ଭୁବନେଶ୍ୱର: ଓଡ଼ିଶା ସ୍କିଲ୍ କନ୍କ୍ଲେଭ୍ ୨୦୨୩କୁ ଉଦ୍ଘାଟନ କରି ଓଡ଼ିଶାର ମୁଖ୍ୟମନ୍ତ୍ରୀ, ଶ୍ରୀ ନବୀନ ପଟ୍ଟନାୟକ କହିଛନ୍ତି ଯେ ବିଶ୍ୱ ସ୍ତରରେ ଚମକିବା ଲାଗି ବ୍ରାଣ୍ଡ୍ “ସ୍କିଲ୍ଡ ଇନ୍ ଓଡ଼ିଶା’ ପ୍ରସ୍ତୁତ ରହିଛି। ଦେଶରେ ନୂଆ ପିଢ଼ିର ପ୍ରଯୁକ୍ତି ଦକ୍ଷତା ଲାଗି କେନ୍ଦ୍ର ରାଜ୍ୟ ଭିତରେ ସହଯୋଗିତାରେ ଉନ୍ନତି ଆଣିବାକୁ ଶ୍ରୀ ପଟ୍ଟନାୟକ ଆହ୍ୱାନ ଦେଇଛନ୍ତି।
ମୁଖ୍ୟମନ୍ତ୍ରୀ ଶ୍ରୀ ପଟ୍ଟନାୟକ କହିଛନ୍ତି ଯେ, “ଯୁବପିଢ଼ିମାନଙ୍କୁ କ୍ଲାଉଡ୍ କମ୍ପ୍ୟୁଟିଂ, ଆର୍ଟିଫିସିଆଲ୍ ପ୍ରଯୁକ୍ତି, ଡାଟା ସାଇନ୍ସ ଓ ଅନ୍ୟାନ୍ୟ ଭବିଷ୍ୟତଧର୍ମୀ ଜ୍ଞାନ ଉପରେ ପ୍ରଶିକ୍ଷଣ ପ୍ରଦାନ କରିବା ଲାଗି ନୂଆ ସ୍କିମ୍ ନୂଆ ଓଡ଼ିଶା ଲାଗି ଚଳିତ ବର୍ଷ ୧୦୦ କୋଟି ଟଙ୍କାର ବଜେଟ୍ ବ୍ୟବସ୍ଥା କରାଯାଇଛି।’’
“ତାହାକୁ ହାସଲ କରିବା ଲାଗି ନୀତି ବିକାଶ କରିବା ଏବଂ ଦକ୍ଷତା ବିକାଶର ପ୍ରସାର କରିବା ଓ ଯେଉଁମାନେ ଦକ୍ଷତା ହାସଲ କରୁଛନ୍ତି ସେମାନଙ୍କୁ ଯେଭଳି ନିଯୁକ୍ତି ବଜାରରେ ମାନ୍ୟତା ଓ ମୂଲ୍ୟ ମିଳିବ, ତାହାକୁ ନିଶ୍ଚିତ କରିବା ଲାଗି କେନ୍ଦ୍ରୀୟ ମନ୍ତ୍ରଣାଳୟ, ରାଜ୍ୟ ସରକାରଙ୍କ ବିଭାଗ, ଶିଳ୍ପ, ଶିକ୍ଷାନୁଷ୍ଠାନ ଓ ନାଗରିକ ସମାଜ ମଧ୍ୟରେ ଏକ ସାମଗ୍ରିକ ଓ ସହଯୋଗିତା ଉଦ୍ୟମର ଆବଶ୍ୟକତା ରହିଛି ବୋଲି ସେ କହିଛନ୍ତି।”
ଏହି ଉଦ୍ଦେଶ୍ୟ ଲାଗି ରାଜ୍ୟ ସରକାର ପ୍ରତିବଦ୍ଧ ରହିଛନ୍ତି ଏବଂ ୭୦ ଲକ୍ଷ ମହିଳାଙ୍କ ଜୀବନକୁ ବଦଳାଇବା ଏବଂ ସମାନଙ୍କୁ ଉଦ୍ୟୋଗୀରେ ପରିଣତ କରିବା ଲାଗି ସହାୟତା ପ୍ରଦାନ କରିବା ନିମନ୍ତେ ମିଶନ ଶକ୍ତି ଅଭିଯାନର ଶୁଭାରମ୍ଭ କରାଯାଇଛି ବୋଲି ଶ୍ରୀ ପଟ୍ଟନାୟକ କହିଛନ୍ତି।
ଓଡ଼ିଶା ସରକାରଙ୍କ ଦକ୍ଷତା ବିକାଶ, ବୈଷୟିକ ଶିକ୍ଷା ବିଭାଗ ରାଷ୍ଟ୍ରମନ୍ତ୍ରୀ (ସ୍ୱାଧୀନ ଦାୟିତ୍ୱ), ଶ୍ରୀ ପ୍ରୀତିରଂଜନ ଘଡ଼ାଇ କହିଛନ୍ତି ଯେ, “ଆଧୁନିକ ଓ ଭବିଷ୍ୟତଧର୍ମୀ ପ୍ରଯୁକ୍ତିରେ ଶିଳ୍ପ ସହିତ ସହଯୋଗିତା ସ୍ଥାପନ କରିବା ଏବଂ ଉକ୍ତ ପ୍ରକ୍ରିୟାରେ ତାହାକୁ କାର୍ଯ୍ୟକାରୀ କରିବା ଲାଗି ଓଡ଼ିଶା ସରକାର ସର୍ବଦା ଆଗଭର। ସରକାରଙ୍କ ପକ୍ଷରୁ ବିଭିନ୍ନ ବଳିଷ୍ଠ ଓ ପ୍ରତ୍ୟକ୍ଷ ହସ୍ତକ୍ଷେପ ଲାଗି ଦକ୍ଷତା କ୍ଷେତ୍ରରେ ଓଡ଼ିଶା ବହୁ ଆଗକୁ ବଢ଼ିପାରିଛି।’’
ଓଡ଼ିଶା ସରକାରଙ୍କ ଓଡ଼ିଶା ଦକ୍ଷତା ବିକାଶ କର୍ତୃପକ୍ଷଙ୍କ ଅଧ୍ୟକ୍ଷ, ଶ୍ରୀ ସୁବ୍ରତ ବାଗ୍ଚୀ କହିଛନ୍ତି ଯେ, “ଓଡ଼ିଶାକୁ ନବସୃଜନର ଏକ ସ୍ୟାଣ୍ଡ୍ବକ୍ସରେ ପରିଣତ କରିବା ଲାଗି ମୁଖ୍ୟମନ୍ତ୍ରୀଙ୍କ ରହିଥିବା ଲକ୍ଷ୍ୟ ଅନୁସାରେ ଆଜିର କାର୍ଯ୍ୟକ୍ରମ ହେଉଛି ସେହି ଲକ୍ଷ୍ୟ ଏବଂ ରୂପାନ୍ତରୀତ ପ୍ରଯୁକ୍ତି, ସାହିତ୍ୟ, ସଂସ୍କୃତି, କ୍ରୀଡ଼ା କାର୍ଯ୍ୟକ୍ରମ, ଧ୍ୟାନ ତଥା ଦକ୍ଷତା ଆଦି ସହିତ ବିଶ୍ୱ ସ୍ତରୀୟ ମାନକରେ ପରିଣତ ହୋଇ ରାଜ୍ୟର ରାଜଧାନୀର ଲୋକପ୍ରିୟତା ଗଠନ କରିବା ପ୍ରତି ସ୍ୱୀକୃତି।’’
ଓଡ଼ିଶା ସରକାରଙ୍କ ମୁଖ୍ୟ ସଚିବ ତଥା ଉନ୍ନୟନ କମିସନର, ସାଧାରଣ ପ୍ରଶାସନ ଓ ସାଧାରଣ ଅଭିଯୋଗ, ବିଭାଗ ଶ୍ରୀ ପ୍ରଦୀପ କୁମାର ଜେନା କହିଛନ୍ତି ଯେ, “ଆମ ସମୟର ଚର୍ଚ୍ଚିତ ଶବ୍ଦ ହେଉଛି ଦକ୍ଷତା। ରୋବୋଟିକ୍ସ ଓ ଆର୍ଟିଫିସିଆଲ ଇଟେଂଲିଜେନ୍ସରେ ହେଉଥିବା ବିକାଶ ପାଇଁ ପ୍ରଯୁକ୍ତି ଦୃଶ୍ୟପଟ୍ଟରେ ଦ୍ରୁତ ପରିବର୍ତନ ହେଉଛି । ନୀତି ନିର୍ଧାରକ, ଶିଳ୍ପ ନେତୃବୃନ୍ଦ, ଶିକ୍ଷାବିତ୍ ଓ ଛାତ୍ରଛାତ୍ରୀମାନଙ୍କ ମଧ୍ୟରେ ଆଲୋଚନା, ସମ୍ମେଳନ ଓ ସହଯୋଗିତା ଏହି ମେଗା ଦକ୍ଷତା କନ୍କ୍ଲେଭ୍ ହେଉଛି ଏକ ଶ୍ରେଷ୍ଠ ମଂଚ।’’
ଓଡ଼ିଶା ସରକାରଙ୍କ ଦକ୍ଷତା ବିକାଶ ଓ ବୈଷୟିକ ଶିକ୍ଷା ବିଭାଗର ପ୍ରମୁଖ ସଚିବ, ଶ୍ରୀମତୀ ଉଷା ପାଢ଼ୀ ନିଜ ସ୍ୱାଗତ ଭାଷଣରେ କହିଛନ୍ତି ଯେ, “ଓଡ଼ିଶାରେ ଦକ୍ଷତା କେବଳ ତାଲିମ ନୁହେଁ, ଏହା ହେଉଛି ଜୀବନକୁ ବଦଳାଇବାର ମିସନ। ନୁଆ ଚିନ୍ତାଧାରା ସଦୃଷ୍ଟି କରିବା ଏବଂ ଦକ୍ଷତା ଗୋଷ୍ଠୀକୁ ଏକ ନୂତନ ଦିଗନ୍ତ ପ୍ରଦାନ କରିବା ଲାଗି ଦକ୍ଷତା ବ୍ୟବସ୍ଥାର ସବୁ ଅଂଶୀଦାରଙ୍କୁ ଏକଜୁଟ କରିବା ହେଉଛି ଏହି କାର୍ଯ୍ୟକ୍ରମର ଉଦ୍ଦେଶ୍ୟ।’’
ନିଜ ସ୍ୱତନ୍ତ୍ର ଅଭିଭାଷଣରେ ଇଣ୍ଡିଆନ ଚାମ୍ବର ଅଫ୍ କମର୍ସ ଆଣ୍ଡ୍ ଇଣ୍ଡଷ୍ଟ୍ରି (ଫିକି)ର ସଭାପତ. ଶ୍ରୀ ଶୁଭ୍ରକାନ୍ତ ପଣ୍ଡା କହିଛନ୍ତି ଯେ, “ସାଂପ୍ରତିକ ସ୍ଥିତି ଦୃଷ୍ଟିରୁ ନୂଆ ଦୁନିଆ ପାଇଁ ଦକ୍ଷତା ବିଷୟ ଉପଯୁକ୍ତ, କାରଣ ନୂଆ ପିଢ଼ି ବେଶ ଗୁରୁତ୍ୱପୂର୍ଣ୍ଣ ହୋଇପଡ଼ିଥିବା ଦୃଷ୍ଟିରୁ ନିଯୁକ୍ତି ହାସଲ କରିବା କ୍ଷମତାରେ ଉନ୍ନତି ଆଣିବା ଲାଗି ଦକ୍ଷତା ହାସଲ କରିବା ଗୁରୁତ୍ୱପୂର୍ଣ୍ଣ ହୋଇପଡ଼ିଛି। ଜନସଂଖ୍ୟାରେ ରହିଥିବା ବିବିଧତାର ଲାଭ ହାସଲ କରିବା ଲାଗି ଲୋକଙ୍କ ଉପରେ ନିବେଶ କରିବା ପରମ୍ପରିକ ଦକ୍ଷତା ଭଳି ସମାନ ଭାବେ ଗୁରୁତ୍ୱପୂର୍ଣ୍ଣ। ଓଡ଼ିଶା ସ୍କିଲ୍ କନ୍କ୍ଲେଭ୍ ୨୦୨୩ ପଛର ପ୍ରମୁଖ ଚିନ୍ତାଧାରା ହେଉଛି ଓଡ଼ିଶାର ଲୋକଙ୍କ ଉପରେ ନିବେଶ କରିବା ଏବଂ ଦକ୍ଷତାକୁ ନୂଆ ସ୍ତରରେ ପହଂଚାଇବା।’’
ଉଦ୍ଘାଟନୀ ଅଧିବେଶନରେ ବିଭିନ୍ନ ବୁଝାମଣାପତ୍ର ବା ଏମ୍ଓୟୁ ସ୍ୱାକ୍ଷର କରାଯାଇଥିଲା। ଆଇଟିଇ ଏଜୁକେସନ ସର୍ଭିସେସ୍, ସିଙ୍ଗାପୁର ସହିତ ଓଡ଼ିଶା ସରକାରଙ୍କ ଦକ୍ଷତା ବିକାଶ ଓ ବୈଷୟିକ ଶିକ୍ଷା; ମିଶନ ଶକ୍ତି ସହ ୱାର୍ଲଡ୍ ସ୍କିଲ୍ ସେଂଟର, ସ୍କୁଲ ଓ ଗଣ ଶିକ୍ଷା ବିଭାଗ ସହ ଆଇଟିଇ ଏକୁକେସନ ସର୍ଭିସେସ୍, ସିଙ୍ଗାପୁର, ଓଡ଼ିଶା କମ୍ପ୍ୟୁଟର ଆପ୍ଲିକେସନ ସେଂଟର୍ (ଓକାକ୍) ସହିତ ଓଡ଼ିଶା ସରକାରଙ୍କ ଦକ୍ଷତା ବିକାଶ ଓ ବୈଷୟିକ ଶିକ୍ଷା ଏବଂ ଡ୍ରୋନ୍ ଫେଡେରେସନ୍ ଅଫ୍ ଇଣ୍ଡିଆ ସହିତ ଓଡ଼ିଶା ସରକାରଙ୍କ ଦକ୍ଷତା ବିକାଶ ଓ ବୈଷୟିକ ଶିକ୍ଷା ମଧ୍ୟରେ ବୁଝାମଣାପତ୍ର ସ୍ୱାକ୍ଷର ହୋଇଥିଲା।
ଏହି ଏମ୍ଓୟୁ ଗୁଡ଼ିକ ବ୍ୟତୀତ ଫେଷ୍ଟୋ, ମିଟୁଟୋୟୋ, ସ୍ନାଇଡର, କୋର୍ସେରା, ଅଲ୍ଟେରା, ଫିଲିପ୍ସ ଏଜୁକେସନ, ଆଇଏସ୍ବି ଆଦି ଓଡ଼ିଶାର ଯୁବ ପିଢ଼ି ଏବଂ ଓଡ଼ିଶା ସରକାରଙ୍କ ଦକ୍ଷତା ବିକାଶ ଓ ବୈଷୟିକ ଶିକ୍ଷା ଉପରେ ନିବେଶ କରିବା ଲାଗି ଆଗ୍ରହ ପ୍ରକାଶ କରିଥିଲେ।
ଦେଶରେ ଦକ୍ଷତାର ପ୍ରସାର କରିବାର ପ୍ରମୁଖ ଚିନ୍ତାଧାରାକୁ ନେଇ ଏବଂ ନିରନ୍ତର ଜୀବନଜୀବିକା ଉପରେ ଯୁବପିଢ଼ିଙ୍କୁ ସକ୍ଷମ କରିବା ଲାଗି ଏହି କନ୍କ୍ଲେଭ୍ ପ୍ରମୁଖ ଆହ୍ୱାନଗୁଡ଼ିକର ସମାଧାନ କରିବ, ଏକ ଚମତ୍କାର ପରିବେଶ ଲାଗି ରୋଡ୍ମ୍ୟାପ୍ ପ୍ରସ୍ତୁତ କରିବ ଏବଂ ଦେଶର ଯୁବପିଢ଼ିଙ୍କୁ ନିଯୁକ୍ତି ସକ୍ଷମ ଦକ୍ଷତାରେ ଉନ୍ନତି ଆଡ଼କୁ ଅଗ୍ରସର କରାଇବ।
ଏହି ଅଧିବେଶନ ପରେ ପ୍ୟାନେଲ ଆଲୋଚନା ଅନୁଷ୍ଠିତ ହୋଇଥିଲା ଯେଉଁଥିରେ ସରକାରୀ ଅଧିକାରୀ, କର୍ପୋରେଟ ପ୍ରତିନିଧି ଓ ଶିଳ୍ପ ସହଯୋଗୀମାନେ ଦେଶ ପାଇଁ ଦକ୍ଷତା ବିକାଶର ଗୁରୁତ୍ୱ ଉପରେ ସେମାନଙ୍କ ଭାବନା ବ୍ୟକ୍ତ କରିଥିଲେ।
ଓଡ଼ିଶା ସରକାର ଏବଂ ଓଡ଼ିଶା ଦକ୍ଷତା ବିକାଶ କର୍ତୃପକ୍ଷଙ୍କ ସହ ଶିଳ୍ପ ସହଯୋଗୀ ଭାବେ ଫେଡେରେସନ୍ ଅଫ୍ ଇଣ୍ଡିଆନ ଚାମ୍ବର ଅଫ୍ କମର୍ସ ଆଣ୍ଡ୍ ଇଣ୍ଡଷ୍ଟ୍ରି (ଫିକି) ପକ୍ଷରୁ ଏହି କନ୍କ୍ଲେଭ୍ ଆୟୋଜନ କରାଯାଇଛି।