ବାଲୁଗାଁ: ଜାତୀୟ ଅଗ୍ନି ନିରାପତ୍ତା ସପ୍ତାହ ଅବସରରେ ବାଲୁଗାଁ ମହାବିଦ୍ୟାଳୟ ପକ୍ଷରୁ ସ୍ଥାନୀୟ ଅଗ୍ନିଶମ ଓ ଆପାତକାଳୀନ ସେବାର ସହଯୋଗରେ ମହାବିଦ୍ୟାଳୟ ଛାତ୍ରଛାତ୍ରୀ ଓ କର୍ମଚାରୀମାନଙ୍କ ନିମନ୍ତେ ଏକ ସଚେତନତା କାର୍ଯ୍ୟକ୍ରମ ମହାବିଦ୍ୟାଳୟ ପରିସରରେ ଅନୁଷ୍ଠିତ ହୋଇଯାଇଛି। ଅଧ୍ୟକ୍ଷ ଡକ୍ଟର ଲକ୍ଷ୍ମୀଧର ସୁବୁଦ୍ଧିଙ୍କ ତତ୍ତ୍ୱାବଧାନରେ ଅନୁଷ୍ଠିତ ଉକ୍ତ କାର୍ଯ୍ୟକ୍ରମ ରେ ବାଲୁଗାଁ ଅଗ୍ନିଶମ କେନ୍ଦ୍ର ଅଧିକାରୀ ପ୍ରଶାନ୍ତ କୁମାର ମହାପାତ୍ର ଯୋଗଦେଇ ଜାତୀୟ ସେବା ଯୋଜନା, ଜାତୀୟ ସମର ଶିକ୍ଷାର୍ଥୀ ବାହିନୀ, ଯୁବ ରେଡ଼କ୍ରସ ଓ ରେଞ୍ଜରସର ଛାତ୍ର ଛାତ୍ରୀ ମାନଙ୍କୁ ଘରୋଇ ପରିବେଶରେ ଗ୍ୟାସ ସିଲିଣ୍ଡରର ନିରାପତ୍ତା, ଉପଯୁକ୍ତ ବ୍ୟବହାର, ଜରୁରୀ କାଳୀନ ପରିସ୍ଥିତିରେ ଦାୟିତ୍ତ୍ଵବୋଧତା, କାର୍ଯ୍ୟାଳୟ ଓ ଅନ୍ୟାନ୍ୟ ପରିସ୍ଥିତିରେ ଅଗ୍ନି ନିରାପତ୍ତା ଓ ଜରୁରୀକାଳୀନ ସେବା ସମ୍ପର୍କରେ ପ୍ରଶିକ୍ଷଣ ପ୍ରଦାନ କରିଥିଲେ। ଏଥିରେ ଅଗ୍ନିଯୋଦ୍ଧା ଅମୁଲ୍ୟ ପ୍ରଧାନ, ନିର୍ମଳ ଭୁଜବଳ, ବିଜୟ କୁମାର ଡାକୁଆ, ଧିରେନ ଜେନା ପ୍ରମୁଖ ପ୍ରଶିକ୍ଷଣରେ ସହଯୋଗ କରିଥିଲେ।
କାର୍ଯ୍ୟକ୍ରମ ପରିଚାଳନା କରିଥିଲେ ପ୍ରଶାସନିକ ଅଧିକାରୀ ଡକ୍ଟର କୈଳାସ ଚନ୍ଦ୍ର ମହାରଣା, ଜାତୀୟ ସେବା ଯୋଜନା ଅଧିକାରୀ ଅଧ୍ୟାପିକା ରୀନା ରାଉତ, ଯୁବ ରେଡକ୍ରସ ଅଧିକାରୀ ଡକ୍ଟର ମନସ୍ବିନୀ ପଟ୍ଟନାୟକ, ରେଞ୍ଜର୍ସ ଅଧିକାରୀ ସ୍ନିଗ୍ଧା ରାଣୀ ମୁଦୁଲି।