The Samikhsya Odia
ଭୁବନେଶ୍ବର: ଆସନ୍ତାକାଲି ଓଡିଶା ପାଇଁ ଏକ ଖୁସିର ଖବର। କାରଣ ଆସନ୍ତାକାଲି ଓଡିଶାର ଆରମ୍ଭ ହେବ 5ଜି ସେବା। ଏହି 5ଜି ହେଉଛି ମୋବାଇଲ ସେବାର ସବୁଠାରୁ ହାଇସ୍ପିଡ ସେବା। ଏହାକୁ କେନ୍ଦ୍ର ରେଳ ଓ ଯୋଗାଯୋଗ ମନ୍ତ୍ରୀ ଅଶ୍ବନୀ ବୈଷ୍ଣବ ଏହାର ଉଦଘାଟନ କରିବେ। ଦେଶରେ ବିଭିନ୍ନ ସ୍ଥାନରେ ଏହି ସେବା ଆରମ୍ଭ ହୋଇଥିବା ବେଳେ ଓଡିଶାରେ ଆରମ୍ଭ ହୋଇ ନ ଥିଲା।
ଏହି ଉତ୍ସବ ପାଇଁ ଭୁବନେଶ୍ବରର ସୋଆ ପ୍ରେକ୍ଷାଳୟରେ ଆୟୋଜନ କରାଯାଇଛି। ଏଥିରେ କେନ୍ଦ୍ରମନ୍ତ୍ରୀ ଅଶ୍ବନୀ ବୈଷ୍ଣବଙ୍କ ସହିତ ଧର୍ମେନ୍ଦ୍ର ପ୍ରଧାନ ମଧ୍ୟ ଯୋଗ ଦେବେ। ଆସନ୍ତାକାଲି ଦିନ 9 ଟା 30 ରେ ଏହି ଉଦଘାଟନର ସମୟ ରଖାଯାଇଛି।
ଭୁବନେଶ୍ୱର: ରିଲାଏନ୍ସ ଜିଓ ଏଭଳି କିଛି ୫ଜି ସମାଧାନ ବିକାଶ କରିଛି ଯାହା ଗ୍ରାମୀଣ ଭାରତର ରୂପରେଖ ବଦଳାଇବାର କ୍ଷମତା ରଖିଛି। ଏହି ୫ଜି ସମାଧାନଗୁଡ଼ିକ ଚାଷବାସଠାରୁ ଆରମ୍ଭ କରି ପଶୁପାଳନ ପର୍ଯ୍ୟନ୍ତ ସବୁ କିଛିର ବ୍ୟବସ୍ଥାରେ ବ୍ୟାପକ ପରିବର୍ତନ ଆଣିବ। ରିଲାଏନ୍ସ ଇଣ୍ଡଷ୍ଟ୍ରିଜ୍ର ଅଧ୍ୟକ୍ଷ ମୁକେଶ ଅମ୍ବାନି ୫ଜି ପ୍ରଯୁକ୍ତିକୁ କାମଧେନୁ ଭାବରେ ଅଭିହିତ କରିଛନ୍ତି। ଏହା ଏଭଳି ଏକ ପ୍ରଯୁକ୍ତି ଯାହା ସହର ସହିତ ଗ୍ରାମାଚଂଳ ପାଇଁ ମଧ୍ୟ ବରଦାନ ସାବ୍ୟସ୍ତ ହେବ।
ନିକଟରେ ଲମ୍ପି ରୋଗ ଯୋଗୁଁ ହଜାର ହଜାର ପଶୁଙ୍କ ମୃତ୍ୟୁ ହୋଇଥିଲା। ସେହି ସମୟରେ ଏଭଳି ଏକ ଉତ୍ପାଦ ଆବଶ୍ୟକ ହେଉଥିଲା ଯାହା ପଶୁମାନଙ୍କ ରୋଗ ବିଷୟରେ ଆଗ୍ରୁଆ ସୂଚନା ଦେଇପାରିବ। “ଜିଓ ଗୋ ସମୃଦ୍ଧି’ ନାମରେ ରିଲାଏନ୍ସ ଜିଓ ପକ୍ଷରୁ ଏକ ୫ଜି କନେକ୍ଟେଡ୍ ଡିଭାଇସ୍ର ବିକାଶ କରାଯାଇଛି। ପାଂଚ ବର୍ଷ ପର୍ଯ୍ୟନ୍ତ କାମ କରିପାରୁଥିବା ଏହି ୪ ଇଂଚ୍ର ଡିଭାଇସ୍କୁ କେବଳ ପଶୁମାନଙ୍କ ବେକରେ ଘଂଟି ଭଳି ବାନ୍ଧିବାକୁ ହେବ। ଏହା ପରେ ଡିଭାଇସ୍ ସବୁ କାମ କରିବ। ଦେଶରେ ଦୁଗ୍ଧ ପ୍ରଦାନ କରୁଥିବା ପ୍ରାୟ ୩୦ କୋଟି ପଶୁମାନଙ୍କ ଉପରେ କେବଳ ୫ଜି ସ୍ପିଡ୍ ଜରିଆରେ ଏକସଙ୍ଗେ ନଜର ରଖାଯାଇପାରିବ।
ପଶୁ କେତେବେଳେ ଖାଦ୍ୟ ଖାଇଲେ, କେତେ ବେଳେ ପାଣି ପିଇଲେ, କେତେବେଳେ ପାକୁଳି କଲେ ଭଳି ମହତ୍ୱପୂର୍ଣ୍ଣ ସୂଚନାକୁ ପଶୁପାଳନମାନଙ୍କୁ ଏହି ଡିଭାଇସ୍ ପ୍ରଦାନ କରିବ। ସବୁ ପଶୁପାଳକ ଏହା ଜାଣନ୍ତି ଯେ ରୋଗଗ୍ରସ୍ତ ହେବା ପୂର୍ବରୁ ପଶୁମାନେ ପାକୁଳି କରିବା କମ୍ କରନ୍ତି କିମ୍ବା ବନ୍ଦ କରିଦିଅନ୍ତି। ପାକୁଳି କମ୍ କରିବା କିମ୍ବା ବନ୍ଦ କରିବା ସମ୍ପର୍କରେ ଏହି ଡିଭାଇସ୍ ସତର୍କ ସୂଚନା ଜାରି କରିବ। ଏହି ଡିଭାଇସ୍ ପଶୁଙ୍କ ଗର୍ଭଧାରଣର ସଠିକ୍ ସମୟ ମଧ୍ୟ ଜଣାଇବ।
ଚାଷ ଜମି ଓ ମୃତିକା ସ୍ୱାସ୍ଥ୍ୟର ମଧ୍ୟ ଜିଓର କୃଷି ୫ଜି ଡିଭାଇସ୍ ଯତ୍ନ ନେବ। କେତେ ପରିମାଣର ବର୍ଷା ହୋଇଛି ଓ ମାଟି ତଥା ପରିବେଶରେ ଆର୍ଦ୍ରତା କିଭଳି ରହିଛି ଏବଂ ଅତ୍ୟଧିକ ଗରମ ଭଳି ସୂଚନା ଏହି ଡିଭାଇସ୍ ବାସ୍ତବ ସମୟ ଭିତରେ ଚାଷୀଙ୍କୁ ପ୍ରଦାନ କରିବ। ଏକ ସ୍ୱତନ୍ତ୍ର ପାଣିପାଗ ପରିସ୍ଥିତିରେ କେଉଁଭଳି କୀଟ ଫସଲ ଉପରେ ଆକ୍ରମଣ କରିବା ଆଶଙ୍କା ରହିଛି ତାହାର ସତର୍କ ସୂଚନା ମଧ୍ୟ ଏହି ଡିଭାଇସ୍ ପ୍ରଦାନ କରିବ।
ଜିଓ ଏଭଳି ଡ୍ରୋନ୍ ସମାଧାନ ପ୍ରସ୍ତୁତ କରିଛି ଯେଉଁଥିରେ ୫ଜିର ସଂଯୋଗ ରହିଛି। ଏହି ଡ୍ରୋନ୍ ଜିଓ-କୃଷି ଡିଭାଇସ୍ରୁ ତଥ୍ୟ ସଂଗ୍ରହ କରି ଫସଲରେ କୀଟ ଲାଗିବା ପୂର୍ବରୁ ଔଷଧ ସିଂଚନ କରିବ। ସବୁ ପ୍ରକାର ସତର୍କତା ଅବଲମ୍ବନ କରିବା ସତ୍ୱେ ଯଦି ଫସଲରେ କୀଟ ଲାଗିବ ତେବେ ଏହି ବୁଦ୍ଧିମାନ ଡ୍ରୋନ୍ କେବଳ କୀଟ ଲାଗିଥିବା ସ୍ଥାନରେ ଔଷଧ ସିଂଚନ କରିବ। ମାଟି ଭଲ ରହିଲେ ଫସଲ ମଧ୍ୟ ବଢ଼ିଆ ହେବ ଏବଂ ଗାଁ ସମୃଦ୍ଧ ହୋଇପାରିବ।
ଭୁବନେଶ୍ବର: ବର୍ତ୍ତମାନ ସାଇବର ଅପରାଧୀଙ୍କ ତରିକା ଦିନକୁ ଦିନ ବଦଳିବାରେ ଲାଗିଛି। ବଜାରକୁ ଅନୁଧ୍ୟାନ କରି ସେମାନେ ଏହି ତରିକା ପରିବର୍ତ୍ତନ କରିବାରେ ଲାଗିଛି। ଏବେ ସାରା ଭାରତରେ ୫ଜି ସେବାକୁ ନେଇ ଚର୍ଚ୍ଚା ଚାଲିଛି। ଲୋକମାନେ ଏହି ସେବାକୁ ହାସଲ କରିବା ପାଇଁ ଆଗ୍ରହର ସହକାରେ ଅଛନ୍ତି। ଏହିପରି ଏକ ସମୟରେ ସାଇବର ଅପରାଧୀ ଲୋକଙ୍କୁ ଠକିବା ଆରମ୍ଭ କରିଦେଇଛନ୍ତି।
ସେମାନେ ଆପଣଙ୍କ ମୋବାଇଲକୁ କଲ କରି କୌଣସି ଏକ ଟେଲିକମ କଂପାନୀରୁ କହୁଛି ବୋଲି ପରିଚୟ ଦେଉଛନ୍ତି। ଏହାପରେ ସେମାନେ ଆରମ୍ଭ କରିଦେଉଛନ୍ତି ତାଙ୍କର କଳା କାରବାର। ସେମାନେ ଆପଣଙ୍କୁ କହିବେ ଯେ, ଆପଣଙ୍କର ୪ଜି ସିମକୁ ୫ଜି କୁ ପରିବର୍ତ୍ତନ କରିବାକୁ ଚାହୁଁଛନ୍ତି କି? ଆପଣ ଖୁସିରେ ୫ଜି ସେବା ନେବା ପାଇଁ ହଁ କରିବେ। ତେବେ ପଚାରିବେ କେତେ ପଇସା ପଡିବ।
ତେବେ ସେମାନେ କହିବେ ଯେ, ବର୍ତ୍ତମାନ ଏହି ସେବା ବର୍ତ୍ତମାନ ଆରମ୍ଭ ହେଉଥିବାରୁ କଂପାନୀ ତରଫରୁ ମାଗଣା ୫ଜି ଆକ୍ଟିଭେଟ କରାଯାଉଛି। ଏହା ଶୁଣିବା ପରେ ଆପଣଙ୍କର ଖୁସି କହିଲେ ନ ସରେ। ଏହାପରେ ସେମାନେ କିପରି ୫ଜି ଆକ୍ଚିଭେଟ ହେବ ତାହା କହିବ। ଶେଷରେ କହିବେ ଆପଣଙ୍କ ମୋବାଇଲକୁ ଏକ ଓଟିପି ଗଲା, ତାହା କେତେ ବୋଲି ପଚାରିବେ।
ସେହି ଓଟିପିଟି ଦେବା ପରେ କଥା ସରିଲା। ଆପଣଙ୍କ ସେହି ନମ୍ବରରେ ଯେଉଁ ସବୁ ବ୍ୟାଙ୍କ ଆକାଉଣ୍ଟ ଲିଙ୍କ ଥିବା ସେଥିରୁ ସାଇବର ଅପରାଧୀମାନେ ଟଙ୍କା ଖାଲି କରିଦେବେ। ଆପଣ ଶେଷରେ ମୁଣ୍ଡପିଟିବା ଛଡା ଆଉ କିଛି ହେବ ନାହିଁ। ପରେ ଆପଣ ସାଇବର ପୋଲିସକୁ ଏହି ଖବର ଦେବେ, ଏହାର ଅନୁସନ୍ଦାନ ହେବ। ହେଲେ ଟଙ୍କା ମିଳିବ କି ନାହିଁ ତାହା କହି ହେବ ନାହିଁ।
ସାଇବର ଠକଙ୍କର ଏପରି କୌଶଳ ନେଇ ବିଭିନ୍ନ ରାଜ୍ୟ ପୋଲିସ ପାଇଁ ମୁଣ୍ଡବଥା ଆରମ୍ଭ ହୋଇଯାଇଛି। ଏହି ସଂଖ୍ୟା ଧିରେ ଧିରେ ବଢୁଥିବାରୁ ପୂର୍ବରୁ ସଚେତନ କରିବା ପାଇଁ ପୋଲିସ ତରଫରୁ ପଦକ୍ଷେପ ମଧ୍ୟ ଆରମ୍ଭ ହୋଇଛି। ସେଥିପାଇଁ ଏପରି ଠକ ପ୍ରତି ସମସ୍ତେ ସଜାଗ ହେବାର ଆବଶ୍ୟକତା ରହିଛି।
ମୁମ୍ବାଇ / ଭୁବନେଶ୍ୱର: ଭାରତର ସର୍ବବୃହତ ଡିଜିଟାଲ ସେବା ଯୋଗାଣକାରୀ ଜିଓ, ଭାରତ ସରକାରଙ୍କ ଦୂରସଂଚାର ବିଭାଗ ଦ୍ୱାରା ପରିଚାଳିତ ନିଲାମରେ ଭାଗନେଇଥିଲା। ଏଥିରେ କଂପାନୀ ୨୦୨୨ ଅଗଷ୍ଟ ୧ ତାରିଖରେ ୭୦୦ ମେଗାହର୍ଜ, ୮୦୦ ମେଗାହର୍ଜ, ୧୮୦୦ ମେଗାହର୍ଜ, ୩୩୦୦ ମେଗାହର୍ଜ ଏବଂ ୨୬ ଗିଗାହର୍ଜ ବ୍ୟାଣ୍ଡରେ ସର୍ବାଧିକ ସ୍ପେକ୍ଟ୍ରମ ଅଧିଗ୍ରହଣ ଘୋଷଣା କରିଛି ।
ଜିଓ ପକ୍ଷରୁ ଉପରୋକ୍ତ ସ୍ପେକ୍ଟ୍ରମର ୨୦ ବର୍ଷ ନିମନ୍ତେ ବ୍ୟବହାର ଅଧିକାର ହାସଲ ଲାଗି ୮୮,୦୭୮ କୋଟି ଟଙ୍କା ପ୍ରଦାନ କରାଯିବ। ସ୍ପେକ୍ଟ୍ରମ ନିଲାମ ସର୍ତାବଳୀ ଅନୁଯାୟୀ ସ୍ପେକ୍ଟ୍ରମ ବାବଦ ଦେୟ ସୁଧ ସମେତ ୨୦ଟି ସମାନ ବାର୍ଷିକ କିସ୍ତିରେ ଦାଖଲ କରିବାକୁ ହେବ।
ଏହି ସ୍ପେକ୍ଟ୍ରମ ବ୍ୟବହାର ଅଧିକାର ହାସଲ ଦ୍ୱାରା ଜିଓ ବିଶ୍ୱର ସର୍ବାଧୁନିକ ୫ଜି ନେଟୱର୍କ ନିର୍ମାଣ ଦିଗରେ ସମର୍ଥ ହେବ ଏବଂ ଓୟାରଲେସ୍ ବ୍ରଡବ୍ୟାଣ୍ଡ୍ ସଂଯୋଗୀକରଣ କ୍ଷେତ୍ରରେ ଭାରତର ବିଶ୍ୱସ୍ତରୀୟ ନେତୃତ୍ୱ ସ୍ଥାନକୁ ଅଧିକ ମଜଭୁତ କରିବ। ଜିଓର ୫ଜି ନେଟୱର୍କ ପରବର୍ତୀ ପିଢିର ଡିଜିଟାଲ ସଲ୍ୟୁସନ୍ସକୁ ସମର୍ଥ କରାଇବ ଯାହା ଏକ ୫ ଟ୍ରିଲିଅନ ଆମେରିକୀୟ ଡଲାର ଅର୍ଥନୀତିରେ ପରିଣତ ହେବାକୁ ଭାରତର ଏଆଇ-ପରିଚାଳିତ ଅଭିଯାନକୁ ତ୍ୱରାନ୍ୱିତ କରିବ।
ଜିଓ ଲୋ-ବ୍ୟାଣ୍ଡ୍, ମିଡ୍-ବ୍ୟାଣ୍ଡ୍ ଏବଂ ଏମଏମ୍ୱେଭ ସ୍ପେକ୍ଟ୍ରମର ଏକ ଅନନ୍ୟ ସମ୍ମିଶ୍ରଣ ଅଧିଗ୍ରହଣ କରିଛି, ଯାହା ଏହାର ପରିବ୍ୟାପ୍ତ ଫାଇବର ନେଟୱର୍କ ଏବଂ ସ୍ୱଦେଶୀ ପ୍ରଯୁକ୍ତି ପ୍ଲାଟଫର୍ମ ସହିତ ମିଶି ସର୍ବତ୍ର ୫ଜି ସେବା ସମସ୍ତଙ୍କ ପାଇଁ (ଉପଭୋକ୍ତା ଓ ଉଦ୍ୟୋଗ) ଯୋଗାଇଦେବ। ଏହାର ଅତୁଳନୀୟ ୭୦୦ ମେଗାହର୍ଜ ସ୍ପେକ୍ଟ୍ରମ ଉପସ୍ଥିତି ସହିତ ଜିଓ ଦ୍ରୁତ ଗତି, କମ୍ ଲାଟେନ୍ସି ଏବଂ ବ୍ୟାପକ ସଂଯୋଗ ସହିତ ସର୍ବଭାରତୀୟ ସ୍ତରରେ ବାସ୍ତବ ୫ଜି ସେବା ଯୋଗାଇବାରେ ଏକମାତ୍ର ଅପରେଟର ହେବ।
ଏହି ଅଧିଗ୍ରହଣ ଜରିଆରେ ଜିଓ ମାଲିକାନାରେ ଥିବା ମୋଟ ସ୍ପେକ୍ଟ୍ରମ ଉପସ୍ଥିତି ଉଲ୍ଲେଖନୀୟ ଭାବରେ ବୃଦ୍ଧିପାଇ ୨୬,୭୭୨ ମେଗାହର୍ଜ ହୋଇଛି , ଯାହା ଭାରତରେ ସର୍ବାଧିକ। ଶ୍ରୀ ଆକାଶ ଏମ୍ ଅମ୍ବାନି, ଅଧ୍ୟକ୍ଷ, ରିଲାଏନ୍ସ ଜିଓ ଇନ୍ଫୋକମ୍ କହିଛନ୍ତି, “ଆମେ ସର୍ବଦା ବିଶ୍ୱାସ କରିଆସିଛୁ ଯେ ଯୁଗାନ୍ତକାରୀ ପ୍ରଯୁକ୍ତିର ସାମର୍ଥ୍ୟକୁ ଲାଗୁ କରାଗଲେ ଭାରତ ବିଶ୍ୱରେ ଏକ ଅଗ୍ରଣୀ ଅର୍ଥନୈତିକ ଶକ୍ତି ହୋଇପାରିବ।
ଏହି ସୁଦୂରପ୍ରସାରୀ ଲକ୍ଷ୍ୟ ଏବଂ ଏକନିଷ୍ଠତା ଜିଓକୁ ଜନ୍ମ ଦେଇଛି। ଜିଓର ୪ଜି ସେବାର ବେଗ, ପରିମାଣ ଏବଂ ସାମାଜିକ ପ୍ରଭାବ ବିଶ୍ୱର ଯେକୌଣସି ସ୍ଥାନ ତୁଳନାରେ ଅତୁଳନୀୟ। ସମ୍ପ୍ରତି ଏକ ବୃହତର ଲକ୍ଷ୍ୟ ଏବଂ ମଜଭୁତ ନିର୍ଣ୍ଣୟ ସହିତ ଜିଓ ୫ଜି ଯୁଗକୁ ଭାରତ ଅଗ୍ରସର ହେବା ଦିଗରେ ନେତୃତ୍ୱ ନେବାକୁ ଯାଉଛି।
ସର୍ବଭାରତୀୟ ସ୍ତରରେ ୫ଜି ସେବା ପ୍ରଚଳନ ସହିତ ଆମେ ‘ଆଜାଦି କା ଅମୃତ ମହୋତ୍ସବ’ ପାଳନ କରିବୁ। ଜିଓ ବିଶ୍ୱ ଶ୍ରେଣୀର, ସୁଲଭ ୫ଜି ଏବଂ ୫ଜି ସମର୍ଥିତ ସେବାଗୁଡିକ ପ୍ରଚଳନ କରିବାକୁ ପ୍ରତିବଦ୍ଧ ରହିଛି। ଆମେ ସେବା, ପ୍ଲାଟଫର୍ମ ଏବଂ ସମାଧାନ ଯୋଗାଇଦେବୁ ଯାହା ଭାରତର ଡିଜିଟାଲ ବିପ୍ଳବ, ବିଶେଷକରି ଶିକ୍ଷା, ସ୍ୱାସ୍ଥ୍ୟସେବା, କୃଷି, ମାନୁଫାକ୍ଚରିଂ ଏବଂ ଇ-ପ୍ରଶାସନ ଆଦି ଭଳି ଗୁରୁତ୍ୱପୂର୍ଣ୍ଣ କ୍ଷେତ୍ରକୁ ତ୍ୱରାନ୍ୱିତ କରିବ। ଏଥିସହ ପ୍ରଧାନମନ୍ତ୍ରୀଙ୍କ ଡିଜିଟାଲ ଭାରତ ଅଭିଯାନ ପ୍ରତି ଆଉ ଏକ ଗର୍ବ କଲାଭଳି ଅବଦାନ ରଖିବ।”
ପରିବର୍ଦ୍ଧିତ ନେଟୱର୍କ କ୍ଷମତା ଜିଓ ନେଟୱର୍କରେ ଦ୍ରୁତ ଅଭିବୃଦ୍ଧିଶୀଳ ଡାଟା ଚାହିଦା ପୂରଣ କରିବ ଯାହା ସମ୍ପ୍ରତି ବିଶ୍ୱରେ ଅନ୍ୟତମ ସର୍ବାଧିକ ଓୟାରଲେସ୍ ଡାଟା ଟ୍ରାଫିକ ପରିବହନ କରୁଛି। ଜିଓର ବ୍ୟାପକ ଫାଇବର-ଭିତିକ ସେବା ସହିତ ଏବେ ଓୟାରଲେସ୍ ବାସଗୃହକୁ ସେବାଗୁଡିକ ସମ୍ମିଳିତ ହେବାଦ୍ୱାରା ତାହା ବାସଗୃହକୁ ବ୍ରଡବ୍ୟାଣ୍ଡ୍ ସେବାସମୂହ କ୍ଷେତ୍ରରେ ଭାରତର ନେତୃତ୍ୱରେ ନିର୍ଣ୍ଣାୟକ ଭୂମିକା ନେବ, ଠିକ୍ ଯେମିତି ଜିଓ ମୋବିଲିଟି ସେବା କ୍ଷେତ୍ରରେ ଭାରତକୁ ବିଶ୍ୱସ୍ତରରେ ନେତୃତ୍ୱ ସ୍ଥାନକୁ ନେଇଥିଲା।
ମାତ୍ର ଛଅବର୍ଷ ତଳେ ପ୍ରଚଳନ କରାଯାଇଥିବା ଜିଓ ଅତି ସ୍ୱଳ୍ପ ସମୟ ମଧ୍ୟରେ ତାହାର ସର୍ବବୃହତ ୪ଜି ନେଟୱର୍କ ପ୍ରଚଳନ ଅବଧିରେ ଏକାଧିକ ବିଶ୍ୱ ରେକର୍ଡ ସ୍ଥାପନ କରିଥିଲା। ଜିଓର ୪ଜି ନେଟୱର୍କ ସର୍ବୋତମ ମାନ ତଥା ସବୁଠାରୁ ସୁଲଭ ଡିଜିଟାଲ ସେବା ୪୦୦ ନିୟୁତରୁ ଅଧିକ ନିଷ୍ଠାବାନ ଏବଂ ଆନନ୍ଦିତ ଗ୍ରାହକଙ୍କୁ ଯୋଗାଇ ଦେଉଛି। ଜିଓ ସମ୍ପ୍ରତି ୫ଜି ସେବା ସହିତ ଏହି ସ୍ତର ଅଧିକ ଉପରକୁ ନେବ।
ଭବିଷ୍ୟତର ପ୍ରଯୁକ୍ତିଗୁଡିକୁ ଗ୍ରହଣ କରିବା ଏବଂ ଭାରତ ତଥା ଭାରତୀୟ ବ୍ୟବସାୟ ଜଗତର ଲାଭ ନିମନ୍ତେ ସେଗୁଡିକର ପୂର୍ଣ୍ଣ ସାମର୍ଥ୍ୟକୁ ଉପଯୋଗ କରିବା କ୍ଷେତ୍ରରେ ଜିଓ ସମ୍ମୁଖ ଭାଗରେ ରହିଛି। ଭାରତ ୫ଜି ଯୁଗକୁ ପ୍ରବେଶ କରୁଥିବା ଅବସରରେ ଜିଓ ଏହାର ଦୂରଦୃଷ୍ଟିସମ୍ପନ୍ନ ପ୍ରତିବଦ୍ଧତାକୁ ପୁନଃ ପ୍ରଦର୍ଶିତ କରିଛି।
ଜିଓ ଯେଭଳି ଭାରତ ଓ ଇଣ୍ଡିଆ ମଧ୍ୟରେ ରହିଥବା ତାରତମ୍ୟକୁ ଲିଭାଇ ଦେଇଥିଲା ଏବଂ ପ୍ରତ୍ୟେକ ଭାରତୀୟଙ୍କୁ ସର୍ବୋତମ ସଂଯୋଗ ବିଶ୍ୱସ୍ତରରେ ସର୍ବାଧିକ ସୁଲମ ମୂଲ୍ୟରେ ଯୋଗାଇ ଦେଇଥିଲା, ଜିଓ ୫ଜି ସେହିଭଳି ପ୍ରତ୍ୟେକ ଭାରତୀୟ ଏହି ସର୍ବାଧିକ ରୂପାନ୍ତରଣକ୍ଷମ ଡିଜିଟାଲ ସେବା ଓ ପ୍ଲାଟଫର୍ମର ସୁଯୋଗ ବିଶ୍ୱର ଯେକୌଣସି ସ୍ଥାନରେ ଯେଭଳି ନେଇପାରିବେ, ତାହା ସୁନିଶ୍ଚିତ କରିବ।
ଜିଓର ୫ଜି ସମାଧାନଗୁଡିକ ଭାରତରେ ପ୍ରସ୍ତୁତ, ଭାରତୀୟଙ୍କ ଦ୍ୱାରା ପ୍ରସ୍ତୁତ ଏବଂ ପ୍ରତ୍ୟେକ ଭାରତୀୟଙ୍କ ଆବଶ୍ୟକତା ପୂରଣ ନିମନ୍ତେ ପୂର୍ଣ୍ଣ ଉପଯୋଗୀ । ଜିଓ ସର୍ବନିମ୍ନ ସମୟ ମଧ୍ୟରେ ୫ଜି ସେବା ପ୍ରଚଳନ ପାଇଁ ପୂର୍ଣ୍ଣ ପ୍ରସ୍ତୁତ କାରଣ ଏହାର ରାଷ୍ଟ୍ରବ୍ୟାପୀ ଫାଇବର ଉପସ୍ଥିତି, ପରମ୍ପରାଗତ ଭିତିଭୂମି ସମସ୍ୟା ନଥିବା ପୂର୍ଣ୍ଣ ଆଇପିି ନେଟୱର୍କ, ସ୍ୱଦେଶୀ ୫ଜି ଷ୍ଟାକ୍ ଏବଂ ସମଗ୍ର ପ୍ରଯୁକ୍ତି ପରିବ୍ୟବସ୍ଥାରେ ମଜଭୁତ ବିଶ୍ୱସ୍ତରୀୟ ସହଭାଗିତା ରହିଛି।
ଟୋକିଓ : ସମଗ୍ର ବିଶ୍ବର ଅଧିକାଂଶ ରାଷ୍ଟ୍ରରେ ବର୍ତ୍ତମାନ 5ଜି ଲଞ୍ଚ ହୋଇ ନଥିବା ବେଳେ ପ୍ରଥମ ଦେଶ ଭାବରେ 6ଜି ଲଞ୍ଚ କରିବାକୁ ଯାଉଛି ଜାପାନ । ଆସନ୍ତା 2030 ମସିହାରେ ଜାପାନ 6ଜି ଲଞ୍ଚ କରିବାକୁ ଯାଉଥିବା ନେଇ ଜାପାନ ସରକାରଙ୍କ ପକ୍ଷରୁ ମତ ଦିଆଯାଇଛି।
5ଜିର ସ୍ପିଡ୍ ଅପେକ୍ଷା ଏହାର ସ୍ପିଡ୍ 10 ଗୁଣା ଅଧିକ ରହିବ ବୋଲି ଜାପାନର ସୂଚନା ଓ ପ୍ରସାରଣ ମନ୍ତ୍ରୀ ଟାକାଓ ସାନାଏ ମତ ଦେଇଛନ୍ତି । 6ଜି ଇଣ୍ଟରନେଟ୍ ସେବା ପାଇଁ ବୈଷୟିକ କୌଶଳ ନିମନ୍ତେ ଜାପାନ ସରକାର ଏନ୍ଟିଟି ଏବଂ ତୋଷିବା ସହିତ ଚୁକ୍ତି କରିଛନ୍ତି । 6ଜି ଇଣ୍ଟରନଟ ସେବା ପାଇଁ ଜାପାନ ସରକାର 7 ବିଲିୟନ୍ ଡଲାରର ବଜେଟ୍ ସ୍ଥିର କରିଛନ୍ତି ।
ମୁମ୍ବାଇ: ଚଳିତ ଆର୍ଥିକ ବର୍ଷ (୨୦୨୧-୨୨) ର ଦ୍ୱିତୀୟ ତ୍ରୟମାସରେ (ଜୁଲାଇ-ସେପ୍ଟେମ୍ବର) ଜିଓ ପ୍ଲାଟଫର୍ମସ୍ର ନିଟ୍ ଲାଭ ୨୩.୫ ପ୍ରତିଶତ ବୃଦ୍ଧି ପାଇ ୩,୭୨୮ କୋଟି ଟଙ୍କା ହୋଇଛି ବୋଲି ରିଲାଏନ୍ସ ଇଣ୍ଡଷ୍ଟ୍ରିଜ୍ ପକ୍ଷରୁ ଘୋଷଣା କରାଯାଇଛି ।
୨୦୨୧ର ଜୁଲାଇ-ସେପ୍ଟେମ୍ବର ତ୍ରୟମାସରେ ଜିଓ ପ୍ଲାଟଫର୍ମସ୍ର ମୋଟ ରାଜସ୍ୱ ୧୫.୨ ପ୍ରତିଶତ ବୃଦ୍ଧି ପାଇ ୨୩,୨୨୨ କୋଟି ଟଙ୍କା ହୋଇଥିବା ରିଲାଏନ୍ସ ଇଣ୍ଡଷ୍ଟ୍ରିଜ୍ ପକ୍ଷରୁ କୁହାଯାଇଛି । ଏହି ଅବଧିରେ କମ୍ପାନୀର ଗ୍ରାହକ ପ୍ରତି ରାଜସ୍ୱ ୩.୭ ପ୍ରତିଶତ ବୃଦ୍ଧି ପାଇ ଗ୍ରାହକ ପିଛା ମାସିକ ୧୪୩.୬ ଟଙ୍କାରେ ପହଁଚିଛି । ଏହି ତ୍ରୟମାସରେ ଜିଓ ନେଟ୍ୱର୍କରେ ଗ୍ରାହକ ପିଛା ମାସିକ ହାରାହାରି ଡାଟା ବ୍ୟବହାର ୧୭.୬ ଜିବିକୁ ବୃଦ୍ଧି ପାଇଛି ।
କମ୍ପାନୀ ପକ୍ଷରୁ ବିଭିନ୍ନ ସ୍ଥାନରେ ୫ଜି କ୍ଷେତ୍ରସ୍ତରୀୟ ପରୀକ୍ଷଣ ଆରମ୍ଭ ହୋଇଥିବା ପ୍ରକାଶ କରାଯାଇଛି । ସେହିଭଳି ଦୀପାବଳୀ ଉତ୍ସବ ସମୟରେ ଜିଓଫୋନ୍ ନେକ୍ସଟ୍ କୁ ବ୍ୟାପକ ଭାବରେ ଉପଲବ୍ଧ କରାଇବା ପାଇଁ ଜିଓ ଓ ଗୁଗୁଲ୍ ମିଳିତ ଭାବରେ କାର୍ଯ୍ୟ କରୁଥିବା କମ୍ପାନୀ ପକ୍ଷରୁ ସୂଚନା ଦିଆଯାଇଛି ।
ସୂଚନାଯୋଗ୍ୟ ଯେ ଜିଓ ପ୍ଲାଟଫର୍ମସ୍ ହେଉଛି ରିଲାଏନ୍ସ ଇଣ୍ଡଷ୍ଟ୍ରିଜ୍ ଲିମିଟେଡ୍ (ଆର୍ଆଇଏଲ୍)ର ଏକ ସଂସ୍ଥା ଯାହା ଅଧୀନରେ ଭାରତର ସର୍ବବୃହତ ଟେଲିକମ୍ ସଂସ୍ଥା ଜିଓ ଓ ଆପ୍ଗୁଡ଼ିକ ରହିଛି ।