମୁଦ୍ରାସ୍ପୀତିକୁ ହିସାବରେ ନେଲାପରେ ଯଦି ଚାଷୀର ପ୍ରକୃତ ଆୟ ଦେଖିବା ତାହେଲେ ସେଇଟା ନକରାତ୍ମକ ରହିଅଛି। ଅର୍ଥାତ ଚାଷୀ ଚାଷରେ ଲଗାଉଥିବା ନିଜ ପଇସା ହରେଇ ଚାଲିଛି। ଏଥିରେ ଅନେକ ଅସହମତ ହେଇପାରନ୍ତି ଅନେକେ ମତ ପୋଷଣ କରିବେ କି ଗାଁ’ରେ ମଜୁରି ଦର ନିୟମିତ ଭାବରେ ବୃଦ୍ଧି ପାଉଛି କିନ୍ତୁ ଆମେ ଭୁଲିଯିବା ଉଚିତ ନୁହଁ କି ଅଧିକାଂଶ ଚାଷୀ କ୍ଷୁଦ୍ର ଅଥବା ଭାଗ ଚାଷୀ ଯେଉଁମାନେ କି ନିଜ ଜମିରେ ହିଁ ଚାଷ କରିଥାନ୍ତି। ଆଉ ଯଦି ଚାଷରୁ ଆୟ କମୁଛି ତାହେଲେ ସେମାନେ ବହୁତ ମାତ୍ରରେ କ୍ଷତିର ସମ୍ମୁଖୀନହଉଛନ୍ତି ଏବଂ ତାହାର ପ୍ରଭାବ ଖାଦ୍ୟଊପରେ କମ ଖର୍ଚ୍ଚ କରିବା ପାଥେୟ।
ଏମଜିଏନଆରଇଜିଏର ଗ୍ରାମୀଣ ଅର୍ଥନୀତି ଉପରେ ପ୍ରଭାବ ଖାସ କରି ମଜୁରି ଦର ବୃଦ୍ଧି ଉପରେ ଅନେକ ତଥ୍ୟ ରହିଅଛି। ୨୦୦୭-୦୮ ରୁ ୨୦୧୪ ଭିତରେ ଗ୍ରାମୀଣ ମଜୁରି ବୃଦ୍ଧି ପାଇବାରେ ଏମଜିଏନଆରଇଜିଏର ବହୁତ ପ୍ରଭାବ ରହିଅଛି।କିନ୍ତୁ ଏନଡ଼ିଏ ସରକାର ଗଠନ ହେଲା ପାରେ ଏହାକୁ ପ୍ରଧାନମନ୍ତ୍ରୀ ମୋଦୀ ମୋନୁମେଣ୍ଟାଲ ବ୍ଲଣ୍ଡର ବା ସବୁଠୁ ବଡ ଭୁଲ କହିଥିଲେ। ତଥ୍ୟ ଅନୁସାରେ ୨୦୧୪- ୧୫ ରୁ ୨୦୧୭-୧୮ ମଧ୍ୟରେ ଆବଶ୍ୟକୀୟ ଅର୍ଥ ଏହି ଯୋଜନା ପାଇଁ ବ୍ୟବସ୍ଥାକରଯାଇ ନାହିଁଯାହାକି ବାର୍ଷିକ ହାରାହାରି ୫୦୦୦ କୋଟି ହେବ। ଏବଂଠିକ ସମୟରେ କେନ୍ଦ୍ର ସରକାର ରାଜ୍ୟ ସରକାରମାନଙ୍କୁ ପଇସା ପଠାଇନାହାନ୍ତି ଯାହା ଫଳରେ ଶ୍ରମିକଙ୍କୁ ମଜୁରି ଦେବାରେ କ୍ରମାଗତ ଭାବରେ ବିଳମ୍ବ ହେଇଛି।
ବିମୁନ୍ଦ୍ରିକରଣର ଗ୍ରାମୀଣ ଏବଂଅଣସଙ୍ଗଠିତ କ୍ଷେତ୍ରରେପଡିଥିବା ଭଯାବହ ପ୍ରଭାବର ଆଲୋଚନା କରିବା ଆଉ ଆବଶ୍ୟକତା ନାହିଁ।
ଦୁଖଃର ବିଷୟ ହେଲା କେନ୍ଦ୍ର ସରକାର ଏହି ରିପୋର୍ଟକୁ ସାଧାରଣ କରିବା ବଦଳରେ ଗୁଣାତ୍ମକ ତଥ୍ୟ ନଥିବା ଦର୍ଶାଇ ଗ୍ରହଣ କରି ନାହାନ୍ତି। ଏହାଛଡା ଚିନ୍ତାର ବିଷୟ ହେଲା ଗ୍ରାମୀଣ ଅର୍ଥନୀତି କେମିତି ସୁଦୃଢ ହେବ ସେ ଉପରେ ନିବେଶ ନକରି କମ୍ପାନୀ ଟିକସକୁ ୩୦ ପ୍ରତିଶତରୁ ୨୫ ପ୍ରତିଶତକୁ କମ କରିଦେଇଛନ୍ତି ଯେଉଁଥିରେ ସରକାର ରାଜସ୍ୱ ବାବଦରେ ୧.୪ ଲକ୍ଷ କୋଟି ଟଙ୍କାର ଟିକସ ହରେଇବେ। କିଛିଦିନ ପୂର୍ବରୁ ନୋବେଲ ବିଜେତା ଭାରତୀୟ ଅର୍ଥନୀତିଜ୍ଞ ଅଭିଜିତ ବାନାର୍ଜୀ କହିଥିଲେ କମ୍ପାନୀଙ୍କୁ ଟିକସ ଛାଡ ଦେଶର ଅର୍ଥନୀତି ସୁଧାରରେ କିଛି ସହାୟକ ହେବ ନାହିଁ। ତାଙ୍କ ହିସାବରେ ଅର୍ଥନୀତି ଠିକ ନହେଲା ଯାଏଁ ଏବଂ ଲୋକଙ୍କ କ୍ରୟ ଶକ୍ତି ନବଢିଲା ଯାଏଁ କମ୍ପାନୀମାନେ ନୂତନ ନିବେଶ କରିବେ ନାହିଁ। ଏହା କେବଳ ତେଲିଆ ମୁଣ୍ଡରେ ତେଲ ଭଳିଆ ନୀତି।
ଯଦି ସରକାର ଦେଶର ଅର୍ଥନୀତିରେ ସୁଧାର ଆଣିବାରେ ଚିନ୍ତିତ ଅଛନ୍ତି ଏବଂ ଦେଶରେ ଦାରିଦ୍ର୍ୟ ଏବଂ କୁପୋଷଣ ଯେମିତି ନବଢେ ଚାହୁଁଛନ୍ତି ତା’ହେଲେ ଗ୍ରାମୀଣ ଅର୍ଥନୀତିକୁ ସୁଦୃଢ କରିବାକୁ ପଡିବ। ଏମଜିଏନଆରଇଜିଏ ଭଳିଆ ଯୋଜନାକୁ ସଶକ୍ତ ରୂପେ ଲାଗୁ କରିବାବୁ ପଡିବ। ତା’ସହିତ ଏହି ଯୋଜନା ଅନ୍ତର୍ଗତ ମଜୁରି ବଢେଇବା ଦରକାର। ଏହା ମୁଖ୍ୟତଃ ଜମି ମରାମତି, ଜଳ ସଂରକ୍ଷଣ ବ୍ୟବସ୍ଥାର ଉନ୍ନତି ପାଇଁ ବିନିଯୋଗ କରିବାର ଅବଶ୍ୟକତା ରହିଅଛି।ମୁଦ୍ରାସ୍ପୀତି ବୃଦ୍ଧିକୁ ନଡରି ଚାଷୀ ଯେମିତି ନିଜ ଫସଲର ଉପଯୁକ୍ତ ମୂଲ୍ୟ ପାଇପାରିବେ ତା’ର ବ୍ୟବସ୍ଥା କରିବାକୁ ପଡିବ। କିନ୍ତୁ ସବୁଠୁ ବଡକଥା ହେଲା କେବଳ ସରକାରଙ୍କ ଛବି କୁ ନସୁହାଇଲେ ବି ସତ୍ୟକୁ ଗ୍ରହଣ କରିବା ଦରକାର ଏବଂ ପ୍ରକୃତ ତଥ୍ୟ ଜନସାଧାରଣଙ୍କସାମ୍ନାରେ ରଖିବା ଦରକାର। ଏହା ନହେଲା ଯାଏଁ ଦେଶର ଅର୍ଥନୀତି ସୁଧାରିବା ସମ୍ଭାବନା କ୍ଷୀଣ।