ନୂଆଦିଲ୍ଲୀ : 2012 ମସିହାରେ ସେଇ ଡିସେମ୍ବର 16 ତାରିଖର କଥା ମନେ ପଡିଲେ ସମସ୍ତ ଦେହ ଶୀତେଇ ଉଠିବ । ଏକ ଶୀତୁଆ ରାତ୍ରିରେ ଅମାନୁଷିକ କାଣ୍ଡ ଘଟାଇଥିଲେ ନରରୂପୀ ପିଶାଚମାନେ । ଚଳନ୍ତା ବସ୍ରେ ନିର୍ଭୟାଙ୍କୁ ଗଣଦୁଷ୍କର୍ମ କରି ଫିଙ୍ଗିଦେଇଥିଲେ ରାସ୍ତା କଡକୁ। ଦୀର୍ଘ ସାଢେ ସାତ ବର୍ଷ ଧରି ନିର୍ଭୟା ନ୍ୟାୟ ପାଇଁ ଗୁହାରି କରି ଚାଲିଥିବାବେଳେ ପରିଶେଷରେ ତାକୁ ଆଜି ନ୍ୟାୟ ମିଳିଛି । ଶୁକ୍ରବାର ସକାଳ 5.30 ମିନିଟ୍ରେ ତିହାର୍ ଜେଲ୍ରେ ନିର୍ଭୟାର ଚାରି ଦୋଷୀଙ୍କୁ ଫାଶୀ ଦିଆଯାଇଛି । କିନ୍ତୁ ଫାଶୀ ଦିଆଯିବା ପୂର୍ବରୁ ଗତ ରାତିରେ ଦୋଷୀଙ୍କ ଓକିଲ ଫାଶୀ ଟାଳିବା ପାଇଁ ବାରମ୍ବାର ପ୍ରୟାସ କରିଥିଲେ । ହାଇକୋର୍ଟରୁ ସୁପ୍ରିମ୍କୋର୍ଟ ଯାଏ ବିଭିନ୍ନ ପ୍ରକାରର ପ୍ରଚେଷ୍ଟା କରି ଚାଲିଥିଲେ ବି ଶେଷରେ ସେ ନିରାଶ ହୋଇଛନ୍ତି ।
ଗୁରୁବାର ରାତ୍ରିଠାରୁ ଶୁକ୍ରବାର ସକାଳେ 5.30 ମିନିଟ୍ ପର୍ଯ୍ୟନ୍ତ କ’ଣ କ’ଣ ହୋଇଥିଲା :
- ଗୁରୁବାର ଦ୍ବିପ୍ରହରରେ ପଟିଆଲା ହାଉସ୍ କୋର୍ଟ ନିର୍ଭୟା ଦୋଷୀଙ୍କୁ ଚତୁର୍ଥ ଡେଥ ଓ୍ବାରେଣ୍ଟକୁ ଖାରଜ ଯାଚିକାକୁ ରଦ୍ଦ କରିଥିଲେ । ଏତଦ୍ବ୍ୟତୀତ ସୁପ୍ରିମ୍କୋର୍ଟ ମଧ୍ୟ ମୁକେଶ ସିଂହଙ୍କ ଯାଚିକାକୁ ଖାରିଜ୍ କରିଦେଇଥିଲେ, ଯାହା ଫଳରେ ଫାଶୀ ପାଇଁ ରାସ୍ତା ସଫା ହୋଇଥିଲା ।
- ସନ୍ଧ୍ୟା ହେଉ ହେଉ ନିର୍ଭୟା ଦୋଷୀଙ୍କ ଓକିଲ ଏପି ସିଂ ପଟିଆଲା ହାଉସ୍ କୋର୍ଟ ଫାଶୀ ନିଷ୍ପତ୍ତି ବିରୋଧରେ ଦିଲ୍ଲୀ ହାଇକୋର୍ଟରେ ଅପିଲ୍ କରିଥିଲେ । ଏହାପରେ ହାଇକୋର୍ଟ ରାତ୍ରି 9 ଘଟିକା ସମୟରେ ଏହି ମାମଲାର ଶୁଣାଣି କରିଥିଲେ
- ଦିଲ୍ଲୀ ହାଇକୋର୍ଟ ଏପି ସିଂଙ୍କ ଡେଥ୍ ଓ୍ବାରେଣ୍ଟ ଟାଳିବା ଅପିଲ୍ର ଶୁଣାଣି କରି କହିଥିଲେ ଯେ, ତାଙ୍କ ପାଖରେ କୌଣସି ଆଇନ୍ ଦଲିଲ୍ ନାହିଁ, ଯେଉଁଥିପାଇଁ ଏହା ଉପରେ ନିଷ୍ପତ୍ତି ନିଆଯାଇପାରିବ ।
- କୋର୍ଟରେ ଓକିଲ ଏପି ସିଂହ କହିଥିଲେ ଯେ, କରୋନା ଭାଇରସ୍ ବ୍ୟାପୁଥିବା ଯୋଗୁଁ ବହୁ ଜାଗାରେ କୋର୍ଟ ବନ୍ଦ ରହୁଛି, ଏଥିପାଇଁ ତାଙ୍କ ଯାଚିକାର ଶୁଣାଣି ହୋଇପାରୁନାହିଁ। ଏପି ସିଂ ଅନ୍ତର୍ରାଷ୍ଟ୍ରୀୟ କୋର୍ଟରେ ମଧ୍ୟ ଏନେଇ ଯାଚିକା ଦାଏର କରିଛନ୍ତି । କିନ୍ତୁ ଦିଲ୍ଲୀ ହାଇକୋର୍ଟ ଏହି ତଥ୍ୟ ଆଧାରରେ ଡେଥ୍ ଓ୍ବାରେଣ୍ଟ ଟାଳିବା ପାଇଁ ମନା କରିଥିଲେ ।
- ବିଳମ୍ବିତ ରାତ୍ରି 12ଟା ସମୟରେ ଦିଲ୍ଲୀ ହାଇକୋର୍ଟ ଏହି ଯାଚିକାକୁ ଖାରଜ କରିବା ସହିତ ଫାଶୀ ଆଦେଶକୁ ପାଳନ କରିବା ପାଇଁ କହିଥିଲେ । ଏହି ନିଷ୍ପତ୍ତିରେ ସାଙ୍ଗେ ସାଙ୍ଗେ ଦୋଷୀଙ୍କ ଓକିଲ ସୁପ୍ରିମ୍କୋର୍ଟରେ ଏନେଇ ଅପିଲ୍ କରିଥିଲେ ।
- ରାତ୍ରି ପ୍ରାୟ ଗୋଟାଏ ସମୟରେ ଏପି ସିଂହ ସୁପ୍ରିମ୍କୋର୍ଟଙ୍କ ରେଜିଷ୍ଟ୍ରାରଙ୍କ ଘରେ ପହଞ୍ଚିଥିଲେ । ଓ ଯାଚିକାର ଶୁଣାଣି ପାଇଁ ଅପିଲ୍ କରିଥିଲେ । ଏହି ସମୟରେ ଏପି ସିଂ ଅଭିଯୋଗ କରିଥିଲେ ଯେ, ଦିଲ୍ଲୀ ହାଇକୋର୍ଟ ନିଷ୍ପତ୍ତିର କପି ତାଙ୍କୁ ମିଳି ପାରିଲା ନାହିଁ। ଏହି ଆଧାରରେ ଏହାର ଶୁଣାଣିକୁ ସେ ବିଳମ୍ବ କରିବାକୁ ଚାହୁଁଥିଲେ ।
- ରାତ୍ରି ପ୍ରାୟ 2.30 ସମୟରେ ସୁପ୍ରିମ୍କୋର୍ଟରେ ଜଷ୍ଟିସ୍ ଭାନୁମତୀଙ୍କ ଅଧ୍ୟକ୍ଷତାରେ ତିନି ଜଣିଆ ଖଣ୍ଡପୀଠ ଏହି ମାମଲାର ଶୁଣାଣି କରିଥିଲେ । ଏହା ତୃତୀୟ ଥର ପାଇଁ ରାତି ଅଧରେ ସୁପ୍ରିମ୍କୋର୍ଟ ଶୁଣାଣି କରିଛନ୍ତି ।
- ଏପି ସିଂହ ଦିଲ୍ଲୀ ହାଇକୋର୍ଟରେ ସୁପ୍ରିମ୍କୋର୍ଟରେ ମଧ୍ୟ ତାଙ୍କ ଅଭିଯୋଗ ବାଢିଥିଲେ । କରୋନା ଭାଇରସ୍କୁ ବାହାନା ବନାଇଥିଲେ । କିନ୍ତୁ ସୁପ୍ରିମ୍କୋର୍ଟ ତାଙ୍କର ସମସ୍ତ ଦଲିଲ୍କୁ ଖାରଜ କରିଥିଲେ ।
- ସୁପ୍ରିମ୍କୋର୍ଟ ଆଦେଶ ଦେଇଥିଲେ ଯେ, ତାଙ୍କ ପାଖରେ କୌଣସି ନ୍ୟାୟିକ ତର୍କ ନାହିଁ, ଯାହା ରାଷ୍ଟ୍ରପତିଙ୍କ ଦ୍ବାରା ଖାରଜ କରାଯାଇଥିବା ଯାଚିାକ ଉପରେ ପ୍ରଶ୍ନ କରିପାରିବ । ଏହା ପରେ ଅଦାଲତ ସାଢ ତିନିଟା ସମୟରେ ଯାଚିକାକୁ ଖାରଜ କରିଥିଲେ ।
- ସମସ୍ତ ନ୍ୟାୟିକ ରାସ୍ତା ବନ୍ଦ ହେବା ପରେ ସକାଳ 4ଟା ସମୟରେ ତିହାର ଜେଲ୍ରେ ନିର୍ଭୟାର ଚାରି ଦୋଷୀ ଅକ୍ଷୟ, ବିନୟ, ମୁକେଶ ଓ ପଓ୍ବନ ଗୁପ୍ତାଙ୍କୁ ଫାଶୀ ପାଇଁ ନିଆଯାଇଥିଲା । ଫାଶୀ ପୂର୍ବରୁ ତାଙ୍କୁ ଗାଧୋଇବା ପାଇଁ କୁହାଯାଇଥିଲା, ନୂଆ କପଡା ଦିଆଯାଇଥିଲା ଓ କିଛି ଖାଇବାକୁ ଦିଆଯାଇଥିଲା ।
- ଚାରି ଦୋଷୀ ନିଜର ଶେଷ ଇଚ୍ଛା ସମ୍ପର୍କରେ କିଛି କହିନଥିଲେ । ଠିକ୍ 5.30 ସମୟରେ ତିହାରର ଫାଶୀ ଘରେ ପଓ୍ବନ ଜହ୍ଲାଦ ଫାଶୀରେ ଲଟକାଇଥିଲେ ।
- ପ୍ରାୟ ପାଞ୍ଚ ମିନିଟ୍ ପରେ ଡକ୍ଟର ଚାରି ଦୋଷୀଙ୍କୁ ମୃତ ଘୋଷିତ କରିଥିଲେ । ତିହାର୍ ଜେଲ୍ରେ ଲକ୍ଡାଉନ୍କୁ ବନ୍ଦ କରି ଦିଆଗଲା, ସମସ୍ତ ଦୋଷୀଙ୍କ ଶବକୁ ପୋଷ୍ଟମର୍ଟମ୍ କରିବା ପାଇଁ ପଠାଗଲା । (ଏଜେନ୍ସି)
