କେଦାର ମିଶ୍ର
ଗତ ୨ଏପ୍ରିଲରୁ ୬ ଏପ୍ରିଲ ପର୍ୟନ୍ତ ଓଡିଶାର ବ୍ରହ୍ମପୁର, ଆସ୍କା, କନ୍ଧମାଳ, କୋରାପୁଟ, ନବରଙ୍ଗପୁର ଓ ବଲାଙ୍ଗୀର ଲୋକସଭା ନିର୍ବାଚନ ମଣ୍ଡଳୀ ଅନ୍ତର୍ଗତ ପ୍ରାୟ ୩୦ରୁ ଅଧିକ ବିଧାନସଭା କ୍ଷେତ୍ର ବୁଲିବାର ସୁଯୋଗ ମିଳିଥିଲା। ଖଲିକୋଟ, କବିସୂର୍ୟ ନଗର, ଆସ୍କା, ହିଞ୍ଜିଳି, ସୋରୋଡା, ବାଲିଗୁଡା, ଦଶପଲ୍ଲା, ଜି ଉଦୟଗିରି, କଣ୍ଟାମାଳ, ବୌଦ, ଦଶପଲ୍ଲା, ଫୁଲବାଣୀ, ବିଷମ କଟକ, ରାୟଗଡା, ଲକ୍ଷ୍ମୀପୁର, କୋରାପୁଟ, ଜୟପୁର, ନବରଙ୍ଗପୁର, ଝରିଗାଁ, ଡାବୁ ଗାଁ, ଧରମଗଡ, ଜୁନାଗଡ, ଭବାନୀପାଟଣା, ନର୍ଲା, ଟିଟିଲାଗଡ, ବଲାଙ୍ଗୀର ଓ ସୋନପୁର ବିଧାନସଭା ମଣ୍ଡଳୀ ବୁଲିବା ସମୟରେ ଲୋକଙ୍କ ପ୍ରତିକ୍ରିୟାକୁ ନେଇ ଧାରାବାହିକ ଭାବରେ ଆମେ ଲେଖୁଛୁ। ତେବେ ଏତେ ବାଟ ବୁଲିବା ଭିତରେ ଗୋଟେ କଥା ମାନିବାକୁ ପଡିବ ଯେ, ୧୯ ବର୍ଷ ଶାସନ କଲାପରେ ମଧ୍ୟ ଓଡିଶା ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କ ପ୍ରତି ଲୋକଙ୍କ ମୋହ ତୁଟିନାହିଁ। କୋରାପୁଟ-ଲକ୍ଷ୍ମୀପୁର ରାସ୍ତାରେ ଥିବା କୁମ୍ଭୀକୋଟା ଗାଁର ଦଳେ ବୟସ୍କ ଲୋକ ଏକା ସାଙ୍ଗରେ ଆମକୁ କହିଥିଲେ, “ନବୀନ ବାବୁଟା ଭଲ ଲୋକ ଆଜ୍ଞା, ହେଲେ ଆମ ଏମଏଲଏ ଟି ଭଲ ଲୋକ ନୁହଁ। ଗଲା ଚାରୋଟି ଯାକ ନିର୍ବାଚନରେ ଆମେ ତାଙ୍କୁ ଭୋଟ ଦେଇଛୁ, ହେଲେ ୧୯ ବର୍ଷ ଭିତରେ ସେ ଲୋକ ଆମ ଗାଁକୁ ଥରେ ବି ଆସିନାହାନ୍ତି।“
ଏ ପ୍ରକାର ମନ୍ତବ୍ୟ ଅନେକ ଜାଗାରେ ଶୁଣିବାକୁ ମିଳିଛି। ଲୋକେ ନବୀନ ସରକାର ପ୍ରତି ଯେତିକି ସନ୍ତୁଷ୍ଟ, ନବୀନଙ୍କ ବିଧାୟକ ଓ ମନ୍ତ୍ରୀଙ୍କୁ ନେଇ ଲୋକଙ୍କ ମନରେ ସେତିକି କ୍ଷୋଭ ରହିଛି। ଓଡିଶା ସରକାର ବଦଳିବା ଦରକାର ବୋଲି ବିରୋଧୀ ଦଳ ଗୁଡିକ କହୁଥିବା ବେଳେ ଲୋକ କିନ୍ତୁ ନବୀନଙ୍କ ଉପରେ ମାତ୍ରାଧିକ ସନ୍ତୁଷ୍ଟ ଥିବା ଦେଖିବାକୁ ମିଳୁଛି। ଆମେ ଭେଟିଥିବା ୫୦୦ ରୁ ଅଧିକ ଲୋକଙ୍କ ଭିତରୁ କେହି ଜଣେବି ନବୀନଙ୍କୁ ଅବିଶ୍ଵାସ କରିବା ଭଳି ମନ୍ତବ୍ୟ ଦେଇନଥିଲେ। ହେଲେ ଖଲିକୋଟ ଠୁ ଆରମ୍ଭ କରି ସୋନପୁର ପର୍ଯନ୍ତ ସବୁଠି ଶାସକ ଦଳର ବିଭିନ୍ନ ମନ୍ତ୍ରୀ ଓ ବିଧାୟକଙ୍କ ନାଁରେ ଲୋକଙ୍କ ଆକ୍ରୋଶ ରହିଛି। ହୁଏତ ନବୀନଙ୍କ ପ୍ରତି ରହିଥିବା ଶୁଭେଛାର ଲାଭ ଏ ବିଧାୟକମାନେ ଉଠାଇବେ, ନଚେତ ଏମାନଙ୍କ ହାରିବା ଏକ ପ୍ରକାର ଥୟ ବୋଲି କୁହାଯାଇପାରେ।
ଖଲିକୋଟ ବିଜେଡି ଅଫିସ ଆଗରେ ଆମକୁ ପ୍ରଚାରରେ ବାହାରିଥିବା ଜଣେ କର୍ମୀ କହିଥିଲେ, “ଆସ୍କା ବିଧାୟକ ଦେବରାଜ ମହାନ୍ତିଙ୍କୁ ଲୋକ ପସନ୍ଦ କରୁନାହାନ୍ତି। କାରଣ ସେ ଲୋକଙ୍କ ସହ ମିଶୁନାହାନ୍ତି।“ କନ୍ଧମାଳରେ ଏଥର ନୂଆ ଲୋକସଭା ପ୍ରାର୍ଥୀ ଅଚ୍ୟୁତ ସାମନ୍ତଙ୍କ ପ୍ରତି ବିପୁଳ ସମର୍ଥନ ଦେଖିବାକୁ ମିଳୁଥିବା ବେଳେ ବିଧାୟକ ପ୍ରାର୍ଥୀମାନଙ୍କୁ ନେଇ ଅନେକଟା ଅସନ୍ତୋଷ ବାରି ହୋଇପଡୁଛି। ବିଧାନସଭା ବାଚସ୍ପତି ପ୍ରଦୀପ କୁମାର ଅମାତଙ୍କ ବିରୋଧରେ ତାଙ୍କ ଦଳର ଅନେକ କର୍ମୀ ବିଦ୍ରୋହ କରୁଥିବାର ଖବର ମିଳୁଛି। ସମାନ କଥା ନବରଙ୍ଗପୁରରେ ଦେଖିବାକୁ ମିଳିଛି। ପାପଡାହାଣ୍ଡି ବଜାରରେ ଜଗମୋହନ ରାଓ ନାମକ ଜଣେ ଭୋଟର କହିଲେ, ସେ ସବୁବେଳେ ବିଜେଡି କୁ ଭୋଟ ଦେଇଥାନ୍ତି। ହେଲେ ଝରିଗାଁ ବିଧାୟକ ତଥା ମନ୍ତ୍ରୀ ଗତ କିଛି ବର୍ଷ ହେଲା ଭୁବନେଶ୍ବରିଆ ହୋଇ ଯାଇଛନ୍ତି!
ଆମର ଜନମତ ସଂଗ୍ରହ ବେଳେ କଂଗ୍ରେସର ନବରଙ୍ଗପୁର ଲୋକସଭା ପ୍ରାର୍ଥୀ ପ୍ରଦୀପ ମାଝୀ ଓ ଭବାନୀପାଟଣା ବିଧାନସଭା ଲାଗି ବିଜେପିର ପ୍ରାର୍ଥୀ ପ୍ରଦୀପ୍ତ ନାୟକଙ୍କ ପ୍ରତି ସବୁ ଦଳର ସମର୍ଥକଙ୍କ ପ୍ରଶଂସା ଦେଖିବାକୁ ମିଳିଥିଲା। ନବରଙ୍ଗପୁରରେ ଲୋକେ ପ୍ରଦୀପ ମାଝିଙ୍କ ପ୍ରତି ବେଶ ଆସ୍ଥାବାନ ଲାଗୁଥିବା ବେଳେ, ବିଜେଡ଼ିର ନିର୍ବାଚନ ପରିଚାଳନା ଦକ୍ଷତା ଆଗରେ ସେ ଯେ ତିଷ୍ଠି ପାରିବେ ନାହିଁ, ଏ ପ୍ରକାର ସନ୍ଦେହ ଲୋକଙ୍କ ମନରେ ଆସୁଛି। ଭବାନୀପାଟଣା କୁ ଘେରି ରହିଥିବା ଜୁନାଗଡ, ଧରମଗଡ, ଲାଞ୍ଜିଗଡ ଓ ନର୍ଲା କ୍ଷେତ୍ରରେ ବିଜେପିର ଲୋକସଭା ପ୍ରାର୍ଥୀ ତଥା ରାଜ୍ୟ ବିଜେପି ସଭାପତି ବସନ୍ତ କୁମାର ପଣ୍ଡାଙ୍କ ପ୍ରତି ଲୋକଙ୍କର ପ୍ରବଳ ବିରକ୍ତି ରହିଛି। ତେବେ ଏ ପ୍ରକାର ବିରୋଧ ସତ୍ତ୍ୱେ କଳାହାଣ୍ଡି ରେ ଏକ ପ୍ରକାର ବିଜେପି ହାୱା ଦେଖିବାକୁ ମିଳୁଛି। କଳାହାଣ୍ଡିର ତ୍ରିମୁଖୀ ଲଢେଇରେ କଂଗ୍ରେସର ଭକ୍ତ ଚରଣ ଦାସ ଗୋଟେ ସମୟରେ ଆଗୁଆ ଥିଲେ, ହେଲେ ସମୟ କ୍ରମେ ତାଙ୍କ ପ୍ରତି ଲୋକ ସମର୍ଥନ କମୁଛି ବୋଲି, ଖୋଦ କଂଗ୍ରେସ କର୍ମୀମାନେ ସ୍ଵୀକାର କରିଛନ୍ତି। ଓଡିଶାର ଜଣେ ପ୍ରଭାବଶାଳୀ ମନ୍ତ୍ରୀ ତଥା ସୋନପୁର ବିଧାୟକ ନିରଞ୍ଜନ ପୂଜାରୀଙ୍କ ବିପକ୍ଷରେ ସୋନପୁର ସହର ଓ ତରଭା ଅଞ୍ଚଳରେ ପ୍ରବଳ ଜନ ଅସନ୍ତୋଷ ରହିଛି। ତେବେ ଡୁଙ୍ଗୁରିପାଲି ଓ ବିନିକା ଅଞ୍ଚଳରୁ ବେଶ ଭଲ ଭୋଟ ଗୋଟାଇପାରିବାର ଦକ୍ଷତା ରଖିଥିବା ଶ୍ରୀ ପୂଜାରୀ ସୋନପୁର ଅଞ୍ଚଳକୁ ଏକ ପ୍ରକାର ବିଜେପି ହାତକୁ ଟେକି ଦେଇଛନ୍ତି। ସ୍ଥାନୀୟ ନେତାଙ୍କ ପ୍ରତି ରହିଥିବା ଲୋକ ଅସନ୍ତୋଷର ପ୍ରଭାବ ଅନେକ ସମୟରେ ବିଜେପିର ଶକ୍ତି ବୃଦ୍ଧିରେ ସହାୟକ ହେଉଛି।
ଏ ପ୍ରକାର ପ୍ରତିକ୍ରିୟାର ପୃଷ୍ଠଭୂମିରେ ବିଜେଡି ଲାଗି ଏହା ମୁଣ୍ଡ ବିନ୍ଧାର କାରଣ ହେବ କି? ଏହାର ଉତ୍ତର ହେଉଛି ନା। କାରଣ ବିଜେପି ଓ କଂଗ୍ରେସ ଭାସମାନ ଭୋଟ ଉପରେ ନିର୍ଭର କରୁଥିବା ବେଳେ ପ୍ରତି ନିର୍ବାଚନ କ୍ଷେତ୍ରରେ ବିଜେଡ଼ିର ନିର୍ଦ୍ଦିଷ୍ଟ ଭୋଟ ଆଧାର ରହିଛି। ରାଜ୍ୟର ମହିଳା ଭୋଟର ଆଜି ମଧ୍ୟ ନବୀନଙ୍କ ପ୍ରତି ଆସ୍ଥାବାନ। । ସେହିପରି ବିଜେଡି ନିର୍ବାଚନ ପରିଚାଳନାର ଭିତିରି ରହସ୍ୟ ଭେଦ କରିବାରେ ଆଜି ମଧ୍ୟ କଂଗ୍ରେସ ଓ ବିଜେପି ଅସମର୍ଥ। ତେଣୁ ସ୍ଥାନୀୟ ସ୍ତରରେ ରହିଥିବା ଅସନ୍ତୋଷକୁ ଠିକଣା ସମୟରେ ବିଜେଡି ମୁକାବିଲା କରିପାରିବ ବୋଲି ଅନେକ ଭୋଟର ଭାବୁଛନ୍ତି। ତେଣୁ ନବୀନଙ୍କ କାନ୍ଧରେ ସବାର ହୋଇ ଆଜି ମଧ୍ୟ ବିଜେଡ଼ିର ଅନେକ ଅକର୍ମା ନେତା ସହଜ ବିଜୟ ପାଇଯାଇପାରନ୍ତି।
( ମୋବାଇଲରେ ଫଟାଫଟ ଖବର ପଢିବା ପାଇଁ ପ୍ଲୋଷ୍ଟୋରରୁ ଡାଉନଲୋଡ କରନ୍ତୁ SANKHIPTA , ଡାଉନଲୋଡ ପରେ ମୋବାଇଲ ସ୍କ୍ରିନକୁ ଟିପରେ ତଳୁ ଉପରକୁ ଘଷି ପଢି ଚାଲନ୍ତୁ ଖବର ପରେ ଖବର)
