ନୂଆଦିଲ୍ଲୀ : କ୍ରିକେଟର ସର୍ବପୁରାତନ ଫର୍ମାଟ୍ ଟେଷ୍ଟ କ୍ରିକେଟକୁ ଆଜି 143 ବର୍ଷ ପୁରିଛି । 1877 ମସିହାର ଆଜିର ଦିନରେ ବିଶ୍ବର ପ୍ରଥମ ଟେଷ୍ଟ ମ୍ୟାଚ୍ ଅଷ୍ଟ୍ରେଲିଆ ଏବଂ ଇଂଲଣ୍ଡ ମଧ୍ୟରେ ଖେଳାଯାଇଥିଲା । ଏହି ମ୍ୟାଚ୍ ପରଠାରୁ ଟେଷ୍ଟ କ୍ରିକେଟରେ ଅନେକ ପରିବର୍ତ୍ତନ ଆସିଛି । ଅନେକ ନୂତନ ନିୟମ ସହିତ ବର୍ତ୍ତମାନ ଟେଷ୍ଟ ଚାମ୍ପିୟନ୍ସିପ୍ ମଧ୍ୟ ଆୟୋଜିତ ହେଉଛି । ବିଶ୍ବର ପ୍ରଥମ ଅଫିସିଆଲ୍ ଟେଷ୍ଟମ୍ୟାଚ୍ରେ ଇଂଲଣ୍ଡ ଦଳର ନେତୃତ୍ବ ନେଇଥିଲେ ଜେମ୍ସ ଲିଲିହ୍ବାଇଟ୍ । ବିଶ୍ବର ଏହି ପ୍ରଥମ ଟେଷ୍ଟ ମ୍ୟାଚ୍ରେ ଇଂଲଣ୍ଡ 45 ରନ୍ରେ ପରାଜିତ ହୋଇଥିଲା ।
ଐତିହାସିକ ଇଡେନ୍ ଟେଷ୍ଟ : ଏହି ଦିନରେ ଆଉ ଏକ ଐତିହାସିକ ଟେଷ୍ଟ ମ୍ୟାଚ୍ ଖେଳାଯାଇଥିଲା । 2001 ମସିହାରେ ଭାରତ ଏବଂ ଅଷ୍ଟ୍ରେଲିଆ ମଧ୍ୟରେ ଏହି ଐତିହାସିକ ମ୍ୟାଚ୍ ଖେଳାଯାଇଥିଲା । ପ୍ରଥମ ଇନିଂସରେ ପଛୁଆ ରହି ବିଜୟୀ ହେବାର ଇତିହାସ ରଚିଥିଲା ଭାରତ । ଅଷ୍ଟ୍ରେଲିଆ ପ୍ରଥମ ଇନିଂସରେ 445 ରନ୍ ସଂଗ୍ରହ କରିଥିବା ବେଳେ ଭାରତ ମାତ୍ର 171 ରନ୍ରେ ଅଲ୍ଆଉଟ୍ ହୋଇଯାଇଥିଲା । ଦ୍ବିତୀୟ ଇନିଂସରେ ଭାରତର ସ୍କୋର 4/232 ରହିଥିବା ବେଳେ ଭିଭିଏସ୍ ଲକ୍ଷ୍ମଣ ଏବଂ ରାହୁଲ ଦ୍ରାବିଡଙ୍କ ମଧ୍ୟରେ ପଞ୍ଚମ ଓ୍ବିକେଟ୍ରେ 376 ରନ୍ର ଭାଗିଦାରୀ ହୋଇଥିଲା । ଲକ୍ଷ୍ମଣ 281 ଏବଂ ଦ୍ରାବିଡ୍ 172 ରନ୍ର ଐତିହାସିକ ଇନିଂସ ଖେଳିଥିଲେ । ପଞ୍ଚମ ଦିବସରେ ଅଷ୍ଟ୍ରେଲିଆ ସମ୍ମୁଖରେ 384 ରନ୍ର ବିଜୟ ଲକ୍ଷ୍ୟ ରହିଥିବା ବେଳେ ହରଭଜନ୍ ସିଂ ହ୍ୟାଟ୍ରିକ୍ ସମେତ 6 ଓ୍ବିକେଟ୍ ଅକ୍ତିଆର କରିବାରୁ ଭାରତ ଐତିହାସିକ ବିଜୟ ହାସଲ କରିଥିଲା । (ଏଜେନ୍ସି)
