ନୂଆଦିଲ୍ଲୀ: ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ଆଜି ରାଜସ୍ଥାନର ଜୟପୁରସ୍ଥିତ ଜୟପୁର ପ୍ରଦର୍ଶନୀ ଏବଂ ସମ୍ମିଳନୀ କେନ୍ଦ୍ର (ଜେଇସିସି)ରେ ରାଇଜିଂ ରାଜସ୍ଥାନ ଗ୍ଲୋବାଲ ଇନଭେଷ୍ଟମେଣ୍ଟ ସମିଟ ୨୦୨୪ ଏବଂ ରାଜସ୍ଥାନ ଗ୍ଲୋବାଲ ବିଜନେସ ଏକ୍ସପୋକୁ ଉଦଘାଟନ କରିଛନ୍ତି। ଏହି ଅବସରରେ ଉପସ୍ଥିତ ଜନତାଙ୍କୁ ସମ୍ବୋଧିତ କରି ପ୍ରଧାନମନ୍ତ୍ରୀ କହିଥିଲେ ଯେ ରାଜସ୍ଥାନର ସଫଳତାଯାତ୍ରାରେ ଆଜି ଆଉ ଏକ ସ୍ୱତନ୍ତ୍ର ଦିନ। ପିଙ୍କ ସିଟି- ଜୟପୁରରେ ଆୟୋଜିତ ରାଇଜିଂ ରାଜସ୍ଥାନ ଗ୍ଲୋବାଲ ଇନଭେଷ୍ଟମେଣ୍ଟ ସମିଟ୍ ୨୦୨୪ ଆୟୋଜନ ଅବସରରେ ସେ ସମସ୍ତ ଶିଳ୍ପ ଓ ବ୍ୟବସାୟୀ ନେତୃତ୍ବ, ନିବେଶକ, ପ୍ରତିନିଧିମାନଙ୍କୁ ଅଭିନନ୍ଦନ ଜଣାଇଛନ୍ତି। ଏହି ଭବ୍ୟ କାର୍ଯ୍ୟକ୍ରମ ଆୟୋଜନ କରିଥିବାରୁ ସେ ରାଜସ୍ଥାନ ସରକାରଙ୍କୁ ଅଭିନନ୍ଦନ ଜଣାଇଛନ୍ତି।
ପ୍ରଧାନମନ୍ତ୍ରୀ ଉଲ୍ଲେଖ କରିଥିଲେ ଯେ ଭାରତରେ ବ୍ୟବସାୟିକ ବାତାବରଣକୁ ନେଇ ବ୍ୟୟସାୟ ବିଶେଷଜ୍ଞ ଓ ନିବେଶକମାନେ ଉତ୍ସାହିତ ଅଛନ୍ତି। ସେ ଆହୁରି ମଧ୍ୟ କହିଥିଲେ ଯେ ଭାରତ ପର୍ଫର୍ମ, ଟ୍ରାସଫର୍ମ ଏଣ୍ଡ ରିଫର୍ମ ( ପ୍ରଦର୍ଶନ, ପରିବର୍ତ୍ତନ ଏବଂ ସଂସ୍କାର)ର ମନ୍ତ୍ରକୁ ନେଇ ଯେଉଁ ପ୍ରଗତି ଦେଖୁଛି ତାହା ପ୍ରତ୍ୟେକ କ୍ଷେତ୍ରରେ ଦୃଶ୍ୟମାନ ହେଉଛି।
ଶ୍ରୀ ମୋଦୀ କହିଥିଲେ ଯେ, ସ୍ବାଧୀନତାର ୭ଟି ଦଶନ୍ଧି ପରେ ହିଁ ଭାରତ ବିଶ୍ବର ୧୧ତମ ବୃହତ୍ତମ ଅର୍ଥନୀତିରେ ପରିଣତ ହୋଇପାରିଥିଲା, କିନ୍ତୁ ଗତ ଏକ ଦଶନ୍ଧିରେ ହିଁ ଭାରତ ବିଶ୍ୱର ପଞ୍ଚମ ବୃହତ୍ତମ ଅର୍ଥନୀତିରେ ପରିଣତ ହୋଇଛି। ବିଗତ ୧୦ ବର୍ଷ ମଧ୍ୟରେ ଭାରତର ଅର୍ଥନୀତି ଓ ରପ୍ତାନି ପ୍ରାୟ ଦ୍ୱିଗୁଣିତ ହୋଇଛି ଏବଂ ୨୦୧୪ ପୂର୍ବ ଦଶନ୍ଧି ତୁଳନାରେ ଗତ ଦଶନ୍ଧିରେ ପ୍ରତ୍ୟକ୍ଷ ବିଦେଶୀ ପୁଞ୍ଜିନିବେଶ ମଧ୍ୟ ଦ୍ୱିଗୁଣିତ ହୋଇଛି ବୋଲି ମୋଦୀ କହିଛନ୍ତି। ସେ ଆହୁରି ମଧ୍ୟ କହିଥିଲେ ଯେ ଭାରତର ଭିତ୍ତିଭୂମି ଖର୍ଚ୍ଚ ପ୍ରାୟ ୨ ଲକ୍ଷ କୋଟି ଟଙ୍କାରୁ ୧୧ ଲକ୍ଷ କୋଟି ଟଙ୍କାକୁ ବୃଦ୍ଧି ପାଇଛି।
“ଭାରତର ସଫଳତା ଗଣତନ୍ତ୍ର, ଜନସଂଖ୍ୟା, ଡିଜିଟାଲ ଡାଟା ଏବଂ ବିତରଣର ପ୍ରକୃତ ଶକ୍ତିକୁ ଦର୍ଶାଉଛି” ପ୍ରଧାନମନ୍ତ୍ରୀ କହିଥିଲେ। ସେ ଆହୁରି କହିଥିଲେ ଯେ ଭାରତ ଭଳି ଏକ ବିବିଧତାପୂର୍ଣ୍ଣ ଦେଶରେ ଗଣତନ୍ତ୍ରର ସଫଳତା ଏବଂ ସଶକ୍ତୀକରଣ ହେଉଛି ନିଜେ ଏକ ବଡ଼ ସଫଳତା। ପ୍ରଧାନମନ୍ତ୍ରୀ ଉଲ୍ଲେଖ କରିଥିଲେ ଯେ ଏକ ଗଣତାନ୍ତ୍ରିକ ରାଷ୍ଟ୍ର ହେବା ସହ ମାନବିକତାର କଲ୍ୟାଣ ହେଉଛି ଭାରତର ମୁଖ୍ୟ ଆଦର୍ଶ। ଏହା ଭାରତର ମୌଳିକ ଚରିତ୍ର ବୋଲି ସେ କହିଥିଲେ।
ଭାରତରେ ନିଜର ଗଣତାନ୍ତ୍ରିକ ଅଧିକାରକୁ କାର୍ଯ୍ୟକାରୀ କରିବା ସହ ଏକ ସ୍ଥିର ସରକାର ସୁନିଶ୍ଚିତ କରିଥିବାରୁ ସେ ଭାରତବାସୀଙ୍କୁ ପ୍ରଶଂସା କରିଥିଲେ। ଭାରତର ଏହି ପ୍ରାଚୀନ ପରମ୍ପରାକୁ ଆଗକୁ ନେବା ପାଇଁ ଶ୍ରୀ ମୋଦୀ ଦେଶର ଯୁବଶକ୍ତି ବହୁଳ ଜନସଂଖ୍ୟାକୁ ପ୍ରସଂଶା କରିଥିଲେ। ଆଗାମୀ ଅନେକ ବର୍ଷ ପାଇଁ ଭାରତ ବିଶ୍ୱର ସବୁଠାରୁ ତରୁଣ ଦେଶ ମାନଙ୍କ ମଧ୍ୟରେ ରହିବ ଏବଂ ଭାରତରେ ଯୁବଗୋଷ୍ଠୀର ସର୍ବାଧିକ ସମୁଦାୟ ଏବଂ ବୃହତ୍ତମ କୁଶଳୀ ଯୁବ ଗୋଷ୍ଠୀ ରହିବ ବୋଲି ସେ ଉଲ୍ଲେଖ କରିଥିଲେ। ସେ ଆହୁରି ମଧ୍ୟ କହିଛନ୍ତି ଯେ ସରକାର ଏ ଦିଗରେ ଅନେକ ସକାରାତ୍ମକ ପଦକ୍ଷେପ ନେଉଛନ୍ତି।
ଶ୍ରୀ ମୋଦୀ କହିଥିଲେ ଯେ ଗତ ଦଶନ୍ଧିରେ ଭାରତର ଯୁବଶକ୍ତି ଆମ ଶକ୍ତିରେ ଆଉ ଏକ ଦିଗ ଯୋଡ଼ିଛି ଏବଂ ଏହି ନୂତନ ଦିଗ ହେଉଛି ଭାରତର ବୈଷୟିକ ଶକ୍ତି ଏବଂ ଡାଟା ଶକ୍ତି। ବିଶ୍ୱର ପ୍ରତ୍ୟେକ କ୍ଷେତ୍ରରେ ପ୍ରଯୁକ୍ତି ବିଦ୍ୟା ଏବଂ ଡାଟାର ଗୁରୁତ୍ୱ ଉପରେ ଗୁରୁତ୍ୱାରୋପ କରି ଶ୍ରୀ ମୋଦୀ କହିଲେ, “ଏହି ଶତାବ୍ଦୀ ଟେକ୍ନୋଲୋଜି ଦ୍ୱାରା ପରିଚାଳିତ ଏବଂ ଡାଟା ଭିତ୍ତିକ। ଗତ ଦଶନ୍ଧି ମଧ୍ୟରେ ଭାରତରେ ଇଣ୍ଟରନେଟ୍ ବ୍ୟବହାର କରୁଥିବା ଲୋକଙ୍କ ସଂଖ୍ୟା ପାଖାପାଖି ୪ ଗୁଣ ବୃଦ୍ଧି ପାଇଛି ବୋଲି ସେ ଉଲ୍ଲେଖ କରିଥିଲେ। ସେ ଆହୁରି ମଧ୍ୟ କହିଛନ୍ତି ଯେ ଡିଜିଟାଲ କାରବାରରେ ନୂତନ ରେକର୍ଡ ସୃଷ୍ଟି କରାଯାଉଛି। ଭାରତ ବିଶ୍ୱରେ ଗଣତନ୍ତ୍ରର ପ୍ରକୃତ ଶକ୍ତି, ଜନସଂଖ୍ୟା ଏବଂ ତଥ୍ୟ ପ୍ରଦର୍ଶନ କରୁଛି ବୋଲି ପ୍ରଧାନମନ୍ତ୍ରୀ ଦୃଢ଼ୋକ୍ତି ପ୍ରକାଶ କରିଥିଲେ।
ଡିଜିଟାଲ ଟେକ୍ନୋଲୋଜିର ଗଣତାନ୍ତ୍ରିକୀକରଣ ପ୍ରତ୍ୟେକ କ୍ଷେତ୍ର ଏବଂ ସମୁଦାୟପାଇଁ କିପରି ଲାଭଦାୟକ ତାହା ଭାରତ ଦେଖାଇଛି| ୟୁପିଆଇ, ଡାଇରେକ୍ଟ ବେନିଫିଟ ଟ୍ରାନ୍ସଫର ସିଷ୍ଟମ, ଗଭର୍ଣ୍ଣମେଣ୍ଟ ଇ-ମାର୍କେଟପ୍ଲେସ (ଜିଇଏମ), ଓପନ ନେଟୱାର୍କ ଫର ଡିଜିଟାଲ କମର୍ସ (ଓଏନଡିଭିସି) ଭଳି ଭାରତର ବିଭିନ୍ନ ଡିଜିଟାଲ ପଦକ୍ଷେପ ବିଷୟରେ ଉଲ୍ଲେଖ କରି ସେ କହିଥିଲେ ଯେ ଏଭଳି ଅନେକ ପ୍ଲାଟଫର୍ମ ଅଛି ଯାହା ଡିଜିଟାଲ ଇକୋସିଷ୍ଟମର ଶକ୍ତିକୁ ପ୍ରଦର୍ଶନ କରିଥାଏ। ରାଜସ୍ଥାନରେ ମଧ୍ୟ ଏହାର ବ୍ୟାପକ ପ୍ରଭାବ ଦେଖିବାକୁ ମିଳିବ ବୋଲି ସେ କହିଛନ୍ତି। ରାଜ୍ୟର ବିକାଶ ମାଧ୍ୟମରେ ଦେଶର ବିକାଶ ହୋଇଛି ଏବଂ ଯେତେବେଳେ ରାଜସ୍ଥାନ ବିକାଶର ନୂତନ ଶିଖର ଛୁଇଁବ, ସେତେବେଳେ ଦେଶ ମଧ୍ୟ ନୂତନ ଉଚ୍ଚତାରେ ପହଞ୍ଚିବ ବୋଲି ଶ୍ରୀ ମୋଦୀ ବିଶ୍ୱାସ ବ୍ୟକ୍ତ କରିଥିଲେ।
ଶ୍ରୀ ମୋଦୀ କହିଥିଲେ ଯେ ଗତ ଦଶନ୍ଧିରେ ଭାରତର ଯୁବଶକ୍ତି ଆମ ଶକ୍ତିରେ ଆଉ ଏକ ଦିଗ ଯୋଡ଼ିଛି ଏବଂ ଏହି ନୂତନ ଦିଗଟି ହେଉଛି ଭାରତର ପ୍ରଯୁକ୍ତି ବିଦ୍ୟାର ଶକ୍ତି ଏବଂ ଡାଟା ଶକ୍ତି। ବିଶ୍ୱର ପ୍ରତ୍ୟେକ କ୍ଷେତ୍ରରେ ପ୍ରଯୁକ୍ତି ବିଦ୍ୟା ଏବଂ ଡାଟାର ଗୁରୁତ୍ୱ ଉପରେ ଗୁରୁତ୍ୱାରୋପ କରି ଶ୍ରୀ ମୋଦୀ କହିଲେ, “ଏହି ଶତାବ୍ଦୀ ଟେକ୍ନୋଲୋଜି ଦ୍ୱାରା ପରିଚାଳିତ ଏବଂ ଡାଟା ଭିତ୍ତିକ।“ ଗତ ଦଶନ୍ଧି ମଧ୍ୟରେ ଭାରତରେ ଇଣ୍ଟରନେଟ୍ ବ୍ୟବହାର କରୁଥିବା ଲୋକଙ୍କ ସଂଖ୍ୟା ପାଖାପାଖି ୪ ଗୁଣ ବୃଦ୍ଧି ପାଇଛି ବୋଲି ସେ ଉଲ୍ଲେଖ କରିଥିଲେ। ସେ ଆହୁରି ମଧ୍ୟ କହିଥିଲେ ଯେ ଡିଜିଟାଲ କାରବାରରେ ନୂଆ ନୂଆ ରେକର୍ଡ ସୃଷ୍ଟି କରାଯାଉଛି। ଭାରତ ବିଶ୍ୱକୁ ଗଣତନ୍ତ୍ର, ଜନସଂଖ୍ୟା ଏବଂ ତଥ୍ୟର ପ୍ରକୃତ ଶକ୍ତିକୁ ପ୍ରଦର୍ଶନ କରୁଛି ବୋଲି ପ୍ରଧାନମନ୍ତ୍ରୀ ଉଲ୍ଲେଖ କରିଥିଲେ।
ଡିଜିଟାଲ ଟେକ୍ନୋଲୋଜିର ଗଣତାନ୍ତ୍ରିକୀକରଣ ପ୍ରତ୍ୟେକ କ୍ଷେତ୍ର ଏବଂ ସମୁଦାୟପାଇଁ କିପରି ଲାଭଦାୟକ ତାହା ଭାରତ ଦେଖାଇଛି। ଭାରତର ବିଭିନ୍ନ ଡିଜିଟାଲ ପଦକ୍ଷେପ ଯେପରିକି ୟୁପିଆଇ, ଡାଇରେକ୍ଟ ବେନିଫିଟ ଟ୍ରାନ୍ସଫର ସିଷ୍ଟମ, ଗଭର୍ଣ୍ଣମେଣ୍ଟ ଇ-ମାର୍କେଟପ୍ଲେସ (ଜିଇଏମ), ଓପନ ନେଟୱାର୍କ ଫର ଡିଜିଟାଲ କମର୍ସ (ଓଏନଡିଭିସି)ଆଦି ବିଷୟରେ ଉଲ୍ଲେଖ କରି ସେ କହିଥିଲେ ଯେ ଏଭଳି ଅନେକ ପ୍ଲାଟଫର୍ମ ଅଛି ଯାହା ଡିଜିଟାଲ ଇକୋସିଷ୍ଟମର ଶକ୍ତିକୁ ପ୍ରଦର୍ଶନ କରିଥାଏ। ରାଜସ୍ଥାନରେ ମଧ୍ୟ ଏହାର ବ୍ୟାପକ ପ୍ରଭାବ ଦେଖିବାକୁ ମିଳୁଛି ବୋଲି ସେ କହିଛନ୍ତି। ରାଜ୍ୟର ବିକାଶ ମାଧ୍ୟମରେ ଦେଶର ବିକାଶ ହୋଇଥାଏ ଏବଂ ଯେତେବେଳେ ରାଜସ୍ଥାନ ବିକାଶର ନୂତନ ଶିଖର ଛୁଇଁବ, ସେତେବେଳେ ଦେଶ ମଧ୍ୟ ବିକାଶର ନୂତନ ଉଚ୍ଚତାରେ ପହଞ୍ଚିବ ବୋଲି ଶ୍ରୀ ମୋଦୀ ବିଶ୍ୱାସ ବ୍ୟକ୍ତ କରିଥିଲେ।
କ୍ଷେତ୍ରଫଳ ଦୃଷ୍ଟିରୁ ରାଜସ୍ଥାନ ଭାରତର ସର୍ବବୃହତ ରାଜ୍ୟ ବୋଲି ଉଲ୍ଲେଖ କରି ଶ୍ରୀ ମୋଦୀ ରାଜସ୍ଥାନବାସୀଙ୍କ ବିଶାଳ ହୃଦୟ, କଠିନ ପରିଶ୍ରମ କରିବାର ପ୍ରକୃତି, ସଚ୍ଚୋଟତା, କଠିନତମ ଲକ୍ଷ୍ୟ ହାସଲ କରିବାର ଇଚ୍ଛାଶକ୍ତି, ଦେଶ ପ୍ରଥମ ବୋଲି ସେମାନଙ୍କର ବିଶ୍ୱାସ, ଦେଶ ପାଇଁ କିଛି ବି କରିବାକୁ ସେମାନଙ୍କ ପ୍ରେରଣା ପାଇଁ ପ୍ରଶଂସା କରିଥିଲେ।
ସେ ଆହୁରି ମଧ୍ୟ କହିଥିଲେ ଯେ ସ୍ୱାଧୀନତା ପରବର୍ତ୍ତୀ ସରକାରମାନଙ୍କର ପ୍ରାଥମିକତା ନା ଦେଶର ବିକାଶ ଥିଲା ନା ଦେଶର ଐତିହ୍ୟ ନା ରାଜସ୍ଥାନର ଐତିହ୍ୟ ସୁରକ୍ଷା ଥିଲା ଏବଂ ରାଜସ୍ଥାନ ଏହାର କୁଫଳ ଭୋଗକରୁଛି। ସେ ଆଶ୍ବାସନା ଦେଇଥିଲେ ଯେ ତାଙ୍କ ସରକାର ବିକାଶ ଏବଂ ଐତିହ୍ୟର ମନ୍ତ୍ର ଉପରେ କାର୍ଯ୍ୟ କରୁଛନ୍ତି ଯାହା ରାଜସ୍ଥାନର ଉପକାର କରିବ।
ରାଜସ୍ଥାନ କେବଳ ଏକ ଉଦୀୟମାନ ରାଜ୍ୟ ନୁହେଁ ବରଂ ଏକ ବିଶ୍ୱସନୀୟ ରାଜ୍ୟ ବୋଲି ଉଲ୍ଲେଖ କରି ପ୍ରଧାନମନ୍ତ୍ରୀ କହିଥିଲେ ଯେ ରାଜସ୍ଥାନ ଗ୍ରହଣଶୀଳ ଏବଂ ସମୟ ସହିତ ନିଜକୁ କିପରି ଉନ୍ନତ କରିବାକୁ ହେବ ତାହା ଜାଣେ। ସେ କହିଥିଲେ, ରାଜସ୍ଥାନର ଅନ୍ୟନାମ ହେଉଛି ଆହ୍ୱାନର ମୁକାବିଲା ଏବଂ ନୂତନ ସୁଯୋଗ ସୃଷ୍ଟି କରିବା । ଶ୍ରୀ ମୋଦୀ କହିଥିଲେ ଯେ ରାଜସ୍ଥାନବାସୀଙ୍କ ଦ୍ୱାରା ନିର୍ବାଚିତ ଏକ ଦାୟିତ୍ୱବାନ ଏବଂ ସଂସ୍କାରବାଦୀ ସରକାର ରାଜସ୍ଥାନର ଆର-ଫ୍ୟାକ୍ଟରରେ ଏକ ନୂତନ ଦିଗ ଯୋଡିଛି। ରାଜସ୍ଥାନର ମୁଖ୍ୟମନ୍ତ୍ରୀ ଓ ତାଙ୍କର ପୂରା ଟିମ କମ ସମୟରେ ଭଲ କାମ କରିଛନ୍ତି ବୋଲି ସେ ପ୍ରସଂଶା କରିଥିଲେ।
ରାଜ୍ୟ ସରକାର ଆଉ କିଛି ଦିନ ମଧ୍ୟରେ ନିଜର ପ୍ରଥମ ବର୍ଷ ପୂରଣ କରିବାକୁ ଯାଉଛନ୍ତି ବୋଲି ଉଲ୍ଲେଖ କରି ଶ୍ରୀ ମୋଦୀ ଗରିବ ଓ କୃଷକଙ୍କ କଲ୍ୟାଣ, ଯୁବକମାନଙ୍କ ପାଇଁ ନୂତନ ସୁଯୋଗ ସୃଷ୍ଟି, ସଡ଼କ, ବିଜୁଳି, ଜଳକାର୍ଯ୍ୟ ଭଳି ଉନ୍ନୟନମୂଳକ କାର୍ଯ୍ୟ ଭଳି ବିଭିନ୍ନ କ୍ଷେତ୍ରରେ ରାଜସ୍ଥାନର ଦ୍ରୁତ ବିକାଶ ପାଇଁ ମୁଖ୍ୟମନ୍ତ୍ରୀଙ୍କ ଦକ୍ଷତା ଏବଂ ପ୍ରତିବଦ୍ଧତାକୁ ପ୍ରଶଂସା କରିଥିଲେ। ସେ ଆହୁରି ମଧ୍ୟ କହିଛନ୍ତି ଯେ ଅପରାଧ ଏବଂ ଦୁର୍ନୀତିକୁ ରୋକିବାରେ ସରକାରଙ୍କ ତତ୍ପରତା ନାଗରିକ ଏବଂ ନିବେଶକଙ୍କ ମଧ୍ୟରେ ଏକ ନୂତନ ଉତ୍ସାହ ଆଣିଛି।
ରାଜସ୍ଥାନର ପ୍ରକୃତ ସମ୍ଭାବନାକୁ ଉପଲବ୍ଧି କରିବା ଜରୁରୀ ବୋଲି ଗୁରୁତ୍ୱାରୋପ କରି ପ୍ରଧାନମନ୍ତ୍ରୀ ଉଲ୍ଲେଖ କରିଥିଲେ ଯେ ରାଜସ୍ଥାନରେ ପ୍ରାକୃତିକ ସମ୍ପଦର ଭଣ୍ଡାର, ଏକ ସମୃଦ୍ଧ ଐତିହ୍ୟ ସହିତ ଆଧୁନିକ ସମ୍ପର୍କର ଏକ ନେଟୱାର୍କ, ଏକ ବହୁତ ବିଶାଳ ଭୂଖଣ୍ଡ ଏବଂ ଏକ ଉଚ୍ଚ ଦକ୍ଷ ଯୁବ ଶକ୍ତି ଅଛନ୍ତି। ସେ ଆହୁରି ମଧ୍ୟ କହିଛନ୍ତି ଯେ ରାଜସ୍ଥାନରେ ସଡ଼କଠାରୁ ଆରମ୍ଭ କରି ରେଳବାଇ, ହୋଟେଲ ଶିଳ୍ପଠାରୁ ଆରମ୍ଭ କରି ହସ୍ତଶିଳ୍ପ, କୃଷିଠାରୁ ଆରମ୍ଭ କରି ପ୍ରାଚୀନ ଦୁର୍ଗ ପର୍ଯ୍ୟନ୍ତ ଅନେକ କିଛି ରହିଛି। ରାଜସ୍ଥାନର ଏହି ସମ୍ଭାବନା ଏହି ରାଜ୍ୟକୁ ଏକ ଆକର୍ଷଣୀୟ ପୁଞ୍ଜିନିବେଶସ୍ଥଳୀରେ ପରିଣତ କରିଛି ବୋଲି ମୋଦୀ କହିଥିଲେ। ରାଜସ୍ଥାନରେ ଶିକ୍ଷାର ଗୁଣବତ୍ତା ଏବଂ ଏହାର ସାମର୍ଥ୍ୟ ବଢ଼ାଇବାର ଗୁଣବତ୍ତା ରହିଛି ବୋଲି ଉଲ୍ଲେଖ କରି ଶ୍ରୀ ମୋଦୀ କହିଥିଲେ ଯେ ଏହି କାରଣରୁ ଏବେ ଏଠାକାର ବାଲୁକା ପ୍ରାନ୍ତର ମଧ୍ୟ ଫଳନ୍ତି ଗଛପତ୍ରରେ ପରିପୂର୍ଣ୍ଣ ହୋଇପାରିଛି ଏବଂ ଅଲିଭ୍ ଏବଂ ଜେଟ୍ରୋଫା ଚାଷ ବୃଦ୍ଧି ପାଉଛି। ଜୟପୁରର ନୀଳ ମାଟିପାତ୍ର, ପ୍ରତାପଗଡ଼ର ଥେବା ଅଳଙ୍କାର ଏବଂ ଭିଲଓ୍ଵାଡାର ବସ୍ତ୍ରର ସ୍ବତନ୍ତ୍ର ସୁନାମ ଥିବାବେଳେ ମକ୍ରାନା ମାର୍ବଲ ଓ କୋଟା ଡୋରିଆ ସମଗ୍ର ବିଶ୍ବରେ ପରିଚିତ। ନାଗୌର ପାନ ମେଥିର ସୁଗନ୍ଧ ମଧ୍ୟ ଅନନ୍ୟ । ରାଜ୍ୟ ସରକାର ପ୍ରତ୍ୟେକ ଜିଲ୍ଲାର ସାମର୍ଥ୍ୟ ଚିହ୍ନଟ କରିବା ପାଇଁ କାର୍ଯ୍ୟ କରୁଛନ୍ତି ବୋଲି ସେ କହିଛନ୍ତି।
ଭାରତର ଖଣିଜ ଭଣ୍ଡାର ଯେପରିକି ଜିଙ୍କ, ସିସା, ତମ୍ବା, ମାର୍ବଲ, ଚୂନପଥର, ଗ୍ରାନାଇଟ୍, ପୋଟାସ ଇତ୍ୟାଦିର ଏକ ବଡ଼ ଭାଗ ରାଜସ୍ଥାନରେ ରହିଛି ବୋଲି ଉଲ୍ଲେଖ କରି ପ୍ରଧାନମନ୍ତ୍ରୀ କହିଥିଲେ ଯେ ଏହି ଖଣିଜସଂପଦ ଆତ୍ମନିର୍ଭର ଭାରତର ଏକ ମଜବୁତ ମୂଳଦୂଆ ଏବଂ ରାଜସ୍ଥାନ ଭାରତର ଶକ୍ତି ନିରାପତ୍ତାରେ ବହୁ ଅବଦାନ ଦେଇଥାଏ । ଏହି ଦଶନ୍ଧି ଶେଷ ସୁଦ୍ଧା ଭାରତ ୫୦୦ ଗିଗାୱାଟ୍ ଅକ୍ଷୟ ଶକ୍ତି କ୍ଷମତା ସୃଷ୍ଟି କରିବାକୁ ଲକ୍ଷ୍ୟ ଧାର୍ଯ୍ୟ କରିଛି ବୋଲି ଉଲ୍ଲେଖ କରି ଶ୍ରୀ ମୋଦୀ କହିଲେ ଯେ ରାଜସ୍ଥାନ ମଧ୍ୟ ଏଥିରେ ଏକ ପ୍ରମୁଖ ଭୂମିକା ଗ୍ରହଣ କରୁଛି ଏବଂ ଭାରତର ଅନେକ ବଡ଼ ବଡ଼ ସୌରପାର୍କ ଏଠାରେ ହିଁ ନିର୍ମାଣ କରାଯାଉଛି ।
ଦେଶର ଅର୍ଥନୀତିର ଦୁଇଟି ପ୍ରମୁଖ କେନ୍ଦ୍ର ଦିଲ୍ଲୀ ଏବଂ ମୁମ୍ବାଇ ଏବଂ ମହାରାଷ୍ଟ୍ର ଏବଂ ଗୁଜରାଟର ବନ୍ଦରଗୁଡ଼ିକୁ ଉତ୍ତର ଭାରତ ସହିତ ରାଜସ୍ଥାନ ସଂଯୋଗ କରିଥାଏ ବୋଲି ଉଲ୍ଲେଖ କରି ଶ୍ରୀ ମୋଦୀ କରିଥିଲେ ଯେ ଦିଲ୍ଲୀ-ମୁମ୍ବାଇ ଶିଳ୍ପ କରିଡରର ୨୫୦ କିଲୋମିଟର ଅଂଶ ରାଜସ୍ଥାନରେ ରହିଛି । ଏହାଦ୍ୱାରା ରାଜସ୍ଥାନର ଅଲୱାର, ଭରତପୁର, ଦୌସା, ସୱାଇ ମାଧୋପୁର, ଟଙ୍କ, ବୁନ୍ଦି ଓ କୋଟା ଜିଲ୍ଲା ବ୍ୟାପକ ଭାବେ ଉପକୃତ ହେବେ। ଡେଡିକେଟେଡ୍ ଫ୍ରେଟ୍ କରିଡର ପରି ଅତ୍ୟାଧୁନିକ ରେଳ ନେଟୱାର୍କର ୩୦୦ କିଲୋମିଟରର ଅଂଶ ରାଜସ୍ଥାନରେ ଥିବା ବିଷୟରେ ଉଲ୍ଲେଖ କରି ଶ୍ରୀ ମୋଦୀ କହିଥିଲେ ଯେ ଏହି କରିଡର ଜୟପୁର, ଆଜମେର, ସିକର, ନାଗୌର ଏବଂ ଅଲୱାର ଜିଲ୍ଲା ଦେଇ ଯାଇଥାଏ । ରାଜସ୍ଥାନ ଏଭଳି ମେଗା କନେକ୍ଟିଭିଟି ପ୍ରକଳ୍ପର କେନ୍ଦ୍ରରେ ରହିଛି ବୋଲି ଆଲୋକପାତ କରି ପ୍ରଧାନମନ୍ତ୍ରୀ କହିଥିଲେ ଯେ ଏହା ପୁଞ୍ଜିନିବେଶ ପାଇଁ ଏକ ଉତ୍କୃଷ୍ଟ ଗନ୍ତବ୍ୟସ୍ଥଳ, ଯେଉଁଠାରେ ବିଶେଷ କରି ଶୁଷ୍କବନ୍ଦର ଏବଂ ଲଜିଷ୍ଟିକ୍ କ୍ଷେତ୍ରରେ ପ୍ରଚୁର ସମ୍ଭାବନା ରହିଛି । ସେ ଆହୁରି ମଧ୍ୟ କହିଛନ୍ତି ଯେ ସରକାର ମଲ୍ଟି ମୋଡାଲ ଲଜିଷ୍ଟିକ୍ ପାର୍କ ବିକଶିତ କରୁଛନ୍ତି, ପ୍ରାୟ ଦୁଇ ଡଜନ କ୍ଷେତ୍ର ନିର୍ଦ୍ଦିଷ୍ଟ ଶିଳ୍ପ ପାର୍କର ବିକାଶ କରୁଛନ୍ତି ଏବଂ ଦୁଇଟି ଏୟାର କାର୍ଗୋ କମ୍ପ୍ଲେକ୍ସ ନିର୍ମାଣ କରୁଛନ୍ତି। ସେ ଆହୁରି ମଧ୍ୟ କହିଛନ୍ତି ଯେ ଏହା ଦ୍ୱାରା ଶିଳ୍ପ ଯୋଗାଯୋଗରେ ଆହୁରି ଉନ୍ନତି ଆସିବ ଏବଂ ରାଜସ୍ଥାନରେ ଶିଳ୍ପ ପ୍ରତିଷ୍ଠା କରିବା ସହଜ ହେବ ।
ଭାରତର ସମୃଦ୍ଧ ଭବିଷ୍ୟତରେ ପର୍ଯ୍ୟଟନର ବିପୁଳ ସମ୍ଭାବନା ଉପରେ ଗୁରୁତ୍ୱାରୋପ କରି ପ୍ରଧାନମନ୍ତ୍ରୀ କହିଥିଲେ କରିଥିଲେ ଯେ ଭାରତରେ ପ୍ରକୃତି, ସଂସ୍କୃତି, ଦୁଃସାହସିକ, ସମ୍ମିଳନୀ, ଡେଷ୍ଟିନେସନ ଓ୍ବେଡିଙ୍ଗ ଏବଂ ଐତିହ୍ୟ ପର୍ଯ୍ୟଟନ ପାଇଁ ପ୍ରଚୁର ସୁଯୋଗ ରହିଛି । ସେ ଆହୁରି ମଧ୍ୟ କହିଛନ୍ତି ଯେ ରାଜସ୍ଥାନ ଭାରତର ପର୍ଯ୍ୟଟନ ମାନଚିତ୍ରରେ ଏକ ପ୍ରମୁଖ କେନ୍ଦ୍ର ହୋଇ ରହିଛି ଏବଂ ଏଠାରେ ଇତିହାସ, ଐତିହ୍ୟ, ବିଶାଳ ମରୁଭୂମି, ଚମତ୍କାର ହ୍ରଦ, ବିବିଧ ସଙ୍ଗୀତ ଏବଂ ଖାଦ୍ୟ ସହିତ ସୁନ୍ଦର ସମନ୍ବୟ ଅଛି, ଯାହା ପର୍ଯ୍ୟଟନ, ଭ୍ରମଣ ଏବଂ ଆତିଥେୟତା ଶିଳ୍ପର ଆବଶ୍ୟକତାକୁ ପୂରଣ କରିବାକୁ ଯଥେଷ୍ଟ । ସେ ଆହୁରି ମଧ୍ୟ କହିଛନ୍ତି ଯେ ରାଜସ୍ଥାନ ବିଶ୍ୱର ସେହି ଅଳ୍ପ କିଛି ସ୍ଥାନ ମଧ୍ୟରୁ ଗୋଟିଏ ଯେଉଁଠାରେ ଲୋକମାନେ ବିବାହ ପାଇଁ ଆସିବାକୁ ଚାହାଁନ୍ତି ଏବଂ ଜୀବନର ମୁହୂର୍ତ୍ତକୁ ସ୍ମରଣୀୟ କରିବାକୁ ଚାହାଁନ୍ତି । ରାଜସ୍ଥାନରେ ବନ୍ୟପ୍ରାଣୀ ପର୍ଯ୍ୟଟନ ପାଇଁ ପର୍ଯ୍ୟାପ୍ତ ସୁଯୋଗ ରହିଛି ବୋଲି ଶ୍ରୀ ମୋଦୀ ଉଲ୍ଲେଖ କରିଥିଲେ ଏବଂ ରଣଥମ୍ବୋର, ସରିସ୍କା, ମୁକୁନ୍ଦରା ପାହାଡ଼, କେଓଲାଦେଓ ଏବଂ ଅନ୍ୟାନ୍ୟ ଅନେକ ସ୍ଥାନ ବିଷୟରେ ଉଲ୍ଲେଖ କରିଥିଲେ ଯାହା ବନ୍ୟପ୍ରାଣୀ ପ୍ରେମୀଙ୍କ ପାଇଁ ଗୋଟିଏ ଗୋଟିଏ ଆକର୍ଷଣୀୟ ସ୍ଥାନଭାବେ ପରିଗଣିତ ହୋଇଥାଏ। ରାଜସ୍ଥାନ ସରକାର ଏହାର ପର୍ଯ୍ୟଟନ ସ୍ଥଳୀ ଏବଂ ଐତିହ୍ୟ କେନ୍ଦ୍ରଗୁଡ଼ିକୁ ଉନ୍ନତ ଯୋଗାଯୋଗ ବ୍ୟବସ୍ଥା ସହିତ ସଂଯୋଗ କରୁଥିବାରୁ ପ୍ରଧାନମନ୍ତ୍ରୀ ଆନନ୍ଦ ପ୍ରକାଶ କରିଥିଲେ । ସେ ଆହୁରି ମଧ୍ୟ କହିଥିଲେ ଯେ ଭାରତ ସରକାର ମଧ୍ୟ ବିଭିନ୍ନ ଥିମ୍ ସର୍କିଟ୍ ସମ୍ବନ୍ଧୀୟ ଯୋଜନା ଆରମ୍ଭ କରିଛନ୍ତି । ସେ କହିଥିଲେ ଯେ ୨୦୦୪ରୁ ୨୦୧୪ ମଧ୍ୟରେ ପାଖାପାଖି ୫ କୋଟି ବିଦେଶୀ ପର୍ଯ୍ୟଟକ ଭାରତକୁ ଆସିଥିବା ବେଳେ ୨୦୧୪ରୁ ୨୦୨୪ ମଧ୍ୟରେ, କୋଭିଡ ଯୋଗୁଁ ୩-୪ ବର୍ଷ ପ୍ରଭାବିତ ହେବା ସତ୍ତ୍ବେ, ୭ କୋଟିରୁ ଅଧିକ ବିଦେଶୀ ପର୍ଯ୍ୟଟକ ଭାରତକୁ ଆସିଥିଲେ । କରୋନା ମହାମାରୀ ସମୟରେ ପର୍ଯ୍ୟଟନ କ୍ଷେତ୍ର ସ୍ଥାଣୁ ହୋଇଯାଇଥିଲେ ମଧ୍ୟ ଭାରତରେ ପର୍ଯ୍ୟଟକଙ୍କ ସଂଖ୍ୟା ଯଥେଷ୍ଟ ବୃଦ୍ଧି ପାଇଛି ବୋଲି ଶ୍ରୀ ମୋଦୀ କହିଥିଲେ। ସେ ଉଲ୍ଲେଖ କରିଥିଲେ ଯେ ଭାରତରେ ଇ-ଭିସା ସୁବିଧା ଅନେକ ଦେଶର ପର୍ଯ୍ୟଟକଙ୍କ ପାଇଁ ସଂପ୍ରସାରିତ ହୋଇଛି, ଯାହା ବିଦେଶୀ ଅତିଥିମାନଙ୍କୁ ବହୁତ ସାହାଯ୍ୟ କରିଛି । ଘରୋଇ ପର୍ଯ୍ୟଟନ କ୍ଷେତ୍ର ମଧ୍ୟ ଆଜି ଭାରତରେ ନୂଆ ନୂଆ ରେକର୍ଡ ସୃଷ୍ଟି କରୁଛି ବୋଲି ଉଲ୍ଲେଖ କରି ପ୍ରଧାନମନ୍ତ୍ରୀ କହିଥିଲେ ଯେ ଉଡ଼ାନ ଯୋଜନା, ବନ୍ଦେ ଭାରତ ଟ୍ରେନ୍, ପ୍ରସାଦ ଯୋଜନା ଭଳି ଯୋଜନାଗୁଡ଼ିକ ଦ୍ୱାରା ରାଜସ୍ଥାନ ଉପକୃତ ହୋଇଛି । ଆହୁରି ମଧ୍ୟ ଭାରତ ସରକାରଙ୍କ ଭାଇବ୍ରେଣ୍ଟ ଭିଲେଜ୍ ଭଳି କାର୍ଯ୍ୟକ୍ରମରୁ ରାଜସ୍ଥାନ ମଧ୍ୟ ଉପକୃତ ହୋଇଛି ବୋଲି ସେ କହିଛନ୍ତି। ଶ୍ରୀ ମୋଦୀ ଦେଶର ନାଗରିକମାନଙ୍କୁ ଭାରତରେ ବିବାହ କରିବାକୁ ନିବେଦନ କରିଛନ୍ତି, ଯାହା ରାଜସ୍ଥାନକୁ ମଧ୍ୟ ଫାଇଦା ଦେବ । ସେ କହିଥିଲେ ଯେ ରାଜସ୍ଥାନର ଐତିହ୍ୟ ପର୍ଯ୍ୟଟନ, ଚଳଚ୍ଚିତ୍ର ପର୍ଯ୍ୟଟନ, ପରିବେଶ ପର୍ଯ୍ୟଟନ, ଗ୍ରାମୀଣ ପର୍ଯ୍ୟଟନ, ସୀମା ପର୍ଯ୍ୟଟନର ସମ୍ପ୍ରସାରଣ ପାଇଁ ପ୍ରଚୁର ସମ୍ଭାବନା ରହିଛି। ଏହି କ୍ଷେତ୍ରଗୁଡ଼ିକରେ ପୁଞ୍ଜିନିବେଶ ରାଜସ୍ଥାନର ପର୍ଯ୍ୟଟନ କ୍ଷେତ୍ରକୁ ସୁଦୃଢ଼ କରିବା ସହ ସେମାନଙ୍କ ବ୍ୟବସାୟ ବୃଦ୍ଧିରେ ମଧ୍ୟ ସହାୟକ ହେବ ବୋଲି ପ୍ରଧାନମନ୍ତ୍ରୀ ନିବେଶକମାନଙ୍କୁ ଅନୁରୋଧ କରିଥିଲେ ।
ବିଶ୍ୱ ଯୋଗାଣ ଏବଂ ମୂଲ୍ୟ ଶୃଙ୍ଖଳା ସହିତ ଜଡିତ ସାମ୍ପ୍ରତିକ ଆହ୍ୱାନଗୁଡ଼ିକ ବିଷୟରେ ଉଲ୍ଲେଖ କରି ପ୍ରଧାନମନ୍ତ୍ରୀ କହିଥିଲେ ଯେ ବିଶ୍ୱକୁ ଏପରି ଏକ ବ୍ୟବସ୍ଥାର ଆବଶ୍ୟକତା ଅଛି ଯାହା ସବୁଠାରୁ ବଡ଼ ସଙ୍କଟ ସମୟରେ ମଧ୍ୟ ନିର୍ବିଘ୍ନ ଏବଂ ନିରବଚ୍ଛିନ୍ନ ଭାବରେ କାର୍ଯ୍ୟ କରିବ । ଏଥିପାଇଁ ଭାରତରେ ଏକ ବୃହତ ଉତ୍ପାଦନ କ୍ଷେତ୍ର ରହିବା ଜରୁରୀ, ଯାହା କେବଳ ଭାରତ ପାଇଁ ନୁହେଁ ବରଂ ବିଶ୍ୱ ଅର୍ଥନୀତି ପାଇଁ ମଧ୍ୟ ଜରୁରୀ ବୋଲି ସେ କହିଛନ୍ତି। ଏହି ଦାୟିତ୍ୱକୁ ଅନୁଭବ କରି ଉତ୍ପାଦନ କ୍ଷେତ୍ରରେ ଆତ୍ମନିର୍ଭରଶୀଳତା ବଜାୟ ରଖିବାକୁ ଭାରତ ସଂକଳ୍ପ ନେଇଛି ବୋଲି ଶ୍ରୀ ମୋଦୀ ଉଲ୍ଲେଖ କରିଛନ୍ତି। ସେ ଆହୁରି ମଧ୍ୟ କହିଛନ୍ତି ଯେ ଭାରତ ଏହାର ମେକ୍ ଇନ୍ ଇଣ୍ଡିଆ କାର୍ଯ୍ୟକ୍ରମ ଅଧୀନରେ ସ୍ୱଳ୍ପ ମୂଲ୍ୟର ଉତ୍ପାଦନ ଉପରେ ଗୁରୁତ୍ୱ ଦେଉଛି ଏବଂ ଭାରତର ପେଟ୍ରୋଲିୟମ ଉତ୍ପାଦ, ଔଷଧ ଏବଂ ଟିକା, ଇଲେକ୍ଟ୍ରୋନିକ୍ସ ସାମଗ୍ରୀ ଏବଂ ରେକର୍ଡ ଉତ୍ପାଦନରୁ ବିଶ୍ୱ ବହୁତ ଉପକୃତ ହୋଇଛି । ଶ୍ରୀ ମୋଦୀ ଉଲ୍ଲେଖ କରିଛନ୍ତି ଯେ ଗତ ଏକ ବର୍ଷ ମଧ୍ୟରେ ରାଜସ୍ଥାନରୁ ପ୍ରାୟ ୮୪,୦୦୦ କୋଟି ଟଙ୍କା ରପ୍ତାନି ହୋଇଛି, ଯେଉଁଥିରେ ଇଞ୍ଜିନିୟରିଂ ସାମଗ୍ରୀ, ରତ୍ନ ଏବଂ ଅଳଙ୍କାର, ବୟନଶିଳ୍ପ, ହସ୍ତଶିଳ୍ପ, କୃଷି ଖାଦ୍ୟ ଉତ୍ପାଦ ଅନ୍ତର୍ଭୁକ୍ତ ।
ଭାରତ ବର୍ଦ୍ଧିଷ୍ଣ ଉତ୍ପାଦନ କ୍ଷେତ୍ରରେ ପିଏଲଆଇ ଯୋଜନାର କ୍ରମାଗତ ବଢୁଥିବା ଭୂମିକା ଉପରେ ଆଲୋକପାତ କରି ପ୍ରଧାନମନ୍ତ୍ରୀ କହିଥିଲେ ଯେ ଆଜି ଇଲେକ୍ଟ୍ରୋନିକ୍ସ, ସ୍ପେଶାଲିଟି ଷ୍ଟିଲ୍, ଅଟୋମୋବାଇଲଏବଂ ଅଟୋ କମ୍ପୋନେଣ୍ଟ, ସୌର ପିଭି, ଫାର୍ମାସ୍ୟୁଟିକାଲ୍ ଡ୍ରଗ୍ସ ଭଳି କ୍ଷେତ୍ରରେ ବହୁତ ଅଭିବୃଦ୍ଧି ପରିଲକ୍ଷିତ ହେଉଛି । ସେ ଆହୁରି ମଧ୍ୟ କହିଛନ୍ତି ଯେ ପିଏଲଆଇ ଯୋଜନାରେ ପ୍ରାୟ ୧.୨୫ ଲକ୍ଷ କୋଟି ଟଙ୍କା ନିବେଶ କରାଯାଇଛି, ପ୍ରାୟ ୧୧ ଲକ୍ଷ କୋଟିର ଉତ୍ପାଦ ଉତ୍ପାଦନ ହେଉଛି ଓ ପ୍ରାୟ ୪ ଲକ୍ଷ କୋଟିର ରପ୍ତାନି ହେଉଛି । ଲକ୍ଷ ଲକ୍ଷ ଯୁବକଯୁବତୀଙ୍କୁ ନୂଆ ନିଯୁକ୍ତି ମିଳିଛି ବୋଲି ସେ ଉଲ୍ଲେଖ କରିଛନ୍ତି। ଇଲେକ୍ଟ୍ରିକ୍ ଯାନ ଉତ୍ପାଦନ ପାଇଁ ବହୁ ସମ୍ଭାବନା ସମେତ ଅଟୋମୋଟିଭ୍ ଏବଂ ଅଟୋ କମ୍ପୋନେଣ୍ଟ ଶିଳ୍ପ ପାଇଁ ମଧ୍ୟ ରାଜସ୍ଥାନ ଏକ ଭଲ କ୍ଷେତ୍ର ସ୍ଥାପନ କରିଛି ବୋଲି ପ୍ରଧାନମନ୍ତ୍ରୀ କହିଥିଲେ । ସେ ଆହୁରି ମଧ୍ୟ କହିଥିଲେ ଯେ ଇଲେକ୍ଟ୍ରୋନିକ୍ସ ଉତ୍ପାଦନ ପାଇଁ ଆବଶ୍ୟକ ଭିତ୍ତିଭୂମି ମଧ୍ୟ ରାଜସ୍ଥାନରେ ଉପଲବ୍ଧ ରହିଛି । ରାଜସ୍ଥାନର ଉତ୍ପାଦନ ସମ୍ଭାବନାର ନିଶ୍ଚିତଭାବେ ସୁଯୋଗ ନେବାକୁ ନିବେଶକମାନଙ୍କୁ ଶ୍ରୀ ମୋଦୀ ଅନୁରୋଧ କରିଛନ୍ତି।
ଉଦୀୟମାନ ରାଜସ୍ଥାନ ଏକ ପ୍ରମୁଖ ଅର୍ଥନୈତିକ ଶକ୍ତି ବୋଲି ଉଲ୍ଲେଖ କରି ପ୍ରଧାନମନ୍ତ୍ରୀ କହିଥିଲେ ଯେ ଏମଏସଏମଇ କ୍ଷେତ୍ରରେ ରାଜସ୍ଥାନ ଭାରତର ଶ୍ରେଷ୍ଠ ୫ଟି ରାଜ୍ୟ ମଧ୍ୟରୁ ଅନ୍ୟତମ । ଏହି ଶିଖର ସମ୍ମିଳନୀରେ ଏମଏସଏମଇ ଉପରେ ଏକ ପୃଥକ ସମ୍ମିଳନୀ ମଧ୍ୟ ଅନୁଷ୍ଠିତ ହେବାକୁ ଯାଉଛି ବୋଲି ସେ କହିଥିଲେ। ଶ୍ରୀ ମୋଦୀ ଉଲ୍ଲେଖ କରିଛନ୍ତି ଯେ ରାଜସ୍ଥାନରେ ୨୭ ଲକ୍ଷରୁ ଅଧିକ ଲଘୁ ଏବଂ କ୍ଷୁଦ୍ର ଉଦ୍ୟୋଗ ରହିଛି, ଯେଉଁଥିରୁ ୫୦ ଲକ୍ଷରୁ ଅଧିକ ଲୋକ କାମ କରନ୍ତି । ଏହି କ୍ଷେତ୍ର ଦ୍ବାରା ରାଜସ୍ଥାନର ଭାଗ୍ୟ ବଦଳିବାର ସମ୍ଭାବନା ରହିଛି ବୋଲି ସେ କହିଛନ୍ତି। ଖୁବ୍ କମ୍ ସମୟ ମଧ୍ୟରେ ସରକାର ନୂଆ ଏମଏସଏମଇ ନୀତି ପ୍ରଣୟନ କରିଥିବାରୁ ଶ୍ରୀ ମୋଦୀ ଖୁସି ବ୍ୟକ୍ତ କରିଥିଲେ। ସେ ଆହୁରି ମଧ୍ୟ କହିଛନ୍ତି ଯେ ଭାରତ ସରକାର ମଧ୍ୟ ନିଜର ନୀତି ଏବଂ ପଦକ୍ଷେପ ମାଧ୍ୟମରେ ଏମଏସଏମଇ କ୍ଷେତ୍ରକୁ କ୍ରମାଗତ ଭାବରେ ସୁଦୃଢ଼ କରୁଛନ୍ତି । ପ୍ରଧାନମନ୍ତ୍ରୀ କହିଥିଲେ ଯେ ଭାରତର ଏମଏସଏମଇଗୁଡ଼ିକ ଭାରତୀୟ ଅର୍ଥନୀତିକୁ ସୁଦୃଢ଼ କରିବା ସହିତ ବିଶ୍ୱ ଯୋଗାଣ ଏବଂ ମୂଲ୍ୟ ଶୃଙ୍ଖଳାକୁ ସୁଦୃଢ଼ କରିବାରେ ଗୁରୁତ୍ୱପୂର୍ଣ୍ଣ ଭୂମିକା ଗ୍ରହଣ କରୁଛନ୍ତି । କୋଭିଡ ମହାମାରୀ ସମୟରେ ଫାର୍ମା ସମ୍ବନ୍ଧୀୟ ଯୋଗାଣ ଶୃଙ୍ଖଳା ସଙ୍କଟକୁ ମନେ ପକାଇ ଶ୍ରୀ ମୋଦୀ ଗୁରୁତ୍ୱାରୋପ କରିଥିଲେ ଯେ ଭାରତର ଫାର୍ମା କ୍ଷେତ୍ର ଏହାର ମଜବୁତ ଭିତ୍ତିଭୂମି ଯୋଗୁଁ ସମଗ୍ର ବିଶ୍ୱକୁ ସାହାଯ୍ୟ କରୁଛି । ସେହିଭଳି ଅନ୍ୟାନ୍ୟ ସାମଗ୍ରୀ ଉତ୍ପାଦନ କ୍ଷେତ୍ରରେ ବି ଭାରତକୁ ଏକ ମଜଭୁତ ଉତ୍ପାଦନ କେନ୍ଦ୍ରରେ ପରିଣତ କରିବାକୁ ସେ ନିବେଦନ କରିଥିଲେ ଓ କହିଥିଲେ ଯେ ଆମର ଏମଏସଏମଇଗୁଡ଼ିକ ଏଥିରେ ପ୍ରମୁଖ ଭୂମିକା ଗ୍ରହଣ କରିବେ ।
ଏମଏସଏମଇର ସଂଜ୍ଞା ବଦଳାଇବା ପାଇଁ ସରକାରଙ୍କ ପ୍ରୟାସ, ଯଦ୍ବାରା ଏହି କ୍ଷେତ୍ର ଅଭିବୃଦ୍ଧି ପାଇଁ ଅଧିକ ସୁଯୋଗ ପାଇବ, ସେ ବିଷୟରେ ଉଲ୍ଲେଖ କରି ଶ୍ରୀ ମୋଦୀ କହିଥିଲେ ଯେ କେନ୍ଦ୍ର ସରକାର ପ୍ରାୟ ୫ କୋଟି ଏମଏସଏମଇକୁ ଆନୁଷ୍ଠାନିକ ଅର୍ଥନୀତି ସହିତ ଯୋଡ଼ିଛନ୍ତି ଏବଂ ସେମାନଙ୍କ ଋଣ ଉପଲବ୍ଧତାକୁ ସହଜ କରିଛନ୍ତି । ସରକାର ଏକ କ୍ରେଡିଟ୍ ଲିଙ୍କଡ ଗ୍ୟାରେଣ୍ଟି ସ୍କିମ୍ ଆରମ୍ଭ କରିଥିବା କଥା ଉଲ୍ଲେଖ କରି ପ୍ରଧାନମନ୍ତ୍ରୀ କହିଥିଲେ ଯେ ଏହି ଯୋଜନା ଅଧୀନରେ କ୍ଷୁଦ୍ର ଶିଳ୍ପଗୁଡ଼ିକ ପ୍ରାୟ ୭ ଲକ୍ଷ କୋଟିର ସହାୟତା ପାଇଛନ୍ତି। ଗତ ଏକ ଦଶନ୍ଧି ମଧ୍ୟରେ ଏମଏସଏମଇଗୁଡ଼ିକୁ ଋଣ ପ୍ରବାହ ଦ୍ୱିଗୁଣିତ ହୋଇଛି ବୋଲି ଉଲ୍ଲେଖ କରି ଶ୍ରୀ ମୋଦୀ କହିଥିଲେ ଯେ ୨୦୧୪ରେ ଏହା ପାଖାପାଖି ୧୦ ଲକ୍ଷ କୋଟି ଟଙ୍କା ଥିଲା, କିନ୍ତୁ ଏବେ ଏହା ୨୨ ଲକ୍ଷ କୋଟିରୁ ଅଧିକକୁ ବୃଦ୍ଧି ପାଇଛି । ସେ ଆହୁରି ମଧ୍ୟ କହିଛନ୍ତି ଯେ ରାଜସ୍ଥାନ ମଧ୍ୟ ଏଥିରୁ ବହୁତ ଉପକୃତ ହୋଇଛି ଏବଂ ଏମଏସଏମଇର ଏହି ବଢୁଥିବା ଶକ୍ତି ରାଜସ୍ଥାନର ବିକାଶକୁ ନୂତନ ଉଚ୍ଚତାକୁ ନେଇଯିବ ।
“ଆମେ ଆତ୍ମନିର୍ଭର ଭାରତର ଏକ ନୂତନ ଯାତ୍ରା ଆରମ୍ଭ କରିଛୁ,” ପ୍ରଧାନମନ୍ତ୍ରୀ କହିଥିଲେ । ସେ ଆହୁରିମଧ୍ୟ କହିଥିଲେ ଯେ ଆତ୍ମନିର୍ଭର ଭାରତ ଅଭିଯାନର ଲକ୍ଷ୍ୟ ବିଶ୍ୱସ୍ତରୀୟ ଥିଲା ଏବଂ ଏହାର ପ୍ରଭାବ ମଧ୍ୟ ବିଶ୍ୱସ୍ତରୀୟ ହୋଇଛି । ସାମଗ୍ରିକ ସରକାରୀ ଆଭିମୁଖ୍ୟ ସହିତ ଏହି ଅଭିଯାନକୁ ଆଗେଇ ନିଆଯାଉଛି ବୋଲି ଶ୍ରୀ ମୋଦୀ ଉଲ୍ଲେଖ କରିଥିଲେ । ସେ ଆହୁରି ମଧ୍ୟ କହିଛନ୍ତି ଯେ ଶିଳ୍ପ ଏବଂ ଉତ୍ପାଦନ ଅଭିବୃଦ୍ଧି ପାଇଁ ସରକାର ପ୍ରତ୍ୟେକ କ୍ଷେତ୍ର ଏବଂ ପ୍ରତ୍ୟେକ ଘଟକକୁ ପ୍ରୋତ୍ସାହିତ କରୁଛନ୍ତି। ସବ୍ କା ପ୍ରୟାସ ( ସମସ୍ତଙ୍କ ଉଦ୍ୟମ)ର ଏହି ଭାବନା ଏକ ବିକଶିତ ରାଜସ୍ଥାନ ଏବଂ ଏକ ବିକଶିତ ଭାରତ ଗଠନ କରିବ ବୋଲି ଶ୍ରୀ ମୋଦୀ ବିଶ୍ୱାସ ବ୍ୟକ୍ତ କରିଥିଲେ।
ନିଜର ଅଭିଭାଷଣ ଶେଷ କରି ଶ୍ରୀ ମୋଦୀ ସମସ୍ତ ନିବେଶକଙ୍କୁ ରାଇଜିଂ ରାଜସ୍ଥାନର ସଂକଳ୍ପ ନେବାକୁ ନିବେଦନ କରିଥିଲେ। ସେ ଅନ୍ତର୍ଜାତୀୟ ପ୍ରତିନିଧିମାନଙ୍କୁ ରାଜସ୍ଥାନ ଏବଂ ଭାରତ ଗସ୍ତ କରିବାକୁ ଅନୁରୋଧ କରିଥିଲେ ଯାହା ସେମାନଙ୍କ ପାଇଁ ଏକ ଅବିସ୍ମରଣୀୟ ଅନୁଭୂତି ହେବ ବୋଲି ସେ ଆଶା ବ୍ୟକ୍ତ କରିଥିଲେ।
ଏହି ଅବସରରେ ରାଜସ୍ଥାନ ରାଜ୍ୟପାଳ ଶ୍ରୀ ହରିଭାଉ କିଷାନରାଓ ବାଗଡେ, ରାଜସ୍ଥାନ ମୁଖ୍ୟମନ୍ତ୍ରୀ ଭଜନଲାଲ ଶର୍ମା, ମନ୍ତ୍ରୀ, ସାଂସଦ, ବିଧାୟକ, ଶିଳ୍ପପତି ଏବଂ ଅନ୍ୟାନ୍ୟ ମାନ୍ୟଗଣ୍ୟ ବ୍ୟକ୍ତି ଉପସ୍ଥିତ ଥିଲେ।
ପୃଷ୍ଠଭୂମି:
ଚଳିତ ବର୍ଷ ଡିସେମ୍ବର ୯ରୁ ୧୧ ତାରିଖ ପର୍ଯ୍ୟନ୍ତ ହେବାକୁ ଥିବା ଏହି ନିବେଶ ସମ୍ମିଳନୀର ବିଷୟବସ୍ତୁ ‘ରିପ୍ଲେଟ, ରେସପନ୍ସିବଲ, ରେଡି’ ରଖାଯାଇଛି। ଏହି ସମ୍ମିଳନୀରେ ଜଳ ନିରାପତ୍ତା, ସ୍ଥାୟୀ ଖଣି, ସ୍ଥାୟୀ ଋଣ, ଅନ୍ତର୍ଭୁକ୍ତ ପର୍ଯ୍ୟଟନ, କୃଷି ବ୍ୟବସାୟରେ ଉଦ୍ଭାବନ ଏବଂ ମହିଳାଙ୍କ ଦ୍ବାରା ପରିଚାଳିତ ଷ୍ଟାର୍ଟଅପ୍ ଭଳି ୧୨ଟି କ୍ଷେତ୍ର ସଂପର୍କିତ ବିଷୟ ଉପରେ ଆଲୋଚନା ହେବ।
ଏହି ସମ୍ମିଳନୀରେ ଅଂଶଗ୍ରହଣକାରୀ ଦେଶମାନଙ୍କ ସହିତ ‘ବାସଯୋଗ୍ୟ ସହରପାଇଁ ଜଳ ପରିଚାଳନା’, ‘ଶିଳ୍ପର ବିବିଧତା – ଉତ୍ପାଦନ ଏବଂ ଅନ୍ୟାନ୍ୟ’ ଏବଂ ‘ବାଣିଜ୍ୟ ଓ ପର୍ଯ୍ୟଟନ’ ଭଳି ବିଷୟଉପରେ ଆଠଟି କଣ୍ଟ୍ରି ସେସନ ଅନୁଷ୍ଠିତ ହେବ।
ପ୍ରବାସୀ ରାଜସ୍ଥାନୀ ସମ୍ମିଳନୀ ଏବଂ ଏମଏସଏମଇ ସମ୍ମିଳନୀ ମଧ୍ୟ ତିନିଦିନରେ ଅନୁଷ୍ଠିତ ହେବ। ରାଜସ୍ଥାନ ଗ୍ଲୋବାଲ ବିଜନେସ୍ ଏକ୍ସପୋରେ ରାଜସ୍ଥାନ ପ୍ୟାଭିଲିୟନ୍, କଣ୍ଟ୍ରି ପ୍ୟାଭିଲିୟନ୍, ଷ୍ଟାର୍ଟଅପ୍ ପ୍ୟାଭିଲିୟନ୍ ଭଳି ବିଷୟଭିତ୍ତିକ ପ୍ୟାଭିଲିୟନ ସାମିଲ ହୋଇଛି। ଏହି ଶିଖର ସମ୍ମିଳନୀରେ ୧୬ଟି ଅଂଶୀଦାର ଦେଶ ଏବଂ ୨୦ଟି ଅନ୍ତର୍ଜାତୀୟ ସଂଗଠନ ସମେତ ୩୨ରୁ ଅଧିକ ଦେଶ ଅଂଶଗ୍ରହଣ କରୁଛନ୍ତି।
