ବାଣପୁର (ସୀତାରାମ ଅଗ୍ରୱାଲ): ଆଜି ପୂର୍ବାହ୍ନରେ ଖୋର୍ଦ୍ଧା ଜିଲ୍ଲା ବାଣପୁର ପଞ୍ଚାୟତ ସମିତି ପରିସରରେ ସରକାରଙ୍କ ନିର୍ଦ୍ଦେଶକ୍ରମେ ମିଶନ ଶକ୍ତି ସୁଧ ଛାଡ଼ ମେଳା ଅନୁଷ୍ଠିତ ହୋଇଯାଇଛି। ଏଥିରେ ଅତିଥି ଭାବେ ଜିଲ୍ଲାପରିଷଦ ଉପାଧ୍ୟକ୍ଷ, ବାଣପୁର ଏନଏସି ଅଧ୍ୟକ୍ଷ, ଉପାଧ୍ୟକ୍ଷା ଆଦି ଯୋଗ ଦେଇଥିବା ବେଳେ ମହିଳା ସ୍ୱୟଂ ସହାୟକ ବ୍ଲକ ସଭାନେତ୍ରୀ କବିତା ରାଣୀ ମହାପାତ୍ର ଓ ସମ୍ପାଦିକା ବେବିନା ତ୍ରିପାଠୀ ଉପସ୍ଥିତ ଥିଲେ।
ପ୍ରକାଶ ଥାଉକି ବ୍ୟାଙ୍କ ମାଧ୍ୟମରେ ୫ଲକ୍ଷ ଟଙ୍କା ଲେଖାଏଁ ଋଣ ନେଇଥିବା ମହିଳା ଗୋଷ୍ଠୀ ମାନଙ୍କୁ ସାରା ରାଜ୍ୟରେ ରାଜ୍ୟ ସରକାର ୨ ଲକ୍ଷ ୬୫ ହଜାର କୋଟି ଟଙ୍କାର ସୁଧ ଛାଡ଼ କରିଛନ୍ତି। ଏହି ପରିପ୍ରେକ୍ଷୀରେ ବାଣପୁର ବ୍ଲକ ଓ ଏନଏସି ର ସମୁଦାୟ ୮୨୪ ଟି ମହିଳା ଗୋଷ୍ଠୀଙ୍କୁ ୬୦ ଲକ୍ଷ ୬୫ ହଜାର ୪୨୮ଟଙ୍କାର ସୁଧ ଛାଡ଼ କରାଯାଇଛି।
ମହିଳାମାନଙ୍କୁ ଉତ୍ସାହ କରିବା ଲକ୍ଷ୍ୟରେ ଅନୁଷ୍ଠିତ ସୁଧ ଛାଡ଼ ମେଳାରେ ସବୁଠାରୁ ଅଧିକ ସୁଧ ଛାଡ଼ ପାଇଥିବା ୫୦ଟି ମହିଳା ଗୋଷ୍ଠୀଙ୍କୁ ଅତିଥି ମାନେ ଡମୀ ଚେକ ପ୍ରଦାନ କରିଥିଲେ। ସେମାନଙ୍କ ମଧ୍ୟରୁ ଆୟତପୁର ଗ୍ରାମପଞ୍ଚାୟତର ବେଲେଡ଼ିହି ଗ୍ରାମର ସ୍ୱାଭିମାନ ସ୍ୱୟଂ ସହାୟକ ଗୋଷ୍ଠୀ ସବୁଠାରୁ ଅଧିକ ୩୮୦୨୫ ଟଙ୍କାର ସୁଧ ଛାଡ଼ ପାଇଥିବା ଜଣାପଡିଛି।
ଉକ୍ତ ମେଳାରେ ସମସ୍ତ ସିଆରପି, ଏମବିକେ, ପଂଚାୟତ ସଭାନେତ୍ରୀଙ୍କ ସହ ଛାଡ଼ ପାଇଥିବା ମହିଳା ଗୋଷ୍ଠୀ ମାନଙ୍କର ପ୍ରାୟ ୫୦୦ରୁ ଅଧିକ ମା’ମାନେ ଉପସ୍ଥିତ ଥିଲେ। ଏ ସମସ୍ତ କାର୍ଯ୍ୟକୁ ବିପିଏମ ଶିବ ପ୍ରସାଦ ଜାଲି ଓ ବିପିସି ରଶ୍ମିତା ଇଦ୍ରଜିତ ପରିଚାଳନା କରିଥିଲେ।
