ନୂଆଦିଲ୍ଲୀ: ଦିଲ୍ଲୀ ମୁଖ୍ୟମନ୍ତ୍ରୀ ଭାବେ ରେଖା ଗୁପ୍ତାଙ୍କ ସହ ୬ ଜଣ ବିଧାୟକ ଆଜି ମନ୍ତ୍ରୀ ଭାବରେ ଶପଥ ଗ୍ରହଣ କରିବେ। ଏଥିମଧ୍ୟରେ ପ୍ରବେଶ ବର୍ମା, ମଞ୍ଜିନ୍ଦର ସିଂ ସିର୍ସା, ରବିନ୍ଦ୍ର ଇନ୍ଦ୍ରରାଜ, କପିଲ ମିଶ୍ର, ଆଶିଷ ସୁଦ ଏବଂ ପଙ୍କଜ ସିଂଙ୍କ ନାମ ରହିଛି। ନୂଆଦିଲ୍ଲୀ ଆସନରୁ ପ୍ରବେଶ ବର୍ମା ଅରବିନ୍ଦ କେଜ୍ରିୱାଲଙ୍କୁ ପରାସ୍ତ କରିଛନ୍ତି। କପିଲ ମିଶ୍ର କରାୱଲ ନଗରରୁ ବିଧାୟକ ହୋଇଛନ୍ତି। ମଞ୍ଜନ୍ଦର ସିଂ ସିର୍ସା ରାଜୌରୀ ଗାର୍ଡନର ବିଧାୟକ ଅଟନ୍ତି। ଆଶିଷ ସୁଦ ଜନକପୁରୀର ବିଧାୟକ। ପଙ୍କଜ ସିଂ ବିକାଶପୁରର ବିଧାୟକ। ରବୀନ୍ଦ୍ର ଇନ୍ଦ୍ରରାଜ ବୱାନାରୁ ବିଧାୟକ ଭାବରେ ନିର୍ବାଚିତ ହୋଇଛନ୍ତି।
ପ୍ରବେଶ ବର୍ମା ଏକ ଜାଟ ଚେହେରା। ସିର୍ସା ବିଜେପିର ଏକ ବଡ ଶିଖ ଚେହେରା ଭାବରେ ଜଣାଶୁଣା। ରବିନ୍ଦ୍ର ଇନ୍ଦ୍ରରାଜ ହେଉଛନ୍ତି ବିଜେପିର ଦଲିତ ଚେହେରା। କପିଲ ମିଶ୍ର ଜଣେ ବ୍ରାହ୍ମଣ ଚେହେରା ଏବଂ ଆମ୍ ଆଦମୀ ପାର୍ଟିରୁ ବିଜେପିକୁ ଆସିଥିଲେ। ଆଶିଷ ସୁଦ ଜଣେ ଦଳର ବରିଷ୍ଠ ନେତା ତଥା ପଞ୍ଜାବୀ ଚେହେରା। ବର୍ତ୍ତମାନ ସେ ଗୋଆର ପ୍ରଭାରୀ ଅଛନ୍ତି ଏବଂ ଜାମ୍ମୁ କାଶ୍ମୀରର ସହ-ପ୍ରଭାରୀ ଅଛନ୍ତି। ପଙ୍କଜ ସିଂ ଜଣେ ପୂର୍ବାଞ୍ଚଳ ଚେହେରା।
କୌତୂହଳର ବିଷୟ ହେଉଛି, ପ୍ରବେଶ ବର୍ମା, ସିର୍ସା, ରବିନ୍ଦ୍ର ଇନ୍ଦ୍ରରାଜ ଏବଂ ଆଶିଷ ସୁଦଙ୍କ ନାମ ମୁଖ୍ୟମନ୍ତ୍ରୀ ପାଇଁ ଦୌଡରେ ନିଆଯାଉଥିଲା। କିନ୍ତୁ ଶେଷରେ ଶାଲିମାର ବାଗ ବିଧାୟକ ରେଖା ଗୁପ୍ତାଙ୍କ ନାମରେ ସହମତି ପ୍ରକାଶ ପାଇଥିଲା।
ବୁଧବାର ବିଜେପିର ବିଧାୟକ ପାର୍ଟି ବୈଠକ ଅନୁଷ୍ଠିତ ହୋଇଥିଲା। ପ୍ରବେଶ ବର୍ମା ମଞ୍ଚରେ ପହଞ୍ଚିଥିଲେ ଏବଂ ସେ ହିଁ ରେଖା ଗୁପ୍ତାଙ୍କ ନାମ ପ୍ରସ୍ତାବ ଦେଇଥିଲେ। ଏହା ପରେ ସେଠାରେ ଉପସ୍ଥିତ ଥିବା ସମସ୍ତ ବିଜେପି ବିଧାୟକ ଏଥିରେ ସହମତ ହୋଇଥିଲେ। ରେଖା ଗୁପ୍ତାଙ୍କୁ ଅଭିନନ୍ଦନ ପ୍ରକ୍ରିୟା ଆରମ୍ଭ ହୋଇଥିଲା।
ରାମଲିଲା ମଇଦାନରେ ଶପଥ ଗ୍ରହଣ:
ବିଜେପି ବିଧାୟକ ଦଳର ନେତା ଭାବରେ ନିର୍ବାଚିତ ହେବା ପରେ ରେଖା ଗୁପ୍ତା ଦଳର ବିଧାୟକଙ୍କ ସହ ଦିଲ୍ଲୀ ଏଲଜି ବିନୟ କୁମାର ସକ୍ସେନାଙ୍କୁ ଭେଟି ସରକାର ଗଠନ ପାଇଁ ଦାବି କରିଛନ୍ତି। ବିଧାୟକଙ୍କ ସମର୍ଥନ ପତ୍ର ଏଲଜିଙ୍କୁ ଦିଆଯାଇଥିଲା ଯାହା ପରେ ସେ ତାଙ୍କୁ ସରକାର ଗଠନ ପାଇଁ ନିମନ୍ତ୍ରଣ କରିଥିଲେ। ଆଜି ଦିଲ୍ଲୀର ରାମଲିଲା ମଇଦାନରେ ଏହି ଶପଥ ଗ୍ରହଣ ସମାରୋହ ଅନୁଷ୍ଠିତ ହେବ।
