Tag: ଅନୁରାଗ ସିଂହ ଠାକୁର

ଦିଲ୍ଲୀ: ଯୁବ ବ୍ୟାପାର ବିଭାଗ ୧୨ ରୁ ୧୯ ଅକ୍ଟୋବର ୨୦୨୨ ପର୍ଯ୍ୟନ୍ତ ଭାରତ ପରିଭ୍ରମଣରେ ଆସିଥିବା ବାଂଲାଦେଶର ୧୦୦ ସଦସ୍ୟ ବିଶିଷ୍ଟ ଯୁବ ପ୍ରତିନିଧି ମଣ୍ଡଳୀଙ୍କୁ ଆତିଥ୍ୟ ପ୍ରଦାନ କରିଥିଲା। ପରିଭ୍ରମଣର ଶେଷ ଦିନରେ, କେନ୍ଦ୍ର ଯୁବ ବ୍ୟାପାର ଓ କ୍ରୀଡ଼ା ମନ୍ତ୍ରୀ ଅନୁରାଗ ସିଂହ ଠାକୁର ବାଂଲାଦେଶର ଯୁବ ପ୍ରତିନିଧି ମଣ୍ଡଳୀଙ୍କ ସମ୍ମାନ ଉଦ୍ଦେଶ୍ୟରେ ନୂଆ ଦିଲ୍ଲୀ ଠାରେ ଏକ ରାତ୍ରି ଭୋଜନର ବ୍ୟବସ୍ଥା ମଧ୍ୟ କରିଥିଲେ। ଯୁବ ବ୍ୟାପାର ଏବଂ କ୍ରୀଡ଼ା ରାଷ୍ଟ୍ର ମନ୍ତ୍ରୀ ନିଶିଥ ପ୍ରମାଣିକ ମଧ୍ୟ ଏହି ଉତ୍ସବରେ ଯୋଗ ଦେଇଥିଲେ।

ଭାରତ ସରକାରଙ୍କ ଯୁବ ବ୍ୟାପାର ଏବଂ କ୍ରୀଡ଼ା ମନ୍ତ୍ରୀଙ୍କ ସହ ଆଲୋଚନା ସମୟରେ ବାଂଲାଦେଶ ପ୍ରତିନିଧି ମଣ୍ଡଳୀ ଏହି କାର୍ଯ୍ୟକ୍ରମକୁ ବହୁତ ପ୍ରଶଂସା କରିଥିଲେ। ଏହି ପ୍ରତିନିଧି ଦଳ ବାଂଲାଦେଶର ବିଭିନ୍ନ ସାଂସ୍କୃତିକ କାର୍ଯ୍ୟକ୍ରମ ମଧ୍ୟ ପ୍ରଦର୍ଶନ କରିଥିଲେ। ଭାରତୀୟ କଳାକାରମାନେ ଏହି ରଙ୍ଗାରଙ୍ଗ ସନ୍ଧ୍ୟାରେ ମଧ୍ୟ ନିଜର କଳାର ପ୍ରଦର୍ଶନ କରିଥିଲେ।
ପ୍ରତିନିଧି ମଣ୍ଡଳୀଙ୍କ ସହିତ ଆଲୋଚନା କରୁଥିବା ସମୟରେ ଶ୍ରୀ ଅନୁରାଗ ସିଂହ ଠାକୁର ଭାରତରେ ସେମାନଙ୍କର ଏକ ସପ୍ତାହ ରହଣୀକୁ ନେଇ ଯେଉଁ ଅନୁଭବ ରହିଥିଲା, ସେ ସମ୍ପର୍କରେ ସେମାନଙ୍କ ଠାରୁ ଶୁଣିଥିଲେ। ଏହି ଗସ୍ତ ଯୋଗୁଁ ଦୁଇ ଦେଶ ମଧ୍ୟରେ ସାଂସ୍କୃତିକ, ରାଜନୈତିକ ଏବଂ ଅର୍ଥନୈତିକ ସମ୍ବନ୍ଧର ଆଦାନପ୍ରଦାନ ମଧ୍ୟ ସୁଗମ ହୋଇଥିଲା ଏବଂ ଆଂଚଳିକ ସ୍ତରରେ ସହଯୋଗ ଏବଂ ବିଶ୍ୱ ଶାନ୍ତି ବୃଦ୍ଧିରେ ଏହା ସହଯୋଗ କରିଛି। ଭାରତ ଏବଂ ବାଂଲାଦେଶ ମଧ୍ୟରେ ଏକ ଦୀର୍ଘ ସାଧାରଣ ସାଂସ୍କୃତିକ, ଅର୍ଥନୈତିକ ଏବଂ ରାଜନୈତିକ ଇତିହାସ ରହିଛି। ଭାରତର ଏକ ବୃହତ୍ ଜନସଂଖ୍ୟା ମଧ୍ୟ ବାଂଲାଦେଶରେ ବ୍ୟବହୃତ ହେଉଥିବା ଭାଷାରେ କଥାବାର୍ତ୍ତା ହୋଇଥାନ୍ତି। ଉଭୟ ଦେଶ ପରସ୍ପର ସହିତ ଏକ ଗୁରୁତ୍ୱପୂର୍ଣ୍ଣ ସୀମା ବଂଟନ କରିଥାନ୍ତି। ଆମ ଭିତରେ ପରସ୍ପର ସହିତ ପୁରୁଣା, ଗଭୀର, ବନ୍ଧୁତ୍ୱପୂର୍ଣ୍ଣ ସମ୍ପର୍କ ରହିଛି ଏବଂ ଆମେ ସାଧାରଣ ସ୍ୱାର୍ଥକୁ ପରସ୍ପର ମଧ୍ୟରେ ବଂଟନ କରିଥାଉ।

ଏହି କାର୍ଯ୍ୟକ୍ରମର ଏକ ଅଂଶ ଭାବରେ ବାଂଲାଦେଶ ଯୁବ ପ୍ରତିନିଧି ମଣ୍ଡଳୀ ଭାରତର ରାଷ୍ଟ୍ରପତି ଦ୍ରୌପଦୀ ମୁର୍ମୁଙ୍କୁ ୧୪ ଅକ୍ଟୋବର ୨୦୨୨ ରେ ରାଷ୍ଟ୍ରପତି ଭବନରେ ସାକ୍ଷାତ କରିଥିଲେ। ପ୍ରତିନିଧି ମଣ୍ଡଳୀ ବିଭିନ୍ନ ସାଂସ୍କୃତିକ, ଶିକ୍ଷାଗତ ତଥା ଶିଳ୍ପାଂଚଳ ପରିଦର୍ଶନ କରିଥିଲେ, ଯେଉଁଥିରେ ଆଗ୍ରା ଠାରେ ତାଜମହଲ, ବେଙ୍ଗାଲୁରୁ ଠାରେ ଇଣ୍ଡିଆନ୍ ଇନଷ୍ଟିଚ୍ୟୁଟ୍ ଅଫ୍ ମ୍ୟାନେଜମେଂଟ ଏବଂ ମହୀଶୂର ସ୍ଥିତ ଇନଫୋସିସ୍ କାର୍ଯ୍ୟାଳୟ ଇତ୍ୟାଦି ଅନ୍ତର୍ଭୁକ୍ତ, ସେଠାରେ ସେମାନେ ଶିକ୍ଷାବିତ୍ ମାନଙ୍କ ସହିତ ଏବଂ ଉଦ୍ୟୋଗ ଜଗତର ନେତୃତ୍ୱ ମାନଙ୍କ ସହିତ କଥାବାର୍ତ୍ତା କରିଥିଲେ। ଏହି ପ୍ରତିନିଧି ମଣ୍ଡଳୀ ଛାତ୍ର ମାନଙ୍କ୍ରୁ, ଯୁବ ସାମ୍ବାଦିକ ମାନଙ୍କୁ, ଉଦ୍ୟୋଗୀ ମାନଙ୍କୁ, ସାମାଜିକ କର୍ମୀ ମାନଙ୍କୁ, ଡାକ୍ତର ଇତ୍ୟାଦିଙ୍କ ସମେତ ବିଭିନ୍ନ ପୃଷ୍ଠଭୂମିରୁ ଆସିଥିବା ଯୁବକ ମାନଙ୍କୁ ନେଇ ଗଠିତ ହୋଇଛି। ଏହି କାର୍ଯ୍ୟକ୍ରମ ଆମର ପଡୋଶୀ ରାଷ୍ଟ୍ର ମାନଙ୍କ ସହିତ ସୌହାର୍ଦ୍ଦ୍ୟପୂର୍ଣ୍ଣ ସମ୍ବନ୍ଧ ଗୁଡିକୁ ପ୍ରୋତ୍ସାହିତ କରିବା କ୍ଷେତ୍ରରେ ଅସୀମ ସଦ୍ଭାବନା ଏବଂ ସକାରାତ୍ମକ ଶକ୍ତି ସୃଷ୍ଟି କରିଥାଏ।

ଯୁବ ବ୍ୟାପାର ଏବଂ କ୍ରୀଡା ମନ୍ତ୍ରଣାଳୟର ଯୁବ ବ୍ୟାପାର ବିଭାଗ ଅନ୍ୟ ଦେଶ ଗୁଡିକର ଏବଂ ବିଭିନ୍ନ ଅନ୍ତର୍ଜାତୀୟ ଏଜେନ୍ସି /ସଙ୍ଗଠନ ଗୁଡିକ ସହଯୋଗରେ ଯୁବପିଢ଼ିଙ୍କ ମଧ୍ୟରେ ଏକ ଅନ୍ତର୍ଜାତୀୟ ଦୃଷ୍ଟିକୋଣ ସୃଷ୍ଟି କରିବାକୁ ବାଧ୍ୟ ଅଟେ। ଶାନ୍ତି ଏବଂ ବୁଝାମଣାକୁ ପ୍ରୋତ୍ସାହିତ କରିବାରେ ଯୁବକ ମାନଙ୍କୁ ଜଡିତ କରିବା ପାଇଁ ବିଭାଗ ଯୁବ ପ୍ରତିନିଧି ମଣ୍ଡଳର ଆନ୍ତର୍ଜାତୀୟ ବିନିମୟକୁ ଏକ ପ୍ରଭାବଶାଳୀ ଉପକରଣ ଭାବରେ ଗ୍ରହଣ କରିଛି। ବନ୍ଧୁତ୍ୱପୂର୍ଣ୍ଣ ସମ୍ପର୍କ ରହିଥିବା ଦେଶ ଗୁଡିକ ସହିତ ଯୁବ ପ୍ରତିନିଧି ମାନଙ୍କ ଆଦାନପ୍ରଦାନ ବିଭିନ୍ନ ଦେଶର ଯୁବକ ମାନଙ୍କ ମଧ୍ୟରେ ବିଚାରଧାରା, ମୂଲ୍ୟବୋଧ ଏବଂ ସଂସ୍କୃତିର ଆଦାନପ୍ରଦାନକୁ ପ୍ରୋତ୍ସାହିତ କରିବା ପାଇଁ ଏବଂ ଆନ୍ତର୍ଜାତୀୟ ବୁଝାମଣାର ବିକାଶ ନିମନ୍ତେ ଏକ ପାରସ୍ପରିକ ଆଧାରରେ କରାଯାଇଛି। ୨୦୦୬ ମସିହାରୁ ଏହି ବିଭାଗ ଚାଇନା ଏବଂ ଦକ୍ଷିଣ କୋରିଆ ସହିତ ଯୁବ ପ୍ରତିନିଧି ମଣ୍ଡଳୀଙ୍କୁ ନିୟମିତ ଆଦାନପ୍ରଦାନ କରି ଆସୁଛି।

୨୦୧୨ ମସିହାରେ, ଢାକା ସ୍ଥିତ ଭାରତର ହାଇ କମିଶନ ଭାରତ ସରକାରଙ୍କ ଯୁବ ବ୍ୟାପାର ଏବଂ କ୍ରୀଡା ମନ୍ତ୍ରଣାଳୟକୁ ୧୦୦ ସଦସ୍ୟ ବିଶିଷ୍ଟ ବାଂଲାଦେଶ ଯୁବ ପ୍ରତିନିଧି ମଣ୍ଡଳୀଙ୍କୁ ଭାରତକୁ ନିମନ୍ତ୍ରଣ କରିବା ଏବଂ ସେମାନଙ୍କ ହିତ ପାଇଁ ଐତିହାସିକ, ଶିକ୍ଷାଗତ, ବୈଷୟିକ ଏବଂ ଶିଳ୍ପାଂଚଳ ପ୍ରଦର୍ଶନ କରିବା ନିମନ୍ତେ ଏକ ଗସ୍ତ କାର୍ଯ୍ୟକ୍ରମର ବ୍ୟବସ୍ଥା କରିବାକୁ ଅନୁରୋଧ କରିଥିଲେ। ସେହି ଅନୁଯାୟୀ, ପ୍ରଥମ ଥର ପାଇଁ ୧୦୦ ସଦସ୍ୟ ବିଶିଷ୍ଟ ବାଂଲାଦେଶ ଯୁବ ପ୍ରତିନିଧି ମଣ୍ଡଳୀ ୨୦୧୨ ମସିହାରେ ୬ ରୁ ୧୩ ଅକ୍ଟୋବର ପର୍ଯ୍ୟନ୍ତ ଭାରତ ଗସ୍ତ କରିଥିଲେ। ଏହି ପରିପ୍ରେକ୍ଷୀରେ ଭାରତ ଗସ୍ତରେ ଆସିଥିବା ବର୍ତ୍ତମାନର ବାଂଲାଦେଶର ପ୍ରତିନିଧି ଦଳ ହେଉଛନ୍ତି ଅଷ୍ଟମ ଦଳ।

ଦିଲ୍ଲୀ: କେନ୍ଦ୍ର ଯୁବ ବ୍ୟାପାର ଏବଂ କ୍ରୀଡ଼ା ମନ୍ତ୍ରୀ ଅନୁରାଗ ସିଂହ ଠାକୁର ଆଜି ଦିଲ୍ଲୀର ଚାନ୍ଦିନୀ ଚୌକ ଠାରୁ ସ୍ୱଚ୍ଛ ଭାରତ ୨୦୨୨ କାର୍ଯ୍ୟକ୍ରମ ଅଧୀନରେ ସମଗ୍ର ଭାରତରେ ବୃହତ୍ ସ୍ୱଚ୍ଛତା ଅଭିଯାନର ଶୁଭାରମ୍ଭ କରିଛନ୍ତି। ଏହି ଅବସରରେ ଯୁବ ବ୍ୟାପାର ଏବଂ କ୍ରୀଡ଼ା ବିଭାଗର ସଚିବ ଶ୍ରୀ ସଞ୍ଜୟ କୁମାର ଏବଂ ମନ୍ତ୍ରଣାଳୟର ଅନ୍ୟ ଅଧିକାରୀ ମାନେ ମଧ୍ୟ ଉପସ୍ଥିତ ଥିଲେ। ସମାନ ଧରଣର ସ୍ୱଚ୍ଛତା ଅଭିଯାନ ୧୯ ଅକ୍ଟୋବର ୨୦୨୨ ରେ ଦେଶର ସମସ୍ତ ଗ୍ରାମ ଏବଂ ଜିଲ୍ଲାରେ ଚାଲୁ ହୋଇଛି।

ଏହି ଅବସରରେ ଶ୍ରୀ ଠାକୁର କହିଥିଲେ ଯେ, ସ୍ୱଚ୍ଛ ଭାରତ କେବଳ ଏକ କାର୍ଯ୍ୟକ୍ରମ ନୁହେଁ ବରଂ ଏହା ସାଧାରଣ ଲୋକଙ୍କ ପ୍ରକୃତ ଚିନ୍ତା ଏବଂ ଏହି ସମସ୍ୟାର ସମାଧାନ ପାଇଁ ସେମାନଙ୍କର ସଂକଳ୍ପକୁ ପ୍ରତିଫଳିତ କରିଥାଏ। କେନ୍ଦ୍ର ମନ୍ତ୍ରୀ ଆହୁରି ମଧ୍ୟ କହିଥିଲେ ଯେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ସର୍ବଦା ‘ଜନ ଭାଗିଦାରୀ ଦ୍ୱାରା ଜନ ଆନ୍ଦୋଳନ’ ସମ୍ପର୍କରେ ଦୋହରାଇ ଆସିଛନ୍ତି ଏବଂ ଯୁବକ ମାନଙ୍କ ଅଂଶ ଗ୍ରହଣ ବିନା କୌଣସି ଅଭିଯାନ ଅସମ୍ପୂର୍ଣ୍ଣ ଅଟେ। ସେ ଆହୁରି ମଧ୍ୟ କହିଥିଲେ ଯେ , ସ୍ୱଚ୍ଛ ଭାରତର ସ୍ୱପ୍ନକୁ ପୂରଣ ନକରି, ଏକ ନୂତନ ଭାରତର ସ୍ୱପ୍ନ, ଏକ ବିକଶିତ ଭାରତର ସ୍ୱପ୍ନ ପୂରଣ ହୋଇ ପାରିବ ନାହିଁ।

ଶ୍ରୀ ଠାକୁର କହିଥିଲେ ଯେ, ଗୋଟିଏ ମାସର ଅବଧିରେ ଏକ କୋଟି କିଲୋଗ୍ରାମ ବର୍ଜ୍ୟ ସଂଗ୍ରହର ଉଦ୍ଦେଶ୍ୟ ସହିତ ଏହି କାର୍ଯ୍ୟକ୍ରମ ଆରମ୍ଭ ହୋଇଛି ଏବଂ ଆମେ ୧୮ ଦିନ ମଧ୍ୟରେ ୮୪ ଲକ୍ଷ କିଲୋଗ୍ରାମ ପ୍ଲାଷ୍ଟିକ୍ ବର୍ଜ୍ୟ ବସ୍ତୁ ସଂଗ୍ରହ କରି ସାରିଛୁ ଏବଂ ରହିଥିବା ଲକ୍ଷ୍ୟକୁ ଅତିକ୍ରମ କରିବାକୁ ସ୍ଥିର କରିଛୁ। ଏହି କାର୍ଯ୍ୟ ଐତିହାସିକ ସ୍ଥାନ ଗୁଡିକରେ, ସାମୂହିକ କେନ୍ଦ୍ର, ବିଦ୍ୟାଳୟ, ଗ୍ରାମ ଏବଂ ଜିଲ୍ଲାର ଅନ୍ୟାନ୍ୟ ସ୍ଥାନରେ କରା ଯାଇଥିଲା। ଭିନ୍ନ ଭିନ୍ନ ପୃଷ୍ଠଭୂମି ଏବଂ ବିଭିନ୍ନ ପ୍ରକାରର ଲୋକ, ବିଶେଷ ରୂପରେ ଯୁବକ ମାନେ କେବଳ ଏହି କାର୍ଯ୍ୟକ୍ରମରେ ଭାଗ ନେଉ ନାହାନ୍ତି, ବରଂ ଅନ୍ୟ ମାନଙ୍କୁ ମଧ୍ୟ ସମ୍ପୂର୍ଣ୍ଣ ରୂପରେ ସ୍ୱେଚ୍ଛାକୃତ ଭାବେ ଏହି କାର୍ଯ୍ୟକ୍ରମରେ ସାମିଲ ହେବା ନିମନ୍ତେ ପ୍ରେରିତ ଏବଂ ପ୍ରୋତ୍ସାହିତ କରିବାରେ ମହତ୍ୱପୂର୍ଣ୍ଣ ଭୂମିକା ନିର୍ବାହ କରୁଛନ୍ତି।

ପରିଷ୍କାର ପରିଚ୍ଛନ୍ନତାର ଗୁରୁତ୍ୱ ସମ୍ପର୍କରେ ଶ୍ରୀ ଠାକୁର କହିଥିଲେ ଯେ ପରିଷ୍କାର ପରିଚ୍ଛନ୍ନତା ବିନା ଆମେ ଲୋକ ମାନଙ୍କର ଉତ୍ତମ ସ୍ୱାସ୍ଥ୍ୟ ଏବଂ କଲ୍ୟାଣ ନିଶ୍ଚିତ କରି ପାରିବା ନାହିଁ। ଆମକୁ ‘ସ୍ୱଚ୍ଛ ଭାରତ’ (କ୍ଲିନ୍ ଇଣ୍ଡିଆ)ର ରାଷ୍ଟ୍ରଦୂତ ହେବାକୁ ପଡିବ ବୋଲି କେନ୍ଦ୍ର ମନ୍ତ୍ରୀ ଅନୁରୋଧ କରିଥିଲେ। ଏଥିପାଇଁ, ଆମକୁ ସଚେତନତା ସୃଷ୍ଟି କରିବା ଏବଂ ଲୋକଙ୍କ ମାନସିକତାରେ ପରିବର୍ତ୍ତନ କରିବା ଆବଶ୍ୟକ ରହିଛି। ପରିବେଶକୁ ପରିଷ୍କାର ରଖିବା ପାଇଁ ଦୀପାବଳୀ ପର୍ବର ଦୁଇ ଦିନ ଉତ୍ସର୍ଗ କରିବାକୁ ମନ୍ତ୍ରୀ ଯୁବକ ମାନଙ୍କୁ ମଧ୍ୟ ଅନୁରୋଧ କରିଥିଲେ।

୨୦୨୨ ଅକ୍ଟୋବର ପହିଲାରୁ ଉତ୍ତର ପ୍ରଦେଶର ପ୍ରୟାଗରାଜ ଠାରେ ଅନୁରାଗ ସିଂହ ଠାକୁରଙ୍କ ଦ୍ୱାରା ଏକ ମାସବ୍ୟାପୀ ସ୍ୱଚ୍ଛ ଭାରତ ୨୦୨୨ କାର୍ଯ୍ୟକ୍ରମ ଆରମ୍ଭ କରା ଯାଇଥିଲା। ନେହେରୁ ଯୁବ କେନ୍ଦ୍ର ସଙ୍ଗଠନ (ଏନ୍‌ୱାଇକେଏସ୍‌) ଦ୍ୱାରା ଅନୁବନ୍ଧିତ ୟୁଥ୍ କ୍ଲବ୍ ଏବଂ ଜାତୀୟ ସେବା ଯୋଜନା ଅନୁବନ୍ଧିତ ଅନୁଷ୍ଠାନ ମାଧ୍ୟମରେ ଦେଶର ୭୪୪ ଜିଲ୍ଲା ଗୁଡିକର ୬ ଲକ୍ଷ ଗ୍ରାମରେ ସ୍ୱଚ୍ଛ ଭାରତ ୨୦୨୨ କାର୍ଯ୍ୟକ୍ରମ ଆୟୋଜିତ ହେଉଛି।

ଏହି କାର୍ଯ୍ୟକ୍ରମର ଉଦ୍ଦେଶ୍ୟ ହେଉଛି ଯୁବ ବ୍ୟାପାର ଏବଂ କ୍ରୀଡା ବିଭାଗ ଏବଂ ଏହାର ଅନୁବନ୍ଧିତ ସଂଗଠନ ଗୁଡିକ ଯଥା, ଏନ୍‌ୱାଇକେଏସ୍ ଏବଂ ଏନ୍‌ଏସ୍‌ଏସ୍ ଦ୍ୱାରା ସ୍ୱଚ୍ଛ ଭାରତ ୨୦୨୨ ର ପ୍ରୟାସକୁ ସୁଦୃଢ଼ କରିବା ଏବଂ ଦେଶର ସମସ୍ତ ଗ୍ରାମରେ ସମାନ କାର୍ଯ୍ୟକ୍ରମ ଆୟୋଜନ କରି ଅଭିଯାନରେ ଜନସାଧାରଣଙ୍କ ଅଂଶ ଗ୍ରହଣକୁ ସୁନିଶ୍ଚିତ କରିବା ପାଇଁ କାର୍ଯ୍ୟକଳାପକୁ ଆହୁରି ତୀବ୍ର କରିବା।

ଏକ ନମ୍ର ପ୍ରାରମ୍ଭ ବଡ଼ ବଡ଼ ପରିବର୍ତ୍ତନ ଆଣି ପାରେ। ଆଜାଦୀର ଅମୃତ ମହୋତ୍ସବ ଉପଲକ୍ଷରେ ଯୁବ ବ୍ୟାପାର ବିଭାଗ ଦ୍ୱାରା ଆରମ୍ଭ କରା ଯାଇଥିବା ସ୍ୱଚ୍ଛ ଭାରତ କାର୍ଯ୍ୟକ୍ରମ ଏହି କଥାକୁ ପ୍ରମାଣିତ କରିଥାଏ।

ଏହି କାର୍ଯ୍ୟକ୍ରମ ଏହାର ସ୍ତର ଏବଂ ବ୍ୟାପକତା, ଦୁଇଟି ଦୃଷ୍ଟିରୁ ବିଶେଷ ଅଟେ ଏବଂ ଏହା ଯୁବକ ମାନଙ୍କ ଭାଗୀଦାରୀ ଦ୍ୱାରା ଜନ ଆନ୍ଦୋଳନର ମଡେଲ୍ ଉପରେ ପରିକଳ୍ପିତ କରା ଯାଇଛି ତଥା ଏହା ମାଧ୍ୟମରେ ଏହି କାର୍ଯ୍ୟକ୍ରମର ସଫଳତା ଏବଂ ନିରନ୍ତରତା ନିମନ୍ତେ ପ୍ରତ୍ୟେକ ନାଗରିକ ମାନଙ୍କର ଭୂମିକା ଏବଂ ଯୋଗଦାନକୁ ନିର୍ଦ୍ଧାରିତ କରା ଯାଇଛି।

ଏହି ପଦକ୍ଷେପର ମୁଖ୍ୟ ପ୍ରେରକ ତତ୍ୱ ହେଉଛି ନିଜର ସୀମାକୁ ଭୂଲି ସମସ୍ତ ହିତଧାରକ ମାନଙ୍କ ମଧ୍ୟରେ ସମନ୍ୱୟ ଏବଂ ତାଳମେଳ ରକ୍ଷା କରିବା। ବିଭିନ୍ନ ବିଭାଗ/ଏଜେନ୍ସି ଗୁଡିକ, ସିବିଓ ଏବଂ ସିଭିଲ୍ ସୋସାଇଟି ସଙ୍ଗଠନ ଇତ୍ୟାଦି ଏକକ ବ୍ୟବହୃତ ପ୍ଲାଷ୍ଟିକ୍‌ର ବ୍ୟବହାରକୁ ସମାପ୍ତ କରିବା ଏବଂ ସ୍ୱଚ୍ଛତାକୁ ସୁନିଶ୍ଚିତ କରିବାର ସାଧାରଣ ଲକ୍ଷ୍ୟକୁ ସାକାର କରିବା ନିମନ୍ତେ ଏକାଠି ହୋଇଛନ୍ତି।

ଦିଲ୍ଲୀ: କେନ୍ଦ୍ର ଯୁବ ବ୍ୟାପାର ଏବଂ କ୍ରୀଡା ମନ୍ତ୍ରୀ ଅନୁରାଗ ସିଂହ ଠାକୁର ୧୯ ଅକ୍ଟୋବର ୨୦୨୨ରେ ଦିଲ୍ଲୀର ଚାନ୍ଦିନୀ ଚୌକ ଠାରେ ସ୍ୱଚ୍ଛ ଭାରତ ୨୦୨୨ କାର୍ଯ୍ୟକ୍ରମ ଅଧୀନରେ ବୃହତ୍ ସ୍ୱଚ୍ଛତା ଅଭିଯାନର ଉଦ୍ଘାଟନ କରିବେ। ସମାନ ଧରଣର ସ୍ୱଚ୍ଛତା ଅଭିଯାନ ୧୯ ଅକ୍ଟୋବର ୨୦୨୨ରେ ସାରା ଦେଶର ସମସ୍ତ ଗ୍ରାମ ଗୁଡିକରେ ଚାଲୁ କରାଯିବ। ଏହାର ଉଦ୍ଦେଶ୍ୟ ହେଉଛି ଯୁବ ବ୍ୟାପାର ବିଭାଗ ତଥା ଏହାର ସହଯୋଗୀ ସଙ୍ଗଠନ ଗୁଡିକ, ଯଥା ଏନ୍ୱାଇକେଏସ୍ ଏବଂ ଏନ୍ଏସ୍ଏସ୍ ଦ୍ୱାରା ସ୍ୱଚ୍ଛ ଭାରତ ୨୦୨୨ କାର୍ଯ୍ୟକ୍ରମର ପ୍ରୟାସ ଗୁଡିକୁ ମଜଭୁତ କରିବା ଏବଂ ସାରା ଦେଶର ସମସ୍ତ ଗ୍ରାମ ଗୁଡିକରେ ଏହି ଭଳି କାର୍ଯ୍ୟକ୍ରମ ଆୟୋଜିତ କରି ଏହି ଅଭିଯାନରେ ଜନ ଭାଗୀଦାରୀକୁ ସୁନିଶ୍ଚିତ କରିବାର କାର୍ଯ୍ୟକୁ ଆହୁରି ଦ୍ରୁତ କରିବା।

ଏକ ଛୋଟ ଆରମ୍ଭ ମହାନ ଏବଂ ବଡ ବଡ ପରିବର୍ତ୍ତନ ଆଡକୁ ଆଗେଇ ନେଇ ଯାଇପାରେ। ଆଜାଦୀର ଅମୃତ ମହୋତ୍ସବ ଉପଲକ୍ଷରେ ଯୁବ ବ୍ୟାପାର ବିଭାଗ ଦ୍ୱାରା ଆରମ୍ଭ କରା ଯାଇଥିବା ସ୍ୱଚ୍ଛ ଭାରତ କାର୍ଯ୍ୟକ୍ରମ ଏହି କଥାକୁ ପ୍ରମାଣିତ କରିଥାଏ।

ପ୍ରାୟ ୧୭ ଦିନ ପୂର୍ବରୁ, ଏକ ମାସର ଅବଧିରେ ଏକ କୋଟି କିଲୋଗ୍ରାମ୍ ଅବର୍ଜନା ସଂଗ୍ରହ ଉଦ୍ଦେଶ୍ୟରେ ଏହି କାର୍ଯ୍ୟକ୍ରମ ଆରମ୍ଭ କରା ଯାଇଥିଲା। ଏବେ ସୁଦ୍ଧା, ସାରା ଦେଶରେ ସମସ୍ତ ଜିଲ୍ଲା ଗୁଡିକର ଯୁବକ ମାନଙ୍କର ଏବଂ ଜୀବନର ବିଭିନ୍ନ କ୍ଷେତ୍ର ଗୁଡିକ ସହିତ ଯୋଡି ହୋଇଥିବା ଲୋକ ମାନଙ୍କ ପକ୍ଷରୁ ମିଳୁଥିବା ବହୁତ ସମର୍ଥନ ଏବଂ ପ୍ରତିକ୍ରିୟା ସହିତ ୬୦ ଲକ୍ଷ କିଲୋଗ୍ରାମ୍ରୁ ଅଧିକ ଆବର୍ଜନା ସଂଗ୍ରହ କରା ଯାଇଛି।

ଏହା ଗୋଟିଏ ପ୍ରକାରର ଟ୍ରେଣ୍ଡ ସେଟର୍ ଅଟେ। ଭିନ୍ନ ଭିନ୍ନ ପୃଷ୍ଠଭୂମି ଏବଂ ବିଭିନ୍ନ ପ୍ରକାରର ଲୋକ, ବିଶେଷ ରୂପରେ ଯୁବକ ମାନେ କେବଳ ଏହି କାର୍ଯ୍ୟକ୍ରମରେ ଭାଗ ନେଉ ନାହାନ୍ତି, ବରଂ ଅନ୍ୟ ମାନଙ୍କୁ ମଧ୍ୟ ସମ୍ପୂର୍ଣ୍ଣ ରୂପରେ ସ୍ୱେଚ୍ଛାକୃତ ଭାବେ ଏହି କାର୍ଯ୍ୟକ୍ରମରେ ସାମିଲ ହେବା ନିମନ୍ତେ ପ୍ରେରିତ ଏବଂ ପ୍ରୋତ୍ସାହିତ କରିବାରେ ମହତ୍ୱପୂର୍ଣ୍ଣ ଭୂମିକା ନିର୍ବାହ କରୁଛନ୍ତି।
ସ୍ୱଚ୍ଛତା ଅଭିଯାନ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ଜୀ’ ଙ୍କ ଦ୍ୱାରା ୨୦୧୪ ମସିହାରେ ଆରମ୍ଭ କରା ଯାଇଥିଲା ଏବଂ ସେବେ ଠାରୁ ଏହି କ୍ଷେତ୍ରରେ ଉଲ୍ଲେଖନୀୟ ପ୍ରଗତି ଦେଖା ଯାଇ ପାରିଛି। ଏହି କାର୍ଯ୍ୟକ୍ରମ ନୂଆ ରୂପରେ କେନ୍ଦ୍ରିତ ଏବଂ ପ୍ରତିବଦ୍ଧତା ସହିତ ପ୍ରଧାନମନ୍ତ୍ରୀଙ୍କ ନେତ୍ୱତ୍ୱରେ ଆରମ୍ଭ କରା ଯାଇଥିବା ପଦକ୍ଷେପ ଅଟେ।

ସ୍ୱଚ୍ଛ ଭାରତ ଏକ ଯୁବା କେନ୍ଦ୍ରିତ ମଡେଲ୍। ଏହି କାର୍ଯ୍ୟକ୍ରମର ସଙ୍କଳ୍ପତା, ଲୋକ ମାନଙ୍କୁ ସଙ୍ଗଠିତ କରିବାର କାର୍ଯ୍ୟ ଏବଂ ଏହାର ସଫଳ କାର୍ଯ୍ୟାନ୍ୱୟନରେ ଯୁବକ ମାନଙ୍କର ମୁଖ୍ୟ ଭୂମିକା ସମ୍ପର୍କରେ ପରିକଳ୍ପନା କରା ଯାଇଛି। ସୀମା ଭିତରୁ ବାହାରି ବିକାଶର ମୁଖ୍ୟ ଧାରାରେ ଯୁବକ ମାନେ ଯୋଗ ଦେବା ଦେଶ ନିମନ୍ତେ ଶୁଭ ସଙ୍କେତ ଅଟେ।

ଯଦିଓ ଏହି କାର୍ଯ୍ୟକ୍ରମର ମୁଖ୍ୟ କେନ୍ଦ୍ର ଗ୍ରାମ ଅଟେ, କିନ୍ତୁ ଜନସଂଖ୍ୟାର ବିଶେଷ ବର୍ଗ, ଯେମିତିକି ଧାର୍ମିକ ସଙ୍ଗଠନ, ଶିକ୍ଷକ, କର୍ପୋରେଟ୍ ସଙ୍ଗଠନ, ମହିଳା ସମୂହ ଏବଂ ଅନ୍ୟ ଲୋକମାନେ ମଧ୍ୟ ଏଥିରେ ଭାଗ ନେଇ ଏହି ଲକ୍ଷ୍ୟ ପ୍ରତି ନିଜର ଏକତା ଦେଖାଉଛନ୍ତି ଏବଂ ଏହାକୁ ବାସ୍ତବରେ ଏକ ଜନ ଆନ୍ଦୋଳନରେ ପରିବର୍ତ୍ତନ କରୁଛନ୍ତି।

ସମାନ ଅଭିଯାନ ଐତିହାସିକ/ପ୍ରତିଷ୍ଠିତ ସ୍ଥାନ ଗୁଡିକରେ ଏବଂ ଅନ୍ୟାନ୍ୟ ହଟ୍ସ୍ପଟ୍ରେ, ଯେମିତି ପର୍ଯ୍ୟଟନ ସ୍ଥଳୀ, ବସ୍ ଷ୍ଟାଣ୍ଡ/ରେଳ ଷ୍ଟେସନ୍ ଗୁଡିକରେ, ଜାତୀୟ ରାଜପଥ ଏବଂ ଶୈକ୍ଷିକ ସଂସ୍ଥା ଗୁଡିକରେ ମଧ୍ୟ ଚାଲୁ କରା ଯାଉଛି।

ଏହି କାର୍ଯ୍ୟକ୍ରମ ଏହାର ସ୍ତର ଏବଂ ବ୍ୟାପକତା, ଦୁଇଟି ଦୃଷ୍ଟିରୁ ବିଶେଷ ଅଟେ ଏବଂ ଏହା ଯୁବକ ମାନଙ୍କ ଭାଗୀଦାରୀ ଦ୍ୱାରା ଜନ ଆନ୍ଦୋଳନର ମଡେଲ୍ ଉପରେ ପରିକଳ୍ପିତ କରା ଯାଇଛି ତଥା ଏହା ମାଧ୍ୟମରେ ଏହି କାର୍ଯ୍ୟକ୍ରମର ସଫଳତା ଏବଂ ନିରନ୍ତରତା ନିମନ୍ତେ ପ୍ରତ୍ୟେକ ନାଗରିକ ମାନଙ୍କର ଭୂମିକା ଏବଂ ଯୋଗଦାନକୁ ନିର୍ଦ୍ଧାରିତ କରା ଯାଇଛି। ସ୍ୱଚ୍ଛ ଭାରତ କେବଳ ଏକ କାର୍ଯ୍ୟକ୍ରମ ନୁହେଁ, ଏହା ସାଧାରଣ ଲୋକ ମାନଙ୍କର ବାସ୍ତବିକ ଚିନ୍ତାଧାରାକୁ ଏବଂ ଏହି ସମସ୍ୟା ଗୁଡ଼ିକୁ ଦୂର କରିବା ନିମନ୍ତେ ସେମାନଙ୍କର ସଙ୍କଳ୍ପକୁ ମଧ୍ୟ ଦର୍ଶାଇଥାଏ।

ଏହି ପଦକ୍ଷେପର ମୁଖ୍ୟ ପ୍ରେରକ ତତ୍ୱ ହେଉଛି ନିଜର ସୀମାକୁ ଭୂଲି ସମସ୍ତ ହିତଧାରକ ମାନଙ୍କ ମଧ୍ୟରେ ସମନ୍ୱୟ ଏବଂ ତାଳମେଳ ରକ୍ଷା କରିବା। ବିଭିନ୍ନ ବିଭାଗ/ଏଜେନ୍ସି ଗୁଡିକ, ସିବିଓ ଗୁଡିକ ଏବଂ ସିଭିଲ୍ ସୋସାଇଟି ସଙ୍ଗଠନ ଗୁଡିକ, ଏକକ ବ୍ୟବହୃତ ପ୍ଲାଷ୍ଟିକ୍ର ବ୍ୟବହାରକୁ ସମାପ୍ତ କରିବା ଏବଂ ସ୍ୱଚ୍ଛତାକୁ ସୁନିଶ୍ଚିତ କରିବାର ସାଧାରଣ ଲକ୍ଷ୍ୟକୁ ସାକାର କରିବା ନିମନ୍ତେ ସେମାନେ ସମସ୍ତେ ଏକାଠି ହୋଇଛନ୍ତି।

ଏହି ସ୍ୱଚ୍ଛ ଭାରତ ପଦକ୍ଷେପର ଯାତ୍ରା ଏନ୍ୱାଇକେଏସ୍ ଏବଂ ଏନ୍ଏସ୍ଏସ୍ର ସେହି ଲକ୍ଷ ଲକ୍ଷ ଯୁବ ସ୍ୱୟଂସେବକ ମାନଙ୍କର ସମର୍ଥନ ଏବଂ ଯୋଗଦାନ ବିନା ସମ୍ଭବ ହୋଇ ପାରି ନଥାନ୍ତା, ଯେଉଁମାନେ ସେବା ମନୋଭାବ ନେଇ ଲଗାତାର କାମ କରୁଛନ୍ତି।

ଏଭଳି ଲକ୍ଷ ଲକ୍ଷ ଯୋଦ୍ଧା ମଧ୍ୟ ଅଛନ୍ତି, ଯେଉଁମାନେ ସାମନାକୁ ନଆସୁଥିଲେ ବି ନିଜେ ସ୍ୱେଚ୍ଛାକୃତ ଭାବେ ସ୍ୱଚ୍ଛତା ଅଭିଯାନରେ ସାମିଲ୍ ହୋଇଛନ୍ତି ଏବଂ ବିନା କୌଣସି ପଦବୀ ଏବଂ ଦାବି ଉପସ୍ଥାପନ କରି ଏଥିରେ ଯୋଗଦାନ ଦେଇଛନ୍ତି। ସେମାନେ ଏହି ଅଭିଯାନର ପ୍ରକୃତ ହିରୋ ଅଟନ୍ତି।

ନୂଆଦିଲ୍ଲୀ: କେନ୍ଦ୍ର ଯୁବ ବ୍ୟାପାର ଓ କ୍ରୀଡା ମନ୍ତ୍ରୀ ଅନୁରାଗ ସିଂହ ଠାକୁର ଆଜି ନୂଆଦିଲ୍ଲୀ ଠାରେ ତିନିଦିବସୀୟ ୱାଡା ଆଥଲେଟିକ ବାୟୋଲଜିକାଲ ପାସପୋର୍ଟ ଆଲୋଚନାଚକ୍ର- ୨୦୨୨ର ଉଦଘାଟନୀ ଅଧିବେଶନକୁ ସମ୍ବୋଧିତ କରିଛନ୍ତି। ଏହି ଆଲୋଚନାଚକ୍ର ଜାତୀୟ ଡୋପିଂ ନିରୋଧୀ ସଂସ୍ଥାନ (ନାଡା) ଓ ଜାତୀୟ ଡୋପ ପରୀକ୍ଷଣ ଗବେଷଣାଗାର (ଏନଡିଟିଏଲ) ଦ୍ୱାରା ଆୟୋଜିତ ହୋଇଛି। କ୍ରୀଡା ସଚିବ ସୁଜାତା ଚତୁର୍ବେଦୀ, ଜାତୀୟ ଡୋପିଂ ନିରୋଧୀ ସଂସ୍ଥାନର ମହାନିର୍ଦ୍ଦେଶକ ରିତୁ ସାଇଁ, (ଆଥଲେଟ ବାୟୋଲଜିକଲ ପାସପୋର୍ଟ) ବିଶ୍ୱ ଡୋପିଂ ନିରୋଧୀ ସଂସ୍ଥାନର ସହଯୋଗୀ ନିର୍ଦ୍ଦେଶକ ଡଃ ରିଡ ଆଇକିନ, ବିଶ୍ୱ ଡୋପିଂ ନିରୋଧୀ ସଂସ୍ଥାନର ଏସିଆ/ଓସିଏନିଆ କାର୍ଯ୍ୟାଳୟ ନିର୍ଦ୍ଦେଶକ କାଜୁଗିରୋ ହୟାଶି ଓ ବିଶ୍ୱ ଡୋପିଂ ନିରୋଧୀ ସଂସ୍ଥାନର ବରିଷ୍ଠ ପ୍ରବନ୍ଧକ ଡଃ ନୋବର୍ଟ ବାମେ ଏହି ଅବସରରେ ଉପସ୍ଥିତ ଥିଲେ।

ଆମେ ନିଜ ସ୍ୱାଧୀନତାର ୭୫ ବର୍ଷ ପୂର୍ତ୍ତି ପାଳନ ଅବସରରେ ଆଜାଦୀର ଅମୃତ ମହୋତ୍ସବ ପାଳନ କରୁଥିବା ବେଳେ ଦେଶର ଇତିହାସରେ ପ୍ରଥମ ପାଇଁ ଏବିପି ଆଲୋଚନାଚକ୍ର ଆୟୋଜିତ ହେବା ବେଶ ନିଆରା। ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କ ନେତୃତ୍ୱରେ ଭାରତ ବିଶ୍ୱ କ୍ରୀଡା ପରିଦୃଶ୍ୟରେ ଲଗାତର ନୂଆ ଉଚ୍ଚତା ସ୍ପର୍ଶ କରିଚାଲିଥିବା ଅନୁରାଗ ସିଂହ ଠାକୁର କହିଛନ୍ତି।

ଆଥଲେଟ ବାୟୋଲଜିକଲ ପାସପୋର୍ଟକୁ ଡୋପିଂ ନିରୋଧ ପାଇଁ ଏକ ଗୁରୁତ୍ୱପୂର୍ଣ୍ଣ ବୈଜ୍ଞାନିକ ଉପକରଣ ଭାବେ ଅଭିହିତ କରି ଏ ସମ୍ପର୍କିତ ଗବେଷଣା ଦ୍ୱାରା ବିଶ୍ୱ କ୍ରୀଡାରୁ କେବଳ ଡୋପିଂ ଚିହ୍ନଟ ନୁହେଁ ଏହାକୁ ଦୂରେଇବା ପାଇଁ ସୁଯୋଗ ପ୍ରଦାନ କରିବ ବୋଲି ଶ୍ରୀ ଠାକୁର କହିଛନ୍ତି। ଏହି ଆଲୋଚନାଚକ୍ର କେବଳ ଏବିପିକୁ ଦୃଢ ଓ ମଜବୁତ କରିବ ନାହିଁ ଡୋପିଂ ବିରୋଧରେ ଆମ ସାମୂହିକ ଲଢେଇ ପାଇଁ ଏକ ବଡ ମାଇଲଖୁଣ୍ଟ ସାବ୍ୟସ୍ତ ହେବ ବୋଲି ସେ ଆଶା ବ୍ୟକ୍ତ କରିଛନ୍ତି। ଏହି ସୁଯୋଗର ଉପଯୋଗ କରି କ୍ରୀଡାବିତମାନଙ୍କୁ ତଥା ସମୂର୍ଣ୍ଣ କ୍ରୀଡା ବ୍ୟବସ୍ଥାକୁ ଡୋପିଂ କବଳରୁ ରକ୍ଷା କରିବା ପାଇଁ ସମସ୍ତ ପ୍ରତିଯୋଗୀମାନେ ଜ୍ଞାନ, ଉପକରଣ, ଗବେଷଣା ଓ ବିଶେଷଜ୍ଞମତ ଆହରଣ କରିବାକୁ କେନ୍ଦ୍ର ମନ୍ତ୍ରୀ ଆହ୍ୱାନ ଦେଇଛନ୍ତି। ଏହି ଆଲୋଚନାଚକ୍ର ଭାରତରେ ଡୋପିଂ ନିରୋଧୀ କାର୍ଯ୍ୟକ୍ରମ ସୁଦୃଢ କରିବାରେ ସହାୟକ ହେବ।

ଭାରତ ସରକାର ନିକଟରେ ଜାତୀୟ ଡୋପିଂ ନିରୋଧୀ ଅଧିନିୟମ, ୨୦୨୨ ନାମରେ ଡୋପିଂ ନିରୋଧୀ ଆଇନ ପ୍ରସ୍ତୁତ କରିଛନ୍ତି। ବିଶ୍ୱ ଡୋପିଂ ନିରୋଧୀ ଅଭିଯାନ ପ୍ରତି ଏହା ଭାରତର ଦୀର୍ଘକାଳୀନ ପ୍ରତିବଦ୍ଧତାକୁ ପ୍ରତିପାଦିତ କରୁଛି। ଏହି ଅଧିନିୟମ ଦେଶରେ ସମସ୍ତ ସ୍ତରରେ ସ୍ୱଚ୍ଛ କ୍ରୀଡା ପାଇଁ ଭାରତ ସରକାରଙ୍କ ଦୃଢ ସଂକଳ୍ପର ଅଭିବ୍ୟକ୍ତି ବୋଲି ଶ୍ରୀ ଠାକୁର କହିଛନ୍ତି।

ବିଗତ ଏକ ବର୍ଷ ମଧ୍ୟରେ ବିଶ୍ୱ ଡୋପିଂ ନିରୋଧୀ ସଂସ୍ଥାନ (ୱାଡା)କୁ ଅନୁଦାନ ବଢାଇଛୁ ଓ ଆମ ଅନୁଦାନ ଏସିଆରେ ଚତୁର୍ଥ ସର୍ବାଧିକ ବୋଲି ଶ୍ରୀ ଠାକୁର କହିଛନ୍ତି। ସେହିପରି ଆମେ ୟୁନେସ୍କୋ ସ୍ୱେଚ୍ଛାସେବୀ ପାଣ୍ଠିର ପ୍ରମୁଖ ଅବଦାନକାରୀ। ପୋଷକ ତତ୍ତ୍ୱ ସହ ନିଷିଦ୍ଧ ପଦାର୍ଥ ଅନିଚ୍ଛାକୃତ ଭାବେ ସେବନରୁ କ୍ରୀଡାବିତମାନଙ୍କୁ ସୁରକ୍ଷା ପ୍ରଦାନ ସୁନିଶ୍ଚିତ କରିବା ସହ ନାଡା ଜାତୀୟ ଫୋରେନସିକ ସାଇନ୍ସେସ ବିଶ୍ୱବିଦ୍ୟାଳୟ (ଏନଏଫଏସୟୁ) ଓ ଭାରତୀୟ ଖାଦ୍ୟ ସୁରକ୍ଷା ମାନକ ପ୍ରାଧିକରଣ (ଏଫଏସଏସଏଆଇ) ସହ ମିଳିତ ଭାବେ କାର୍ଯ୍ୟ କରୁଛି ବୋଲି କେନ୍ଦ୍ର ମନ୍ତ୍ରୀ କହିଛନ୍ତି।

ଭିନ୍ନକ୍ଷମ କ୍ରୀଡାବିତମାନଙ୍କ ପାଇଁ ସମାବେଶୀ ଆଉଟରିଚ ବିଷୟ ବିକଶିତ ହୋଇଛି। ୟୁନିଭର୍ସଲ ଡିଜାଇନ ଫର ଲର୍ଣ୍ଣିଂ (ୟୁଡିଏଲ) ନୀତିକୁ ଆଧାରିତ ସାଙ୍କେତିକ ଭାଷା ଡୋପିଂ ନିରୋଧୀ ମଡ୍ୟୁଲ କେବଳ ଭାରତର ଭିନ୍ନକ୍ଷମ କ୍ରୀଡାବିତଙ୍କ ପାଇଁ ନୁହେଁ ସାରା ବିଶ୍ୱର କ୍ରୀଡାବିତମାନଙ୍କ ପାଇଁ ଉପଯୋଗୀ। ନାଡା, ଭାରତ ଏସବୁ ସଂସାଧନକୁ ଏସିଆର ଅନ୍ୟ ନାଡୋମାନଙ୍କ ସହ ଶେୟାର କରୁଛି।

ଏହି ଆଲୋଚନାଚକ୍ରରେ ମୁଖ୍ୟ ଚର୍ଚ୍ଚାର ବିଷୟ ରହିବ ବର୍ତ୍ତମାନର ଘଟଣାକ୍ରମ, ସଫଳତା ଓ ଏବିପିର ଆହ୍ୱାନ, ଷ୍ଟେରୋଇଡା ମଡ୍ୟୁଲକୁ ପ୍ରଭାବିତ କରୁଥିବା ବିଶୃଙ୍ଖଳିତ କାରଣର ପ୍ରବନ୍ଧନ, ଏବିପି ପାଇଁ ରଣନୈତିକ ପରୀକ୍ଷଣ ପ୍ରସ୍ତୁତି। ଏବଂ ଏପିଏମୟୁ ମାଧ୍ୟମରେ କ୍ରୀଡାରୁ ଡୋପିଂ ଚିହ୍ନଟ ଓ ନିବାରଣ ପାଇଁ ୱାଡାକୁ ସାହାଯ୍ୟ କରିବ।

ପ୍ରଥମ ୱାଡା ଏବିପି ଆଲୋଚନାଚକ୍ର ୨୦୧୫ରେ ଦୋହା, କାତାର ଠାରେ ଡୋପିଂ ନିରୋଧୀ ଲ୍ୟାବ କାତାର (ଏଡିଏଲକ୍ୟୁ) ଦ୍ୱାରା ଆୟୋଜିତ ହୋଇଥିଲା। ଦ୍ୱିତୀୟ ୱାଡା ଏବିପି ଆଲୋଚନାଚକ୍ର ୨୦୧୮ ଇଟାଲୀର ରୋମ ଠାରେ ଇଟାଲିଆନ ଫେଡେରେସନ ଅଫ ସ୍ପୋର୍ଟସ ମେଡିସିନ (ଏଫଏମଏସଆଇ) ଦ୍ୱାରା ଆୟୋଜିତ ହୋଇଥିଲା। ଏହା ତୃତୀୟ ୱାଡା ଏବିପି ଆଲୋଚନାଚକ୍ର ଓ ଭାରତ ଦ୍ୱାରା ପ୍ରଥମ ଥର ପାଇଁ ଆୟୋଜିତ ହୋଇଛି। ୫୬ଟି ଦେଶର ଦୁଇ ଶହକୁ ଅଧିକ ପ୍ରତିଯୋଗୀ, ୱାଡା ଅଧିକାରୀ, ବିଭିନ୍ନ ଜାତୀୟ ଡୋପିଂ ନିରୋଧୀ ସଂଗଠନର ପ୍ରତିନିଧି ଓ ବିଶେଷଜ୍ଞ, ଆଥଲେଟ ପାସପୋର୍ଟ ପ୍ରବନ୍ଧନ ୟୁନିଟ (ଏପିଏମୟୁ) ଓ ୱାଡା ମାନ୍ୟତା ପ୍ରାପ୍ତ ଗବେଷଣାଗାରର ପ୍ରତିନିଧି ଓ ବିଶେଷଜ୍ଞ ଏହି ଆଲୋଚନାଚକ୍ରରେ ଭାଗ ନେଉଛନ୍ତି।

ନୂଆଦିଲ୍ଲୀ: କେନ୍ଦ୍ର କ୍ରୀଡା ଓ ଯୁବ ବ୍ୟାପାର ମନ୍ତ୍ରୀ ଅନୁରାଗ ସିଂହ ଠାକୁର ରବିବାର ପୂର୍ବାହ୍ନରେ ହିମାଚଳ ପ୍ରଦେଶର ବିଳାସପୁରର କୋଲଡେମ ବରମାନା ଠାରେ ଏକ ୱାଟର ସ୍ପୋର୍ଟସ ସେଣ୍ଟର ଉଦଘାଟନ କରିଛନ୍ତି। ହିମାଚଳ ପ୍ରଦେଶରେ ଏହି ଅଭିନବ ୱାଟର ସ୍ପୋର୍ଟସ ସେଣ୍ଟର ଭାରତୀୟ କ୍ରୀଡା ପ୍ରାଧିକରଣ (ସାଇ) ଓ ଜାତୀୟ ତାପଜ ବିଦ୍ୟୁତ ନିଗମ (ଏନଟିପିସି)ର ମିଳିତ ଭାବେ ଆରମ୍ଭ ହୋଇଛି।

ଏହି କାର୍ଯ୍ୟକ୍ରମ ଅବସରରେ ସାଇ ଓ ଏନଟିପିସି ମଧ୍ୟ ବୁଝାମଣାପତ୍ର ହସ୍ତାନ୍ତର ହୋଇଛି ।

ଖୁବ କମ ସମୟ ଅବଧି ମଧ୍ୟରେ ସ୍ଥାପିତ ହୋଇଥିବା ଏହି କେନ୍ଦ୍ର ସମ୍ପର୍କରେ ଅନୁରାଗ ସିଂହ ଠାକୁର କହିଛନ୍ତି “ମାତ୍ର ଗୋଟିଏ ମାସ ମଧ୍ୟରେ ହିଁ ୱାଟର ସ୍ପୋର୍ଟସ ବ୍ୟବସ୍ଥା ହୋଇପାରିଛି ଓ ସାଇ ଏବଂ ଏନଟିପିସି ଅଧିକାରୀମାନେ ଏହା ସମ୍ଭବ କରି ପାରିଥିବାରୁ ସେମାନଙ୍କୁ ଧନ୍ୟବାଦ ଜଣାଉଛି। ରୋଇଂ, କାୟାକିଂ ଓ କାନୋଇଂରେ ଭାଗ ନେବା ପାଇଁ ୪୦ ଜଣ ଖେଳାଳିଙ୍କୁ ଚୟନ କରାଯିବ। ଅତ୍ୟାଧୁନିକ ଉପକରଣ ସହ ଏଠାରେ ପୁରୁଷ ଏବଂ ମହିଳାଙ୍କ ପାଇଁ ହଷ୍ଟେଲ ଓ ତାଲିମ ସୁବିଧା ରହିଛି। ଏହି କେନ୍ଦ୍ରରେ ଜାତୀୟ ପ୍ରତିଯୋଗିତା ଆୟୋଜିତ ହେବା ନେଇ ବିଶ୍ୱାସ ରହିଛି।”

ରୋଇଂ, କାୟାକିଂ ଓ କାନୋଇଂ ଭଳି ୱାଟର ସ୍ପୋର୍ଟସ କ୍ରୀଡାବିତମାନଙ୍କୁ ପ୍ରଶିକ୍ଷଣ ଦେବା ପାଇଁ ଏହି କେନ୍ଦ୍ର ସମର୍ପିତ ରହିବ।

କାର୍ଯ୍ୟକ୍ରମ ଅବସରରେ ଶ୍ରୀ ଠାକୁର ଗୁଜୁରାଟରେ ଚାଲିଥିବା ୩୬ତମ ଜାତୀୟ କ୍ରୀଡାରେ ସ୍ୱର୍ଣ୍ଣପଦକ ବିଜେତା ହିମାଚଳ ପ୍ରଦେଶର କବାଡି ଦଳକୁ ସମ୍ବର୍ଦ୍ଧିତ କରିଛନ୍ତି।

ଦିଲ୍ଲୀ: କେନ୍ଦ୍ର ଯୁବ ବ୍ୟାପାର ଏବଂ କ୍ରୀଡା ମନ୍ତ୍ରୀ ଅନୁରାଗ ସିଂହ ଠାକୁର ୧ ଅକ୍ଟୋବର ୨୦୨୨ରୁ ଉତ୍ତର ପ୍ରଦେଶର ପ୍ରୟାଗରାଜ ଠାରୁ ଏକ ମାସ ପର୍ଯ୍ୟନ୍ତ ଚାଲିବାକୁ ଥିବା ରାଷ୍ଟ୍ରବ୍ୟାପୀ ସ୍ୱଚ୍ଛ ଭାରତ ୨୦୨୨ ଅଭିଯାନର ଶୁଭାରମ୍ଭ କରିବେ।

ସ୍ୱଚ୍ଛ ଭାରତ ୨୦୨୨ କାର୍ଯ୍ୟକ୍ରମ ସାରା ଦେଶରେ ୭୪୪ ଜିଲ୍ଲା ଗୁଡିକର ୬ ଲକ୍ଷ ଗ୍ରାମ ଗୁଡିକରେ ନେହେରୁ ଯୁବ କେନ୍ଦ୍ର ସଙ୍ଗଠନ (ଏନ୍ୱାଇକେଏସ୍) ଦ୍ୱାରା ଅନୁବନ୍ଧିତ ୟୁଥ୍ କ୍ଲବ୍ ଏବଂ ଜାତୀୟ ସେବା ଯୋଜନା ଅନୁବନ୍ଧିତ ସଂସ୍ଥା ଗୁଡିକର ନେଟୱର୍କ ମାଧ୍ୟମରେ ଆୟୋଜିତ କରା ଯାଉଛି। ଯୁବ ବ୍ୟାପାର ବିଭାଗ ସ୍ୱଚ୍ଛ ଭାରତ ୨୦୨୨ ମାଧ୍ୟମରେ ୧ କୋଟି କିଲୋ ପ୍ଲାଷ୍ଟିକ୍ ବର୍ଜ୍ୟକୁ ଏକାଠି କରିବା ଏବଂ ଏହାର ପରିଚାଳନା କରିବା ନିମନ୍ତେ ଲକ୍ଷ୍ୟ ରଖିଛନ୍ତି।

ଏହା ପୂର୍ବରୁ ଏକ ଭିଡିଓ ବାର୍ତ୍ତାରେ ସ୍ୱଚ୍ଛ ଭାରତ ୨୦୨୨ ଅଭିଯାନ ସମ୍ପର୍କରେ ସୂଚନା ଦେଇ ଶ୍ରୀ ଅନୁରାଗ ଠାକୁର କହିଥିଲେ ଯେ ସ୍ୱଚ୍ଛ ଭାରତ ୨୦୨୨ ଅଭିଯାନର ଆରମ୍ଭ ଲୋକମାନଙ୍କ ମଧ୍ୟରେ ସଚେତନତା ବୃଦ୍ଧି କରିବା, ଲୋକ ମାନଙ୍କୁ ସଙ୍ଗଠିତ କରିବା ଏବଂ ଭାରତକୁ ସ୍ୱଚ୍ଛ କରିବାରେ ସେମାନଙ୍କର ଭାଗୀଦାରୀତାକୁ ସୁନିଶ୍ଚିତ କରିବା ଉଦ୍ଦେଶ୍ୟରେ କରା ଯିବ। ଏହି ପଦକ୍ଷେପରେ, ବିଭିନ୍ନ ଅଂଚଳ, ବିଭିନ୍ନ ଭାଷା ଏବଂ ଅଲଗା ପୃଷ୍ଠଭୂମିର ଲୋକ ଏକା ସହିତ କାମ କରିବେ ଏବଂ ଏହି ଲୋକ ମାନଙ୍କ ଦ୍ୱାରା ସମ୍ପୂର୍ଣ୍ଣ ସ୍ୱେଚ୍ଛକୃତ ଭାବରେ ସ୍ୱଚ୍ଛତା ଆଧାରରେ ବର୍ଜ୍ୟ ପରିଚାଳନା କରାଯିବ। ସ୍ୱଚ୍ଛ ଭାରତ ୨୦୨୨ କେବଳ ଏକ କାର୍ଯ୍ୟକ୍ରମ ନୁହେଁ. ଏହା ଲୋକ ମାନଙ୍କୁ ସ୍ୱଚ୍ଛତାର ଅନୁଭବ କରାଇବା ନିମନ୍ତେ ଏକ ଗମ୍ଭୀର ପ୍ରୟାସ ଅଟେ। ଏହା ଦେଶରେ ଖୁସି ସୂଚକାଙ୍କରେ ମଧ୍ୟ ଯୋଗଦାନ ଦେବ। ଯୁବ ବ୍ୟାପାର ବିଭାଗ ଏହି ଅଭିଯାନକୁ ଦେଶରେ ଲୋକ ମାନଙ୍କ ଦ୍ୱାରା ଚାଲୁ କରା ଯାଉଥିବା ସବୁଠାର ବଡ ସ୍ୱଚ୍ଛତା ଅଭିଯାନ କରାଇବା ନିମନ୍ତେ ଚେଷ୍ଟା କରୁଛି।

ସ୍ୱଚ୍ଛ ଭାରତ ୨୦୨୨ କାର୍ଯ୍ୟକ୍ରମର ଉଦ୍ଦେଶ୍ୟ ୦୧ ଅକ୍ଟୋବରରୁ ୩୧ ଅକ୍ଟୋବର ୨୦୨୨ ପର୍ଯ୍ୟନ୍ତ ଦେଶର ସମସ୍ତ ଜିଲ୍ଲା ଗୁଡିକରେ ସର୍ବସାଧାରଣ ସ୍ଥାନ ଗୁଡିକୁ ଏବଂ ଘର ଗୁଡିକୁ ପରିଷ୍କାର କରିବା ପାଇଁ ଆୟୋଜନ କରିବା, ଯେଉଁଥିରେ ସମାଜର ସମସ୍ତ ବର୍ଗ ଗୁଡିକର ଲୋକ, ସରକାରୀ ସଙ୍ଗଠନ, ଯେଉଁଥିରେ ପିଆର୍ଆଇ ଅନ୍ତର୍ଭୁକ୍ତ ଏବଂ ଅଣ – ସରକାରୀ ସଙ୍ଗଠନ ଗୁଡିକ ସହିତ ସରକାରୀ ସଙ୍ଗଠନ ଗୁଡିକ ଜଡିତ ହୋଇ ନିଜର ଆଖପାଖର ପରିବେଶକୁ ସ୍ୱଚ୍ଛ ଏବଂ ବର୍ଜ୍ୟ ମୁକ୍ତ ରଖିବା ନିମନ୍ତେ ନାଗରିକ ମାନଙ୍କ ମଧ୍ୟରେ ସଚେତନତା ଏବଂ ଗର୍ବର ଭାବନା ସୃଷ୍ଟି କରିବା ପାଇଁ କାର୍ଯ୍ୟ କରିବେ। ଏହା ସହିତ ଏହି ଅଭିଯାନ “ସ୍ୱଚ୍ଛ କାଳ : ଅମୃତ କାଳ” ମନ୍ତ୍ର ପ୍ରଦାନ କରିବ ଏବଂ ଜନ ଭାଗୀଦାରୀ ମାଧ୍ୟମରେ ଏହି କାର୍ଯ୍ୟକ୍ରମକୁ ଜନ ଆନ୍ଦୋଳନରେ ପରିବର୍ତ୍ତନ କରିବ।

ନୂଆଦିଲ୍ଲୀ: କେନ୍ଦ୍ର ସୂଚନା ଓ ପ୍ରସାରଣ ମନ୍ତ୍ରୀ ଅନୁରାଗ ସିଂହ ଠାକୁର କହିଛନ୍ତି ଯେ ଦେଶରେ ଦ୍ରୁତଗତିରେ ବିକଶିତ ହେଉଥିବା ଡିଜିଟାଲ ଭିତ୍ତିଭୂମି ଏବଂ ଏଭିଜିସି (ଆନିମେସନ, ଭିଜୁଆଲ ଇଫେକ୍ଟସ, ଗେମିଙ୍ଗ ଓ କମିକ୍ସ) କ୍ଷେତ୍ରରେ ଚାଲିଥିବା ପ୍ରଗତି ଭାରତକୁ ବିଶ୍ୱର ପ୍ରମୁଖ ମିଡିଆ (ଗଣମାଧ୍ୟମ) ଓ ଏଣ୍ଟରଟେନମେଣ୍ଟ (ମନୋରଞ୍ଜନ) ର ପୋଷ୍ଟ ପ୍ରଡକ୍ସନ ହବ୍‌ରେ ପରିଣତ କରିବାକୁ ଦକ୍ଷତା ବହନ କରୁଛି।

ପୁଣେ ସ୍ଥିତ ସିମ୍ବାୟୋସିସ୍ ସ୍କିଲ ଓ ପ୍ରଫେସନାଲ ବିଶ୍ୱବିଦ୍ୟାଳୟର “ଗଣମାଧ୍ୟମ ଓ ମନୋରଞ୍ଜନ କ୍ଷେତ୍ରରେ ପରିବର୍ତ୍ତନଶୀଳ ଦୃଶ୍ୟପଟ-୨୦୨୨” ଶୀର୍ଷକ ଏକ ଜାତୀୟ ଆଲୋଚନାଚକ୍ରରେ ମୂଳ ବକ୍ତୃତା ପ୍ରଦାନ କରି ମନ୍ତ୍ରୀ ଶ୍ରୀ ଠାକୁର କହିଛନ୍ତି ଯେ ଦେଶରେ ଏବେ ଏଭିଜିସି କ୍ଷେତ୍ରରେ ଏକ ଦୃଢ ଡିଜିଟାଲ ମୂଳଦୁଆ  ତିଆରି ହୋଇଛି । ଦେଶର ଓ ବିଶ୍ୱର ଆବଶ୍ୟକତା ପୂରଣ ପାଇଁ ବିଶ୍ୱସ୍ତରୀୟ ସର୍ଜନାତ୍ମକ ପ୍ରତିଭା ବିକଶିତ କରିବାକୁ ସରକାର ଏଭିଜିସି କ୍ଷେତ୍ର ନିମନ୍ତେ ଏକ ଟାସ୍କଫୋର୍ସ ଗଠନ କରିଛନ୍ତି।

ମନ୍ତ୍ରୀ ଶ୍ରୀ ଠାକୁର ଆହୁରି କହିଛନ୍ତି ଯେ ଦେଶର ମିଡିଆ ଓ ଏଂଟରଟେଂନମେଣ୍ଟ ପରିବେଶ ଏକ ଦ୍ରୁତ ବିକାଶୋନ୍ମୁଖୀ ଉଦ୍ୟୋଗ ଯାହାର ଭବିଷ୍ୟତ ଅତ୍ୟନ୍ତ ଉଜ୍ଜ୍ୱଳ। ଏହି ଉଦ୍ୟୋଗର ଆକାର ୨୦୨୫ ସୁଦ୍ଧା ବାର୍ଷିକ  ୪ଲକ୍ଷ କୋଟି ଟଙ୍କା ଛୁଇଁବା ଆଶା କରାଯାଉଛି। ଆହୁରି ମଧ୍ୟ ଏହି ଉଦ୍ୟୋଗର ଆକାର ୨୦୩୦ ସୁଦ୍ଧା ୧୦୦ ବିଲିୟନ ଡଲାର ବା ୭.୫ ଲକ୍ଷ କୋଟି ଟଙ୍କାରେ ପହଞ୍ଚିବା ବୋଲି ସେ କହିଛନ୍ତି।

ମନ୍ତ୍ରୀ ଆହୁରି କହିଛନ୍ତି ଯେ ଭାରତ ସରକାର ଅଡିଓ-ଭିଜୁଆଲ ସର୍ଭିସ(ଦୃଶ୍ୟ-ଶ୍ରାବ୍ୟ ସେବା)କୁ ୧୨ଟି ଚମ୍ପିଅନ ସେବା କ୍ଷେତ୍ର ମଧ୍ୟରେ ସ୍ଥାନିତ କରିଛନ୍ତି ଏବଂ ଏହି କ୍ଷେତ୍ରରେ ଅଭିବୃଦ୍ଧିର ଧାରାକୁ ତ୍ୱରାନ୍ୱିତ କରିବାକୁ ଅନେକ ଗୁରୁତ୍ୱପୂର୍ଣ୍ଣ ନୀତି ଓ କାର୍ଯ୍ୟକ୍ରମ ଘୋଷଣା କରିଛନ୍ତି।

ମନ୍ତ୍ରୀ ଶ୍ରୀ ଠାକୁର କହିଛନ୍ତି ଯେ “ ଆମେ ଉଚ୍ଚମାନର ବିଷୟବସ୍ତୁ (କ୍ୱାଲିଟି କଂଟେଂଟ) ସୃଷ୍ଟିର ଡିଜିଟାଲ ଯୁଗରେ ପାଦ ଦେବାକୁ ଯାଉଥିବାରୁ ରେଡିଓ, ଫିଲ୍ମ ଏବଂ ମନୋରଞ୍ଜନ ଉଦ୍ୟୋଗରେ ବିପୁଳ ନିଯୁକ୍ତି ସୁଯୋଗ ସୃଷ୍ଟି ହେବ। ଭିଡିଓ ଏଡିଟିଙ୍ଗ, କଲର ଗ୍ରେଡିଂ, ଭିଜୁଆଲ ଇଫେକ୍ଟ, ସାଉଣ୍ଡ ଡିଜାଇନ, ରୋଟୋସ୍କେପିଙ୍ଗ ଓ ଥ୍ରୀଡି ମଡେଲିଂ ଆଦି କ୍ଷେତ୍ରରେ ଅନେକ ନିଯୁକ୍ତି ସୁଯୋଗ ସୃଷ୍ଟି ହୋଇସାରିଲାଣି। ଏସବୁ କ୍ଷେତ୍ରରେ ନିର୍ଦ୍ଦିଷ୍ଟ କୌଶଳ ଓ ଦକ୍ଷତାର ଆବଶ୍ୟକତା ରହିଛି। ଅତଏବ ଏହି କ୍ଷେତ୍ରର ଆବଶ୍ୟକତା ପୂରଣ କ୍ଷେତ୍ରରେ ଉଦ୍ୟୋଗ ଓ ଶିକ୍ଷା ତଥା ଗବେଷଣା ଅନୁଷ୍ଠାନମାନେ ଆଗେଇ ଆସିବା ଅପରିହାର୍ଯ୍ୟ। ଏହି କ୍ଷେତ୍ରରେ ଯେଉଁ ନୂଆ ନୂଆ ଟେକ୍‌ନୋଲୋଜି ଟ୍ରେଣ୍ଡ ଆସୁଛି ତା’ସହିତ ଛାତ୍ରଛାତ୍ରୀମାନଙ୍କୁ ଅବଗତ ଓ ଅଭ୍ୟାସ କରିବାକୁ ସରକାର ଘରୋଇ ଉଦ୍ୟୋଗ ସହିତ ସମ୍ଭାବ୍ୟ ଅଂଶୀଦାରୀ ଗଢିବାକୁ ଉଦ୍ୟମ କରୁଛନ୍ତି।

ମନ୍ତ୍ରୀ ଶ୍ରୀ ଠାକୁର କହିଛନ୍ତି ଯେ ଟେକ୍‌ନୋଲୋଜି ପ୍ରତି ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କ ବିଶେଷ ଆଗ୍ରହ ଦେଶର ଯୁବବର୍ଗଙ୍କ ଆଶା ଆକାଂକ୍ଷା ବଢାଇଛି। ସେଥିପାଇଁ ସରକାର ନୂଆ ନୂଆ ସୁବିଧା ସୁଯୋଗ ସୃଷ୍ଟି କରୁଛନ୍ତି। ସ୍କିଲ ଇଣ୍ଡିଆ ମିଶନ ମାଧ୍ୟମରେ ଭାରତ ସରକାର ଦେଶର ଯୁବସମାଜକୁ ସଶକ୍ତ ଓ ସମର୍ଥ କରି ପ୍ରଧାନମନ୍ତ୍ରୀଙ୍କ ଆଶା ଓ ଲକ୍ଷ୍ୟକୁ ପୂରଣ କରୁଛନ୍ତି। ଏହା ଫଳରେ ଯୁବ ସମାଜର ଆଶାରେ ଡେଣା ଲାଗିଛି। ସ୍କିଲ ଇଣ୍ଡିଆ ମିଶନ ମାଧ୍ୟମରେ ବିଭିନ୍ନ କ୍ଷେତ୍ରରେ ବଜାରର ଆବଶ୍ୟକତାକୁ ବିଚାରକୁ ନେଇ ୪୦କୋଟି ଯୁବକଙ୍କୁ ସମର୍ଥ ଓ ସଶକ୍ତ କରିବାର ଲକ୍ଷ୍ୟ ସରକାର ରଖାଯାଇଛି।

‘୭୫ କ୍ରିଏଟିଭ ମାଇଣ୍ଡସ ଅଫ ଟୁମରୋ’ ପ୍ରୋଜେକ୍ଟ ଯାହା ୨୦୨୧ ଆନ୍ତର୍ଜାତିକ ଫିଲ୍ମ ଫେଷ୍ଟିଭାଲ ଅବସରରେ ଆରମ୍ଭ ହୋଇଥିଲା। ସେ ସମ୍ପର୍କରେ ଶ୍ରୀ ଠାକୁର କହିଛନ୍ତି ଯେ ଏହି ପ୍ରକଳ୍ପର ଅନେକ ପ୍ରତିଭା ମିଡିଆ ଓ ଏଣ୍ଟରଟେନମେଣ୍ଟ କ୍ଷେତ୍ରକୁ ଉଲ୍ଲେଖନୀୟ ସୃଷ୍ଟି ଧର୍ମୀ ଅବଦାନ ଯୋଗାଉଛନ୍ତି। ସେମାନଙ୍କ ମଧ୍ୟରୁ ଆଉ କେତେକ ମଧ୍ୟ ସଫଳତାର ସହିତ ନିଜର ଷ୍ଟାର୍ଟଅପ୍ ଆରମ୍ଭ କରିଛନ୍ତି।

ଦେଶର କ୍ରମବର୍ଦ୍ଧିନଶୀଳ ଷ୍ଟାର୍ଟଅପ ସଂସ୍କତି ଓ ପରିତନ୍ତ୍ର ସମ୍ପର୍କରେ ସେ କହିଛନ୍ତି ଯେ କୋଭିଡ ମହାମାରୀ କାଳରେ ମଧ୍ୟ ଏ କ୍ଷେତ୍ରରେ ଭାରତର ଉଦ୍ୟମରେ ଭଟ୍ଟା ପଡି ନ ଥିଲା। ଏହି କଠିନ ସମୟରେ ଭାରତରେ ୫୦ଟି ନୂଆ ୟୁନିକର୍ଣ୍ଣ ଗଠିତ ହୋଇଥିଲା। ଏହା ଭାରତୀୟ ଉଦ୍ୟମିତାର  ଉତ୍ସାହର  ପ୍ରମାଣ ବହନ କରେ। ଏଫ୍‌ଟିଆଇଆଇ  ଓ ଏସ୍‌ଆରଏଫଟିଆଇ ଭଳି ପ୍ରମୁଖ ଚଳଚ୍ଚିତ୍ର ଶିକ୍ଷାନୁଷ୍ଠାନ ବା ଫିଲ୍ମ ସ୍କୁଲଗୁଡିକରୁ ବାହାରୁଥିବା ପ୍ରତିଭାମାନେ ଏଭଳି ଅଧିକରୁ ଅଧିକ ଷ୍ଟାର୍ଟଅପ୍ ନିର୍ମାଣ କରିବେ ବୋଲି  ସେ ଆଶାପ୍ରକାଶ କରିଥିଲେ।

ଏକ ଗ୍ଲୋବାଲ କଣ୍ଟେଣ୍ଟ ହବ୍ ଭାବେ ଭାରତ

ଡିଜିଟାଲ ଇଣ୍ଡିଆର ସଫଳତା ମାଧ୍ୟମରେ ଭାରତର କଣ୍ଟେଣ୍ଟ କ୍ରିଏସନ(ବିଷୟବସ୍ତୁ ସୃଷ୍ଟି କରିବା) ଉଦ୍ୟୋଗ ଏକ ବଡ ପ୍ରୋତ୍ସାହନ ପାଇଥିବା ଉଲ୍ଲେଖ କରି ମନ୍ତ୍ରୀ ଶ୍ରୀ ଠାକୁର କହିଛନ୍ତି ଯେ “ଉତ୍ତମ ମାନର ବିଷୟବସ୍ତୁ, ସହଜ ପହଂଚ ଓ ଆଗ୍ରହୀ ଶ୍ରୋତା /ଦର୍ଶକଙ୍କ ଉପସ୍ଥିତି ଭାରତକୁ ଏ କ୍ଷେତ୍ରରେ ତାହାର ସଫଳ କାହାଣୀ ବିଶ୍ୱ ସମୁଦାୟକୁ ଶୁଣାଇବାକୁ ପ୍ରସ୍ତୁତ କରିଛି। ଏହା ଭାରତକୁ ବିଶ୍ୱର ଏକ ପ୍ରମୁଖ କଂଟେଂଟ ହବ୍‌ରେ ପରିଣତ କରିବାକୁ ଯାଉଛି । ସେ ଆହୁରି କହିଛନ୍ତି ଯେ ଏହି ପ୍ରୟାସ ପଛରେ ଥିବା ବୈଷୟିକ ଲୋକଶକ୍ତିର ଉଦ୍ୟମକୁ ଉପଯୁକ୍ତଭାବେ ପୁରସ୍କୃତ ଓ ମାନ୍ୟତା ପ୍ରଦାନ କରାଯିବାର ଆବଶ୍ୟକତା ରହିଛି। ସେଥିପାଇଁ ଅଗ୍ରଣୀ ଚରିତ୍ରଙ୍କ ଉପରେ ଦୃଷ୍ଟି କେନ୍ଦ୍ରୀତ କରିବାର ପ୍ରଚଳିତ ଧାରାକୁ ବଦଳାଇବାକୁ ପଡିବ।

ଏହି ଜାତୀୟ ସମ୍ମିଳନୀରେ ଅସ୍କାର ଓ ‘ବାଫଟା’ ପୁରସ୍କାର ବିଜୟୀ ସାଉଣ୍ଡ ଡିଜାଇନର ରେସୁଲ ପୁକୁଟ୍ଟୀ ସମ୍ମାନୀତ ଅତିଥିଭାବେ ଯୋଗଦେଇଥିଲେ। ସେ କହିଥିଲେ ଯେ ଦେଶର ଶିକ୍ଷାନୁଷ୍ଠାନ ସମୂହ ଛାତ୍ରଛାତ୍ରୀଙ୍କୁ ବାହାର ଦୁନିଆର ସମ୍ମୁଖୀନ ହେବା ପାଇଁ ସେମାନଙ୍କର ଦକ୍ଷତା ବିକାଶ କରିବା ବ୍ୟତୀତ ପ୍ରାଚୀନ ଭାରତୀୟ ପରମ୍ପରାକୁ ଅନୁସରଣ କରି ଶିକ୍ଷାଦାନ କରିବା ଆବଶ୍ୟକ।

ଆନିମେସନ,ଭିଏପ୍‌ଏକ୍ସ, ଗେମିଂ ଓ କମିକ୍ସ, ଓଟିଟି, ଟିଭି, ଫିଲ୍ମ ପ୍ରଡକ୍ସନ, ଅଗମେଣ୍ଟଡ୍ ରିୟଲିଟି/ଭର୍ଚୁଆଲ ରିୟଲିଟି, ଇମ୍‌ର୍ସିଭ ମିଡିଆ ସ୍କିଲ  ଆଦି ଉତ୍‌ଥାନମୁଖୀ କ୍ଷେତ୍ର ଓ ତାହାର ସୁଯୋଗ ଉପରେ ଏହି ସମ୍ମିଳନୀରେ ଆଲୋଚନା କରାଯାଇଥିଲା। ଏଥିରେ ମିଡିଆ ଓ ମନୋରଞ୍ଜନ କ୍ଷେତ୍ରର ପ୍ରମୁଖ ବ୍ୟକ୍ତିତ୍ୱ ତଥା ସିମ୍ବାୟୋସିସ୍ ସ୍କିଲ ଓ ପ୍ରଫେସନାଲ ୟୁନିଭିରସିଟିର କୁଳାଧିପତି ଡକ୍ଟର ଏସ.ପି. ମଜୁମଦାର,  ଉପକୂଳାଧିପତି ଡଃ ସ୍ୱାତୀ ମଜୁମଦାର ଓ କୁଳପତି ଡଃ ଗୌରୀ ଶିଉରକର ପ୍ରମୁଖ ଯୋଗଦେଇଥିଲେ।

ନୂଆଦିଲ୍ଲୀ: କେନ୍ଦ୍ର ସୂଚନା ଏବଂ ପ୍ରସାରଣ ଏବଂ ଯୁବ ବ୍ୟାପାର ଓ କ୍ରୀଡ଼ା ମନ୍ତ୍ରୀ ଅନୁରାଗ ସିଂହ ଠାକୁର ଆଜି ନୂଆଦିଲ୍ଲୀରେ ପ୍ରସାରଣ ସେବା ପୋର୍ଟାଲର ଉନ୍ମୋଚନ କରିଛନ୍ତି। ଏଥିସହିତ ପ୍ରସାରଣ କ୍ଷେତ୍ରରେ ‘ବ୍ୟବସାୟିକ ସୁଗମତା’ ପାଇଁ ଏକ ନୂତନ ଅଧ୍ୟାୟ ଆରମ୍ଭ ହୋଇଛି। ପ୍ରସାରଣ ସେବା ପୋର୍ଟାଲ ଏକ ଅନଲାଇନ ପୋର୍ଟାଲ, ଯାହା ଅଧୀନରେ ପ୍ରସାରକମାନଙ୍କ ଦ୍ବାରା ବିଭିନ୍ନ ପ୍ରକାର ଲାଇସେନ୍ସ, ଅନୁମତି, ପଞ୍ଜୀକରଣ ଆଦି ପାଇଁ ଆବେଦନକୁ ଯଥାଶୀଘ୍ର ଦାଖଲ କରାଯାଇ ପାରିବ। ଏସବୁ ଆବେଦନର ଯାଞ୍ଚ ପ୍ରକ୍ରିୟା ମଧ୍ୟ ଯଥାଶୀଘ୍ର ସମ୍ପୂର୍ଣ୍ଣ କରାଯାଇପାରିବ।

ଏହି ଅବସରରେ ଅନୁରାଗ ଠାକୁର କହିଥିଲେ ଯେ ସରକାର ବ୍ୟବସ୍ଥାଗତ ପାରଦର୍ଶିତା ଆଣିବା ଏବଂ ଏହାକୁ ଆହୁରି ଉତ୍ତରଦାୟୀ କରିବା ଲାଗି ପ୍ରଯୁକ୍ତିର ଉପଯୋଗ କରିଛନ୍ତି। ପ୍ରସାରଣ ସେବା ପୋର୍ଟାଲରେ ଆବେଦନ କଲେ ଚୂଡ଼ାନ୍ତ ନିଷ୍ଣତ୍ତି ଗ୍ରହଣ କରିବାରେ ଲାଗୁଥିବା ସମୟ ହ୍ରାସ ପାଇବ ଏବଂ ଆବେଦନକାରୀମାନଙ୍କୁ ଆବେଦନର ପ୍ରଗତି ସମ୍ପର୍କରେ ସୂଚନା ମିଳିପାରିବ। ଏହି ପୋର୍ଟାଲ ଆବେଦନକାରୀମାନଙ୍କର ବାରମ୍ବାର ଉପସ୍ଥିତି ଆବଶ୍ୟକତାକୁ ମଧ୍ୟ କମାଇବ, ଯାହାକି ପୂର୍ବରୁ ଜରୁରି ଥିଲା। ଏହି ପୋର୍ଟାଲ ମନ୍ତ୍ରଣାଳୟର କ୍ଷମତା ବୃଦ୍ଧିରେ ମଧ୍ୟ ସହାୟକ ହେବ। ବ୍ୟବସାୟିକ ସୁଗମତା ବା ଇଜ୍‌ ଅଫ୍‌ ଡୁଇଂ ବିଜନେସ କ୍ଷେତ୍ରରେ ଏହା ଏକ ମହତ୍ବପୂର୍ଣ୍ଣ ପଦକ୍ଷେପ ସାବ୍ୟସ୍ତ ହୋଇପାରିବ।

ଶ୍ରୀ ଠାକୁର ଆହୁରି ମଧ୍ୟ କହିଥିଲେ ଯେ ସବୁ ପ୍ରକାରର (୩୬୦ ଡିଗ୍ରୀ) ଡିଜିଟାଲ ସମାଧାନ, ଅଂଶୀଦାରମାନଙ୍କୁ ଅନୁମତି ଆଣିବା, ପଞ୍ଜୀକରଣ ପାଇଁ ଆବେଦନ କରିବା, ଆବେଦନ ଉପରେ ଦୃଷ୍ଟି ରଖିବା, ଶୁଳ୍କ ଗଣନା କରିବା ଏବଂ ପରିଶୋଧ କରିବାର ସୁବିଧା ଏହି ପୋର୍ଟାଲରୁ ମିଳିପାରିବ। ଘରୋଇ ସାଟେଲାଇଟ୍‌ ଟିଭି ଚ୍ୟାନେଲ, ଟେଲିପୋର୍ଟ ପରିଚାଳକ, ଏମଏସଓ, ଗୋଷ୍ଠୀ ଏବଂ ଘରୋଇ ରେଡିଓ ଚ୍ୟାନେଲ ସହ ଜଡ଼ିତ ସବୁ ଅଂଶୀଦାରମାନଙ୍କୁ ଡିଜିଟାଲ ଇଣ୍ଡିଆର ବ୍ୟାପକ ପ୍ରୟାସ ଅଧୀନରେ ଏହି ପୋର୍ଟାଲ ସେବା ପ୍ରଦାନ କରିବ।

ଶ୍ରୀ ଠାକୁର କହିଥିଲେ ଯେ, ‘‘ଏହି ପୋର୍ଟାଲ ମାନନୀୟ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କ ‘ସର୍ବନିମ୍ନ ସରକାର, ସର୍ବାଧିକ ପ୍ରଶାସନ’ ମନ୍ତ୍ରକୁ ସାକାର କରିବା ଦିଗରେ ଏକ ଗୁରୁତ୍ବପୂର୍ଣ୍ଣ ପଦକ୍ଷେପ ସାବ୍ୟସ୍ତ ହେବ। କାରଣ ସରଳ ତଥା ବ୍ୟବହାରକାରୀଙ୍କ ପାଇଁ ଅନୁକୂଳ ହୋଇଥିବାରୁ ଏହି ୱେବ ପୋର୍ଟାଲ ଆରମ୍ଭରୁ ଶେଷ ପର୍ଯ୍ୟନ୍ତ (ଏଣ୍ଡ ଟୁ ଏଣ୍ଡ) ସବୁ ସମାଧାନ ମାତ୍ର ଗୋଟିଏ କ୍ଲିକ୍‌ରେ ପ୍ରଦାନ କରିବ। ପୋର୍ଟାଲ ଦ୍ବାରା ୯୦୦ରୁ ଅଧିକ ସାଟେଲାଇଟ୍‌ ଟିଭି ଚ୍ୟାନେଲ, ୭୦ରୁ ଅଧିକ ଟେଲିପୋର୍ଟ ପରିଚାକ, ୧୭୫୦ରୁ ଅଧିକ ବହୁ ସେବା ପରିଚାଳକ, ୩୫୦ରୁ ଅଧିକ ଗୋଷ୍ଠୀ ରେଡିଓ ଷ୍ଟେସନ (ସିଆରଏସ), ୩୮୦ରୁ ଅଧିକ ଘରୋଇ ଏଫଏମ ଚ୍ୟାନେଲ ଲାଭାନ୍ବିତ ହୋଇପାରିବେ। ବ୍ୟବସାୟିକ ସୁଗମତା ପାଇଁ ଉପଯୁକ୍ତ ପରିବେଶ ସୃଷ୍ଟି କରିବା ସହିତ ସମ୍ପୂର୍ଣ୍ଣ ପ୍ରସାରଣ କ୍ଷେତ୍ରକୁ ସଶକ୍ତ କରିବା ଦିଗରେ ଏହି ପୋର୍ଟାଲ ବିଶେଷ ସହାୟକ ହୋଇପାରିବ।’’

କେନ୍ଦ୍ର ମନ୍ତ୍ରୀ ଶ୍ରୀ ଠାକୁର କହିଥିଲେ ଯେ ପୋର୍ଟାଲର ପରୀକ୍ଷଣକୁ ଶେଷ ଉପଯୋଗକାରୀଙ୍କ ଠାରୁ ସକାରାତ୍ମକ ପ୍ରତିକ୍ରିୟା ମିଳିଛି। ଯଥାଶୀଘ୍ର ପୋର୍ଟାଲକୁ ଜାତୀୟ ସିଙ୍ଗଲ ୱିଣ୍ଡୋ ବ୍ୟବସ୍ଥା ସହିତ ଯୋଡ଼ି ଦିଆଯିବ। ଉଦ୍ୟୋଗ ଜଗତ ଅନ୍ୟ କୌଣସି ସଂସ୍କାର ଆବଶ୍ୟକ କରୁଥିଲେ, ମନ୍ତ୍ରଣାଳୟ ସେସବୁ ସଂସ୍କାରକୁ ସାମିଲ କରିବା ପାଇଁ ମଧ୍ୟ ପ୍ରସ୍ତୁତ ରହିଛି ବୋଲି କେନ୍ଦ୍ର ମନ୍ତ୍ରୀ କହିଥିଲେ।

ସୂଚନା ଏବଂ ପ୍ରସାରଣ ମନ୍ତ୍ରଣାଳୟର ସଚିବ ଅପୂର୍ବ ଚନ୍ଦ୍ର କହିଥିଲେ ଯେ ନୂଆ ପୋର୍ଟାଲରେ ପୂର୍ବ ସଂସ୍କରଣ ତୁଳନାରେ ଅନେକ ସୁଧାର ଅଣାଯାଇଛି ଏବଂ ସେଥିରେ ଗୋଟିଏ ମାସର ପରୀକ୍ଷଣ ଅବଧି ସମୟରେ ଅଂଶୀଦାରମାନଙ୍କ ଠାରୁ ପ୍ରାପ୍ତ ପରାମର୍ଶକୁ ମଧ୍ୟ ସାମିଲ କରାଯାଇଛି।

ପୋର୍ଟାଲ ଦ୍ବାରା ଇକୋସିଷ୍ଟମରେ ପାରଦର୍ଶିତା, ଉତ୍ତରଦାୟିତ୍ବ ଏବଂ ତତ୍ପରତା ବୃଦ୍ଧି ପାଇବ ଏବଂ ସବୁ ପ୍ରକାର ସୂଚନା ଗୋଟିଏ ଡ୍ୟାଶବୋର୍ଡରେ ଉପଲବ୍ଧ ହେବ। ପୋର୍ଟାଲର ବିଭିନ୍ନ ସେବା ଏବଂ ବିଶେଷତ୍ବ ମଧ୍ୟରେ ରହିଛି:

– ଆରମ୍ଭରୁ ଶେଷ ପର୍ଯ୍ୟନ୍ତ (ଏଣ୍ଡ ଟୁ ଏଣ୍ଡ) ଯାଞ୍ଚ ସୁବିଧା

– ପରିଶୋଧ ପ୍ରଣାଳୀ ସହିତ ସମନ୍ବୟ (ଭାରତ କୋଷ)

– ବିଶ୍ଳେଷଣ, ରିପୋର୍ଟିଂ ଏବଂ ପରିଚାଳନା ସୂଚନା ପ୍ରଣାଳୀ (ଏମଆଇଏସ)

– ସମନ୍ବିତ ହେଲ୍ପଡେସ୍କ

– ଆବେଦନ ଫର୍ମ ଏବଂ ଷ୍ଟାଟସ ଜାଣିବାର ସୁବିଦା

– ପୋର୍ଟାଲରୁ ପତ୍ର/ଆଦେଶ ଡାଉନଲୋଡ୍‌ କରିବାର ସୁବିଦା

– ଅଂଶୀଦାରମାନଙ୍କ ପାଇଁ ସତର୍କତା (ଏସଏମଏସ/ଇମେଲ)

ଏହି କାର୍ଯ୍ୟକ୍ରମରେ ଉପସ୍ଥିତ ପ୍ରସାରକମାନେ ପୋର୍ଟାଲ ଉନ୍ମୋଚନକୁ ସ୍ବାଗତ କରିଥିଲେ ଏବଂ କହିଥିଲେ ଯେ ଆବେଦନ ପାଇଁ ଲାଗୁଥିବା ସମୟ ହ୍ରାସ କରିବାରେ ଏହା ସହାୟକ ହୋଇପାରିବ। ଆବେଦନ ପ୍ରକ୍ରିୟା ପାଇଁ ଆବଶ୍ୟକ ପ୍ରୟାସକୁ ଏହା ସହଜ କରିବ।

ସୂଚନାଯୋଗ୍ୟ ଯେ ଦେଶରେ ବ୍ୟବସାୟିକ ସୁଗମତାରେ ସୁଧାର ଆଣିବା ପାଇଁ ଭାରତ ସରକାର ପ୍ରାଥମିକତା ଦେଇ ଆସୁଛନ୍ତି। ପ୍ରସାରଣ ସେବା ପୋର୍ଟାଲ ବ୍ୟବସାୟିକ ସୁଗମତା ଆଣିବା ତଥା ପ୍ରସାରଣ କ୍ଷେତ୍ରକୁ ସଶକ୍ତ କରିବା ପ୍ରତି ସରକାରଙ୍କ ପ୍ରତିବଦ୍ଧତାର ଏକ ଉଦାହରଣ।