ମୁମ୍ବାଇ : ମହାରାଷ୍ଟ୍ରରେ ମଦ ଦୋକାନ ଖୋଲିବା ନିଷ୍ପତ୍ତିକୁ ନେଇ ଉଦ୍ଧବ ଠାକ୍ରେଙ୍କୁ ସମାଲୋଚନା କରିଛନ୍ତି ଔରଙ୍ଗାବାଦ ସାଂସଦ ଇମତିୟାଜ୍ ଜଲିଲ୍ । ଦେଶ କରୋନା ସମସ୍ୟାରେ ପ୍ରପୀଡିତ ହେଉଥିବା ବେଳେ ମହାରାଷ୍ଟ୍ରରେ ସର୍ବାଧିକ ଆକ୍ରାନ୍ତ ରହିଛନ୍ତି । ଏପରି ଘଡିସନ୍ଧି ମୂହୂର୍ତ୍ତରେ ଉଦ୍ଧବ ସରକାରଙ୍କ ମଦ ଦୋକାନ ଖୋଲିବାର ନିଷ୍ପତ୍ତି ଅତ୍ୟନ୍ତ ଦୁର୍ଭାଗ୍ୟ ଜନକ ବୋଲି ଜଲିଲ କହିଛନ୍ତି । ମଦ ଦୋକାନ ଗୁଡିକୁ ସରକାରଙ୍କ ପକ୍ଷରୁ ବନ୍ଦ କରାନଗଲେ ସେ ଲକ୍ଡାଉନ୍ ନିୟମ ଭାଙ୍ଗିବାକୁ ବାଧ୍ୟ ହେବେ ଏବଂ ମଦ ଦୋକାନ ଗୁଡିକୁ ସ୍ବୟଂ ବନ୍ଦ କରାଇବେ ବୋଲି ଜଲିଲ୍ କହିଛନ୍ତି । ମଦ ବିକ୍ରୟ କରି ରୋଗ ବିକ୍ରୟ କରିବା ଏବଂ ମା ଓ ଭଉଣୀ ମାନଙ୍କ ପାଇଁ ସମସ୍ୟା ସୃଷ୍ଟି କରିବାର ଏହା ପ୍ରକୃଷ୍ଟ ସମୟ ନୁହେଁ ବୋଲି ଜଲିଲ୍ ମତ ଦେଇଛନ୍ତି ।
