Tag: ଅନୁରାଗ ସିଂହ ଠାକୁର

ନୂଆଦିଲ୍ଲୀ: ଭାରତ ସରକାରଙ୍କ କେନ୍ଦ୍ର ଯୁବ ବ୍ୟାପାର ଓ କ୍ରୀଡ଼ା ଏବଂ ସୂଚନା ଓ ପ୍ରସାରଣ ବିଭାଗ ମନ୍ତ୍ରୀ ଅନୁରାଗ ସିଂହ ଠାକୁର ନୂଆଦିଲ୍ଲୀର କେଡି ଯାଦବ ଇଣ୍ଡୋର ହଲରେ ଏକ ଭବ୍ୟ ସମାରୋହରେ ଖେଲୋ ଇଣ୍ଡିଆ ପାରା ଗେମ୍ସ ୨୦୨୩କୁ ଆନୁଷ୍ଠାନିକ ଭାବେ ଉଦ୍‌ଘାଟନ କରିଛନ୍ତି।

ଡିସେମ୍ବର ୧୦ରୁ ୧୭ ତାରିଖ ମଧ୍ୟରେ ଦିଲ୍ଲୀର ତିନୋଟି କ୍ରୀଡ଼ାସ୍ଥଳରେ ଆୟୋଜିତ ହେଉଥିବା ଏହି କ୍ରୀଡ଼ାରେ ୩୨ଟି ରାଜ୍ୟ ଓ କେନ୍ଦ୍ରଶାସିତ ଅଞ୍ଚଳ ଏବଂ ସର୍ଭିସେସ୍‌ କ୍ରୀଡ଼ା ବୋର୍ଡର ୧୪ଶହ ୫୦ରୁ ଅଧିକ ପ୍ରତିଯୋଗୀ ଭାଗ ନେଉଛନ୍ତି।

ଏହି ଚିତ୍ତାକର୍ଷକ କାର୍ଯ୍ୟକ୍ରମରେ ହିମାଚଳ ପ୍ରଦେଶ ପୋଲିସ ବ୍ୟାଣ୍ଡ୍‌ ପକ୍ଷରୁ ଚମତ୍କାର ପରିବେଷଣ କରାଯାଇଥିଲା, ଯାହାର ମେଲୋଡି ଦେଶଭକ୍ତି ଭାବନାକୁ ଜାଗ୍ରତ କରିଥିଲା। ସାଇ ଅଧିକାରୀଙ୍କ ଦ୍ୱାରା କଲବେଲିଆ ନୃତ୍ୟ ପରିବେଷଣ କରାଯିବା ପରେ ‘ୱି ଆର୍ ୱାନ୍’ ଗ୍ରୁପ୍ ର ନୃତ୍ୟ କଳାକାରମାନେ ପାରା ଡ୍ୟାନ୍ସ ପରିବେଷଣ କରିଥିଲେ। ଉଦଘାଟନୀ ସମାରୋହରେ ଗେମ୍ସ ସଙ୍ଗୀତ ବାଜିଥିବା ବେଳେ ‘ପାରା ଗେମ୍ସର ବିକାଶ’ ଶୀର୍ଷକରେ ଏଲଇଡି ନୃତ୍ୟ ପରିବେଷଣ ଦର୍ଶକଙ୍କୁ ଆକର୍ଷିତ କରିଥିଲା।

ପାରା କ୍ରୀଡ଼ାର କିମ୍ବଦନ୍ତୀ ଦୀପା ମଲ୍ଲିକ, ଭାବିନା ପଟେଲ, ସୁମିତ ଆଣ୍ଟିଲଙ୍କ ସମେତ ଅନୁରାଗ ଠାକୁର ଖେଲୋ ଇଣ୍ଡିଆ ପାରା ଗେମ୍ସକୁ ବିଧିବଦ୍ଧ ଭାବେ ଘୋଷଣା କରିବା ପୂର୍ବରୁ ମଶାଲ ରିଲେରେ ଅଂଶଗ୍ରହଣ କରିଥିଲେ।

ଶ୍ରୀ ଅନୁରାଗ ଠାକୁର କହିଛନ୍ତି, ଏହା ଭାରତୀୟ କ୍ରୀଡ଼ା ପାଇଁ ଏକ ଐତିହାସିକ ମୁହୂର୍ତ୍ତ, କାରଣ ପ୍ରଥମ ଖେଲୋ ଇଣ୍ଡିଆ ପାରା ଗେମ୍ସ ଜାତୀୟ ରାଜଧାନୀ ଦିଲ୍ଲୀରେ ଆୟୋଜିତ ହେଉଛି, ଯାହା ଦେଶର କ୍ରୀଡ଼ା ପରିବେଶ ବ୍ୟବସ୍ଥାରେ ଏକ ନୂତନ ବିପ୍ଳବର ବାଟ ଖୋଲିଛି। ଦକ୍ଷତା ନିର୍ବିଶେଷରେ ସମସ୍ତ ଆଥଲେଟ୍‌ମାନଙ୍କୁ ସମାନ ସୁଯୋଗ ପ୍ରଦାନ ଦିଗରେ ଏହି ପଦକ୍ଷେପ ଏକ ଗୁରୁତ୍ୱପୂର୍ଣ୍ଣ ପଦକ୍ଷେପ। ଖେଲୋ ଇଣ୍ଡିଆ ପାରା ଗେମ୍ସ ନୂଆ ଭାରତର ପ୍ରତୀକ ବୋଲି ସେ କହିଛନ୍ତି ।

ଅଂଶଗ୍ରହଣକାରୀମାନଙ୍କୁ ଉତ୍ସାହିତ କରି ଶ୍ରୀ ଅନୁରାଗ ଠାକୁର କହିଛନ୍ତି, ଏଠାକୁ ଆସି ଅଂଶଗ୍ରହଣ କରିବା ପାଇଁ ଆପଣଙ୍କ ପ୍ରୟାସକୁ ଦେଖି ମୁଁ ବହୁତ ଗର୍ବ ଅନୁଭବ କରୁଛି। କ୍ରୀଡ଼ାବିତ୍‌ ଓ ଅଫିସିଆଲଙ୍କୁ ମିଶାଇ ୩ ହଜାରରରୁ ଅଧିକ ଲୋକ ଏଠାରେ ଉପସ୍ଥିତ ଅଛନ୍ତି ଏବଂ ମୋଟ ୨୭୬ଟି ସ୍ୱର୍ଣ୍ଣ ପଦକ ପାଇଁ ପ୍ରତିଦ୍ୱନ୍ଦ୍ୱିତା ହେଉଛି । ମୁଁ ପ୍ରତ୍ୟେକ କ୍ରୀଡ଼ାବିତଙ୍କୁ ଶୁଭେଚ୍ଛା ଜଣାଉଛି।

ଯୁବ ବ୍ୟାପାର ଏବଂ କ୍ରୀଡ଼ା ମନ୍ତ୍ରଣାଳୟର ପ୍ରୟାସକୁ ଅଭିନନ୍ଦନ ଜଣାଇ କେନ୍ଦ୍ର ଗୃହ ରାଷ୍ଟ୍ରମନ୍ତ୍ରୀ ତଥା କେନ୍ଦ୍ର ଯୁବ ବ୍ୟାପାର ଓ କ୍ରୀଡ଼ା ରାଷ୍ଟ୍ରମନ୍ତ୍ରୀ ଶ୍ରୀ ନିଶିଥ ପରମାଣିକ କହିଥିଲେ, “ଆମେ ମାନ୍ୟବର ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କ ନିକଟରେ କୃତଜ୍ଞ, ଯିଏକି ବିକଳାଙ୍ଗ ଶବ୍ଦ ବଦଳରେ ଦିବ୍ୟାଙ୍ଗ ଶବ୍ଦର ବ୍ୟବହାରକୁ କାର୍ଯ୍ୟକାରୀ କରିଥିଲେ।। ସେ ବିକଳାଙ୍ଗ ଶବ୍ଦ ବ୍ୟବହାର ନ କରି ସେମାନଙ୍କୁ ଭିନ୍ନକ୍ଷମ ବୋଲି କହିବାକୁ ଜିଦ୍ ଧରିଥିଲେ। ତାଙ୍କ ଦୂରଦୃଷ୍ଟି ସମ୍ପନ୍ନ ପ୍ରୟାସ ହିଁ ଲୋକଙ୍କୁ ସେମାନଙ୍କ ଚିନ୍ତାଧାରାରେ ପରିବର୍ତ୍ତନ ଆଣିବାକୁ ଉତ୍ସାହିତ କରୁଛି।

ଖେଲୋ ଇଣ୍ଡିଆ କାର୍ଯ୍ୟକ୍ରମ ଜରିଆରେ ଭାରତୀୟ କ୍ରୀଡ଼ାକୁ ନୂଆ ଉଚ୍ଚତାରେ ପହଞ୍ଚାଇବା ପାଇଁ ଅନୁରାଗ ଠାକୁର ଏବଂ କ୍ରୀଡ଼ା ମନ୍ତ୍ରଣାଳୟର ସମସ୍ତଙ୍କୁ ଶ୍ରୀ ପରମାଣିକ ଅଭିନନ୍ଦନ ଜଣାଥିଲେ। ସେ କହିଥିଲେ, ଏଥିରେ କୌଣସି ସନ୍ଦେହ ନାହିଁ ଯେ ୨୦୩୦ ସୁଦ୍ଧା ଏସୀୟ ପାରା ଗେମ୍ସରେ ଭାରତ ୨୦୦ରୁ ଅଧିକ ପଦକ ଜିତିପାରିବ।

ଖେଲୋ ଇଣ୍ଡିଆ ପାରା ଗେମ୍ସ ଆୟୋଜନ କରିବା ପଛରେ କେନ୍ଦ୍ର ସରକାରଙ୍କ ଲକ୍ଷ୍ୟ ହେଉଛି ସମସ୍ତ ପାରା ଆଥଲେଟଙ୍କୁ ସଶକ୍ତ କରିବା । ଭିନ୍ନକ୍ଷମଙ୍କ କଲ୍ୟାଣ ପାଇଁ ସରକାର ଅନେକ ଗୁରୁତ୍ୱପୂର୍ଣ୍ଣ ପ୍ରକଳ୍ପ ଆରମ୍ଭ କରିଛନ୍ତି।

ଇନ୍ଦିରା ଗାନ୍ଧୀ ଷ୍ଟାଡିୟମ, ଜବାହର ଲାଲ ନେହେରୁ ଷ୍ଟାଡିୟମ ଏବଂ କର୍ଣ୍ଣି ସିଂ ସୁଟିଂ ରେଞ୍ଜ ଭଳି ତିନୋଟି ସ୍ଥାନରେ ପ୍ରଥମ ଖେଲୋ ଇଣ୍ଡିଆ ପାରା ଗେମ୍ସ ଆୟୋଜନ କରାଯାଉଛି। ୭ଟି ପାରା ସ୍ପୋର୍ଟସ ଯଥା- ଦୌଡ଼କୁଦ, ବନ୍ଧୁକଚାଳନ, ତୀରନ୍ଦାଜି, ଫୁଟବଲ, ବ୍ୟାଡମିଣ୍ଟନ, ଟେବୁଲ ଟେନିସ ଓ ଭାରୋତ୍ତୋଳନରେ ପ୍ରତିଯୋଗିତା ଅନୁଷ୍ଠିତ ହେବ । ଶୀତଲ ଦେବୀ, ଭାବିନା ପଟେଲ, ଅଶୋକ ଙ୍କ ଭଳି ଭାରତର କେତେକ ଶୀର୍ଷ ଅନ୍ତର୍ଜାତୀୟ ପାରା ତାରକା କ୍ରୀଡ଼ାବିତ୍‌ ଏଥିରେ ଅଂଶଗ୍ରହଣ କରିବେ।

ଖେଲୋ ଇଣ୍ଡିଆ ୟୁଥ୍ ଗେମ୍ସ ଓ ଖେଲୋ ଇଣ୍ଡିଆ ୟୁନିଭର୍ସିଟି ଗେମ୍ସର ବିପୁଳ ସଫଳତା ପରେ ଏବେ ଖେଲୋ ଇଣ୍ଡିଆ ପାରା ଗେମ୍ସ ଆୟୋଜନ କରାଯାଉଛି ଏବଂ ପ୍ରଥମ ଥର ପାଇଁ ଖେଲୋ ଇଣ୍ଡିଆ ପାରା ଗେମ୍ସ ଆୟୋଜନକୁ ନେଇ ରାଜଧାନୀରେ ଉତ୍ସବର ବାତାବରଣ ସୃଷ୍ଟି ହୋଇଛି। ସପ୍ତାହବ୍ୟାପୀ ଚାଲିବାକୁ ଥିବା ଏହି କ୍ରୀଡ଼ା ମହୋତ୍ସବ ସମାବେଶୀତାର ପ୍ରତୀକ ହେବା ସହ ମାନବୀୟ ମର୍ଯ୍ୟାଦାକୁ ମଧ୍ୟ ପାଳନ କରିବ।

ଦିଲ୍ଲୀ: କେନ୍ଦ୍ର ଯୁବ ବ୍ୟାପାର ଓ କ୍ରୀଡ଼ା ମନ୍ତ୍ରୀ ଅନୁରାଗ ସିଂହ ଠାକୁର ଆଜି ନୂଆଦିଲ୍ଲୀରେ ଖେଲୋ ଇଣ୍ଡିଆ ପାରା ଗେମ୍ସ ୨୦୨୩କୁ ଉଦ୍‌ଘାଟନ କରିବେ।

ଡିସେମ୍ବର ୧୦ ରୁ ୧୭ ତାରିଖ ମଧ୍ୟରେ ନୂଆଦିଲ୍ଲୀର ତିନୋଟି ସ୍ଥାନରେ ହେବାକୁ ଥିବା ଏହି କ୍ରୀଡ଼ାରେ ୩୨ଟି ରାଜ୍ୟ ଓ କେନ୍ଦ୍ରଶାସିତ ଅଞ୍ଚଳ ଏବଂ ସର୍ଭିସେସ୍ ସ୍ପୋର୍ଟ୍ସ ବୋର୍ଡର ୧୪୦୦ରୁ ଅଧିକ ଖେଳାଳି ଅଂଶଗ୍ରହଣ କରୁଛନ୍ତି।

ଉଦ୍‌ଘାଟନୀ ଉତ୍ସବ ଇନ୍ଦିରା ଗାନ୍ଧୀ ସ୍ପୋର୍ଟସ କମ୍ପେ୍ଲକ୍ସସ୍ଥିତ କେଡି ଯାଦବ ଇଣ୍ଡୋର ହଲ୍‌ରେ ଅନୁଷ୍ଠିତ ହେବ। ଏହି ସମାରୋହରେ ଦିଲ୍ଲୀ ପୁଲିସ ବ୍ୟାଣ୍ଡ୍ ଭବ୍ୟ ପରିବେଷଣ କରିବା ପରେ ‘ୱି ଆର୍ ୱାନ୍‌’ ଗ୍ରୁପ୍‌ର ନୃତ୍ୟ କଳାକାରମାନେ ‘ମିଟି ମେଁ ମିଲ୍ ଜାୱା’ ଏବଂ ‘ବନ୍ଦେ ମାତରମ୍‌’ କାର୍ଯ୍ୟକ୍ରମରେ ନୃତ୍ୟ ପରିବେଷଣ କରିବେ।

ଉଦ୍‌ଘାଟନୀ ସମାରୋହରେ କ୍ରୀଡା ସଙ୍ଗୀତ ଟ୍ରାକ୍‌ରେ ଦର୍ଶକ ମାନେ ଝୁମିବେ ଏବଂ ‘ଇଭୋଲ୍ୟୁସନ୍ ଅଫ୍ ପାରା ଗେମ୍ସ’ (ପାରା କ୍ରୀଡାର ବିକାଶ) ବିଷୟବସ୍ତୁ ଉପରେ ଏକ ଏଲ୍‌ଇଡି ନୃତ୍ୟ ପରିବେଷଣ ଦର୍ଶକଙ୍କୁ ଆକର୍ଷିତ କରିବ। ଉଦ୍‌ଘାଟନୀ ସମାରୋହରେ ସାଇ ଅଧିକାରୀ ମାନଙ୍କ ଦ୍ୱାରା ଏକ ସ୍ୱତନ୍ତ୍ର ପ୍ରଦର୍ଶନ ମଧ୍ୟ କରାଯିବ।

ସାଂସ୍କୃତିକ କାର୍ଯ୍ୟକ୍ରମ ‘ୟୁନାଇଟେଡ୍ ବାଇ ସ୍ପୋର୍ଟସ’ (କ୍ରୀଡା ମାଧ୍ୟମରେ ଏକଠି ହେବା) ପରିବେଷଣ ସହିତ ଶେଷ ହେବ ଏବଂ ସମସ୍ତ ଅଂଶଗ୍ରହଣକାରୀ ମାନଙ୍କ ପାଇଁ ପ୍ରଧାନମନ୍ତ୍ରୀ ଶ୍ରୀ ନରେନ୍ଦ୍ର ମୋଦୀଙ୍କ ଠାରୁ ଏକ ସ୍ୱତନ୍ତ୍ର ବାର୍ତ୍ତା ମଧ୍ୟ ରହିବ।

ଖେଲୋ ଇଣ୍ଡିଆ ପାରା ଗେମ୍ସ ଆୟୋଜନ କରିବା ପଛରେ କେନ୍ଦ୍ର ସରକାରଙ୍କ ଲକ୍ଷ୍ୟ ହେଉଛି ସମସ୍ତ ପାରା ଆଥଲେଟ୍ (ଶାରୀରିକ ଭିନ୍ନକ୍ଷମ କ୍ରୀଡାବିତ୍‌) ମାନଙ୍କୁ ସଶକ୍ତ କରିବା। ଶାରୀରିକ ଭିନ୍ନକ୍ଷମ ମାନଙ୍କର କଲ୍ୟାଣ ପାଇଁ ସରକାର ଅନେକ ଗୁରୁତ୍ୱପୂର୍ଣ୍ଣ ପ୍ରକଳ୍ପ ଆରମ୍ଭ କରିଛନ୍ତି। ଇନ୍ଦିରା ଗାନ୍ଧୀ ଷ୍ଟାଡିୟମ, ଜବାହରଲାଲ ନେହରୁ ଷ୍ଟାଡିୟମ ଏବଂ କର୍ଣ୍ଣି ସିଂହ ସୁଟିଂ ରେଞ୍ଜ ଭଳି ତିନୋଟି ସ୍ଥାନରେ ଉଦ୍‌ଘାଟନୀ ଖେଲୋ ଇଣ୍ଡିଆ ପାରା ଗେମ୍ସ ଆୟୋଜନ କରାଯାଉଛି। ଆଥଲେଟିକ୍ସ, ସୁଟିଂ, ତୀରନ୍ଦାଜି, ଫୁଟବଲ, ବ୍ୟାଡମିଣ୍ଟନ, ଟେବୁଲ ଟେନିସ ଓ ଭାରୋତ୍ତୋଳନ ଭଳି ୭ଟି ପାରା କ୍ରୀଡ଼ାରେ ପ୍ରତିଯୋଗିତା ଅନୁଷ୍ଠିତ ହେବ। ଶୀତଲ ଦେବୀ, ଭାବିନା ପଟେଲ, ଅଶୋକ, ପ୍ରମୋଦ ଭଗତଙ୍କ ଭଳି ଭାରତର ଅନେକ ଶୀର୍ଷ ସ୍ତରର ଅନ୍ତର୍ଜାତୀୟ ପାରା ତାରକା କ୍ରୀଡାବିତ୍ ଏଥିରେ ଅଂଶଗ୍ରହଣ କରିବେ।

ଖେଲୋ ଇଣ୍ଡିଆ ୟୁଥ୍ ଗେମ୍ସ ଓ ଖେଲୋ ଇଣ୍ଡିଆ ୟୁନିଭର୍ସିଟି ଗେମ୍ସର ବିପୁଳ ସଫଳତା ପରେ ଏବେ ଖେଲୋ ଇଣ୍ଡିଆ ପାରା ଗେମ୍ସ ଆୟୋଜନ କରାଯାଉଛି ଏବଂ ପ୍ରଥମ ଥର ପାଇଁ ଖେଲୋ ଇଣ୍ଡିଆ ପାରା ଗେମ୍ସ ଆୟୋଜନକୁ ନେଇ ରାଜଧାନୀରେ ଉତ୍ସବର ବାତାବରଣ ସୃଷ୍ଟି ହୋଇଛି। ସପ୍ତାହବ୍ୟାପୀ ଚାଲିବାକୁ ଥିବା ଏହି କ୍ରୀଡ଼ା ମହୋତ୍ସବ ସମନ୍ୱିତକରଣର ପ୍ରତୀକ ହେବା ସହ ମାନବୀୟ ମର୍ଯ୍ୟାଦାକୁ ପାଳନ କରିବ।

ନୂଆଦିଲ୍ଲୀ: କ୍ରୀଡ଼ା ପ୍ରତିଭାଙ୍କୁ ଚିହ୍ନଟ କରିବା ଏବଂ ଯୁବ ଓ ଆଶାୟୀ ପାରା ଆଥଲେଟ୍‌ (ଦିବ୍ୟାଙ୍ଗ କ୍ରୀଡ଼ାବିତ୍‌)ମାନଙ୍କୁ ଆଗକୁ ବଢ଼ିବାର ସୁଯୋଗ ପ୍ରଦାନ କରିବା ଉଦ୍ଦେଶ୍ୟରେ କେନ୍ଦ୍ର ଯୁବ ବ୍ୟାପାର ଓ କ୍ରୀଡ଼ା ମନ୍ତ୍ରୀ ଅନୁରାଗ ସିଂହ ଠାକୁର ପ୍ରଥମ ଖେଲୋ ଇଣ୍ଡିଆ ପାରା ଗେମ୍ସ ଘୋଷଣା କରିଛନ୍ତି। ଏହା  ଡିସେମ୍ବର ୧୦ରୁ ଡିସେମ୍ବର ୧୭ ତାରିଖ ପର୍ଯ୍ୟନ୍ତ ନୂଆଦିଲ୍ଲୀରେ ଆୟୋଜିତ ହେବ। ଏକ ଭିଡିଓ ବାର୍ତ୍ତା ଜରିଆରେ ସେ କହିଛନ୍ତି, ‘‘ମୁଁ ଗର୍ବର ସହ ଘୋଷଣା କରୁଛି ଯେ ଡିସେମ୍ବର ୧୦ରୁ ୧୭ ତାରିଖ ପର୍ଯ୍ୟନ୍ତ ନୂଆଦିଲ୍ଲୀର ବିଭିନ୍ନ ସ୍ଥାନରେ ପ୍ରଥମ ଖେଲୋ ଇଣ୍ଡିଆ ପାରା ଗେମ୍ସ ଅନୁଷ୍ଠିତ ହେବ। ୩ଟି ସାଇ (ଭାରତୀୟ କ୍ରୀଡ଼ା ପ୍ରାଧିକରଣ) ଷ୍ଟାଡିୟମରେ ମୋଟ ୭ଟି ପ୍ରତିଯୋଗିତା ଅନୁଷ୍ଠିତ ହେବ।’’

ଦେଶରେ ପାରା କ୍ରୀଡ଼ାର ବିକାଶ ଦିଗରେ ସରକାରଙ୍କ ପ୍ରୟାସ ଦିଗରେ ଏହି ଘୋଷଣା ଏକ ବଡ଼ ପଦକ୍ଷେପ ଏବଂ ଏହି ପ୍ରତିଯୋଗିତା ପ୍ରତିଭାବାନ ପାରା ଆଥଲେଟ୍‌ମାନଙ୍କୁ ଚିହ୍ନଟ କରିବାରେ ସହାୟକ ହେବ, ଯେଉଁମାନଙ୍କୁ ସାଇ ଏବଂ ଯୁବ ବ୍ୟାପାର ଏବଂ କ୍ରୀଡ଼ା ମନ୍ତ୍ରଣାଳୟର ଉପଯୁକ୍ତ ସହଯୋଗରେ ସେମାନଙ୍କ ଦକ୍ଷତା ବୃଦ୍ଧି ପାଇଁ ଅଧିକ ସହାୟତା ପ୍ରଦାନ କରାଯିବ।

ଏହି ଅବସରରେ ଅନୁରାଗ ସିଂହ ଠାକୁର କହିଛନ୍ତି, ଖେଲୋ ଇଣ୍ଡିଆ ଯୋଜନା ଭାରତୀୟ କ୍ରୀଡ଼ା ପାଇଁ ଏକ ଯୁଗାନ୍ତକାରୀ ଯୋଜନା ସାବ୍ୟସ୍ତ ହୋଇଛି। ଖେଲୋ ଇଣ୍ଡିଆ ଗେମ୍ସ ଏହି ଯୋଜନାରେ ଗୁରୁତ୍ୱପୂର୍ଣ୍ଣ ଭୂମିକା ଗ୍ରହଣ କରିଛି ଏବଂ ୨୦୧୮ ରୁ ମୋଟ ୧୧ଟି ଖେଲୋ ଇଣ୍ଡିଆ ଗେମ୍ସ ଆୟୋଜନ କରାଯାଇଛି । ୫ଟି ଖେଲୋ ଇଣ୍ଡିଆ ଯୁବ କ୍ରୀଡ଼ା, ୩ଟି ଖେଲୋ ଇଣ୍ଡିଆ ବିଶ୍ୱବିଦ୍ୟାଳୟ କ୍ରୀଡ଼ା ଏବଂ ୩ଟି ଖେଲୋ ଇଣ୍ଡିଆ ଶୀତକାଳୀନ କ୍ରୀଡ଼ା ସଫଳତାର ସହ ଆୟୋଜନ କରାଯାଇଛି।

ଏହି କ୍ରୀଡ଼ା ପ୍ରତିଯୋଗିତାଗୁଡ଼ିକ ମଧ୍ୟରୁ ଆମେ ପ୍ରାୟ ୧୦୦୦ ପ୍ରତିଭାବାନ ଆଥଲେଟ୍ ମାନଙ୍କୁ ଚିହ୍ନଟ କରିଛୁ ଏବଂ ସେମାନଙ୍କ ମଧ୍ୟରୁ ଅନେକ ଏସୀୟ କ୍ରୀଡ଼ା, ରାଜ୍ୟଗୋଷ୍ଠୀ କ୍ରୀଡ଼ା ଏବଂ ଅଲିମ୍ପିକ୍ କ୍ରୀଡ଼ାରେ ଅଂଶଗ୍ରହଣ କରିଛନ୍ତି। ଆଗାମୀ ଅଲିମ୍ପିକ୍ସରେ ଭାଗ ନେଉଥିବା ପାରା ଆଥଲେଟମାନଙ୍କୁ ମୁଁ ଶୁଭେଚ୍ଛା ଜଣାଉଛି ।

ପ୍ରଥମ ଖେଲୋ ଇଣ୍ଡିଆ ପାରା ଗେମ୍ସରେ ସର୍ଭିସେସ୍‌ ସ୍ପୋର୍ଟସ୍‌ କଣ୍ଟ୍ରୋଲ ବୋର୍ଡ ସମେତ ୩୨ଟି ରାଜ୍ୟ ଓ କେନ୍ଦ୍ର ଶାସିତ ଅଞ୍ଚଳର ୧୩୫୦ରୁ ଅଧିକ ପ୍ରତିଯୋଗୀ ଅଂଶଗ୍ରହଣ କରିବେ। ଏଥିରେ ପାରା ଆଥଲେଟିକ୍ସ, ପାରା ସୁଟିଂ, ପାରା ଆର୍ଚରୀ, ପାରା ଫୁଟବଲ, ପାରା ବ୍ୟାଡମିଣ୍ଟନ, ପାରା ଟେବୁଲ ଟେନିସ ଏବଂ ପାରା ଭାରୋତ୍ତୋଳନ ସମେତ ୭ଟି ବିଭାଗରେ ପାରା ଆଥଲେଟ୍‌ମାନେ ପୁରସ୍କାର ପାଇଁ ପ୍ରତିଦ୍ୱନ୍ଦ୍ୱିତା କରିବେ। ଆଇଜି ଷ୍ଟାଡିୟମ, ତୁଘଲକାବାଦର ସୁଟିଂ ରେଞ୍ଜ ଏବଂ ଜେଏଲଏନ ଷ୍ଟାଡିୟମ ଭଳି ୩ଟି ସାଇ ଷ୍ଟାଡିୟମରେ ଏହି କାର୍ଯ୍ୟକ୍ରମ ଅନୁଷ୍ଠିତ ହେବ।

ନିକଟରେ ହାଙ୍ଗଝୌଠାରେ ଶେଷ ହୋଇଥିବା ଏସୀୟ ପାରା ଗେମ୍ସରେ ଅଭୂତପୂର୍ବ ୧୧୧ ପଦକ ଜିତିଥିବା ଭାରତୀୟ ପାରା ଆଥଲେଟଙ୍କ ପ୍ରୟାସକୁ ପ୍ରଶଂସା କରି କେନ୍ଦ୍ରମନ୍ତ୍ରୀ ଜୋର୍‌ ଦେଇ କହିଛନ୍ତି, ଖେଲୋ ଇଣ୍ଡିଆ ପାରା ଗେମ୍ସ ବାର୍ଷିକ ଆୟୋଜନ ହେଉଥିବା ପ୍ରତିଯୋଗିତାରେ ପାରା ଆଥଲେଟମାନଙ୍କୁ ନିରନ୍ତର ଅଭ୍ୟାସ ପ୍ରଦାନ କରିବାକୁ ଲକ୍ଷ୍ୟ ରଖଛି।

‘‘କିଛି ସପ୍ତାହ ତଳେ ଆମର ପାରା କ୍ରୀଡ଼ାବିତ୍‌ମାନେ ହାଙ୍ଗଝୌ ଏସୀୟ ପାରା ଗେମ୍ସ ଅଭିଯାନକୁ ଅଭୂତପୂର୍ବ ୧୧୧ ପଦକ ସହ ଶେଷ କରି ଇତିହାସ ରଚିଥିଲେ, ଯାହା କି କୌଣସି ପ୍ରମୁଖ ଅନ୍ତର୍ଜାତୀୟ ବହୁ-କ୍ରୀଡ଼ା ଇଭେଣ୍ଟରେ ଦେଶ ପାଇଁ ସବୁଠାରୁ ବଡ଼ ସଫଳତା। ବର୍ତ୍ତମାନ ପାରା ଗେମ୍ସର ଲଗାତାର ଆୟୋଜନ ଏବଂ ପାରା ଅଲିମ୍ପିକ୍ କ୍ରୀଡ଼ା ପାଇଁ ଅଧିକ ପ୍ରତିଭା ବିକାଶ ସୃଷ୍ଟି କରିବା ଆମର ପ୍ରମୁଖ ଏଜେଣ୍ଡା। ପ୍ରଥମ ଖେଲୋ ଇଣ୍ଡିଆ ପାରା ଗେମ୍ସ ଆମ ମାନ୍ୟବର ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କ ସ୍ୱପ୍ନ ଦିଗରେ ଆଉ ଏକ ବଡ ପଦକ୍ଷେପ,’’ କେନ୍ଦ୍ର କ୍ରୀଡ଼ାମନ୍ତ୍ରୀ କହିଛନ୍ତି।

୨୦୧୮ ପରଠାରୁ ମୋଟ ୧୧ଟି ଖେଲୋ ଇଣ୍ଡିଆ ଗେମ୍ସ ସଫଳତାର ସହ ଆୟୋଜନ କରାଯାଇଛି। ଏଥିରେ ୫ଟି ଖେଲୋ ଇଣ୍ଡିଆ ୟୁଥ୍ ଗେମ୍ସ, ୩ଟି ଖେଲୋ ଇଣ୍ଡିଆ ୟୁନିଭର୍ସିଟି ଗେମ୍ସ ଏବଂ ୩ଟି ଖେଲୋ ଇଣ୍ଡିଆ ଶୀତକାଳୀନ କ୍ରୀଡ଼ା ଅନ୍ତର୍ଭୁକ୍ତ। ଶ୍ରୀ ଠାକୁର କହିଛନ୍ତି ଯେ ଏହି କ୍ରୀଡ଼ା ଗୁଡ଼ିକ ସମଗ୍ର ଦେଶରେ ପ୍ରତିଭାଙ୍କୁ ଚିହ୍ନଟ କରିବାରେ ପ୍ରମୁଖ ଭୂମିକା ଗ୍ରହଣ କରିଛି ଏବଂ ସମ୍ମାନଜନକ ବହୁ-ଶୃଙ୍ଖଳା ପ୍ରତିଯୋଗିତାରେ ଭାରତର ପ୍ରଦର୍ଶନରେ ସହାୟକ ହୋଇଛି।

ନୂଆଦିଲ୍ଲୀ: ମୁମ୍ବାଇ ଠାରେ ଆଇଓସିର ୧୪୧ତମ ଅଧିବେଶନ ପୂର୍ବରୁ ବିଶ୍ୱର ବିଭିନ୍ନ କ୍ରୀଡ଼ା ସଂଗଠନରେ ଗୁରୁତ୍ୱପୂର୍ଣ୍ଣ ପଦବୀରେ ଥିବା ଅନ୍ତର୍ଜାତୀୟ ଅଲିମ୍ପିକ୍ କମିଟି (ଆଇଓସି)ର ଅନେକ ସଦସ୍ୟ ମାନଙ୍କ ସହ କେନ୍ଦ୍ର ଯୁବ ବ୍ୟାପାର ଓ କ୍ରୀଡ଼ା ମନ୍ତ୍ରୀ ଅନୁରାଗ ଠାକୁର ଗତ ସପ୍ତାହରେ (ଅକ୍ଟୋବର ୧୩  ଓ ୧୪, ୨୦୨୩) ଦୁଇ ଦିନ ଧରି ବୈଠକ କରିଥିଲେ। ଅକ୍ଟୋବର ୧୫ ରୁ ୧୭, ୨୦୨୩ ପର୍ଯ୍ୟନ୍ତ ମୁମ୍ବାଇ ଠାରେ ଆଇଓସି ଅଧିବେଶନ ଚାଲିଛି।

ଦୁଇ ଦିନିଆ ଆଇଓସି ବୈଠକ ଆରମ୍ଭ ହେବା ପୂର୍ବରୁ କେନ୍ଦ୍ର ଯୁବ ବ୍ୟାପାର ଓ କ୍ରୀଡ଼ା ମନ୍ତ୍ରୀ ଶନିବାର (ଅକ୍ଟୋବର ୧୪, ୨୦୨୩) ଦିନ କହିଛନ୍ତି ଯେ ଭାରତରେ ଆଇଓସି ଅଧିବେଶନ ଆୟୋଜନ ହେବା ଏକ ଗୁରୁତ୍ୱପୂର୍ଣ୍ଣ ସୁଯୋଗ। “ମୁଁ କମିଟିର ସମସ୍ତ ସଦସ୍ୟ ମାନଙ୍କୁ ସ୍ୱାଗତ କରୁଛି ଏବଂ ଆଶା କରୁଛି ଯେ ଅଧିବେଶନ ସଫଳ ହେବ ଏବଂ ଅଲିମ୍ପିକ୍ସ କ୍ରୀଡ଼ାରେ ନୂତନ ସଂଯୋଜନ ପାଇଁ ଘୋଷଣା ହେବ” ବୋଲି କେନ୍ଦ୍ର ମନ୍ତ୍ରୀ କହିଛନ୍ତି।

ବିଭିନ୍ନ ଅନ୍ତର୍ଜାତୀୟ ସ୍ତରର କ୍ରୀଡ଼ା ମହାସଂଘର ସଦସ୍ୟ ଏବଂ ଆଇଓସିର କର୍ମକର୍ତ୍ତା ମାନଙ୍କ ସହ ଅନୁଷ୍ଠିତ ଦ୍ୱିପାକ୍ଷିକ ବୈଠକ ଶୃଙ୍ଖଳାରେ କେନ୍ଦ୍ର ଯୁବ ବ୍ୟାପାର ଓ କ୍ରୀଡ଼ା ମନ୍ତ୍ରୀ ଅନୁରାଗ ସିଂହ ଠାକୁର କ୍ରୀଡ଼ା, ବିଜ୍ଞାନ ଓ ଔଷଧ କ୍ଷେତ୍ରରେ ଜ୍ଞାନର ଆଦାନପ୍ରଦାନ ବିଷୟରେ କହିଥିଲେ। ଏହି ସହଯୋଗରେ ପ୍ରଶିକ୍ଷଣ ପଦ୍ଧତି, ଉପକରଣ ଏବଂ କ୍ରୀଡ଼ା ଏବଂ ଅନ୍ୟାନ୍ୟ ଆନୁଷଙ୍ଗିକ କ୍ଷେତ୍ରରେ ଡିଜିଟାଲ ପ୍ରଶିକ୍ଷଣ ଏବଂ ପ୍ରଶିକ୍ଷଣର କାର୍ଯ୍ୟକାରିତାରେ ଅଭିନବତାକୁ ପ୍ରୋତ୍ସାହିତ କରିବା ପାଇଁ ଗବେଷଣା ଉଦ୍ୟୋଗର ଅନୁସନ୍ଧାନ ଅନ୍ତର୍ଭୁକ୍ତ ଥିଲା।

ଶୁକ୍ରବାର ଦିନ କେନ୍ଦ୍ର ଯୁବ ବ୍ୟାପାର ଓ କ୍ରୀଡ଼ା ମନ୍ତ୍ରୀ ମନ୍ତ୍ରୀ ମୁମ୍ବାଇ ଠାରେ ଅନ୍ତର୍ଜାତୀୟ ଆଥଲେଟିକ୍ସ ମହାସଂଘର ସଭାପତି ଲର୍ଡ ସେବାଷ୍ଟିଆନ କୋଏ  ଏବଂ ବିଶ୍ୱ ରୋଇଂ ଫେଡେରେସନର ସଭାପତି ଜିନ୍ – କ୍ରିଷ୍ଟୋଫ ରୋଲାଣ୍ଡଙ୍କ ସହ ଦ୍ୱିପାକ୍ଷିକ ବୈଠକ କରିଥିଲେ।

କେନ୍ଦ୍ର ଯୁବ ବ୍ୟାପାର ଓ କ୍ରୀଡ଼ା ମନ୍ତ୍ରୀ ଶନିବାର ଆଇଓସି ସଭାପତି ଥୋମାସ ବାକ୍‌, ଆଇଓସି ଉପାଧ୍ୟକ୍ଷ ଜୁଆନ୍ ଆଣ୍ଟୋନିଓ, ଆଇଓସି କାର୍ଯ୍ୟନିର୍ବାହୀ ବୋର୍ଡ ସଦସ୍ୟ ତଥା ୟୁଡବ୍ଲ୍ୟୁଡବ୍ଲ୍ୟୁ ରେସଲିଂର ସଭାପତି ନେନାଦ ଲେଲୋଭିକ୍‌, ଅନ୍ତର୍ଜାତୀୟ ପାରାଲିମ୍ପିକ୍ କମିଟିର ସଭାପତି ଆଣ୍ଡ୍ର‌୍ୟୁ ପାର୍ସନ, ଜାତୀୟ ଅଲିମ୍ପିକ୍ କମିଟି ସଂଘର ମହାସଚିବ ଗୁନିଲା ଲିଣ୍ଡବର୍ଗ, ଆଇଓସି ସଦସ୍ୟ ତଥା ଭବିଷ୍ୟତ କ୍ରୀଡ଼ା ଆୟୋଗର ଅଧ୍ୟକ୍ଷ କୋଲିଣ୍ଡା ଗ୍ରାବର – କିତାରୋଭିକ୍‌, ଅନ୍ତର୍ଜାତୀୟ ହକି ମହାସଂଘର ସଭାପତି ତୈୟାବ ଇକ୍ରାମ୍‌, ଅନ୍ତର୍ଜାତୀୟ ସାଇକ୍ଲିଂ ମହାସଂଘର ସଭାପତି ଡେଭିଡ୍ ଲାପର୍ଟେଣ୍ଟ ଏବଂ ବିଶ୍ୱ ଡୋପିଂ ନିରୋଧୀ ଏଜେନ୍ସିର ସଭାପତି ୱିଟୋଲ୍ଡ ବାଙ୍କ ଙ୍କୁ ଭେଟିଛନ୍ତି। ରାଜ୍ୟସଭା ସାଂସଦ, ପୂର୍ବତନ ଅଲିମ୍ପିଆନ୍ ଏବଂ ଟ୍ରାକ୍ ଆଣ୍ଡ ଫିଲ୍ଡ ଆଥଲେଟ୍ ଏବଂ ଭାରତୀୟ ଅଲିମ୍ପିକ୍ ସଂଘର ସଭାପତି ପି. ଟି. ଉଷା ମଧ୍ୟ ଦ୍ୱିପାକ୍ଷିକ ବୈଠକରେ ଉପସ୍ଥିତ ଥିଲେ।

ଅଲିମ୍ପିକ୍ସରେ କ୍ରିକେଟକୁ ଅନ୍ତର୍ଭୁକ୍ତ କରିବାକୁ ପରାମର୍ଶ ଦେଇ କେନ୍ଦ୍ର ଯୁବ ବ୍ୟାପାର ଓ କ୍ରୀଡ଼ା ମନ୍ତ୍ରୀ କହିଛନ୍ତି, ଯଦି କ୍ରିକେଟ୍ ଖେଳକୁ ଅଲିମ୍ପିକ୍ସରେ ଅନ୍ତର୍ଭୁକ୍ତ କରାଯାଏ, ତେବେ ଏହି ଖେଳ ପାଇଁ ବଜେଟ୍ ଆବଣ୍ଟନ କରିବା ସାରା ବିଶ୍ୱର ସରକାରଙ୍କ ପାଇଁ ସହଜ ହେବ। ତେଣୁ ଏଭଳି ନିଷ୍ପତ୍ତି କ୍ରିକେଟ୍ ପାଇଁ କ୍ରୀଡ଼ା ଭିତ୍ତିଭୂମି ସୃଷ୍ଟି କରିବାରେ ସହାୟକ ହେବ। ଭାରତକୁ କ୍ରୀଡ଼ା ମହାଶକ୍ତିରେ ପରିଣତ କରିବା ହେଉଛି ପ୍ରଧାନମନ୍ତ୍ରୀ ମୋଦୀଙ୍କ ଲକ୍ଷ୍ୟ। ଦେଶରେ କ୍ରୀଡ଼ା ଭିତ୍ତିଭୂମିର ଉନ୍ନତି ପାଇଁ ୩୦୦୦ କୋଟି ଟଙ୍କାର ପ୍ରକଳ୍ପ ଚାଲିଛି। ଖେଲୋ ଇଣ୍ଡିଆ ଯୋଜନା ଓ ଅନ୍ୟାନ୍ୟ କାର୍ଯ୍ୟକ୍ରମ ଅଧୀନରେ କ୍ରୀଡ଼ାବିତ୍ ମାନଙ୍କୁ ଉନ୍ନତ ପ୍ରଦର୍ଶନ ନିମନ୍ତେ ସରକାର ସର୍ବୋତ୍ତମ ସୁବିଧା ଯୋଗାଇ ଦେଉଛନ୍ତି ବୋଲି ସେ କହିଛନ୍ତି।

ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ଶନିବାର ମୁମ୍ବାଇ ଠାରେ ୧୪୧ତମ ଅନ୍ତର୍ଜାତୀୟ ଅଲିମ୍ପିକ୍ସ କମିଟି (ଆଇଓସି) ଅଧିବେଶନକୁ ଉଦଘାଟନ କରିଛନ୍ତି। ଏହି ଅଧିବେଶନରେ କ୍ରୀଡ଼ା ସମ୍ବନ୍ଧୀୟ ବିଭିନ୍ନ ଅଂଶୀଦାରଙ୍କ ମଧ୍ୟରେ ବାର୍ତ୍ତାଳାପ ଏବଂ ଜ୍ଞାନ ଆଦାନପ୍ରଦାନର ସୁଯୋଗ ପ୍ରଦାନ କରାଯାଇଥାଏ।୧୪୧ତମ ଆଇଓସି ଅଧିବେଶନରେ ଅନ୍ତର୍ଜାତୀୟ ଅଲିମ୍ପିକ୍ କମିଟି ସଭାପତି ଥୋମାସ୍ ବାକ୍‌ଙ୍କ ସମେତ ଆଇଓସିର ଅନ୍ୟାନ୍ୟ ସଦସ୍ୟ, ବିଶିଷ୍ଟ ଭାରତୀୟ କ୍ରୀଡ଼ା ବ୍ୟକ୍ତିତ୍ୱ ଏବଂ ଭାରତୀୟ ଅଲିମ୍ପିକ୍ ସଂଘ ସମେତ ବିଭିନ୍ନ କ୍ରୀଡ଼ା ମହାସଂଘର ପ୍ରତିନିଧିମାନେ ଯୋଗ ଦେଉଛନ୍ତି।

ଆଇଓସି ସଦସ୍ୟ ମାନଙ୍କର ଏକ ଗୁରୁତ୍ୱପୂର୍ଣ୍ଣ ବୈଠକ, ଆଇଓସି ଅଧିବେଶନରେ ଅଲିମ୍ପିକ୍ କ୍ରୀଡ଼ାର ଭବିଷ୍ୟତ ସମ୍ପର୍କରେ ଗୁରୁତ୍ୱପୂର୍ଣ୍ଣ ନିଷ୍ପତ୍ତି ନିଆ ଯାଇଥାଏ। ଭାରତରେ ଆୟୋଜିତ ହେଉଥିବା ୧୪୧ତମ ଆଇଓସି ଅଧିବେଶନ ବିଶ୍ୱସ୍ତରୀୟ ସହଯୋଗକୁ ପ୍ରୋତ୍ସାହିତ କରିବା, କ୍ରୀଡ଼ା ସଫଳତାକୁ ସମ୍ମାନ ଦେବା ଏବଂ ବନ୍ଧୁତା, ସମ୍ମାନ ଏବଂ ଉତ୍କର୍ଷତାର ଅଲିମ୍ପିକ୍ ନୀତିକୁ ଆଗକୁ ବଢ଼ାଇବା ପାଇଁ ଦେଶର ପ୍ରତିବଦ୍ଧତାକୁ ପ୍ରତିଫଳିତ କରୁଛି। ଏହି କାର୍ଯ୍ୟକ୍ରମ କ୍ରୀଡ଼ା କ୍ଷେତ୍ରର ବିଭିନ୍ନ ଅଂଶୀଦାର ମାନଙ୍କ ମଧ୍ୟରେ ବାର୍ତ୍ତାଳାପ ଏବଂ ଜ୍ଞାନର ଆଦାନପ୍ରଦାନକୁ ସୁଗମ କରିଥାଏ।

ନୂଆଦିଲ୍ଲୀ: କେନ୍ଦ୍ର କ୍ରୀଡ଼ାମନ୍ତ୍ରୀ ଅନୁରାଗ ସିଂହ ଠାକୁର ଏସୀୟ କ୍ରୀଡ଼ା ପ୍ରତିଯୋଗିତାରେ ଭାଗ ନେଇ ଭାରତ ଫେରିଥିବା କ୍ରୀଡ଼ାବିତମାନଙ୍କୁ ସମ୍ବର୍ଦ୍ଧିତ କରିଛନ୍ତି। ନୂଆଦିଲ୍ଲୀସ୍ଥିତ କନଷ୍ଟିଚ୍ୟୁସନ୍ କ୍ଲବ୍ ଅଫ୍ ଇଣ୍ଡିଆରେ ଏହି ସମ୍ବର୍ଦ୍ଧନା କାର୍ଯ୍ୟକ୍ରମ ଅନୁଷ୍ଠିତ ହୋଇଥିଲା।

ସୁଟିଂ, ରୋଇଂ ଓ ମହିଳା କ୍ରିକେଟ ଦଳର ମୋଟ ୨୭ ଜଣ ଖେଳାଳୀଙ୍କୁ ମନ୍ତ୍ରୀ ସମ୍ବର୍ଦ୍ଧିତ କରିଥିଲେ। ହରମନପ୍ରୀତ କୌରଙ୍କ ନେତୃତ୍ୱାଧୀନ ମହିଳା କ୍ରିକେଟ୍ ଦଳ ଏହି ପ୍ରତିଯୋଗିତାରେ ଐତିହାସିକ ସ୍ୱର୍ଣ୍ଣ ପଦକ ଜିତିଥିବା ବେଳେ ରୋଇଂରୁ ମୋଟ ୫ ପଦକ (୨ ରୌପ୍ୟ, ୩ କାଂସ୍ୟ) ଜିତିଥିଲା। ବର୍ତ୍ତମାନ ପର୍ଯ୍ୟନ୍ତ ଅଧିକାଂଶ ପଦକ ସୁଟିଂରୁ ଆସିଛି। ଭାରତର ରାଇଫଲ, ସଟଗନ୍ ଏବଂ ପିସ୍ତଲ ଦଳ ୧୩ ପଦକ (୪ ସ୍ୱର୍ଣ୍ଣ, ୪ ରୌପ୍ୟ ଏବଂ ୫ କାଂସ୍ୟ) ଜିତିଛନ୍ତି।

ଏସୀୟ କ୍ରୀଡ଼ାରେ ଉତ୍କୃଷ୍ଟ ପ୍ରଦର୍ଶନ ପାଇଁ କେନ୍ଦ୍ର କ୍ରୀଡ଼ା ମନ୍ତ୍ରୀ ଖେଳାଳିମାନଙ୍କୁ ଅଭିନନ୍ଦନ ଜଣାଇଛନ୍ତି। ସେ କହିଛନ୍ତି, ‘‘ମୁଁ ସମସ୍ତ ଆଥଲେଟ୍ ଓ ପ୍ରଶିକ୍ଷକଙ୍କୁ ଅଭିନନ୍ଦନ ଜଣାଉଛି। ଏହି ସଫଳତା ପାଇଁ ସେମାନଙ୍କୁ ବର୍ଷ ବର୍ଷ ପରିଶ୍ରମ କରିବାକୁ ପଡ଼ିଛି। ଆପଣ ଦେଖିପାରନ୍ତି ଯେ ଏହି ଇତିହାସ ସୃଷ୍ଟିକାରୀ ରୋଇଂ ଖେଳାଳୀମାନେ ଯେଉଁ ଅଞ୍ଚଳର ଅଟନ୍ତି, ସେଠାରେ ପାଣିର ଅଭାବ ଥାଇପାରେ, କିନ୍ତୁ ସେମାନେ ଏକ ଜଳ କ୍ରୀଡ଼ା ଇଭେଣ୍ଟରେ ପଦକ ଜିତିଛନ୍ତି । ଅଶ୍ୱାରୋହଣରେ ମଧ୍ୟ ଆମେ ଐତିହାସିକ ସ୍ୱର୍ଣ୍ଣ ପାଇଛୁ’’, ବୋଲି କେନ୍ଦ୍ର ମନ୍ତ୍ରୀ କହିଛନ୍ତି।

‘‘ସୁଟିଂରେ ଆମେ ଆମର ଉତ୍ସାହ ଓ ଦୃଢ଼ତା ଦେଖିଥିଲୁ। ମହିଳା ୫୦ ମିଟର ରାଇଫଲ ଥ୍ରୀପି ଇଭେଣ୍ଟରେ ସ୍ୱର୍ଣ୍ଣ ପଦକ ଜିତିଥିବା ଟପ୍ସ ଆଥଲେଟ୍ ସିଫତ କୌର ସାମରାଙ୍କ ଠାରୁ ଆରମ୍ଭ କରି ୧୦ ମିଟର ଏୟାର ରାଇଫଲରେ ସ୍ୱର୍ଣ୍ଣ ପଦକ ଜିତିଥିବା ଖେଲୋ ଇଣ୍ଡିଆ ଆଥଲେଟ୍ ରୁଦ୍ରାଂଶ ପାଟିଲଙ୍କ ପର୍ଯ୍ୟନ୍ତ ଆମର ସମସ୍ତ ଶୁଟରମାନେ ବହୁତ ଭଲ ପ୍ରଦର୍ଶନ କରିଛନ୍ତି’’, ବୋଲି ଶ୍ରୀ ଠାକୁର କହିଛନ୍ତି।

ଗୁରୁବାର ଆୟୋଜିତ ଏହି କାର୍ଯ୍ୟକ୍ରମରେ ଯୁବ ବ୍ୟାପାର ଓ କ୍ରୀଡ଼ା ମନ୍ତ୍ରଣାଳୟ, ଭାରତୀୟ କ୍ରୀଡ଼ା ପ୍ରାଧିକରଣର ଅଧିକାରୀଙ୍କ ସମେତ ଖେଳାଳିଙ୍କ ପରିବାର ଓ ବନ୍ଧୁମାନେ ଯୋଗ ଦେଇଥିଲେ।

ନୂଆଦିଲ୍ଲୀ: ଜାତୀୟ କ୍ରୀଡ଼ା ଦିବସ ୨୦୨୩ ଅବସରରେ କେନ୍ଦ୍ର ଯୁବ ବ୍ୟାପାର ଓ କ୍ରୀଡ଼ା ମନ୍ତ୍ରୀ ଅନୁରାଗ ସିଂହ ଠାକୁର ଆଜି ଜେଏଲଏନ ଷ୍ଟାଡିୟମରେ ଆୟୋଜିତ ଏକ କାର୍ଯ୍ୟକ୍ରମରେ ଫିଟ୍ ଇଣ୍ଡିଆ କୁଇଜ୍ ର ତୃତୀୟ ସଂସ୍କରଣର ଶୁଭାରମ୍ଭ କରିଛନ୍ତି।

ଏହି କାର୍ଯ୍ୟକ୍ରମରେ ନୂଆଦିଲ୍ଲୀର ବିଭିନ୍ନ ବିଦ୍ୟାଳୟର ପାଖାପାଖି ୫୦୦ ସ୍କୁଲ ପିଲାଙ୍କ ସମେତ ମନ୍ତ୍ରଣାଳୟ, ସାଇ ଓ ଜାତୀୟ କ୍ରୀଡ଼ା ମହାସଂଘର ବହୁ ବିଶିଷ୍ଟ କ୍ରୀଡ଼ାବିତ୍ ଓ ଅଧିକାରୀ ଯୋଗ ଦେଇଥିଲେ।

ଖେଲୋ ଇଣ୍ଡିଆ ଯୋଜନା ଅଧୀନରେ ମଞ୍ଜୁର ହୋଇଥିବା କ୍ରୀଡ଼ା ଭିତ୍ତିଭୂମି ପ୍ରକଳ୍ପ ସମ୍ପର୍କିତ ସୂଚନା ପୁସ୍ତିକା ଉନ୍ମୋଚନ କରିବା ସହ ଜାତୀୟ କ୍ରୀଡ଼ା ମହାସଂଘ ପୋର୍ଟାଲ ଉନ୍ମୋଚନ କରିବା ଏବଂ ବୁଦାପେଷ୍ଟଠାରେ ଅନୁଷ୍ଠିତ ବିଶ୍ୱ ଆଥଲେଟିକ୍ସ ଚାମ୍ପିୟନଶିପରେ ଏସୀୟ ରେକର୍ଡ ସୃଷ୍ଟି କରିଥିବା ୪×୪୦୦ ମିଟର ପୁରୁଷ ରିଲେ ଦଳକୁ ସମ୍ବର୍ଦ୍ଧିତ କରିଥିଲେ।

ଏହି ଅବସରରେ ଶ୍ରୀ ଠାକୁର କହିଥିଲେ, ହକିର ଯାଦୁଗର ମେଜର ଧ୍ୟାନଚାନ୍ଦ ୧୯୨୮, ୧୯୩୨ ଏବଂ ୧୯୩୬ରେ ହକିରେ ଆମକୁ ଲଗାତାର ତିନୋଟି ଅଲିମ୍ପିକ୍ସ ସ୍ୱର୍ଣ୍ଣ ପଦକ ଦେଇଥିଲେ। ଏହି ମହାନ ଖେଳାଳିଙ୍କୁ ଶ୍ରଦ୍ଧାଞ୍ଜଳି ଦେବା ପାଇଁ ଏହା ଏକ ଉପଯୁକ୍ତ ଦିନ ଏବଂ ମୁଁ ଏହା ଦେଖି ଆନନ୍ଦିତ ଯେ ବର୍ଷ ବର୍ଷ ଧରି ପ୍ରଶିକ୍ଷକ ଏବଂ ଆଥଲେଟମାନେ ମଧ୍ୟ ଏହି କ୍ରୀଡ଼ା ବିପ୍ଳବକୁ ଆଗେଇ ନେବାରେ ଏକ ବଡ଼ ଭୂମିକା ଗ୍ରହଣ କରିଛନ୍ତି। ପ୍ରଶିକ୍ଷକ ଓ ଆଥଲେଟମାନେ ବଡ଼ ଭୂମିକା ଗ୍ରହଣ କରିଥାନ୍ତି।

ଆଜି ସମଗ୍ର ଭାରତରେ ୩୫୨୬ଟି କାର୍ଯ୍ୟକ୍ରମ ଆୟୋଜିତ ହୋଇଛି ଏବଂ ଏହା ଆଜି ଆମେ ଯେଉଁ ସ୍ଥାନକୁ ଆସିଛୁ ତାହାର ପ୍ରମାଣ। ଭାରତୀୟ କ୍ରୀଡ଼ା ପାଇଁ ଏହା ଏକ ଅବିଶ୍ୱସନୀୟ ପର୍ଯ୍ୟାୟ। ୬୦ ବର୍ଷ ରେ ବିଶ୍ୱ ବିଶ୍ୱବିଦ୍ୟାଳୟ କ୍ରୀଡ଼ାରେ ମାତ୍ର ୧୮ ଟି ପଦକ ଥିଲା। ଚଳିତ ବର୍ଷ ହିଁ ଆମେ ପ୍ରତିଯୋଗିତାରେ ୨୬ଟି ପଦକ ଜିତିଥିଲୁ। ଖାଲି ସେତିକି ନୁହେଁ ଚେସ୍ ରେ ପ୍ରଜ୍ଞାନନ୍ଦ, କୁସ୍ତିରେ ଅନ୍ତିମ ପଙ୍ଘାଲ ଏବଂ ତୀରନ୍ଦାଜୀରେ ଅଦିତି ଗୋପୀଚାନ୍ଦ ସ୍ୱାମୀ, ସମସ୍ତ କ୍ରୀଡ଼ାରେ ଆମେ ଅଭୂତପୂର୍ବ ଫଳାଫଳ ପାଉଛୁ। ବିଶ୍ୱ ଆଥଲେଟିକ୍ସ ଚାମ୍ପିୟନଶିପ୍ ବୁଦାପେଷ୍ଟରେ ମଧ୍ୟ ଆମର ୪×୪୦୦ ମିଟର ରିଲେ ଦଳର ପାରୁଲ ଚୌଧୁରୀ ଏବଂ ଆମର ସବୁଦିନିଆ ହୀରୋ ନୀରଜ ଚୋପ୍ରା ସହ ଚମତ୍କାର ପ୍ରଦର୍ଶନ କରିଛନ୍ତି, ଯିଏ କି କ୍ରୀଡ଼ାରେ ସମସ୍ତ ସମ୍ଭାବ୍ୟ ଉଚ୍ଚସ୍ତରୀୟ ଅନ୍ତର୍ଜାତୀୟ ପ୍ରତିଯୋଗିତାରେ ସ୍ୱର୍ଣ୍ଣ ପଦକ ହାସଲ କରିନାହାଁନ୍ତି ବୋଲି ମନ୍ତ୍ରୀ କହିଛନ୍ତି।

ଫିଟ୍ ଇଣ୍ଡିଆ କୁଇଜ୍ ର ଦୁଇଟି ସଫଳ ସଂସ୍କରଣ ପରେ ତୃତୀୟ ସଂସ୍କରଣ ମଧ୍ୟ ଘୋଷଣା କରାଯାଇଥିଲା। ସ୍କୁଲ ଛାତ୍ରଛାତ୍ରୀଙ୍କ ପାଇଁ ଏହା ଭାରତର ସର୍ବବୃହତ କ୍ରୀଡ଼ା ଓ ଫିଟନେସ୍ କୁଇଜ୍ ପ୍ରତିଯୋଗିତା, ଯେଉଁଥିରେ ମୋଟ ୩.୨୫ କୋଟି ଟଙ୍କାର ପୁରସ୍କାର ରାଶି ରହିଛି। ଫିଟ୍ ଇଣ୍ଡିଆ କୁଇଜ୍ ଉପରେ ମନ୍ତବ୍ୟ ଦେଇ ଶ୍ରୀ ଠାକୁର କହିଛନ୍ତି, ଅରୁଣାଚଳର ତେଙ୍ଗା ଉପତ୍ୟକା ସହ ଆଣ୍ଡାମାନ, ସିକ୍କିମ୍ ଆଦି ଦୁର୍ଗମ ସ୍ଥାନର ଛାତ୍ରଛାତ୍ରୀମାନେ ଫିଟ୍ ଇଣ୍ଡିଆ କୁଇଜରେ ଅଂଶଗ୍ରହଣ କରିଥିବା ଦେଖି ମୁଁ ଆଶ୍ଚର୍ଯ୍ୟ ହୋଇଥିଲି। ସେମାନେ କୁଇଜ୍ ରେ ଶୀର୍ଷ ଦଳ ଥିଲେ।
କ୍ରୀଡ଼ା କ୍ଷେତ୍ରରୁ ଆରମ୍ଭ କରି ଚନ୍ଦ୍ରାୟଣ ସହ ଚନ୍ଦ୍ରରେ ଆମେ ନିଜର ପରିଚୟ ସୃଷ୍ଟି କରିଛୁ। ଏହା ହେଉଛି ନୂଆ ଭାରତ। ଆମର ଆଥଲେଟମାନେ ଆମକୁ ଶୀର୍ଷରେ ପହଞ୍ଚାଇବା ପାଇଁ ସବୁ କିଛି କରିଛନ୍ତି। କେବଳ ଏନ୍ଏସ୍ଏଫ୍ ଓ ଆଇଓଏ ନୁହେଁ, ପିଲାଙ୍କୁ ଶୃଙ୍ଖଳିତ କରି କ୍ରୀଡ଼ା କ୍ଷେତ୍ରରେ ପ୍ରବେଶ କରାଇଥିବା ଅନେକ ଅଭିଭାବକ ଓ ପ୍ରଶିକ୍ଷକଙ୍କୁ ମଧ୍ୟ ମୁଁ ଅଭିନନ୍ଦନ ଜଣାଉଛି ବୋଲି ଶ୍ରୀ ଅନୁରାଗ ସିଂହ ଠାକୁର କହିଛନ୍ତି।

ମଙ୍ଗଳବାର ଉଦଘାଟିତ ହୋଇଥିବା ଜାତୀୟ କ୍ରୀଡ଼ା ମହାସଂଘର ପୋର୍ଟାଲ ଡିଜିଟାଲ ଇଣ୍ଡିଆ ପାଇଁ ଭାରତ ସରକାରଙ୍କ ଦୃଷ୍ଟିକୋଣ, ବ୍ୟବସାୟଏବଂ ସୁଶାସନକୁ ସହଜ କରିବା ପାଇଁ ଅନୁସରଣ କରୁଛି। ଏହା ଏନଏସଏଫ ପାଇଁ ଏକ ସମନ୍ୱିତ ଅନଲାଇନ ପୋର୍ଟାଲ, ଯାହା ଏନଏସଏଫର ସ୍ୱୀକୃତିର ବାର୍ଷିକ ନବୀକରଣ, ଜାତୀୟ କ୍ରୀଡ଼ା ମହାସଂଘର ନିର୍ବାଚନ ଇତ୍ୟାଦି ପ୍ରକ୍ରିୟାକରଣ ପାଇଁ ଏକ ସିଙ୍ଗଲ ୱିଣ୍ଡୋ ଭାବେ କାର୍ଯ୍ୟ କରିବ।

ଏହା ଦ୍ୱାରା ବ୍ୟକ୍ତିଗତ ଭାବେ ଏନଏସଏଫ ଦସ୍ତାବିଜ ଦାଖଲ କରିବାର ପଦ୍ଧତି ଏବଂ କେନ୍ଦ୍ର କ୍ରୀଡ଼ା ମନ୍ତ୍ରଣାଳୟ ଦ୍ୱାରା ଏହାର ଯାଞ୍ଚ କରିବାର ପ୍ରଚଳିତ ବ୍ୟବସ୍ଥା ଉଚ୍ଛେଦ ହୋଇଯିବ । ଏହି ଅନଲାଇନ୍ ପୋର୍ଟାଲ କ୍ରୀଡ଼ା ବିଭାଗ ଏବଂ ଜାତୀୟ କ୍ରୀଡ଼ା ମହାସଂଘ ମଧ୍ୟରେ ଉତ୍ତମ ସମନ୍ୱୟ ସୁନିଶ୍ଚିତ କରିବ।

ସେହିପରି ଏକ ଅନଲାଇନ୍ ଆବେଦନ ଦାଖଲ ଓ ପ୍ରକ୍ରିୟାକରଣ ପୋର୍ଟାଲ ର ଶୁଭାରମ୍ଭ କରାଯାଇଛି ଯାହାକୁ ଖେଲୋ ଇଣ୍ଡିଆ ଯୋଜନା ଅଧୀନରେ କ୍ରୀଡ଼ା ଭିତ୍ତିଭୂମି ସୃଷ୍ଟି ଏବଂ ଉନ୍ନତିକରଣ ଏବଂ କ୍ରୀଡ଼ା ଉପକରଣର ଚାହିଦା ପାଇଁ ସମସ୍ତ ଆବେଦନର ପରିଚାଳନା ପାଇଁ ବ୍ୟବହାର କରାଯିବ। ୨୦୨୩ ସେପ୍ଟେମ୍ବର ପହିଲାରୁ ଅନୁଦାନପ୍ରାପ୍ତ ବ୍ୟକ୍ତି, ରାଜ୍ୟ, କେନ୍ଦ୍ରଶାସିତ ଅଞ୍ଚଳଗୁଡ଼ିକ ସେମାନଙ୍କର ଆର୍ଥିକ ସହାୟତା ପ୍ରସ୍ତାବ ଏହି ପୋର୍ଟାଲ ମାଧ୍ୟମରେ ଦାଖଲ କରିବା ପାଇଁ ଉପଲବ୍ଧ ହେବ।

ସେପଟେ ଖେଲୋ ଇଣ୍ଡିଆ ଯୋଜନାରେ ମଞ୍ଜୁର ହୋଇଥିବା କ୍ରୀଡ଼ା ଭିତ୍ତିଭୂମି ପ୍ରକଳ୍ପ ସମ୍ପର୍କିତ ସୂଚନା ପୁସ୍ତିକାରେ ୨୦୧୬ ମସିହାରୁ ଖେଲୋ ଇଣ୍ଡିଆ ଯୋଜନା କିପରି ଦେଶକୁ କ୍ରୀଡ଼ା ଉତ୍କର୍ଷତା ପାଇଁ ପରିବର୍ତନ କରିଛି ତାହା ଦର୍ଶାଯାଇଛି। ଏହି ପୁସ୍ତିକାରେ ଦେଶର ବିଭିନ୍ନ ରାଜ୍ୟ ଏବଂ କେନ୍ଦ୍ରଶାସିତ ଅଞ୍ଚଳରେ ବିକଶିତ ଏବଂ ପ୍ରସ୍ତାବରେ ଥିବା ସମଗ୍ର କ୍ରୀଡ଼ା ଭିତ୍ତିଭୂମି ଉପରେ ଆଲୋକପାତ କରାଯାଇଛି। ଖେଲୋ ଇଣ୍ଡିଆ ଯୋଜନା ଆରମ୍ଭରୁ ଦେଶରେ କ୍ରୀଡ଼ା ବିକାଶରେ ଗୁରୁତ୍ବପୂର୍ଣ୍ଣ ହୋଇ ରହିଛି ଏବଂ ତୃଣମୂଳ ସ୍ତରରେ ଏହାକୁ ଗୁରୁତ୍ବ ଦିଆଯାଇଛି।

ଜାତୀୟ କ୍ରୀଡ଼ା ଦିବସ ଅବସରରେ ହକି କିମ୍ବଦନ୍ତୀ ମେଜର ଧ୍ୟାନଚାନ୍ଦଙ୍କୁ ଉପଯୁକ୍ତ ଶ୍ରଦ୍ଧାଞ୍ଜଳି ଅର୍ପଣ କରିବା ଉଦ୍ଦେଶ୍ୟରେ ଭାରତ ସରକାରଙ୍କ ବିଭିନ୍ନ କାର୍ଯ୍ୟାଳୟ, କେନ୍ଦ୍ର ମନ୍ତ୍ରଣାଳୟ କାର୍ଯ୍ୟାଳୟ, ଭାରତୀୟ କ୍ରୀଡ଼ା ପ୍ରାଧିକରଣ କେନ୍ଦ୍ର, ଖେଲୋ ଇଣ୍ଡିଆ କେନ୍ଦ୍ର, ଜାତୀୟ କ୍ରୀଡ଼ା ମହାସଂଘ ସମେତ ସ୍କୁଲ ଓ କଲେଜରେ କ୍ରୀଡ଼ା ଓ ଫିଟନେସ୍ କାର୍ଯ୍ୟକ୍ରମ ଅନୁଷ୍ଠିତ ହୋଇଥିଲା। ୧୮ ରୁ ୪୦ ବର୍ଷ, ୪୦ ରୁ ୬୦ ବର୍ଷ ଏବଂ ୬୦ ବର୍ଷରୁ ଉର୍ଦ୍ଧ ବୟସ ବର୍ଗ ପାଇଁ ବୟସ ଉପଯୁକ୍ତ ପ୍ରତିଯୋଗିତାମୂଳକ ଏବଂ ମଜାଦାର ଖେଳ ଆୟୋଜନ କରାଯାଇଥିଲା।

ନୂଆଦିଲ୍ଲୀ: କେନ୍ଦ୍ର କ୍ରୀଡା ଓ ଯୁବ ବ୍ୟାପାର ତଥା ସୂଚନା ଓ ପ୍ରସାରଣ ମନ୍ତ୍ରୀ ଅନୁରାଗ ସିଂହ ଠାକୁର ଆଜି ମର୍ଯ୍ୟାଦାଜନକ “ହିରୋ ଏସିଆ ହକି ଚାମ୍ପିଅନ୍ସ ଟ୍ରଫି-୨୦୨୩ର ଟ୍ରଫିକୁ ଉନ୍ମୋଚନ କରିଛନ୍ତି। ଚେନ୍ନାଇରେ ଏହି ପ୍ରତିଯୋଗିତା ଆୟୋଜିତ ହେବ। ନୂଆଦିଲ୍ଲୀର ମେଜର ଧ୍ୟାନଚାନ୍ଦ ଜାତୀୟ ଷ୍ଟାଡିୟମରେ ଏହି ଉପଲକ୍ଷେ ଆୟୋଜିତ କାର୍ଯ୍ୟକ୍ରମରେ ମନ୍ତ୍ରୀ ଶ୍ରୀ ଠାକୁର ମଧ୍ୟ “ପାସ୍ ଦି ବଲ୍ ଟ୍ରଫି ଟୁର୍‌’ ଅଭିଯାନର ଶୁଭାରମ୍ଭ କରିଥିଲେ।

ହିରୋ ଏସିଆନ ହକି ଚମ୍ପିଆନ୍ସ ଟ୍ରଫି-ଚେନ୍ନାଇ ୨୦୨୩  ଆସନ୍ତାମାସ (ଅଗଷ୍ଟ) ୩ତାରିଖରୁ ଆରମ୍ଭ ହେବ। ଏହି ପ୍ରତିଯୋଗିତାରେ ଭାରତ, କୋରିଆ, ମାଲେସିଆ, ଜାପାନ, ପାକିସ୍ତାନ, ଓ ଚୀନ ପ୍ରତିଦ୍ୱନ୍ଦ୍ୱିତା କରିବେ।

ଏହି ଅବସରରେ ମନ୍ତ୍ରୀ ଶ୍ରୀ ଠାକୁର କହିଛନ୍ତି ଯେ ‘ଟ୍ରଫି ଟୁର୍‌’ ଗୁରୁତ୍ୱପୂର୍ଣ୍ଣ କାରଣ ଦେଶର ବିଭିନ୍ନ ସ୍ଥାନକୁ ଟ୍ରଫିକୁ ନେଲେ ଏହା ଜନସାଧାରଣଙ୍କ ମଧ୍ୟରେ ଉତ୍ସାହ ସୃଷ୍ଟି କରିବ ଓ ଲୋକେ ଏ ବିଷୟରେ ସଚେତନ ହେବେ। ଏହା ମଧ୍ୟ ଯୁବ କ୍ରୀଡାବିତ୍‌ମାନଙ୍କୁ ଟ୍ରଫି ଦେଖିବାକୁ ନିମନ୍ତ୍ରଣ କରିବାର ସୁଯୋଗ ଦେବ। ଏହା ଫଳରେ ସେମାନେ ଭବିଷ୍ୟତରେ ଭାରତୀୟ ଦଳରେ ସ୍ଥାନ ପାଇବାର ସ୍ୱପ୍ନ ଦେଖିବେ। ଭାରତ ଚତୁର୍ଥ ଥର ଏହି ଟ୍ରଫି ଜିଣି ଇତିହାସ ସୃଷ୍ଟି କରିବା ବୋଲି ମନ୍ତ୍ରୀ ଆଶା ପ୍ରକାଶ କରିଛନ୍ତି।

ମନ୍ତ୍ରୀ ଶ୍ରୀ ଠାକୁର ଆହୁରି କହିଛନ୍ତି ଯେ ଏହି ପ୍ରତିଯୋଗିତାକୁ ଚେନ୍ନାଇ ଭଲଭାବେ ଆୟୋଜନ କରିବେ। ଆମ ସରକାର ସହଯୋଗ ଭିତ୍ତିକ ତଥା ପ୍ରତିଯୋଗିତାମୂଳକ ସଂଘୀୟ ବ୍ୟବସ୍ଥାରେ ବିଶ୍ୱାସ କରେ। ତେଣୁ ଏହି ପ୍ରତିଯୋଗିତାକୁ ସଫଳ କରିବାକୁ କେନ୍ଦ୍ର ସରକାର ସମସ୍ତ ସହଯୋଗ ଯୋଗାଇଦେବେ। ଖେଳକୁଦ କ୍ଷେତ୍ରରେ ମଧ୍ୟ ଏହି ସଂଘୀୟ ସହଯୋଗ ବଜାୟ ରହିବ। ସବୁ ଦେଶର ପ୍ରତିଯୋଗୀ ଏହି ପ୍ରତିଯୋଗିତାରୁ ଉତ୍ତମ ଅନୁଭୂତି ନେଇ ଫେରିବେ ବୋଲି ସେ ଆଶା ପ୍ରକାଶ କରିଛନ୍ତି। ସେ ଆହୁରି କହିଛନ୍ତି ଯେ ଏହି ପ୍ରତିଯୋଗିତାରେ ସବୁ ଦଳ ଶ୍ରେଷ୍ଠତ୍ୱ ପ୍ରଦର୍ଶନ କରିବେ ଏବଂ ଶ୍ରେଷ୍ଠତମ ଦଳ ଟ୍ରଫି ପାଇବ ବୋଲି ତାଙ୍କର ପୂର୍ଣ୍ଣ ବିଶ୍ୱାସ ରହିଛି। ସେ ମଧ୍ୟ ହକି ଇଣ୍ଡିଆ ଓ ଅନ୍ୟ ସମସ୍ତ ସମ୍ପୃକ୍ତ ପକ୍ଷଙ୍କୁ ଏହି ପ୍ରତିଯୋଗିତା ଆୟୋଜନ ପାଇଁ ଶୁଭେଚ୍ଛା ଜ୍ଞାପନ କରିଛନ୍ତି।

ଆଜିର ଏହି କାର୍ଯ୍ୟକ୍ରମରେ ଭାରତୀୟ ହକି (ହକି ଇଣ୍ଡିଆ) ମହାସଂଘର ସଭାପତି ପଦ୍ମଶ୍ରୀ ଦିଲ୍ଲୀପ ତିର୍କୀ, ଅନୁଷ୍ଠାନର ମହାସଚିବ ଭୋଳାନାଥ ସିଂ,  କୋଷାଧ୍ୟକ୍ଷ ତଥା ଆୟୋଜକ ରାଜ୍ୟ ତାମିଲନାଡୁ ହକି ମହାସଂଘର ସଭାପତି ଓ କର୍ମକର୍ତ୍ତାମାନେ ଉପସ୍ଥିତ ଥିଲେ। ଏମାନଙ୍କ ବ୍ୟତୀତ ଭାରତୀୟ ହକି ଅଲିମ୍ପିଆନ ହରବିନ୍ଦର ସିଂହ, ଅଶୋକ ଦିୱାନ, ଜାଫର ଇକ୍‌ବାଲ, ରୋମିଓ ଜେନ୍ସସ,ଏମ.ପି ସିଂହ,ଏଚ୍‌ପିଏସ୍ ଚିମାନି, ଓ ବିନୀତ କୁମାର ପ୍ରମୁଖ କାର୍ଯ୍ୟକ୍ରମରେ ଭାଗ ନେଇଥିଲେ।

କାର୍ଯ୍ୟକ୍ରମ ଶେଷରେ ଟ୍ରଫିର ବିଭିନ୍ନ ରାଜ୍ୟ ଓ ସହର ଭ୍ରମଣ ଅଭିଯାନର ଶୁଭାରମ୍ଭ କରାଯାଇଥିଲା। ଏହା ଦିଲ୍ଳୀ, ଚଣ୍ଡିଗଡ, ଗୁଆହାଟି, ପାଟନା, ଭୁବନେଶ୍ୱର, ରାଂଚି, ବେଙ୍ଗାଲୁର, ତ୍ରିଭେନ୍ଦ୍ରମ ଦେଇ ଆୟୋଜନକାରୀ ନଗରୀ ଚେନ୍ନାଇରେ ପହଞ୍ôଚବେ। ତାମିଲନାଡୁର ସବୁ ଜିଲ୍ଲା ସଦର ମହକୁମାକୁ ଟ୍ରଫିକୁ ନିଆଯିବ। ଏହି “ ପାସ୍ ଦି ବଲ୍ ଟ୍ରଫି ଟୁର” ଅଭିଯାନ ହକି ପ୍ରେମୀଙ୍କ ମଧ୍ୟରେ ଆଗ୍ରହ ବଢାଇବାକୁ  ଆୟୋଜିତ ହୋଇଛି।

ପୁରୁଷ ହକିର ଏହି ଏସିଆନ ଚାମ୍ପିଅନସିପ୍ ଟ୍ରଫିକୁ ପ୍ରସ୍ତୁତ କରିଛନ୍ତି ବିଶିଷ୍ଟ ଟ୍ରଫି ଡିଜାଇନର ସଂଜୟ ଶର୍ମା। ଏଥିରେ କଂସା, ପିତ୍ତଳ, ଆଲୁମିନିୟମ, ତମ୍ବାରେ ପ୍ରସ୍ତୁତ ସାମଗ୍ରୀ ସବୁ ବ୍ୟବହୃତ ହୋଇଛି। ଏହା ଉପରେ ସୁନ୍ଦର କ୍ରିଷ୍ଟାଲ ସହିତ  ନିକେଲ ଓ ସୁନା ଛାଉଣୀ ସଯତ୍ନେ କରାଯାଇ ଏହାକୁ ଅତି ଆକର୍ଷଣୀୟ କରାଯାଇଛି। ଦେଖିବାକୁ ଓ ଡିଜାଇନ ଦୃଷ୍ଟିରୁ ଏହା ଅତ୍ୟନ୍ତ ଆକର୍ଷଣୀୟ ହୋଇଛି।

ଆସନ୍ତା ଅଗଷ୍ଟ ୩ତାରିଖରୁ ଏହି ଟୁର୍ଣ୍ଣାମେଣ୍ଟ ଚେନ୍ନାଇରେ ଆରମ୍ଭ ହୋଇ ସେ ମାସ ୧୨ ତାରିଖ ଯାଏ ଚାଲିବ। ଏହି ପ୍ରତିଯୋଗିତାରେ ଭାରତ ବ୍ୟତୀତ କୋରିଆ, ମାଲେସିଆ, ପାକିସ୍ତାନ, ଜାପାନ ଓ ଚୀନ ଭାଗ ନେଉଛନ୍ତି। ପ୍ରତ୍ୟେକ ଦିନରେ ମ୍ୟାଚକୁ ଷ୍ଟାର ସ୍ପୋର୍ଟ୍‌ସ ଚାନେଲ ମାଧ୍ୟମରେ ସିଧା ପ୍ରସାରଣ କରାଯିବ। ‘ଡିସ୍‌ନେ-ହଟ୍‌ଷ୍ଟାର’ ମଧ୍ୟ ଏହା ସିଧାପ୍ରସାରଣ କରିବ। ଭାରତ ବାହାରେ ଏହି ପ୍ରତିଯୋଗିତାର ମ୍ୟାଚ ସିଧା ଦର୍ଶକଙ୍କୁ ଦେଖାଇବାର ବ୍ୟବସ୍ଥା କରାଯାଇଛି।

ଦିଲ୍ଲୀ: କେନ୍ଦ୍ର ଯୁବ ବ୍ୟାପାର ଏବଂ କ୍ରୀଡ଼ା ମନ୍ତ୍ରୀ ଅନୁରାଗ ସିଂହ ଠାକୁର ଆଜି ଲକ୍ଷ୍ନୌର ଗୋମତି ନଗର ସ୍ଥିତ ଇନ୍ଦିରା ଗାନ୍ଧୀ ପ୍ରତିଷ୍ଠାନରେ ଖେଲୋ ଇଣ୍ଡିଆ ୟୁନିଭରସିଟି ଗେମ୍ସ ( ଖେଲୋ ଇଣ୍ଡିଆ ବିଶ୍ୱ ବିଦ୍ୟାଳୟ ସ୍ତରୀୟ କ୍ରୀଡା) ୨୦୨୨ (କେଆଇୟୁଜି ୨୦୨୧)ର ଲୋଗୋ, ଜର୍ସି, ମାସ୍କଟ ଏବଂ ସଂଗୀତ ଲଞ୍ଚ କରିବେ।

ଖେଲୋ ଇଣ୍ଡିଆ ବିଶ୍ୱ ବିଦ୍ୟାଳୟ ସ୍ତରୀୟ କ୍ରୀଡାର ତୃତୀୟ ସଂସ୍କରଣ ମେ ୨୩ ରେ ଆରମ୍ଭ ହୋଇ ଜୁନ୍ ୩ ପର୍ଯ୍ୟନ୍ତ ଚାଲିବ; ଉଦଘାଟନୀ ସମାରୋହ ମେ ମାସ ୨୫ ତାରିଖରେ ଲକ୍ଷ୍ନୌର ବାବୁ ବନାରସୀ ଦାସ ବିଶ୍ୱ ବିଦ୍ୟାଳୟ ଠାରେ ଅନୁଷ୍ଠିତ ହେବ ବୋଲି ଧାର୍ଯ୍ୟ କରାଯାଇଛି।

ଉତ୍ତର ପ୍ରଦେଶର ମୁଖ୍ୟମନ୍ତ୍ରୀ ଯୋଗୀ ଆଦିତ୍ୟନାଥ, ଯୁବ ବ୍ୟାପାର ତଥା କ୍ରୀଡ଼ା ରାଷ୍ଟ୍ର ମନ୍ତ୍ରୀ ନିଶିଥ ପ୍ରମାଣିକ, ଉତ୍ତର ପ୍ରଦେଶର କ୍ରୀଡ଼ା ମନ୍ତ୍ରୀ ଗିରିଶ ଚନ୍ଦ୍ର ଯାଦବଙ୍କ ସମେତ ବହୁ ମାନ୍ୟଗଣ୍ୟ ବ୍ୟକ୍ତି ମଧ୍ୟ ଏହି କାର୍ଯ୍ୟକ୍ରମରେ ଯୋଗଦେବେ।

କେଆଇୟୁଜିର ଆଗାମୀ ସଂସ୍କରଣରେ ସାରା ଦେଶର ୨୦୦+ ବିଶ୍ୱ ବିଦ୍ୟାଳୟରୁ ୪୭୦୦ ରୁ ଅଧିକ କ୍ରୀଡାବିତ୍ ଅଂଶଗ୍ରହଣ କରିବେ ବୋଲି ଆଶା କରାଯାଉଛି ଏବଂ ମୋଟ ଅଂଶଗ୍ରହଣ ୭୦୦୦ ରୁ ଅଧିକ ହେବ। ଏହି ସଂସ୍କରଣରେ ୨୧ ପ୍ରକାରର ଖେଳ ଖେଳାଯିବ, ଯାହା ବିଶ୍ୱ ବିଦ୍ୟାଳୟ ଖେଳ ଇତିହାସରେ ସର୍ବାଧିକ। ରୋଇଂ ମଧ୍ୟ ପ୍ରଥମ ଥର ପାଇଁ ଏଥିରେ ସାମିଲ୍ କରାଯାଉଛି।

ରାଜ୍ୟର ରାଜଧାନୀ ଲକ୍ଷ୍ନୌ ବ୍ୟତୀତ ବାରଣାସୀ, ନୋଏଡା ଏବଂ ଗୋରଖପୁର ଠାରେ ଖେଳ ଅନୁଷ୍ଠିତ ହେବ। ନୂଆଦିଲ୍ଲୀ ଠାରେ ଡକ୍ଟର କର୍ଣ୍ଣି ସିଂହ ଶୁଟିଂ ରେଞ୍ଜରେ ଶୁଟିଂ ପ୍ରତିଯୋଗିତା ଆୟୋଜିତ ହେବ। ପ୍ରଥମ ଥର ପାଇଁ ରୋଇଂ ଭଳି ଜଳ କ୍ରୀଡା ଖେଲୋ ଇଣ୍ଡିଆ ବିଶ୍ୱ ବିଦ୍ୟାଳୟ ସ୍ତରୀୟ କ୍ରୀଡାର ଏକ ଅଂଶ ବିଶେଷ ହେବ। କର୍ଣ୍ଣାଟକ ଠାରେ ଆୟୋଜିତ ହୋଇଥିବା ଖେଲୋ ଇଣ୍ଡିଆ ବିଶ୍ୱ ବିଦ୍ୟାଳୟ ସ୍ତରୀୟ କ୍ରୀଡାର ପୂର୍ବ ସଂସ୍କରଣର ଦୁଇଟି ଖେଳ ଭାବରେ ଦୁଇଟି ସ୍ୱଦେଶୀ କ୍ରୀଡ଼ା ମାଲଖମ୍ବ ଏବଂ ଯୋଗାସନକୁ ଅନ୍ତର୍ଭୁକ୍ତ କରା ଯାଇଥିଲା ଏବଂ ସେଗୁଡିକ ଏହି ସଂସ୍କରଣର ମଧ୍ୟ ଅଂଶ ହେବ। ଖେଳର ସିଧା ପ୍ରସାରଣ ଡିଡି ସ୍ପୋର୍ଟସ୍ ଏବଂ ଓଟିଟି ପ୍ଲାଟଫର୍ମରେ ହେବ।

ନୂଆଦିଲ୍ଲୀ: କେନ୍ଦ୍ର ଯୁବ ବ୍ୟାପାର ତଥା କ୍ରୀଡ଼ା ମନ୍ତ୍ରୀ ଅନୁରାଗ ସିଂହ ଠାକୁର ଆଜି ନୂଆଦିଲ୍ଲୀର ଜେଏଲ୍‌ଏନ୍ ଷ୍ଟାଡିୟମରେ ଏକ ମେଗା ଉଦଘାଟନୀ ସମାରୋହରେ ଖେଲୋ ଇଣ୍ଡିଆ ଦଶ୍‍ କା ଦମ୍ କାର୍ଯ୍ୟକ୍ରମର ଶୁଭାରମ୍ଭ କରିଛନ୍ତି। ଅନ୍ତର୍ଜାତୀୟ ମହିଳା ଦିବସ ୨୦୨୩ ଉତ୍ସବର ଏକ ଅଂଶ ଭାବରେ ଆୟୋଜିତ ଏହି ପ୍ରତିଯୋଗିତା ଆଜି ଦେଶର ୫୦ ରୁ ଅଧିକ ସହରରେ ଏକକାଳୀନ ଭାବେ ଆରମ୍ଭ ହୋଇଛି।

ଅନେକ ମାସରୁ ସାରା ଦେଶରେ ଚାଲୁଥିବା ଏକାଧିକ ଖେଲୋ ଇଣ୍ଡିଆ ମହିଳା ଲିଗ୍ ର ସଫଳତାର ଉପରକୁ ଯାଇ, ଦଶ୍‍ କା ଦମ୍ ପଦକ୍ଷେପ ସାରା ଦେଶରେ ହଜାର ହଜାର ମହିଳାଙ୍କ ପାଇଁ ଅଧିକ ସୁଯୋଗ ସୃଷ୍ଟି କରିବ। ୧୦ ରୁ ୩୧ ମାର୍ଚ୍ଚ ମଧ୍ୟରେ ମୋଟ ୧୦ ଟି କ୍ରୀଡ଼ାରେ ଭାରତର ୨୬ ଟି ରାଜ୍ୟରେ ଅବସ୍ଥିତ ୫୦ ରୁ ଅଧିକ ସହରରେ ଏହି ପ୍ରତିଯୋଗିତାରେ ପାଖାପାଖି ୧୫୦୦୦ ଆଥଲେଟ୍ ଅଂଶଗ୍ରହଣ କରିବେ। ଏହି କାର୍ଯ୍ୟକ୍ରମ ପାଇଁ ଭାରତ ସରକାର ମୋଟ ୧ କୋଟି ଟଙ୍କା ମଞ୍ଜୁର କରିଛନ୍ତି।

ଶୁକ୍ରବାର ସକାଳେ ଏହି କାର୍ଯ୍ୟକ୍ରମର ଗ୍ରାଣ୍ଡ୍ ଉଦଘାଟନୀ ଉତ୍ସବରେ ଅନ୍ୟମାନଙ୍କ ମଧ୍ୟରେ କେନ୍ଦ୍ର କ୍ରୀଡ଼ା ମନ୍ତ୍ରଣାଳୟ ଏବଂ ସାଇର ମାନ୍ୟଗଣ୍ୟ ବ୍ୟକ୍ତିଙ୍କ ସହିତ କ୍ରୀଡା ପ୍ରାଧିକରଣର ମହାନିର୍ଦ୍ଦେଶକ ସନ୍ଦୀପ ପ୍ରଧାନ ମଧ୍ୟ ଉପସ୍ଥିତ ଥିଲେ। ଉଦଘାଟନୀ ସମାରୋହରେ ଜେଏଲ୍‌ଏନ୍ ଷ୍ଟାଡିୟମରେ ପ୍ରାୟ ୨୦୦୦ ମହିଳା ଆଥଲେଟ୍ ମଧ୍ୟ ଯୋଗ   ଦେଇଥିଲେ, ଯେଉଁଥିରେ ଖେଲୋ ଇଣ୍ଡିଆ ଦଶ୍‍ କା ଦମ୍ ଅଂଶଗ୍ରହଣକାରୀ ଓ ଶିବିରାର୍ଥୀ ରହିଥିଲେ।

ଶ୍ରୀ ଠାକୁର କହିଛନ୍ତି, ବଢାଓ କଦମ୍‍ ହେଉଛି ଖେଲୋ ଇଣ୍ଡିଆ ଦଶ୍‍ କା ଦମ୍ କାର୍ଯ୍ୟକ୍ରମର ଟ୍ୟାଗଲାଇନ୍ ଏବଂ ଏହା କ୍ରୀଡ଼ା ମାଧ୍ୟମରେ ମହିଳାମାନଙ୍କୁ ସଶକ୍ତ କରିବା ପାଇଁ ଆମେ ନେଇଥିବା ଅନ୍ୟ ଏକ ପ୍ରମୁଖ ପଦକ୍ଷେପ। ସାରା ଦେଶରେ ୧୪ ଟି କ୍ରୀଡା ମଧ୍ୟରେ ମହିଳା ଲିଗ୍ ଆୟୋଜନ କରିବାକୁ ସାଇ ର ପ୍ରୟାସ, ଅନେକ ମାସରୁ ୨୦,୦୦୦ ଶକ୍ତିଶାଳୀ ମହିଳା ଆଥଲେଟ୍‌ଙ୍କୁ ସେମାନେ ଆବଶ୍ୟକ କରୁଥିବା ସୁବିଧା ଏବଂ ସଶକ୍ତିକରଣ ପାଇଁ ସୁଯୋଗ ଦେଇଛନ୍ତି। ମୁଁ ମଧ୍ୟ ଖୁସି ଯେ ଏହି ପ୍ରତିଯୋଗିତା ଗଭୀର ସଫଳତା ପାଇଛି ବୋଲି କେନ୍ଦ୍ର ମନ୍ତ୍ରୀ କହିଛନ୍ତି।

ମେରି କୋମ ଏବଂ ପିଭି ସିନ୍ଧୁଙ୍କ ପରି ପ୍ରତିଭାବାନ ଆଥଲେଟ୍‌ଙ୍କ ଉଦାହରଣ ଦେଇ ଶ୍ରୀ ଠାକୁର କହିଛନ୍ତି, ମେରି କୋମଙ୍କ ଠାରୁ ଲୋଭଲିନାଙ୍କ ପର୍ଯ୍ୟନ୍ତ ନିଖତ ଏବଂ ପିଭି ସିନ୍ଧୁ ସାଇନା ନେହୱାଲ ପର୍ଯ୍ୟନ୍ତ ଏହି ଝିଅମାନେ ବାରମ୍ବାର ଭାରତ ପାଇଁ ଗୌରବ ଆଣି ଦେଇଛନ୍ତି। ବର୍ତ୍ତମାନ ଏହି ପରି ପ୍ରତିଯୋଗିତା ଅଧିକ ସୁପରଷ୍ଟାର ସୃଷ୍ଟି କରିବ। ସର୍ବୋତ୍ତମ ପ୍ରତିଯୋଗିତା ଏବଂ କ୍ରୀଡା କ୍ଷେତ୍ର ଯୋଗାଇବା ପାଇଁ ଆମେ ସବୁକିଛି କରୁଛୁ, ବର୍ତ୍ତମାନ ସମସ୍ତ ମହିଳାଙ୍କ ନିଜର ଉତ୍କୃଷ୍ଟତା ଦେଖାଇବାର ସମୟ ଆସିଛି।

ଉଦଘାଟନୀ ସମାରୋହର ଅନ୍ୟତମ ମୁଖ୍ୟ ଆକର୍ଷଣ ହେଲା ଖେଲୋ ଇଣ୍ଡିଆ ଦଶ୍‍ କା ଦମ୍‍ କାର୍ଯ୍ୟକ୍ରମକୁ ଦିଲ୍ଲୀର ୮ ବର୍ଷ ବୟସ୍କ ଟ୍ରାକ ଏବଂ ଫିଲ୍ଡ ଆଥଲେଟ୍ ସାକ୍ଷୀଙ୍କ ସହ ଶ୍ରୀ ଅନୁରାଗ ସିଂହ ଠାକୁର ପତାକା ଦେଖାଇ ଉଦ୍‍ଘାଟନ କରିଥିଲେ। ଭବିଷ୍ୟତରେ କ୍ରୀଡ଼ା ତାଲିକାରେ ଅନ୍ତର୍ଭୁକ୍ତ ହେବ: ଖୋ-ଖୋ, ସନ୍ତରଣ, ଆଥଲେଟିକ୍ସ, ଉସୁ, ତୀରନ୍ଦାଜ, ଅଶୀଚାଳନା, ଜୁଡୋ, ଭାରୋତ୍ତୋଳନ, ହକି ଏବଂ ଯୋଗାସାନ।

ନୂଆଦିଲ୍ଲୀ: କେନ୍ଦ୍ର ସୂଚନା ଓ ପ୍ରସାରଣ ତଥା କ୍ରୀଡା ଓ ଯୁବବ୍ୟାପାର ମନ୍ତ୍ରୀ ଅନୁରାଗ ସିଂହ ଠାକୁର ଆଜି ଜାମ୍ମୁ -କାଶ୍ମୀରର ଉପରାଜ୍ୟପାଳ ମନୋଜ ସିହ୍ନାଙ୍କ ସହିତ ତୃତୀୟ ଖେଲୋ ଇଣ୍ଡିଆ ଶୀତକାଳୀନ କ୍ରୀଡା ପ୍ରତିଯୋଗିତାର ମାସ୍କଟ, ଥିମ୍ ସଙ୍ଗ୍ ଓ ଜର୍ସିକୁ ଜାମ୍ମୁ ରାଜଭବନଠାରେ ଉନ୍ମୋଚନ କରିଛନ୍ତି।

ଏହି କାର୍ଯ୍ୟକ୍ରମ ଅବସରରେ ମନ୍ତ୍ରୀ ଅନୁରାଗ ସିଂହ ଠାକୁର କହିଥିଲେ ଯେ ଖେଲୋ ଇଣ୍ଡିଆ ଶୀତକାଳୀନ କ୍ରୀଡା ପ୍ରତିଯୋଗିତା ଖେଲୋ ଇଣ୍ଡିଆ ଅଭିଯାନର ଏକ ଅଂଶବିଶେଷ। ଏହା ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କ ବିଚାର ପ୍ରସୂତ ଏକ କାର୍ଯ୍ୟକ୍ରମ ଯାହା ଦେଶରେ ଖେଳକୁଦ ପ୍ରତି ଯୁବସମାଜକୁ ଆକର୍ଷିତ କରି ଭାରତକୁ ବିଶ୍ୱର ଏକ କ୍ରୀଡା ଶକ୍ତିରେ ପରିଣତ କରିବାକୁ ଉଦ୍ଦିଷ୍ଟ।

ଶ୍ରୀ ଠାକୁର ଆହୁରି କହିଥିଲେ, ଗତ ଆଠବର୍ଷ ଧରି କ୍ରୀଡା ପ୍ରତି ଲୋକଙ୍କର ମନୋଭାବ ବଦଳୁଛି ଏବଂ ପ୍ରତ୍ୟେକ ପରିବାର ନିଜର ପୁଅଝିଅଙ୍କୁ ଖେଳକୁଦ ପ୍ରତି ପ୍ରୋତ୍ସାହିତ କରୁଛନ୍ତି। ଖେଲୋ ଇଣ୍ଡିଆ ଓ ଫିଟ୍ ଇଣ୍ଡିଆ ଅଭିଯାନ ଯୋଗୁଁ ଏହା ସମ୍ଭବ ହୋଇଛି। ଏହି ଦୁଇ କାର୍ଯ୍ୟକ୍ରମ ପ୍ରଧାନମନ୍ତ୍ରୀଙ୍କ ଦ୍ୱାରା ଆରମ୍ଭ କରାଯାଇଛି।

ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କ ନେତୃତ୍ୱରେ ଭାରତରେ କ୍ରୀଡା ଭିତ୍ତିଭୂମିର କେବଳ ବିକାଶ ଘଟିନାହିଁ, ଯୁବ ସମାଜ ଖେଳକୁଦ ପ୍ରତି ପୂର୍ବାପେକ୍ଷା ଅଧିକ ଆକର୍ଷିତ ହୋଇଛନ୍ତି। ଭାରତର ଖେଳାଳିମାନେ ବଡ ବଡ ପ୍ରତିଯୋଗିତା, ବିଶେଷକରି ଆର୍ନ୍ତଜାତିକସ୍ତରର କ୍ରୀଡା କାର୍ଯ୍ୟକ୍ରମରେ ଭାଗ ନେବା ପୂର୍ବରୁ ଅଗ୍ରଣୀ କ୍ରୀଡାବିତ୍ମାନଙ୍କ ସହ ମିଶିବା ବା ଭାବବିନିମୟ କରିବା ସୁଯୋଗ ପାଇ ନିଜର ଆତ୍ମବିଶ୍ୱାସ ବଢାଉଛନ୍ତି। ଏହାଫଳରେ ସେମାନେ ଆନ୍ତର୍ଜାତିକ ସ୍ତରର ଖେଳକୁଦ ପ୍ରତିଯୋଗିତାରେ ଭଲ ପ୍ରଦର୍ଶନ କରି ଭାରତକୁ ଗର୍ବିତ କରୁଛନ୍ତି। ଆଗରୁ ଆମ କ୍ରୀଡାବିତଙ୍କୁ ଏଭଳି ସୁଯୋଗ ସୁବିଧା ମିଳୁ ନ ଥିଲା।

ଖେଲୋ ଇଣ୍ଡିଆ ଶୀତକାଳୀନ କ୍ରୀଡା ସମ୍ପର୍କରେ ଉଲ୍ଲେଖ କରି ମନ୍ତ୍ରୀ ଶ୍ରୀ ଠାକୁର କହିଛନ୍ତି ଯେ ଜାମ୍ମୁ କାଶ୍ମୀରର ଗୁଲମାର୍ଗରେ ଚଳିତମାସ ୧୦ରୁ ୧୪ତାରିଖ ପର୍ଯ୍ୟନ୍ତ ଏହି ପ୍ରତିଯୋଗିତା ଆୟୋଜିତ ହେବ। ଦେଶ ୨୯ରାଜ୍ୟ ଓ କେନ୍ଦ୍ରଶାସିତ ଅଞ୍ଚଳରୁ ୧୫୦୦ରୁ ଅଧିକ ପ୍ରତିଯୋଗୀ ଏଥିରେ ଭାଗ ନେବେ। ଏହା ଦ୍ୱାରା ଜାମ୍ମୁ-କାଶ୍ମୀର ଯୁବକ ଯୁବତୀମାନେ କ୍ରୀଡା ପ୍ରତି ଆକର୍ଷିତ ହେବା ସହିତ ଏହି କେନ୍ଦ୍ର ଶାସିତ ଅଞ୍ଚଳରେ ପର୍ଯ୍ୟଟନର ବିକାଶ ଘଟିବ। ଖେଳାଳୀ ଓ କ୍ରୀଡା ଅଧିକାରୀମାନେ ଜାମ୍ମୁ-କାଶ୍ମୀରର ଅପରୂପ ସୌନ୍ଦର୍ଯ୍ୟ ଉପଭୋଗ କରିବାର ସୁଯୋଗ ପାଇବା ସହିତ ବିଗତ କେତେବର୍ଷ ମଧ୍ୟରେ ଏଠାରେ ଘଟିଥିବା ପରିବର୍ତ୍ତନକୁ ଦେଖିପାରିବେ। ସେମାନେ ଜାମ୍ମୁ-କାଶ୍ମୀରର ପର୍ଯ୍ୟଟନ, ଶାନ୍ତି ଏବଂ ସ୍ଥିରତାର ବ୍ରାଣ୍ଡ ଆମ୍ବାସଡାର ହୋଇପାରିବେ ବୋଲି ଶ୍ରୀ ଠାକୁର କହିଛନ୍ତି।

ଖେଲୋ ଇଣ୍ଡିଆ କ୍ରୀଡା ପ୍ରତିଯୋଗିତାର ମାସ୍କଟ, ଥିମ୍ ସଙ୍ଗ୍ ଓ ଜର୍ସି ଉନ୍ମୋଚନ ଅବସରରେ ଉପରାଜ୍ୟପାଳ ମନୋଜ ସିହ୍ନାଙ୍କୁ ଅଭିନନ୍ଦନ ଜଣାଇ ଶ୍ରୀ ଠାକୁର କହିଛନ୍ତି ଯେ ଏହି ପ୍ରତିଯୋଗିତା ସମଗ୍ର ଦେଶକୁ ଏକ ଭଲ ସଙ୍କେତ ପଠାଉଛି। ଏହି ପ୍ରତିଯୋଗିତାର ଆନନ୍ଦ ଓ ଅଭିଜ୍ଞତା ଉଠାଇବାକୁ ସମଗ୍ର ଜାମ୍ମୁ-କାଶ୍ମୀର ଅତ୍ୟନ୍ତ ଆଗ୍ରହର ସହିତ ଅପେକ୍ଷା କରିଛି। ଏହି ପ୍ରତିଯୋଗିତାରେ ଉପଲବ୍ଧ ସୁବିଧା ସୁଯୋଗର ଫାଇଦା ଉଠାଇ ଭାରତର ଯୁବ କ୍ରୀଡାବିତ୍ମାନେ ଅଲିମ୍ପିକ୍ସ ଓ ଅନ୍ୟାନ୍ୟ ଆନ୍ତର୍ଜାତିକ ପ୍ରତିଯୋଗିତାରେ ଭାଗନେବାକୁ ନିଜକୁ ପ୍ରସ୍ତୁତ କରିପାରିବେ।

ଉନ୍ମୋଚନ କାର୍ଯ୍ୟକ୍ରମ ଅବସରରେ ଉପରାଜ୍ୟପାଳ ଶ୍ରୀ ସିହ୍ନା କହିଥିଲେ ଯେ ପିଏମ୍ଡିପି ଅଧୀନରେ ଜାମ୍ମୁ-କାଶ୍ମୀରର କୋଣ ଅନୁକୋଣରେ କ୍ରୀଡା ଭିତ୍ତିଭୂମିର ଉନ୍ନତି କରାଯାଇଛି। ଏହାଫଳରେ ଯୁବ ସମାଜ କ୍ରୀଡା ପ୍ରତି ବିଶେଷ ଆକର୍ଷିତ ହେଉଛନ୍ତି। ଏହି କେନ୍ଦ୍ର ଶାସିତ ଅଞ୍ଚଳର ପ୍ରତ୍ୟେକ ପଞ୍ଚାୟତରେ କ୍ରୀଡା ଭିତ୍ତିଭୂମି ଓ ଖେଳକୁଦର ସୁବିଧା କରାଯାଇଛି। ଏଥିରେ ୫୦ଲକ୍ଷ ଯୁବକଯୁବତୀଙ୍କୁ ନିୟୋଜିତ କରିବାର ଯେଉଁ ଲକ୍ଷ୍ୟ ରଖାଯାଇଥିଲା ତାହା ପୂରଣ ହୋଇଛି। ନୂଆ କ୍ରୀଡାନୀତି ମାଧ୍ୟମରେ ଜାମ୍ମୁ-କାଶ୍ମୀର କ୍ରୀଡାବିତ୍ମାନଙ୍କୁ ଆକର୍ଷଣୀୟ ନିଯୁକ୍ତି ସୁଯୋଗ ଯୋଗାଇ ଦେବାର ବ୍ୟବସ୍ଥା କରାଯାଇଛି।

ଗୁଲମାର୍ଗରେ ଚଳିତମାସ ୧୦ରୁ ୧୪ତାରିଖ ଯାଏ ଆୟୋଜିତ ହେବାକୁ ଥିବା ଏହି ଖେଲୋ ଇଣ୍ଡିଆ ଶୀତକାଳୀନ କ୍ରୀଡା ପ୍ରତିଯୋଗିତାକୁ କେନ୍ଦ୍ର କ୍ରୀଡା ଓ ଯୁବବ୍ୟାପାର ମନ୍ତ୍ରଣାଳୟ ସାହାଯ୍ୟ ସହଯୋଗ ଯୋଗାଉଛି। ଜାମ୍ମୁ-କାଶ୍ମୀର କ୍ରୀଡା ପରିଷଦ ଓ ଜାମ୍ମୁ କାଶ୍ମୀର ଉଇଣ୍ଟର ଗେମ୍ସ ଆସୋସିଏସନ ଏହି ପ୍ରତିଯୋଗିତାକୁ ମିଳିତଭାବେ ଆୟୋଜନ କରୁଛି।

ସମଗ୍ର ଦେଶରୁ ୧୫୦୦ରୁ ଅଧିକ କ୍ରୀଡାବିତ୍ ଏହି ପ୍ରତିଯୋଗିତାରେ ଭାଗ ନେଉଛନ୍ତି। ନ’ଟି ଖେଳ ଏଥିରେ ସ୍ଥାନ ପାଇଛି। ଜାମ୍ମୁ-କାଶ୍ମୀରରେ ମଧ୍ୟ ଖେଲୋ ଇଣ୍ଡିଆ ଶୀତକାଳନୀ କ୍ରୀଡା ପ୍ରତିଯୋଗିତା ୨୦୨୦ରେ ସଫଳତାର ସହିତ ଆୟୋଜିତ ହୋଇଥିଲା। ଏବେ ଏହି ଦ୍ୱିତୀୟ ସଂସ୍କରଣକୁ ସମ୍ପୂର୍ଣ୍ଣ ସଫଳ କରିବା ପାଇଁ ସବୁମନ୍ତେ ଉଦ୍ୟମ କରାଯାଉଛି। (ପିଆଇବି)