ବାଣପୁର: ଖୋର୍ଦ୍ଧା ଜିଲ୍ଲା ବାଣପୁରସ୍ଥିତ ଗୋଦାବରୀଶ ମହାବିଦ୍ୟାଳୟର ମନସ୍ତତ୍ତ୍ୱ ବିଭାଗ ପକ୍ଷରୁ ଆଜି “ଫରେନ୍ସିକ୍ ମନସ୍ତତ୍ତ୍ୱ: ଅସମାପ୍ତ ସମସ୍ୟାଗୁଡ଼ିକୁ ବୁଝାନ୍ତୁ” ବିଷୟରେ ଏକ ଅନ୍ତର୍ଦୃଷ୍ଟିପୂର୍ଣ୍ଣ ସେମିନାର ଅନୁଷ୍ଠିତ ହୋଇଯାଇଅଛି। ଏହି କାର୍ଯ୍ୟକ୍ରମର ଲକ୍ଷ୍ୟ ଥିଲା ମନସ୍ତତ୍ତ୍ୱ ଏବଂ ଆଇନ ମଧ୍ୟରେ ଜଟିଳ ସମ୍ପର୍କ ଅନୁସନ୍ଧାନ କରିବା, ଅପରାଧିକ ଆଚରଣର ମନସ୍ତତ୍ତ୍ୱିକ ଦିଗ ଏବଂ ଫରେନ୍ସିକ୍ ଦ୍ୱନ୍ଦ୍ୱ ସମାଧାନରେ ଚ୍ୟାଲେଞ୍ଜ ଉପରେ ଧ୍ୟାନ କେନ୍ଦ୍ରିତ କରିବା।
ଉକ୍ତ ସେମିନାରକୁ ମହାବିଦ୍ୟାଳୟ ଅଧ୍ୟକ୍ଷ ଡକ୍ଟର ଏସ୍.ପି.ଏନ୍.ଏସ୍. ବର୍ମା ଉଦଘାଟନ କରିଥିବା ବେଳେ ମନସ୍ତତ୍ତ୍ୱ ବିଭାଗର ମୁଖ୍ୟ ସୁଜିତ କୁମାର ପାଣ୍ଡେ ଅଧ୍ୟକ୍ଷତା କରିଥିଲେ। ଏଥିରେ ମୁଖ୍ୟ ବକ୍ତା ଭାବେ ରାଜ୍ୟ ଫରେନ୍ସିକ୍ ଲାବୋରେଟୋରୀ, ସିଆଇଡି କ୍ରାଇମ୍ ବ୍ରାଞ୍ଚର ବୈଜ୍ଞାନିକ ଅଧିକାରୀ ସମ୍ପିତ ମହାନ୍ତି ଯୋଗଦେଇ ଅପରାଧ ତଦନ୍ତରେ ଫରେନ୍ସିକ୍ ମନସ୍ତତ୍ତ୍ୱର ଭୂମିକା ବିଷୟରେ ଛାତ୍ରଛାତ୍ରୀ ଙ୍କୁ ବିସ୍ତୃତ ଭାବେ ବୁଝାଇଥିଲେ। ମନୋବିଜ୍ଞାନର ଛାତ୍ରଛାତ୍ରୀମାନଙ୍କ ସହିତ ଅନ୍ୟ ବିଭାଗ ଗୁଡ଼ିକର ଛାତ୍ରଛାତ୍ରୀମାନେ ମଧ୍ୟ ଉତ୍ସାହର ସହିତ ଉକ୍ତ ସେମିନାରରେ ଅଂଶଗ୍ରହଣ କରିବା ସହ ପ୍ରଶ୍ନୋତ୍ତର କାର୍ଯ୍ୟକ୍ରମରେ ଭାଗ ନେଇଥିଲେ। ସେମିନାରକୁ କ୍ୟାପ୍ଟେନ୍ ଡକ୍ଟର ଗୁରୁ କିଶୋର ନାୟକ ଦକ୍ଷତାର ସହ ସଂଯୋଜନା କରିଥିଲେ।
ବିଭାଗର ଅନ୍ୟ ଅଧ୍ୟାପକମାନେ ପୁଲିନ୍ ବିହାରୀ ଜେନା, ଦେବସ୍ମିତା ଦାସ ମହାପାତ୍ର, ଅଜୟ କୁମାର ବେହେରା, ଡେମୋନଷ୍ଟ୍ରେଟର ସନ୍ତୋଷ କୁମାର ସାହୁ, ଦଶରଥି ରାଉଳଙ୍କ,ଡକ୍ଟର ଅରବିନ୍ଦ ନାୟକ, ହିଟଲର ବେହେରା, ଡକ୍ଟର ଋତୁସ୍ମିତା ମିଶ୍ରଙ୍କ ସମେତ ବିଭିନ୍ନ ବିଭାଗର ଅଧ୍ୟାପକ ଅଧ୍ୟାପିକା ମାନେ ଏଥିରେ ଯୋଗଦାନ କରିଥିଲେ। ପରିଶେଷରେ ଅଧ୍ୟାପକ ଅଜୟ କୁମାର ବେହେରା ଧନ୍ୟବାଦ ଅର୍ପଣ କରି କାର୍ଯ୍ୟକ୍ରମର ଏ ସଫଳତା ପାଇଁ ଆୟୋଜନ କମିଟି, ଅଧ୍ୟାପକ ସଦସ୍ୟ ଏବଂ ଛାତ୍ରଛାତ୍ରୀଙ୍କ ପ୍ରୟାସକୁ ପ୍ରଶଂସା କରିଥିଲେ।
ଏହି କାର୍ଯ୍ୟକ୍ରମ ଅଂଶଗ୍ରହଣକାରୀଙ୍କ ଶୈକ୍ଷିକ ଜ୍ଞାନକୁ କେବଳ ସମୃଦ୍ଧ କରିନଥିଲା ବରଂ ଫୋରେନସିକ୍ ମନସ୍ତତ୍ତ୍ବର ଗଭୀର ଏବଂ ଅସମାହିତ ଦିଗଗୁଡ଼ିକୁ ଅନୁସନ୍ଧାନ କରିବାକୁ ପ୍ରେରଣା ଦେଇଥିଲା।
