Categories
ଆଜିର ଖବର ରାଜ୍ୟ ଖବର ସଂସ୍କୃତି

ପ୍ରସିଦ୍ଧ ବାଣପୁର ପଞ୍ଚୁଦୋଳ ଯାତ୍ରା ପାଇଁ ସ୍ଥାପନ ହେଲା ଶୁଭସ୍ତମ୍ଭ, ନିଆଗଲା ଏହିସବୁ ନିଷ୍ପତି

ବାଣପୁର: ପବିତ୍ର ଫାଲ୍‌ଗୁନ ଦୋଳ ପୂର୍ଣ୍ଣିମା ଅପରାହ୍ନର ମାହେନ୍ଦ୍ର ବେଳାରେ ଯାତ୍ରା କମିଟିର ସମସ୍ତ କର୍ମକର୍ତ୍ତାଙ୍କ ଉପସ୍ଥିତିରେ ମା’ ଭଗବତୀ ଓ ଶ୍ରୀ ଚ଼ରଣ ଚ଼କାଦେବଙ୍କ ଜୟ ଜୟ କାର ହରିବୋଲ ଧ୍ବନୀରେ ଐତିହାସିକ ପଞ୍ଚୁଦୋଳ ଯାତ୍ରାର ଶୁଭାରମ୍ଭ ନିମନ୍ତେ ମିଳନ ଯଜ୍ଞବେଦୀର ଐଶାନ୍ୟ କୋଣରେ ଶୁଭ ସ୍ତମ୍ବ ସ୍ଥାପନ କରାଗଲା ।

ଏହି ଯାତ୍ରାର ପ୍ରମୁଖ ସ୍ଥାନାଧିପତି ଶ୍ରୀ ଶ୍ରୀ ଚରଣ ଚ଼କାଦେବଙ୍କ ଚରଣାର ବିନ୍ଦରେ ସମର୍ପିତ ହୋଇ ଯାତ୍ରା କମିଟିର କର୍ମକର୍ତ୍ତାମାନେ ଯାତ୍ରାର ସଫଳତା ନିମନ୍ତେ ଶ୍ରୀ ଜୀଉଙ୍କ ଆର୍ଶୀବାଦ କାମନା କରି ଦୀପ ଧୂପ ନୈବେଦ୍ୟ ଅର୍ପଣ ପରେ ଆଜ୍ଞାମାଳ ନେଇ ପଡ଼ିଆ ଅଭିମୁଖେ ଯାତ୍ରା କରି ଯଜ୍ଞବେଦୀରେ ସ୍ଥାପନ କରିଥିଲେ।

ସେହିପରି ଯାତ୍ରାର ମୁଖ୍ୟ ଆକର୍ଷଣ ଅରାଧ୍ୟା ଦେବୀ ସଂସାରର ମାତୃଶକ୍ତିର ପ୍ରତୀକ ମଙ୍ଗଳମୟୀ ମା’ଭଗବତୀଙ୍କ ମନ୍ଦିରରେ ମଧ୍ୟ କର୍ମକର୍ତ୍ତାମାନେ ମା’ଙ୍କ ପାଦତଳେ ପ୍ରଦୀପ ପ୍ରଜ୍ବଳନ ପୂର୍ବକ ସମର୍ପିତ ହୋଇ ଯାତ୍ରାର ସଫଳତା ନିମନ୍ତେ ପ୍ରାର୍ଥନା କରିବା ସହିତ ଆଜ୍ଞାମାଳ ଭିକ୍ଷା କରିଥିଲେ।ପରେ ମା’ଙ୍କ ପବିତ୍ର ସିନ୍ଦୁର, ଆଜ୍ଞାମାଳ ଓ ପତାକା ନେଇ ଯାତ୍ରା ପଡ଼ିଆର ଯଜ୍ଞବେଦୀରେ ସ୍ଥାପନ କରିଥିଲେ। ସ୍ତୋତ୍ରୀୟ ବ୍ରାହ୍ମଣଙ୍କ ମଙ୍ଗଳାଚରଣରେ ଯାତ୍ରାର ସର୍ବମଙ୍ଗଳ କାମନା କରି ବେଦୀର ଐଶାନ୍ୟ କୋଣରେ ଶୁଭସ୍ତମ୍ବ ସ୍ଥାପନ କରାଯାଇଛି ।

ଚ଼ଳିତବର୍ଷ ଚୈତ୍ର କୃଷ୍ଣପଞ୍ଚମୀ ମାର୍ଚ୍ଚ ୧୯ ତାରିଖ ବୁଧବାର ପଞ୍ଚୁଦୋଳ ଯାତ୍ରା ଅବସରରେ ସଂଧ୍ୟା ୬ ଟା ରୁ ଏହି ଯାତ୍ରା ଆରମ୍ଭ ହୋଇ କୃଷ୍ଣଷଷ୍ଠୀ ମାର୍ଚ୍ଚ ୨୦ ତାରିଖ ଗୁରବାର ଗୋଧୂଳୀ ଲଗ୍ନ ଅପରାହ୍ନ ୬ ଟା ଦେବା ଦେବୀଙ୍କ ମହାମିଳନ ପରେ ଐତିହାସିକ ପଞ୍ଚୁଦୋଳ ମେଳଣ ଯାତ୍ରା ଉଦ୍‌ଯାପିତ ହେବ।

ଏହି ଅବସରରେ ଚଳିତ ବର୍ଷ ତା ୧୯ରିଖ ସଂଧ୍ୟା ୬ ଟାରୁ ଶ୍ରୀକ୍ଷେତ୍ରରୁ ଆସିଥିବା ପ୍ରଭୁ ଶ୍ରୀ ଜଗନ୍ନାଥଙ୍କ ଆଜ୍ଞାମାଳ ହୃଦୟ ପଲ୍ଲବ ପ୍ରଥମ ପିଣ୍ଡିରେ ସ୍ଥାପନ ପରେ ଛାୟା ମଣ୍ଡପଠାରେ ଯାତ୍ରାର ଶୁଭ ଉଦଘାଟନ କରାଯାଇ ତୁଳସୀ ସଂଧ୍ୟାରେ ଓଡ଼ିଶା ସରକାରଙ୍କ ସଂସ୍କୃତି ବିଭାଗ ତରଫରୁ ବହୁ ରଙ୍ଗାରଙ୍ଗ ସାଂସ୍କୃତିକ କାର୍ଯ୍ୟକ୍ରମ ପରିବେଷଣ କରାଯିବ।

ଉକ୍ତଦିନ ମଧ୍ୟରାତ୍ର ୧୨ ଘଟିକା ପରଠାରୁ ସ୍ଥାନାଧିପତି ଶ୍ରୀ ଶ୍ରୀ ଚରଣ ଚକାଦେବଙ୍କ ନିମନ୍ତ୍ରଣ କ୍ରମେ ବାଣପୁରର ଆରାଧ୍ୟା ଦେବୀ ମା’ ଭାଗବତୀଙ୍କ ଚ଼ଳନ୍ତି ପ୍ରତିମା କାଠି ଠାକୁରାଣି ପ୍ରଥମେ ଯାତ୍ରା ପଡ଼ିଆରେ ପହଞ୍ଚି ଆସ୍ଥାନ ବିଜେ କରିବାପରେ ସାଥିରେ ଆସିଥିବା ସମଗ୍ର ବାଣପୁର ଚିଲିକା ଅଞ୍ଚଳର ଶତାଧିକ ଦେବାଦେବୀ ନିଜ ନିଜର ସୁସଜ୍ଜିତ ଆସ୍ଥାନ ପିଣ୍ଡି ଉପରେ ଉପବେଶନ କରି ଅଗଣିତ ଶ୍ରଦ୍ଧାଳୁଙ୍କୁ ଦର୍ଶନ ଦେବେ ।

ଠାକୁର ଠାକୁରାଣୀଙ୍କ ଦୋଳବିମାନ, ଯାନବାହାନ ,ଆଗରେ ବିଭିନ୍ନ ଗ୍ରାମରୁ ଆସିଥିବା ଆକର୍ଷଣୀୟ ଥାଟ ପଟୁଆର ବାଜା ରୋଷଣୀରେ ଏବଂ ଅଗଣିତ ଶ୍ରଦ୍ଧାଳୁଙ୍କ ସମବେତ ହୁଳହୁଳି ହରିବୋଲ ଧ୍ବନୀରେ ପଡ଼ିଆର ଗଗନ ପବନ ମୁଖରିତ ହୋଇ ଉଠିବ। ତା ୨୦ରିଖ ସକାଳୁ ଛାୟା ମଣ୍ଡପଠାରେ ଦିନସାରା ଆଞ୍ଚଳିକ ସଂକୀର୍ତ୍ତନ, ପାଲା, ଦାସକାଠିଆ, ପାଇକ ଆଖଡ଼ା ଇତ୍ୟାଦି ଲୋକନୃତ୍ୟ ସଂଗୀତ ପରିବେଷଣ କରାଯିବ।

ଅପରାହ୍ନରେ ପୁରସ୍କାର ବିତରଣ ପରେ ଗୋଧୂଳୀ ଲଗ୍ନର ମାହେନ୍ଦ୍ର ବେଳାରେ ସ୍ଥାନାଧିପତି ଶ୍ରୀ ଚରଣଚକାଦେବ ଓ ମା’ ଭଗବତୀଙ୍କ ବିଜେ କାହାଳୀ ବାଜିବା ପରେ ଦେବା ଦେବା ମାନେ ଆସ୍ଥାନ ଛାଡ଼ି ଯଜ୍ଞବେଦୀ ଚ଼ାରିପଟେ ୭ ଥର ମିଳିତ ପରିକ୍ରମା କରିବା ଅବସରରେ ପୁଞ୍ଜିଆମା ଶାସନଠାକୁର ଶ୍ରୀ ଶ୍ରୀ ଚନ୍ଦ୍ରଶେଖରଙ୍କ ସହିତ ମା’ଭଗବତୀଙ୍କ ମହାମିଳନ ପରେ ମେଳଣ ଯାତ୍ରା ଉଦଯାପିତ ହେବ। ଯାତ୍ରା ୫ ଦିନ ଧରି ତା ୨୫ରିଖ ପର୍ଯ୍ୟନ୍ତ୍ର ପଡ଼ିଆରେ ପଡ଼ିଥିବା ବିଭିନ୍ନ ମନୋହରୀ, ହୋଟେଲ୍ ମୋଟେଲ୍, ଉଠାଦୋକାନୀ, ଗୃହ ଆସବାବପତ୍ର ଦୋକାନବଜାର କାରବାର ଚାଲୁ ରହିବ।

ଚଳିତ ବର୍ଷର ଏହି ଲୋକ ଉତ୍ସବରେ ସୂଚନା କେନ୍ଦ୍ର, ଶ୍ରଦ୍ଧାଳୁଙ୍କ ଧନଜୀବନର ସୁରକ୍ଷା, ସ୍ଵାସ୍ଥ୍ୟସେବା, ସୌରାଘାତରୁ ରକ୍ଷା ପାଇଁ ତୁରନ୍ତ ଆମ୍ବୁଲାନ୍ସ୍ ର ବ୍ୟବସ୍ଥା, ଅସ୍ଥାୟୀ ଶୌଚ଼ାଳୟ, ଗ୍ରୀଷ୍ମପ୍ରବାହକୁ ଆଖିରେ ରଖି ପର୍ଯ୍ୟାପ୍ତ ପାନୀୟ ଜଳର ବ୍ୟବସ୍ଥା, ପରିମଳ, ଯାନବାହାନ ନିୟନ୍ତ୍ରଣ , ଚ଼ୋରିହାରି ଡକାୟତି ଓ ରାହାଜାନିରୁ ଜନସାଧାରଣଙ୍କୁ ସୁରକ୍ଷା ଯୋଗାଇ ଦେବା ପାଇଁ ରାଜ୍ୟ ସରକାରଙ୍କ ତରଫରୁ ପର୍ଯ୍ୟାପ୍ତ ପରିମାଣର ପୋଲିସ ବାହିନି ଯୋଗାଇ ଦେବା ନିମନ୍ତେ ଯାତ୍ରା କମିଟି ତରଫରୁ ଅନୁରୋଧ କରାଯାଇଛି। ଚଳିତ ବର୍ଷ ପ୍ରଥମ ଥର ପାଇଁ ଜିଲ୍ଲା ପ୍ରଶାସନ ତରଫରୁ”ଓରମାସ୍”ର ହସ୍ତଶିଳ୍ପ ମେଳା ,ଦୋକାନବଜାର ପଡ଼ିବା ସହିତ ରାଜ୍ୟ ସରକାରଙ୍କ ତରଫରୁ ବାରବାଟି ଷ୍ଟାଡିୟମ ପରି ଯାତ୍ରା ପଡ଼ିଆକୁ ଫ୍କଡ୍ ଲାଇଟ୍ ରେ ଆଲୋକିତ କରାଯିବାର ବ୍ୟବସ୍ଥା କରାଯାଇଛି।

ଯାତ୍ରାକୁ ଉପଭୋଗ କରିବାକୁ ରାଜ୍ୟ ତଥା ରାଜ୍ୟ ବାହାରୁ ଅଗଣିତ ଶ୍ରଦ୍ଧାଳୁ ଯୋଗ ଦେବାର ସମ୍ଭାବନା ଥିବାରୁ ବିଶେଷକରି ମା’ଭଉଣୀ ମାନଙ୍କୁ ନିଜ ନିଜର ସୁନାଗହଣା ପରିଧାନ ଓ ଛୋଟ ଛୋଟ ପିଲାଙ୍କ ପ୍ରତି ଅଧିକ ସତର୍କ ରହିବାକୁ କମିଟି ତରଫରୁ ଅନୁରୋଧ କରାଯାଇଛି। ସୂଚନା ଥାଉକି କିଛି ଦିନ ତଳେ ଖୋଦ ଆଇନ ମନ୍ତ୍ରୀ ପୃଥ୍ୱୀରାଜ ହରିଚନ୍ଦନ ପଞ୍ଚୁଦୋଳ ଯାତ୍ରା ପ୍ରସ୍ତୁତିର ତଦାରଖ କରିଥିଲେ ଯେଉଁଥିରେ ଜିଲ୍ଲା ପ୍ରଶାସନ, ସ୍ଥାନୀୟ ପ୍ରଶାସନ ଓ ପଞ୍ଚୁଦୋଳ କମିଟି ଯୋଗଦେଇଥିଲେ।

Categories
ଧର୍ମ ବିଶେଷ ଖବର ରାଜ୍ୟ ଖବର

ଶେଷ ହେଲା ପ୍ରସିଦ୍ଧ ବାଣପୁର ପଞ୍ଚୁଦୋଳ, ଚିତାକର୍ଷକ ଥିଲା ଆତସବାଜି

ବାଣପୁର( ସୀତାରାମ ଅଗ୍ରୱାଲ): ଶନିବାର ଓ ରବିବାର ଦିନ ଖୋର୍ଦ୍ଧା ଜିଲ୍ଲା ବାଣପୁର ଐତିହାସିକ ପଲଟଣ ପଡିଆ ଠାରେ ଦୁଇଦିନ ଧରି ପଞ୍ଚୁଦୋଳ ଓ ମେଳଣ ପର୍ବ ଅନୁଷ୍ଠିତ ହୋଇଯାଇଛି। ଚଳିତ ବର୍ଷ ଲୋକମାନେ ଖୁବ ଧୂମଧାମରେ ପାଳନ କରିଛନ୍ତି ମେଳଣ ପର୍ବ। କାହିଁ କେଉଁ ଅନାଦି କାଳରୁ ବାଣପୁରରେ ଏହି ପର୍ବ ପାଳନ କରାଯାଉଛି। ଚୈତ୍ର କୃଷ୍ଣପକ୍ଷ ପ୍ରତିପଦା ଠାରୁ ପାଞ୍ଚଦିନ ପରେ ଶନିବାର ମାହେନ୍ଦ୍ର ବେଳା ରାତ୍ର ୧୧ ଘଟିକା ୩୫ମିନିଟ ପରେ ସ୍ଥାନାଧିପତି ଚରଣ ଚକାଦେବ ଓ ମା’ ଭଗବତୀଙ୍କ ନିମନ୍ତ୍ରଣ କ୍ରମେ ଠାକୁର ମାନେ ମେଳଣ ପଡିଆକୁ ଆସିଥିଲେ।

ପ୍ରଥମେ ମା’ ଭଗବତୀ ଓ ଚକାଦେବ ମେଳଣ ପଡିଆରେ ପଦାର୍ପଣ କରି ଆସନ ଗ୍ରହଣ କଲା ପରେ ବାଣପୁର ଅଞ୍ଚଳର ଗାଁ ସହର ଓ ପୁରପଲ୍ଲୀର ଦେବାଦେବୀ ମାନେ ସୁସଜିତ ଦୋଳ ବିମାନରେ ବିଭିନ୍ନ ଥାଟ ପାଟ ଓ ପଟୁଆରରେ ଆସି ମେଳଣ ପଡିଆରେ ନିଜ ନିଜର ଅସ୍ଥାନରେ ଅଭିଷିକ୍ତ ହୋଇଥିଲେ। ସନ୍ଧ୍ୟା ସମୟରୁ ପଲଟନ ପଡିଆର ଛାୟା ମଣ୍ଡପରେ ସାଂସ୍କୃତିକ କାର୍ଯ୍ୟକ୍ରମର ଆସର ଜମିଥିଲା।

ବିଭିନ୍ନ ଗ୍ରାମର ଦେବା ଦେବୀ ମାନେ ପ୍ରତିଯୋଗିତା ମୁଳକ ପଟୁଆରରେ ଆସିଥିବା ବେଳେ ମୁଖ୍ୟତଃ ଭେଟେଶ୍ୱର ଗ୍ରାମର ଭେଟିନାଥ ଦେବ, ଗାଲୁଆର ଗୁପ୍ତେଶ୍ୱର ଦେବ, ବାଲିପଦର ଗ୍ରାମର ପଟୁଆରକୁ ଦେଖିବାକୁ ଲୋକଙ୍କ ଭିତରେ ଉତ୍କଣ୍ଠା ଜାତ ହୋଇଥିଲା। ଗତବର୍ଷ ଭୂଷଣ୍ଡପୁର ବାଣ ବିସ୍ଫୋରଣ ଘଟଣା ପରେ ବାଣପୁର ପଞ୍ଚୁଦୋଳରେ ପ୍ରଶାସନ ପକ୍ଷରୁ ବାଣ ନିଷେଧ କରାଯାଇଥିବାରୁ ଲୋକଙ୍କ ମାନରେ ନିରାଶା ଭାବ ପରିଲକ୍ଷିତ ହୋଇଥିଲା। ହେଲେ ଚଳିତ ବର୍ଷ ଚିତାକର୍ଷକ ଆତସବାଜି ପ୍ରଦର୍ଶନ ହୋଇଥିଲା।

ରବିବାର ମେଳଣ ପର୍ବରେ ପଞ୍ଚୁଦୋଳ କମିଟି ତରଫରୁ ପଟୁଆର ପାଇଁ ବାଲିପଦର ଲୋକନାଥ ଦେବ ପ୍ରଥମ ଓ ଗାଲୁଆ ଗୁପ୍ତେଶ୍ୱର ଦେବଙ୍କୁ ଦ୍ୱିତୀୟ,ଭେଟେଶ୍ୱର ଭେଟିନାଥ ଦେବଙ୍କୁ ତୃତୀୟ ପୁରସ୍କାର ଦେବାକୁ ଚୟନ କରି କମିଟି ସଭାପତି ତହସିଲଦାର ଟି.ପଦ୍ମନାଭ ଡୋରା, ଉପସଭାପତି ଅମର କାଣ୍ଡି ଓ ସମ୍ପାଦକ ମାଧବ ଚନ୍ଦ୍ର ବାରିକି ପୁରସ୍କାର ବିତରଣ କରିଥିଲେ।

ରବିବାର ଦିନତମାମ ହଜାର ହଜାର ଲୋକଙ୍କ ମେଳଣ ପଡିଆକୁ ଯିବା ଆସିବା ଲାଗି ରହିଥିଲା। ଶ୍ରଦ୍ଧାଳୁମାନେ ପଞ୍ଚୁଦୋଳ ପଡିଆରେ ପହଞ୍ଚି ଦେବାଦେବୀଙ୍କ ଆଶୀର୍ବାଦ ଲାଭ କରି ବିଭିନ୍ନ ପ୍ରକାର ଘର ସରଞ୍ଜାମ, ଖଟ ପଲଙ୍କ ସହ ପିଲାଙ୍କ ପାଇଁ ଖେଳନା କିଣାବିକା କରି ସୁସ୍ୱାଦୁ ଖାଦ୍ୟର ମଜା ନେଇଥିଲେ। ଚଳିତ ବର୍ଷ ଯାତ୍ରାରେ ପ୍ରାୟ ଲକ୍ଷାଧିକ ଭକ୍ତଙ୍କ ସମାଗମ ହୋଇଥିଲା। ପିଲାମାନେ ବିଭିନ୍ନ ପ୍ରକାର ଦୋଳିର ମଜା ଉଠାଉଥିବା ନଜରକୁ ଆସିଥିଲା। ମଥୁରା କେକ ଖାଇବା ପାଇଁ ଦୋକାନ ଆଗରେ ଭିଡ଼ ପରିଲକ୍ଷିତ ହୋଇଥିଲା।

ଅପରାହ୍ନ ପାଞ୍ଚ ଘଟିକା ଗୋଧୂଳି ଲଗ୍ନରେ ସବୁ ଦେବଦେବୀ ଯଂଜ୍ଞ ମଣ୍ଡପର ଚତୁଃପାର୍ଶ୍ଵରେ ପହଂଚିବା ପରେ ଦେବୀ ଭଗବତୀ ଓ ଚନ୍ଦ୍ରଶେଖରଙ୍କର ମିଳନ ହୋଇଥିଲା। ପରେ ପରେ ସମସ୍ତ ଦେବାଦେବୀ ମେଳଣ ପର୍ବରେ ସାମିଲ ହୋଇ ଯଂଜ୍ଞ ମଣ୍ଡପକୁ ସାତଥର ପରିକ୍ରମା କରିଥିଲେ l ମା’ ଭଗବତୀ ପ୍ରଥମେ ମେଳଣ ପଡିଆରୁ ପ୍ରତ୍ୟାବର୍ତନ କଲାପରେ ଅନ୍ୟ ଠାକୁର ମାନେ ମେଳଣ ପଡିଆରୁ ସ୍ଵଗ୍ରାମକୁ ଗମନ କରିଥିଲେ।

ବିଭିନ୍ନ ଅନୁଷ୍ଠାନ ପକ୍ଷରୁ ଲୋକମାନଙ୍କ ପାଇଁ ପାନୀୟ ଜଳ ବିତରଣ କେନ୍ଦ୍ର ଖୋଲାଯାଇ ଜଳ ପ୍ରଦାନ କରାଯାଇଥିଲା l ବହୁ ସଂଖ୍ୟକ ଲୋକଙ୍କ ସମାଗମକୁ ଦେଖି ପୋଲିସ ପ୍ରଶାସନ ତରଫରୁ ବାଲୁଗାଁ ଏସ୍ଡ଼ିପିଓ ସୁଧାଂଶୁ ଶେଖର ମିଶ୍ର, ବାଣପୁର ଆଇଆଇସି ରମେଶ କୁମାର ଦେବତା, ବାଲୁଗାଁ ଆଇଆଇସି ଜୟପ୍ରକାଶ ପରିଡ଼ା, ନାଚୁଣୀ ଆଇଆଇସି ଚନ୍ଦ୍ରଶେଖର ଜେନା, ଟାଙ୍ଗୀ ଆଇଆଇସି ସୁଶାନ୍ତ କୁମାର ବେହରା, ନିରାକାରପୁର ଆଇଆଇସି ବିଶ୍ୱଜିତ ରାଉତରାୟ ଆଦି ବ୍ୟାପକ ସୁରକ୍ଷା ବ୍ୟବସ୍ଥା ଗ୍ରହଣ କରିଥିଲେ। ପଞ୍ଚୁଦୋଳ କମିଟିମାନଙ୍କ ଦ୍ୱାରା ଦୀର୍ଘଦିନ ଧରି ଅକ୍ଲାନ୍ତ ପରିଶ୍ରମ ଫଳରେ ଚଳିତ ବର୍ଷ ସୁଚାରୁ ରୂପେ ମେଳଣ ପର୍ବ ସମାପନ ହୋଇଛି।

Categories
ଆଞ୍ଚଳିକ

ବାଣପୁରରେ ପଞ୍ଚୁଦୋଳ କମିଟି ତରଫରୁ ପ୍ରସ୍ତୁତି ବୈଠକ

ସୀତାରାମ ଅଗ୍ରଓ୍ବାଲ
ବାଣପୁର: ବାଣପୁରର ପଞ୍ଚଦୋଳ କମିଟି ପକ୍ଷରୁ ଏକ ପ୍ରସ୍ତୁତି ବୈଠକ ଅନୁଷ୍ଠିତ ହୋଇଯାଇଛି। ଐତିହାସିକ ପଲଟଣ ପଡିଆର ଛାୟା ମଣ୍ଡପ ଠାରେ ଏହି ପ୍ରସ୍ତୁତି ବୈଠକ ଅନୁଷ୍ଠିତ ହୋଇଥିଲା। ବାଣପୁର ତହସିଲଦାର ମନ୍ମଥ ବେହେରା ଏହି ବୈଠକର ସଭାପତିତ୍ବ କରିଥିଲେ। କମିଟିର ଉପସଭାପତି ତଥା ଗୋଦାବରୀଶ ମହାବିଦ୍ୟାଳୟର ପୂର୍ବତନ ଅଧ୍ୟକ୍ଷ ନଳିନୀ କାନ୍ତ ପଟ୍ଟନାୟକ, ସମ୍ପାଦକ ମାଧବଚନ୍ଦ୍ର ବାରିକୀ, କୋଷାଧ୍ୟକ୍ଷ ନବ କିଶୋର ପ୍ରଧାନ, ବରିଷ୍ଠ ସଭ୍ୟ କେଦାର ନନ୍ଦ, ପ୍ରଶାନ୍ତ କୁମାର କାଣ୍ଡି, ବୀରଭଦ୍ର କାଣ୍ଡି, ମୁକୁନ୍ଦ ମହାନ୍ତି, ମୋଇନ୍‌ ଉଲ୍‌ ହକ୍‌, ଯୁବ ସାମ୍ବାଦିକ ଲକ୍ଷ୍ମୀଧର ମହାପାତ୍ର, ଅବସରପ୍ରାପ୍ତ ଶିକ୍ଷକ ବାଳକୃଷ୍ଣ ଦାସ, ରମେଶ ବେହେରା ଏବଂ ବିଭୂତି ନନ୍ଦ ପ୍ରମୁଖ ଏହି ବୈଠକର ଆଲୋଚନାଚକ୍ରରେ ଅଂଶଗ୍ରହଣ କରିଥିଲେ। ଏତଦ୍‌ ବ୍ୟତୀତ ଊମାମହେଶ୍ବର ଆସୋସିଏସନ୍‌ର ମ୍ୟାନେଜିଂ କମିଟି ସମେତ ସମସ୍ତ ମନ୍ଦିରର କାର୍ଯ୍ୟକର୍ତ୍ତା ଉପସ୍ଥିତ ରହିଥିଲେ।

ଏହି ବୈଠକରେ ସୂଚାରୂ ରୂପରେ ମେଳଣ ପରିଚାଳନା ଉପରେ ଆଲୋଚନା କରାଯାଇଥିଲା। ନୂତନ ଭାବରେ ନିର୍ମିତ ମଣ୍ଡପର ବୈଦିକ ରୀତିନୀତି ଅନୁସାରେ ପ୍ରତିଷ୍ଠା ସମ୍ପର୍କରେ ଆଲୋଚନା ହୋଇଥିଲା। କୋଷାଧ୍ୟକ୍ଷ ନବ କିଶୋର ପ୍ରଧାନ ପୂର୍ବବର୍ଷର ହିସାବ ପ୍ରଦାନ କରିଥିଲେ। ଆଗାମୀ ଦିନର ଏକ ନୂତନ ପରିଚାଳନା କମିଟି ଦ୍ବାରା ଆଉ ଏକ ବୈଠକର ଆୟୋଜନ ସମ୍ପର୍କରେ ଆଲୋଚନା କରାଯାଇଥିଲା।