Tag: ଅବକାରୀ ବିଭାଗ

ରଣପୁର: ରଣପୁର ଅଂଚଳରେ ଦିନକୁ ଦିନ ନିଶା କାରବାର ବଢୁଥିବା ବେଳେ ଏବେ ଆକ୍ସନ ମୋଡ଼ରେ ରଣପୁର ଅବକାରୀ ବିଭାଗ। ଆଜି ରଣପୁର ଅବକାରୀ ପୋଲିସ ମୟୂରଝାଲିଆ ଠାରେ ଚଢ଼ାଉ କରି ୨ ଶହ ଗ୍ରାମର ବ୍ରାଉନ ସୁଗାର ସହ ଗୋଟିଏ ଟାଟା ଏସି ଗାଡି, ୭ଟି ମୋବାଇଲ ଓ ନଗଦ ୧ ଲକ୍ଷ ୧୭ ହଜାର ପାଞ୍ଚଶହ ଜବତ କରିବା ସହ ୨ ଜଣ ଅଭିଯୁକ୍ତଙ୍କୁ ଗିରଫ କରିଛନ୍ତି।

ଅଭିଯୁକ୍ତମାନେ ହେଲେ ସଚିନ ପ୍ରଧାନ ଓ ରୀନା ପ୍ରଧାନ। ଜବତ ସାମଗ୍ରୀର ଆନୁମାନିକ ମୂଲ୍ୟ ୨୦ ଲକ୍ଷ ହୋଇଥିବା ବେଳେ ଏମାନେ ପେସାଦାର ନିଶାବେପାରୀ ବୋଲି ଅବକାରୀ ବିଭାଗ ପକ୍ଷରୁ ସୂଚନା ମିଳିଛି।

ଭୁବନେଶ୍ୱର: ଅବକାରୀ କମିଶନର ନରସିଂହ ଭୋଳ ବେଆଇନ ମଦ କାରବାରରୁ ଲାଞ୍ଚ ନେଇ ଦୁର୍ନୀତି କରିଥିବା ଅଭିଯୋଗରେ କଟକ ଜିଲ୍ଲା ଅବକାରୀ ଏଏସଆଇ ନିରଞ୍ଜନ ଖଟୁଆଙ୍କୁ ଚାକିରିରୁ ବହିଷ୍କାର କରିଛନ୍ତି। ତାଙ୍କ ବିରୋଧରେ ଏ ସଂକ୍ରାନ୍ତରେ ଅନେକ ଅଭିଯୋଗ ଆସିଥିଲା। ଆଇଟି ଆପ୍ଲିକେସନ୍ ମାଧ୍ୟମରେ ତଦନ୍ତରୁ ବେଆଇନ ମଦ କାରବାରରେ ମଦ ବେପାରୀଙ୍କ ସହ ତାଙ୍କର ସମ୍ପୃକ୍ତି ଥିବା ପ୍ରମାଣିତ ହୋଇଥିଲା।

ଏହା ପୂର୍ବରୁ ମଧ୍ୟ ଗୋଟିଏ ବିଦେଶୀ ମଦ ଦୋକାନରେ ମଦ ବେପାରୀଙ୍କ ସହ ମଦ ପିଇବା ଅଭିଯୋଗରେ ତାଙ୍କୁ ନିଲମ୍ବିତ କରାଯାଇଥିଲା ଏବଂ ତାଙ୍କ ବିରୁଦ୍ଧରେ ବିଭାଗୀୟ ତଦନ୍ତ ଜାରି ରହିଛି। ପୂର୍ବରୁ ବେଆଇନ ଭାବେ ବିଦେଶୀ ମଦ ବିକ୍ରି କରୁଥିବା ବେଳେ ତାଙ୍କ ବାପାଙ୍କୁ କଟକ ଇଆଇ ଓ ଇବି ୟୁନିଟ୍-୧ ଗିରଫ କରି ଜେଲ୍ ହାଜତକୁ ପଠାଇଥିଲେ।

ପୋଷାକରେ ରହି ବେଆଇନ ମଦ କାରବାର ରୋକିବା ଦିଗରେ ସେ ଦାୟିତ୍ୱ ତୁଲାଇବା ପରିବର୍ତ୍ତେ ବେଆଇନ ମଦ ବେପାରୀମାନଙ୍କୁ ସୁରକ୍ଷା ଦେବା ଏବଂ ମଦ ମାଫିଆଙ୍କ ସହ ହାତ ମିଳାଇ ଥିବାର ଯଥେଷ୍ଟ ପ୍ରମାଣ ରହିଛି। ସେ କେବଳ ନିଜକୁ ଅପମାନିତ କରିନାହାନ୍ତି, ବରଂ ତାଙ୍କ କାର‌୍ୟ୍ୟ ଅବକାରୀ ବିଭାଗର ସ୍ୱାର୍ଥ ବିରୋଧୀ। ବେଆଇନ ମଦ କାରବାରରେ ମଦ ବେପାରୀଙ୍କ ସହ ତାଙ୍କର ମିଳାମିଶା ଜଣେ ସରକାରୀ କର୍ମଚାରୀଙ୍କ ପାଇଁ ନୀତି ବିରୁଦ୍ଧ ଓ ଅଗ୍ରହଣୀୟ । ତେଣୁ ଭାରତୀୟ ସମ୍ବିଧାନର ନିୟମ ୩୧୧(୨) (ଖ) ଅନୁଯାୟୀ ଜନସ୍ୱାର୍ଥ ଦୃଷ୍ଟିରୁ ତାଙ୍କୁ ଚାକିରିରୁ ବହିଷ୍କାର କରାଯାଇଛି।

ଏଠାରେ ଉଲ୍ଲେଖଯୋଗ୍ୟ ଯେ ଗତ ପାଞ୍ଚ ମାସ ମଧ୍ୟରେ ୫ ଜଣ ଅବକାରୀ କର୍ମଚାରୀଙ୍କୁ ସେମାନଙ୍କ ବେଆଇନ କାର‌୍ୟ୍ୟପାଇଁ ବହିଷ୍କାର କରାଯାଇଛି। ଅବକାରୀ ବିଭାଗର ସଚ୍ଚୋଟତା ଓ ଦକ୍ଷତା ରେ ଉନ୍ନତି ଆଣିବା ପାଇଁ ଅବକାରୀ ବିଭାଗର ଦୁର୍ନୀତିଗ୍ରସ୍ତ/ ଅପାରଗ ସଦସ୍ୟଙ୍କୁ ବହିଷ୍କାର/ହଟାଇବା ପ୍ରକ୍ରିୟା ଆଗାମୀ ଦିନରେ ଜାରି ରହିବ।

କନ୍ଦର୍ପ ବେହେରା
ରେଢାଖୋଲ: ସମ୍ବଲପୁର ଜିଲ୍ଲା ରେଢ଼ାଖୋଲରେ ଦିନକୁ ଦିନ ଗଂଜେଇ ଚୋରାଚାଲାଣ ବଢିଚାଲିଛି। ପୋଲିସ୍ ଓ ଅବକାରୀ ବିଭାଗ ବହୁ ସମୟରେ ଚୋରା ବେପାରୀମାନଙ୍କୁ ଧରିବାରେ ବିଫଳ ହେଉଛି।

ଗତକାଲି ବିଳମ୍ବିତ ରାତ୍ରିରେ ବୌଦ୍ଧ ରେଢ଼ାଖୋଲ ରାସ୍ତା କଦଳିଗଡ ଟୋଲଗେଟ ନିକଟରେ ବେଆଇନ ଗଂଜେଇ ଚୋରାଚାଲାଣ ପାଇଁ ସଜବାଜ ହେଉଥିବା ବେଳେ ଅବକାରୀ ବିଭାଗ ଧରିବାରେ ସଫଳ ହୋଇଛି। ଉଇଙ୍ଗର୍ ଗାଡ଼ିର ସିଟ ତଳେ ଏକ ଭିନ୍ନ ଧରଣର ଚେମ୍ବର ତିଆରିକରି ଗଞେଇ ଲୋଡିଙ୍ଗ ଚାଲୁଥିବାବେଳେ ରେଢ଼ାଖୋଲ ଅବକାରୀ ବିଭାଗ ଖବର ପାଇ ଗାଡିକୁ ଚଢ଼ାଉ କରି ୧୦୫ କେଜି ଗଂଜେଇ ଜବତ କରିବା ସହ ୨ ଜଣଙ୍କୁ ଅଟକ ରଖିଥିବା ଜଣାପଡିଛି। ଗଂଜେଇ ର ଆନୁମାନିକ ମୂଲ୍ୟ ହେବ ୧୧ଲକ୍ଷ ବୋଲି ଅବକାରୀ ବିଭାଗ କହିଛି। ଗିରଫ ବ୍ୟକ୍ତି ଦୁଇ ଜଣ ହେଲେ ବିହାର ଅଂଚଳର ଗୌତମ କୁମାର(୨୮) ଓ ଲବକୁସ ରାମ(୨୩)।

ଚଢ଼ାଉ ସମୟରେ ଅନ୍ୟ ଏକ ହିରୋ ବାଇକ ରୁ (ଓଆର୧୫କ୍ୟୁ ୦୪୨୯) ୫ କେଜି ଗଞ୍ଜେଇ ଜବତ କରିଛି ଅବକାରୀ ବିଭାଗ ା ବୌଦ୍ଧ ରୁ ରେଢ଼ାଖୋଲ ରାସ୍ତାରେ ଯାଉଥିବାବେଳେ ବାଇକରେ ଯାଉଥିବା ଗଞେଇ ବେପାରୀ ଧରା ପଡିଯାଇଥିଲା।  ରେଢ଼ାଖୋଲ ଆମ୍ବଝୁରି ଗ୍ରାମର ପଙ୍କଜ ପ୍ରଧାନ(୫୫) କୁ ଅବକାରୀ ବିଭାଗ ଗିରଫ କରିଛି। ଅବକାରି ଇନ୍ସପେକ୍ଟର ପବିତ୍ର ମୋହନ ମାଝୀ ଙ୍କ ନିର୍ଦ୍ଦେଶରେ ଏଏସ ଆଇ ସଞ୍ଜୟ ବରିହା, ବନମାଳୀ ନାଏକ ସମେତ ଅବକାରୀ ବିଭାଗର ସମସ୍ତ ଟିମ୍ ସାମିଲ୍ ହୋଇଥିଲେ।

ଖୋର୍ଦ୍ଧା: ଆଜି ଅବକାରୀ ବିଭାଗ ଖୋର୍ଦ୍ଧା ଜିଲ୍ଲା ବାଘମାରି ଛକରେ ଚଢ଼ାଉ କରି ବିପୁଳ ପରିମାଣରେ ଗଞ୍ଜେଇ ଜବତ କରିବା ସହ ଜଣେ ମହିଳାଙ୍କୁ ଗିରଫ କରିଛି। ଅଭିଯୁକ୍ତ ମହିଳା ଜଣକ ହେଲେ ବାଲେଶ୍ୱର ଜିଲ୍ଲାର ଯଶୋଦା ବେହେରା। ତାଙ୍କ ନିକଟରୁ ୧୬.୬୦୦ କେଜି ଗଞ୍ଜେଇ ଜବତ ହୋଇଛି, ଯାହାର ଆନୁମାନିକ ମୂଲ୍ୟ ୧ ଲକ୍ଷ ୬୦ ହଜାର ଟଙ୍କା ହେବ।

ଆଜି ବେଗୁନିଆ ଅବକାରୀ ବିଭାଗ ପାଟ୍ରୋଲିଂ କରୁଥିବା ବେଳେ ବାଘମାରୀ ଛକରେ ଉକ୍ତ ମହିଳା ଅଭିଯୁକ୍ତ ଗଞ୍ଜେଇ ସହ ଧରା ପଡ଼ିଥିଲେ। ଏହି ପରିପ୍ରେକ୍ଷୀରେ ଅଭିଯୁକ୍ତଙ୍କ ବିରୁଦ୍ଧରେ ମାମଲା ରୁଜୁ କରାଯାଇ କୋର୍ଟ ଚାଲାଣ କରାଯାଇଛି।

ଖୋର୍ଦ୍ଧା: ଆଜି ଅବକାରୀ ବିଭାଗ ଖୋର୍ଦ୍ଧା ଜିଲ୍ଲା ବେଗୁନିଆ ଥାନା ଅଞ୍ଚଳରେ ଚଢ଼ାଉ କରି ୧୫ କେଜି ଗଞ୍ଜେଇ ଜବତ କରିବା ସହ ଜଣେ ଅଭିଯୁକ୍ତଙ୍କୁ ଗିରଫ କରିଛି। ବେଗୁନିଆ ଥାନା ଭାଗଲପୁର ଗ୍ରାମରୁ ଅଭିଯୁକ୍ତ ପ୍ରମୋଦ କୁମାର ସାହୁ (୫୭) ଗିରଫ ହୋଇଥିବା ବେଳେ ତାଙ୍କ ନିକଟରୁ ଉକ୍ତ ଗଞ୍ଜେଇ ଜବତ ହୋଇଛି।

ଜବତ ଗଞ୍ଜେଇର ମୂଲ୍ୟ ଦେଢ଼ ଲକ୍ଷ ଟଙ୍କା ହେବ ବୋଲି ଜଣାପଡିଛି। ଅଭିଯୁକ୍ତଙ୍କ ବିରୁଦ୍ଧରେ ମାମଲା ରୁଜୁ କରାଯାଇ କୋର୍ଟ ଚାଲାଣ କରାଯାଇଛି।

ଉକ୍ତ ଚଢ଼ାଉରେ ଜିଲ୍ଲା ଅବକାରୀ ମୋବାଇଲ ଟିମ ଏବଂ ଖୋର୍ଦ୍ଧା ରେଞ୍ଜ ଅବକାରୀ ଟିମ ସାମିଲ ଥିଲା।

କୈଳାଶ ଚନ୍ଦ୍ର ଚୌଧୁରୀ

ବ୍ରହ୍ମପୁର: ବ୍ରହ୍ମପୁର ଅବକାରୀ ବିଭାଗ ଭ୍ରାମ୍ୟମାଣ ଟିମ୍ ବିଶ୍ଵସ୍ତ ସୁତ୍ରରୁ ଖବର ପାଇ ଗୋପାଳପୁର ଥାନା ଅନ୍ତର୍ଗତ ପଥରା ଗ୍ରାମରେ ଚଢ଼ାଉ କରି ୪୨ ଗ୍ରାମ ଧଳା ଜହର ଜବତ କରିବା ସହ କାରବାରରେ ଲିପ୍ତ ଭରତ ସାହୁ ନାମକ ଦୁଇଜଣ ଯୁବକଙ୍କୁ ଗିରଫ କରିଛି। ଜବତ ଧଳା ଜହରର ମୁଲ୍ୟ ୬ ଲକ୍ଷ ଟଙ୍କାରୁ ଅଧିକ ହେବ ବୋଲି ଜଣାପଡିଛି।

ଏତଦବ୍ୟତୀତ ବ୍ରହ୍ମପୁର ରେଳଷ୍ଟେସନ ନିକଟରେ କାହ୍ନା ଡାକୁଆ ନାମକ ଜଣେ ଯୁବକକୁ ସନ୍ଦେହ ଜନକ ଭାବେ ଦେଖି ତାକୁ ଜେରା କରିବା ବେଳେ ତାଙ୍କ ନିକଟରୁ ୧୦ କିଲୋ ଗଞ୍ଜେଇ ଜବତ ହୋଇଥିଲା। କାହ୍ନାକୁ ଗିରଫ କରି କୋର୍ଟ ଚାଲାଣ କରାଯାଇଛି। ଜବତ ଗଞ୍ଜେଇର ମୁଲ୍ୟ ଏକ ଲକ୍ଷ ଟଙ୍କାରୁ ଅଧିକ ହେବ ବୋଲି ନୀରିକ୍ଷକ ରମେନ୍ଦ୍ର ନାରାୟଣ ନାୟକଙ୍କ ଠାରୁ ପ୍ରକାଶ।

ମାନସ ପୂର୍ଣ୍ଣ ଆଚାର୍ଯ୍ୟ

ଆସିକା: ଅବକାରୀ ବିଭାଗ ପକ୍ଷରୁ ଆସିକା ଥାନା ଅନ୍ତର୍ଗତ ବିଭିନ୍ନ ସ୍ଥାନରେ ଚଢ଼ାଉ କରାଯାଇଛି। ଆସ୍କା ତହସିଲଦାରଙ୍କ ଉପସ୍ଥିତିରେ ଅବକାରୀ ବିଭାଗ ମିଳିତ ଭାବେ ଚଢ଼ାଉ କରାଯାଇଛି। ଏଥିରେ ୨୮୦ ଲିଟର ଦେଶୀ ମଦ ଏବଂ ୫୫୫୦ ଲିଟର ପୋଚ ଜବତ କରାଯାଇଛି। ଆହୁରି ମଧ୍ୟ ଏହି ସଂଯୋଗରେ ୬ ଜଣଙ୍କୁ ଗିରଫ ଯାଇଛି।

ସୂଚନା ଅନୁସାରେ ଆସିକା ଅଞ୍ଚଳର ବିଭନ୍ନ ଗ୍ରାମରେ ବେଆଇନ ମଦ ପ୍ରସ୍ତୁତ ହେଉଥିବା ଖବର ମିଳିଥିଲା। ଏହାକୁ ଅବକାରୀ ଟିମ୍ କାଳଷଣ୍ଢପୁର, ସମନ୍ତିଆପଲ୍ଲି, କରା ତଳି, ସୁମନ୍ତ ପଲ୍ଲୀ, କଳିଙ୍ଗା ରୋଡ ସ୍ତିସ୍ତ I.B ପଛପାଖ ଆଦି ଗ୍ରାମରେ ଚଢ଼ାଉ କରାଯାଇଥିଲା।

ଏହି ଚଢାଉରେ ଆସିକା ତହସିଲଦାର ସଞ୍ଜୟ ସାମନ୍ତରାୟ, ଅବକାରୀ ଇନସ୍ପେକ୍ଟର ବାଳକ ବିଶି, ଏସଆଇ ପ୍ରଦିପ କୁମାର ମହାନ୍ତି, ନୀଳାମ୍ବର ନାୟକ, ବିଜୟ କୁମାର ମଲ୍ଲିକ ସହ ଅନେକ ଅବକାରୀ କର୍ମଚାରୀ ସାମିଲ ଥିଲେ।

ଖୋର୍ଦ୍ଧା: ଖୋର୍ଦ୍ଧାରେ ଚଢ଼ାଉ କରି ଆଜି ଅବକାରୀ ବିଭାଗ ବିପୁଳ ପରିମାଣରେ ଦେଶୀ ମଦ ଓ ଗଞ୍ଜେଇ ଜବତ କରିଛି। ଗଡ଼ମାଣିତ୍ରି ଗ୍ରାମ ନିକଟରୁ ଚଢ଼ାଉ କରି ୧୭୫ ଲିଟର ଦେଶୀ ମଦ ଜବତ କରିବା ସହ ଅଭିଯୁକ୍ତ ପୁରୁଷୋତ୍ତମ ବଳବନ୍ତରାୟ (୫୯) ଙ୍କୁ ଗିରଫ କରି କୋର୍ଟଚାଲାଣ କରିଛି ଅବକାରୀ ବିଭାଗ।

ସେହିପରି ଖୋର୍ଦ୍ଧା ନୂଆ ବସ ଷ୍ଟାଣ୍ଡ ନିକଟରେ ଚଢ଼ାଉ କରି ୭.୧ କେଜି ଗଞ୍ଜେଇ ଜବତ କରିବା ସହ ଅଭିଯୁକ୍ତ ରଞ୍ଜିତ ସାହୁଙ୍କୁ ଗିରଫ କରାଯାଇଛି। ଜବତ ଗଞ୍ଜେଇର ଆନୁମାନିକ ମୂଲ୍ୟ ୭୧ ହଜାର ଟଙ୍କା ହେବ ବୋଲି ଜଣାପଡିଛି।

ନିରାକାରପୁର: ଆଜି ଖୋର୍ଦ୍ଧା ଜିଲ୍ଲା ନିରାକାରପୁର ଥାନା ଅଞ୍ଚଳରୁ ଅବକାରୀ ବିଭାଗ ଲକ୍ଷାଧିକ ଟଙ୍କାର ବ୍ରାଉନ ସୁଗାର ଜବତ କରିଛି। ଏହା ସହ ଜଣେ ମହିଳାଙ୍କୁ ଗିରଫ କରାଯାଇଛି।

ଖବର ମୁତାବକ ନିରାକାରପୁର ଥାନା ଅନ୍ତର୍ଗତ ଭଗବତୀପଡ଼ା ଗ୍ରାମରେ ବ୍ରାଉନ ସୁଗାର କାରବାର ଚାଲିଥିବା ଖବର ପାଇ ଜିଲ୍ଲା ଅବକାରୀ ମୋବାଇଲ ୟୁନିଟ ଚଢ଼ାଉ କରିଥିଲା। ଉକ୍ତ ଚଢ଼ାଉରେ ରେଣୁ ଉଦୟସିଂ (୪୫) ନାମ୍ନୀ ଜଣେ ମହିଳା ଅଭିଯୁକ୍ତ ଗିରଫ ହୋଇଥିବା ବେଳେ ତାଙ୍କ ନିକଟରୁ ୪୦ ଗ୍ରାମ ବ୍ରାଉନ ସୁଗାର (ଆନୁମାନିକ ମୂଲ୍ୟ ୪ ଲକ୍ଷ) ଅବକାରୀ ବିଭାଗ ଜବତ କରିଛି।

ଖୋର୍ଦ୍ଧା: ଖୋର୍ଦ୍ଧା ଜିଲ୍ଲା ବୋଲଗଡ଼ ଥାନା ଅନ୍ତର୍ଗତ କୋଟସିଂ ଗ୍ରାମର ଏକାଧିକ ସ୍ଥାନରେ ଆଜି ଅବକାରୀ ବିଭାଗ ପକ୍ଷରୁ ଦେଶୀ ମଦ ଭାଟି ଉପରେ ଚଢ଼ାଉ କରାଯାଇଛି। ଚଢାଉ ସମୟରେ ମୋଟ ୩ ହଜାର ୪୦୦ ଲିଟର ଗୁଡ ମିଶ୍ରିତ ମହୁଲି ପୋଚ ଓ ୧୨୦୦ ଲିଟର ଦେଶୀ ମଦ ଜବତ କରି ନଷ୍ଟ କରିଦିଆଯାଇଛି।

ଉକ୍ତ ଚଢାଉରେ ବେଗୁନିଆ ଅବକାରୀ ଅଧିକାରୀ ରାଜେନ୍ଦ୍ର ଖେସ ଏବଂ ଖୋର୍ଦ୍ଧା ଓ ବେଗୁନିଆ ଅବକାରୀ ଥାନାର ସମସ୍ତ କର୍ମଚାରୀ ମାନେ ସାମିଲ ଥିଲେ। ଏହି ପରିପ୍ରେକ୍ଷୀରେ ବେଗୁନିଆ ଅବକାରୀ ଥାନା ଏକ ମାମଲା ରୁଜୁ କରି ତଦନ୍ତ ଜାରିରଖିଛି l

ଖୋର୍ଦ୍ଧା: ଖୋର୍ଦ୍ଧା ଟାଉନ ଥାନା ଅଞ୍ଚଳରୁ ଅବକାରୀ ବିଭାଗ ଆଜି ଲକ୍ଷାଧିକ ଟଙ୍କାର ବ୍ରାଉନ ସୁଗାର ଜବତ କରିଛି। ଖବର ମୁତାବକ ଠାକୁରପଡ଼ା ଠାରେ ଏକ ବାଇକରେ ଦୁଇ ଅଭିଯୁକ୍ତ ବ୍ରାଉନ ସୁଗାର ନେଇ ବେପାର ପାଇଁ ଯାଉଥିବା ବେଳେ ଅବକାରୀ ହାତରେ ଧରା ପଡ଼ିଥିଲେ। ଜିଲ୍ଲା ଅବକାରୀ ମୋବାଇଲ ଇନ୍ସପେକ୍ଟର ନୀଳିମା ଜୟନ୍ତୀ ସ୍ୱାଇଁ ଓ ଟିମ ବାଇକ କୁ କାବୁ କରିଥିବା ବେଳେ ଦୁଇ ଜଣ ଅଭିଯୁକ୍ତଙ୍କୁ ଗିରଫ କରିଛନ୍ତି।

ଅଭିଯୁକ୍ତମାନେ ଟାଉନ ଥାନା ଅନ୍ତର୍ଗତ ଠାକୁରପଡ଼ା ନୁଆସାହିର ପ୍ରଦୀପ ବାରିକ (୨୪) ଓ ରାଜେଶ ମହାରଣା (୨୬) ବୋଲି ଜଣାପଡିଛି। ସେମାନଙ୍କ ନିକଟରୁ ୨୯ ଗ୍ରାମ ବ୍ରାଉନ ସୁଗାର ଜବତ ହୋଇଛି ଯାହାର ଆନୁମାନିକ ମୂଲ୍ୟ ୨ ଲକ୍ଷ ୯୦ ହଜାର ଟଙ୍କା ହେବ।

ଉଭୟଙ୍କୁ ଆଜି ଅପରାହ୍ନରେ କୋର୍ଟଚାଲାଣ କରାଯାଇଛି। ଉକ୍ତ ଚଢ଼ାଉରେ ଅବକାରୀ ମୋବାଇଲ ଏସଆଇ ବି. ମନୋଜ କୁମାର ଏବଂ ଅନ୍ୟ କର୍ମଚାରୀ ମାନେ ସାମିଲ ଥିଲେ।

କନ୍ଦର୍ପ ବେହେରା
ରେଢାଖୋଲ: ରେଢାଖୋଲ ସବଡିଭିଜନର ନାକଟି୍‌ଦେଉଳ ବ୍ଲକ୍‌ର ବିଭିନ୍ନ ଗ୍ରାମ ଗଞେଇ ଚାଷ ପାଇଁ ବେଶ୍ ପରିଚିତ ଥିବା ବେଳେ ଅତୀତରେ ଏଇ ଚାଷ କରୁଥିବା ଚାଷୀ ତଥା ଚୋରା ବେପାରୀମାନଙ୍କୁ ପୋଲିସ୍ ତଥା ଅବକାରୀ ବିଭାଗ ଗିରଫ କରିଥିଲା। ବାରମ୍ବାର ଜନସଚେତନତା ସହ ଯେଉଁ ମାନେ ଏହି ଚାଷରେ ସଂପୃକ୍ତି ସେମାନଙ୍କୁ ଗିରଫ କରିବା ଫଳରେ ଗଞେଇ ଚାଷରୁ ଲୋକମାନେ ଅପସରି ଯାଇ ଥିବା ବେଳେ ପୁଣି ଏହି ବ୍ଲକ୍‌ର ଡଇଁଚା ପଂଚାୟତ ଗୋପାଳପୁର ଗ୍ରାମରେ ପ୍ରଥମ ଥର ପାଇଁ ଅଫିମ୍ ଚାଷ ହୋଇଥିବା ଜଣା ପଡିଛି। ଆଜି ଅବକାରୀ ବିଭାଗ , ପୋଲିସ୍ , ରାଜସ୍ୱ ତଥା ବନବିଭାଗ ମିଳିତ ଚଢଉ କରି ୧ କୋଟି ଟଙ୍କାର ଅଫିମ ଗଛ ନଷ୍ଟ କରାଯାଇଥିବା ବେଳେ ୨ ଜଣଙ୍କୁ ଅଟକ ରଖାଯାଇଥିବା ଜଣା ପଡିଛି।

ଖବରରୁ ଜଣାପଡିଛି ଯେ, ନାକଟିଦେଉଳ ବ୍ଲକ୍ ଡଇଁଚା ପଂଚାୟତର ବଣପାହାଡ ଘେରା ଆଦିବାସୀ ଅଧୁଷିତ ଗ୍ରାମ ଗୋପାଳପୁର ଗ୍ରାମର ପାଶ୍ୱର୍ବର୍ତୀ ନାଳର ୫ ଟି ସ୍ଥାନରେ -ପ୍ରାୟ ୪୦ ଡିସିମିଲ୍ ଜାଗାରେ ବେଆଇନ୍ ଅଫିମ ଚାଷ ହୋଇଥିବା ସମ୍ବଲ-ପୁର ଅବକାରୀ ବିଭାଗ ଜାଣିପାରିଥିଲା। ଏହି ଚାଷ ଜଣା ପଡିବା ପରେ ଚଢଉ କରି ୧୦ ହଜାର ଅଫିମ ଗଛ ନଷ୍ଟ କରାଯାଇଛି ବୋଲି ଅବକାରୀ ବିଭାଗ କହିଛି। ଉପୁଡା ଯାଇଥିବା ଅଫିମ ଗଛର ଆନୁମାନିକ ମୁଲ୍ୟ ପାଖାପାଖି ୧ କୋଟି ବୋଲି ଅବକାରୀ ବିଭାଗ ଗଣମାଧ୍ୟମ ଆଗରେ ପ୍ରକାଶ କରିଛନ୍ତି।

ଏହି ଚଢଉରେ ମାଜିଷ୍ଟେଟ୍ ଦାୟିତ୍ୱରେ ନାକଟିଦେଉଳ ତହସିଲ୍‌ଦାର ଇଂ ସୁକାନ୍ତ କୁମାର ନାଏକ, ଅବକାରୀ ଅଧିକ୍ଷକ ପବିତ୍ର ମୋହନ ମିଶ୍ର ତଥା ଅବକାରୀ ବିଭାଗର ବରିଷ୍ଟ ଅଧିକାରୀ ସମେତ ନାକଟିଦେଉଳ ଆର୍ ଆଇ ଅଶୋକ କୁମାର ନାଏକ, ଏଏସଆଇ ବିନୋଦିନୀ ବେହେରା, ମୋହନ ବେହେରା ପ୍ରମୁଖ ସାମିଲ୍ ହୋଇଥିଲେ। ଏଇ ଚାଷ କରିବା ଅଭିଯୋଗରେ ପୋଲିସ୍ ଦୁଇଜଣଙ୍କୁ ଅଟକ ରଖି ପଚରାଉଚୁରା କରୁଥିବା ଜଣା ପଡିଛି।

ଏଇ ଚାଷ ରେ ଆହୁରି ବହୁତ ଜଣ ସଂପୃକ୍ତ ଥିବା ବିଶ୍ୱସ୍ତ ସୂତ୍ରରୁ ଜଣା ପଡିଛି। ଗୋପାଳପୁର ଅଂଚଳକୁ ଝାଡଖଣ୍ଡ ଅଂଚଳରୁ ବହୁ ଆଦିବାସୀ ଆସି ଜଙ୍ଗଲକୁ ସଫାକରି ବସତି ସ୍ଥାପନ କରିବା ସହ ଜଙ୍ଗଲରୁ ମୁଲ୍ୟବାନ ଗଛ ବାହାର ରାଜ୍ୟକୁ ଚାଲାଣ କରୁଥିବା ବେଳେ ଅଂଚଳରେ ଗଞେଇ ଚାଷ କରୁଥିବା ଜଣା ପଡିଛି। ଏଇ ଚାଷ ବହୁ ଦିନରୁ କରିଆସୁଥିଲେ ମଧ୍ୟ ବନବିଭାଗ କିମ୍ବା ରାଜସ୍ୱ ବିଭାଗ କିପରି ଜାଣି ପାରିଲା ନାହିଁ ସନ୍ଦେହ ସୃଷ୍ଟି କରୁଛି।

ବନବିଭାଗ ତଥା ରାଜସ୍ୱ ବିଭାଗ ସେଇ ଆଦିବାସୀ ମାନଙ୍କ ଠାରୁ ମୋଟା ଅଙ୍କର ଫାଇଦା ପାଇ ଜଙ୍ଗଲ ଜମିକୁ ପଟ୍ଟା କରିଦେବା ଦ୍ୱାରା ଆଦିବାସୀ ମାନେ ଏଠାରେ ବେଆଇନ୍ ଗଞେଇ ଚାଷ କରିଆସୁଥିବା ବେଳେ ରେଢାଖୋଲ ସବ୍‌ଡିଭିଜନରେ ଅଫିମ ଚାଷ କରିବା ଏହା ପ୍ରଥମ ଘଟଣା।