ଭୁବନେଶ୍ୱର: ସରଦେଇପୁର-ବାଲିପାଟଣା ପୂର୍ତ୍ତ ବିଭାଗ ମୁଖ୍ୟ ରାସ୍ତାର ପୁରଣପ୍ରଧାନସ୍ଥିତ ମଞ୍ଜରୀ ଦେବୀ କଲେଜ ଅଫ ନର୍ସିଂ ଏବଂ କ୍ୟାପିଟାଲ ଏକାଡ଼େମୀ ଅଫ ନର୍ସିଂ କଲେଜ ପରିସରରେ ଆନ୍ତର୍ଜାତୀୟ ମହିଳା ଦିବସ ପାଳିତ ହୋଇଯାଇଛି। ଏହି ପରିପ୍ରେକ୍ଷୀରେ ଉଭୟ ଶିକ୍ଷାନୁଷ୍ଠାନର ଛାତ୍ରଛାତ୍ରୀମାନଙ୍କ କଲେଜ ପରିସରରୁ ଏକ ପଦଯାତ୍ରା ବାହାରି ଉତ୍ତରାଛକ ପର୍ଯ୍ୟନ୍ତ ଯାଇଥିଲେ। ଉକ୍ତ ଶୋଭାଯାତ୍ରାରେ ଛାତ୍ରଛାତ୍ରୀମାନେ ହାତରେ ପ୍ଲାକାର୍ଡ଼ ଧରି ମହିଳା ସଶକ୍ତିକରଣ ନେଇ ବିଭିନ୍ନ ସ୍ଲୋଗାନ ଦେଇଥିଲେ। ମହିଳାମାନଙ୍କ ଶିକ୍ଷା, ସ୍ୱାସ୍ଥ୍ୟ ଏବଂ ସୁରକ୍ଷା, ନିରାପତ୍ତା ନେଇ ସଚେତନତା ବାର୍ତ୍ତା ପ୍ରଚାର କରିଥିଲେ।
ପ୍ରାରମ୍ଭରେ ଉଭୟ କଲେଜର ପ୍ରତିଷ୍ଠାତା ତଥା ସମ୍ପାଦକ ଶରତ ଚନ୍ଦ୍ର ବିଶ୍ୱାଳ ଆନୁଷ୍ଠାନିକ ଭାବେ ପ୍ରଦୀପ ପ୍ରଜ୍ଜ୍ୱଳନ କରିବା ସହ ପତାକା ହଲାଇ କାର୍ଯ୍ୟକ୍ରମକୁ ଉଦ୍ଘାଟନ କରିଥିଲେ। ଉପାଧ୍ୟକ୍ଷା ଜ୍ୟୋତ୍ସ୍ନା ଦାସ, ମଞ୍ଜରୀ ଦେବୀ କଲେଜର ଅଧ୍ୟକ୍ଷା ଡ. ସି. ରେବତୀ, କ୍ୟାପିଟାଲ ଏକାଡ଼େମୀ ଅଫ ନର୍ସିଂ କଲେଜର ଅଧ୍ୟକ୍ଷା ଲିଜା ସ୍ୱାଇଁ ଏବଂ ଡ. ବି. ସେନ୍ଥିଲ କୁମାରଙ୍କ ପ୍ରତ୍ୟକ୍ଷ ତତ୍ତ୍ୱାବଧାନରେ ଶୋଭାଯାତ୍ରା ପରିକ୍ରମା କରିଥିଲା। ପଞ୍ଚାୟତ ରୋଡ଼, ଛକ, ବାଳକାଟି ବଜାର ଦେଇ ଉତ୍ତରା ଛକ ପର୍ଯ୍ୟନ୍ତ ଶୋଭାଯାତ୍ରା ପରିକ୍ରମା କରିଥିଲା।
ଶେଷରେ କଲେଜ ପରିସରରେ ଏନେଇ ଏକ ସଭା ଅନୁଷ୍ଠିତ ହୋଇଥିଲା। ଏଥିରେ ସମାଜ ଗଠନରେ ମହିଳାମାନଙ୍କ ଗୁରୁତ୍ୱପୂର୍ଣ୍ଣ ଭୂମିକା ରହିଥିବା ନେଇ ବକ୍ତାମାନେ ମତବ୍ୟକ୍ତ କରିଥିଲେ। ଶେଷରେ କଲେଜ ପରିସରରେ ବୃକ୍ଷରୋପଣ କରାଯାଇଥିଲା।