ନୂଆଦିଲ୍ଲୀ: ‘‘ଅପରେସନ୍ ସିନ୍ଦୁର ମାଧ୍ୟମରେ, ଭାରତ ନିଜ ମାଟିରେ ଆକ୍ରମଣର ଜବାବ ଦେବାକୁ ନିଜର ଅଧିକାର ପ୍ରୟୋଗ କରିଛି ଏବଂ ସଶସ୍ତ୍ର ବାହିନୀ ପାକିସ୍ତାନ ଏବଂ ପାକ୍ ଅଧିକୃତ କାଶ୍ମୀରରେ ଆତଙ୍କବାଦୀ ତାଲିମ କେନ୍ଦ୍ର ଏବଂ ଶିବିରଗୁଡ଼ିକୁ ଧ୍ୱଂସ କରିବାରେ ସଠିକତା, ସତର୍କତା ଏବଂ ଚେତନାପୂର୍ଣ୍ଣ କାର୍ଯ୍ୟ କରି ଇତିହାସ ସୃଷ୍ଟି କରିଛି,’’ ବୋଲି ପ୍ରତିରକ୍ଷା ମନ୍ତ୍ରୀ ରାଜନାଥ ସିଂ କହିଛନ୍ତି। ଦିଲ୍ଲୀ କ୍ୟାଣ୍ଟର ମାନେକଶା ସେଣ୍ଟରରେ ସୀମା ସଡ଼କ ସଂଗଠନର ୬୬ତମ ପ୍ରତିଷ୍ଠା ଦିବସ ସମାରୋହରେ ତାଙ୍କ ଅଭିଭାଷଣରେ ସେ ଜୋର ଦେଇ କହିଛନ୍ତି, ସାଧାରଣ ନାଗରିକଙ୍କୁ କ୍ଷତି ନ ପହଞ୍ଚାଇ ଯୋଜନାବଦ୍ଧ ଭାବରେ ଟାର୍ଗେଟଗୁଡ଼ିକୁ ଧ୍ୱଂସ କରାଯାଇଛି। ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କ ନେତୃତ୍ୱରେ ଆତଙ୍କବାଦୀ ଆକ୍ରମଣର ଉପଯୁକ୍ତ ଜବାବ ଦେବା ପାଇଁ ସେ ସଶସ୍ତ୍ର ବାହିନୀକୁ ପ୍ରଶଂସା କରିଛନ୍ତି।
ରାଜନାଥ ସିଂହ କହିଛନ୍ତି ଯେ ଆଜି ଆମ ସଶସ୍ତ୍ର ବାହିନୀର କାର୍ଯ୍ୟାନୁଷ୍ଠାନକୁ ସମଗ୍ର ବିଶ୍ୱ ଦେଖିଛି। ଏହା ଅତ୍ୟନ୍ତ ଯୋଜନାବଦ୍ଧ ଏବଂ ସଠିକ୍ ଭାବରେ କାର୍ଯ୍ୟକାରୀ ହୋଇଥିଲା। ତେବେ, ଏହି କାର୍ଯ୍ୟାନୁଷ୍ଠାନ କେବଳ ଆତଙ୍କବାଦୀମାନଙ୍କୁ ତାଲିମ ଦେବା ପାଇଁ ବ୍ୟବହୃତ ଶିବିର ଏବଂ ସମ୍ପୃକ୍ତ ଭିତ୍ତିଭୂମିକୁ ଧ୍ୱଂସ କରିବା ମଧ୍ୟରେ ସୀମିତ ଥିଲା। ଏହାର ମୁଖ୍ୟ ଲକ୍ଷ୍ୟ ଥିଲା ଆତଙ୍କବାଦୀ ଏବଂ ସେମାନଙ୍କ ମୁନିବମାନଙ୍କର ମନୋବଳ ଭାଙ୍ଗିବା। ପ୍ରତିରକ୍ଷା ମନ୍ତ୍ରୀ କହିଛନ୍ତି ଯେ ସମଗ୍ର ଦେଶ ପକ୍ଷରୁ ସେ ଏହି ଅଭିଯାନ ପାଇଁ ସଶସ୍ତ୍ର ବାହିନୀକୁ ଅଭିନନ୍ଦନ ଜଣାଉଛନ୍ତି। ସେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କୁ ମଧ୍ୟ ଅଭିନନ୍ଦନ ଜଣାଉଛନ୍ତି, ଯିଏ ପ୍ରତିରକ୍ଷା ବାହିନୀକୁ ପୂର୍ଣ୍ଣ ସମର୍ଥନ ଦେଇଛନ୍ତି।
ଏହି କାର୍ଯ୍ୟକ୍ରମରେ, ପ୍ରତିରକ୍ଷା ମନ୍ତ୍ରୀ ସୀମା ସଡ଼କ ସଂଗଠନ(ବିଆରଓ)ର ୫୦ଟି ରଣନୀତିକ ଭାବରେ ଗୁରୁତ୍ୱପୂର୍ଣ୍ଣ ଭିତ୍ତିଭୂମି ପ୍ରକଳ୍ପକୁ ଆଭାସୀ ମାଧ୍ୟମରେ ରାଷ୍ଟ୍ର ଉଦ୍ଦେଶ୍ୟରେ ଉତ୍ସର୍ଗ କରିଥିଲେ। ଏଥିରେ ୩୦ଟି ସେତୁ, ୧୭ଟି ରାସ୍ତା ଏବଂ ଅନ୍ୟ ତିନୋଟି ଭିତ୍ତିଭୂମି କାର୍ଯ୍ୟ ଅନ୍ତର୍ଭୁକ୍ତ। ମୋଟ ୧୮୭୯ କୋଟି ଟଙ୍କା ବ୍ୟୟରେ ନିର୍ମିତ ଏହି ପ୍ରକଳ୍ପଗୁଡ଼ିକ ଛଅଟି ସୀମାନ୍ତ ରାଜ୍ୟ ଏବଂ ଦୁଇଟି କେନ୍ଦ୍ରଶାସିତ ଅଞ୍ଚଳ – ଜମ୍ମୁକାଶ୍ମୀର, ଲଦାଖ, ଅରୁଣାଚଳ ପ୍ରଦେଶ, ହିମାଚଳ ପ୍ରଦେଶ, ସିକିମ, ମିଜୋରାମ, ପଶ୍ଚିମବଙ୍ଗ ଏବଂ ରାଜସ୍ଥାନରେ ରହିଛି। ଏଗୁଡ଼ିକ ଦୁର୍ଗମ ଅଞ୍ଚଳରେ ଦେଶର ସୁରକ୍ଷା, ସଂଯୋଗୀକରଣ ଏବଂ ବିକାଶକୁ ପ୍ରୋତ୍ସାହିତ କରିବେ। ସୀମା ସଡ଼କ ସଂଗଠନ ଗତ ଦୁଇ ବର୍ଷ ମଧ୍ୟରେ ୫,୬୦୦ କୋଟି ଟଙ୍କା ବ୍ୟୟରେ ୧୬୧ଟି ଭିତ୍ତିଭୂମି ପ୍ରକଳ୍ପ ସମାପ୍ତ କରିଛି, ଯାହା ଏକ ରେକର୍ଡ। ଏଥିରେ ଗତ ବର୍ଷର ୧୧୧ଟି ପ୍ରକଳ୍ପ ଅନ୍ତର୍ଭୁକ୍ତ। ଗତ ଚାରି ବର୍ଷ ମଧ୍ୟରେ, ସଂଗଠନ ମୋଟ ୧୩,୭୪୩ କୋଟି ଟଙ୍କା ବ୍ୟୟରେ ୪୫୬ଟି ଭିତ୍ତିଭୂମି ପ୍ରକଳ୍ପ ସମାପ୍ତ କରିଛି।
ରାଜନାଥ ସିଂହ ବିଶ୍ୱାସ ପ୍ରକଟ କରି କହିଛନ୍ତି ଯେ ଆଜି ଇ-ଉଦଘାଟିତ ହୋଇଥିବା ପ୍ରକଳ୍ପଗୁଡ଼ିକ ସଡ଼କ ସଂଯୋଗୀକରଣକୁ ବୃଦ୍ଧି କରିବ, ଜାତୀୟ ସୁରକ୍ଷାକୁ ସୁଦୃଢ଼ କରିବ ଏବଂ ସମ୍ପୃକ୍ତ ଅଞ୍ଚଳର ଆର୍ଥିକ ସମୃଦ୍ଧିରେ ସାହାଯ୍ୟ କରିବ। ପ୍ରତିରକ୍ଷା ମନ୍ତ୍ରୀ କହିଛନ୍ତି ଯେ, ଏହି ପ୍ରକଳ୍ପଗୁଡ଼ିକ ପ୍ରତିରକ୍ଷା ପ୍ରସ୍ତୁତିକୁ ବୃଦ୍ଧି କରିବ ଏବଂ ପ୍ରକଳ୍ପ କ୍ଷେତ୍ରରେ ପରିବହନ, ପର୍ଯ୍ୟଟନ ଓ ଆର୍ଥିକ କାର୍ଯ୍ୟକଳାପକୁ ବୃଦ୍ଧି କରିବ। ଶ୍ରୀ ରାଜନାଥ ସିଂହ କହିଥିଲେ ଯେ ଏଗୁଡ଼ିକ କେବଳ ଭିତ୍ତିଭୂମି ସମ୍ପତ୍ତି ନୁହେଁ ବରଂ ଏକ ଉଜ୍ଜ୍ୱଳ ଭବିଷ୍ୟତର ପଥ।
ସୀମା ସଡ଼କ ସଂଗଠନର କାର୍ଯ୍ୟ ରଣନୀତିକ ଗୁରୁତ୍ୱ ବହନ କରିଥାଏ ବୋଲି ଉଲ୍ଲେଖ କରି ପ୍ରତିରକ୍ଷା ମନ୍ତ୍ରୀ କହିଛନ୍ତି ଯେ ଆଧୁନିକ ପ୍ରତିରକ୍ଷା କ୍ଷମତା କେବଳ ଅସ୍ତ୍ରଶସ୍ତ୍ର ଉପରେ ନୁହେଁ ବରଂ ଏହାକୁ ସମର୍ଥନ କରୁଥିବା ଭିତ୍ତିଭୂମି ଉପରେ ମଧ୍ୟ ନିର୍ଭର କରେ। ସେ କହିଥିଲେ ଯେ ଆପଣ ଦ୍ରୁତତମ ଟ୍ୟାଙ୍କ କିମ୍ବା ସବୁଠାରୁ ଉନ୍ନତ ବିମାନ ପାଇପାରିବେ, କିନ୍ତୁ ଯଦି ସେଗୁଡ଼ିକ ଆବଶ୍ୟକ ସମୟରେ ଠିକ୍ ସ୍ଥାନରେ ନ ପହଞ୍ଚନ୍ତି, ତେବେ ସେଗୁଡ଼ିକର କୌଣସି ମୂଲ୍ୟ ନାହିଁ। ଆମର ସେନାବାହିନୀ ପେଯରି ସର୍ବଦା ପ୍ରସ୍ତୁତ ଏବଂ ପରିଚାଳନା ସୁବିଧାଯୁକ୍ତ ରହିବ ତାହା ସୁନିଶ୍ଚିତ କରିବାରେ ସୀମା ସଡ଼କ ସଂଗଠନ ଏକ ଗୁରୁତ୍ୱପୂର୍ଣ୍ଣ ଭୂମିକା ଗ୍ରହଣ କରୁଛି। ସେ ସୀମା ସଡ଼କ ସଂଗଠନର କର୍ମୀମାନଙ୍କୁ ପ୍ରଶଂସା କରିଥିଲେ, ଯେଉଁମାନେ ପରଦା ପଛରେ ରହି ମଧ୍ୟ ଦେଶର ସୁରକ୍ଷାରେ ଅବଦାନ ରଖିଛନ୍ତି ।
ରାଜନାଥ ସିଂହ ବର୍ତ୍ତମାନର ଭୂରାଜନୈତିକ ପରିସ୍ଥିତିକୁ ବିଚାରକୁ ନେଇ ସଶସ୍ତ୍ର ବାହିନୀ ପାଇଁ ଏକ ନୂତନ ପିଢ଼ିର ଆଧୁନିକ ଭିତ୍ତିଭୂମି ନିର୍ମାଣର ଆବଶ୍ୟକତା ଉପରେ ଗୁରୁତ୍ୱାରୋପ କରିଥିଲେ। ସେ କହିଥିଲେ ଯେ ସୀମା ସଡ଼କ ସଂଗଠନକୁ ନିଶ୍ଚିତ କରିବାକୁ ପଡିବ ଯେ ଏହାର ପ୍ରସ୍ତୁତି ଯୁଦ୍ଧକାଳୀନ ଭିତ୍ତିରେ ଅଛି।
ସୀମାନ୍ତ ଅଞ୍ଚଳରେ ବିକାଶ କାର୍ଯ୍ୟ ସୁନିଶ୍ଚିତ କରିବା ପାଇଁ ସରକାରଙ୍କ ପ୍ରତିବଦ୍ଧତାକୁ ପ୍ରତିରକ୍ଷା ମନ୍ତ୍ରୀ ଦୋହରାଇଥିଲେ। ସେଲା ସୁଡ଼ଙ୍ଗ ବିଷୟରେ ସେ ବିଶେଷ ଉଲ୍ଲେଖ କରିଥିଲେ, ଯାହା ରଣନୀତିକ ଦୃଷ୍ଟିରୁ ଗୁରୁତ୍ୱପୂର୍ଣ୍ଣ କ୍ଷେତ୍ରଗୁଡ଼ିକରେ ଯୋଗାଯୋଗ ବିସ୍ତାର କରିବାର ସଂକଳ୍ପର ପ୍ରତୀକ ପାଲଟିଛି। ସୀମାନ୍ତ ଗ୍ରାମଗୁଡ଼ିକର ପୁନରୁଦ୍ଧାର ପାଇଁ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କ ଦୃଷ୍ଟିକୋଣ ବିଷୟରେ ସେ ଉଲ୍ଲେଖ କରିଥିଲେ। ଶ୍ରୀ ରାଜନାଥ ସିଂହ କହିଥିଲେ ଯେ ଭାଇବ୍ରାଣ୍ଟ ଗ୍ରାମ କାର୍ଯ୍ୟକ୍ରମ ଭଳି ପଦକ୍ଷେପ ଅଧୀନରେ, ସରକାର ପ୍ରତିଦିନ ପ୍ରାୟ ୩୫ କିଲୋମିଟର ରାସ୍ତା ନିର୍ମାଣ କରି ସଡ଼କ ସଂଯୋଗୀକରଣକୁ ବିସ୍ତାର କରୁଛନ୍ତି।
ସୀମା ସଡ଼କ ମହାନିର୍ଦ୍ଦେଶକ (ଡିଜିବିଆର) ଲେଫ୍ଟନାଣ୍ଟ ଜେନେରାଲ ରଘୁ ଶ୍ରୀନିବାସନ ସୀମା ସଡ଼କ ସଂଗଠନ (ବିଆରଓ)ର ବୃଦ୍ଧି ପାଉଥିବା ଜାତୀୟ ଗୁରୁତ୍ୱ ଉପରେ ଆଲୋକପାତ କରିଥିଲେ ଏବଂ କହିଥିଲେ ଯେ ଏହି ସଂଗଠନ ସବୁଠାରୁ ଆହ୍ୱାନପୂର୍ଣ୍ଣ କ୍ଷେତ୍ରରେ ଭିତ୍ତିଭୂମି ପ୍ରକଳ୍ପ କାର୍ଯ୍ୟକାରୀ କରିବା ପାଇଁ କେନ୍ଦ୍ରୀୟ ମନ୍ତ୍ରଣାଳୟଗୁଡ଼ିକର ପସନ୍ଦଯୋଗ୍ୟ ସଂସ୍ଥା ଭାବରେ ଉଭା ହୋଇଛି। ସେ ଜେନେରାଲ ରିଜର୍ଭ ଇଞ୍ଜିନିୟର ଫୋର୍ସ (ଜିଆରଇଏଫ) ଏବଂ ବେତନଭୋଗୀ ଶ୍ରମିକଙ୍କ ସମେତ ଏହାର କର୍ମଚାରୀଙ୍କ କଲ୍ୟାଣ ଏବଂ ମର୍ଯ୍ୟାଦା ପ୍ରତି ବିଆରଓର ପ୍ରତିବଦ୍ଧତାକୁ ପୁନଃଦୋହରାଇଥିଲେ।
ଏହି ଅବସରରେ କେନ୍ଦ୍ର ସଂସଦୀୟ ବ୍ୟାପାର ଏବଂ ସଂଖ୍ୟାଲଘୁ ବ୍ୟାପାର ମନ୍ତ୍ରୀ ଶ୍ରୀ କିରେନ ରିଜିଜୁ, ବିଜ୍ଞାନ ଓ କାରିଗରୀ, ଭୂବିଜ୍ଞାନ ରାଷ୍ଟ୍ରମନ୍ତ୍ରୀ (ସ୍ୱାଧୀନ ଦାୟିତ୍ୱ), ପ୍ରଧାନମନ୍ତ୍ରୀଙ୍କ କାର୍ଯ୍ୟାଳୟ, କାର୍ମିକ, ସାଧାରଣ ଅଭିଯୋଗ ଏବଂ ପେନସନ ତଥା ପରମାଣୁ ଶକ୍ତି ଏବଂ ମହାକାଶ ରାଷ୍ଟ୍ରମନ୍ତ୍ରୀ ଡକ୍ଟର ଜିତେନ୍ଦ୍ର ସିଂହ, ସେନାଧ୍ୟକ୍ଷ ଜେନେରାଲ ଉପେନ୍ଦ୍ର ଦ୍ୱିବେଦୀ, ପ୍ରତିରକ୍ଷା ସଚିବ ଶ୍ରୀ ରାଜେଶ କୁମାର ସିଂହ ଏବଂ ପ୍ରତିରକ୍ଷା ମନ୍ତ୍ରଣାଳୟର ଅନ୍ୟାନ୍ୟ ବରିଷ୍ଠ ଅଧିକାରୀମାନେ ଉପସ୍ଥିତ ଥିଲେ।
ଏତଦ୍ବ୍ୟତୀତ ହିମାଚଳ ପ୍ରଦେଶର ରାଜ୍ୟପାଳ ଶିବ ପ୍ରତାପ ଶୁକ୍ଲା, ଅରୁଣାଚଳ ପ୍ରଦେଶର ରାହରିଭାଉ କିସାନରାଓ ବାଗଡେ, ଅରୁଣାଚଳ ପ୍ରଦେଶର ମୁଖ୍ୟମନ୍ତ୍ରୀ ପେମା ଖାଣ୍ଡୁ, ମିଜୋରାମ ମୁଖ୍ୟମନ୍ତ୍ରୀ ଲାଲଦୁହୋମା, ଜାମ୍ମୁକାଶ୍ମୀର ଉପରାଜ୍ୟପାଳ ମନୋଜ ସିହ୍ନା, ଲଦାଖ ଉପରାଜ୍ୟପାଳ ବ୍ରିଗେଡିୟର ଡକ୍ଟର ବିଡି ମିଶ୍ରା (ଅବସରପ୍ରାପ୍ତ) କାର୍ଯ୍ୟକ୍ରମରେ ଆଭାସୀ ମାଧ୍ୟମରେ ସାମିଲ ହୋଇଥିଲେ।
