ସୀତାରାମ ଅଗ୍ରୱାଲ
ଚିଲିକା: ଦିନ ମଜୁରିଆ ଉପରେ ପରିବାର ଭାର ସତେ ଯେମିତି ବୋଝ ଉପରେ ନଳିତା ବିଡା ସଦୃଶ। ସୂଚନା ମୁତାବକ ଖୋର୍ଦ୍ଧା ଜିଲ୍ଲା ଚିଲିକା ବ୍ଲକ୍ ଅନ୍ତର୍ଗତ ବଉଳାବନ୍ଧ ପଞ୍ଚାୟତ ଗୋଡ଼ି ସାହିରେ ବସବାସ କରୁଥିବା ଭାସ୍କର ପୃଷ୍ଟିଙ୍କ ପତ୍ନୀ ପ୍ରଫୁଲୀ ପୃଷ୍ଟି ଆଜକୁ ଦୀର୍ଘ ୮ ବର୍ଷ ଧରି ଟ୍ୟୁମର ରୋଗରେ ପୀଡ଼ିତ ଅଛନ୍ତି। ପୁଅ, ବୋହୂ,୨ ନାତୁଣୀ ଓ ଗୋଟିଏ ନାତିଙ୍କୁ ନେଇ ପରିବାରରେ ୬ ଜଣ ସଦସ୍ୟ। ପୁରା ପରିବାର ଭରସା କରୁଛି ଏକ ମାତ୍ର ରୋଜ ଗାରିଆ ପୁଅ ଉପରେ। ବାପ ଛେଉଣ୍ଡ ପୁଅ ପେସାରେ ଜଣେ ଫେରି ବେପାରୀ। କେତେବେଳେ ଦୈନିକ ୧୦୦ ଟଙ୍କା ବିକନ୍ତି ତ ଆଉ କେତେବେଳେ ୨୦୦ ଟଙ୍କା। ମାତ୍ର ଚିକିତ୍ସା ପାଇଁ ଘର ଖଣ୍ଡିକ ମଧ୍ୟ କେଇଟା ଟଙ୍କା ପାଇଁ ଦାଣ୍ଡରେ ବନ୍ଧା ପଡିଛି।
ତଥାପି ନିଜର ଉଦ୍ୟମ ବଳରେ ପରିବାରବର୍ଗଙ୍କ ଭରଣ ପୋଷଣ କରିବା ସହ ଯାହା ଅର୍ଥ ବଳକା ହୁଏ ମା’ ର ଚିକିତ୍ସା ପାଇଁ ଖର୍ଚ୍ଚ କରନ୍ତି। କିନ୍ତୁ ଆଜିର ମହାଙ୍ଗା ଦୁନିଆରେ ଏସବୁ ସମ୍ଭବପର ନ ହେବାରୁ ବହୁ ଦୁର୍ଦ୍ଦିନରେ କାଳାତିପାତ କରୁଛନ୍ତି। ଏ ଖବର ସୋସିଆଲ ମିଡିଆରେ ଭାଇରଲ ହେବା ପରେ ‘ଦ ବ୍ଲଡ଼ ଡୋନର୍ସ ଓଡ଼ିଶା’ ର ସଭାପତି ରଞ୍ଜନ ମହାପାତ୍ର, ନୟାଗଡ଼ ଜିଲ୍ଲା ସଂଯୋଜକ ବିରେନ୍ଦ୍ର ସାହୁ, ସମାଜ ସେବୀ ପ୍ରମୋଦ କୁମାର୍ ସ୍ବାଇଁ, ସୁରେଶ ଦାସ, ଶାଳିଆ ପ୍ରେସ କ୍ଲବର ସଦସ୍ୟ ବୃନ୍ଦ ପ୍ରମୁଖ ପହଞ୍ଚି ବୃଦ୍ଧ ମା’ ଙ୍କୁ ଆଶ୍ଵାସନା ଦେବା ସହିତ କିଛି ଆର୍ଥିକ ସହାୟତା ପ୍ରଦାନ କରିଥିଲେ ଏବଂ ଏଥି ସହିତ ବୃଦ୍ଧ ମା’ ଙ୍କ ଚିକିତ୍ସା କରାଇବାର ପ୍ରତିଶୃତି ମଧ୍ୟ ଦେଇଥିଲେ।
ଏଥି ସହିତ ରାଜ୍ୟ ସରକାରଙ୍କ ପକ୍ଷରୁ ସହାୟତା ସହିତ ସମାଜସେବୀ ଭାଇ ଭଉଣୀ ମାନଙ୍କୁ କିଛି କିଛି ସହଯୋଗର ହାତ ବଢ଼ାଇବାପାଇଁ ଦୃଷ୍ଟି ଆକର୍ଷଣ କରିଥିଲେ। ଯାହାକି ପ୍ରଫୁଲୀ ପୃଷ୍ଟିଙ୍କ ପୁଅ ଦୀପ ରଞ୍ଜନ ପୃଷ୍ଟି କିଛି ସରକାରୀ ସାହାର୍ଯ୍ୟ ମିଳିଲେ ମୁଁ ମୋର ବୋଉଙ୍କ ଚିକିତ୍ସା କରାଇପାଇବି ବୋଲି କୋହଭରା କଣ୍ଠରେ କହିଛନ୍ତି।
ତେବେ ନୂତନ ସହୃଦୟ ଖୋର୍ଦ୍ଧା ଜିଲ୍ଲାପାଳ ସଂଗ୍ରାମ କେଶରୀ ମହାପାତ୍ର ଜିଲ୍ଲାର ଏହିପରି ଏକାଧିକ ରୋଗୀଙ୍କ ସରକାରୀ ଚିକିତ୍ସା କରାଇଥିବାର ଖବର ପାଇ ପୁଅ ଦୀପ ରଞ୍ଜନ ମଧ୍ୟ ତାଙ୍କ ଗରିବ ମା’ ର ଚିକିତ୍ସା ଜିଲ୍ଲାପାଳ କରାଇବେ ବୋଲି ଅଶା ରଖିଛନ୍ତି।