ନୂଆଦିଲ୍ଲୀ: ନେତାଜୀ ସୁଭାଷ ଚନ୍ଦ୍ର ବୋଷଙ୍କ ଜୟନ୍ତୀ ତଥା ଜାତୀୟ ପରାକ୍ରମ ଦିବସ ପାଳନ ଅବସରରେ ଆଣ୍ଡାମାନ ନିକୋବର ଦ୍ୱୀପର ପୋର୍ଟ ବ୍ଲେୟାରରେ ଆସନ୍ତା ୨୩ ତାରିଖରେ ଜୟ ହିନ୍ଦ ପଦଯାତ୍ରା ଅନୁଷ୍ଠିତ ହେବ। କେନ୍ଦ୍ର ଯୁବ ବ୍ୟାପାର ଓ କ୍ରୀଡା ରାଷ୍ଟ୍ରମନ୍ତ୍ରୀ ରକ୍ଷା ନିଖିଲ ଖଡ଼ସେ ଏହାର ନେତୃତ୍ୱ ନେବେ। ନେତାଜୀଙ୍କ ଜୀବନି ଓ ସ୍ୱାଧୀନତା ସଂଗ୍ରାମ ଉପରେ ଆଧାରିତ କାର୍ଯ୍ୟକ୍ରମରେ ଦେଢ ହଜାର ମାଇ ଭାରତ ଯୁବ ସ୍ୱେଚ୍ଛାସେବୀ ଓ ଯୁବ ନେତୃତ୍ୱ ଅଂଶଗ୍ରହଣ କରିବାର ରହିଛି।
ସ୍ୱାଧୀନତା ସଂଗ୍ରାମୀମାନଙ୍କ ବୀର ଗାଥାର ବାର୍ତା ନେଇ ଫ୍ଲାଗ ପଏଂଟରୁ ନେତାଜୀ ଷ୍ଟାଡିୟମ ପର୍ଯ୍ୟନ୍ତ ଯାଇଥିବା ପ୍ରାୟ ପାଂଚ କିଲୋମିଟର ରାସ୍ତା ଏହି ପଦଯାତ୍ରୀମାନେ ଅତିକ୍ରମ କରିବେ। ଏକ ସ୍ୱାଧୀନ ଓ ବିକଶିତ ଭାରତବର୍ଷ ପାଇଁ ନେତାଜୀଙ୍କ ଅବଦାନକୁ ମନେ ପକାଇ ବିଭିନ୍ନପ୍ରକାରର କାର୍ଯ୍ୟକ୍ରମ ମଧ୍ୟ ଅନୁଷ୍ଠିତ ହେବ।
ପ୍ରମୁଖ କାର୍ଯ୍ୟକ୍ରମ
ଯୁବକମାନଙ୍କ ଲାଗି ପ୍ରତିଯୋଗିତା: ‘ସୁଭାଷ ଚନ୍ଦ୍ର ବୋଷ ଓ ସ୍ୱାଧୀନତା’ ଶୀର୍ଷକରେ ଏକାଧିକ ପ୍ରତିଯୋଗିତା। ସ୍ୱାଧୀନତା ସଂଗ୍ରାମ କାଳରେ ନେତାଜୀଙ୍କ ଉତ୍ସର୍ଗୀକୃତ ଜାବନ ସମ୍ପର୍କିତ ଚିତ୍ରାଙ୍କନ, ପ୍ରବନ୍ଧ ଲିଖନ, କୁଇଜ, ଡିକ୍ଲାମେସନ ପ୍ରତିଯୋଗିତା।
ସାଂସ୍କୃତିକ କାର୍ଯ୍ୟକ୍ରମ: ଉଦଘାଟନୀରେ ଗ୍ରୁପ ସଙ୍ଗୀତ, ପାରମ୍ପରିକ ନାଚଗୀତ ସହ ସୁଭାଷ ବୋଷଙ୍କ ଜୀବନି ସମ୍ପର୍କିତ ବିଭିନ୍ନ ସାଂସ୍କୃତିକ କାର୍ଯ୍ୟକ୍ରମ।
ପ୍ରଦର୍ଶନୀ ଓ ଷ୍ଟଲ: ସ୍ୱାଧୀନତା ସଂଗ୍ରାମ କାଳରେ ନେତାଜୀଙ୍କ ଜୀବନି ଓ ମାଇଲଖୁଂଟ ଉପରେ ଫଟୋ ଗ୍ୟାଲେରୀ। ସ୍ଥାନୀୟ ହସ୍ତଶିଳ୍ପ ସାମଗ୍ରୀ ପ୍ରଦର୍ଶନ ପୂର୍ବକ ଆଣ୍ଡାମାନ ଓ ନିକୋବର ଦ୍ୱୀପପୁଞ୍ଜର କଳା ନୈପୁଣ୍ୟ ପ୍ରଦର୍ଶନର ଷ୍ଟଲ।
ଯୁବ ପ୍ରତିଭା ସମ୍ବର୍ଦ୍ଧନା: ଦେଶ ନିର୍ମାଣ ଓ ସମାଜ ଗଠନ ଦିଗରେ ଉଲ୍ଲେଖନୀୟ ଅବଦାନ ଲାଗି ଯୁବ ନେତୃତ୍ୱଙ୍କୁ ସମ୍ବର୍ଦ୍ଧନା।
ସେନା ଅଧିକାରୀଙ୍କୁ ସମ୍ବର୍ଦ୍ଧନା: ନେତାଜୀ ପରମ୍ପରା ଓ ଭାରତର ପ୍ରତିରକ୍ଷା ଶକ୍ତି ମଧ୍ୟରେ ସମାନତା ଟାଣିବାକୁ ସେନାଧିକାରୀ ଓ ସେମାନଙ୍କ ପରିବାରକୁ ଆମନ୍ତ୍ରଣ।
ଭାରତୀୟ ସମ୍ବିଧାନ ଓ ସାଂସ୍କୃତିକ ବିବିଧତାର ୭୫ ବର୍ଷ ପୂର୍ତି ଉପଲକ୍ଷେ ଅନୁଷ୍ଠିତ ହେବାକୁ ରହିଥିବା ୨୪ଟି କାର୍ଯ୍ୟକ୍ରମ ସିରିଜ ଭିତରୁ ପଂଚମରେ ରହିଛି ପୋର୍ଟ ବ୍ଲେୟାରର ଏହି ଜୟହିନ୍ଦ ପଦଯାତ୍ରା। ବର୍ଷ ସାରା ପାଳନ ହେବାକୁ ରହିଥିବା ଏହି କାର୍ଯ୍ୟକ୍ରମ ଅଧୀନରେ ସାରା ଦେଶରେ ପ୍ରତି ମାସରେ ମାଇ ଭାରତ ସ୍ୱେଚ୍ଛାସେବୀଙ୍କ ଦ୍ୱାରା ଦୁଇଟି ପଦଯାତ୍ରା ଅନୁଷ୍ଠିତ ହେବାର ରହିଛି।
ନେତାଜୀଙ୍କ ସ୍ୱପ୍ନର ବିକଶିତ ଓ ଆତ୍ମ ନିର୍ଭର ଭାରତୀୟ ଭାବଧାରାରେ ଯୋଡି ହୋଇ ମାଇ ଭାରତ ପୋର୍ଟାଲରେ ପଞ୍ଜିକରଣ କରି ସାରା ଦେଶର ଯୁବକ ଏହି କାର୍ଯ୍ୟକ୍ରମରେ ଭାଗ ନେବାକୁ ସମ୍ପୃକ୍ତ ମନ୍ତ୍ରଣାଳୟ ପକ୍ଷରୁ କୁହାଯାଇଛି।
