ନୂଆଦିଲ୍ଲୀ: ଆଜି ଅଯୋଧ୍ୟାରେ ଶ୍ରୀ ରାମ ମନ୍ଦିରରେ ପ୍ରାଣ ପ୍ରତିଷ୍ଠା କାର୍ଯ୍ୟକ୍ରମ ଅନୁଷ୍ଠିତ। ଦେଶର ବୃହତ୍ତମ ନିର୍ମାଣକାରୀ କମ୍ପାନୀ ଏଲ ଆଣ୍ଡ ଟି ଦାବି କରିଛି ଯେ, ୧୦୦୦ ବର୍ଷ ଧରି ଶ୍ରୀ ରାମ ମନ୍ଦିରରେ କିଛି କ୍ଷତି ହେବ ନାହିଁ। ଏଲ ଆଣ୍ଡ ଟି ଏହାର ଡିଜାଇନ୍ ଏବଂ ସାମଗ୍ରୀକୁ ଏପରି ଭାବରେ ବାଛିଛି ଯେ, ଏହା ସହଜରେ ନଷ୍ଟ ହେବ ନାହିଁ। ଏହା ଏକ ମାଷ୍ଟରପିସ୍ ବୋଲି ପ୍ରମାଣ କରିବ ବୋଲି କମ୍ପାନୀ ଦାବି କରିଛି। ଏହାକୁ ପ୍ରସ୍ତୁତ କରିବାରେ ଦେଶର ସଂସ୍କୃତି, କଳା ଏବଂ ଲୋକଙ୍କ ଭାବନା ପ୍ରତି ସମ୍ପୂର୍ଣ୍ଣ ଯତ୍ନ ନିଆଯାଇଛି। ଶ୍ରୀ ରାମ ଜନ୍ମଭୂମି ତିର୍ଥ କ୍ଷେତ୍ର ଟ୍ରଷ୍ଟ ମଧ୍ୟ ଏହା ନିଶ୍ଚିତ କରିଛି।
ତିନି ମହଲା ବିଶିଷ୍ଟ ମନ୍ଦିରରେ ପାଞ୍ଚଟି ମଣ୍ଡପ ଏବଂ ମୁଖ୍ୟ ଶିଖର:
ଅଯୋଧ୍ୟାରେ ପ୍ରାୟ ୭୦ ଏକର ଜମିରେ ଶ୍ରୀ ରାମ ମନ୍ଦିର ବ୍ୟାପିଛି। ନାଗର ଶୈଳୀରେ ଏହାର ସ୍ଥାପତ୍ୟ। ଏହାର ଉତ୍କୃଷ୍ଟ ଡିଜାଇନ୍ ସବୁଠାରେ ପ୍ରଶଂସିତ ହେଉଛି। ଏହି ମନ୍ଦିର ଉଚ୍ଚତା ୧୬୧.୭୫ ଫୁଟ, ଲମ୍ବ ୩୮୦ ଫୁଟ ଏବଂ ଚଉଡା ୨୪୯.୫ ଫୁଟ। ଏହି ତିନି ମହଲା ମନ୍ଦିରରେ ପାଞ୍ଚଟି ମଣ୍ଡପ ଅଛି। ଏଗୁଡିକ ନୃତ୍ୟ ମଣ୍ଡପ, ରଙ୍ଗ ମଣ୍ଡପ, ଗୁଢ ମଣ୍ଡପ, କୀର୍ତ୍ତନ ମଣ୍ଡପ ଏବଂ ପ୍ରାର୍ଥନା ମଣ୍ଡପ ନାମରେ ଜଣାଶୁଣା। ସାଥିରେ ମୁଖ୍ୟ ଶିଖର ମଧ୍ୟ ଅଛି।
ଏଲ ଆଣ୍ଡ ଟି ଚେୟାରମ୍ୟାନ୍ କହିଛନ୍ତି ଯେ, ଏହି ପ୍ରକଳ୍ପକୁ ଦେଶକୁ ଉତ୍ସର୍ଗ କରି ଆମେ ବହୁତ ଖୁସି ଅନୁଭବ କରୁଛୁ। ଆମକୁ ଶ୍ରୀ ରାମ ମନ୍ଦିରର ପରିକଳ୍ପନା ତଥା ନିର୍ମାଣ କରିବାର ସୁଯୋଗ ଦେଇଥିବାରୁ ଆମେ ଭାରତ ସରକାର, ଉତ୍ତରପ୍ରଦେଶ ସରକାର, ଶ୍ରୀ ରାମ ଜନ୍ମଭୂମି ତିର୍ଥ କ୍ଷେତ୍ର ଟ୍ରଷ୍ଟ, ନୃପେନ୍ଦ୍ର ମିଶ୍ର ଏବଂ ବିଶ୍ୱ ହିନ୍ଦୁ ପରିଷଦର ଚମ୍ପତ ରାୟଙ୍କୁ ଧନ୍ୟବାଦ ଦେଉଛୁ। ଏହି ସମସ୍ତ ଲୋକଙ୍କ ନିରନ୍ତର ସମର୍ଥନ ସହିତ, ଆମେ ଏହି ଇଞ୍ଜିନିୟରିଂ ଚମତ୍କାର ସୃଷ୍ଟି କରିବାରେ ସକ୍ଷମ ହେଲୁ। ହଜାର ହଜାର ବର୍ଷ ଧରି ଏହା ପରିଦର୍ଶକଙ୍କୁ ଆକର୍ଷିତ କରିବ।
ଶ୍ରୀ ରାମ ମନ୍ଦିରର ବୈଶିଷ୍ଟ୍ୟ:
ଏହାକୁ ପ୍ରସ୍ତୁତ କରିବା ପାଇଁ ରାଜସ୍ଥାନର ଭରତପୁର ଜିଲ୍ଲାରୁ ଗୋଲାପୀ ବଂଶୀ ପହାଡପୁର ପଥର ମଗାଯାଇଛି। ମନ୍ଦିର ମଧ୍ୟ ଅତି ଶକ୍ତିଶାଳୀ ଭୂକମ୍ପକୁ ସହଜରେ ସହ୍ୟ କରିପାରିବ। ମନ୍ଦିରର ଉଭୟ ପାର୍ଶ୍ୱରେ ୩୯୦ ସ୍ତମ୍ଭ ଏବଂ ୬ ଟି ମକ୍ରାନା ମାର୍ବଲ ସ୍ତମ୍ଭ ଅଛି। ସେଥିରେ ୧୦ ହଜାରରୁ ଅଧିକ ମୂର୍ତ୍ତି ଏବଂ ଥିମ୍ ଖୋଦିତ ହୋଇଛି। ମନ୍ଦିର ନିର୍ମାଣ କାର୍ଯ୍ୟ ମେ ୨୦୨୦ରୁ ଆରମ୍ଭ ହୋଇଥିଲା। ଏହାର ଭିତ୍ତିପ୍ରସ୍ତର ପାଇଁ ଆଇଆଇଟି ପରି ଅନୁଷ୍ଠାନଗୁଡ଼ିକର ସହାୟତା ମଧ୍ୟ ନିଆଯାଇଥିଲା। L&T ବରିଷ୍ଠ ଉପସଭାପତି ଏମ.ଭି ସତୀଶ କହିଛନ୍ତି ଯେ, ଏହି ମନ୍ଦିରର ପ୍ରତ୍ୟେକ ପଥରକୁ ଯତ୍ନ ସହକାରେ ସ୍ଥାପନ କରାଯାଇଛି ଏବଂ ସର୍ବୋତ୍ତମ ଜ୍ଞାନକୌଶଳ ବ୍ୟବହାର କରାଯାଇଛି।
