ସୀତାରାମ ଅଗ୍ରଓ୍ବାଲ
ବାଣପୁର: ବାଣପୁର ବ୍ଲକ୍ ଅନ୍ତର୍ଗତ ଭବାନୀପୁର ପଞ୍ଚାୟତର ସାହସପୁର ଗ୍ରାମରେ ମହିଳା ମାନେ ସାହସର ଅନନ୍ୟ ଉଦାହରଣ ଦେଖାଇଛନ୍ତି। ସାହସପୁରରେ ରହିଥିବା ଗତେଶ୍ବରପୁର ଆଞ୍ଚଳିକ ମଞ୍ଚର ସଦସ୍ୟା ମାନେ ଚୋରାମଦ ବେପାରୀଙ୍କୁ କାବୁ କରି ପୋଲିସ୍ ଜିମା ଦେଇଛନ୍ତି। ଦୁଇ ଜଣ ଯୁବକ ଏକ ବାଇକ୍ ଯୋଗେ ଦେଶୀମଦ ନେଇ ଯାଉଥିବା ବେଳେ ସଙ୍ଗଠନର ସଦସ୍ୟା ମାନେ ଉଭୟଙ୍କୁ ଧରିଥିଲେ। ଜଣେ ବ୍ୟକ୍ତି ଘଟଣାସ୍ଥଳରୁ ଫେରାର ହୋଇଯାଇଥିବା ବେଳେ ଅନ୍ୟଜଣଙ୍କୁ ସଦସ୍ୟା ମାନେ ପୋଲିସ୍ ଜିମା ଦେଇଛନ୍ତି। ଲକ ଡାଉନ ସମୟରେ ସାହାସପୁର ମହିଳା ମାନଙ୍କର ଏପରି ସାହସିକତାକୁ ସ୍ଥାନୀୟ ଅଞ୍ଚଳରେ ପ୍ରଶଂସା କରାଯାଇଛି। 
ସେହିପରି ବାଣପୁର ପୋଲିସ୍ ପକ୍ଷରୁ ଅନ୍ୟ ଏକ ରେଡ୍ରେ ଦେଶୀ ଚୋରାମଦ ଜବତ କରାଯିବା ସହିତ ଜଣଙ୍କୁ ଅଟକ ରଖିଛି। ବନବାସପୁରରେ ପୋଲିସ୍ ରେଡ୍ କରି ଦେଶୀ ମଦ ଜବତ କରିବା ସହିତ ଜଣଙ୍କୁ ଅଟକ ରଖିଥିବା ବେଳେ ଅନ୍ୟ ଜଣେ ଅଭିଯୁକ୍ତ ଘଟଣାସ୍ଥଳରୁ ଚମ୍ପଟ ମାରିଛନ୍ତି। ଗ୍ରାମାଞ୍ଚଳରେ ଚୋରାମଦ ବିକ୍ରି ବୃଦ୍ଧି କାରଣରୁ ଆଇଆଇସି ସଞ୍ଜୟ କୁମାର ପଟ୍ଟନାୟକଙ୍କ ନେତୃତ୍ବରେ ବାଣପୁର ପୋଲିସର ତିନୋଟି ଟିମ୍ ପୃଥକ୍ ପୃଥକ ସ୍ଥାନରେ ଚଢାଉ କରିବା ସହିତ ପ୍ରାୟ ୨୫୦ ପ୍ୟାକେଟ୍ ଜବତ କରିଛି। ଏହା ସହିତ ଶତାଧିକ ପ୍ୟାକେଟ୍ ମଦକୁ ପୋଲିସ୍ ନଷ୍ଟ କରିଦେଇଛି। ଏଏସଆଇ ଶ୍ରୀନିବାସ ପ୍ରଧାନ,ଏଏସଆଇ ବସନ୍ତ କୁମାର ପଟ୍ଟନାୟକ ଓ ଟିମ୍ ସାହାସପୁର ଏବଂ କୋଷରଡାର ବନବାସପୁର ଗ୍ରାମରେ ରେଡ୍ କରି ଦୁଇଟି ଗାଡି ଜବତ କରିଛି। ସେହିପରି ଏସ.ଆଇ ପ୍ରସନ୍ନ ଜେନା, ଏସ.ଆଇ ଦିଗବିଜୟ ବିଶ୍ୱାଳ ଓ ଟିମ ବାଲେଡିହ, ମୁକ୍ତାଦେଇପୁର, ଭୁସ୍କାପଡା ଏବଂ ଏହାର ପାର୍ଶ୍ବବର୍ତ୍ତୀ ଅଞ୍ଚଳରେ ରେଡ୍ କରିଛନ୍ତି।
ଉଲ୍ଲେଖଯୋଗ୍ୟ ଯେ କୋଷରଡା ଅଞ୍ଚଳରୁ ଏହି ଗ୍ରାମ ରାସ୍ତା ଦେଇ ଦେଶୀ ମଦର ଚୋରା ଚାଲାଣ ହେଉଥିବା ନେଇ ପୂର୍ବରୁ ପୋଲିସଙ୍କ ନିକଟରେ ଅଭିଯୋଗ ହୋଇଆସୁଥିଲା। ଯଦ୍ୱାରା ଏହି ଘଟଣାକୁ ଆଇଆଇସି ପଟ୍ଟନାୟକ ସଜ୍ଞାନକୁ ନେଇ କଡା ପଦକ୍ଷେପ ନେଉଛନ୍ତି।
ଉଲ୍ଲେଖଯୋଗ୍ୟ ଯେ, ଗତ ୧୯ ତାରିଖ (ରବିବାର) ଦିନ ବାଣପୁର ଅନ୍ତର୍ଗତ ଝିଣ୍ଟିକାପଲ୍ଲୀ ଗ୍ରାମର ଗଙ୍ଗାଧର ପରିଡାଙ୍କୁ ପୋଲିସ୍ ଦେଶୀ ମଦ ଏବଂ ଅସ୍ତ୍ର ଶସ୍ତ୍ର ସହିତ ଗିରଫ କରିଥିଲା।
