ପୁରୀ: ପୁଣି ଖୋଲାଗଲା ଭିତର ରତ୍ନ ଭଣ୍ଡାର। ଗତଥର ଏହାକୁ ଖୋଲାଯାଇଥିଲେ ମଧ୍ୟ ଭିତରେ କଣ ଥିଲା ତାହା ଦେଖାଯାଇ ନ ଥିଲା। ହେଲେ ଆଜି ୧୧ ଜଣିଆ ଅଧିକୃତ ଟିମ୍ ଭିତର ରତ୍ନ ଭଣ୍ଡାରକୁ ଯାଇ ଆଲମାରା ଓ ସିନ୍ଧୁକ ଖୋଲିଥିଲେ। ତା ଭିତରେ କଣ ରହିଥିଲା ତାହା ତଦାରଖ କରିବା ପରେ ସେଗୁଡିକ ଅସ୍ଥାୟୀ ରତ୍ନ ଭଣ୍ଡାରକୁ ସ୍ଥାନାନ୍ତରତି କରାଇଛନ୍ତି।
ତଦାରଖ କମିଟର ଅଧ୍ୟକ୍ଷ ଜଷ୍ଟିସ ବିଶ୍ବନାଥ ରଥଙ୍କ କହିବା ଅନୁସାରେ ଭିତର ରତ୍ନଭଣ୍ଡାରକୁ ସକାଳେ ସମସ୍ତ ସଦସ୍ୟ ପ୍ରବେଶ କରିଥିଲେ। ପ୍ରଥମେ ଆଲମାରୀ ଓ ସିନ୍ଧୁକଗୁଡିକ ଦେଖିବା ପରେ ତାହା ଖୋଲାଯାଇଥିଲା। ଭିତରେ କଣ ରହିଛି ତାହା ଦେଖିବା ପରେ ସେଗୁଡିକର ସ୍ଥାନାନ୍ତରିତ ପକ୍ରିୟା ଆରମ୍ଭ କରାଯାଇଥିଲା। ଏହି ସ୍ଥାନାନ୍ତରିତ ପାଇଁ ପ୍ରାୟ ସାଢେ ସାତ ଘଣ୍ଟା ଲାଗିଗଲା ବୋଲି ସେ କହିଥିଲେ।
ତେବେ ରତ୍ନଭଣ୍ଡାରରୁ ଅଳଙ୍କାର ସ୍ଥାନାନ୍ତରିତ ପରେ କାଠ ସିନ୍ଧୁକ, ଆଲମାରୀ ଏବଂ ଲୁହା ସିନ୍ଧୁକଙ୍କୁ ସେ ଭିତରୁ ସ୍ଥାନାନ୍ତରିତ କରାଯାଇଥିଲା। ଏହାପରେ ଏଏସଆଇ ତାହାର ଯାଞ୍ଚ କରି ମରାମତି କରିବାକୁ ପଦକ୍ଷେପ ଗ୍ରହଣ କରିବେ ବୋଲି ଜଷ୍ଟିସ ରଥ କହିଥିଲେ। ତେବେ ଭିତରେ ଯେଉଁ ସାପ ରହିବା କଥା କୁହାଯାଉଥିଲା ତାହା ସଂପର୍ଣ୍ଣ ମିଛ। ଭିତରେ କୌଣସି ସାପ ନାହିଁ ବୋଲି ଅନ୍ୟତମ ସଦସ୍ୟ ଡାକ୍ତର ସିବିକେ ମହାନ୍ତି ମଧ୍ୟ କହିଛନ୍ତି।
ସେହିପରି ଭିତରେ ଆଉ ଗୁପ୍ତ ସୁଡଙ୍ଗ ରହିଛି କା ନାହିଁ ସେ ସଂପର୍କରେ କମିଟ ସଦସ୍ୟ କହିଛନ୍ତି ଯେ, ବର୍ତ୍ତମାନ ଖାଲି ଆଖିରେ ତାହା ଦେଖାଯାଇ ନାହିଁ। ତେଣୁ ଆମେ ଭାବୁଛୁ ଯେ ସେପରି କିଛି ଗୁପ୍ତ ସୁଡଙ୍ଗ ନାହିଁ। ତେବେ ଲେଜର ସ୍କାନିଂ କରିବା ପରେ ତାହା ସ୍ପଷ୍ଟ ହେବ ବୋଲି ସେ କହିଛନ୍ତି। ତେବେ ଏ ନେଇ ସରକାରଙ୍କ ଏସଓପିରେ କିଛି ଉଲ୍ଲେଖ ନାହିଁ। ସେଥିପାଇଁ ସେ ସଂପର୍କରେ ସରକାରଙ୍କୁ ଅବଗତ କରାଯିବ। ଲେଜର ସ୍କାନିଂ ପାଇଁ ଅନୁମତି ମିଳିଲେ ତାହା ସ୍ପଷ୍ଟ ହେବ ବୋଲି କମିଟ ସଦସ୍ୟ କହିଥିଲେ।
ତେବେ ଭିତର ରତ୍ନ ଭଣ୍ଡାରରେ କଣ କଣ ଜିନିଷ ବା ଅଳଙ୍କାର ରହିଛି ସେ ସଂପର୍କରେ କମିଟ ସଦସ୍ୟମାନେ ମୁହଁ ଖୋଲି ନ ଥିଲେ। ସେମାନେ କହିଥିଲେ ଯେ, କାହା ଘରେ କଣ ସୁନା ଅଳଙ୍କାର ରହିଛି ତାହା ବାହାର ଲୋକଙ୍କୁ ଜଣାନ୍ତି ନାହିଁ। ଠିକ ସେହିପରି ଠାକୁରଙ୍କ କଣ ସୁନା ଜିନିଷ ରହିଛି ତାହା ଅନ୍ୟମାନେ ଜାଣିବା ଆବଶ୍ୟକ ନାହିଁ। ଆମେ ସେ ସଂପର୍କରେ ବାହାରେ କିଛି ପ୍ରକାଶ କରିବୁ ନାହିଁ ବୋଲି ଠାକୁରଙ୍କ ପାଖରେ ଶପଥ କରିଛୁ ବୋଲି ଡାକ୍ତର ସିବିକେ ମହାନ୍ତି କହିଥିଲେ।
