ବାଣପୁର (ସୀତାରାମ ଅଗ୍ରୱାଲ): ଖୋର୍ଦ୍ଧା ଜିଲ୍ଲା ବାଣପୁରସ୍ଥିତ ଏକ ମାତ୍ର ୟୁକୋ ବ୍ୟାଙ୍କ ଏଟିଏମ ଟି ଦୀର୍ଘଦିନ ଧରି ଅଚଳ ହୋଇପଡିଛି। ଫଳରେ ଜନସାଧାରଣ ମାନେ ନାହିଁନଥିବା ଅସୁବିଧାର ସମ୍ମୁଖୀନ ହେଉଛନ୍ତି। ଉକ୍ତ ବ୍ୟାଙ୍କରେ ବିଶେଷତଃ ସରକାରୀ କାରବାର ବହୁଳ ଭାବରେ ହେଉଥିବାବେଳେ ବ୍ୟବସାୟିକ ଅନୁଷ୍ଠାନ ତଥା ମହାବିଦ୍ୟାଳୟର ଛାତ୍ରଛାତ୍ରୀ ମଧ୍ୟ ବର୍ଷତମାମ କାରବାର କରିଥାନ୍ତି। କିନ୍ତୁ ବ୍ୟାଙ୍କ ପରିଧି ମଧ୍ୟରେ ଥିବା ଏଟିଏମ କେନ୍ଦ୍ର ବର୍ଷରେ ଏକାଧିକ ଦିନ ଅଚଳ ରହିଥାଏ।
ବର୍ତ୍ତମାନ ଦେଖିବାକୁ ମିଳିଛି ଦୀର୍ଘ ଦିନ ହେବ ଏହାକୁ ସମ୍ପୂର୍ଣ୍ଣ ବନ୍ଦ କରିଦିଆଯାଇଛି। ଏଟିଏମ କେନ୍ଦ୍ର ସଟରରେ ତାଲା ଝୁଲୁଛି। ଫଳରେ ବହୁ ବ୍ୟାଙ୍କ ଗ୍ରାହକ ହଇରାଣ ହେଉଛନ୍ତି। ବିଶେଷତଃ ଏଟିଏମ କାର୍ଡ ପିନ କୋଡ଼ ବଦଳାଇବା ଏକ ପ୍ରକାର ଅସମ୍ଭବ ହୋଇପଡିଛି।
କୌଣସି ୟୁକୋ ବ୍ୟାଙ୍କ ଏଟିଏମ କାର୍ଡ ଧାରୀ ଗ୍ରାହକ ନିଜ ପିନ କୋଡ଼ ବଦଳେଇବାକୁ ହେଲେ ଏବଂ ପିନ କୋଡ଼ ଭୁଲିଯାଇଥିଲେ ତାହାକୁ ପୁନଃ ଗ୍ରୀନ ପିନ ମାଧ୍ୟମରେ ବଦଳାଇପାରିବେ। ତେବେ ଏଥି ନିମନ୍ତେ ସେହି ଶାଖାର ୟୁକୋ ବ୍ୟାଙ୍କ ଏଟିଏମ ରେ ତାହା ସମ୍ଭବ। କିନ୍ତୁ ଦୀର୍ଘ ଦିନ ଧରି ଏଟିଏମ କେନ୍ଦ୍ର ବନ୍ଦ ରହିବାରୁ ଗ୍ରାହକ ମାନେ ନିରାଶ ହୋଇ ଘରକୁ ଫେରୁଛନ୍ତି ଏବଂ ପରୋକ୍ଷରେ କେନ୍ଦ୍ର ସରକାରଙ୍କ କ୍ୟାସଲେସ ଡିଜିଟାଲାଇଜେସନ ସୁବିଧାରୁ ବଞ୍ଚିତ ହେଉଛନ୍ତି।
ଏ ନେଇ ବାଣପୁର ୟୁକୋ ବ୍ୟାଙ୍କ ଶାଖା ପ୍ରବନ୍ଧକ ବାଉରୀବନ୍ଧୁ ବେହେରାଙ୍କୁ ପଚାରିବାରୁ ଏଟିଏମ ଟି ଖରାପ ଅଛି ଏବଂ ମେକାନିକ ପଠାଇବା ପାଇଁ ବିଭଗୀୟ ଅଧିକାରୀଙ୍କୁ ଅବଗତ କରିଥିଲେ ସୁଦ୍ଧା କେହି ମେକାନିକ ଆସୁନଥିବାର ଅସହାୟ ହୋଇ କହିଛନ୍ତି।
