Tag: ଇପିଏଫଓ

ନୂଆଦିଲ୍ଲୀ: ନିରବଚ୍ଛିନ୍ନ ଭାବେ ପେନସନ ସୁବିଧା ଜାରି ରଖିବାକୁ କର୍ମଚାରୀ ଭବିଷ୍ୟନିଧି ସଂସ୍ଥା (ଇପିଏଫଓ) ର ୭୮ ଲକ୍ଷରୁ ଅଧିକ ପେନସନଧାରୀଙ୍କୁ ପ୍ରତିବର୍ଷ ଲାଇଫ ସାର୍ଟିଫିକେଟ ବା ଜୀବନ ପ୍ରମାଣପତ୍ର ଦାଖଲ କରିବାକୁ ପଡ଼ିଥାଏ। ପୂର୍ବରୁ ପେନସନଧାରୀମାନଙ୍କୁ ବ୍ୟକ୍ତିଗତ ଭାବେ ବ୍ୟାଙ୍କକୁ ଯିବାକୁ ପଡ଼ୁଥିଲା, ଯାହାକି କଷ୍ଟଦାୟକ ଥିବାର ଅଭିଯୋଗ ମିଳୁଥିଲା।

ଜୀବନର ଚଳଣିକୁ ସହଜ କରିବାକୁ ଇପିଏଫଓ ପକ୍ଷରୁ ୨୦୧୫ ମସିହାରେ ପେନସନଧାରୀଙ୍କ ପାଇଁ ଡିଜିଟାଲ ଲାଇଫ ସାର୍ଟିଫିକେଟ (ଡିଏଲଓ) ବ୍ୟବସ୍ଥା ଆରମ୍ଭ କରାଗଲା। ଇପିଏସ୍ ପେନସନଧାରୀଙ୍କ ପାଖରୁ ଇପିଏଫଓ ବାୟୋମେଟ୍ରିକ ପ୍ରମାଣନ ପ୍ରକ୍ରିୟାରେ ଡିଏଲସି ଗ୍ରହଣ କଲା। ବାୟୋମେଟ୍ରିକ ଭିତ୍ତିକ ଡିଏଲସି ଦାଖଲ କରିବାକୁ ହେଲେ ଜଣେ ପେନସନଧାରୀଙ୍କୁ ଯେକୌଣସି ବ୍ୟାଙ୍କ, ଡାକଘର, ସାଧାରଣ ସେବା କେନ୍ଦ୍ର କିମ୍ବା ଇପିଏଫଓ କାର୍ଯ୍ୟାଳୟ ଯିବାକୁ ପଡ଼ିଥାଏ, କାରଣ ସେଠାରେ ଆଙ୍ଗୁଠି ଛାପ ଓ ଆଖି ଡୋଳାର ଚିତ୍ର ଗ୍ରହଣ କରିବାକୁ ଯନ୍ତ୍ର ଉପଲବ୍ଧ ହୋଇଥାଏ।

ବ୍ୟାଙ୍କ ଓ ଡାକଘରକୁ ବ୍ୟକ୍ତିଗତ ଭାବେ ଯିବାରେ ବରିଷ୍ଠ ନାଗରିକ ମାନେ ସମୁଖୀନ ହେଉଥିବା ସମସ୍ୟାକୁ ହ୍ରାସ କରିବା ପାଇଁ ଇଲେକ୍ଟ୍ରୋନିକ୍ସ ଓ ସୂଚନା ପ୍ରଯୁକ୍ତି ମନ୍ତ୍ରଣାଳୟ ଏବଂ ୟୁନିକ ଆଇଡେଣ୍ଟିଫିକେସନ ଅଥରିଟି ଅଥ ଇଣ୍ଡିଆ ପକ୍ଷରୁ ଜୀବନ ପ୍ରମାଣପତ୍ର ଦାଖଲ ସକାଶେ ଫେସ୍ ଅଥେଣ୍ଟିକେସନ ଟେକ୍ନୋଲୋଜିର ବିକାଶ କରାଯାଇଛି। ୨୦୨୨ ମସିହା ଜୁଲାଇ ମାସରେ ଇପିଏଫଓ ଏହି ବ୍ୟବସ୍ଥାକୁ ଗ୍ରହଣ କରିଥିଲା। ପେନସନଧାରୀଙ୍କୁ ଘରେ ବସି ଡିଏଲସି ଦାଖଲ କରିବା ଦିଗରେ ଏହି ନୂତନ ବ୍ୟବସ୍ଥା ବେଶ୍ ଗ୍ରହଣୀୟ, ସହଜ ଏବଂ ଆରାମଦାୟକ। ଯେକୌଣସି ଆଣ୍ଡ୍ରଏଡ ଫୋନ୍ ମାଧ୍ୟମରେ ସେମାନେ ଏହା ଦାଖଲ କରିପାରିବେ, ଯଦ୍ୱାରା ପରିଣତ ବୟସରେ ବ୍ୟାଙ୍କ, ଡାକଘର କିମ୍ବା ଅନ୍ୟ କୌଣସି ସ୍ଥାନକୁ ଏଥିପାଇଁ କଷ୍ଟଦାୟକ ଯାତ୍ରାରୁ ମୁକ୍ତି ମିଳିପାରିବ।

ଏହି ପ୍ରକ୍ରିୟା ଜଣେ ପେନସନଧାରୀଙ୍କୁ ନିଜ ଘରେ ବସ ସୁବିଧାନୁସାରେ ଏକ ସ୍ମାର୍ଟଫୋନ ବ୍ୟବହାର କରି ଫେସିଆଲ ସ୍କାନ ଦ୍ୱାରା ପରିଚୟ ପ୍ରମାଣନ ସମ୍ପନ୍ନ କରିବାର ସୁବିଧା ଦେଉଛି। ଏହି ପ୍ରକ୍ରିୟା ୟୁଆଇଡିଏଆଇର ଫେସ୍ ରିକୋଗନେସନ ଆପ୍ ଦ୍ୱାରା ୟୁଆଇଡିଏଆଇର ଥିବା ଆଧାର ଡାଟାବେସ ସହାୟତାରେ ସମ୍ପନ୍ନ ହୋଇଥାଏ।

ଇପିଏଫଓ ପକ୍ଷରୁ ଫେସିଆଲ ଅଥେଣ୍ଟିକେସନ ଟେକ୍ନୋଲୋଜି ଦ୍ୱାରା ଡିଏଲସି ଦାଖଲ ପ୍ରକ୍ରିୟା ଆରମ୍ଭ କରାଯିବା ପରେ ୨୦୨୨-୨୩ରେ ୨.୧ ଲକ୍ଷ ପେନସନଧାରୀ ଏହାର ସୁବିଧା ନେଇଥିଲେ। ୨୦୨୩-୨୪ ରେ ଏହି ସଂଖ୍ୟା ୬.୬ ଲକ୍ଷକୁ ବୃଦ୍ଧି ପାଇଥିଲା, ଯାହାକି ପ୍ରତ୍ୟେକ ବର୍ଷ ଏହି ଟେକ୍ନୋଲୋଜି ବ୍ୟବହାର କରିବାରେ ୨୦୦% ବୃଦ୍ଧି ହୋଇଥିବା ପରିଲକ୍ଷିତ ହୋଇଛି। ୨୦୨୩-୨୪ରେ ଏହି ପ୍ରକ୍ରିୟାରେ ୬.୬ ଲକ୍ଷ ପେନସନଧାରୀଙ୍କ ଜୀବନ ପ୍ରମାଣପତ୍ର ମିଳିଥିଲା, ଯାହାକି ଏହି ଅବଧି ମଧ୍ୟରେ ମିଳିଥିବା ମୋଟ ଡିଜିଟାଲ ଲାଇଫ ସାର୍ଟିଫିକେଟର ୧୦%। ଗତ ଆର୍ଥିକ ବର୍ଷରେ ମୋଟ ପ୍ରାୟ ୬୦ ଲକ୍ଷ ଡିଜିଟାଲ ଲାଇଫ ସାର୍ଟିଫିକେଟ ମିଳିଥିଲା।

ଫେସିଆଲ ଅଥେଣ୍ଟିକେସନ ପ୍ରକ୍ରିୟା ବ୍ୟବହାର କରିବାକୁ ହେଲେ ସ୍ମାଟ ଫୋନରେ ‘ଆଧାର ଫେସ୍ ଆରଡି’ ଏବଂ ‘ଜୀବନ ପ୍ରମାଣନ’ ନାମକ ଦୁଇଟି ଆପ୍ଲିକେସନ ଇନଷ୍ଟଲ କରିବାକୁ ପଡ଼ିବ। ଆଧାର ଲିଙ୍କ ହୋଇଥିବା ମୋବାଇଲ ଫୋନ ଗୁଡ଼ିକରେ ଏହି ଆପ୍ଲିକେସନ ବ୍ୟବହାର ସହଜ। ସଫଳତାର ସହ ଫେସ ସ୍କାନ କରିବାକୁ ଏହି ଆପ ରେ ସମ୍ପୂର୍ଣ୍ଣ ନିୟମାବଳୀ ଉପଲବ୍ଧ। ଥରେ ଫେସ ସ୍କାନ ଶେଷ ହୋଇଗଲେ ଡିଏଲସି ଦାଖଲ ହୋଇଯାଇଥାଏ ଏବଂ ମୋବାଇଲ ସ୍କିନରେ ଏହା ସୂଚିତ ହୋଇଥାଏ। ଏଥିସହ ଘରେ ବସି ଜୀବନ ପ୍ରମାଣନ ଆଇଡି ଏବଂ ପିପିଓ ନମ୍ବର ମଧ୍ୟ ମିଳିଯାଇଥାଏ।

ଇପିଏସ ପେନସନଧାରୀଙ୍କ ଡିଏଲସି ପାଇଁ ଏହି ଅଭିନବ ଓ ସହଜ ଟେକ୍ନୋଲୋଜି ୨୦୨୨ ମସିହା ଜୁଲାଇ ମାସରେ ଇପିଏଫଓ ସଫ୍ଟୱେରରେ ସଂଯୁକ୍ତ କରାଯାଇଥିଲା। ଅଧିକରୁ ଅଧିକ ପେନସନଧାରୀଙ୍କୁ ଏହି ନୂତନ ବ୍ୟବସ୍ଥା ବାବଦରେ ସୂଚିତ କରିବାକୁ କ୍ଷେତ୍ର ଅଧିକାରୀମାନଙ୍କୁ ନିର୍ଦ୍ଦେଶ ଦିଆଯାଇଥିଲା। ଏହି ବ୍ୟବସ୍ଥାକୁ ଲୋକପ୍ରିୟ କରାଇବାକୁ କ୍ଷେତ୍ର କାର୍ଯ୍ୟାଳୟ ଗୁଡ଼ିକରେ ପେନସନଧାରୀଙ୍କୁ ବୁଝାଯିବା ସହ ୨୦୨୩ ମସିହା ଜାନୁଆରୀ ମାସରୁ ପ୍ରତ୍ୟେକ ଜିଲ୍ଲାରେ ଅନୁଷ୍ଠିତ ହୋଇ ଆସୁଥିବା ନିଧି ଆପକେ ନିକତ କାର୍ଯ୍ୟକ୍ରମରେ ମଧ୍ୟ ଅବଗତ କରାଯାଉଛି। ଏହି ଟେକ୍ନୋଲୋଜି ବ୍ୟବହାରର ଏକ ବିସ୍ତୃତ ଭିଡିଓ ଇପିଏଫଓର ଅଫିସିଆଲ ୟୁଟ୍ୟୁବ ହ୍ୟାଣ୍ଡଲ @SOCIALEPFO ରେ ଉପଲବ୍ଧ।

ଅଧିକରୁ ଅଧିକ ପେନସନଧାରୀଙ୍କ ଜୀବନପ୍ରଣାଳୀକୁ ଏହି ନୂତନ ବ୍ୟବସ୍ଥା ସହଜ କରିବ ବୋଲି ଇପିଏଫଓର ଦୃଢ଼ ବିଶ୍ୱାସ।

ନୂଆଦିଲ୍ଲୀ: ଇପିଏଫଓର ନିୟମିତ ଭାବେ ଦରମା ପାଉଥିବା କର୍ମଚାରୀଙ୍କ ଅଗଷ୍ଟ ୨୦, ୨୦୨୨ ଦିନ ପ୍ରକାଶିତ ତଥ୍ୟ ଅନୁସାରେ ଜୁନ, ୨୦୨୨ରେ ଇପିଏଫଓରେ ୧୮.୩୬ଲକ୍ଷ ମୋଟ ସଦସ୍ୟ ଯୋଡି ହୋଇଛନ୍ତି। ଗତବର୍ଷ ମେ ୨୦୨୨ ହିସାବକୁ ଦେଖିଲେ ଯୋଡି ହୋଇଥିବା ମୋଟ ସଦସ୍ୟଙ୍କ ସଂଖ୍ୟା ଜୁନ, ୨୦୨୨ରେ ଶତକଡା ୯.୨୧ଭାଗ ବୃଦ୍ଧି ପାଇଛି। ବର୍ଷ ପରେ ବର୍ଷ ଏହି ପେ ରୋଲ ତଥ୍ୟ ତୁଳନା କଲେ ଜୁନ ୨୦୨୨ରେ ଜୁନ ମାସ ୨୦୨୧ ତୁଳନାରେ ୫. ୫୩ ଲକ୍ଷ ସଦସ୍ୟ ସାମିଲ ହୋଇଛନ୍ତି।

ସେହି ମାସରେ ସାମିଲ ହୋଇଥିବା ମୋଟ ୧୮. ୩୬ଲକ୍ଷ ସଦସ୍ୟ ମଧ୍ୟରୁ ପ୍ରଥମ ଥର ନିମନ୍ତେ ୧୦.୫୪ଲକ୍ଷ ନୂତନ ସଭ୍ୟ ଇପିଏଫ  ଓ ଏମପି ଆଇନ, ୧୯୫୨ ଅଧୀନରେ ସାମିଲ ହୋଇଛନ୍ତି। ଏପ୍ରିଲ ୨୦୨୨ ଠାରୁ ନୂତନ ସଭ୍ୟ ଯୋଗ ଦେବା ଧାରା ବୃଦ୍ଧି ପରିଲକ୍ଷିତ ହୋଇଛି। ପ୍ରାୟ ୭.୮୨ ଲକ୍ଷ ସଦସ୍ୟ ବାସ୍ତବ ପକ୍ଷେ ଛାଡିଥିଲେ ମଧ୍ୟ ସେମାନେ ସଂସ୍ଥା ମଧ୍ୟରେ ଚାକିରି ପରିବର୍ତ୍ତନ ସତ୍ତ୍ୱେ ଇଡିଏଫଓରେ ପୁନଃ ଯୋଗଦେଇ ତାଙ୍କ ପୂର୍ବତନ ଭବିଷ୍ୟନିଧି ପାଣ୍ଠିକୁ ଅର୍ଥ ହସ୍ତାନ୍ତର କରିଛନ୍ତି। ମାତ୍ର ସେମାନେ ଭବିଷ୍ୟନିଧି ପାଣ୍ଠିରୁ  ଚୂଡାନ୍ତ ଅର୍ଥ କାଢି ନାହାଁନ୍ତି। ନୂତନ ଭାବେ ସାମିଲ ହୋଇଥିବା ସଦସ୍ୟମାନଙ୍କ ସଂଖ୍ୟା ଗତ ଆର୍ଥିକ ବର୍ଷର ଏଇମାସ ତୁଳନାରେ ଅଧିକ।

ବୟସ ଅନୁସାରେ ନିୟମିତ ଦରମା ପାଉଥିବା କର୍ମଚାରୀଙ୍କ ତଥ୍ୟକୁ ତୁଳନା କଲେ ୨୨-୨୫ବର୍ଷ ମଧ୍ୟରେ ସର୍ବାଧିକ କର୍ମଚାରୀ ପ୍ରାୟ ୪. ୭୨ଲକ୍ଷ କେବଳ ଜୁନ ମାସରେ ପଞ୍ଜୀକୃତ ହୋଇଛନ୍ତି। ଅଧିକାଂଶ ପ୍ରଥମ ଥର ପାଇଁ ଚାକିରି କରୁଥିବା ବ୍ୟକ୍ତି ସଂଗଠିତ କ୍ଷେତ୍ର କର୍ମଚାରୀ ଭାବେ ଅଧିକ ସଂଖ୍ୟାରେ ଯୋଗ ଦେଉଥିବା ଜଣାପଡିଛି।

ରାଜ୍ୟୱାରୀ ପେରୋଲ ସଂଖ୍ୟା ତୁଳନା କଲେ ଜଣାପଡେ ଯେ ମହାରାଷ୍ଟ୍ର, କର୍ଣ୍ଣାଟକ, ତାମିଲନାଡୁ, ହରିୟାଣା, ଗୁଜରାଟ ଓ ଦିଲ୍ଲୀରେ ସାମିଲ ସଂସ୍ଥାଗୁଡିକ ସର୍ବାଧିକ ପ୍ରାୟ ୧୨. ୬୧ ଲକ୍ଷ ସଭ୍ୟକୁ ସାମିଲ କରିଛନ୍ତି ଯାହାକି ଦେଶର ସବୁ ବୟସଙ୍କ ମୋଟ ପେରୋଲର ଶତକଡା ୬୮.୬୬ ଭାଗ।

ଲିଙ୍ଗଗତ ବିଶ୍ଳେଷଣରୁ ଜଣାଯାଏ ଯେ ମହିଳା ସଦସ୍ୟଙ୍କ ସଂଖ୍ୟା ଗତ ମାସରେ ୩.୪୩ ଲକ୍ଷ ଥିବାବେଳେ ଚଳିତମାସରେ ଏହା ୪.୦୬ଲକ୍ଷକୁ  ବୃଦ୍ଧି ପାଇଛି। ଏହା ଶତକଡା ୧୮.୩୭ଭାଗ ଅଧିକ ବୃଦ୍ଧି ପାଇଛି। ଗତ ୧୨ ମାସରେ ମହିଳା କର୍ମଚାରୀ ସଂଖ୍ୟା ସଂଗଠିତ କ୍ଷେତ୍ରରେ ସର୍ବାଧିକ ବୋଲି ଜଣାପଡିଛି। ସେହି ଅନୁସାରେ ମହିଳା ସଦସ୍ୟଙ୍କ ସଂଖ୍ୟା ମେ ୨୦୨୨ରେ ଶତକଡା ୨୦.୩୭ଭାଗ ଥିବାବେଳେ ଜୁନ ୨୦୨୨ତାହା ଶତକଡା ୨୨.୦୯ଭାଗକୁ ବୃଦ୍ଧି ପାଇଛି।

ଶିଳ୍ପ ୱାରୀ ପେରୋଲ ତଥ୍ୟରୁ ଜଣାପଡିଛି ଯେ ମୁଖ୍ୟତଃ ଦୁଇ ପ୍ରକାର ଶ୍ରେଣୀ ଉଦାହରଣ ସ୍ୱରୂପ “ଦକ୍ଷ ସେବା” (ମାନବସମ୍ବଳ ସଂସ୍ଥା, ଘରୋଇ ସୁରକ୍ଷା ସଂସ୍ଥା ଓ ଛୋଟ ଛୋଟ ଠିକାଦାରୀ ସଂସ୍ଥା) ଇତ୍ୟାଦି। ବ୍ୟବସାୟ ବାଣିଜ୍ୟିକ ସଂସ୍ଥାରୁ ଏହି ସମୟ ମଧ୍ୟରେ ଶତକଡା  ୪୭.୬୩ ଭାଗ ସଦସ୍ୟ ସାମିଲ ହୋଇଛନ୍ତି। ପୂର୍ବ ମାସ ସହ ଶିଳ୍ପୱାରୀ ତଥ୍ୟକୁ ତୁଳନା କଲେ ବିଦ୍ୟାଳୟ, ଗହଣା ତିଆରି, ଦକ୍ଷ ସେବା ଓ ବୟନ କ୍ଷେତ୍ରରେ ଅଧିକ ସାମିଲ ହୋଇଥିବା ପରିଲକ୍ଷିତ ହୋଇଛି। ତଥ୍ୟ ସଂଗ୍ରହ ଏକ ନିରବଚ୍ଛିନ୍ନ ପ୍ରକ୍ରିୟା ତଥା କର୍ମଚାରୀର ରେକର୍ଡ ମଧ୍ୟ ଏହି ପ୍ରକ୍ରିୟା ଦେଇ ଗତି କରୁଥିବାରୁ ପେ ରୋଲ ତଥ୍ୟ ମଧ୍ୟ କାମଚଳା ବା ଅସ୍ଥାୟୀ। ପୁରୁଣା ତଥା ପ୍ରତିମାସରେ ନବୀକରଣ ହେଉଥାଏ। ଏପ୍ରିଲ ୨୦୧୮ ମସିହାଠାରୁ ଇପିଏଫଓ ସେପ୍ଟେମ୍ବର ୨୦୧୭ ପରର ପେ ରୋଲ ତଥ୍ୟ ଦେବାରେ ଲାଗିଛି।

କର୍ମଚାରୀ ଭବିଷ୍ୟନିଧି ପାଣ୍ଠି ଓ ଅନ୍ୟାନ୍ୟ ବ୍ୟବସ୍ଥା ଆଇନ ୧୯୫୨ ଅଧୀନ ସଂଗଠିତ କ୍ଷେତ୍ରର ପ୍ରତିଷ୍ଠାନ ମାନଙ୍କର କର୍ମଚାରୀ ମାନେ ଇପିଏଫଓ ପେ ରୋଲର ଅଂଶବିଶେଷ। ଏହା ଏକ ସାମାଜିକ ସୁରକ୍ଷା ସଂଗଠନ ହୋଇଥିବାରୁ କର୍ମଚାରୀଙ୍କୁ ଭବିଷ୍ୟନିଧି ପାଣ୍ଠି, ଅବସରକାଳୀନ ସୁବିଧା ଏହାର ସଦସ୍ୟମାନଙ୍କୁ ଅବସର ପରେ ପ୍ରଦାନ କରିଥାଏ। ଏହାଛଡା କୌଣସି କର୍ମଚାରୀଙ୍କ ଆକସ୍ମିକ ମୃତ୍ୟୁ ଘଟିଲେ ତାଙ୍କ ପରିବାରକୁ ପରିବାର ପେନସନ ଓ ବୀମା ସୁବିଧା ମଧ୍ୟ ପ୍ରଦାନ କରିଥାଏ। (ପିଆଇବି)

ନୂଆଦିଲ୍ଲୀ : ଦେଶରେ ଇପିଏଫଓ ଅଧୀନରେ ମୋଟ 65 ଲକ୍ଷ ପେନସନଭୋଗୀ ରହିଛନ୍ତି । କୋଭିଡ-19 ଲକଡାଉନ କାଳରେ ପେନସନଭୋଗୀଙ୍କୁ ଯେପରି କୌଣସି ଅସୁବିଧା ନହୁଏ ସେଥିଲାଗି ଏପ୍ରିଲ ମାସରେ ଇପିଏଫଓର ସମସ୍ତ 135ଟି କ୍ଷେତ୍ରୀୟ କାର୍ଯ୍ୟାଳୟ ଅଗ୍ରୀମ ପେନସନ ପ୍ରଦାନ କରିଛି । ଇପିଏଫଓର ଅଧିକାରୀ ଓ କର୍ମଚାରୀମାନେ ଅକ୍ଲାନ୍ତ ପରିଶ୍ରମ କରି ପେନସନ ପ୍ରଦାନ କରୁଥିବା ଦେଶର ସମସ୍ତ ନୋଡାଲ ବ୍ୟାଙ୍କ ଜରିଆରେ 764 କୋଟି ଟଙ୍କା ପ୍ରଦାନ କରିଛନ୍ତି ।  ପେନସନଭୋଗୀଙ୍କ ବ୍ୟାକ ଖାତାକୁ ସଠିକ ସମୟରେ ପେନସନ ରାଶି ପ୍ରଦାନ କରିବା ପାଇଁ ବ୍ୟାଙ୍କମାନଙ୍କୁ ନିର୍ଦ୍ଦେଶ ଦିଆଯାଇଛି । କୋଭିଡ-19 ମହାମାରୀ ସମୟରେ ପେନସନଭୋଗୀଙ୍କ ସୁବିଧାକୁ ଅଗ୍ରାଧିକାର ଦେଇ ଇପିଏଫଓ ତାହାର ନିରନ୍ତର ସେବା ଜାରି ରଖିଛି ।