ଭୁବନେଶ୍ୱର: ଦିବ୍ୟ ଦିଗନ୍ତ ସାମାଜିକ ଅନୁଷ୍ଠାନର ସ୍ୱନକ୍ଷତ୍ର ଉତ୍ସବ ଆଜି ସନ୍ଧ୍ୟା ୬ ଘଟିକା ସମୟରେ ‘ଗୀତଗୋବିନ୍ଦ ସଦନ’ ସଭାଗୃହରେ ଅତି ସୁନ୍ଦର କାର୍ଯ୍ୟକ୍ରମ ମାଧ୍ୟମରେ ସମ୍ପାଦିତ ହୋଇଯାଇଛି। ମୁଖ୍ୟ ଅତିଥି ପ୍ରଫେସର (ଡ଼କ୍ଟର) ଅଶୋକ ମହାପାତ୍ର, ଅନ୍ୟ ଅତିଥି ବୃନ୍ଦ, ଅନୁଷ୍ଠାନର ଅଧ୍ୟକ୍ଷା ମମତା ବିଶ୍ୱାଳ ଓ ସହ-ପ୍ରତିଷ୍ଠାତା ଓ ସଭାପତି ଜୟ ପ୍ରକାଶ ମିଶ୍ରଙ୍କ ଦ୍ୱାରା ଜଗନ୍ନାଥଙ୍କ ପାଦପଦ୍ମରେ ଦୀପଂଜ୍ୟୋତି ବନ୍ଦନା ଗାନ ସହ ପ୍ରଦୀପ ପ୍ରଜ୍ଜ୍ୱଳନ କରଯାଇଥିଲା, ଅତିଥିମାନଙ୍କୁ ଉତ୍ତରୀୟ ଓ ନିଆରା ଢ଼ଙ୍ଗରେ ଏକ ‘କର୍ପୁର ତୁଳସୀ’ର ଚାରା ପ୍ରଦାନ ପୂର୍ବକ ସମ୍ବର୍ଦ୍ଧିତ କରାଯିବା ପରେ ସରସ୍ୱତୀ ବନ୍ଦନା ଓ ବନ୍ଦେ ଉତ୍କଳ ଜନନୀ ଗାନ ସହ ସଭାକାର୍ଯ୍ୟ ଅନୁଷ୍ଠାନିକ ଭାବେ ଆରମ୍ଭ କରାଯାଇଥିଲା। ବିଗତ ବର୍ଷମାନଙ୍କର କାର୍ଯ୍ୟବଳୀର ବିବରଣୀ ଅତିଥିମାନଙ୍କ ଦ୍ୱାରା ଉନ୍ମୋଚନ ହେବାସହ ସଭାପତି ଜୟ ପ୍ରକାଶ ମିଶ୍ର ଏହାକୁ ପାଠ କରିଥିଲେ।
ମମତା ବିଶ୍ୱାଳ ଆଗାମୀ ଦିନରେ ହେବାକୁ ଥିବା କାର୍ଯ୍ୟାବଳୀର ସୂଚନା ଦେବା ସହ ଯୋଗ, ଆକ୍ୟୁପ୍ରେସର ମାଧ୍ୟମରେ ବିନା ଔଷଧରେ ସୁସ୍ଥ ରହିବାର ଛୋଟଛୋଟ କୌଶଳ ଅତି ସୁନ୍ଦର ଭାବରେ ବୁଝାଇଥିଲେ। ନିରନ୍ତର ଭାବେ ଅନୁଷ୍ଠାନ ସହ ସମସ୍ତ କାର୍ଯ୍ୟରେ ଜଡିତ ଥିବା ବ୍ୟକ୍ତିବିଶେଷଙ୍କୁ ଅତିଥି ମାନଙ୍କ ଦ୍ୱାରା ଉତ୍ତରୀୟ ଓ ବ୍ରାହ୍ମୀ ଚାରା ଦେଇ ସମ୍ବର୍ଦ୍ଧିତ କରାଯାଇଥିଲା। ମୁଖ୍ୟ ଅତିଥି ପ୍ରଫେସର ମହାପାତ୍ର ସ୍ୱାସ୍ଥ୍ୟ ସଚେତନତା ଉପରେ ଦେଶୀୟ ଚିକିତ୍ସା ପଦ୍ଧତିରେ ସୁସ୍ଥ ରହିବାର ବାର୍ତ୍ତା ପ୍ରଦାନ କରିଥିଲେ।
ମୁଖ୍ୟବକ୍ତା ଜଗଦାନନ୍ଦ ସମାଜ ପ୍ରତି ଜଣେ ସାମାଜିକ ଅନୁଷ୍ଠାନର ପ୍ରତିବଦ୍ଧତା ବିଷୟରେ ସାରଗର୍ଭକ ତଥ୍ୟ ଓ ନିଜର କାର୍ଯ୍ୟଶୈଳୀର ବର୍ଣ୍ଣନା ସହିତ ଅତି ସରଳ ଭାବରେ ବୁଝାଇଥିଲେ।
ସମ୍ମାନିତ ଅତିଥି ଭାବେ ସୁବ୍ରତ ପାଣିଗ୍ରାହୀ ଜନସାଧାରଣଙ୍କର ଅପରିଣାମ ଦର୍ଶିତା, ଦୂରଦୃଷ୍ଟିର ଅଭାବ ହେତୁ ପରିବେଷ ଅସନ୍ତୁଳିତ ହେଉଛି ଏହା ଉପରେ ଆଲୋକପାତ କରିଥିଲେ। ଏହାକୁ ରକ୍ଷା ନ କଲେ ଆଗାମୀ ଦିନରେ ବିଶ୍ୱ ଧ୍ୱଂସ ହେବାର କିଛି ପ୍ରାମାଣିକ ତଥ୍ୟ ପ୍ରଦାନ କରିଥିଲେ।
ଔଷଧୀୟ ବୃକ୍ଷର ଓ ବିଲୁପ୍ତ ପ୍ରାୟ କିଛି ଗଛ ସଭାଗୃହର ପ୍ରବେଶ ଦ୍ୱାର ସମ୍ମୁଖରେ ରଖାଯାଇ ଏକ ଉଦ୍ୟାନ ବଗିଚା ସୃଷ୍ଟି କରାଯାଇଥିଲା ଯାହାକି ସମସ୍ତଙ୍କର କେନ୍ଦ୍ରବିନ୍ଦୁ ପାଲଟିଥିଲା। ଦିବ୍ୟ ଦିଗନ୍ତର ଏହି ପ୍ରୟାସକୁ ସମସ୍ତେ ଭୂୟସୀ ପ୍ରଶଂସା କରିଥିଲେ ଓ ସମସ୍ତେ ନିଜ ନିଜ ବାଡିରେ କିଛିକିଛି ଔଷଧିୟ ଚାରା ରୋପଣର ସଂକଳ୍ପ ନେଇଥିଲେ । ପରିଶେଷରେ ଅନୁଷ୍ଠାନର ଉପଦେଷ୍ଟା ଶ୍ରୀଯୁକ୍ତ ସନ୍ତୋଷ କୁମାର ମହାପାତ୍ର ଧନ୍ୟବାଦ ଅର୍ପଣ କରିଥିଲେ।