ବାଣପୁର: ଆଜି ଗୋଦାବରୀଶ ମହାବିଦ୍ୟାଳୟରେ ଦୁଇ ଦିନଧରି ଚାଲିଥିବା ୬୨ ତମ ବାର୍ଷିକ କ୍ରୀଡା ଉତ୍ସବ ଉଦଯାପିତ ହୋଇଯାଇଛି। ପ୍ରଥମ ଦିନ ଛାତ୍ରମାନେ ମା ଭଗବତୀ ମନ୍ଦିରରୁ ମଶାଲ ପ୍ରଜ୍ବଳିତକରି ବାଣପୁର ବଜାର ପରିକ୍ରମା କରି ମହାବିଦ୍ୟାଳୟ ପରିସରକୁ ପ୍ରବେଶ କରିଥିଲେ। ଏହାପରେ ଅଧ୍ୟକ୍ଷ ସୁରପ୍ରତାପ ନରେନ୍ଦ୍ରସିଂ ବର୍ମା ପ୍ରଜ୍ବଳିତ ମଶାଲକୁ ଅବସ୍ଥାପିତ କରି କ୍ରୀଡା ପତାକା ଉତ୍ତୋଳନ କରି କ୍ରୀଡ଼ାପ୍ରତିଯୋଗୀ ଓ ଛାତ୍ର ଛାତ୍ରୀମାନଙ୍କୁ ଶୃଙ୍ଖଳାପୂର୍ବକ କ୍ରୀଡାଉତ୍ସବ ସମ୍ପୂର୍ଣ୍ଣ କରାଇବାପାଇଁ ଶପଥ କରାଇଥିଲେ। ଏହାପରେ ମହାବିଦ୍ୟାଳୟ ପଡିଆରେ ଦୁଇଦିନଧରି ବିଭିନ୍ନ ପ୍ରକାର କ୍ରୀଡା ଅନୁଷ୍ଠିତ ହୋଇଥିଲା। ଉ
ଦଯାପନୀ ଉତ୍ସବରେ ଏନ. ଏ. ସି. ଚେୟାରମ୍ୟାନ ମିଟୁ ନାୟକ, ପୁରାତନ ଛାତ୍ରସଂଘର ସଭାପତି ଜିତେନ୍ଦ୍ର କୁମାର ଭୋଳ, ପୂର୍ବତନ ଅଧ୍ୟକ୍ଷ ବିନାୟକ ହୋତା, ଅଧ୍ୟକ୍ଷ ଶ୍ରୀଯୁକ୍ତ ବର୍ମା, ପୂର୍ବତନ କ୍ରୀଡା ଶିକ୍ଷକ ବୈରାଗୀ ଚରଣ ବଳ, ପ୍ରଶାସନିକ ଅଧିକାରୀ ଆଦିତ୍ୟ ସାରଥୀ ବେଦମତ୍ତା କ୍ରୀଡ଼ାବିତ ଛାତ୍ର ଛାତ୍ରୀମାନଙ୍କୁ କ୍ରୀଡାର ଗୁରୁତ୍ୱ ବିଷୟରେ ଆଲୋକପାତ କରିଥିଲେ।
କ୍ରୀଡା ଦାୟିତ୍ୱରେ ଥିବା ଅଧ୍ୟାପକ ପୁଲିନ ଜେନା, ଡକ୍ଟର କ୍ୟାପଟେନ ଗୁରୁକିଶୋର ନାୟକ, ଗୋଲକ କୁମାର ବେହେରା, ଉର୍ବଶୀ ସ୍ୱାଇଁ, ଅନିତା ଗୌଡ଼ ଓ ଅନ୍ୟାନ୍ୟ ଅଧ୍ୟାପକ ଅଧ୍ୟାପିକା ମାନେ କ୍ରୀଡା ପରିଚାଳନା କରିଥିଲେ। ଛାତ୍ର ଶ୍ରୀ ଓଁ ପ୍ରକାଶ ସ୍ୱାଇଁ, ଛାତ୍ରୀ କୁମାରୀ ଶ୍ରଦ୍ଧାଞ୍ଜଳି ପ୍ରଧାନ ଯୁକ୍ତ ୩ ବିଭାଗର ଚାମ୍ପିୟାନ ହୋଇଥିଲେ। ଆକାଶ ନାୟକ ଓ କୁମାରୀ ରାଲି ଜାଲି ଯୁକ୍ତ ୨ ବିଭାଗର ଚାମ୍ପିୟାନ ହୋଇଥିଲେ। ବିଜୟୀ ହୋଇଥିବା ଛାତ୍ରଛାତ୍ରୀ ମାନଙ୍କୁ ଅତିଥିମାନେ ପୁରସ୍କାର ପ୍ରଦାନ କରିଥିଲେ। ପରିଶେଷରେ ଯୁକ୍ତ ଦୁଇ ବିଭାଗର ଅଧ୍ୟକ୍ଷା ଅର୍ଚ୍ଚନା ତ୍ରିପାଠୀ ଧନ୍ୟବାଦ ଅର୍ପଣ କରିଥିଲେ।