ଭୁବନେଶ୍ୱର: ଓଡ଼ିଶାର ପ୍ରଖ୍ୟାତନାମା ନାଟ୍ୟ ନିର୍ଦ୍ଦେଶକ ତଥା ଓଡ଼ିଶା ନାଟ୍ୟସଂଘର ସମ୍ପାଦକ ଲାଲା ବୀରେନ ପ୍ରସାଦ ରାୟ ଗତ ଦୁଇଦିନ ଧରି ମସ୍ତିଷ୍କ ରକ୍ତପ୍ରବାହ ଜନିତ (ବ୍ରେନ୍ ଷ୍ଟ୍ରୋକ୍) ରୋଗରେ ପୀଡ଼ିତ ହୋଇ, ଲୁଇସରୋଡ଼, ଭୁବନେଶ୍ୱରସ୍ଥିତ ଶ୍ରୀ ହସ୍ପିଟାଲରେ ଚିକିତ୍ସିତ ହେଉଛନ୍ତି। ତାଙ୍କର ଏହି ଅସୁସ୍ଥତାର ଖବର ପାଇ ଓଡ଼ିଶା ସଙ୍ଗୀତ ନାଟକ ଏକାଡ଼େମୀର ସଚିବ ପ୍ରବୋଧ ରଥ, ଓଡ଼ିଶା ନାଟ୍ୟସଂଘର ବରିଷ୍ଠ ଉପଦେଷ୍ଟା ଧୀରେନ୍ଦ୍ରନାଥ ମଲ୍ଲିକ ଓ ଓଡ଼ିଶା ନାଟ୍ୟସଂଘର ସଭାପତି ହରେନ୍ ସାହୁ ସରକାରଙ୍କ ପାଖରେ ଶ୍ରୀ ରାୟଙ୍କ ଏହି ଦୁଃସମୟରେ ଆର୍ଥିକ ସହାୟତା ଦେବା ପାଇଁ ଆବେଦନ କରିଥିଲେ। ବଡ଼ ଖୁସିର କଥା ଯେ, ସରକାର ଗୁରୁତ୍ୱର ସହିତ ଏହାକୁ ବିଚାରକୁ ନେଇ ଶ୍ରୀ ରାୟଙ୍କ ଚିକିତ୍ସା ଖର୍ଚ୍ଚ ପାଇଁ ୧ଲକ୍ଷ ଟଙ୍କାର ଅନୁଦାନ ପ୍ରଦାନ କରିଛନ୍ତି।
ଏଠାରେ ସୂଚନାଯୋଗ୍ୟ ଯେ, ଆଜି ସନ୍ଧ୍ୟାରେ ବ୍ୟକ୍ତିଗତ ଭାବେ ଓଡ଼ିଶା ସଙ୍ଗୀତ ନାଟକ ଏକାଡ଼େମୀର ସଚିବ ପ୍ରବୋଧ ରଥ, ନାଟ୍ୟସଂଘର ସଭାପତି ହରେନ୍ ସାହୁ ଓ ଓଡ଼ିଶା ନାଟ୍ୟସଂଘର ଯୁଗ୍ମ ସମ୍ପାଦକ ଶୁଭକାନ୍ତ ପାଢୀ ଏହି ଅନୁଦାନ ରାଶିକୁ ନେଇ ଶ୍ରୀ ହସ୍ପିଟାଲ ଠାରେ ଲାଲା ବୀରେନ୍ ରାୟଙ୍କ ଧର୍ମପତ୍ନୀଙ୍କୁ ପ୍ରଦାନ କରି ଆସିଛନ୍ତି।
ଏଥିପାଇଁ ଓଡ଼ିଶା ନାଟ୍ୟସଂଘ ତରଫରୁ ଓଡ଼ିଆ ଭାଷା, ସାହିତ୍ୟ ଓ ସଂସ୍କୃତି ବିଭାଗ ମନ୍ତ୍ରୀ ଜ୍ୟୋତିପ୍ରକାଶ ପାଣିଗ୍ରାହୀ, ଓଡ଼ିଆ ଭାଷା, ସାହିତ୍ୟ ଓ ସଂସ୍କୃତି ବିଭାଗର ପ୍ରମୁଖ ଶାସନ ସଚିବ ବିଷ୍ଣୁପଦ ସେଠୀ, ଆଇ.ଏ.ଏସ୍. ଓ ସଂସ୍କୃତି ବିଭାଗର ନିର୍ଦ୍ଦେଶକ ରଞ୍ଜନ କୁମାର ଦାସଙ୍କୁ ସଭାପତି ଶ୍ରୀ ହରେନ୍ ସାହୁ ଗଭୀର କୃତଜ୍ଞତା ଜ୍ଞାପନ କରିଛନ୍ତି।