ଭୁବନେଶ୍ୱର: ୮ଗୋଟି କେନ୍ଦ୍ରୀୟ ଶ୍ରମିକ ସଂଗଠନ ପକ୍ଷରୁ ଆସନ୍ତା ଫେବୃୟାରୀ ୨୩ ଓ ୨୪ ଦେଶବ୍ୟାପୀ ସାଧାରଣ ଧର୍ମଘଟକୁ ସଫଳ କରିବା ପାଇଁ ସ୍ଥାନୀୟ ଆଇଏନ୍ଟିୟୁସି କାର୍ଯ୍ୟାଳୟ ପରିସରରେ ଅନୁଷ୍ଠିତ ଏକ ରାଜ୍ୟସ୍ତରୀୟ ସମ୍ମିଳନୀରେ ଶ୍ରମିକନେତାମାନେ ଆହ୍ୱାନ ଦେଇଛନ୍ତି। ବିଜେପି ନେତୃତ୍ୱାଧୀନ ସରକାର ଯେଭଳି ଶ୍ରମିକ ବିରୋଧୀ, କୃଷକ ବିରୋଧୀ, ଜନବିରୋଧୀ ଓ କର୍ପୋରେଟ ସପକ୍ଷବାଦୀ ଧ୍ୱଂସକାରୀ ନୀତି ଚଳାଇଛନ୍ତି, ତାହାକୁ ବନ୍ଦ କରିବା ପାଇଁ ଆସନ୍ତା ଫେବୃୟାରୀ ୨୩ ଓ ୨୪ ଦୁଇଦିନ ଧରି ସାଧାରଣ ଧର୍ମଘଟ ଅନୁଷ୍ଠିତ ହେବା ପାଇଁ ନିଷ୍ପତ୍ତି ନିଆଯାଇଛି।
ଏହି ସମ୍ମିଳନୀରେ ଭିତ୍ତିପତ୍ର ଉପସ୍ଥାପନ କରି ଆଇଏନ୍ଟିୟୁସିର ସଭାପତି ଓ ପୂର୍ବତନ ସାଂସଦ ରାମଚନ୍ଦ୍ର ଖୁଣ୍ଟିଆ କହିଲେ ଯେ, ମୋଦି ସରକାରଙ୍କ ନୀତିଯୋଗୁ ଦେଶବାସୀଙ୍କର ଜୀବନ ଜୀବିକା ଏବଂ ଦେଶର ଅର୍ଥନୀତି ଧ୍ୱଂସମୁଖୀ ହୋଇଛି। ଆସନ୍ତା ସାଧାରଣ ଧର୍ମଘଟ ଜନଗଣଙ୍କର ଅଧିକାର କିମ୍ବା ଜୀବନ ଜୀବିକାର ସୁରକ୍ଷା ପାଇଁ ଉଦ୍ଦିଷ୍ଟ ନୁହେଁ, ବରଂ ଦେଶର ଅର୍ଥନୀତି, ଦେଶର ଗଣତାନ୍ତ୍ରିକ ବ୍ୟବସ୍ଥା ଏବଂ ସାମଗ୍ରିକ ଭାବେ ସମାଜକୁ ରକ୍ଷା କରିବାକୁ ଉଦ୍ଦିଷ୍ଟ।
ସିଆଇଟିୟୁ ସଭାପତି ସାଥୀ ଜନାର୍ଦ୍ଦନ ପତି ତାଙ୍କ ବକ୍ତବ୍ୟରେ କହିଲେ ଯେ, ଦେଶର ଅନ୍ନଦାତା କୃଷକମାନେ ଆକ୍ରମଣରୁ ବାଦ୍ ପଡ଼ିନାହାଁନ୍ତି। ଦୀର୍ଘ ଏକବର୍ଷ ଧରି କୃଷକମାନେ ଯେଉଁ ଲଗାତର ଆନ୍ଦୋଳନ ଚଳାଇଲେ, ଏଥିପ୍ରତି ସମସ୍ତ ଶ୍ରମିକଶ୍ରେଣୀଙ୍କ ଓ ବିଜେପି ଦଳକୁ ଛାଡ଼ି ସମସ୍ତ ରାଜନୈତିକ ଦଳମାନେ ଯେପରି ସମର୍ଥନ ଜ୍ଞାପନ କଲେ, ମୋଦି ବାଧ୍ୟ ହୋଇ ତିନିକଳା କୃଷି ଆଇନକୁ ପ୍ରତ୍ୟାହାର କଲେ। ତେଣୁ ଆଗାମୀ ୨୩ ଓ ୨୪ ସାଧାରଣ ଧର୍ମଘଟରେ କୃଷକ ସଂଗଠନଗୁଡ଼ିକୁ ଶ୍ରମିକ ଆନ୍ଦୋଳନରେ ସାମିଲ କରି ଧର୍ମଘଟକୁ ସଫଳ କରିବା ପାଇଁ ସେ ଆହ୍ୱାନ ଦେଇଥିଲେ।
ଏହି ସମ୍ମିଳନୀରେ ୧୨ଦଫା ଦାବିକୁ ନେଇ ପ୍ରସ୍ତାବ ପାରିତ ହୋଇଥିଲା ଯାହାକି ଚାରୋଟି ଶ୍ରମକୋଡକୁ ବାତିଲ୍, କୃଷି ଆଇନ ବାତିଲ ପରବର୍ତ୍ତୀ ସଂଯୁକ୍ତ କିଷାନ ମୋର୍ଚ୍ଚାର ୬ ଦଫା ଦାବିକୁ ଗ୍ରହଣ, ଘରୋଇକରଣ ବନ୍ଦ କରିବା ସହ ଜାତୀୟ ସମ୍ପଦ ମୁଦ୍ରାକରଣ ଯୋଜନା (ଏମ୍.ଏନ୍.ପି.) ବାତିଲ୍, ମନରେଗା କାର୍ଯ୍ୟଦିବସ ବୃଦ୍ଧି ସହ ସହରାଞ୍ଚଳକୁ ନିଶ୍ଚିତ ରୋଜଗାର ଯୋଜନା ବିସ୍ତାରିତ କରିବା, ସ୍କିମ୍ ଶ୍ରମିକମାନଙ୍କୁ ସର୍ବନିମ୍ନ ମଜୁରୀ ଓ ଶ୍ରମିକର ମାନ୍ୟତା ସହ ସାମାଜିକ ସୁରକ୍ଷା ପ୍ରଦାନ, କୋଭିଡ଼ ମହାମାରୀ ସମୟରେ ଆଗଧାଡ଼ିର ଶ୍ରମିକମାନଙ୍କୁ ସୁରକ୍ଷା ଓ ବୀମା ବ୍ୟବସ୍ଥା, ଠିକାଶ୍ରମିକମାନଙ୍କୁ ସ୍ଥାୟୀ କରିବା ଏବଂ ସମସ୍ତଙ୍କ ପାଇଁ ସମାନ କାମକୁ ସମାନ ମଜୁରୀ ନୀତି ଲାଗୁ କରିବା ଆଦି ଦାବିକୁ ଅଂଶଗ୍ରହଣ କରିଥିବା ସାଥୀମାନେ ଦାବି କରିଥିଲେ।
ଏହି ସମ୍ମିଳନୀରେ ଏଆଇସିସିଟିୟୁର ସାଧାରଣ ସମ୍ପାଦକ ମହେନ୍ଦ୍ର ପରିଡ଼ା ସ୍ୱାଗତ ଭାଷଣ ଦେଇଥିବା ବେଳେ ଆଇଏନ୍ଟିୟୁସିର ମଦନ ମୋହନ ଧଳ, ଏଆଇଟିୟୁସି ନେତା ନାରାୟଣ ରେଡ଼ି, ଏଚ୍ଏମ୍ଏସ୍ର ଯୁଗଳ ନାୟକ, ଏଆଇୟୁଟିୟୁସିର ପୂର୍ଣ୍ଣଚନ୍ଦ୍ର ବେହେରା, ଟିୟୁସିିିସିର ଜ୍ୟୋତି ରଞ୍ଜନ ମହାପାତ୍ର, ଏଲ୍ପିଏଫ୍ର ମନୋରଞ୍ଜନ ମହାରଣା ପ୍ରମୁଖଙ୍କୁ ନେଇଏକ ସଭାପତି ମଣ୍ଡଳୀ ଗଠନ କରାଯାଇଥିଲା। ଏଆଇଟିୟୁସିର ନେତା ଜୟନ୍ତ ଦାସ, ଏଚ୍ଏମ୍ଏସ୍ର କୃଷ୍ଣଚନ୍ଦ୍ର ମହାପାତ୍ର, ସିଆଇଟିୟୁର ଦୁଷ୍ମନ୍ତ ଦାସ, ଏଆଇଟିୟୁସି ନେତା ଜୟସେନ ମେହେର, ଏଆଇସିସିଟିୟୁ ନେତା ରାଧାକାନ୍ତ ସେଠି, ଟିୟୁସିସିର ନାରାୟଣ ଡ଼ାଳୁଆ, ଏଲ୍ପିଏଫ୍ର ବୀରେନ୍ଦ୍ର ପ୍ରସାଦ ଦାସ ପ୍ରମୁଖ ଉପସ୍ଥିତ ରହି ଆଗାମୀ ଫେବୃୟାରୀ ୨୩ ଓ ୨୪ ସାଧାରଣ ଧର୍ମଘଟକୁ ସଫଳ କରିବା ପାଇଁ ଆହ୍ୱାନ ଦେଇଥିବା ବେଳେ ଜିଲ୍ଲା ଓ ଶିଳ୍ପାଞ୍ଚଳ ଅଞ୍ଚଳମାନଙ୍କରେ ଧର୍ମଘଟକୁ ସଫଳ କରିବା ପାଇଁ ବ୍ୟାପକ ଅଭିଯାନ ଚାଲୁ ରଖିବା ପାଇଁ ନାରୀନେତ୍ରୀ ପୁଷ୍ପା ଦାସ ଓ ସଂଯୁକ୍ତା ମହଲ ମତପ୍ରକାଶ କରିଥିଲେ।
