ରମେଶ ମହାନ୍ତି
ଜଗତସିଂହପୁର : କରୋନା ସଂକ୍ରମଣକୁ ଦୃଷ୍ଟିରେ ରଖି ରାଜ୍ୟରେ ଲକ୍ ଡାଉନ୍ ଘୋଷଣା ହୋଇଥିବାରୁ ରାଜ୍ୟ ସରକାର ସାମାଜିକ ସୁରକ୍ଷା ହିତାଧିକାରୀଙ୍କୁ ଆଗାମୀ ୪ ମାସର ଏପ୍ରିଲ,ମେ,ଜୁନ୍ ଓ ଜୁଲାଇ ମାସ ପାଇଁ ଅଗ୍ରୀମ ଭତ୍ତା ପ୍ରଦାନ କରିବାକୁ ପଦକ୍ଷେପ ଗ୍ରହଣ କରିଛନ୍ତି । ଏହି ପରିପେକ୍ଷୀରେ ଜଗତସିଂହପୁର ଜିଲ୍ଲାପାଳ ସଂଗ୍ରାମ କେଶରୀ ମହାପାତ୍ର ଜିଲ୍ଲାର ସମସ୍ତ ବି.ଡି.ଓ ଏବଂ ପୌରପରିଷଦ ନିର୍ବାହୀ ଅଧିକାରୀଙ୍କୁ ସମସ୍ତ ପ୍ରତିଷେଧାତ୍ମକ ବ୍ୟବସ୍ଥା ଗ୍ରହଣ କରି ବଣ୍ଟନ କରିବାକୁ ନିର୍ଦ୍ଦଶ ଦେଇଛନ୍ତି। ଜିଲ୍ଲାରେ ମାର୍ଚ୍ଚ ୨୬ ତାରିଖ ଠାରୁ ଏହି ବଣ୍ଟନ ପ୍ରକ୍ରିୟା ଚାଲିବ। ଏଥିପାଇଁ ବି.ଡି.ଓ ମାନେ ଗାଁର ଆକ୍ସନପ୍ଲାନ୍ ପ୍ରସ୍ତୁତ କରି ପଂଚାୟତକୁ ଅବଗତ କରାଇବେ। ଏହି ଭତ୍ତା ବଣ୍ଟନ ପ୍ରକ୍ରିୟାରେ ବ୍ଲକ୍ ଅଧିକାରୀ, ପଂଚାୟତ ନିର୍ବାହୀ ଅଧିକାରୀ, ଜି.ଆର.ଏସ୍, ପଂଚାୟତ ପିଅନ, ୨ଜଣ ଅଙ୍ଗନବାଡି କର୍ମୀ ଏବଂ ଜଣେ ପୋଲିସ୍ କର୍ମଚାରୀଙ୍କୁ ନିୟୋଜିତ କରାଯାଇଛି। ଅଙ୍ଗନବାଡୀ କର୍ମୀ ହିତାଧିକାରୀଙ୍କ ମୋବାଇଲ୍ ନମ୍ବର ଏବଂ ଆଧାର ନମ୍ବର ସଂଗ୍ରହ କରିବେ। ଏହି ଭତ୍ତା ହିତାଧିକାରୀଙ୍କ ଘରକୁ ଘର ବୁଲି ବଣ୍ଟନ କରାଯିବ। ଜିଲ୍ଲାର ୮ଟି ବ୍ଲକ୍ ଓ ୨ଟି ମ୍ୟୁନିସପାଲିଟିର ଭତ୍ତା ହିତାଧିକାରୀଙ୍କ ନିମନ୍ତେ ୪ ମାସ ପାଇଁ ୨୭କୋଟି ୩୩ଲକ୍ଷ ୪୦ହଜାର ଟଙ୍କା ବଣ୍ଟନ କରାଯିବ। ଜଗତସିଂହପୁର ଜିଲ୍ଲାରେ ୪୩,୫୪୩ ଜଣ ଇନ୍ଦିରାଗାନ୍ଧୀ ଜାତୀୟ ବାର୍ଦ୍ଧକ୍ୟ ଭତ୍ତା ,୧୧,୦୯୦ ଜଣ ଇନ୍ଦିରାଗାନ୍ଧୀ ଜାତୀୟ ବିଧବା ଭତ୍ତା, ୨୦୨୯ଜଣ ଇନ୍ଦିରାଗାନ୍ଧୀ ଜାତୀୟ ଭିନ୍ନକ୍ଷମ ଭତ୍ତା ହିତାଧିକାରୀ ଓ ମଧୁବାବୁ ପେନସନ୍ ଯୋଜନାରେ ୭୭,୭୪୦ ଜଣ ହିତାଧିକାରୀଙ୍କୁ ମିଶାଇ ଜିଲ୍ଲାରେ ମୋଟ୍ ୧,୩୪,୪୦୨ ଜଣ ହିତାଧିକାରୀ ଏହି ଭତ୍ତା ପାଇବେ ବୋଲି ଜିଲ୍ଲା ସାମାଜିକ ସୁରକ୍ଷା ଅଧିକାରୀ ପବିତ୍ର ଦାସ ସୂଚନା ପ୍ରଦାନ କରିଛନ୍ତି।
